شمس مظلمة

المقدمه

#شمس_مظلمه ☉
#المقدمه

ضي الشمس دخل عيوني صوت احن انسانه فالدنيا ايدها ع خدي و توعي فيا بكل حنيه يغم التشقق و الجفاف يلي في ايدها تظل انعم يد تمشي ع خدي

صوت قيبيع الدولاب و صوت الحاجات تعزق تحت بفوضه من غييها الفوضاويه دوي ع حاجاتها

وصلني صوتها بكل حنان ... ماما هيا نوضي

انا : فتحت عيوني و ع طول خشتلهن الشمس يديت غمضتهن
ماما : حبيبتي هيا ياعمري نوضي
انا : يديت فتحت عيوني و يفعت يدي و انا و ماسكه دوبدوبي حطيته ع وجي
قمر : ماما وين الخراا مالقيتش
ماما : شوفيه فالدرج و لا البسي من اختك
قمر : ضحكت تي شحاشيرها كلهن ورديات شن بنلبس اووف اهو لقيته هيا طالعه انا
ماما : في امان الله و ديري بالك من روحك
قمر : ماتخافيش نهني

ماما : شموسي هيا نوضي عشان ندوشك بنعدي ندير الفطور للناس
انا : فتحت عيوني و قعدت انبحت فيها
ماما : هيا عشان انلبسك قفطان الاميرات مش تحبيه
انا : ضحكت وهزيت ياسي ب به

صبيت مع ماما و دوشتلي و لبست قفطان الإمييات و هوا قفطان ابيض طويل عادي بس ماما مسميته قفطان الإمييات قمعزت و هيا تخلصلي في شعري

ماما : شموسي انلمه شعرك
انا : هزيت ياسي ب لالا
ماما : باهي انا كملت بنعدي توا للشغل خليكي هنا العبي مع مينو تو نجي نبرم عليك و را تقربي غاز و لاحاجه هكي و لا هك

انا : هزيت ياسي ب اها
ماما : باست خدي سلمها بنيتي صبت البست لبس الشغاله و طلعت من الملحق

انا : قمعزت و مسك دبدوبي مينو و نحكي بصوت واطي ليش انا يعاملو فيا هكي انا نفهم مش غبيه نعيف ان الغاز غلط ماينقيبش و نعيف ان هذي غلط و هذي لا اووف مينو انا ديما محبوسه هنا ياييت نطلع

سمعت صوت دوشه صبيت ع يوشن و نشوف فيهم ينزلو في حصانات و يحطو فيهن فالحضيه

بحتت في مينو نعدو نا وياك بس تقولش لحد باهي هيا

فتحت الباب بشويه و تباوعت مافيش حد طلعت نسلس بشويه للحضييه

اسمي شمس عميي ماما تقولي 17 سنه عندي مشكله في حيف الياء ( الراء ) ساكنين في ملحق متاع القصي الكبيي ماما تشتغل غادي و نحن نقعدو بنات خدامتهم اختي قميي اكبي مني ب 3 سنين ماما قالت سميتكن قميي عشان تضوي فاليل و انتي شمس عشان تضوي ف نهااي بس كيف نضوي و انا نطلعش بيا انا مش شمس تضوي انا " شمس مظلمه " هما يقولو عليا اني مييضه بس انا مش مييضه اناا نفهم في كل شي نعيف يلي يحبني و يلي لا نحبيش نحكي الا مع مينو دبدوبي اكثي حد يفهمني و مايقوليش اني مييضه ماما احن ام فالدنيا و قميي احسن اخت هنا ثنين يحبني وااجد و انا نعييف لان قلبي يحس هكي
__________________

قمر : طلعت من الحوش و انا متجها للعمل لابسه سروال اسود و تي شرت رصاصي و جاكه جلد سوده طالقه شعري لاني مش متحجبه نشتغل في شركه عيت ال**** في بعض الاعمال غير قانونيه و طبعا لان لا في دوله و لا حكومه الشي يمشي عادي و انا و نمشي حسيت بحركه غريبه و طلعو قدامي ثلاث شباب

قمر : تنهدت ماتملش انت
فايز : انا جاي بنكسر خشمك و غرورك
قمر : قلبت عيوني بملل ماشبعتش ب اخر طريحه خذيتها جايب معاك الدجاجات هذينا
فايز : جتشوفي من الدجاج و هز راسه للثنين يلي معاه عساس يهجمو عليا
قمر : عزقت شنطتي متاع الكتفين و درت حركه بيدي تعالو تعالو قرب الاول عساس بيمسكني مسكت يده و لويتها لاه ورا ظهره و هد الثاني ضربته بكراعي ع بطنه وخر و عزقت عليه الثاني بحتت في فايز و ضحكت بهزوه قرب مني يبي يضرب طبست و رديت ضربته ع وجه بواني و مسكت يدها فصعتها لاه ورا ظهره قربت من وذنه تلم فروخك و تمشي من وجي لان مش ناقصتك فااهم و ضغطت ع يديه
فايز : ااااه
قمر : دفيته و قعدت انشوفلهم ايتلو رفعت شنطتي و مشيت من جنبه و دفيت كراعه ب كراعي و مشيت خذيت نفس و طلعت ع طريق العام نمشي و نفكر في حياتنا

اسمي قمر عمري 20 سنه من اول ما وعيت ع دنيا شفت ظلم باتي لامي و ضربه لها كرهت باتي وكرهت الحياه و قتها كان عمري ثلاث سنين و بعدها جت شمس حسيت ان الحياه ردتلي و قعد همي اني نكبر و نطلع ماما وشمس من يلي نحن فيه عند ما جا اليوم الاسود و ظلمت حيات شمس خشينا للحوش انا و امي و نشوفي في دنيا كلها دم كل مكان دم شمس ف تركينه وحاطه يديها ع وذانها و مغمضه عيونها بقوه هوا طايح ع الارض شكلا فاقد الوعي من السكير اخر شي سمعته عيطت ماما و قتها كان عمري 11 سنه و شمس 8 سنين انا نجري بين ممرات المستشفى نبي نعرف امي شن صار فيها نبي نعرف اختي شمس شن صاار فيها بعد وقت خشيت ع ماما كانت منهاره و تعيط و اانا نحاول نمسك روحي نبين اني قويه بس انا فااضيه من جوا منظر دم و هوا كيف راسه مطرطش قدامي لاكن دموعي مش راضيات ينزلن ممكن تحجرت وقتها مرن ثلاث ايام علينا كيف الجحيم و انا مازلت فالصدمه بعد ثلاث ايام امي تمالكت روحها و طلعنا ندورو ع شمس لقينها في قسم مرضى النفسيين قالو خشت حاله نفسيه و ضروري نراعوها و و قعدت شمس بالدواء انهارت ماما و انا مازلت متمالكه روحي و دموعي مش راضيات ينزلن ابدا مر شهر و شهرين و انا و امي نقعدو فالشارع و شمس فالمستشفى لان حالتها تازم بعد فتره شفنا اعلان ع شغل في قصر و سكن و وكال قلنا فرصه و جت و عدينا انا وماما و قبلو ماما للشغل و عطونا الملحق و لما عرفو بحاله شمس اهتمو بيها و بعد فتره روحت شمس من المستشفى بس يجنها نوبات و قاعده ع دواء و اذا حد عيط عليها او شافت دم تخش في حاله هستيريا و نحن قعدنا مراعينها مشن سنوات و كبرنا و المرض مشى مع شمس عارفه انها تحكي نسمع فيها تحكي مع مينو لاكن ماتحبش تحكي مع الناس قعدنا نعاملو فيها معامله طفله و ناخذوها ع قد عقلها هيا تحس بلي يبي ياذيها او لا لاكن ماما حفاظا عليها سكرت عليها فالملحق و قليل ماتطلع انا لما وصلت لعمر 18 توضفت فالشركه هذي و عشان نحمي نفسي تدربت في الملاكمه و ليا سنتين نشتغل و حاليا انا السكرتيره الخاصه للمدير و انا فاهمه شغلهم شنو و لان اكثر الاجتماعات نحظر انا مع المدير نعرف العصابات و ناس يلي جوا و حفظت اسمهم بسبب الشغل و توا نحاول بكل جهدي نطلع امي و شمس من غادي و نستقلو بي حوشنا

وصلت للشركه و خشيت

رنيم : اووو قمورتي
قمر : سلمت عليها شن جو
رنيم : والله تمام و انتي
قمر : الحمدلله وصل المدير
رنيم : لالاه و في حركه غريبه اليوم فالشركه مش عارفه شن
قمر : اهو تو نعرفو خليني نعدي ناخذ قهوه راسي بيطربق
رنيم : استني نعدي معاك

عدينا انا و رنيم و فتحت الشنطه بنطلع الجزدان مش قاعد

قمر : خبطت ع جبهتي الله يلعن الحظ ناسيته
رنيم : عادي تو نسلك عليك
قمر : تي مش هنا البطاقه جوا
رنيم : حي عليك عدي بسرعه جيبيها
قمر : تعب زح
رنيم : عدي و خلاص خير ماتعلقي في لسانهم
قمر : باهي هيا انا طالعه
رنيم : تمام

طلعت و انا نسب و نلعن في ام غبائي ليش ماشفت للشنطه
______________________

مصبي ع قزاز الدار و نشرب في قهوتي و نشوف فيهم ينزلو فالخيل رن تلفوني رفعته لقيته يزن فتحت الخط

انا : الوو
يزن : اوو حمورابي مايض بدري شن بيصير
انا : اختصر
يزن : الخيل اليوم جبناه
انا : اها نشوف فيهم ينزلو فيه يردو بالم من السا حامل
يزن : رفع راسه فالروشن و شيرلي بيده باهي تمام قلت نقولك
انا : تمام ربع سااعه و نازل
يزن : هيا وجك و سكر الخط

حطيت التلفون ع طاوله و رديت انتفرج عليهم و نشرب في قهوتي بهدوء سمعت صوت دقات الباب

تفضل ..

ياسمين : صبااحوو
انا : صباح النور و اسمها صباح الخير نسمع الدوه لمعوجه مره اخرى نهد فمك
ياسمين : ياصبح يافتاح امس كيف جيت و مليت الحوش قوانين صدق من سماك حمورابي
انا : اختصري شن تبي
ياسمين : نبيك توصلني للجامعه لان قلتلي مافيش سواقه
انا : و اختك لخرى وين
ياسمين : قالت مش ماشيه اليوم
انا : انزلي راجيني تحت تو نجي
ياسمين : تمام و عزقت بوسه فالهواه و نزلت تجري

انا : هزيت راسي و حطيت القهوه خذيت نقالي و دخاني و السلاح حطيته في خصري و نزلت كانو كلهم يفطرو

انا : سلام عليكم
رغد : و عليكم السلام و رحمت الله وبركاتو
ياسمين : مسكت ضحكتها و فنصت في رغد يلي تسمط
امير : شنو طالع توا

انا : اها بنشوف الخيل جابوه وبنطلع نحط اختك و ماشي للمزرعه نصفي حسابي معاهم
سعيده : عساس مش اختك يعني را نفس الاب
امير : بحت في امه ورد بحت فيا فوتها اليوم امس كيف وصلنا اجلها
انا : مش انا يلي يخلفو قوانين اذا سكتت اليوم يكرا يطمعو
رغد : بصوت واطي من اول ما جا و مسمعنا ع لسانا غير قوانين
ياسمين : بصوت واطي سكري فمك يعجنك هنا عندك
رغد : كنى في امير طلع حسام طيحه سوده
ياسمين : شكلا ملايا امير

انا : صبيت كان كملتي رغي انتي و ياها صبي اركبي السياره تو نجي ومشيت

سعيده : تبحت فيه جا امس و بيتحكم فالحوش و الرزق مش عليا يا حسام ياولد حور
________________________

اسمي حسام مواليد ال88 كنت وحيدامي و باتي و بعد 3 سنين امي توفت و باتي زوج سعيده فالاول معامله كويسه و بعدين انقلبت من لما جابت امير و باتي سفرني ل تونس عند عمتي غادي و عشت معاها قعدت نشوف فيهم من العطله للعطله بعد امير جابت رغد و بعدين ياسمين و بعدها بفتره توفى باتي

طبعي حاااد جدا و كل شي عندي يمشي ب قوانيني انا ف سموني حمورابي و يلي يخلف القانون يشوف الويل مني حاجه اسمها بنات منغلق عليها كليا و لا عمري تعاملت مع جنس حواء

خويا امير نفس طبعي نوعا ما بسس متساهل مع خواته واجد و انا مايمشيش معايا الجو هذا امس كيف روحت و حطيتلهم قوانين لكل شي و نشوفو اذا يمشو بيهن او لا

انا و امير نعتبرو نمشو في نفس الخط بس الفرق ان امير باسم شركه نضيفه اما انا ضاربها فالساس و علنا و داير فيها دوله لروحي ماسك سوق كلا تحت يدي و بقوانيني اكيد تقولو اني كنت في تونس امتى لحقت اندير هذا في ليبيا من انا و في تونس ماسك شغل باتي من عمري 18 سنه و ناس كلها اتعرفني و نتابع فالشغل من تونس ونجي ل ليبيا مره و مره نشوف الشغل و مهني عليه الحق لان امير ماسك اغلبه وحاليا روحت ل ليبيا للاستقرار

_____________________

انا : ماسكه مينو في يدي و نسلس بنخش للحظييه اسس مينو دييش صوت شفت ثنين مصبيين معطيني بظيهم و يحكو خشيت بسيعه جوا و في حصنه عييم كل واحد في مكان بيوحه شفت حصانه يااقده و فتحت عليها و خشييت قمعزت قدامها و ماسكه مينو في يدي

انا : حطيت يدي ع ياسها مينو شوف قعدت شن اسمك انتي

___________________

حسام طلعت من الفيلا و مشيت للحظيره بنشوف السا اليوم جابوها مريضه خشيت للحظيره و شفت يزن

يزن : منور اليوم
حسام : بنشوف السا و طالع طول للمزرعه
يزن : شن في
حسام : عندي حساب مع جماعه فتحي ال***
يزن : اوو شوره خالف قوانين حمورابي
حسام : ولعت الدخان و نحكي و دخان في فمي حيشوف كيف يخالفهن
يزن : المهم تعال ل.. سكتو ع صوت عياط بنت
حسام : عقد حواجبه شن في
يزن : علمي علمك خشو جوا

حسام .. كانت لابسه قفطان ابيض و شعرها لمجعد يلي نازل على وجها و مختلط بدموع ووجها حمر و ماسكه دب في يدها و توخر و تبكي بصوت عالي و الحراس يقدمو يبو يكروها اخر شي كرها مع يدها و هيا انعلقت تعيط

_____________________

هاااي كيكاتي الحلوين عشان تعرفو بس امي طيبه مانبيش نخليكم يوم واحد بدون رواياتي 😌❤
غير را تصدقو اني طيبه بس 😂💔 نزلت المقدمه و نبي انتريح يومين هكي و نرد نكملها طبعا نزلتها عشان اتشوقن للروايه وونشوف تفاعلكن عليها شفتن المكر 😈

انتقامي عشان ماتفعلتنش ع الحلقه الاخيره 😂

المهم القصه بوليسه رومنسيه يعني حنحكي حتى ع الحرب و العصابات و جو هذا و الجانب الاخر حيكون على الحب و العلاقات المختلفه يلي حتصير هيا تفااعلو نحبكن
😍❤

#wiush_hamo ' للكاتبه 🔥