منقذي ذو النجوم
الكاتبه غدير العزاوي
..
ضليت بتوتر الليل كوله الى ان اجه كرار ...جان الموبايل باايدي هو دخل من باب المطبخ كالي مي خليت الموبايل فوك الكاونتر ورحت اطلع من الثلاجه ....
واني اطلع سمعت الموبايل دك كرار كال المن هذا الموبايل ...كتله ها الي ...شافه رقم....
فتح الخط وفتح السبيكر وخلا باايده اني جمدت من بده حسام يحجي شلون بلوه هاي شورطتت نفسي سد الخط كرار وره ماحجه ويا...وكال اوك احجي ويا بس من تصيرين حلاله كتله والله ماحاجيه ويا اني بس يسأل ع علي ويسد ماكو غير حجي بيناتنه...
واصلا هذا الموبايل انطاني ايا من زمان وضل يمي من طلكني احمد...
كال هذا الموبايل مراح يضل يمج اولا وثانيا جان كتيلي اني اشتريتلج واحد تتسلين بي ...كال هاهيه الله كريم اخذ المي وطلع والموبايل بقه يمه ....
رحت يمه كعد بلصاله كتله شصار وطلعت رزان هم سألت كالت شوكت نخلص منها....
فهمني هيج وهيج واصلا اني سمعت من حسام بس من خوفي حته ماكدرت استوعب حجيه... كلت يعني هلكد عينكم ع فلوس بحيث حاجين عن الفلوس كدام ناس غرب والله ماادري شحجي عليهم.....
عفته ودخلت للغرفه واني افكر شسوي اجه علي يمي وراد بنام نضمت وقت نومته ساعه ١١ بليل نايم هو اصلا...
نومته وتمددت يمه وافكر شسوي ....نمت ثاني يوم كعدت سويت ريوك وكعدت علي وكرار هم كعد ماادري شعجب متااخر بلكعده هو بلعاده هيج وقت مو بلبيت.....
المهم كعدنه نتريك كام دخل لغرفته اني كمت غسلت المواعين وشغلت التلفزيون ع قناة اطفال لعلي ....
شويه وطلع وباايده كارتونه كال هاج اليوم الصبح اشتريته الج اخذته منه وشكرته فتحته شفت منزل كولشي بي وحاط رقم همينه......
جاه منزل فايبر وفيسبوك اني مسحت الفيسبوك والماسنجر مااحب هيج شغلات ابدااا بس بقيت الفايبر.....واصلا ماكو احد اراسله ويراسلني ويسأل عني.....
مخلي بي رقمه بس ماكو غير رقم.....
وهو طالع مبدل كتله موافقه ع الشرط راح اتنازل عن الورث بس خلي يكفون شرهم عني...
كال هاهيه باجر نطلع لبغداد ونبيع كولشي ونحول الفلوس بااسم جدي وطبعا بحضورج....كتله ان شاء الله...
لانه ماعندي غير حل ومااريد اضل يمهم خلي اتزوج حسام بلكي اعيش جم يوم من حياتي براحه .....
واصلا ماكو احد يحبني بكده الكه الامان يمه الي فقدته من اقرب اشخاص الي.....
مشه اليوم عادي وثاني يوم من الصبح تحظرت وطلعنه اني وكرار وجدي وعمي الوسطاني ....
تم كولشي رجعنه للبيت العصر بس شنو ميته تعب من الطريق رأسا سبحت وعلي ذبيته يم كرار لانه ادري بي مراح يخليني انام ....بس قبل لاانان اتأكدت اذا ماكل شارب كالي اي... خليت راسي ع مخده ونمت رأسا .......
كمت ساعه ٨ ونص جانت بس راسي احسه طبل هو هيج نومة المغرب او العصر بس شسوي جنت تعبانه ....وهسه راسي كولش كمت لبست شالي وغسلت وشربتلي حباية وجع راس ....
ماشفت احد بلبيت وهدوء اخذت الموبايل واتصلت ع كرار كال بيت جدي احنه ..كتله هاهيه ...
حضرتلي اكل وتعشيت ....كمت العب بلموبايل واكثر شي اطلعه فيدوهات مرتضى حرب .....
واني جنت كاعده بلصاله سمعت صوت حركه بره بس كلت منو يجيني ومااهتميت شويه صار صوت مشي وواضح كمت بسرعه ركضت لباب المطبخ داادور القفل مالته مالكيته ......
شفت يدة الباب تحركت بس جانت مقفوله الباب زين اشلون وليش ...ركضت بسرعه لغرفتي وسديت الباب وقفلته كعدت ....
ايدي يرجف وكول جسمي يرجف صرت اخاف من هيج اشياء ومو سهل الي عشته ....
يعني شلون حاليا عايشه برعب او تشوفين فلم رعب اني حسيت انه اني الدور الرئيسي بلفلم ....
طلعت الموبايل بسرعه واتصلت ع كرار بس كولشي بسه يرجف كال الو احجي شبيج ريم مدااكدر احجي لساني مداينطق شي ....كال جاي راجعين هسه....
والله شويه وسمعت الباب انفتح ركضت بسرعه فتحت القفل شفته كرار كال شبيج كتله اكو واحد راد يفتح الباب بس جان مقفول ...
كال اي اني الي قفلته من بره كلت نايمه وادري بااخوي مايفوت هيج فرصه....
خوما صار شي سوالج شي ولو ميكدر يدخل لانه قافل كل البيت ...
كتله لا ااحمدلله اخذت علي واريد ارجع للغرفه كالي باجر اتحظري اهل حسام جاين يشوفوج ويتفقون ع العرس وياج......
يايابه طرت من كالي هيج كتله صدوك والله هذا الحجي كال اي ردينالهم موافقتنه كلت الحمدلله...
طول الليل مانمته افكر شراح اسوي وشلون اوووف حتى النومه طارت بلكوه نيمت روحي ....
كمت الصبح اول شي حفيت وجهي اني اعرف احف باايدي اتذكر ماما جنت اشوفها واتعلمت بس ماجنت ابداا لاعبه بوجهي من جنت صغيره الا من ذاك اليوم المشئوم...
كملت رحت للمطبخ سويت نفس كيك ذاك اليوم طلع هم كولش طيب ....وصيت كرار ع عصائر وحبشكلات ثانيه اقدمها اما رزان كل ساع ياطالعه ياطابه ماادري شبيها اوي شعليه بيها.....
كملت صار الظهر تغدينه كمت غسلت المواعين ورتبت البيت كوله خليته يلمع.....
اتقرب وكت جيتهم كمت اخذت علي سبحته وبدلتله ودزيته يم كرار اني هم دخلت سبحت وطلعت لبست فستان اسود بسيط كولش جان ونازم بنفس الوقت بس بعدين لحد الان الاسود مانازعته....
ماخليت مكياج جان عندي بلكنتور بس اخذت شويه حمره خليته ع شفايفي وخدودي شويه اما غير شي ماحطيت.....
سمعت دكة الباب كلت اكيد اجو كمت حتى استقبلهم .....
شويه ودخلو وحده جانت اكبر مني شويه مو هواي ووحده همينه جبيره شويه ودخلت وحده عاكده حواجبها والخشم واصل للسما كلت اكيد الامايه....
دخلن وسلمن عليه وذنيج عرفتهن زوجات اخو ...عامر وسامر ....بس يالله الذوق والاخلاق الي شايلي كولش عجبني مرت عامر اسمها ملاك اسم ع مسمى اطباعها تكولين جنها ملاك ونازل من السمه وعدها بنيه اسمها اريج...ومرت سامر اسمها فاطمه ....حبيتهم للصراحه رزان ماطلعت ....
كمت قدمت الهم ودزيت ع كرار اجه هم قدمت وحطيت كدامهن ملاك اخذت كيك واكلته كالت طيب اممم ...بس شويه وملامحها رخت ندست فاطمه اخذت كيك ضلن ياكلن ويباوعن ع بعضهن ويضحكن....ماادري شبيهن ....
اما ام حسام اخذت بس عصير ومبين تحجي من وره خشمها اتفقنه ع كولشي وهمه شيكولون اني اوافق وماعدهم شي كالو ماعجبني .....
شويه وطلعو بعد يومين عقد قرءان انطوني مهله حتى احظر نفسي ومن داتطلع اتقدمت فاطمه يمي وكال كثريلنه من هل الكيك وانطت باايدي ورقه وطلعو....
بديت نضفت البيت وعزلت كولشي دخلت اني هم بدلت نسيت الورقه الي انطتني ايا باايدي رحت بسرعه واخذته شفت بي رقم .....
اخذته سجلته طلع رقمها هيه لانه كاتبه رقمي دزيت هلو بلفايبر وغلقت الموبايل ....
كمت سويت عشه تعشينه كولنه وبلغتي كرار انه راح يطلعني اشتري بدله بس بعيدا عن اللون الاسود اقنعه ماكو منا منا ابدااا قافل كلت يالله امري لله اشتري لون غامق.....
غسلت المواعين وخلصت واخذت علي نيمته ....ونمت اني هم من التعب ثاني يوم كمت شفت علي كايم قبلي ويلعب ويطشر بلاغراض كمت اخذته والعبه وابوس بي ....بعدين لميت شعري ولبست الشال طلعته غسلتله وغسلت اني همين حضرت ريوك تريكنه بس احنه كرار مو بلبيت .....
خلصت شغلي واخذت علي شغلتله تلفزيون وحطيت كدامه العاب وجباسه التهى بعد كمت اخذت الموبايل فتحت النت منانه وصارت الاشعارات تجيني ماادري منين يعني فوك ال ١٠٠ رساله تفاجأت منو هذوله......
حسام :وخرت الموبايل وتأكدت من الرقم الي متصل علي ورجعته يم اذني كال اني كرار ....
كرار:كتلك خلي السالفه وراي وماتوقعتها منك تنطي موبايل من دون علمي لريم عبالي موبايلها طلع موبايلك وتتصل عليها هم....
لو كايلتلي ريم اني اشتريلها موبايل ليش انتَ منطيها وكولش ماحبيت حجيك وياها بدون علمي خلي تصير حلالك وبعدين....مع السلامه...
سد الخط بوجهي شلون بلوه هاي .....
بعدين اتصل ويطلعلي مغلق ثاني يوم اتصل عليه كرار كال ريم وافقت وتنازلت عن الورث كله واحنه موافقين تكدر تجيب باجر الاهل وتجي نتفق .....
حسيت ملكت الدنيا كلها والله لااعوضج ياريم عن كولشي فقدتي وعانيتي بحياتج وان شاء الله اكون كد كلمتي ....
طرت فرحان وكمت ابوس شكو واحد يطلع كدامي اول شي مهدي كال شوووو دووووخر اشبيك انتَ طاكك الجفاف وداتسوي هيج شبيك لخاطر الله كتله ولك باركلي راح اتزوج وافقو وافقوووووو صرخت .....
كام يضحك ويكمز كال يعني نشبع كيك كتله شو ولي من وجهي مااخليها تشتغل اصلااا وانتَ دتكلي كيك ماكيك.....
رحت بلغت عامر همينه فرح كال هاهيه احاول ارتب وضعي باجر ونروح.....
مهدي كال اني اضرب المحاضره واطلع اجي وياكم خلي نتعلم شويه تقاليد يعني ماتعرف الدنيا باحر عكبه اني اصير بدال حسام.....سامر ماعنده شغل بهيج وقت..
....
ثاني يوم تحضرنه كولنه وقبل لانطلع عامر وصه امي مو تسوي شي ...وطلعنه لبيتهم شويه وكام كرار جاب وقدملنه جان اكو كيك نفس الي انطتني ايا ريم ذاك اليوم كلت بس لا ياخذون وياكلون منه اكيد بالهم يروح لغير شي ......
اول شي اخذ مهدي اكل بس حسيت ملامحه ابتسمت جان كاعد يمي وكال همممم كيك ....
كلت هاهيه مادام مهدي عرف انفضحت....اخذ الموبايل مالته ودز رساله لكروب العائله اكلو من الكيك احس ماكل منه قبل صح لو اني غلطان ....
اخذو همه هم اكلو ....عامر جان ماكل وكايلين اله انه حسام جابه ....بس سامر لا مثل الاطرش بلزفه .....
طلعنه من يمهم وبلطريق صنفوني تصنيف ع كيك يابه والله مو مثل الي بالكم هيج وهيج وهمه لا اله تفكيرهم يشطح ..
يتبع..