(လွန်ခဲ့သော အချိန် သုံးလခန့်က ဖြစ်သည်။ နတ်ဆိုးတွေဟာ သဏ္ဍာန်ဆန်းရဲ့ တည်ရှိမှုကို သတိမထားမိသေးခင် မူလအစ ပထမ ...)
နိုင်ငံရဲ့ အကျော်ကြားဆုံး တက္ကသိုလ်တွေထဲမှာ ထိပ်ဆုံးက ရပ်တည်နေတဲ့ H.V University ...။
H.V University က ဘွဲ့ရသူလို့ ဆိုလိုက်ရင် အလုပ်အကိုင် အခွင့်အလမ်း များပြားတဲ့ အပြင် လစာ ရရှိမှုနှုန်း မြင့်မားခြင်း တွေကြောင့်ကျောင်းသား အများစုက ရွေးချယ်ချင်ကြသော တက္ကသိုလ် တစ်ခုလည်း ဖြစ်သည်။
အဲ့ဒါတွေအပြင် နိုင်ငံရဲ့ အနုပညာလောက၊ စီးပွားရေး၊ နိုင်ငံရေး၊ ပညာရေး နယ်ပယ်တို့မှ ထိပ်တန်း နာမည်ကျော် အများစုသည် H.V University ကနေ ဘွဲ့ရ ခဲ့သူတွေ ဖြစ်သည်။ H.V University ဟာ အစဉ်အလာ ကြီးမားပြီး ဂုဏ်သတင်း ကျော်ဇောလှတဲ့ တက္ကသိုလ်ကြီး တစ်ခု။
ဒီလို ကျောင်းမျိုးမှာ တက်ရောက် ပညာသင်ကြားခွင့် ရဖို့ ဆိုတာကလည်း သိပ်တော့ မလွယ်ကူပေ။ အရည်အချင်းကို ကြည့်ပြီး ဝင်ခွင့် လက်ခံတဲ့ ကျောင်းမျိုးပါ။ ဝင်ခွင့်ရဖို့ ခက်ခဲလှပါသည်။
ကျောင်းတွင် ကျောင်းသားတွေ အနေနဲ့ ပညာ သင်ကြားရေးအပြင် အခြား လှုပ်ရှားမှု activityများစွာ ကိုလည်း လွတ်လပ်စွာ ပြုလုပ်ခွင့် ပေးထား သေးသည်။
များစွာသော activity များထဲတွင် "Hello interview" အဖွဲ့ကတော့ H.V University မှာ လူကြိုက် အများဆုံးပင် ဖြစ်သည်။
H.V University က ကျောင်းသား တိုင်းက "Hello interview" အဖွဲ့ကို သိကြ၏။ ဒါဆိုရင် "Hello interview" အဖွဲ့ဆိုတာ ဘာလဲ ! ! !
သူတို့က ဘာလုပ်ကြတဲ့ အဖွဲ့လဲ ! ! !
တစ်ကျောင်းလုံးက ကျောင်းသား ကျောင်းသူတွေကို အပတ်စဉ် သောကြာနေ့တ်ိုင်း short interview လေးတွေ လျှပ်တပြက် လိုက်မေးကြသည့် အဖွဲ့ဖြစ်၏။ ဒီအဖွဲ့ကို ကျောင်းရဲ့ မေဂျာ အတော်များများမှ စီနီယာ တချို့က ပါဝင်ဖွဲ့စည်း ထားတာ ဖြစ်ပြီး တခါတလေ အဓိပ္ပါယ်ရှိသော မေးခွန်းတွေ မေးမြန်းတတ်ပြီး တခါတလေမှာတော့ အပျော်သဘော မေးခွန်းလေးတွေ မေးမြန်း တတ်၏။
အင်တာဗျူး အစီအစဉ်တွေကို ရိုက်ကူးရေး လုပ်ပြီး ကျောင်းရဲ့ ဝက်ဆိုက်မှာ ပြန်တင်ပေးတာ ဖြစ်သည်။ တခါတရံ အပျော်သဘော မေးခွန်းလေးတွေ မေးတဲ့အခါ စိတ်ကြည်နူး ပျော်ရွှင်ရသည်။ တခါတရံ အဓိပ္ပါယ်ရှိတဲ့ မေးခွန်းတွေကြောင့် ကျောင်းသားတိုင်းမှာ မတူညီတဲ့ အတွေးအခေါ်တွေ၊ မျော်လင့်ချက်တွေ၊ ရည်ရွယ်ချက်တွေ ရှိကြတယ် ဆိုတာ ဒီ interview video လေးတွေ ကြည့်၍ သိနိုင်ကြသည်။ ထို့အတွက် Hello interview အဖွဲ့ကို H.V University မှာ အားပေးထောက်ခံသူတွေ ကတော့ များပြား လှ၏။
"ကဲ ... ဒီနေ့က ဘာနေ့လဲ သိကြတယ် မို့လား ...
ဟုတ်ပါတယ် ဒီနေ့က Friday ပါနော်...
Fridayဆိုတော့ Hello အဖွဲ့လာပါပြီ ...
ကဲ ... ဒီနေ့ရဲ့မေးခွန်းလေးက ဘာဖြစ်မလဲ ...
ဘယ်သူတွေက ဘယ်လို စိတ်ဝင်စားစရာ ကောင်းအောင် ဖြေကြမလဲ ...
ဘယ်သူတွေဆီက ဘယ်လို ဟာသ
မြောက်တဲ့ အဖြေတွေ ကြားရမလဲ ဆိုတာ ကြည့်လိုက် ကြရအောင် Let's go ... "
တက္ကသိုလ် ဝင်းထဲက လမ်းမ တစ်နေရာတွင် မိန်းခလေး တစ်ယောက်က interview ရန် စတင် နေတာ ဖြစ်သည်။ သူမ ဘေးမှာ ကတော့ကျောင်းသား နှစ်ယောက်နဲ့ ကျောင်းသူ တစ်ယောက် ရှိနေပါသည်။ ကျောင်းသား တစ်ယောက် ကတော့ MCမမကို video ကင်မရာနဲ့ မှတ်တမ်းတင် ရိုက်ကူးနေတာ ဖြစ်ပြီး ကျန်တဲ့ ကျောင်းသား တစ်ယောက်နဲ့ ကျောင်းသူ တစ်ယောက် ကတော့ ပစ်မှတ်ကို ရှာဖွေနေတာပဲ ဖြစ်၏။ သူတို့ရဲ့ ပစ်မှတ်က ဒီကျောင်းဝင်း ထဲက မည်သူမဆို ဖြစ်နေနိုင်ပါသည်။
"Hello ညီမလေး တို့ရေ မေးခွန်းလေး နည်းနည်းလောက် မေးမယ်နော်... "
ကျောင်းဝင်းထဲက Public မြက်ခင်း ပြင်တွေမှာ စုထိုင် နေကြတဲ့ ကျောင်းသူ သုံးလေးယောက်ကို မြင်တော့ Hello အဖွဲ့ရဲ့ အင်တာဗျူး အစီအစဉ်ကို စတင် လိုက်လေ၏။ MC တစ်ယောက်နဲ့ ရိုက်ကူးရေး အဖွဲ့ကို မြင်တာနဲ့ Hello အဖွဲ့ကမှန်း ကျောင်းသူ လေးတွေကလည်း သိနေသည်။ ဒါကြောင့် အလွယ်တကူပဲ ခေါင်းညိတ်ကြလေသည်။
"H.V University မှာ Popular အဖြစ်ဆုံးက ဘယ်သူလို့ ထင်လဲ ... "
ဒီမေးခွန်းက ဒီအပတ် သောကြာနေ့ရဲ့ မေးခွန်းတစ်ခုပဲ ဖြစ်သည်။
"Hello interviewအဖွဲ့ ... "
"အာ မဟုတ်သေးဘူးလေ အဲ့လို အဖွဲ့လိုက် club တွေကို ပြောတာ မဟုတ်ဘူး ဒီကျောင်းရဲ့ မေဂျာ ဌာနတိုင်းမှာ နာမည်ကြီးတဲ့ သူကို မေးတာ ... "
"သြော် အဲ့လို Popular ဖြစ်တာ မျိုးလား ...
အဲ့ဒါဆို ဆီဇာနေရဇ္ဇတို့ အုပ်စုပဲပေါ့ ...
စီနီယာတို့ သိတယ်မို့လား Business Administration major ကလေ ... "
"ဆီဇာနေရဇ္ဇ who ... "
MC မမက ထိုနာမည်ကို မရင်းနှီးတော့ သူမရဲ့ ကင်မရာ အဖွဲ့ကို ပြန်မေး လိုက်သေး၏။
"မိုင်းကို ပြောတာလေဟာ နင်ကလည်း ...
သူ့နာမည် အရင်းက ဆီဇာနေရဇ္ဇလေ ဒါလေးတောင် မမှတ်မိဘူးလား ... "
ကင်မရာအဖွဲ့ သူငယ်ချင်းများက MC မမကို ဒါလေးတောင် မသိဘူးလား ဆိုသည့် အကြည့်တွေနဲ့ ပြန်ဖြေ ကြလေ၏။
ဒီတော့မှ အမေးခံရသည့် ကျောင်းသူ အုပ်စုကလည်း...။
"ဟုတ်တယ် ဟုတ်တယ် မိုင်း ...မိုင်းကို ပြောတာ ... သူနဲ့ ရင်းနှီးတဲ့ သူတွေကပဲ သူ့ကိုခေါ်ကြတာလေ မိုင်း ဆိုပြီးတော့ ... "
"အာ ဆောရီး ဆောရီး အစ်မတို့က မိုင်းဆိုတဲ့ နာမည်ပဲ ခေါ်ခေါ်နေတော့ အဲ့နာမည်ပဲ စွဲနေတာ နာမည် အရင်းကို ခဏ မေ့သွားတယ် ဟဲ ဟဲ ...
ဟုတ်ပြီ ဒါဆို မိုင်းတို့ အုပ်စုမှာ ဘယ်သူက ပိုပြီးတော့ Popular ဖြစ်တယ်လို့ ထင်လဲ ... "
"အဲ့ဒါကတော့ ပြောရခက်တယ် စီနီယာရဲ့ ...
ဆီဇာနေရဇ္ဇ ... လင်းရဝေ... ကောင်းသစ်လွင်... နီနီသစ်လွင် ...
သူတို့လေးယောက်လုံးက Popular ဖြစ်လွန်းကြတာပဲလေ ...
သူတို့လေးယောက်လုံးမှာ တူညီတဲ့ အချက်တွေက များတယ်...
စာတော်တယ် ဖော်ရွေတယ် လူချစ်လူခင်များတယ်...
ပြီးတော့ အဓိက အချက်က သူတို့ လေးယောက်လုံးရဲ့ ရုပ်ရည်လေးတွေက အရမ်းပဲချောကြတယ်လေ ခစ် ခစ် ခစ်... "
"ဟုတ်တယ် ဟုတ်တယ်... "
အဖြေပေးသူနဲ့ ထောက်ခံတဲ့ သူတွေက ဟုတ်တော့ ဟုတ်နေပါ၏။
"ကဲ ဟုတ်ပါပြီ အခုလို ဖြေပေးလို့ ကျေးဇူးပါနော် ညီမလေးတို့ရေ ... Bye ... "
Hello interview အဖွဲ့က ထိုနေရာမှာ အင်တာဗျူးခြင်းကို ရပ်တန့် လိုက်ပြီးနောက် တစ်နေရာကို ထပ်သွားဖို့ ပြင်လိုက် ကြလေသည်။
အချိန် အတန်ကြာသည် အထိ ကျောင်းဝင်းထဲက နေရာအနှံ့သို့ ထိုမေးခွန်း တစ်ခုထဲကိုပဲ လိုက်မေးကြ၏။ ပြန်ဖြေကြသည့် အားလုံးရဲ့ အဖြေကတော့ တစ်ခုထဲဲ ပါပဲ။
"ဆီဇာနေရဇ္ဇ တို့အုပ်စု ... "
"မိုင်းတို့ အုပ်စုပဲပေါ့ ... "
မှန်၏။ ဆီဇာနေရဇ္ဇ (ခေါ်) မိုင်းနဲ့ လင်းရဝေ၊ ကောင်းသစ်လွင် ပြီးတော့ ကျောင်းရဲ့ အလှနတ်ဘုရားမ နီနီသစ်လွင် တို့သည် H.V University မှာတော့ အတော်လေး နာမည်ကျော်ကြား ကြပါသည်။
အဲ့ဒီ့နေ့က အားလုံး ပြန်ဖြေကြသည့် မေးခွန်းရဲ့ အဖြေသည် 100% မိုင်းတို့ အုပ်စုဟု ထင်ထားခဲ့သော်လည်း ...။
"ဆောရီးပါ စီနီယာ ...ဒီကျောင်းမှာ ဘယ်သူက နာမည်အကျော်ဆုံးလဲ ဆိုတာ ကျွန်တော် မသိပါဘူး... "
ကျောင်းထဲမှ စက်ဘီးလေး တစ်စီးနဲ့ ထွက်လာတဲ့ ကျောင်းသား တစ်ယောက်ကို Hello interview အဖွဲ့က အတင်းတား၍ မေးခွန်း မေးလိုက်တာဖြစ်သည်။ ပြန်ရလိုက်တဲ့ အဖြေကတော့ သူတို့ကို ဆွံ့အ သွားစေခဲ့၏။
သူ့ကြောင့် 100% ကနေ 99% ဖြစ်သွား ခဲ့ရသည်။ Hello interview အဖွဲ့သည် ဒီကျောင်းမှာ တက်ပြီး ဒီကျောင်းရဲ့ Popular ဖြစ်သူတွေကို ဘာလို့ မသိရတာလဲ ဆိုတဲ့ မေးခွန်းအား အဲ့ဒီ့ ကျောင်းသားကို ပြန်မေးခွင့်ပင် မရလိုက်ကြပေ။
ဘာလို့လဲ ဆိုတော့ သူက အဖြေကို တစ်ခွန်း ထဲပဲ ခပ်မြန်မြန် ဖြေကာ အလျင်စလို စက်ဘီးကို နင်း၍ ထွက်သွားတာကြောင့်ပဲ ဖြစ်သည်။ ပြီးတော့ အဲ့ဒီ့ ကျောင်းသားကို တွေ့တဲ့ နေရာကလည်း Business Administration major ရဲ့ ကျောင်းဆောင်တွေ အနားမှာပဲ ဖြစ်နေသည်။
ဒီကျောင်းသား တကယ်ပဲ မသိတာလား...။
နည်းနည်းတော့ ထူးဆန်း နေသည်။
***** ***** ***** ***** *****