"آشد الآناث صبرًا من كان أبيها
تحتُ التراب ولمَ تجنُ بعد".
..
مَر شهر كامل بعد أربعينية أبوية
دخلت بحالة اكتئاب ..
هاملة دراستي وَنفسي ..
بحيث دراجتي يوم عن يوم
تنزل و أرسب ما اهتم ..
حادث أبوية لحد الآن ما عرفو منو ابو السيارة الدعم والشرطة سدت القضية وماحققو لأن محد شاف الحادث ولا يعرفون رقم السيارة!
مرات اگول لـؤي إلي داعمه لأن
بابا رفضهُ فـ كُتله حتئ ابقئ لوحدي!
بس هوو إلي نكرهه وعدنه عداوة ويا
ماعدنه ويا غير شخص عداوة ..
بسَ أحتمال ثاني ..
يمكن شخص غريب دعمه و شرد ؟
أو عن قصد ؟
اتٲزمت وادهورت حالتنه المادية وبعد وفاة أبوية حييل تعب سالار ، صار هو مسؤول عن البيت ومادا يلحگ بين الدراسة والشغل
لان استلم شغل بابا ، يروح بليل
والصبح بالكلية ،وكلش يتعب ..
صرت ما اطلب منه أحتياجاتي لا اني ولاخواتي .. حتئ ملازم علئ نت ..أريد اخلص من هاي السنة واتخرج من السادس ..وارتاح
بالنسبة لـ حـيدرة ؟ بعد أخر لقاء بالزيارة ماشفته ابدًا ولا عرفت اخباره يتواصل ويا سـالار مرات اسمعه يحچي ويا يخابره ما فتح موضوع الخطوبة بعد الي صار وأني هم نسيت الموضوع شلته من بالي .
شهر ،شهرين ، ثلاثة خلصت سادس، ونبراس نجحت بدرجات عالية معدل 88 ونـور نجحت من الثالث راحت رابع اعدادي علمي .
بيوم التسجيل الأستمارة فكرت هواي ماكو كلية مناسبة استسلمت وانقبلت بقسم الرياضيات ونبراس قسم انكليزي، داومت اول يوم اخذنه سـالار للجامعة چان هو متخرج من الكلية
اول يوم مثل الغريبة ..بس ما تيهت اندليت القاعات والكافتيريا وماخايفه بالعكس افتر عادي وچانن بنات وياي بمدرستي
بنفس القسم فـ أرتاحيت ..
چان يدخل استاذ يعرف عن نفسه وينطي نصايح ، وتالي وزعولنه جدول المحاضرات
خلص الدوام واجه سالار اخذنه ورجعنه للبيت
بليل دخل لغرفتنه .. چان بيده موبايل
سـالار:" هذا موبايل جديد اشتريتة الچن هم بمناسبه تخرج وهم بعد رحتن للجامعة لازم عدچن موبايل!.
اخذته نبراس واني گعدت يمه..
باوعلي وگـال..
:- اعذرني المفروض اجيب لكل وحده موبايل بس والرب تعرفني معندي ان شاء الله اصبرو عليه الشهر الجاي اجيب الچن هلموبايل استعملنه انتي ونبراس ..
حضنته " لا والنبي ما أحتاج اني موبايل
خاص الي، خلي اني ونبراس أحسن
:- لاا اصبرو الشهر الجاي هم انتي مثل البنات وتردين موبايل خاص الج اجيبلجياه حديث ويخبل
- لا فدوة لگلبك ما اريد الله يساعدك
ويحفظك النه ادري بيك داتتعب علمودنه!
- شعندي غيركم ؟ اتعب علمودكم
و اعيشكم بخير
بسته وحضنته فرحانة لان عدنه اخ يحتوينه ويحبنه وماحسسنه بيوم إنُ بابا ما موجود
الله خلق بصوته احن نبره
تنسيني هموم دنياي ومُرها ..
چان أبالي انزل الفيس رحت نزلته وتعلمت أسوي حساب من النت سويت صفحة بدون صورة اول شخص اجه ابالي حيدرة أريد اشوف صفحتة كفضول لا اكثر..
وما أعرف شنو أسم حسابة؟ تالي اتذكرت سالار اكيد متابعة بحثت على صفحة سالار رحت على اليتابعهم شفت حسابة مخلي صورة رحت على صفحته ما ناشر شيء صفحة فارغة تنهدت وطلعت من الحساب خفيت الفيس ورحت رجعتة على الشحن ونمت ..
وره كم يوم اجه سالار چنه گاعدين بالصالة
نور تدرس ونبراس تكتب ومطشرة الملازم
كعد يمنه نسولف تالي ،افاجئنه من كال :-صدك نسيت اگلگم راح اسافر اروح لاربيل
گلت الهُ:" ليش وشنو تسوي ؟
سـالار: أشتغل لگيت شغل مرتب
- ليش بـ أربيل صدگ تحچي!
- آي والله بعد صديقي لكالي عرض شغل بأربيل ، شغل زين وراتب زين حتئ لو بغير محافظه ،قابل بغير دولة ؟
- ليييش سالار و احنا ؟؟
- نارديـن بابا أريد أشتغل بعد ادبر عيشتنا ماداشوفين حالتنه ولج بالشهر اطلع بس 200 الف شسوي بيها ؟ وين أوزعها ؟
للكهرباء ؟ لو للماي ؟ لو للسيارة والبانزين ؟؟ لو الچن ملابس وكتب وقرطايسه وملازم؟ وهذا كله بصفحه ، والمسواك وحتياجات امي بصفحه ثانيه ،
نبراس :- شلون تعوفنه لوحدنه وتروح
يعني لو محافظه قريبة چان بيها مجال!
- هيه وينها أربيل هياتها لا بعيدة ولاشيء لاتخربون الموضوع فدوة الچن!
- زين شگد اطول ؟
سالار :- اول بالبدايه شهرين
-اهووواي شلوون تعوفنه ؟لوحدنه ،
سالار :- هو هذا الشاغل بالي ان شاء الله تصفه المهم باچر رايح ونتوكل علئ الله ،
نور :- الله يرزقك ويفتحه بوجهك ويحفظك
سالار :- لك فدوووه للتدعي
- امي ماحچت شي ابد ولاناقشت ويانه سكتت وكالت تريد تروح روح مامانعتك ،
بقينه اني والبنات وهو ومصيطف الليل كوله كاعدين نسولف ونراجع ذكرياتنه سهرنه باوعنه فلم وطبعا كوري بعد تعودو عليه ،
ثاني يوم الصبح قبل مايروح چنه نتريك كال خابرت امجد وامنته علئ البيت
بعد كل يوميه يجيكم ويشوفكم شنو تحتاجون وخليت 600 الف عند امي تكفيكم شهرين إن شاء الله
وهم مصطفئ مو صغير يگدر يدير البيت بغيابي
وخابرت صديقي اذا صار شي علية يكلكم
إذا دكيتو عليه وماحصلتوني رح يدك عليكم صديقي بيومها صاير شي عليه يعني
- لا ان شاء الله مايصير شي يحفظك الله وين ماتروح
بدلنه انه ونبراس وصلنه للكليه ومناك يطلع لأربيل
وأجر النه خط كال من باچر يجيكم اطلعوله
امجد يجي كل يوم فد ربع ساعه يشوفنه لان هم خطيه عنده شغل ومرات يجي يبات عدنه كم ليله بغرفة مصطفئ
چنت جايه من الكليه وچانت عمه ام امجد عدنه ضلت للعشه وراحت وهم ماسدت الموضوع النهوة كل شويه اتلمح وتدمح بامجد
عبالها صدگ رايدته ومن تطلع سنويته لابويه يخطبني
بيومها من راحت رحت اخذت موبايل امي رقم امجد مسجل بي خابرته ، وسولفتله شنو صار
امجد :- لا بربج هههههههههههه امي طلعت ماناسيه لج يانهوة يابطيخ الله يبعدني عن هلسوالف
- امجد داحجي جديات لعد شنوو الحل عمه وعماتي كلهن يدرن
امجد :- لا يمعودة اصلا ناسي السالفه صارلها اربع اشهر مدري شگد هو نهيت عليج گبال لؤي حتئ يجوز منچ هلعار
- وهسه شنو ؟
امجد :- إن شاء الله باچر افاتح امي واسولفلها
- هاا زين موتنسه والله تعبت عماتي مافكن مني لو بيدهن يحچنها طك بطك بس عود يدرن بيه حزنانه علئ ابويه
امجد :- اي ان شاء الله الج الصافي لاتفكرين بعد بالموضوع
- إن شاء الله مشكور اخذت من وقتك
امجد :- عادي بأي وقت محتاجتني اتصلي اخوج اني صدگ علئ طاري هلموضوع ابشرج
- علئ شنو ؟
امجد :- أريد اخطب وحده اعرفها وعاجبتني بس تمر سنوية عمي الله يرحمة إن شاء الله اخطبها
- حلووو الله يتمم علئ خير إن شاء الله من نصيبك
- إن شاءالله يابه
- يلا امجد اترخص اخذ راحتك
- الله وياج
مرت ايام مثل كل روتين اروح للكليه محاضرات تستطر سطر
ما افهم شيء لمت حالي شجابني بقسم رياضيات دراستها صعبة مرات ابچي لان ماافهم شي بهذا القسم
ومن ارجع أروح اتغده وانام واگعد ادرس
امي مافكت مني ابد وخاصتا بعدما راح سالار
صرت اتجنبها وما اگعد يمها بس بوقت الأكل
خفت لاتسوي شي ما ارتاحيت أبد
هذه الفترة أفكر بحيدرة شنو وضعه وينه وشنو دا يسوي ياترئ ؟ أشتاقيت اتجادل ويا!!
هم يجي يوم وتصير صدفة ونلتقي ؟
....
متمدد رجل علئ رجل وبالي مشغول وتفكيري مُتشتّت واغرس القلم علئ جبيني
فزيت من دخل حسن وركع الباب عدلت گعدتي وگلت اله: " شبيك يابة ؟؟
- روحي واصله لخشمي
- تعال يمي سولفلي شبيك!!
گعد يمي وساكت ..
- احچي حساني شبيك ؟
- صارت مشكلة
- خير يابة شنو من مشكلة ؟
- لك مو مشكلة الأ مصيبة چبيرة وعلي
عقدت حاجبي وشمرت القلم ..
- أحچي ولك شمصخم ؟!!
- وعلي انه ما دخلني بكل شي مو انه والله العظيم!!
- حساني أحچي لك لااا تخبلني
- أبووي
سكتت بقلق ..
- مات ؟
- لِا ما مات ، قتل!
- نفذ صبري لو تحچي لو بعلي اتخبل عليك!
- حيدرة ما أعرف شلوون اگلك ودين مُحمد
- يابة أحچي كاتل منوو ؟؟
حسن :- تدري ابوي شمسوي ؟ لك طلع هو الداعم ابوو سالار
يتـبع..