لارا،،باوعلي وخزرني ورجع باوعلها وحجه بكل هدوئ اتعجب علئ هدوئه
راهب،،چا اشتردين اخذج البيت جلال العار?
ام احلام،،وسفه عليك يبن بطني خل احط هلحجاية بااذنك ترة انته مااخذت حگك من عمك ورحت دمرت بنته بذنب ابوها
اسمع كلامي وماراح اعيدة عدنه ناس اهنا وجيران واهل واحباب شراح يكولون لو سمعو بيك جايب مرة حاطها ابيتك والكل يدرون مامتزوج بعدك
لذالك عرسكم الاسبوع الجاي ومااريد كلمه زايدة
وانتي ابنيتي امسحيها بوجهي يبعد عمتج ترة ابني واعرفه من يحقد ماكو بگلبه رحمه
لارا،،ردت احجي بس هو سبقني
راهب،،هذا هو يللغاليه يجرالج التردي
لارا،،بقيت كاعدة وابلع بريگي ردت اگلها ماراح اخلي احد يشوفني بس جوابه سكتني
شويه واترخص منها بقينه بس اني وهي وفاطمه
ام احلام،،فطيم يمه الغرفه البصف غرفة اخوج فوگ اصعدي رتبيها لمرة اخوج حتئ اتنام بيها
لارا،،گامت فاطمه بدون كلام واني بقيت يمها
ام احلام،،اسمعيني بنيتي ومن اگلج بنيتي لان اعتبرج صدك بنتي مالي شغل بالسواه ابوج لان الله يحاسبه اله مو الج
الصار صار مانگدر نغير شي بعد
واني اريد اسويلكم عرس لان مااريد يضل هذا الشي بنفسج
لارا،،قاطعتها كتلها عمه اصلا مارايدة عرس ولاشي
ام احلام،،خليني اكمل يمه انتي تعرفين شي واني اعرف شي ثاني والناس ماترحم
ومااريد اوكف بين ادين الله اهواي واني اتحاسب عليج واذا صار العرس ضميري يرتاح
ييمه ترة راهب خوش زلمه بس الوكت والذل والتعب كفيلات يخلن گلبه يقسئ
لاعاش طفولته حاله حال الاطفال
ولا شاف ابو وشم ريحته
وحتئ من كبر وليدي اتعلعل وشبع قهر والله اذا احجيلج تنقهرين علي مو منه
طفل عمرة مايتجاوز العشر سنوات وشبع ضيم وكتل من خاله الي هو اخوي ابن امي وابوي ومارحم بحال اخته وگال هذا يتيم ودمعه اليتيم الها حوبه عد ربها
كبر راهب ودخل كلية الضباط عبالي يرتاح ويريح كلبي
بس جان يجيني هلكان من التعب والتدريب اذا تاخذة النومه دقيقه يصدرون بامرة عقوبه تكسر الظهر
مرة جان طالعله بسمار لحم بااصبع رجله الجبير بس صايرة مثل الخراج واصبعه وارم حتئ رجله مايگدر يمشي عليها
گتله يمه روح اطلب اجازة كم يوم بين مااطيب رجلك
وصدك راح الهذا الجبير مالتهم والجبير الله اللواء مدري العميد
وجان راهب بيدة عكازة يتعكز عليها لان حالته فد مرة وصل الالم للعظم
دخل يمه وگاله سيدي اريد اجازة يومين ثلاثه اريد اسوي عمليه الرجلي
گاله واشبيها رجلك حتئ تسويلها عمليه?
گاله سيدي بيها بسمار لحم ومااگدر اداوم
جاوبه شو انزع بسطالك خل اشوفها
اوليدي هم ماجذب االخبر دنگ نزع بسطاله وجاروبه
ايگول ماحسيت غير بالم فضيع عبالي رجلي انشلت واني اشوفه اشلون بچعب العكازة ضغط علئ رجلي وعصر مكان البسمار لحد ماطگ الدم منه
يگول اني گوة كاتم صرختي لان الالم فضيع هو اني ليلي مانايمه من الوجع انوب اجه العميد عصرها بدون رحمه واني اشوفه اشلون ضاغطها ويدوس بكل قوته ع المكان شاغت روحي بدون صوت لان بس احجي يعاقبني عقوبه اشد والمعروف عنه مايتفاهم وعقوباته قاسيه بدون رحمه
تالي گاله روح ارجع الموقعك وهاي سويتلك عمليه بدون اجازة وبدون بنج حتئ ماتعيدها بعد
وغيرهن وغيرهن مصايب اهواي اشلون تردين مايقسئ گلبه وهو شارب كاس المر وجارعه بثنين ادي
لارا،،هي تحجي واني صافنه عليها مااعرف شنو اجاوبها
ام احلام،،المرة هي التعرف تكسب الزلمه سايسي بنيتي ادري عصبي وطبعه صعب بس كلشي بالمسايس يلين
والله يهدي سركم مااگول غير هذا الشي
وعبالج انه راضيه ع السواه ?
لا والله ماراضيه لان عندي ابنيه مااريد اشوف هيج يوم بيها
صح السواه غلط ومراح اسامحه علي بس الحقد من يعمي البشر يخلي يتصرف بدون وعي يخلي يريد بس ينتقم من الاذو مايفكر بالنتيجه كل الي يهمه الانتقام
لارا،،وكعت دمعتي جرتني الحضنها باست راسي وصارت تمسد بشعري
شميت بثوبها ريحة محنه ماشامتها بحضن امي
واصلا مااذكر يوم خلتني بحضنها لو سالتني شبيج مابيج
بقيت بحضنها وابجي بدون صوت وكل شويه ادنك اتبوسني براسي
عجيب امرها شو امي جانت اتگول عنها حقيرة ومااتحب احد تالي هسه ماشفت منها غير المعامله الطيبه رغم الصار بس ماقبلت علئ تصرف ابنها وياي
بعدتني عنها ولزمت وجهي بيدها
ام احلام،،گومي يبنيتي كولي ياالله وغسلي وجهج
واصعدي ارتاحي بغرفتج
قل مايصيبنا الئ ماكتب الله لنا
ييمه المكتوب ع الجبين لازم اتشوفه العين وهذا حضج من الله وهذا المكتوب علئ گصتج اتحملي وانشاءالله الله يريح گلبج
لارا،،كلامها مثل المهدئ احس نفسي ارتاحيت
كمت من يمها صاحت الفاطمه گالتلها صعدي مرة اخوج الغرفتها
صعدنه اني وفاطمه شفت ضرغام ينحثل بالجربايه ام نفر واحد نزلها من السطح حديد
حطها بالغرفه نصبها وفاطمه راحت جابت افراش فرشتها
الغرفه بيها بوفيه صغيرة عليها افراشات وبيها مواعين بالخانه الاولئ
وجوة بيها اربع كومديات اثنين بيهن معاليگ للملابس واثنين اصغار
ضرغام،،وهاي الغرفه صارت جاهزة
لارا،،ابتسمت ك مجامله كتله شكرا تعبتك
ضرغام،،تعبج راحه يابه شمسوين قابل?
لارا،،تركوني ونزلو سديت الباب نزعت شالي واخذت الجنطه ارتب بالملابس احطهن بالبوفيه
جريت العلبه مال الذهب طلعت الگلادة شگد جنت فرحانه بيها
بس بعد الصار نزعتها لان كرهتها مثل ماكرهت صاحبها
احس اسمه وهو منقوش عليها حبل يخنگني
رجعتها العلبتها خليتها ع الميز ناويه ارجعها اله كارها حتئ اسمه
بقيت گاعدة للوحدة بليل اتصلت بمحمد طمنته علئ وضعي وهم اطمنت علئ وضع ابوي
بعدها سديته ردت انام بس انحصرت گمت طلعت بدون حجاب اكيد كلها نايمه
نزلت علئ كيف دخلت للتواليت بعدها بقيت متردده عطشانه استحي ادخل للمطبخ تالي ماتحملت رحت شربت ماي وردت اصعد اتفاجئت بدخول ضرغام يمكن جان بالحديقه اشلون فشله شافني بدون حجاب تركته وصعدت بعدني ب اخر درجه صار بوجهي راهب ينشف بشعرة
باوعلي وباوع الجهة الاسفل البيها ضرغام واگف مدري شيسوي
مااهتميتله اتعديته وكملت طريقي للغرفه
سديت الباب وبلحظه انفتح بقوة لمن اتراجعت لورة عبالي هجوم
دخل وسد الباب وهو وجها اتحسه راح ينفجر من. العصبيه حجه وهو صاك علئ اسنانه ويتقرب مني
راهب،،شتسوووين نازله بدوون حجاب?
لارا،،ماشامه گفه ايدي بعدكم گاعدين
حجيتها ودرت وجهي ماحسيت غير دفعني ع الحايط احس اعضامي انكسرت
ردت ابعد عنه وهو حاصرني بجسمه
وخرر عني
راهب،، ليش ?
اتخافين اتضعفين بيدي من الزمج?
لارا،،ابتسمت ب استهزاء
الضاهر نسيت كلامي من كتلك صرت اكرهك من تلمسني اكرهك تعرف شنو اكرهك
ضربني علئ حلگي بگفه ايدة
اختنگت ودموعي غصب عني جرن بجيت گتله ياالله وخر عني
هاي جيتك علمود تضربني وتهيني وبس ماهامك الحجاب
راهب،،صوتج لااگلب خلقتج
وبعدين لايبوي انزلي عريانه بحجة كلها نايمه ومحد يشوفج
اسمعي ولج حجابج ماينزل من راسج گدام ضرغام
واتراك مااريد حالج حال فاطمه اتلبسين دشاديش اعراض
واذا لمحتج لابسه اتراك والكعبه امزگه عليج فاهمه?
لارا،،مو مااهمك وماتحبني وكله تمثيل ?
بعد عليش مهتم بلبسي وبحجابي?
البس اليعجبني وبكيفي
جنت احجي واناشغ
راهب،،لاتختبرين صبري وياج جري عدل وصيري خوش ادميه
لاعبالج ناسي حجايتج مال اليوم الصبح
وحتئ حجاياتج القديمه واغلاطج مسجلهن
جبتج يمي حتئ اطلعهن كلهن
لارا،،درت وجهي عنه وابتسمت بطرف شفتي استهزء بكلامه
سحبني الصدرة ايدة محاوط بيها خصري
والايد الثانيه لافها ورة راسي
مقرب وجهي من وجها اقترب اكثر يم اذني اتلامست بشرته بخدي لاارادية رجف جسمي مو حب وانما خوف ورهبه اخاف يرجع يقترب مني غصب عني
همست بصوت واهن وخر عني
راهب،،وليش گمتي ترجفين?
لارا،،بقيت ساكته واتنفس سريع بس مامنعت نفسي ابعدة عني وهو جان لازمني بقوة مثبتني الجسمه
راهب،،ليش خايفه?
صوت دگات گلبج صرت اسمعهن من قوة دگاته
هيج اتخافين مني?
لارا،،واكرهك مو بس اخاف منك لان المثلك مالهم امان
راهب،،منا وجاي راح اتكرهيني اكثر
لارا،،تركني وطلع كعدت واني حاطه ايدي علئ كلبي اريدة يهدئ شوكت يبطل ينبض من يكون قريب منه?
شوكت راح يكرها ويشوفه انسان عادي حاله حال اي شخص ماادري
اتمنيت اقتلعه واخلي حجارة مكانه حتئ ماينبض الواحد مايستاهل
كمت باوعت الحلگي بالمرايه عبالي شفتي وارمه من ضربته بس مابيها شي لان كانت الضربه خفيفه
مااگدرت انام لان مكاني متغير والبارحه هم مانمت
بقيت گاعدة الوجه الصبح والتفكير نخر راسي
تالي غفيت بدون مااحس بنفسي ماگعدت غير الساعه ب 11الصبح
باوعت للساعه شگد نايمه ولاحسيت بنفسي
لبست حجابي ونزلت لكيتهم كاعدين كلهم بالصاله يشربون جاي صارت عيني بعينه خزرني لان مانزعت الاتراك
مااهتميت وامه هم صاحتلي رحت گعدت يمها بعد ماغسلت
ام احلام،،فطيم يمه صبي لخيتج جاي
لارا،،شگد طيبه هاي المرة ولاجن ابوي هجم بيتها بالعكس اتحسها شايله محنه بكلبها عجيبه ومستحيل المثلها يكون شايل حقد
اخذت الاستكان من فاطمه وراهب كل مايحاول يحجي وياها تسوي روحها ماتسمعه مبينه طبعها صعب وزعلها طويل
ام احلام،،والله گلبي طگ علئ احلام وجهالها
بيبي ضرغام خابر امك وخالتك خل يجن وهم يحضرن عرس اخوهن
ضرغام،،صار بيبي بس ابوي اليوم خفارة باجر ينزل استراحه بليل اتصل بي حتئ يجيبهن باجر بااذن الله
لارا،،عرفت تقصد بناتها الاثنين الباقيات لان اعرف عمي عندة ثلاث بنات
طول ماجنت كاعدة يتخازر وياي مخازر اليشوفه عبالك يريد ياكلني
تالي گال اني طالع لتسون غدة رايح اجيب جاهز
ام احلام،،زين بعدك تعرف بالاصول
راهب،،مقبوله منج يالغاليه بس مو للي ابالج بس اني مشتهي السمج ورايح اجيب
لارا،،مايعرف اذا مايفشل لا يشمر بسمار
راح ساعه ورجع جايب علاليگ مااهتميت ولاباوعتله سويت روحي حتئ مااشوفه رحت للحمام توضيت وطلعت الغرفة الحجيه صليت بيها
كملت وطلعت لكيتهم يصلون بالصاله
بعدها گعدت يمها
ام احلام،،لاتحطمين روحج بالگعدة يمه صرتي ابنيتنه منه وبينه والبيت بيتج
گومي ويه فطيم جهزن الغدة اريدج انتي وياها اخيات لا تستحين
لارا،،گمت صدك فشله ابقئ كاعدة كلامها ماضوجني بالعكس خلاني افرح لان تعاملني بحنيه وبطيبه عكس ابنها العكرة
رحت للمطبخ فاطمه مدري اشبيها ذابتها ع الصامت
ماتحجي دوب اسمع صوتها
گالت بصوت ناصي
فاطمه، ،حضري الزلاطه والطرشي
لارا،،انطتني المواعين وجابت الطرشي والخيار والطماطه غسلته وانطتنيا
سويتها بشقه وياها كتلها ماضل بس ثرم شو كله جهزتي انتي
ابتسمت بهدوئ ودارت وجها تحضر بالسمج تخلي ع الخبز بالصحن
اخذت السفرة مدتها واني خليت. مواعين الزلايط
بالصينيه شلتها ورحت للصاله دنگت احطها رفعت راسي شو هذا خزرني واشرلي براسه بمعنئ روحي
دخيل ربك بس تتخازر عفته وطلعت واني ادردم بكلبي
حسيت خطوات وراي انتبهتله اجه للمطبخ فتح الثلاجه طلع بطل ماي شرب منه ورجعه قبل مايطلع گال وهو قريب مني
راهب،،دنگي مرة ثانيه وشوفي اشلون امدج بنصهم واگطع الحزام علئ ظهرج
لارا،،مايرتاح اذا ماينغصني بكلمه عافني وراح رحت وراه بس انسدت نفسي عن الاكل لان سممني بكلامه وشبعت
رحت گعدت يمهم ام راهب حطت كدامي سمجه ماتدري ابنها كفه اوفه
ام احلام،،اكلي يمه ماتعشيتي البارحه واليوم بدون ريوگ اذا ماكلتي ازعل وياج
لارا،،شگد حبيتها هلمرة عبالك طفلة كدامها وتقنع بيه اذا مااكلت تزعل مني
ماردت افشلها مديت ايدي بس مااكلت سمج ذكرت احجايته من گال هو مشتهي السمج
جريت خبزة وصرت اكل بس خبز واغمس بالطرشي
ام احلام،،يايايا ولج عمه شنو هذا اكلج ?
اكليلج لحمه تلزم گلبج اكو واحد يغمس خبز وطرشي
لارا،،گتلها عمه مااحب السمج
انتبهتله باوعلي ورفع حاجبه يدري بسبب كلامه مااكلت
راهب،،عوفيها حجيه الياكل بضرسه ينفع نفسه
ام احلام،،انته بس لاتدخل بيها وهي تاكل
لارا،،ابتسمت علئ القصف التقصفه ل ابنها كل شويه تفشله
الله لايوگع واحد بلسانها ويخليها تزعل منه اله اطين عيشته بزعلها
باوعتله بشماته ع الرزاله مااهتم داس ع الكل دوسه ونص اتگول مفجوع وزنه ثابت لايزيد ولاينقص واني بحصرة اكل شي حلو وكل اكله لازم احسب سعراتها الحراريه خاف تسبب سمنه
وهو طالع رون سايد لاتفيد وياه سعرات ولا بطيخ
ام احلام،،يمه فاطمه كومي گلي كباب لمرة اخوج ماتحب السمج
لارا،،رادت اتكوم فاطمه كتلها لالا اكعدي لو اريد اني اگوم اسوي النفسي بس والله شبعت
كوة قنعتها وراهب بس ينافخ ماعاجبه تالي مااتحمل وشمرله احجايه
راهب،،حجيه ليش تحرمصيلها اتريد اكل ذاك المطبخ وتروح تخدم نفسها مو فاطمه تخدمها
لارا،،فشلني دنكت ماحجيت بس امه جاوبت بمكاني
ام احلام،،وحگ روح الزهرة اذا مابطلت سوالفك اخذها واردها لبوها بيدي واني الممنونه واطلب يسامحنه علئ سوايتنه ابنته
لأن وين صايرة بيا دوله بياعشيرة تاخذ بنت الوادم وتجيبها وياك بدون رضا اهلها؟؟
والله مانمت على ساعه اخذها بيدي اردها لابوها
راهب،،حتئ قبل لاتوصل اذبحها
ام احلام،،تايهتلك بنت الوادم
راهب،،ترة هي مرتي واكيد تايهتلي لان ماعدها اهل بيهم حض لو بيهم حض صدك جان شفت زلمة بيهم اجه سأل وراها بس لان نثايه مابيهم لادفع ولانفع يخافون كلمن يگول ياروحي
لارا،،ردت اگله ولا رجل بي حض موبس اهل
بس لزمت الساني الخاطر امه استحيت منها
نهض راح يغسل
واني وفاطمه لمينه الاكل وهي اخذت الجاي يمهم يشربون انطته كوب ترسته اله ترس شگد يشرب جاي من جرمن گلبه اسود بلون الجاي يمكن اذا سحبو منه دم يطلع بثل اسود
كمل وبعدها صعد الغرفته گال راح انام گعدوني بالاربعه يجي قاسم
ضرغام هم راح للاستقبال ينام واني وفاطمه والحجيه بقينه بغرفتها كل وحدة حطت مخدة جوة راسها واتمددنه نسولف واحنه مجطولين
اخذتنه السوالف علئ ايام قبل والحجيه تحجيلنه اشلون جانت تخيط قبل وتشتغل هي وبناتها انقهرت علئ عيشتهم لان كل الصار بيهم سببه امي وابوي
صارت الساعه ب الاربعه الحجيه كالت الفاطمه گومي كعدي اخوج عندة طلعه
راحت فاطمه شويه وشفته عبر من يم الباب علئ متونه الخاولي
سمعنه صوت الجرس راح ضرغام فتح الباب واجه گال بيبي ام قاسم بالباب
گامت الحجيه وفاطمه التفتتلي وگالت تعاي يمهن هاي ام قاسم الحجيتلج عنها اختي الماجابتها امي
گمت طلعت وياهن شفتها گاعدة بالصاله هي وابنيه شابه
رحت سلمت عليها والغريب ام راهب گالتلها هاي مرت راهب
المرة فتحت حلگها متفاجئه وام راهب گعدت وحجتلها ااسالفه كلها ماضمت عنها شي اتعجبت علئ علاقتهن صدگ عبالك اخوات وام قاسم طول ماجانت ام راهب تحجي هي تصفگ اي ب ايد
جنت كاعدة بصف الابنيه بعد ماانتهئ حديثهن التفتت الحجيه الها
ام احلام،،سويرة اشلونج بيبي?
سارة،،زينه بيبي الحمدالله
ام احلام،،بشري اشلون صارت امج واشوكت الله يسهل الهم ويرجعون?
سارة،،العمليه الحمدالله نجحت وهسه بفترة نقاها كم يوم ويرجعون
ام قاسم،،خطيه اخوي صار شهر متعذب ويه مرته الله يشفيها ويكومها بالسلامه
ام راهب،،بس يرجعون انشاءالله فاتحي اخوج بموضوع سويرة ترة ماتلگين احسن منها
لارا،،اباوع للابنيه توزع ابتسامات
التفتتلي وگالت
سارة،،وين الله ويقبل ابنها بيه اله اطش جكليت
لارا،،ضحكت علئ سالفتها كتلها ليش واشبيج حتئ مايقبل بيج
سارة،،عود هو جبير واني زغيرة مايقبل يحضي مايدري قافله علي ماانطي لو تطلع نخله براسه
لارا،،موبنيه سينما سبورتيه الابعد الحدود بسرعه تبيع ميانه عبالك تعرفك من اسنين حبيت حالتها اجتماعيه ومحبوبه
بقينه اندردش اني وياها سالتها شگد عمرج?
سارة،،19
لارا،،اهااا يعني انتي ام السادس اعدادي بنت خاله
شو هاي نطت لزمت ايدي والضحكه شاكه حلكها
سارة،،عاااا منين عرفتيني اكيد حاجي الراهب عني سمعت من عمتي هو ورجلج اصدقاء من الطفوله اكيد حاجيله شي
لارا،،انطي نفسج مجال واخذي نفس يمعودة حتختنگين
سارة،،خيه احجي وفضيني راح افضح روحي
لارا،،والله ماحجه شي بس صار حديث بسيط بالسيارة وماعرفت غير عمرج وبيا مرحلة واصله بالدراسه
سارة،،يمممه قلبي الصغير لايتحمل جاشبي گالب الجهرة مايباوعلي اذا يسولف بيه
لارا،،ضحكت كتلها ترة ماگال احبها
سارة،،بالنسبه الي گالها وغصب عنه
لارا،،خررب انتي سينما حب بالاجبار يعني?
سارة،،اذا ماقبل اخطفه واغتصبه وانعل يومه بويه هو زلمة لو شكر لمه
لارا،،هههههه والله ضحكتيني من صدك الله يفرحج انشاءالله
سارة، ،اگلج خيتو انطيني رقمج شو طبيتي گلبي ركض بدون انعال
لارا،،الله يبلاج شنو انتي كارثه
رديتلها رقمي رمشت التليفوني عفته فوگ كتلها راح اسجل الرقم يمي
شويه واترخصن راحن
لليل بعد العشه اتصل ضرغام ب امه والفهمنا باجر يجن اخوات راهب
مااعرف ليش خفت ولزمت گلبي منهن خاف يطلعن عدوانيات مثل اخوهن