ألحقوووووني يانااااس
بعد ما سمعت الكواريك جريت علي الميدان
الواطة كانت شبه ضلام ، وانا نظري علي قدري بس شايف كنت طشاش طشاش
في نص الميدان كان في واحد مرمي في الارض وقاعدة جمبو بنية كداااا
وبتكورك الحقوني
جريت عليهم والميدان كان فاضي ، ما فيهو غيري انا ، اليوم دااااك كان يوم جمعة وناس الحلة كلهم كانوا في المسيد والحلة دي فاضية مافيها الا كان العجايز
باريت الصوت وشوفي الطشاش داا لحدي م وصلتهم
الود كان لابس جلابية لكن الجلابية بقت حمراء من الدم ، كان غرقان في دمووو وبشهق والبنية دي قاعدة تحت راسو وبتبكي
وقت جيتها وقلت ليها في شنوو
يااساتر ياساتر
حاولت اشوف الود مضروب وين عشان قلت يمكن اقدر اساعدوو
الود يا حسن ياولدي. كان مطعون اكتر من 7 طعنات وومجرح في كل حتة في جسمو
انا م عرفت اسوي شنو بقيت بشوف الود دا حي ولا مات
قربت من راسو وختيت اضاني قصاد نخرتو وبقيت احاول اسمع صوت نفس
كان شوية في صوت نفس طالع لكن كان بشخر
سألت البنية في شنووو يابت وحصل شنوو
ما ردت علي بس كانت بتبكي
انا قمت وبقيت بكورك زاتي علي ناس الحلة مان في زول يسمعنا ويجي نلحق الود دااا
بعد شوية في كم راجل جو جاريين من بعيد علي صوت الكواريك وتاني الحلة دي جت عليها اتلمت
الود ياحسن مات قبلووا وما لحقناهووو والبت كانت بتبكي بي حرقة شديدة
وقت رفعنا الود ووديناهو المركز الصحي
الشفتوا انا سكين ملانة دم كانت جمب الود والبنية دي كانت لابسة عباية ولا شنو ماعارف وجمبها شنطة سوداء كان فيها هدوم
انا فتشت البنية والود والشنطة عشان القي لي حاجة تدلني علي اهلهم ولا تلفون ولا اي شي بس م لقيت
الناس بقت تفتش عن الود دا منو واهلوا وين
لانو ما من الحلة دي شكلوا او انا غايتوا م عرفتو
لا هو لا البنية
وياحسن ياولدي القصة دي قومت ود عجبنا وقعدتها ، لي سبب واحد بس
دي اول جريمة قتل تحصل في ود عجبنا من سنين طويلة ، يمكن من زمن شيخ ود النيل مؤسس المسيد ما حصلت جريمة زي دي
اها الخبر بعد انتشر شيخ محمد احمد جاء مسك الموضوع هو بي نفسوو
ومنع الشرطة تتدخل في الموضوع داا ، حتي الود بعد جابوا من المركز الشيخ كلف حيرانوا انهم يهتموا بي دفنواا
وبعديها بدت الأقاويل في الحلة الناس تتداولها واي زول يحلل بي طريقتوو
لحدي ما الموضوع بقي علي لسان اي زول في الحلة
وهنا قام شيخ محمد احمد في الحولية التانية طوالي يعني بعد اسبوع من الحادثة دي
اتكلم ومنع اي زول في الحلة دي يتكلم في القصة دي او يتحاكي بيها
حتي بتزكر قال ليهم
" ان بقيتو دايرين تزعلوا شيخ ودالنيل في قبروا انضموا لسة ، والبنضم في الموضوع دا مايعتب المسيد "
ومن ديك ود عجبنا قفلت باب الموضوع دااا
دي القصة ياحسن الحصلت
طبعاً انا م فهمت شئ ودا علاقتوا بالدرويش شنوو !!
وراسي جاط عديل
قمت قلت ليهو
-طيب يا حاج موسي ، برضو م فهمت دا علاقتوا بالدرويش شنوو !!
عاين لي بس استغراب ..
وقال لي :
دا كلو وما عرفت !!
الدرويش الحايم داااا ما ياهو البنية زاتهاااا
😨😨😨😨😨😨😨
البت اللي انت بتحكي عنها دي الدرويش ؟؟
كيف بس لكن
بس انا ياحاج موسي لاقيت الدرويش داا كم مرة يوم واحد ما حسيت انها بت
هيئتها بتقول انو راجل
- حسن ياولدي حصل لاقاك درويش مرة !!
- لالا ما حصل
- بس عشان كدي ياولدي ، انت تلقاك من اول مرة شفتوو ختيت في راسك انو راجل
بعدين ياولدي انت بتسمع الناس بتقول درويش ما درويشة لانو كلمة درويش دي بتتقال لي اي زول
راحت ليهو وسرح في ملكوت الله
بغض النظر عن هو راجل ولا مرة
بعدين سنين والبنية دي حايمة وماف زول مهتم بيها
لامن بقت زي الراجل واحد
😯😯😯😯😯😯
- طيب ياحاج موسي ما وريتني البت دي منو طلعت ؟؟
كدي احكي لي اكتر ، وانا في اللحظة دي اهتمامي كلو صبيتو مع حاج موسي
نسيت الزمن الجري
وتلفوني البدق وما شغال بيهو لحدي ما طلعتوا وقفلتوا
وبقيت بس عاوز اعرف قصة البنية دي شنوو !!
والكان محيرني اكتر انو طول الفترة دي كنت مفتكرها راجل وطلعت بت 😐
انا اتلخبطت بس كل أملي كان في حاج موسي يحكي لي ويفهمني
طيب ياولدي النحكي ليك البت دي منو ، موش دا العاوز تعرفو !!
- اي عاوز اعرف احكي لي
- البنية دي ياولدي بعد الموضوع انتشر ظهروا اهلها واهل الود المات
اول زول عرفهم ، جا جاري بعد سمع الكواريك كان
عمار ود حاج التوم لو بتعرفواا
- لالا ما بعرفوا
المهم اول ما جااا اتعرف عليهم
طلعوا اولاد حاج الماحي الله يرحموو
البنية اسمها سارة والود محمد اخوها ، وديل ساكنين علي حلة البحر غادي الفريق داك وماف زول بعرفهم من ناس الحلة هنااا
بعرفهم عمار داا لانو كان صاحب محمد داا
عمار دا بتزكر اول ما جاا لقي محمد مطعن وغرقان في دمو اخد ليهو شهقة وبكي لمن وقع غمران وبعد فتح ياهو الورا الناس اهلو منو
لانو البنية خشت في صدمة وما كانت بتتكلم الوقت دااك
😨😨😨😨😰
دا الحصل ياولدي ودي قصة الدرويش
ودا العارفو وبشهد عليهو يوم القيامة
-طيب ياحاج موسي وريني بست اهلها بي وين او حتي وريني عمار دا وين عشان اعرف منو اكتر
- انت ياولدي مصر تعرف القصة دي لي ، دي حاجة حصلت قبل سنين وانتهت حتي الناس نستها
بعدين انت كدا حتزعل منك الشيخ
لو عرف انك بحت ورااا الموضوع داا
ياولدي الموضوع داا ما تشغل نفسك بيهو لا بخصك من قريب لا من بعيد
- لكن انت ما فاهم ياحاج موسي انا الدرويش داا في حاجة من جيت الحلة دي اول مرة جاراني ليهو
ولازم اعرف قصتو
- ياولدي انا والله ما عاوز اجيب ليك الكلام واللوم
ناس الحلة دي م بحبو زول غريب يتدخل في تفاصيلهم
بعدين ياولدي ما حتلقي زول تسألواا
لانو ابوها وامها ماتوا الاتنين وعمار الوحيد الكان صاحب اخوها هج وخلي البلد بعد موت صاحبوا داا وضاقت ليهو القعدة قام هج
- طيب ياحاج موسي وريني اخر حاجة ، الجنن البت دي شنو وخلاها تبقي كدااا
- والله ياولدي الناس لما بدت تتكلم في الموضوع دااا
وكمان لما ما اتلقي الزول الكتل الود ، الناس قالوا البت هي الكتلت اخوها وكانت عاوزة تهرب مع عشيقها وبدو الناس ينضمواا ويلتو ويعجنوو
وكمان بعد وفاة ابوها بعد شهر من الحادثة دي وامها برضو لحقت ابوها بعد 4 اشهور
بقت براها وما كسبت عافية ، كلام الناس بي جاي واي زول يشوفها ينبذها والزعل الناس انو ماف قانون حاسبها بقو يخافوا منها ويقولوا لي شفعهم يجرو منها دي بتقتل
لحدي ما بقت اسطورة في الحلة ، واي زول يشوفها يجري منها بالذات لما يشوفوها بليل
اطلقو عليها كمية من الاسامي والالقاب وما خلوها في حالها
مرات يقولو عليها السفاح ومرات البعشوم
لحدي ما ساقها شيخ محمد احمد ووداها المسيد وبقت عايشة فيهو وتلبس جلاليبهم وتنضف قبة الشيخ
دي قصة الدرويش ياولدي بي اختصار
- طيب متأكد دي القصة كلها ولا في حاجة انت نسيت تحكيها لي او ما عاوز تقولها لي ؟؟؟
- ياولدي وحيات كتاب الله الحكيتو ليك دا الحصل ودا الشفتو بي عيني
لكن ياولدي دحين بعد عرفت القصة واغريت فضولك
انسي الموضوع دا ، وما تبحت وراهو
م تزعل شيخ محمد احمد منك
- طيب حاضر يا حاج موسي ، انا صراحة ن عارف اشكرك لانك ريحت قلبي ووريتني الحاجة اللي مدة فتش عنها وعاوز اعرفها
شكراا ليك شديد وبالمناسبة دي انا عقدي بكرة ان شاء الله تشرفنا
- مبروووك ياولدي وربنا يتم ليك علي خير، شكلك ود حلال ومن شفتك ارتحت ليك
وان شاء الله ان الله طول في عمري بجيك ابشر تب
- اها انا استأذن بعد داا ، لاني اتأخرت ومفروض ارجع عشان ارتب نفسي لي بكرة
ودعتك الله يا حاج موس لي بكرة
قدمني لحدي الباب وطلعت ماشي علي البيت
لانو الوقت داك الزمن جري والساعة ماشة علي 4 عصر
واتزكرت عم ابراهيم قال لي ما تتأخر عشان مفروض نقعد نرتب لي يوم بكرة
طلعت تلفوني وفتحتو
لقيت مكالمات كتيرة منها احمد ومنها عم ابراهيم ومنتصر وعبدالله وروان برضوو
شكلهم قلقوا علي لاني ما وريتهم ماشي وين 😪
في الطريق كل تفكيري كان متعلق بالدرويش وبي قصة البت الحكاها لي حاج موسي ، لدرجة اني كنت م مصدقو في الاول
الكان محيرني انو في النهاية الدرويش تطلع بت
طيب كيف انا م عرفت الحاجة دي
او حتي احمد لي ما وراني
وبقيت بفكر ...
لقيت انو كلام حاج موسي منطقي برضوو
فعلا انا اول ماشفت الدرويش ختيت في بالي انو درويش اكيد راجل ومنظرو كان بيوحي بكداا
وبرضو لما سقتو مرتين وكنت قريب ليهو ما حاولت اركز في تفاصيلوا كتير لاني كنت خايف في المرتين
حتي صوتو لما يبكي صوت فيهو بحة ورجولي
هسي انا اعمل شنو ، يعني بس كدا خلاص دي قصة الدرويش كداا ، جواي كان في احساس تاني خالص
رافض القصة دي تماماً
اول شي كيف بت تكتل اخوها ...
وتاني شئ لي شيخ محمد احمد منع الشرطة تتدخل ومنع الناس تتكلم 🤔🤔
طيب لو فرضنا قتلتوا لي ماهربت وهي اصلا شايلة شنطة هدومها ومخططة لي كدااا
كان جواي كمية من الاسئلة الما لاقي ليها جواب
بس كل الجوابات الجواي بتقول لي لا
دي ما الحقيقة وفي قصة تانية مدفونة وفي سر انت ماعارفو او يمكن حاج موسي ماعارفوا
ياربي الدرويش دا قصتو شنوو ؟؟
لمن اشتغلت رياضيات لقيت انو اسألتي دي جوابها في حلة البحر واكيد هناك حلقي ناس عارفة اكتر
وكمان عمار صاحب محمد حيكون عارف اكتر
بس المشكلة عمار قالوا سافر وخلا البلد بعد المأساة الشافها في صاحبوا الوحيد
وكمان كنت متأكد السر عند شيخ محمد احمد بس المشكلة م حقدر امشي واسألوا لاني قبل كدا وعدتو اني ما افتش عنو 🤦🏾
في النهاية ..
طلعت تلفوني وقلت كدي هسي خلي قصة الدرويش
واشوف دنيتي دي الحاصل فيها شنو 😴😴
اتصلت علي احمد عشان اشوف عملوا شنوو ما رد
اتصلت اكتر من 4 مرات برضو ما رد واتصلت علي خالتي كوثر ماردت برضوو لمن انا قلقت زاتوا
ياربي في شنو حاصل ليهم 😰
رجعت اتصلت علي صبري يمكن يكون عارف حاجة
رد لي صبري وسألتوا من الوضع وكداا
قال لي احمد كان معاي وطلع قبل شوية لي امو في السوق قال حيوصلهم وعندو تاني مشوار كداا والحاجات كلها تقريبا جهزوها
اتفقت معاهو بكرة حنتلاقي كلنا ونجي سوااا
ربنا يتمم علي خير بس
وانت الوضع عندك كيف ؟
- ياهوو والله منتظر بكرة بي فارغ الصبر
بس خايف ياصبري والله
خايف تحصل حاجة انت عارف انا طوالي بحصل لي كداا
كل ما تحصل لي حاجة حلوة ما بتم وبتبوظ
وانا والله ما عارف لو الموضوع دا ما تم لي اي سبب ممكن يحصل فيني شنو. ممكن اجن عديل والله 😪🤦🏾
- لالا ياخ م تقول كدا اتفائل بالخير بكرة نحن بنجي وبنكون معاك لو في اي مشكلة بإذن الله م بتكون براك بنحلها ليك م تخاف
- اي عليكم الله تعالوا والله محتاج ليكم شديد
قفلت من صبري وتاني رجعت لي عم ابراهيم
طلع عاوز يطمن علي وقال لي
تعال عشان نقعد ونشوف بكرة حنعمل شنو وكدااا
انا كنت خايف من حاجة واحدة
انو يحصل صدام بينو وبين الشيخ وانا عارف انهم ماف بينهم عمار ، وفي نفس الوقت بكرة الشيخ اكيد حيجي
المهم قلت الله يستر ويعدلها ويتم لينا علي خير
بعد خلصت منهم
ختامه مسك
اتصلت علي روان او المنصفة او عروسي 😂
الاسامي كترت
قلت اشاغلها حبة
اول ما ردت
- وينك ياولية ما سويتي الغداء مالك
- ولية شنو يا حسن مالك سكران !!
- ههههه لالا ما سكران بس بجرب في احساس العرس وكداا
بعدين اقول ليك ياولية
ونقعد نتناقر في الغداء والفطور 😅😅
ضحكت وقالت لي
- بعدين اوعي تقول لي ولية دي ما بحبها
وتدلعني باقي انا بحب الدلع 😌
كانت مبسوطة شديد وفرحانة وكل شوية تقول لي انا ما مصدقة ، انو حياتي تتغير كدا في ظرف شهور
الحقيقة انا الما مصدق ، منو كان مصدق انو جيتي لي ود عجبنا تغير حياتي كدا وتشقلبها 😍
بنية تقدر تطلعني من عمق الحزن الكنت عايش فيهو وترجعني انسان من جديد
انسان رجع يشوف الدنيا من جديد
الحقيقة اني كنت بشوف الدنيا من عيونها هي والله
💜💜💜💜
ما كنت شايف غيرها وماعاوز اشوف
بس كل خوفي كان من مؤتمن يعمل لينا مصيبة او يحاول يخرب العرس وكمان كنت خايف من علا تتصرف تصرف مجنون لانها ما طبيعية اصلا
يمكن لانو علا ما عارفة عني شي ولا انا بعمل في شنو دا كان مطمني
بس الخوف من مؤتمن 🤦🏾
بقيت ماشي في الطريق وبين مبسوط وفرحان بالذات كنت كل ما الاقي زول يسلم علي
ود الشيخ كيفك ود الشيخ المبروك
وبين انو تفكيري لسة شاغلو قصة الدرويش
حقيقة الناس في ود عجبنا طيبين ، وان رادوك بتشوف ريدتهم ظاهرة في وشهم وان بقوا كرهوك ماليك مكان في نصهم
وصلت البيت حوالي الساعة 5:30
لقيت الشباب سبقوني بي شوية ويادوب ختو صينية الغداء في الحوش عاوزين يتغدوا
منتصر قبل عاين لي وقال لي
- حصانك جراي والله تعال الصينية ختوها هسي دي قدامك
اول ما قعدت لاحظت للصينية والاكل والصحانة انهم غريبات حتي طعم الاكل مختلف دا ما اكل البيت
سألتهم العمل الغداء منو وخالتي كوثر وبناتها في الخرطوم !!
منتصر قال لي قدر ؟؟
قلت ليهو دا اكل واس روان ما بيغباني😂
عبدالله طوالي نط
- اااحي من روان دي
لمن خجل بعديها لانو عم ابراهيم قاعد😅
عم ابراهيم قال لي
- من جاه الملوك نلوك دا عمود جابتوا نسيبتك بعد عرفت انو كوثر في الخرطوم هي وبناتها
شفت ياحسن انت ناسبت ناس كويسين كيف !!
- والله كتر خيرها ما قصرت انا قلت هسي اجي القاكم عذابة شادين ليكم عدس😂
ضحكنا كلنااا
وبعد الغداء منتصر وانا خشينا عملنا شاي وشربناهو
بعديها المغرب أذن
انا طبعاً العصر ما صليتو ونسيت مع حاج موسي وقصة الدرويش
صليت العصر اول وتاني صليت المغرب
عم ابراهيم ساق الشباب ومشو الجامع صلوا وجو راجعين
عم ابراهيم قعد وبيقينا نتناقش في يوم بكرة حيحصل شنوو
قلت لي عم ابراهيم
والله ياعمي انا ماعارف اي شئ بس انا من ايدك دي لي ايدك دي
وحكيت ليهو برضو انو شيخ محمد احمد حيجي عشان يكون عارف
في الاول اتضايق 😪
لمن قال لي
انا ماعارف انت البخليك تباري الزول دا شنو دا زول غريب ساي واكان علي الدين الدين ما عند محمد احمد الدين في كتاب الله وسنة رسولو
بعدين موضوع العرس دا لو كان كلمتني من الاول كانت تميتو ليك
لكن لي خير يا حسن ياولدي لي خير
اعتزرت ليهو ووريتو اسبابي كلها
واتفهم الحاجة دي كويس هو
قعدنا واتفقنا علي كل شئ ...
وبقينا راقدين كلنا في الحوش عذابة ساي 😅😅
شوية نتونس وشوية نسكت واي زول يمسك تلفونو
انا كنت سرحان مع نفسي وراجي يوم بكرة دا يجي وخايف تحصل مشكلة 🤦🏾
بديت اقلق واخاف وكل شوية اتقلب في السرير ومرات اطلع برا الشارع اقيف واجي خاشي جوااا
والف حولين البيت والف في الحوش واطبظ في تلفوني
واتصل كل شوية علي صبري يطمني
احمد ما كان برد وداا زاد قلقي شديد
خفت يكون مشي حلتنا وحصلت حاجة هناك وزعلت من نفسي اني خليتو يمشي او يعمل كداااا
خفت عليهو من الريح 🤦🏾😪
لحدي م اتصلت علي خالتي كوثر وقالت لي احمد رجعنا بيت اختي وطلع قال عندو مشوار وما جا لسة
قلت ليها اول ما يجي خلي يرجع لي او اتصلي علي اديني ليهو
وكنت مقلق شديد وشايل هم 🤦🏾
ما كان عندي حل غير اضرب لي روان
ضربت ليها وحكيت ليها ووريتها اني زعلان عشان خليت احمد يمشي
كانت روان رغم انها عاقلة وفاهمة وعارفة اني غلطان الا انها كانت بتهون علي وتقول لي معليش دا مقدر ومكتوب
هونت علي شديد وطلعتني من المود وبقت تقول لي انها مبسوطة وخلاص بكرة حنكون لي بعض وكدااا
😍😍😍😍😍😍
حرفياً قدرت تطلعني من المود داا وتخفف عني شديد ، كانت بتعرف كيف تهون لي كل كبيرة
رجعت مبسوط من تاني وبقيت راقد بتخيل في يوم بكرة ، واتخيل حياتي حتكون كيف مع روان وشكل اطفالنا
كنت فاتح تلفوني ومشغل قائمتي المفضلة الو السيد
بغني 😴💜
" الا باكر ياحليوة لما أولادنا السمر ، يبقوا افراحنا البنمسح بيها أحزان السفر
نمشي في كل الدروب الواسعة ديك والبويتات الصغيرة تبقي اكبر من مدن "
وحرفيا دا كل الكنت بحلم بيهو ، ماعاوز غير حياة بسيطة وعشة صغيرة انا وروان ونبدا حياتنا سواا
😴😴😴😴
بس كنت خايف لسة 😭
معليش ياجماعة انا طول عمري كنت بخاف والخوف بقي حاجة مرتبطة بي
لقيت نفسي مسكت التلفون ورسلت رسالة لروان يمكن اكون طلعت كل الجواي فيها
كتب ليها
" عاهديني_بالبقاء يامنصفة💜
عندما تجتاح روحي عاصفة الأزمات ، عندما لا أطيق نفسي وأصبح مجرد شتات إنسان ، عندما لا أقوي علي السير كوني قدماي التي أسير بهما ، كوني الطريق والوجهة والدليل
وقبل كل شئ كوني الرفيق
عندما تُصبح روحي خاوية ، عندما يفصل بيني وبين رفع راية الاستسلام ثانية أو أقل
أحتاجك حينها ، إجمعي رفات نفسي ، إجبري خاطر روحي وأصلحي ما أنكسر بداخلي
ضمدي تلك الجراح التي تقيحت بفعل الزمن ، كوني باسماً يداوي روحي المتعبة ، كوني أقرب لي من نفسي ، ربتي علي كتفي وقولي لا بأس ..
لا بأس علي قلبك الذي أُحب ولا بأس علي روحك التي أهوي ، كوني موجودة حين يغادر الجميع لا بل كوني الجميع ولا تغادري
عديني أن أُصبح كل يوم علي إبتسامة من ثغرك وعلي هديل صوتك الذي يقتل التشاؤم ويحي التفاؤل
عاهديني بالبقاء والتمسك ، ناضلي من أجلنا
لا يغرنك صوتي العالي وغضبي وقوتي وصلابة يدي
فأنا ضعيف أحياناً وهذه الأحيان كثيرة
أحتاجك وبشدة ، مديني بالقوة لأجابه هذه الدنيا وكوني بقربي دائماً يارفيقة💜 "
بعدها نمت 😴
وانا بحلم بي العشة الصغيرة الحتلمني مع روان 💜
نمت وانا عاقد يدي وبسبح عشان بكرة يوم طويل وراجينا فيهو حدث مهم شديد
وكمان عشان احمد الخايف عليهو دا بس الكان مطمني انو احمد مفتح وبعرف يتصرف كويس
🤦🏾♂️
.
.
يُتبع
#أبوبكر_علي