اسألي عني الليالي

البارت ٦٢

تكبر فرحتي بعيني .. واشوف الدنيا بعيونك ..
ويمر بخاطري وظني .. أمَل وردي من اشوفنك ..

يا گمرة عيني من تهل .. يطگ و يورد الصندل ..
وحگ عيناك .. اضل وياك .. شما رادوا يمنعوني ..

كُبر حبي ومِلى گلبي .. صرت دنياي كلها انت ..
شمعة و نورت دربي .. هواك بكل درب شفتة ..
يا روحي شكثر وشگد .. صبرنا ولا جزينا الحد ..

هلك والعاذل يريدون .. وآنه وياك رادة نريد ..
وحجي الناس مرمرني .. وخلاني گصير الايد ..
يدولاب الوكت بيه .. يقسمة وصارت اعليه ..

الـبـارت الـثاني والـسـتـون..............

صگر : لج خابرني خالي محسننننن...
يكلي مرتك تتهجم على بنتي وتتهمهه عدهه علاقة وياك .. كتله لا ماتسوي هيج هي..لخمني على حلكي لمن دزلي رسالة الافندية هاي جدامج..
شهكت وكمشت ايده : والله ماكلت هيج..

صگر : وين تلفونج..
الحجية : يمة تشكك بمريتك..ليش هيج..
صگر : يمة لاتدخلين..تركيني وياهه وروحي..
شافته عصبي..سكتت ماكالت شي..عاط عيطة خلت ايمن يكعد يبجي ومخترع..عتيت ايده ورحت علي اسكته..
صگر : يمة اخذي ونزلي..
اجت اخذته مني..كمت ابچي وجسمي يرجف..متت خوف .. مو بوعية واخاف يضربني..كعدت بمكاني وايدي ضامتهه لوجهي..توهه طلعت وهو اجه كمشني من رگبتي .. حسيت اصابعه دخلت بيهه..عطت بعلو حسي : وخرررر..
خالة فاتت على صوتي..

كمشته من ايده وايدهه اللخ شايلة ايمن..متت قهر ع المنظر الصرنا بي : احلفك بروح ابيك اذا طكيتهه تحلم تحصل رضاي .. ليش هيج تسودنت عليهه..شمسويتلك البت..
صگر : هاااا..طلعتيني مخبللللل..هاي تريد تخزيني.. تخزينييييي..بس بسيطة..
الحجية : ليش تخزيك..مامنهه الشين والله..هسة غير نفتهم هذا محيسن شكال..شبالعجل صدكت انت اللاخ..
صگر : خابرني يصيح..كتله فهمني شكو .. ادور ماافتهم هذا صوته لو صوت البچي وراه..هاي جوان جانت دتبجي.. كال يصير مرتك ادز رسايل لبنتي تكللهه ام السحورة عندج علاقة برجلي بالسر..

كتله ماتسوي هيج هي..تلفونهه يمي واشوف كلشي.. حتى مايحتاج افتش وراهه..ماجاوبني.. سد التلفون بوجهي .. تدرين شيصير بيه اذا واحد قفله بوجهي..والله لو جدامي جان سويت المايسوي الخبل..شواي واجتني صورتين .. هاي الرعنة وأشر علي.. دازة رسايل جرايد لجوان تكللهه لاتتكربين لصگر لا اخزيج يم ابوج اكول عدهه علاقة بي..ام السحورة ... هاج شوفي هااااج خزيتينييييي..وانه منطيج كل الحرية .. كل الثقة .. حتى مااكلج لاتسوين هيج..اكول تفتهم وجبيرة ماتسوي شي غلط هي تعلمت..بس بعدج جاهلة..

دنوة : والله مادزيت هشكل..ماحجيت هيج..ماكتلهه عدج علاقة بي..انه اثق بيك ادري ماتسوي بيه هيج..بس انقهرت عليك .. عايفني حتى ماتحاجيني من طبت للبيت ذاك اليوم.. شنو تفسيرهه هاي..
عيونه صارت براسه..چن يطلع منهه شرار هلكد ماعصبي .. عاط بيه واجه يمي كمشني من دشداشتي ويعت بيه.. حسيت دماغي انرج..كمت ابجي وايدي على وجهي خاف يجيني راشدي..ماادري اسمع صوته هو ويصيح لو صوت ايمن يبجي يريدني..اخر شي حسيته انشال مني..وخرت ايدي شفت الحجي واكف يمه..

وائل : شبيك هرجت البيت صياح وعياط..ابنك تخبل..
صگر : ماتخبلللل..خبلوني .. هاي .. هاي فشلتني جدام خالي وبنته الچلبة..
الحجية : خالة دنوة وين تلفونج..انطيهيا خيشوف انتي شدازتلهه ويفضنا..
دنوة : مسحتهه هي والرقم..
صگر : هاااا..شگلنااااا..
كمشني من شعري ويجر بيه..بهذلني وانه مامسويه شي.. جنت خايفة علي بس ودزيتلهه رسالة..ياريتني مادازة.. اجت خالة صار جدامي .. هو ابتعد..
الحجية : انه شحجيت..عوف البت لا يصير شي مايرضيك .. اجت سولفتلي كلشي وكلتلي ع الرسالة..

بت خالك جذابة..شلون تصدكهه وهي خلت مريتك تجيب كبل موعدهه وانت متشرشح بالمستشفى رايح راد.. الجذب مو بفلوس وانت تدري جوان تكره دنوة..
صگر : يمة دااكلج دزلي الرسايل شنو اجذب عيوني..
الحجية : هاي الحقيرة انه اخابرهه ازفهه زفة تسوى وتستاهل ..تتبلى على چنتي..هسة لو ماحاجية چا كلت اي صدك بس اجت حجتلي..انت اطلع منهه انه احلهه..
صگر : والله ماكو غيرج خلاهه تستهتر وتطلع عينهه .. حطلع.. واذا اجيت لكيتهه بالغرفة انعل زينهه..

ماتحملت اسكت..كلماته أذتني وانه مامسوية شي.. كمت ابجي واحاجي : انه علمودك سويت هيج..خايفة عليك .. ماادري شبيك حتى ماتريد ايمن مو بس انه.. ماكتلهه شي .. بس كتلهه لاتتقربين لرجلي عوفينا نعيش مرتاحين..
الحجية : باجر اخذك لسيد..هاي الحية مسويتلك شي..
هي كالت هيج لو تخبل علينا..كام يصيح ويركع بالباب : مو انه زعطوط واروح وين ماتاخذيني..
الحجية : چا عاجبك تضل هيج..لخاطري دااكول..
عافنا ونزل ماحجة شي..ايمن ماسكت بس يبجي..الحجي ماكال شي نزل وراه..كمت اخذت ايمن سويتله حليب وسكت .. بس دموعي انه الماسكتت..

ادري جوان الحقيرة هيج سوت بي..انه ثولة غبية.. غبية وفطيرة مااجوز من سوالفي.. خالة ماعافتني بقت يمي تحاجيني..
الحجية : خالة صبرج على صگر..هاي اكيد ساحرتله الملعونة شكد حقودة..مو انخطبتي شعندج تبصبصين على وليدي .. عاد ياريت منطيهه وجه..اشو لابسلهه الچينكو..
دنوة : انه شنو ذنبي..بس يرزل بيه..شفتي شلون جر شعري حتى دشداشتي اشنكت..فوكاهه جدام خالو..شكد فشلت ..
الحجية : جيبي ايمن اشربه حليبه..كومي انتي نظفي الغرفة فركشيهه..خنشوف وين حاطته .. كبلهه روحي جيبيلي تلفوني خلارزلهه هاي ام التبلي..حسبالهه تايهتلهه
حركت راسي بالموافقة ونزلت..جبتلهه التلفون سمعت صوت الباب انفتحت .. طلع الحجي.. هم الي عين اعاين علي بعد..

صعدت فوك انطيتهيا..كلبت الكنتور گلاب..كل الهدوم طلعتهن والبطانيات..شواي وسمعتهه تخابر..
الحجية : الو خوية شونك.. صحتك .. على الله.. اجيت احاجيك ع الصاير اليوم..شكو ..
وخرت التلفون من اذنهه وفتحت حاكية ..
ابو مخلد : چنتج تغلط على بنتي وتتهمهه بشرفهه..اني دزيت لابنج كلشي هو يعرف يتصرف..تغلط وتفشر ممكن اتقبلهه .. بس مال تتهمهه بشرفهه لا ماصايرة..بنتي مخطوبة شلون تخلي عينهه على رجال اكبر منهه بسنين فوكاهه متزوج وعنده طفل..شي خيالي ميدخل العقل..
الحجية : نسيت بنتك شجانت ادز لصگر من رسايل ومكالمات تتوسل.. مانريد نكلب دفاتر عتيگة ..شي انتهى وراح.. بس چنتي لوما اعرفهه شنو هي چا وكفت وي بنتك وانه مغمضة .. بس ادري بيهه فقيرة رجل دجاجة ماتحل..مو ادور تكعد تسوي سالوفة اكبر منهه بمرتين..تعرف شني يعني مرة تكول لبنية عندج علاقة برجلي..

الجذب مو بفلوس والحق مبين ليش تغشم برويحتك..
ابو مخلد : شو اكلتيني وشربتيني..عبالك بنتج مو چنتج.. يعني اجاج الدليل ورافضة تصدكين..لا عبالج تفض السالفة هاي على خير..
الحجية : لا والله تفض وهسة هماتين..نسيت جوينة شسوت بمرية ابني..خلتهه تجيب كبل ولادتهه وسوت الماسواه العدو .. بلكت ماتت..بلكت ابنهه مات..منو يفيدهه.. جوان لو منو .. فهمني وانه اعذرك..
ابو مخلد : بس هذا ميدفعهه تتهمهه بشرفهه..
الحجية : مااتهمتهه..كلتلهه عوفي رجلي وحقهه.. وحگ الحگ .. بنتك غلطانة .. اشو هي طلعت منا ووليدي سودة عليه كره مريته والبيت وحتى رويحته..

كام يصيح وخالة تحجي ومنفعلة علي..كمت اكرضم بروحي .. كلتله بنتك بس طلعت من البيت ابني تسودن .. غلط على صگر وعلي..سدته بوجهه..
الحجية : اطلع معتبة اذا حاجيته بعد..يغلط على اهل بيتي جدامي..شني من وادم هاي..وليدي حيروح بالدواهي من وره السعلوة هاي الحاطهه يمه..عساهه بالگبور..ادور تسودن بوجهي حتى للسيد مايقبل اخذه.. لو بت جان كدرتله .. شون انتي لمن اخذج للشيخ.. يمة تگلوطت وعلي.. دوري يمة دوري..
رحت كعدت يمهه كمشت ايدهه : خالة مصدكتني انتي..
الحجية : اي وعيونج مصدكتج..چا انه ماادري بيج فقيرة قابل .. هذيج ملعبة ادري بيهه..

لاتشوفيني ساكتة..كلشي اعرف واشوف.. لمن اجو عدنا شفتهه شلون تعاين لصگر ودهه تعلسه..
دنوة : هههه..اي عاد صحيحة هاي..
الحجية : اي يخالة چا اغشج انه..هسة كومي فركشي الديلاب خنشوف هاي العگربة وين حاطه السم مالتهه..
دنوة : اخاف يجي صگر ادور يرزلني..
الحجية : ميخالف يمة تحملي..تره مو بوعيه..هسة بس يرجع اشد العلگ بايده ..بلكت يقنع يروح..
دنوة : بلكت..

كمت دورت بجيوب بناطيره والقمصان..حتى القماصل مات الشتا طلعتهن دورت بيهن..هدومي والبطانيات ماخليت .. الغرفة صارت كراكيب وهوسة حيل..دورت بالمجارير وجوه الميز والكومدي..اخر شي تعبت وبطني كامت تكرصني .. حتى مامتريكة وصار وكت غده..اخذت ايمن ونزلت اسوي غده .. خالة اجت يمي بين ما كملت وخابرت صگر..
الحجية : شوكت تجي يمة..وين انت.. يله متانيتك..
دنوة : ها شكال..
الحجية : هسة ربع ساعة ويجي..
خليت ايمن يمهه ورحت للحمام غسلت وجهي ورطبت شعري .. كفشة شعر صارت بيدي من وره صگر..

كمشني بكل حيله..بجيت بدون صوت بس دموعي تنزل.. حسبي الله مااكول غيرهه..عساهه بيج وراجعتلج.. كله من وراهه .. هي سوت هيج وانه بثولي وغبائي ساعدتهه.. شوكت اجوز وابطل اسوي شغلات تغثني ماادري.. مسحت دموعي وطلعت..صبيت الاكل جان يدخل صگر..مارفعت راسي ولا عاينتله..ادور يعوف الاكل وهو صاير ضعيف ماياكل .. كملنه وكمت اغسل المواعين..شواي واجه يحاجيني كله بنتر
صگر : صعدي فوك طلعيلي هدوم ارد اسبح..
دنوة : اي هسة..

همزين كبل لا انزل رجعتهن لمكانهن..خفت يرزلني .. طلعتله هدوم جان يجي وقفل الباب..سويت روحي مامهتمه.. مااريد يتقرب حيأذيني مثل ذاك اليوم..اجه يتمشى بإتجاهي و ادي بجيوبه..سحبني من ايدي ضليت واكفة بمكاني ..
خزرني : تمشين لو لا..
دنوة : لا..
صاح بيه جفلني..مشيت وياه مسيرة لا مخيرة..بدا يتقرب ويبوس بس كله بحدة ويوجع..كمت ابجي واوخر بايده .. كمشني عصر ايدي..شاغت روحي..مستحيل هذا صگر .. الهادئ ويخاف علي بكل حركة يسويهه خاف تأذيني.. خلص وكام يلبس ..جريت الدشداشة لبست وكمت ..وكف يم الباب وحاجاني..

صگر : لاتدخلين للغرفة بعد..
دنوة : ليش..وين ان....
صگر : بالگبور..اي مكان بس هنا لا..
سكتت ماجاوبته..عافني وراح ..درت وجهي اخذت هدوم ونزلت سبحت بالحمام الجوه.. مشى اليوم عادي..ابو مخلد بعد ماخابر خالة..وصگر كضى اليوم كله فوك..اخاف اصعدله ادور يسويلي شي..بس بالليل نزل ع العشه..خالة شدت العلگ بزنده هو مثل واحد تبنج..عيونه ثكلت وداخ .. كال حروح انام..ضليت اعاينله هو ويصعد..كامش المحجر وبالكوة يصعد لحظات وحط ايده على حلكه طلع بركضة للحمام.. متت خوف كمت مرعوبة يمه..

كام يستفرغ ويگح ..وجهه صار مطعن بزراك حتى ماكدر يتنفس..اختنك كلش..عبالك ماكل الدنيا كلهه .. هن لكمتين وبالكوة همات..ضل بالربع ساعة اكثر گوة يجر النفس ..
كمش ايدي وهمس : لاترحين..ضلي..
حاوطته من ظهره لأن داخ كلش..خلص وغسلتله وجهه .. طلع يمشي خطوة خطوة مابي حيل..كرفص روحه ومغمض عيونه .. كعدت يمه امسح على شعره..
همست : شلونك هسه..
صگر : احسن..
بقيت يمه لحدما نام وكمت نزلت جوه ..فرشت يم خالة بالغرفة ورحت بالهول ..

وائل : ها شلونه..
دنوة : نام هسه..
الحجية : بعد خيتك لازم اخذه للسيد..ينتهي اذا ضل هيج .. هاي جوان الچلبة سوتله عمل ماكو غيرهه..
وائل : لا يابة..خاف الرجال تعبان شي..
الحجية : هااا..چا شني تفسرهه بس طلعت جوان وليدي تسودن علينا صياح وغلط..حتى مريته مايريدهه هي وابنهه
وائل : والله انه شمعرفني بهسوالف..بس هاهية براحتج التريدي يصيرلج..شلون ناخذه..
الحجية : انه ادري..دااسألك..بلكت تقنعه..
وائل : باجر احاجي واشوف..حتلو اكلة رايحين بشغلة ومناك اخذه لسيد..تعرفين واحد زين..
الحجية : اي .. بس حاجي..
وائل : بحيل الله..شوفي انه ليش اكره محسن والباقين .. ماكو وراهم بس الضيم والفكر..هم ونسوانهم وولدهم..

هسة لوما جايين چا الرجال مابي شي..نعلعلا شيبهم .. ولا اطيقهم واحد واحد..
الحجية : بهاي وياك الحگ والله..بس شسوي خوما تضل كطعي ..هم وراك حساب وكتاب..
وائل : چا وهاي البلوة ماوراهه حساب وكتاب.. انه شلون شايل عليهم..باجر اخابره العب بيهم فلك هو وبنته..
الحجية : خوية مانريد بلاوي فوك بلوتنا..خنشوف السيد شيكول اذا كال مثل مامفكرة فالله وايدك..
وائل : خوش..چا خليهه يمي بعد..اروح اهجع هسة.. الصباح رباح عود..

راح ينام وانه همات كمت..نيمت ايمن وغفيت وياه.. كعدت الصبح على صوت صياح ..كمت بالعجل شفت خالة واكفة وكامشة صگر..هو يصيح گالب البيت..
الحجية : يله هاهية يمة بكيفك لاتضوج رويحتك..
وائل : يابة احنا علمودك..لاتسوي هيج بنفسك..روحة للسيد علمود تصير زين..عاجبك وضعك يعني..ماادري والله..
صگر : كتلك مااروح..واذا انفتح الموضوع مرة اللخ اهجم البيت على روسكم..مللتوني من العيشة وروح ابوي..
وائل : مامنك فايدة..اروح لشغلي احسن..

عافه وطلع..اكيد محاچي على موضوع السيد وماقابل .. هو شيقبل..ماكو هيج عناد..
خلص اليوم بس يصيح وعصبي..هو مو عصبي الا واحد يچفص ببطنه..بس هسة يعني صار موطبيعي نهائيا .. ادور كال لخالة اذا عرفت مخابرة ابو مخلد بعد مااطب للبيت.. تهستر علينا..وهاي وره الغده العصر شخط السيارة وطلع مدري وين ماقبل يكول..رجع المغرب ضايج ويصيح راسي غادي بلوكة هلكد ماثكيل..خالة جانت بالحديقة دتخابر اختهه ام جاسم..ايمن يبجي ويعيط خبصني يريد صگر وهو مايريده ينفر منه..كمت جبتله حباية وجع راس..شمرهه بحضني..
صگر : اخذي ابنج وروحي من چهرتي..مااريد اهجس حسه خوش لو لا..

دنوة : بس هو يريدك..ديبجي عليك..
صگر : اي يله يله..يريدني..اخذي وروحي..
اخذته ورحت لغرفة خالة..موتني يله سكت..شكد يتعب الجاهل .. هو هلكد مابچى بس سكت نام..ضليت كاعدة يمه وايدي على شعر راسه..كصير وقليل وناعم.. رفعت راسي شفت صگر يم الباب..منتچي علي ومجتف ايده..أشرلي اجي يمه..وكفت جدامه بس مدنجة ماعاينتله..رفع راسي باصبعه
صگر : نام..
دنوة : اي..

ضل يعاينلي من فوك ليجوه.. گلبي كام يدك سريع .. مشتاقه لحنيته..لاحساسه وهدوئة..شوكت يسمعني ونروح للسيد .. حتى عيب نضحك علي ونكلة رايحين بشغلة..قابل صغير هو لو يتقشمر بالعجل..خاصة صگر..يلكفهه هي وطايرة.. مايفوته شي..ربي الطف بحالي وحاله..والله تعبنا وشفنا الماشافه احد.. عليش..شمسوين بس اريد اعرف..الك بيهه حكمة الٰهي ..

مر اسبوع ماكو شي..نفس المعاناة والاسلوب الحاد ماتغير .. صار اسوأ..بالهوى يغص مو بالاكل..بس يتريك ويطلع مايرجع للوحدة بالليل..يجي لاشارب ولاشي..وين يروح ..مايقبل نسأله ..صدقانه يدكون علي مايجاوبهم.. ام جاسم خابرته تقنعه ماكو قافل..بس يستفرغ وراسه يوجعه..يكعد الفجر ويكعدنا كلنا وياه..وي الحجي وخالة زين..مايصيح بس انه المحصله الرزايل والصياح..اذا تأخرت بشغلة يريدهه يجي علي يعتني من دشداشتي يجيبني عت للهول لو للمكان اليريدني اسويله شي يريده..اجيت احاجي : صگر انت متغير.. فدوه شوف روحك شلون دتتأذى ليش هامل روحك..
صگر : لاتدخلين..انه من شفتج شفت فگر الدنيا كلهه..

دنوة : بس انه دااحجي علمودك..
صگر : ماريد اهجس حسج..اكرهج اكرهججج..حتى الغرفة ماانام بيهه تلعب روحي واختنگ..شرايده مني ماتكليلي ..
عاينتله بقهر..دموعي نزلت من وحيدهه : مااريد شي.. بس خايفة عليك ..
عفته ورحت لغرفة خالة..حضنت ايمن ودموعي تصب ماسكتت .. ادور باجر حينزل للواجب واخاف يصيرله شي .. من واحد يكلة بيك شي يتخبل خبال..ها تردون تسووني مخبل هيج هيج منكم..كمت مااحاجي بس خالة والحجي ..

كعدت الصبح مالكيت سيارته يعني طلع.. كمت صعدت فوك اخذت هدوم لايمن اريد اسبحه واسمع صوت تلفون.. تلفوني جوه وصگر ماكو..تلفونمن هذا..كمت ادور جوه المخاديد والچراچف مالكيته..فتحت الكنتور لكيته بين اللحف .. هو مال صگر بس ناسي..وانه اعرف الرمز فلتحته وكمت اقره الرسايل كمت ارجف انه واقره..صگر وجوان ..
جوان : شنو اليثبت تحبني..
صگر : يول والله احبج..
جوان : ومرتك الحوبة شلون..
صگر : دختولي..ماتهمني..اريدج الج..انتي بس فسخي خطوبتج واجي اخطبج اليوم كبل باجر..

جوان : اخاف تگلب عليه شمدريني..يعني افسخ خطوبتي على شي مو اكيد..ميصير..
صگر : چا شتردين..
دازتله مقطع صوتي..فتحته واسمع صوتهه شلون تحجي بتنعوص ونزاكة مصطنعة..
جوان : اممم..اريد نلتقي وتعترفلي واني افسخ لعيونك.. اكول لبابا الولد ميخليني اخذ راحتي او فدشي يعني هواي الاعذار هاي خليهه عليه..هو ميكول لا اذا اجيت خطبتني..
صگر : بت الحلال لاتحجين هشكل شعلتي شيبي.. ميخالف انه بعد يومين جاي لدوامي واشوفج هناك..
جوان : ههههه..عجبك صوتييي..
صگر : اي يولي..روحي هسه ..اجت دنوة..

جوان : وشبيك خايف منهه..ختولي هاي جاهلة ..
صگر : بس خيصير كلشي رسمي..وراهه تدللين..
جوان : يله حبيبي اخذ راحتك..
وراهه هو مخابر عليهه مرتين..المره الاولى بالليل حاجين ساعه وشوي..والمره الثانية الصبح اليوم حاجين نص ساعة هيج ..

ايدي كامت ترجف..احس اعصابي انهارت وحيلي باد .. كمت ابجي واكلب بالرسايل واحجي : ليش هيج.. ليش سويتي بي هيج ..خليتي يجيج هو ومغمض..
غصيت من البجي ودموعي مااحس عليهه بس تصير على رگبتي..عيوني غوشت..عجبه صوتهه..اي عجبه ليش لا .. انه من جبت ايمن هملت روحي..التهيت بي.. وهي بنية بت بيت ليش مايريدهه..تهتم بروحهه ودللة..

انه وابجي ومنتهية جان يدك التلفون..جفلت وكمزت من مكاني .. عارف .. ماادري اجاوب لو لا..داادوس رفض ودست رد بالغلط..خليته على اذني واسمعه..
عارف : يمعووود..ضل بالي عليك وينك..
دنوة : طالع لدوامه ماموجود..
عارف : ها العفو خوية..حسبالي صگر..شلونه ..
دنوة : يعني..موحيل زين..على الله..
عارف : الله يساعدكم ويساعده..ذاك اليوم اجاني جان ضايج .. هو هم تعبان طولو بالكم وياه..
دنوة : اي..ان شاء الله من يرجع اكلة خابرك صاحبك..
عارف : مشكور .. مع السلامة..

سديته وطبيت اقره رسايلهم ..صگر جان حاجيله على جوان .. ادور شلون حچي..جلدي كزبر..يحجون بصمات صوتية ومكالمات ماكو رسايل قليل..فتحتهن وكعدت اسمع وحده وحده ..
عارف : خوية انه وياك مو عليك..لهلسبب اكلك روح للسيد خليطيح على علتك..عاجبك هيج وي كل اذان تصيح من راسك وتستفرغ..الى متى يعني ..
صگر : اذا فتحت السالفة هاي مرة اللخ والله مااجيك بعد ولا اوصلك..هو انه اجي يمك ارد ارتاح..مختنگ من البيت
عارف : اي ادري..انه اريدك ترتاح ببيتك همات فدااگلك هيج .. وانت براحتك بعد شرد اسوي اكثر من هيج..
صگر : لا ماتقصر..عوفنا هسة..ارد اخطب جوان..
عارف : انسى هاي السالفة يول..نسيت مرتك لو شنو .. مو تحبهه كول يالله شجاك..
صگر : خرب عدو الله..هسة جايك للبيت..
عارف : يله انتظرك..

خطية شكد حباب هلادمي..شلون ينصحه ويذكره بيه.. بس هو ضايع ومتيه حتى روحه شيسمع وشيسوي.. شكول عليهه شسويلهه..انه انقهرت عليهه لمن ابوهه ضربهه..كلت خطية مو لهلدرجة..چي شبعت كتل بدون سبب..اعرف اذا الاب يمد ايده على بنته شنو شعورهه تجاهه .. بعدين هي جازتني تكلي ابنج يكوم بالسلامة وانتي لا..انه ثولة واستاهل كلشي يصيرلي..ماافتهم..صار سنين متعلعلة شوكت استوعب محد يريدلي الخير..شوكت بس اريد افهم .. اذا الشخص الوحيد اليصدكني هسه مضيع روحه حتى مايصدك بخياله..

دمي فار من كلامهه شلون تتنعوصله..دكيت عليهه .. مرتين يله جاوبت..اول ماشالته استلمتهه
دنوة : شوفي لج قندرة..هذا التلفون يمي..جربي تتقربين لصگر لا اذبحج والله..لعبتي روحي كرهتيني بحياتي الله ينتقم منج ومن كل انسان يسوي بيه هيج..حوبة يتيمة ماتضيع يم ربج..لاحكتج لاحكتج ..
جوان : وانتي شبي...
دتحجي وسديته بوجهه..هسة لو الدرب قريب جان رحت ملختهه بمكانهه..خوش هي ناطيه كمشة على روحهه .. كاتبتله انه افسخ لعيونك وتدلعله والاعذار هواي..صبرج علي الا اخزيج ..كافي بس اسكت واصبر بروحي..محد يستاهل صبري وتحملي..

اخذت لقطات شاشة للمحادثة ودزيتهه على رقمي والبصمات هماتين..بعد مايفوتني شي..أذتني هواي..وهسة تريد تأذيني برجلي ووحيدي ماعندي غيره..اخذ حقي بايدي ولا اكعد اتوسل بهذا وذاك يسويلي الشي الاريده..
اخذت هدوم لايمن ونزلت جوه..سبحته وبدللتله.. خليت الرسايل يمي وحده وحده..وجوان حضرتهه من رقمي..خاف تريد تسويلي بلوة لخ ماتكدر بعد..خلتلطخ راسهه بالحايط .. شلون تشوفه اذا ناسي تلفونه..طبج مرض بس عرفتي تسوين سحورة وتاخذي مني..اذا رجع اخذه للسيد رضا او مارضا .. تعبت اشوفه تعبان وبالكوة يتنفس..حتى مايريدني ويأذيني لمن يتقربلي..مااحسه هو..ولا يمد لنفسه القديمة بصلة اصلا .. بس الله بالمرصاد وين تروح..

ماردت اتسرع واسوي شي اتندم علي بعدين..اول شي ناخذه للسيد والباقي انه اسوي..عندي كلشي ..

مرت اربع ايام ماكو شي..لحدما كاعدين دنتغده جان يدك تلفون خالة..كمت جبتلهيا وهلكد ما صوت الصيح والبجي عالي سمعته..
الحجية : سترك يالهي..يمة شبيج تبجين خرعتيني..
اخلاص : يمهههه..محمود شبعني كتل..الله يرضاهه محمد .. كسرني تكسر..
الحجية : ايا مسودن..ليش يمة..شمسوية..
اخلاص : يمة مامسويه شي وداعت عيونج..والله مامسوية .. شفت محادثات يحاجي وحده بنية وديتفقون على يوم زواجتهم .. كمت ابجي واعاتبه..كام ضربني..
الحجية : ياااا..فوك صخام الوجه يطگج..تعاي لبيتنا وانه اتصرف.ماعدنا نسوان تنطك..

اخلاص : اي يمة جاية هو انه بالطريق..بهذلني الله ياخذ حوبتي..طردني بالشارع والملابس شمرهن شمر علي..
الحجية : خاف حلتلك الكعدة وحيدك شفتهه بديرة غرب استغليتهه..درجعي يمة وانه اتصرف لاتخافين..
سدته وكامت من الاكل ..
دنوة : ها خالة شبيهه اخلاص..
الحجية : محميدان طاكهه چي شايفته يحاجي بنية خطيبته .. وين الغلط اذا عاتبته..چا تضل منجبة وساكتة.. حتلو تضل ساكتة انه مااقبل..منطي مرة شهادتهه بطولهه وخريجة بعدين يدور وراهه..سهلة ..صگر مريض مو معناهه امهه ماموجودة ..
دنوة : وهسة هي حتجي..
الحجية : اي جاية بالطريق..

سكتت ماجاوبهه..كملت اكل وكمت غسلت المواعين .. وره ساعة اندكت الباب..طلعت افتحهه صارت اخلاص بوجهي .. بطنهه عالية وجهه مصوفر وايدهه مليانه زراك وحَمار .. ابنهه وراهه كامشهه من صايتهه وشعره مخربط يبجي .. سلمت علي من وره خشمهه وفاتت..حضنت خالة وتبجي حتى جسمهه يرجف وي دموعهه..انه ساكتة ماحجيت شي..گلبي مثل القسى عليهه..بعد لو اشوفهه تبجي دم مااساعدهه .. مللتني واذتني لحدما الله كال بس..بس انقهرت على ابنهه.. وهي حامل كالت بالشهر الرابع..بلكت طلع الطفل مشوه ع الكتل الكاتلهيا ..

كعدت تحجي وتبجي..وهذا رامي ابنهه يمسح دموعهه ويدفن راسه بحضنهه..كفت الردان واشوف ايدهه مليانة زراك .. تذكرت عقيل بالعجل..هيج جان يكتلني..خو لمن يجي شارب اخر فترة يموتني لحدما يتعب ويروح ينخمد..همزين خلصت منه عوذه..
كمت اخذت رامي اغسله واحاجي : لاتبجي على ماما.. هسة تصير زينة ميخالف..
هو يريد يحجي بس خايف ..كتله : اصبلك اكل..
رامي : اي خالة..
دنوة : يله اكعد هسة اصب..

صبيتله وكعدت يمه بين ما كمل وراح يركض يم اخلاص .. ايمن جان نايم..كمت اشوفه بعده كاعد..لكيت تلفوني داك علي رقم غريب..عفته مارجعت دكيت..شواي ورجع دك.. اول ما شلته اسمع صياح وغلط..صگر..
صگر : ليش تلعبين تلفوني..ادبسز الف مرة محذرج لاتتگربين شنو انتي ماتفهمين..صبرج علي..اربع ايام وجاي
جاوبته ببرود : مالعبت بي..سمعته يدك وجاوبت..
صگر : كتلج اذا يحترك معليج بي..بس ماتستوعبين..
دنوة : اي مااستوعب..يله ديربالك على روحك..
سده بوجهي ماجاوبني..اكيد واصلة الحچي من جوان.. بس شمدري..يعني شلون .. ماادري .. يجي واشوف شسوي ..

بالليل اجه الحجي شاف اخلاص..كام يحجي ..
الحجية : هو انه تانيتك تجي ونشوف صرفة..
وائل : مااريد ادخل واقرر شي هي ماتريده..خالو اذا تردين الرجال لازم تتحملين الضره..
اخلاص : لا خالو فدوة الك شتحمل..انه بس اريد اعيش .. انه وابني والطفل البطني وين نروح..
وائل : باجر الصبح اخابره ونشوف شيكول..
اخلاص : هو مايريدني ..بس خوما اصير مطلكة..
وائل : هسة مافهمنا..اكلج ارجعي تكليلي مااتحمل الضرة .. اكلج نطلكج تكليلي خوما اصير مطلكة..شتردين

ضلت ساكتة بس تبجي..
الحجية : خوية عوفهه..انه اتفاهم وياهه واردلك خبر..
وائل : يله ماعندي شي..شتردون اسوي ..
عافنا وراح لغرفته.. مرت اربع ايام ماكو شي ..اخلاص كلساع برأي..وهذا رجلهه لا خابر ولاكال..شدعوه هيج.. فوك ما حتزوج عليهه هيج شايل خشمك..وابنك ..عفته هيج .. شنو من نفسيات هذول..
صگر ماخابرني بعد..سولفتلهه لخالة ع الرسايل.. ماتحملت احجي ببرود..كمت ابجي ..
الحجية : يمة تره وليدي مايدري..وداعتج هسة بس اخذه للسيد ويرجع يشوفهن مايتذكر برويحته شمسوي..
دنوة : ادري خالة..بس شلون اخاف هم مايقبل ناخذه..

الحجية : اذا ماقبل اجيب السيد لهنا..ماكو غيرهه.. خوما يضل هيج..
دنوة : زين الحجي خابرتي بعد لو هاهيه..
الحجية : اي خابرته..كتله أي شي يصير بصگر انت وبنتك السبب..كال انتي ماناوية تصدكين چنتج هي السبب ..
دنوة : شكتيله..
الحجية : كتله مااحاجيك..بس بيوم اخذ صگر للسيد هو حيسمع بإذانه ويشوف بعينه شحيصير..وكتهه هو يتصرف مو انه.. كام يطكطك..عشتووو..ماينلام وائل من يكرههم .. هاي عود بيناتنا عشرة عمر وروحات وجيات..بس الوادم مايعجبها العجب .. وهاي جوان شوفي الله شحيسوي بيهه.. هسة حسبالهه تفسخ ويجي صگر ع الحاضر يخطب..

شني هاي وين عايشة..متخيله روحهه هي وبس والسالفة حتمشي على مرامهه..باجر بس  يجي صگر واخذه بعد ماتقبل غلط..
دنوة : بلكت..واخلاص شحتسوي..
الحجية : مانريد نضغط عليهه..هي شتريد نسوي.. انه امهه واخوهه وابوهه مامدينا ايدنا عليهه..يجي هذا فوك ما حيزوج عليهه يطكهه..خاف حسباله ماخذهه من باب الملهى ويصول ويجول على راحته..لا اكو من يركده بمكانه ..
دنوة : هي حتلو تريد تطلك مايصير هسة..چي حامل..
الحجية : هو چا انه ليش دااكلج نتاني..وانه ابقى ام .. خوما اريد خراب البيت لبنيتي..نشوف هو شيكول..

بالليل كملت تنظيف وطبيت للغرفة انام..جان تكب العيطة .. اخلاص تبجي ومادري شتحجي بالتلفون..اجت خالة مخروعة عليهه..
الحجية : وج احجي منهو هذ..
اخلاص : يمة..محمود ..
الحجية : انهجم بيتج..جيبي احاجي ..
اخذته منهه جان تعيط بي..
الحجية : احترم من تحجي..مدتحجي وي الزعط .. اي عمى بعينك..لاتشوفنا ساكتين تحسب ماوراهه اهل.. خوانهه اذا عرفو بسوايتك تصير سالفة الهه اول مالهه تالي.. عمامهه موجودين وخالهه وانت اعرف منو عمامهه.. تزوج عليهه وتريد ترجعهه..ماكو هيج حچي ..

باجر يرجع اخوهه..وانه موجوده لاتشوفهه وحيدهه هناك .. غيرهه ماعدنا .. مو بالتلفون الحچي .. يله الله وياك ..
اخلاص : ها يمة شكال..
الحجية : شكال..صخام بعينه..يكول ارجعهه بس مااريدهه .. علمود رامي والطفل ببطنهه..كتله انه واخوهه موجودين باجر تعال مو بالتلفون يصير الحجي..
اخلاص : اووف يمة والله دخت..اذا طلكني وين اروح.. ابقى يمكم يعني..تتحملوني انه وجهالي..
الحجية : يمة انه خوما اريد خراب بيتج..انتي جبيرة وتعرفين .. بعد براحتج مانجبرج..يجي ونفتهم..يمكن متندم .. ولو انه حرزلة خوما تايهتله السالفة وشلح واعبر..

عفتهم يحجون ورحت للغرفة نيمت ايمن ونمت يمة.. كعدن الصبح على صوت صگر بالهول..گلبي كام يدك سريع وايدي ترجف..خايفة ومشتاقتله..يارب يصير مثل مامخططين .. كمت غسلت ولميت شعري ولبست شال وطلعت اشوفه.. سلمت علي ردلي السلام بدون مايعاين علي..كاعد ويهز برجلة چن واحد ينتظر شي ومتلهف يشوفه..خالة يمكن مامحاجيتة بموضوع اخلاص..عافهه وكام..
صگر : تعاي وراي..
تانيته يصعد وصعدت وراه..سديت الباب وانتظرته يحجي..

صگر : وين تلفوني..
دنوة : شتسوي بي..
صگر : اعاين علي..شسوي يعني..تلفوني اريده..
دنوة : لمن خابرتني منيلك تلفون وشمعرفك بسالفة جوان..
صگر : وانتي شكو..لاتدخلين بحياتي..
دنوة : انه مرتك مو امك لو اختك..يعني حياتك من حياتي .. ادري بيك تعبان ومضيع..مو من گلبك هلحجي.. خليني اساعدك وترجع مثل كبل..
صگر : ليش شبيه..مخبل لو مسودن..
دنوة : حشاك..بس انت تعبان..

صگر : لاتفرين السالفة بس خاطر تعرفين شلون وصلي الحچي.. تلفوني القديم بالمركز خابرتهه منه وعرفت..
دنوة : وتحجي جدامي هيج وتريدني مااكول بيك شي..
صگر : جيبي التلفون وروحي مني..تره
دنوة : مايحتاج تهدد.. طلعت التلفون من الكومدي وانطيتهيا .. عفته ونزلت.. مشى الوكت لحد المغرب هو كعد من النوم .. خالة كالت باجر اخذه للسيد الصبح..اذا ماقبل يروح اجيبه للبيت شسوي ماكو غير حل.. انه دورت الغرفة مرة اللخ اريد الكى شي .. ماكو..على حطتهه..هو طول اليوم ماحاچاني .. اجه عيونه مقفلة من النوم يمنا بالهول..بين ما صحصح خالة حاجته بموضوع اخلاص..

الحجية : يمة ارد احاجيك بشي..
صگر : حجية اذا بموضوع السيد لاتفتحي لخاطر ربج..
الحجية : لا يوم بس انطيني مجال.. اختك اخلاص..
صگر : شبيهه..
الحجية : رجلهه عكبة يجي..طاكهه ومطردهه ..
صگر : هااااا خير..طالعة من زرف الحايط.. ماوراهه احد لو شنو..ليش يضربهه ابن الكلب..
الحجية : شايفة تلفونه..طالع خاطب وديتفقون على يوم زواجتهم..يعني حگهه قابل شني تشوفه بعيوناتهه وماتكول وتحجي..الا اذا جانت مسودنة..
صگر : والله طكت براسي اروح افلش وجهه..انه اخوهه وابوهه ماضربناهه..

تجي انت فوك ماشافتك تحاجي نسوان تضربهه.. اذا مااجه باجر اخلي طلقة براسه..
طلع تلفونه ودك علي.. خالة تهسترت من كال اخلي طلقة براسه..كامت تريد تسكت بي .. هو انهد بعد شيسكته .. منا هاي سالفة جوان مأثرة علي..فالتمت كلهه..خابره ويصيح .. يمكن مافهم منه شي كبل انهد بي..
صگر : باجر اذا مااجيت للبصرة اجيك لبيتك واسوي الماسواه احد..فوك ما تريد تزوج عليهه ضاربهه ومطردهه.. خاف عبالك ما وراهه احد.. اي يلهههه ..
سده جان تجي اخلاص ..
اخلاص : ها خوية شسويت..

صگر : باجر يجي..انتي شتردين...خاطر مااسوي شي بكيفي..تطلكين..
اخلاص : لا لا..مااطلك..وابني والطفل ببطني وين نروح..
صگر : مثل ماتردين..ماادخل انه ..
عافنا وراح..كام ابد مايطيقني ولا يعاين بخلقتي.. كامش التلفون ويفتر رايح جاي.. بالليل نيمت ايمن ونمت بعد مادري بي..اخاف اضل يمه..على غفلة يطلعلي سالفة ويرزلني .. خالة ماحجت شي بس خابرت السيد كالت مانكدر نجي باجر ..

ثاني يوم العصر اجه محمود..ماطبيت بس خالة وصگر والحجي..اخلاص مارادت تشوفه حتى.. چا شكد متوترة علاقتهم..بس خطية الجهال .. خنشوف شلون تصفى .. كمت افتر بالهول رايحة جاية واسمعهم..
محمود : اني جنت اريد اجي حتى اذا ماكتلي..
صگر : زين تدري وراك مرة وابن ..
محمود : حقك متعرف المشاكل شتسوي..اني مليت وجزعت وعلي..مابيه حيل بعد..
الحجية : ليش يمة شمسويه بنيتي..مو جابتلك وليد ..
محمود : اي خالة ماكلت شي..واني جيتي اذا الهه سبب فبس علمود رامي والطفل ببطنهه..
وائل : احجي العندك خاطر مانظلم احد بيكم..ولو انه لو بيدي اسوي العجب..بس مااريد ادخل ..
محمود : رحم الله امك وابوك..اني حاجي وياهه هذا الحچي وكايللهه صابر بس علمود الجهال..

وهسة لازم تعرفون..الشرع حلل اربعة واني تزوجت على شرع الله ورسولة..اخلاص اجيت ارجعهه والسبب كلته شنو..
الحجية بشهكة : يمة..متزوج على بنيتي وجاي ترجعهه.. شني ماعدهه اهل يوكفون بسدهه..
محمود : لا عدهه..ولهلسبب اجيت احاجيكم حتى تكونون امام امر الواقع..مليت من المشاكل والشكوك والاحتمالات .. قطعت الشك من اليقين وتزوجت..رجال مايعيبني شي والمرة التقصر بحق رجلهه تستاهل اليجيهه..

انه واكفة واسمع جان تجي اخلاص دفعتني وطبت تصيح وتبجي بحرگة ..
اخلاص : هاااا يعني سويتهه صدك وتزوجت.. نذل اي نذل .. شترجى منك..هاي هيج تجازيني ..
كام عليهه ضربهه راشدي..بس مو راشدي .. هلكد ماقوي من يمي تأذيت..حسيته ابوي لمن جان يضربني .. صگر والحجي تخبلو..خو صگر عبالك مايشوف جدامه بعد.. كمشه من قميصه تكطعت الدكم ..استلمه بوكسات ودفرات .. خالة تريد تكومه هي واخلاص..ماكو.. الرجال انتهى حتى مايكدر يدفعه بعد..كوّمة وطلعه هو ويصيح ..
صگر : تمد ايدك عليهه ببيتي ياعاااار..دمشي اطلع ولا تشوفني چهرتك بعد..ياكلب ابن الكلب..يلهههه ..

محمود : لاتنسى شلون لميت عائلتك وانت تتختل خايف ياجبان ياخنثة..
صگر : دنجب لك دنجب..كلهه فلوسي..راتبي كله ادزلكيا تصرف منه..لا خلف الله عليك..لو منك چا كلت حگة .. قابل انه هيلكي واخلي عديلي يصرف على عائلتي.. كبور تلفني اذا صدك..يله توكل ولا تشوفني خلقتك..
كام واحد يصيح ع الثاني لحدما طلع وراح..اخلاص بس تبجي..هلمرة على صگر مو رجلهه..خطية هو هلكد ما جان عصبي ومدنج ماانتبهنا علي..لمن فات جانت شفته طاكة دم وخشمه..فات يغسل ..انه بقيت يم اخلاص والحجية ..

اخلاص : يمة خليني يمج فدوه..
الحجية : اي يمة ابقي..هذا شكد چليب..بس لاتخافين .. هسة يجي يرجعج وهو الممنون..
اخلاص : ماادري بعد..الله كريم..

انه واسمعهم كلت بگلبي ربج مايضرب بعصا..شكد اذتني وعيرتني..شوكت ماتشوفني ها مطلكة واخوي اخذج ستر عليج منو ياخذج انتي..حتى خلت جلنار تحاجيني هيج.. خلتهه تلبس لصگر وتتزينله بس خاطر يتقربلهه وتربطه بي بعد مايكدر يتنازل عنهه لو يطلكهه..حارت شتسوي بس تريد تبعده عني وتخلي ضدي..انه ماكدرت اردهه بس اجه من يكدرلهه ويعرفهه قدر نفسهه..هلكد ما لعبت وصالت وجالت حتى ماتصدك برجلهه والثقة معدومه.. الحمدلله على كل حال .. مو قصدي اتشمت بس الدنيا ناعور ..جايك الدور جايك .. اذا مو اليوم فباجر ..

وره يومين خالة بدلت هي والحجي اجت على صگر تحاجي .. جان كاعد بالهول يدخن..رجع للتدخين ولا چن جان مريض والدكتور منعه منه ..
الحجية : يمة ابوس راسك بس امشي وياي..
صگر : لاتحجين هيج حجية..شبيج وين اروح..
الحجية : للسيد ييمة..والله گلبي غادي چولة عليك..ماتنطفي ناره الا اشوفك تصير زين..
صگر : مابيه شي..اتركينا من هاي السالفة رحم الله امج وابوج..مالي خلك حتى روحي ..
وائل : يابة مايصير هيج مشعوط امك..امشي بس ع الاقل نشوف شبيك..خلنعرف راسنا من رجلينا..كاعدين وساكتين چي حضرتك ماتقبل .. هاي شلون طركاعة..

صگر : كتلك خطوة وحده مااخطي برة البيت..ولاتفكرين تجيبي هنا..اعوف البيت واطلع حتى ماتشوفيني..
الحجية : يمة حرام عليك..هاي جوينة الچلبة..عساهه بنار جهنم تحترك واخلص منهه..ام السحورة شسوت بوليدي .. صار مخبل بيهه..
صگر : لاتجيبين طاريهه..مالهه دخل..
الحجية : هااا شوف..شوف شلون ادافعلهه..من شوكت هيج مهتم بيهه..ولك يمة اصحى دخيلك وخليني اخذك للسيد .. مايصير هيج..

عاينلهه وكام صعد فوك..كامت تبجي وتلطم..متت قهر عليهه .. رحت حضنتهه واهدي بيهه..جان تجي اخلاص..
اخلاص : ها مايقبل يروح..
الحجية : لا..
اخلاص : اخاف احجي ادور تزعلين..بس هاي الثولة ماتفتهم .. اكو وحده تخلي بت خال رجلهه تصعد لغرفتهه.. چمالة جانت تحبه ..ماادري يعني .. بلكت باكت شي صخمت.. لا هسة هي سوت الاكثر..
دنوة : جانت تريد تجيب ايمن..شمعرفني حتسوي هيج.. ولمن صعدت دورت الغرفة مالكيت شي..
اخلاص : اي هو انتي ثولة شترجى منج..

عفتهه ماجاوبتهه..هو انه حايرة بضيمي وهاي جايه ادقق فوك راسي..مابيه حيل حتى اجاوب..

مرت الايام..ومحمد عرف بصگر..خابر خالة انطاهه خبر ان حيجي وراهه بيوم اجه الصبح..كعدت يمه احاجي ..
محمد : ها شلونه..
دنوة : يسمع حسك..ديصير اسوأ..
محمد : والله عفت شغلي واجيت..كلت شيصير خيصير .. بلكت اقنعه ونروح..
دنوة : بلكت تكدر تسوي شي..خالة تعبت بعد مابيهه حيل .. وانه مايتحمل مني حجاية..
محمد : اشوف شكدر اسوي..لايضل بالج..سبع شدة وتعدي ..
دنوة : امين..الله يسمع منك..

طبعا ماكدر يسوي شي..يحاول يطلع وياه ماكو .. هو يوم عن يوم اسوأ..بس يكابر ومايحجي شي..ولو يستفرغ ويمشي بسد الحايط من التعب بس مايقبل احد يكمشه لو يساعده .. حتى الاكل الاطبخه ماياكله..يكول وصخ ونكس .. يعوفنا ويطلع ياكل بره..الغرفة مايطبهه وحتى البيت من يكعد الصبح لحد بالليل بالدعش يجي يلف راسه وينام.. بس اسمع صوته وجه الفجر يستفرغ ويصيح وينك يابة..

خالة جابت السيد للبيت اول ماشافه عاف البيت وطلع.. يومين قافل تلفونه مايجاوب .. محمد طلع وراه شافه يروح لبيت عارف..شوي اطمنت لمن عرفت مكانه..خلي لايجاوب بس كون مابي شي ..

وراهه بيوم كعدت من النوم على صوت ايمن يبجي.. شربته حليب ورجع نام..سمعت صوت طكطكة..رحت لمكان الصوت لا اراديا..گلبي كالي هذا صگر..لكيته كاعد بالكع ومدنج راسه يدخن..ضليت واكفة بمكاني وره الباب .. فتح التلفون يكلب بي..شواي وصدمني لمن طلع الاغنية اليحبهه .. نصى الصوت وخلاه على اذنه ومغمض عيونه.. لحدما خلصت وطفاه.. اول ماكام رجعت لغرفة خالة ركض..خفت يشوفني يمه ادور يرزلني.. تغطيت وحضنت ايمن چن نايمة ..

گلبي يدك سريع وانفاسي مامنتظمة..مشتاقتله مشتاقه لشوفته ..صار شكد ماشايفته..ادور عكبة حيروح لدوامه ويتأخر بالعناد يله ينزل .. خايفة ومشتاقة وتعبانة وو .. اكثر من شعور .. اخاف احاجي بيهن..ادري مايتقبل مني شي..اذا هو حتى ايمن مايقبل يشوفه..

دقايق وحسيت روحي ارتاحيت شوي..بين غافية وبين كاعدة احس شخص يمي..قريب مني حيل..حتى انفاسه حسيت بيهن .. مد ايده على خدي..گلبي كام يدك سريع بشكل ..
همس : دناوي..
سويت روحي نايمة ماجاوبته..قرب شفايفه من رگبتي واخذ نفس طويل..لمن زفره حسيت برجفة واضحة بأنفاسه.. ضل على وضعيته لحدما حسيت شي حار صار على رگبتي.. ماتحملت انداريت علي شفت دموعه بعينه ..
همست : شبيك عيني..
ماجاوبني..كمت وگومته وياي .. طلعت بره احاجي..

دنوة : شبيك خوفتني..
صگر : اريد انام..مانايم صار يومين..
دنوة : ويعني..
صگر : ارد انام يمج..بغرفتنا .. تعبان ..
دنوة : يله..
حضني وصعدنا فوك..قفل الباب وطفى الضوه تمدد وصاحني يمه..تقربت لفني بحضنه وراسه بشعري يشم بي وضايع احسه..
صگر : دنيتي..مشتاكلج وعيونج..
خليت ايدي على خده : انه همات..ضل بالي عليك..
صگر : حگج..بس وغلاتج ماطايق البيت والغرفة.. مختنك احس روحي بقفص بس اطب هنا..

اليوم احسن..محمد وعارف اخذوني لسيد..
دنوة : لا والله..شوكت هلحچي..
صگر : البارحة المغربية..جنت يم عارف ومادري شصار بيه .. اختنكت وذبيت من راسي ولو جنت ماحاط بحلكي شي .. شحجيلج..احس العگارب تكرصني من كل مكان.. ذبيت روحي شمر بالكع ماتحملت..وجع قوي عصر معدتي.. عاد لمن اجه عارف ومحمد اخذوني ماحسيت..قره علي وانطاني مي اشربه .. وتحسنت خير من الله ..
دنوة : چا خالة المسكينة تتوسل بيك تروح وانت قافل .. تالي متالي حتى البيت عفته..
صگر : بنيتي..بس هلمرة رحت بعد مااروح.. صرت زين شعندي رايح..

دنوة : ليش تعاند..بعدك ماصرت زين..
صگر : دااحس بروحي زين..لاتعاندين..
سكتت ماجاوبته .. محمد ليش ماكاللنا..شنو هلسكوت هذا .. شنو معناه..وصگر معند مايقبل يروح مرة اللخ..انه صار بيه هيج واعرف مو بسهولة يروح..بس لو اعرف وين حطته .. ادور ابو مخلد ومرته وكلهم تلفوناتهم مقفولة مانعرف عنهم شي .. اكيد وراهم شي..
فزيت من افكاري على صگر يبوسني من خدي .. رفع راسي ويحاجيني..

صگر : دنيتي..لاتحسبين اريدج على كد رغبتي.. تعرفيني شنو .. ادري اذيتج بس مو بيدي وعيونج..
دنوة : انت الوحيد ماافكر يستغلني ولو بشي بسيط .. لاتفكر هيج..هم تعبان وحقك..
ابتسم بتعب وتقرب باسني من خدي..انفاسه سرعت .. كمش ايدي خلاهه على صدره..احسهه خدرت .. صار شكد مامحسسني بوجوده هيج.. تقرب من اذني يبوسني على كيفه وبهدوء..
همس : اريدج دناوي..
دنوة : اذا أذيتني تبتعد..
صگر : حاضر..

استسلمتله وصرت كلي بحضنه..حضنه الاحس روحي عصفورة صغيرة بي..يلمني كلني وينسيني كلشي .. صدك احس برجولته وانه يمه..صحيح متغير شوي بس المهم مو مثل اول مرة..جان مو هو خلاص..
كمل وباسني من راسي..حضني ويمسح على شعري لحدما غفيت ماادري بي.. كعدت الصبح مالكيته.. لبست ورحت سبحت..كملت ونزلت ..مرن يومين حالهن حال الكبلهن .. الثبح تخبل علينا ..كام يصيح البيت وصخ البيت نكس وطلع ..

وره هليومين كعدت الصبح واشوف الهوسة للستار.. صگر كاعد ع القنفة وراسه بين ادي..خالة تبجي وتحجي حجي ماادري حتى مافهمته من البجي..نزلت اشوف شكو..

اخلاص : زين نزلتي..عايفة ابنج علي انه وامي.. هو انه بطني لخشمي وامي تعبانة مابيهه حيل شكو عايفته..
دنوة : بعد وكت..مايكعد هسه هو..حتلو يكعد مايبجي ..
اخلاص : عودك صايرة تفتهملي بالجهال..دروحي ..
عفتهه ماجاوبتهه..رحت يم خالة ..
دنوة : شكو شبيكم مخبوصين..
الحجية : چا غير وليدي تخربط من صبحيات الله واخذناه للمستشفى..هو كعد وكال ارد اطلع ماريد ابقى..
خليت ايدي على صدري بخوف : ليش ياستار.. ذاك اليوم جان زين هو كال..
عاينتله بخوف وعيوني مدمعة : مو كلت زين..
اخلاص : عوفي لاتحاجي..هو تعبان

دنوة : انتي لاتدخلين..غير اعرف رجلي شبي.. هو البارحة كال زين مابيه شي..شصار هسة..
اخلاص : هو سوه براسج خير وانتي ذرة خير ماكو عندج .. فكر وتبقين فكر..من يوم شافج ماشاف الراحة..
الحجية : يمة لاتحاجيهه هيج..حگهه تريد تعرف شصاير خوما نمنعهه..بس يخالة هو هذا الصار..اشو كعد من النوم يصيح راسي يوجعني..كام يستفرغ وتكوم بمكانه..حتى مالحكت علي بس لمن صوت طبة..
هي ودتحجي ايمن عاط.. هو عاط وصگر تخبل علي .. كومني هو ويعت بيه من دشداشتي مااندليت حتى دربي ..
صگر : تاخذين ابنج وتطلعين من البيت لا اخلص عليج..

الحجية : يمة على بختك وين تروح..هذا بيتهه لا اطردهه منهه .. استهدي بالرحمن فدوة اروحلك..
صگر : والله .. اذا ماطلعت هسة بعد تحرمين تشوفيني .. لحدما اموت واخلص من الضييييم..
كام يصيح انجن بشكل..ادور مدري منين يجيب الحچي .. چن انه مأذيته ومسمعته كلام ماينسمع..
الحجية : خالة اخذي ايمن وروحي لبيت جدج..
دنوة : وصگر شلون..اعوفه واروح..
الحجية : ادري ييمة مدتشوفي شلونه..حيصيرله شي سودة مصخمة بوجهي..روحي خالة خلي محمد يوصلج..

جرني من شالي خنكني هو وگاز على اسنانه : تطلعين لو اطلعج انه..
انه بعد حتى مااكدر احجي..اختنكت حسيت روحي بزردومي صارت..اجت خالة تفك بيده..
الحجية : يمة دخيلك البنية حتموت لاتسوي هيج ..
عافني ودفعني للغرفة..كمت ابجي والبس الصاية والشال .. صعدت فوك بركضة خليت ملابس الي ولايمن ..حليب وممات ثنين وغراضة الباقيات..نزلت شلته ودموعي تكت على خدودي هو حظي مايكعد ادري بي..طلعت بدون ما اعاين علي .. شوكت تصير زين والله تمرمرت وتعبت حتى من روحي..
محمد وصلني لبيت جدي وراح..

لمن طبيت لكيت ورود وخالة فاطمة حتى غدير وحنين..  ام عقيل هماتين..كلهم جايين وعادي هاي دائما يجون حتى كبل .. سلمت عليهم والابتسامة بالجذب ابتسمهه..بس مااريد احسسهم رجلي طردني.. عفتهم يحجون ورحت ع الثلاجة اكل شي..جان تحاجيني ورود ..
ورود : سمعت صگر مريض..شبي..
دنوة : اي تعبان صارله فترة..
فاطمة : خير ان شاء الله..شبي المسعد..
دنوة : شبي..حظي هذا..بت خالته مسويتله عمل ومايقبل ناخذه للسيد..
غدير : صخام..صدك تحجين يمعوده .. ماتجيبون السيد للبيت تسوون شي خطية الزلمة حيروح..

دنوة : جبناه خية..عاف البيت وطلع يومين ماخاش للبيت .. بعد شنسوي..حتى محمد حاجاه وهو بعده قافل..
حنين : خطية..مايستاهل..
دنوة : اي والله..بلكت باجر لو اليوم ..
فاطمة : وانتي شعندج جاية وعايفة زلمتج وحيده..
دنوة : هو كال روحي..مو بكيفي اكمز .. خالة ابتسام وين .. جديتي وين..
حنين : وره البيت دتخبز..
دنوة : وليش عايفاتهه وحيدهه..مو خطية مره جبيره تخبز .. چا انتن شنو..وحدتجن شكبرهه..
ام عقيل  : مو رجلج متخبل وطاكج تجين اطلعين حرگتج بينا .. تره بره اطلعج بالدفرات..

دنوة : العفو خالة بس مايهمني كلامج..حشاه حبيبي مايمد ايده علي مو مثل البعض .. زلمة وينحلف براسه..
شلت ايمن ورحت وره البيت..بوستهم وخليت ايمن بحضن جديتي..كفيت ايدي وكملت الخبز..
دنوة : شعدهم جايين هذول..شنو هلمغثة..
الحجية غادة : اي عيني غير انتي تعودتي ع الكعدة والهدوء .. چا انتي ماتعرفينا شون عايشين يجدة..
دنوة : اي ادري..بس شنو اكو كعدة شي ..
الحجية غادة : عمج قاسم صار الشيخ  وتدرين بالمشاكل ركع حتى مايشوف دربه عمت عيني..اليوم ماعنده شي وعزمهم مسوي ثواب للمرحوم..
دنوة : يله خوش..خالة لاتمدين ايدج بعد انه اسوي ..

ابتسام : علواه يخالة..تعبت انه..
دنوة : لاديرين بال..
ابتسمت واخذت ايمن يمهه بين ما كملت..لميت الخبز وطبيت .. هاي احنا من زمان وي كل وجبة نخبز جديد.. مايحبون القديم والبايت.. البنية هنا حياتهه كلهه شغل وخلفة وتعب .. الحمدلله على كل حال..
مشى اليوم عادي..نسيت التلفون حتى ماشفت منو مخابرني .. التهيت بالطبخ والمواعين والهوسة.. الولد بس احمد ببغداد..سالم وعصام ونسوانهم هنا ..
جدة من عرفت بسالفة صگر ضلت تحجي علي..ادري الغلط مني بس ماجنت ادري نيتهه كشره..غلطة بسبب غبائي وداادفع ثمنهه الى ان تفرج شوف شلون ..

بالليل اندكت الباب..اجت اخت جدي الاخيرة هي وبناتهه ثنين .. بس سلمت وكمت فرشتلهن مابيه حيل احجي.. راسي صار طبل..اجت غدير وياي ..
غدير : ولج عود خابري رجلج شوفي شلونه..
دنوة : اي اكيد بس خلافرش..
غدير : تدرين روان جابت ولد مايسمع..
دنوة : جذابهههه..عززه شلون خطية..
غدير : اي والله..ابوي كال هذا موطبيعي الولد.. نصفكله مايدير وجهه..بعدين ماخذي للدكتور كايل مايسمع.. سمعه ضعيف الى درجة..
دنوة : خطية والله مايستاهل الطفل..وشلون هسه..
غدير : حيزرعوله قوقعة وينتظرون شحيصير..كلهه چي جانت تاخذ ابر وهي حامل..تخربطت عدهه هواي شغلات .. وكليوم زعلانة رايحة جاية..الحالة النفسية تأثر
دنوة : اي صحيح..قهرتيني ع الطفل والله..
غدير : حكمة ربج بعد..اكيد بيهه صالح..
دنوة : صحيح..الله يشافي يارب..
غدير : من حلكج لباب السما..

دنوة : هي جابت بعد..
غدير : اي..حبلت بتوم ولد وبنية..بس مابيهم شي الحمدلله
دنوة : يله همزين..الله عوضهم..ولو انه ماعندي كلام حسن وي عقيل وروان..بس الاطفال خطية..
غدير : حقج خية معذورة..مو قليل الصارلج..
دنوة : اي والله.. الله كريم ..كلهه فترة وراحت..
غدير : على كولتج.. يله كملي الفراشات انه حفرش بغرفتج القديمة..اليوم ابات..
دنوة : ديله مااتأخر..

نزلتلهياهن من البوفيه وراحت..فرشتهن وكملت عاد اجو ينامون .. مرة سالم اسمهه رانية..ومرة عصام سمر.. مالهم حس كلش هدوء..بس سمر چنهه مقهورة من شي بالكوة كاتمة.. وصدك.. مريت من الحمام واسمعهه تبجي وتنشاغ .. استحيت اسألهه شبيج..يمكن شي شخصي فماحجيت ..
حنين وغدير وكرايب جدي ضلو عدنا..الباقين راحو .. كمت خليت يمهم سراحية مي ورحت لغرفتي منتهية من التعب .. مامتعودة اشتغل هلكد صار سنين..خطية لكيت غدير منيمة ايموني وجهالهه..عدهه تلاثة..بس ابنهه عبودي الجبير ماجايبته باقي يم ابوه..اخذت التلفون لكيت خالة مخابرتني مرتين..دكيت عليهه مرة ماجاوبتني .. خاف نايمة ادور افززهه..عفته شواي ودكت علي..

الحجية : الو يمة شلونج..ضل بالي عليج..
دنوة : زينة خالة لايضل بالج..بس التهيت بالشغل..
الحجية : لاتخليني اقلق عليج..خابريني عود .. ايمن شلونه .. خوما يعنفص ويتعبج..
دنوة : لا حباب فدوة لگلبه مايسوي شي..صگر شلونه..
الحجية : اوووف..وج لاتسأليني..راح لدوامه ليش يقبل يركد وياخذ اجازة..لا طبعا..
دنوة : والله ماادري يخالة..حاولي وياه لمن يرجع .. اذا ماقبل اخلي عمي قاسم هو والولد يجيبون الشيخ هنا ونجيبه .. ماكو غيرهه..
الحجية : ان شاء الله..بس يرجع ونسوي هيج.. وليدي يروح من ادية اذا تركته اكثر..

ادور هاي جوينة الحية هي واخوي وولدة ولا واحد منهم يجاوب على اتصالاتي..طركاعة سودة على روسهم..
دنوة : هاي عود من صدك مايجاوبون..شلون مغثة فوك المغثة
الحجية : اي والله.. روحي نامي يمة..انه اي شي يصير اخابرج عود..ارتاحي ..
دنوة : مع السلامة..
سديته منهه ورحت انام..حجينا انه وغدير ع الوضع وشصاير اخر فترة..مااسمع اخبارهم..چن عفتهم وراي من يوم الطلعت بي من هنا..

دنوة : سولفيلي..شكو شصاير..حنين المن تزوجت نسيت اسألهه..
غدير : ثامر تزوجهه..هي صارت المشية بعد والخطوبة بدون هوسات..ادور الزفة والعرس وره ما طلعت السنة مال ابو صگر..هو ماكال لا الرجال..هسة عدهه ثنين ولد وبنية وكاعدة ببغداد..يمعودة..جانت تريد اخو روان.. واحد هيلكي مادري شحبت منه..بس ربج يريدلهه الخير..
دنوة : اي تستاهل خوش بنية..نوارة هم تحاجيهه..ورود المن تزوجت هاي اللخ..
غدير : اي موجودة مابيهه شي..تسلم عليج .. ورود اخذهه واحد ضابط جان وي صگر بالمقر..
دنوة : الله يسلمهه..هااا .. يله شريد منهه..والله هسه لمن حجيتيلي عليهم چن الدنيا رجعتني لمن جنتي تجين تشوفيني ونضحك ونسولف .. عبالك ذاك اليوم..

غدير : اي والله صحيح..هي هاي الدنيا..المهم الواحد يبقى محافظ على روحه القديمة الطيبة..الباقي على الله..
دنوة : عشتي خية..خلانام لأن تعبت تعب فضيع ..
غدير : نامي عيني نوم الهنا..

كمت حضنت ايمن ونمت..مرت الايام ماكو شي جديد .. بس شغل وتعب..خو هاي العزايم ماتخلص والطلايب .. كلساع الله بالخير..عاد ياريت بالخير..يجون بالمشاكل والفصول .. عمي قاسم بعده بحيله بس كاظم لا موحيل..حتى تعبان ومايحجي هواي على كد السؤال والسلام..صگر شوكت مااخابر خالة تكلي بعده مانازل يكول اطول..وهاي ضالة انتظر على نار .. محمد رجع لاربيل..كايل لمن يرجع من دوامه اجي علمود نفض سالفة السيد..

وراهه بفترة اسبوع من الصبح اسمع صوت طلقات.. لبست الشال ووكفت وره الباب اشوف شكو..
عمي قاسم يصيح وجماعة واكفين يمة ..
قاسم : لاترفع حسك جدامي..ادخل للمضيف خلافتهم شني سالفتك..لاتضل تهوبز ومانعرف شصاير..
- : لانعرف ولا تعرفووون..ابنك عصام واحد لاعوب وتكة ماكو
قاسم : شوف بوية..قسما بالله افض الهوسة كلهه بچيلتين وانتهت..احجي لاتخبصني..
- : ابنك شفناه واكف بباب بيتنا ويتلفت ..احنا ناس بغداديين لانريد ندخل بسوالف العشاير ولا هم يحزنون..نريد ابنك يكف ياخة عنه

عصام : يابة البنية اريد اخطبهه..هذا كلشي .. اجيتكم بالعيني والاغاتي ماكو ماتقبلون..يابة ليش .. متزوج .. ادري الشرع حلل رابعة وانه اذا اخذتهه حعدل بينهم..
قاسم : هااااه..هنا حگك والتريده يجرالك..ابني وربيته اعرف ترباته شنو..زلمة مايعيبه شي .. لوما جايين خاطبين منكم اكثر من مرة وماتنطون..
- : اي ماننطي..اجيتك من المدينة لهنا ياشيخ..البنية ابوهه متوفي وماعدهه خوان..بس مو معناهه عمهه ماموجود والسالفة تايهتله..حقي وطبعا ماانطي بنتي الربيتهه لواحد متزوج .. ابتعد عنهه حتى ليصير شي يكرهك حياتك واني ادخل سجن وانت تسكن الكبور..اكثر من هيج كلام ماعندي..
قاسم : شكلك ماتعرفنا..نمشي بشور الشيوخ.. واذا الشيخ كال تصير الزواجة فحتصير مايكون خاطرك الا طيب ..
عصام : اسألهه الهه..اذا رفضتني انه تارك الموضوع ومتنازل عن كلشي..

ديحجون وبلحظة سريعة لدرجة ماانتبهت من يامسدس طلعت الطلقة بس انتبهت لأحمد تكوم بمكانه..كمت ابجي من الدم وخالة طلعت تلطم وادك على راسهه وتصيح ابنيييي .. عم البنية ضارب الطلقة واجت بأحمد..جان كبل يومين جاي للبيت .. ماتحملت اشوف المنظر طبيت جوه بالعجل .. هاي الهوسة كلهه علمود بنية..شواي وفاتت خالة شايلهه عصام .. وعقيل وراه..تقهر شلون تبجي وبالهه على احمد.. عقيل فات من يمي بدون مايعاين علي ..احسن .. خفة وراحة.. احمد ضل اسبوع بالمستشفى..لحدما كام يكدر يمشي ويحركهه يله .. الضربة صارت بفخذه..وره ماطلع بيومين واسمع عمي قاسم يحجي..
قاسم : حتصير الكعدة ماتقبل غلط..والبنية ماخذيهه ماخذيهه .. ابن الشيخ جاي يخطب شتريد ماادري ..

وصدك وراهه بيومين كعدت من الغبشة وي البنات..سمر ماتت بجي..عيونهه ورمت كامت ماتشوف..شكد حقير ليش هيج تكسر گلبهه..ماتستاهل كلش حبابة وهادئة.. بس هو الحظ من يكعد يكعد.. انه واسوي الاكل جان يجي عليهه ابوهه وخوانهه ثنين..اخذوهه ورجعو لبغداد..
عاد ضلينا وحيدنا بس بنات خالة كريمة اخت جدي ساعدنا ماقصرو..وهاي هيج على نفس الوكفة وايمن يابيد خالة ابتسام يابيد جديتي..لحدما صارت الكعدة وصبيناتهن بصياني كبار..عامر وقصي وكل ولد عمامي وكرايب خالة ابتسام همات اجوي..للسته العصر چايات وماي ماخلو .. لحدما راحو عاد بت خالة كريمة براء هي نظفت الديوانية كلهه..

ماطلبو فلوس بالكعدة والعوض يصير قبول الخطوبة بس احمد يتحسن ويتشافى..

بيوم كاعدة بالليل داالف دولمة لباجر انه وبراء ورانية جان تجي اخت جدي كريمة..
كريمة : خالة دنيوة رجلج شلونه..
دنوة : والله بعده خالة..اليوم راجع من دوامة..
كريمة : دشوفي يمة..انه اكبر منج وفاطنة اكثر.. انتي دورتي بغرفتكم بالهندام..
دنوة : كلبتهه گلاب ومالكيت شي ..
كريمة : ابنج لمن تحطي بفراشه يضوج لو عادي..
تذكرت اخر ايام كبل لا اكوم انام بغرفة خالة جان لمن احطه بفراشه يفز بالتلاثة ونص ضبط وي الاذان.. لو المغربية يعيط على غفلة..كتلهه : اي شمدريج..
كريمة : هااا شوفي..شمالج مطفية يخالة..العمل بكاروك الصغيروني وليدج..دوري زين..

دنوة : يمة خالة خوفتيني الله ينطيج..خوما ايموني يصيرله شي سوده علي مايتحمل..
كريمة : وج لا..اسم الله بعيد الشر عنه..بس دوري هناك وادعيلي..خطية الزلمة لايروح بيهه..
دنوة : ان شاء الله خالة..
كملت بالعجل وكمت خابرت خالة..جاوبتني..
الحجية : هله خالة..شلونج يمة..
دنوة : زينة الحمدلله..انتي شلونج..صحتج..صگر..
الحجية : على الله..كبل شوي نام ..اليوم فد دور موزين
دنوة : وين نايم..
الحجية : بالهول ليش..
دنوة : خالة صعدي فوك لغرفتنا..دوري زين بالكاروك مالت ايمن..بداخله وجواه ..بالمخاديد والبطانيات مالته ..

الحجية : ليش ياستار شكو..
دنوة : يمكن هنا العمل..بلكت تلكي خاطر تخابرين السيد بعد كلشي يصير امام امر الواقع..
الحجية : حروح اشوفه هسه واخابرج..
دنوة : انتظرج لاتتأخرين..
الحجية : يله..

سدته مني وراحت..ضليت الوب ساعة كاملة..اريد اعرف شسوت ولكته لو لا..كمت داانيم ايمن جان يدك التلفون .. كمت شلته بالعجل : ها خالة بشري ..
الحجية : وج لكيته..دزيت اخلاص ادور ولكته.. علاكة سودة ماادري شنو بيهه..وائل خابر السيد كال باجر يجي..
دنوة : يله چا انه جايه باجر من الصبح..
الحجية : هله بيج يمة..يله اخذي راحتج ردت اخبرج بي..
دنوة : ماشي خالة..مع السلام..

كمت توضيت وصليت ركعتين تتيسر الامور وارجع.. حيصير شهر ونص انه هنا..تعبت من الشغل والبعد.. احس روحي غريبة..تعودت على بيتنا والكعدة والهدوء ..فراشي وصگر هو وطوله وصوته..راجعلي يارب بس وكت..
حضرت هدومي انه وايمن وكعدت يم جديتي سولفتلهه .. دعتلي كالت الله يسهلج ويفرج كربتج..فعلا تعبت بهاي الفترة وتحملت فوك طاقتي بهواي.. اضافة للتفكير المتعب بصگر وشلون حيقنع ويروح للسيد شاكة حامل.. كلت يمكن تخربطت چي حالتي النفسية مو مستقرة..خلاصبر بعد اذا تأخرت يعني حامل..

كعدت الصبح غسلت لكيتهم صابين الريوك..اكلت وكمت بدلت انتظر سالم يخلص..اخذت ايمن وودعتهم ورجعني للبيت .. اول ماطبيت احس ردتلي روحي..ريحة صگر بكل ركن بالبيت وصوت ضحكته يرن بإذاني چي قليل يضحك احسهه شي مميز..سلمت على خالة وبوستهه ..اخذت ايمن بحضنهه وتحاجي : مشتاقتلك حقير ماتسأل على جديتك..
هو كيف عليهه..صار فترة طويلة مشايفهه..
دنوة : خالة شوكت يجي السيد..
الحجية : ربع مو اكثر..بس ادعي ربج ييسرهه ونخلص .. هو همات تعب سودة علي..
دنوة : اي اكيد..الله كريم يارب خير..

شواي وكعد من النوم..شافني بالبيت ماكال شي.. الف دعاء اجه على لساني ..خفت يتعارك ويصير عصبي.. يله .. يقابلي ببرود احسن مما يتعارك ويأذي روحه..
وره ثلث ساعة اندكت الباب واجة السيد .. هو يصير كرايب خالة فاجه مو لغير سبب .. محمد والحجي بالتواسيل يله صعدوه فوك..انه صعدت وياه ..
السيد : وين مكانه..
وخرت الدوشك الصغير مال ايمن كتله : هنا..
اخذه فتحه هو ويقره آيات قرآنية بصوت عالي .. صگر كام يشيل روحه ويطبهه ويصيح بصوت بي بچي .. عفت صوته وركزت بالاشياء الطلعهه من الچيس.. فانيلة داخلية مالته مشدودة اطرافهه..فتحهن وطلع اوراق مكتوب عليهه كتابة صغيرة..شگگهن ..

بعد اوراق وخيوط سود ماادري شنو..قرف.. كمل ورجعهن بالچيس ..كام وكف يمه ويقره على راسه..هو رافع عيونه ليفوك وفاك حلكه بتعب چن واحد مانايم صار كومة.. خلص وكام
السيد : كوموه .. ان شاء الله يوم عن يوم يتحسن.. بس الغرفة تنمسح كلهه بمطهر والبيت هماتين...والفراشات تنذب ماانصح ترجعون ترفشوهن بعدين..مايشوف شر يارب..
طلع ونزل الحجي وياه..محمد گومة تمدد ع الجرباية .. اول ماحط راسه نام..

تانيته يكعد ومسحت الغرفة ..بدلت الفرشات كلهن .. فتحت قرآن بالغرفة شوي ارتاحت نفسيته..راح يسبح وغير ملابسه .. كمل واجه يمي شافني دااشتغل وعركانة ..اشرلي اجي يمه .. تقربت منه..حاوطني من خصري..
صگر : لاتعبين روحج ابوية..صيحي اخلاص وياج..
دنوة : ميخالف ماضل شي واخلص..
باسني من راسي و ادي حاضنتني ..
صگر : شسوي بدونج انه..منو تتحملني غيرج.. والله ماجنت حاس بروحي..تفهميني..

حركت راسي يعني اي..باسني من خدي وابتسم : اعتذر بنيتي..ماامد ايدي عليج والله مو طبعي..
دنوة : ادري بيك وعاذرتك..
طبطب على جتفي وراح ع الميزتواليت ينشف شعره.. اشتاقيت لوكفته هنا وكلماته واحساسه..الحمدلله ماراح الصبر بلاش .. مرن يومين عاديات..وراهه كعدت من الصبح على صوت صگر يصيح.. يووو شكو هسة .....

يتبــــــــــــــــــــــــــــــع..................

اعتذر ع التأخير لكن نفسيتي ابد مو مستقرة ، اكثر من ٣ بارتات اكللكم نفسيتي مو مرتاحة راعوني ، وانتو هسة بالتعليقات تكلولي تريدين تجمعين تعليقات ومشاهدات .. الصراحة بعد ماابرر ، بس احب اشكر كل التفهموا وضعي وماكتبو كلام جارح بحجة (متلهفين للقصة) ..

توقعولي شنو حيصير؟ ....