اسألي عني الليالي

البارت ٦١

جيت احبك من زمان ..
جيت من اخر مكان ..

جيت ادور في عيونك بيت .. واحباب .. وحنان ..
ما وصلت الا وانا .. كلي جروح و عنى ..
الي ما تشبهني غيرك .. بس انا ماهو انا ..

من بديت .. افهم شعورك وانسى همي في حظورك ..
صرت اتعب في غيابك .. والگى نفسي عند بابك ..

ما وصلت الا وانا .. كلي جروح و عنى ..
الي ما تشبهني غيرك .. بس انا ماهو انا

الـبـارت الـواحد والـسـتـون..................

كعدت احسب دقيقة دقيقة بس اريد تخلص السبعة واخذه للدكتور متت خوف علي..كلما اشوفه لو يلهث لو خال ايده على صدره يكلي صدري ضاق علي..ومايقبل يرتاح تعبني.. منا ايمن بعيد اشتاقيتله..
اليوم خلصت السبعة بالليل والاغلبيه طلعو..بقو بس كرايبنه .. سرور اجه رجلهه اخذهه ونوارة همات..فنظفت المطبخ وطلعت .. شواي وگبت العيطة..ارد اعرف شكو.. بس اسمع خالة تصيح..رجلية صارن خيوط..متت خوف..

طبيت للديوانية لكيت صگر متكوم بمكانه صاير كوخ .. ايده على صدره ويشهك..عمامي ملتمين علي يردون يكوموه وهو يدفع بيهم مايخليهم يتقربون..رحت يمه بالعجل .. ايدي كامت ترجف واحاجي : صگر شبيك..شنو يوجعك..
رفع راسه واشوف شفايفه لونهن ازرگ بشكل ووجهه مطعن زراك..گلبي صار طبل..خوف ورهبة..دموعي نزلت لا اراديا .. حتى تفكير ماكدرت افكر..مااجه ببالي شي..انداريت عليهم : شبيكم واكفين..تعالو شوفوه حيصيرله شي
هو طويل وضخم فعمي ماكدر وحده..الا اجه وياه عصام وقصي..صار جواه ورفعه من كتره..اجه عمي قاسم وياه دفعه : لا تتگرب..مختنك للستار..

بس وكف غمض عيونه وطاح على قصي..كمت احجي وابجي فرفحت : دخذووو شبيكم واكفييين..
عصام : لاتصيحين..شنو واكفين جدامج ..
دنوة : وانت عفت صگر وحاير بصياحي..
قاسم : بوية اخذه للمستشفى وانه اجي براك..
شالوه شيل لأن فقد..عمي بالعجل راح يبدل..صعدت فوك لبست صاية وشال شلون ماجان عيوني غوشت من الدموع .. نزلت لكيته توه ديطلع : عمي..اصبر اجي وياك..
قاسم : وين جاية هيج..
دنوة : ليش شبيهن..
قاسم : شني اخذج هيج للمستشفى..لا بس تسودنتي..

الحجية : ابو سالم لاتسوي هيج..هو رجلهه يقبل تلبس هشكل مالهه داعي نطولهه..
ماكال شي..مشى ورحنه وراه..ضليت الطريق كله الوم بروحي..صوجي مالحيت علي لحدما وصلنه.. نزلت بالعجل عفتهم يجون وحدهم..لكيت عصام واكف يحاجي الدكتور وقصي يمه..اندار شافني خزرني..عبالهم بعدني على طبعهم .. انه يم صگر عرفت الثقة والغيرة مو بالكعدة بالبيت والعباية وغيرهه من تفكير هواي شباب..
اجت خالة وكفت يمي ننتظره يخلص حچي..شواي واندار يحاجي عمي..

قاسم : ها بشر..شبي..
عصام : الطبيب الاختصاص مو هنا..طالع..بس خلوله اوكسجين ومغذي..ضغطه هابط..
قاسم : بس يفيق نطلعه..ناخذه طبيب اختصاص اهلي احسن من هاي البهذلة وشلعان الگلب..
عاصم : هسه بس خليفيق..
رحت للغرفة الخالي بيهه..بس ماطبيت مايقبل الدكتور.. شواي وصارت هوسة..كلهم اجو..المحبة على فجأة بينت.. احمد رزلني چي جاية..عباله حسكتله..
احمد : شعندج جاية كلهه زلم..
دنوة : مالك حق تدخل..انت مو رجلي..
عيونه صارت بگصته..تهستر بس ردة فعلي الباردة سكتته .. عباله بعدني مثل كبل..حتلو يكتلوني اقبل واسكت..

ضلينه ننتظر..لحدما اجه الدكتور يشوف حالته.. شواي وطلع
الدكتور : واحد منكم يدخل يشوفه..
كاظم : نكدر نطلعه..
الدكتور : اي تكدرون..قستله الضغط ومعدل النبض.. منتظم حاليا بس يحتاجله مراجعة وعلاجات..ميصير تنترك حالته
كاظم : ان شاء الله..
راح الدكتور وانه طبيت اشوفه..لكيته متمدد ومغمض عيونه.. لمن فتحت الباب حس علي..بالكوة فتح عيونه..رحت يمه بسته من راسه..
دنوة : شلون صرت..
صگر : تعبان..وغلاتج تعبان..
دنوة : كتلك اخذك للدكتور ماقبلت..زين هيج..

صگر : متندم حد عض الاصبع والله..
دنوة : لاتحرگ بروحك..باجر اخذك للدكتور ونشوف شيكول
صفن شوي..بعدين حچة : ايمن شلونه..
دنوة : زين..اليوم خابرت خالتي الظهر كالت نايم..شذكرك بي
صگر : ماناسي..بس ملتهي شسوي..اريد اخذ اجازة بس خلاروح للدكتور اول..
بالكوة يحجي يجر الكلمة جر..گلبي يعصرني وي كل كلمة يكولهه..ساعدته يكوم وطلعنه..تحمدوله ع السلامة .. خالة كامت تبجي وحضنته..باسهه ومسح دموعهه هو ومبتسم بتعب..ادري بي تعبان ومريض بس مايحجي..

رجعنه لبيت جدي عمي ماقبل نرجع وحدنه..كال انه اوصلكم
صگر : لايضل بالك..زين هسه اكدر ارجع للبيت وحدي..
فيصل : اكيد..
صگر : اي يابة..
عفتهم وكمت لميت الغراض وانتظرته يخلص حچي وياهم بعدين رجعنه..رحت لبيت خالتي اخذت ايمن..اول ماخليته بحضني سكت..جان يبجي ووجهه احمر..تشكرت منهه ورحنه للبيت .. خليته يم خالة ورحت سبحت..خطية خالتي مبدلتله ومشربته حليب بس هو متضايق يمكن..
الحجية : يمة عود شوفي صگر شلونه..
دنوة : حاضر..
اخذت ايمن وصعدت فوك..بس خليته بكاروكة هزيته شوي ونام ماطول مثل كل مرة..

انداريت على صگر لكيته نايم ع الجهة اللخ بنص الجرباية .. طفيت الضوه ورحت يمه..حضنته من ظهره وبسته من خده .. همست : بعدك تحس بضيق..
صگر : احسن..بس احس بأرهاق..تعبان..اريد ارتاح
ابتعدت عنه..كلت اكيد اضايقه بقربي..اندارلي وخله راسه بحضني ويجر النفس بالكوة ..
دنوة : حتضل هيج..مردت گلبي..
صگر : باجر اروح للدكتور..هسة خليني بحضنج انه ارتاح من اشمج..
سكتت ماحجيت شي..هو وده يكور روحه ويصير بحضني .. مااعرف شبي..
همس : دناوي..شبگيني لاتهديني..
دنوة : شبيك خوفتني عليك..

صگر : مابيه شي..سوي مثل مااگلج..
تقربت حضنته وامسح على شعره..بهلحظة مااكول غير حسيته مثل ايمن..هيج من يشوفني لو احضنه يسكت..وهسة صگر هم نفس الشي.. دقايق وانفاسه ثكلت يعني غفى.. قريت على راسه لحدما نعست ونمت..جسمي متكسر..تعودت على نومة الجرباية والراحة..هناك هيج حي الله چي هوسة..حتى الواحد مايفكر وين ينام وشلون..بس المهم اسمهه نومة.. نمت وكل تفكيري يم صگر..كون اليوم كبل باجر اخذه للدكتور.. گلبي صار جمر علي..

كعدت الصبح لكيته محاوطني من خصري وراسه على صدري بس يتنفس براحة احسن من البارحة بالليل..ضليت على وضعيتي..تذكرت ايمن ماكعد بالليل همزين..انه هم جان مابيه حيل اكعد.. وره ربع ساعة كعد..
همست : شلونك حبيبي..
صگر : احسن يروحه لحبيبج..
دنوة : مو تگلب..نروح يعني نروح..
صگر : حاضر..
بسته وكمت..مشى الوكت عادي..هو ع الغده دناكل كام يغص.. عافه وراح..بس وكف داخ كعد ع القنفة ومغمض عيونه بقوة : ياااابة..انه شنو..ليش الامراض كلهه محطوطه بيه.. راسي حينفجر ودايخ داييييخ..

عفت الاكل ورحت يمه..ماادري شسوي..متوترة وكاعدة على اعصابي..بس انتظر يجي العصر واخذه للدكتور.. كمت للمطبخ جبتله براسيتول بلكت يهدأ..
حتى مااكلنه..مختنگ ويتنفس بصعوبة.. الحجي بس تغده بدل واجة يحاجي خالة..
وائل : وين احجزلة هسه..
صگر : خالو عند ابو القلبية..
وائل : شجابك ع القلب يابة..هو انت مختنگ بس..
صگر : سوي مثل مااگلك..انه اعرف..
وائل : يله مثل ماتريد..
خله ومشى..هو طلع وصگر كمشته الكحة..يكح وايده على صدره حتى ماكدر يحجي..راح للحمام بالعجل .. خالة دمعتهه بعينهه علي..

خليت ايمن بحضنهه ورحت وراه..غسلتله وجهه وهم بعده.. ضل بالربع ساعة لحدما سكت وحده..هو هلكد ما گح بعد مابي حيل..بالعجل انتچى علي وكعد بالكع.. دنجت اكومه كمشني من ايدي..
صگر : لاتكوميني..مابيه اوكف بعد..
كمت ابجي ماتحملت..ليش بس يتمرض..هو انه حظي شوكت كعدت عدل خاطر يكعد هلمره..كعدت يمه وحضنته ..
مسح على شعري وايده عبالك ثكيله بالكوة شايلهه : لاتبجين .. خلاروح للدكتور واشوف شيكول..
دنوة : والله وضعك ديوجعني اكثر منك..خايفة ....
صگر : اشش..لاتكولين خايفة وانه يمج..
سكتت ماحجيت..مسحت دموعي وكومته على كيف..

مشى الوكت وره ساعة اجه الحجي..
الحجية : يالله..حجزتله..
وائل : اكو دكتور ماعلي احد بس موزين..رحت على واحد ثاني ماعنده مجال اليوم الا اخر واحد..يعني بثمانية بالليل يله يكدر يدخل..هم كتبت اسمه بس تصير بثمانية نروح
الحجية : يله بثمانية بالتسعة بس المهم نروح..
وائل : اي ان شاء الله خير..
كمت غسلت مواعين ونيمت ايمن..خالة كالت خلي عندي مااروح وياكم..تصير هوسة..صگر راح ينام خطية تعب.. انه واشتغل الف دعاء وآية قرآنية اجت على لساني بس كون مايطلع بي شي مستعصي..وهيج لحدما صارت بالسبعة كمت صليت وصعدت بدلت..كعدته يبدل بس مابي حيل بالكوة شايل روحه..

ضليت اعاينله هو ويلبس وگلبي يعصرني علي..خايفة وين انطي وجهي اذا بي شي..اندار شافني صافنة..
صگر : شبيج ابوية..
دنوة : خايفة عليك..
صگر : الله كريم..
كمل واخذ فلوس وطلعنه..بس الحجي اجه ويانه..رحنه للدكتور جان واحد جدامنه..اجت السكرتيرة تحاجي..
السكرتيرة : لازم تسوي تخطيط قبل لاتدخل ع الدكتور..
صگر : مو مشكلة..
كمت وياه كالت ميصير وحده..اول مره اشوف هيج اشياء.. هو عادي تصرفه طبيعي..شواي وكملت ..خلته بفايل وانطتنهيا .. بس طلعنه وره دقايق صار سراه..

بلش يسأله عن عمره وصحته بشكل عام..فحصه وقره التخطيط بعدين سأله ع الاعراض هلفترة..
صگر : دايخ ومختنگ..صدري يضيق علي على فجأة.. صار اسبوع تقريبا اگح كحة بيهه شوائب مو خالية..رجلي مورمة صار فترة..للعلم انه كبل ب٢٠٠٦ صار عندي دوالي بس عالجتهن ماتركت الموضوع..
الدكتور : طيب..ارهاق ونبضات قلب غير منتظمة عندك .. لون مزرق بالجلد..
صگر : اي..
الدكتور : حسب التخطيط وتشخيصي للمرض عن طريق الاعراض عندك بداية تجلط بالشريان الرئوي..هن هذني اعراضه بالمضبوط..

ماانكر ان تشخيص هلمرض بالذات صعب جدا .. لأن النوبة القلبية مشابهة لاعراضه مع اختلاف بسيط .. مع ذلك نحتاج تحاليل وفحوصات اكثر علمود اعرف مكانه الصحيح ونسبة الخطورة وغيرهه.. اذا لا سامح الله حالتك متقدمة تحتاج قسطرة..

اما اذا بالبداية فمجرد ادوية مسيّلة للدم وترجع طبيعي.. مكان عملك وين..لأن اذا مكان العمل يعتمد ع الرصاص والدخان فيأثر..اكيد حضرتك مدخن..
صگر : اي والله..ضابط انه..وادخن صار هواي..
الدكتور : شكد يعني..
صگر : من ال٩٥..
الدكتور : هذا دمار لصحتك..ميصير هيج..وانت جبير بالعمر مو ذاك الشباب حتى نكول ميصير عندك هلمرض.. بعد العلاج والشفاء ان شاء الله ضروري تقلع عن التدخين..
صگر : مااكدر دكتور..حاولت اتركهه بس ماتنترك..
الدكتور : هو الموضوع يحتاجله ارادة وصبر..وانت اكيد متزوج وعندك اطفال..فلخاطرهم ..
صگر : ان شاء الله..احاول..

الدكتور : حاليا مااكدر انطيك علاج..لازم تسوي تخطيط لكهربائيات القلب..رنين ايضا جدا مهم .. وتحليل دم.. دوبلر ايضا حكتبلك ورقة حتى تدخل مباشرة تسوي الرنين..لأن حالتك صعبة ماانصحك تتأخر..بالاضافة ان تورم الساق معناهه عندك قبل تخثر بيهه وانت تاركهه..انتقل من الساق للشريان الرئوي .. منريد نستعجل يمكن يكون الموضوع اسهل بس تسويلي الفحوصات كاملة وحاول متتأخر لمصلحتك اولا واخيرا
كتبله ع التحاليل والرنين بيا مستشفى يسويه..كملنه وطلعنه .. بالسيارة حچاله للحجي شكال الدكتور بعدين رجعنه .. بالباب واسمع العياط مال ايمن..طبيت ركض گلبي يرجف.. مايصيح هيج بس لمن يريد ممة.. رحت لكيت خالة شايلته تريد تسكته وهو يدفع بيهه..

اخذته منهه واحاجيهه : شبي يبچي حبيبي..
الحجية : هو كعد من النوم وكام يبجي وحده..متعود عليج
دنوة : يله ماصار شي..
اخذته وهزيته بيدي لحدما سكت..كام يغنغن..فات صگر شافه يسولف وي روحه اجه شاله خلاه بحضنه ويهز بي برجله .. ابتسمت عليهم..
صگر : لك ليش خابص جديتك..مو خطية..
الحجية : يمة شگلك الطبيب ضل بالي..
صگر : باجر اروح الصبح اسوي رنين وتحاليل واروحله العصر شوف شيكول..
الحجية : وهسه ماكال شي يعني..
صگر : كال احتمال تجلط بالشريان الرئوي..
الحجية : صخام بعيني..

صگر : اسم الله عليج حجية..لاتكولين هيج..مايصير الا المكتوب وان شاء الله خير..
الحجية : انه بس لو اعرف انت ليش تكابر..تره انت بين اهلك وناسك ليش تسوي هيج..
صگر : تعرفين طبعي شنو صار سنين..
الحجية : اي ادري يمة..هسه لوما متخربط چا ماعرفنه شبيك هلكد ماتسكت..
صگر : صار التردي ورحت..بعد الله كريم..
عفتهم يحجون ورحت فوك ابدل..مالي نفس بالدنيا كلهه.. كلام الدكتور عصر گلبي..ميته خوف علي..والله مايستاهل ذرة من الديصيرله..ادور منظره لمن كام يگح ضل ببالي.. شواي وفات بيده ايمن..خلاه بكاروكة واجه يمي..حضني من ظهري ويشم برگبتي..

صگر : تعبانة..
دنوة : لا مابيه شي..حشوف ايمن يمكن يريد حليب..
ابتعدت عنه..سحبني من ايدي جرني لحضنه وحاوطني بإدي .. مانطيته ردة فعل..
صگر : شبيج..ضوجتج بشي..
دنوة : لا..
صگر : چا شنو گلبي..شبيج ضايجة..
دنوة : ضايجة عليك..
صگر : لاتخافين..
دنوة : حتضل تكول هيج بكل مره اگلك خاف بيك شي.. مالي احد غيرك ديربالك على روحك فدوه..
صگر : تدلل اميرتي..ادير بالي..علمودج ها..

عاينت بعيونه انه وساكته ماحجيت شي..تنهدت ورحت جوه .. سويت عشه وكعدنه ناكل..اسمع صوته يگح..حسيت روحي انه الاكح مو هو..اذا اروحله شكدر اسوي..بس نفسيتي انسدت للاكل..ضليت كاعدة لحدما كملو وغسلت المواعين .. اجت خالة تحاجيني
الحجية : خالة اكيد الصار يم الطبيب..
دنوة : اي خالة..ليش شكو..
الحجية : خاف تجذبون علي..
دنوة : لا والله هو كال هيج بعد الله كريم..
خلت وراحت..كملت وصعدت فوك..لكيته متمدد ويگلب بالتلفون.. طفيت الضوه ورحت نيمت ايمن ..حبيبي عبالك ديحس بيه مامرتاحه بالعجل ينام مايتعبني..

رحت تمددت من الجهة اللخ ودايره وجهي..مااريد اشوفه .. انقهر لمن يسوي روحه مابي شي..ديحسسني انه المريضة وخايف لايصير بيه شي..تعبني.. شواي وحسيت ايده حاوطتني من خصري..صار قريب علي ..انفاسه رجفتني بس كمشت روحي..سويت روحي نايمة..
همس : ادري كاعدة..لاتسوين هيج ..
دنوة : مامسوية شي..تعبانه اريد انام..
صگر : انه همات تعبان..تدرين بيه ماارتاح بس يمج.. ديوري علي دناوي..
سكتت ماجاوبته..ضل على نفس وضعيته دقايق وابتعد هو ويتنفس بصعوبة..احس گلبي جمّر..خفت ينقهر ادور يصيرله شي..انداريت علي ودخلت لحضنه..

اخذ نفس وحاوطني بإدي..
دنوة : ضجت مني..
صگر : مااضوج منج ..بس ماريدج تصيرين هيج..
دنوة : انه خايفة عليك..وانت منا ماتحجي شلون حعرف دتتوجع..والله اضل افكر واتعب من التفكير..
صگر : والله حاجيلج الماحاچي لروحي..بس طبعي مااحجي لمن اتعب..مع ذلك تشوفيني اجيج برجليه من اتعب.. وماارتاح بس يمج..بس لمن اشبگج..باجر اروح اسوي الرنين والتحاليل وان شاء الله خير..
بسته من خده وغفيت على صدره..

كعدت الصبح مالكيته..كمت توضيت وصليت ودعيت يطلع شي بسيط ويتعالج بالادوية..بس كملت كعد ايمن يبجي.. بدلتله وسويتله حليب .. ضليت اعاين علي وكامشه ايده لحدما خلص ونزلنه جوه..
مشى الوكت للثنتين ونص يله اندكت الباب..طلعت افتحهه صار صگر بوجهي..بيده فايل وعركان كصته تصب مي..
وائل : فوت يابة فوت..روحي جيبيله مي خرب بالدرب..
اندار ع الحجي وعاينله بنظره هو ويهمس : مو وكتهه
وائل : شوف شلون هامل روحك..يله ادخل..
طبو ورحت وراهم..جبتله مي عاينلي بقهر ..
صگر : ايمن وين..
دنوة : نايم..

اجت خالة كعدت يمه وتحاجي..خايفة علي اكثر مني وتحاجي بحذر..خطية من عرفت بي متخربط بالطريق كامت تبجي .. فرفحت..هو حضنهه وطمنهه..
صگر : لاتخافين..ان شاء الله شي يتعالج بالادوية..
الحجية : ها صدك..شلون ..
صگر : اكو واحد دكتور اعرفه شافني هناك..كال هاي شجابك هنا..كتله والله مريض واجيت اسوي رنين والتحاليل.. كال خيرك شبيك..عاد سولفتله ..قرالي الرنين بس كال اخذ الاكيد من الدكتور..
الحجية : وشكال..
صگر : بداية تخثر..بعدهه ماصايرة جلطة يعني الشريان مامسدود..

الحجية : ميخالف..هم تروح للطبيب يشوفك..
صگر : اي طبعا حجية..اروح انام ميت نعاس..من السبعة كاعد..
الحجية : ماتاكلك شي..
صگر : لا مااشتهي..كعدوني بالخمسة علمود اروح للدكتور
الحجية : يله على راحتك يمه..اصعد نام..
عافنه وراح..كمت صبيت للحجي اكل وصعدت وراه.. لكيته واكف يم كاروك ايمن ومبتسم..رحت يمه حضنته بدون مااحجي شي..حاوطني من جتفي ورحنه ع الجرباية.. كام يمسد بشعري ويعاين على شفايفي انه واحجي..
دنوة : ليش رحت بدون ماتكلي..جان اجيت وياك..
صگر : خطية مابيج حيل..ليش اكعدج..

دنوة : مابيه شي..ليش تكول هشكل..
سكت ماكال شي..تقرب باسني من خدي ومن شفايفي.. انه بين تجاوبت وياه وبين تذكرت ذيج الليلة..خفت يختنك وانفاسه تنكطع..بعدت روحي بهدوء..
بهمس : ليش..
دنوة : صير زين..اخاف عليك..
تنهد وجر الغطى تغطه..ادري اجت بباله فكرة ان هو عاجز ومايكدر يسوي شي مثل لمن تمرض..كمت لميت شعري وبسته من خده.. همست : احبك ومااقصد اجرحك..
صگر : ماتطلع منج غاليتي..تعاي بحضني..
اجيت يمه حضني ونام..على صوت انفاسه غفيت .. فزيت على صوت ايمن يبجي..كمت شفت الساعة بالخمسة وربع .. شلته اسكته واكعد بصگر..

دنوة : صگر كوم..يله بالخمسة وربع هم يالله..
ذب الغطى وكوة يفتح عيونه..شواي وكام غسل وبدل.. انه سويت حليب لايمن وكمت بدلت..وره نص ساعة اخذت الفايل وطلعنه للدكتور..همزين حجز بس دخلو ثنين اجه سراه.. گلبي يدك سريع خايفة شحيكول..سلم علي وسأله عن وضعه واذا اكو تغير للأسوء..بعدين قره الفحوصات..
الدكتور : مثل ماشخصت..تخثر بالشريان الرئوي.. ممنوع ادخن جكارة وحده بعد..تمحيهه من حياتك نهائيا.. الحمدلله حالتك ماواصله مرحلة القسطرة..ادوية فقط..تلتزم بالموعد واهم شي فترة العلاج تبتعد عن الجهد..لحدما تبدي تقل الاعراض ويخلص العلاج ترجعلي..

وصاه على چم شغله يسويهه علمود تقلل احتمالية الاصابة مرة اللخ..كتبله الادوية وطلعنه..احس گلبي حيطير من الفرح.. هيج ولا غير شي..اليوم شينيمني من الفرحة..خالة همات حتفرح خطية..بس طلعنه عاينلي وابتسم..عرفته شيقصد.. عبالك ديطمني چن انه المريضة مو هو..مستحيل الاكي شخص مثله مهتم للطرف الثاني اكثر من روحه.. راح للصيدلية اشترى الادوية ورجعنه للبيت..طبيت مرتاحة احسن من اولت البارحة .. لكيت ايمن بالكع يلعب بالخرخاشة..رحت علي ابوسه وصگر طب يحاجي خالة شصار يم الدكتور..فرحت وتغيرت ملامحهه .. صدك الخبر فرحنه كلنه..

مر اسبوع هو نفس وضعه..هم يكح..بس دگات گلبه انتظمت نوعا ما..لمن ينام احس بيهن طبيعيات..ولمن يكعد همات.. جان حتى بالمدة الساكت بيهه يدك سريع ويضايقه..هسة احسن .. هو الدكتور كال يحتاج صبر..الجكاير اخذتهن ذبيتهن.. بعد ما هو كال..جان مشتري تكة خالهه بالكنتور..عبالك ادمان .. بلكت يتعود بدونهه..
وره هلاسبوع جان ديسبح وانه كاعده داارتب الجرباية.. دك تلفونه..محمد..شلته حاجيته..
محمد : زين جاوبت..صار شكد ادك عليك..
دنوة : هلا بيك..انه دنوة ..صگر ديسبح..
محمد : هاااه..هلا خوية والله ماادري بيج..شلونج..
دنوة : والله زينة..انت شلونك..روزة..

محمد : زينين نسأل عنج..صگر شلون صار..دكيت اسأل علي سمعت من امي مريض..
دنوة : اي صارله مدة مريض..هلفترة ديتحسن ع العلاجات وبعد الله كريم نشوف شيصير..
محمد : خير ان شاء الله..انه و روزة جايين عكبة..
دنوة : هلا بيك..درب السلامة..
محمد : يله اخذي راحتج..من يطلع كليله خابرك محمد
دنوة : ماشي..
ودعته وسديته..كملت الغرفة جان يفوت..لحيته طولت اخر فتره نساهه من وره الفاتحة والمرض منا فاجه مزينهه.. وشواربه محددهه ابتسمت علي..عبالك ردتله روحه.. راح ع التلفون يكلب بي ويحاجيني..

صگر : محمد مخابرني..
دنوة : اي راد يسأل عليك..كتله ديسبح..
صگر : يله عود اخابره بعدين..
دنوة : هو حيجي عكبة وي روزة يشوفك..
صگر : هاااه.. اي هلا بي..
رحت لبست الشال ونزلت..طبيت للمطبخ اسوي الغده واسمع خالة تخابر مدري منو وتحجي بحرگة..
الحجية : اي عيني همزين سمعنه حسج..وليدي مريض محد سأل علي..خلف الله على ابنج علاوي اجانه چم مره.. الا انتي ولا حجيتي ولاكلتي..ليش گليل السواه ابني وياج ووي بناتج كعدتي شهور يمنه لاكال ولا تشكى بس ماعنده حظ..

اكيد ام علي هاي..صدك انه همات استغربت ليش ماحجت ولا خابرت..عمامي من يوم رجعنه من يمهم لحد هليوم يخابرون .. ياعمي فيصل ياعمي قاسم..اجه عمي لواء مره هو وقصي .. ولو احنه شبه مقطوعة العلاقة بيناتنه بس اجو وسوو الواجب .. حتى الواحد يستحسف يسوي زين بعد وياهم..

وره يومين بالليل ماشفت دربي بعد..ايمن بس يبجي بعياط .. اشربه حليب يذبه..اهزه بالكاروك يكوم يدفر.. ادور صگر نايم وخايفة لا يكعد..هو بالكوة نام..كلساع يفز على صوته ويرجع ينام..اخر شي اخذته ورحت لغرفة اخلاص القديمة كبال غرفتنه..فليته وشغلت الضوه..بچى شوي بعدين سكت وحده .. ادور كام مايريد ينام..اهزه على رجلي ويبقي عيونه مفتوحة .. ابتسمت علي چنهه عيون صگر..بعدين همست يمه : ولك نام تعبتني..
ضل بالساعة يحوص لحدما نام صفح مثل نومتي.. كمت توضيت وصليت حتى اذان وذن..يله همزين نام.. كملت واخذته للغرفة نومته بمكانه ورحت تمددت..شواي وحسيت على صگر حضني من ظهري ويجرني لحضنه..

قربني منه هو ويعاين بعيوني ويعدل بشعري ..
صگر : نام ..
دنوة : اي..جنت كاعد..
صگر : كعدت كبل شوي لمن رحتي تغسلين..
همهمت بدون مااحجي..حاوطته من رگبته وراسي على ايده .. طول فترة علاجة اخاف اتقرب منه..اكول هو تعبان ادور اجي انه شيصير بي..بس هلمرة لا اراديا صرت بحضنه.. سمعت دگات گلبه..مثل كل مرة..ادك سريع وانفاسه ترجف..
رفع وجهي بايده وانفاسنه صارت وحدة : مشتاكلج دنيتي
دنوة : بس انه يمك..
صگر : اريدج يدنوة..

عاينت بعيونه وسكتت..ماانكر انه هم مشتاقتله واريد قربه بس خايفة علي..خايفة تصعب علي ادور ينقهر..
همس : لاتخافين علي..تره گلبي يرجف عليج وغلاتج مو تحسبين بسبب المرض..
دنوة : بس...
قاطعني : لا بس ولا هس..
سكتت..غير وضعيته شال الغطى صار فوكاي وثنيناتنه جواه .. انفاسه الدافية صارت وره اذني ورگبتي..هو مايسوي شي الا يشوف رضاي..حاوطت رگبته كمواققة مني.. بدا يبوسني بحب ولهفة مثل واحد عطشان بس خايف.. ماحسيت بروحي غير تجاوبت وياه وبديت انسجم واحس بكل حركة ولمسة يسويهه..

خلص وباسني من راسي..حضني هو ويلعب بشعري
دنوة : شيكعدنه باجر..حيجي محمد
صگر : اي ادري..انه نمت بس انتي مانايمة..
همهمت وغفيت على حركة ايده بشعري..كعدت الصبح لكيت ايمن ماكو وصگر همات..اكيد ماخذه وياه جوه.. لبست واخذت ملابس اسبح..كملت وطبيت للغرفة انشف بشعري .. لكيت صگر واكف وشايل ايمن يلعبه وهو يضحك.. ابتسملي واجه يمي..باسني وصبح علي..
دنوة : محمد اجه..
صگر : يم السيطرة هسه على جية..
دنوة : يله همزين..بيش الساعة..
صگر : بالثنتين..

دنوة : شنووو..شبيك ماكعدتني..خطية هسه خالة سوت الاكل وحيدهه وين تكدر..
صگر : لا لاتخافين..طلعت كبل ساعة اشتريت من بره.. اخذت ايمن وياي ..
دنوة : اي شفته ماكو..عبالي جوه..
صگر : لا حبيبي..
دنوة : شلونك اليوم..
صگر : احسن..دااحس بتحسن مو مثل اول ايام..
دنوة : يالله خير ان شاء الله..
ابتسمتله وسويت حليب لايمن..بين ما خلص سمعت صوت جوه..اجوي ..صگر عافنه ونزل..

لبست شال واخذت ايمن ونزلت وراه..سلمت عليهم .. روزة ماتت على ايمن..ابيض گطن ومدبدب ..ولو لا انه بيضة ولا صگر بس خالة بيضة طلع عليهه..محمد متغير ع الزواج جسمه تارس..هو ليش اغلب الزلم اليتزوجون يسمنون.. بس صگر ضعف..
وره سلام وكلام صبينه الغده وكعدنه.. كال حيبقون اسبوع .. حقهم .. المسافة شطولهه وهو جاي بالسيارة..جان ببيت خالهم ابو جمال ببغداد بعدين جاينه مناك..

وره الغده دااغسل مواعين وفات صگر يحجي بالتلفون..
صگر : اي موجود بالبيت وين اروح..هلا بيك يول لاتكول هيج .. على راحتك يابة..لاتكلف روحك .. هاهيه الله وياك
دنوة : ها منو..
صگر : ولد ضباط وياي هناك..حيجون العصر..
دنوة : ها خوش..
عاد التهيت..نظفت الهول غيرت ديكوره ومسحت كله جديد سويته..ايمن مايقبل يبقى يم صگر..اجه يمي مچلب بذيالي .. ادور كام يتلوگ لروزة..لمن تفوت من يمه يفتح اديناته ويبجي يعني شيليني..هي ماتكول لا تكيف علي..عاد اخذته وراحت .. كملت بالاربعة ..راح صگر جاب شغلات من بره

بالخمسة وشوي سمعت صوت بالباب..فتحت البردة على كيف واشوف..يعني صگر صدك بارز بيناتهم وبين أي ناس يوكف يمهم .. طويل وجسمه ولو مريض بس يجنن وهيبة.. شلون يحجي وياهم ويضحك برزانة..هذول يضحكون چن جسمهم يضحك وياهم..مختلف بكلشي..ضليت صافنة علي ومبتسمة لحدما طبو وسديت البردة..كمت للمطبخ صبيتلهم عصاير من الجابهه صگر..شواي واجه اخذهن..

صگر : روحي نامي تعبتي اليوم..
دنوة : وايمن..
صگر : يمي لاتخافين..
دنوة : يله..
ابتسم واخذ الصينية وراح..ماكدرت انام فرحت يم روزة خلصت الوكت..بالليل هلكت بعد خليت ايمن يم صگر بالهول وصعدت..نمت من العشرة..لأن علي ومرته والجهال همات اجو والبيت هوسة صار..انظف منا يتوصخ منا.. لحدما راحو ونظفت تنظيفه اخيرة ورحت نمت..

مرت الايام وصگر يوم عن يوم يتحسن..الگحة قلت بشكل خصوصا وي اخر حبايات..ووي التمارين ان ميبقى كاعد هواي ويبتعد عن الجهد المفرط صار احسن بهواي.. ردتله روحه..حتى وياي صار مختلف وحركاته طبيعية مو مثل كبل احسه يتعب..هسه احسن..
محمد وروزة رجعو لاربيل.. هو خلص العلاج رجع للدكتور .. الحجي راح وياه انه مارحت..لمن رجع حاجيته..
دنوة : شكال..
صگر : سوالي تخطيط..كال متحسن ودگات القلب منتظمة .. وبعد بس تسوي دوبلر كامل للجسم..الادوية ثنين منهن مايحتاج استمر عليهن..بقى بس واحد وكال مايأثر على طبيعة شغلك ..

هاهيه بعد خلصت..يابة طكت روحي من البيت..مااعرف ابقى كاعد..ارد ارجع لدوامي..ازمة وعدت على خير..
الحجية : الف الحمدلله..يعني شنو راح تروح لبغداد
صگر : اي هاهية طلابة..
الحجية : ماصدكت كالولك زين..اوف منك..
صگر : مامليتي مني..صار شهر كاعد بالبيت..
الحجية : لا يمة غير اخاف عليك..هو انت جدام عيني واضل افكر شربت دواك لو لا..
صگر : الله يطول بعمرج..لاتخافين علي..

بيومهه حسيت الدنيا طارت بيه..فرحت ونسيت كلشي.. الله وكفله..مايستاهل يصيرله شي موزين..

وره يومين صار الاربعين مال جدي..طلعنه من الفجر للنجف .. اخذت ايمن خليته يم خالتي ورحنه..رزان جانت جاية هي ورجلهه بس..سما وشذى ماكو..استغربت..اجو ويانه بالسيارة والباقين وحدهم..بالطريق حاجيتهه..
دنوة : شو سما ماكو ليش..
رزان : سالفة طويلة خية..
دنوة : شكو دحچي..ماعدنه شي درب شطوله..
رزان : امي مريضة دنوة..ماتكدر تكوم من الفراش.. صار شهرين ماكو دكتور ماخذناهه علي..حتى سما انخطبت بعدين هلكد ما التهت تفركشت الخطوبة..اخر دكتور رحناله كال خلولهه مغذي بالبيت بعد خوما كلساع ماخذيهه للدكتور .. وهاي عايشة ع المغذي ماتكدر تسوي شي..بس تاكل تكوم تستفرغ..

عاينت عليهه مستغربة : هاي شوكت..شو ماكتيلي..
رزان : غير انتي ملتهية..خوما اجيج انه تچمالة..
دنوة : لا عادي شوكت مايعجبج خابريني احجيلي..
رزان : ادري بيج متحبيهه فليش اگلج..
دنوة : اي بس ع الاقل يكون عندي علم..
سكتت بس كمشت ايدي كامت تبجي بس ماتريد خالة لو صگر ينتبهون عليهه..خلت راسهه على چتفي وتحجي بهمس : اخاف امي تموت دنوة..ادري ماتردين تعرفين عنهه شي ولا تحبيهه.. بس تعاي شوفيهه لخاطري..حتنقهرين عليهه.. عبالك ميتة بس جسد باقية..كل مااشوفهه اموت قهر..حتى صارلي شهر مارايحتله بس اخابر..

سكتت ماجاوبتهه..ردت اكللهه مدااحس بيج..چي من كبل مااتعلق بيهه راحت..لمن توفت بقيت يومين اكعد بالليل اكول لابوي وين ماما..يجاوبني جواب عنيف وقاسي وحاد .. ذرة احساس مابي..يكلي ماتت ماتت انسيهه.. بصياح .. واذا بجيت عليهه يضربني..ثنينهم ماشفت منهم شي..هو وامي .. وهو لمن صار زين وياي فرقتنه المسافات بعدين توفى وانه بعيدة عنه كل البعد..

تنهدت ومسحت دموعهه..بستهه من خدهه وهمست : ميخالف اجيهه لخاطرج..بس نرجع للبيت بسلامة..
خلت راسهه بحضني ونامت..الطريق كله ماكدرت انام .. لحدما وصلنه وكعدتهه..رحنه لگبر جدي..اول ماشفته فرفحت بچي..مامصدكة لحد هللحظة يله استوعبت..اكو دچة صغيرة كعدت عليهه وابجي..عمي قاسم بكبره حط ايده على عيونه ويبچي..حسيت علي من صوته وحركة چتافه..
اجه صگر كعد يمي لحدما كامو..
كاظم : احنه جايين جايين..امشينه لابو دنوة..
هو كال اسمه وانه گلبي عصرني عصرة بس الله يدري بيهه.. كمت مشيت وراهم لحدما وصلناله..هو كبل لايموت كايل اريد تدفنوني يم شهلاء..امي ...

بس وصلت لمكانه وقريت اسمه طكيت بچي..عبالك ذاك اليوم لمن محمد كال ابوج توفى واجيته من سوريا للبصرة بس اريد اطفي ناري..كمت ابجي فرفحت روحي..احس گلبي صار بزردومي ويدك بقوة..كعدت يمه وابجي من كل گلبي.. فقدت بعد مااحس شنو وشلون ومنو اكو..
بس سمعت صوت عقيل : هاي شدتسوي بروحهه.. كوموهه مو وكتهه..
صگر : لاتدخل..ابوهه وحگهه..
كاظم : احترمه ع الاقل اكبر منك..
حسيت حتصير لغوة..كمت بالعجل وكفت يم صگر.. عاد هو سكت..لحظات واحس الدنيا سوده بوجهي..

ضغطي هبط چي جنت مدنجة وابجي..بقيت دقايق دايخة.. صگر كمشني من جتفي كعدت ع الصبة بين ما استعدلت ورجعنه للبصرة..رحت لبيت خالتي اخذت ايمن ورجعنه للبيت .. خليته يمهه واخذته هو نايم..خليته بكاروكة ونمت بملابسي..كعدت على صوته يبجي ..لكيت صگر شايله يهشهش بي يريده يسكت : يول امك نايمة..انطي مفكة..
كمت سويتله حليب واحاجي : انطينيا اشربه..
صگر : روحي سبحي..خلي عندي..
انطيته الممة واخذت ملابس رحت اسبح..

مرت الايام ماكو شي..تلث شهور صگر بين دوامه وبين يجي للبيت..تحسن ع العلاج ورجع مثل كبل..رزان خابرتني كالت شوكت ماتريدين تروحين كليلي علمود الاگيج ببغداد.. كتلهه بس افرغ اخابرج..انه التهيت بايمن وحلا بت خالتي تزوجت .. ماكدرت احضر الحفلة والهوسة عيب جدي ميت منا واروح منا .. فرحتلهه بالسبعة وي خالة وتارة..اشتريتلهه هدية ورحت بقيت ساعة هيج ورجعت..تزوجت بالبصرة بس بغير منطقة .. ام علي اجت هي وبناتهه..بعدهن ليهسه ماتزوجن.. اجن شافن ايمن بايدي وصگر يمي احس النار حتطلع من اذانهم .. چم كلمة ضلت بنفسي اكوللهنيا ..شكد عيروني .. حتى لمن صرت حامل تكلي حيطلع اچلح املح مثلج.. ولو انه ملامحي ماتتعاب وانسانة طبيعية مابيه عيب ..

بس هن هيج..حاسبات نفسهن هن الصح وانه كلشي اسوي غلط وبي نقص..حتى على صگر ولو هن مالهن دخل يگللي ماتستاهلي..ولمن يريدن يحچن على نفسهن وحدتهن تكول انه اخذ واحد شخصية وماكو مثله..عبالك شوف شنو هن.. بعدين ثنيناتهن ماتزوجن..وهن اكبر من اخلاص..اختصار الكلام هذا ..كله ربج مايضرب بعصا.. بس معلي..مجرد كلمات صارت ببالي لمن شفتهن..ام علي اكلت صگر بالسلام ..
ام علي : ماقصرت ويانه الله يطول بعمرك..گرة عينك بابنك.. تعذرني چي مااجيت بس ملتهية والدرب صعب..
صگر : الله يسلمج خالة..عذرج وياج علي ماقصر..
ام علي : ولو..بس لازم اسوي الواجب..
ابتسملهه : مشكورة ..

ماراد يكسر بخاطرهه..عباله جايه وحدهه..مايدري خالة عتبت عليهه واجت تشوفه..
وره هلتلث شهور صگر اخذ ايمن هو وعلي والحجي علمود يطهروه..خفت اروح..شبيه اخاف من كلشي..
رجعو الظهر..ذبحله ذبيحة ووزعناهه..صدقان صگر كل فترة يجون ثنين تلاثة منهم..ماادري شلون يحفظهم..هواي .. اكو منهم اجو علمود سلامته..واكو علمود طهور ايمن.. شبعنه هدايا وحلويات وغيرهه.. واجب يعتبر ..

لحد اخر شي العصر توني كملت تنظيف الهول وسمعت الباب تندك..طلعت افتحهه لكيت مخلد ومرته وجوان..شهد.. الحجي والحجية وسلمى..بهاء واركان ماشفتهم..سلمت عليهم وفاتو جوه..صگر جان بالمطبخ..اجه على صوتهم .. سلم عليهم وكعدو كلهم..رحت للمطبخ اصبلهم عصاير اجت سلمى تحاجيني..
سلمى : لعد ايموني وين..غير اجينه نشوفه..
دنوة : يااا..ولج تنبل مال نوم..بس ينام..هسه اكعدلچيا تدللين بس خلاصبلكم..
دااحجي جان تفوت جوان..الفكرة التكونت عنهه ببالي مستحيل تنمحي وتتبدل..بس اجت تحاجيني بهداوة واسلوب حلو مو مثل كبل..

جوان : شلونج دنو..
دنوة : زينة الله يسلمج..
جوان : الصغير وين لعد..اريد اشوفه..
دنوة : نايم فوك..
جوان : اروح اكعدة لو اعوفه نايم..
دنوة : لا هو انه جنت اريد اكعده..روحي شوفي بس على كيفج وياه..خاف يستغرب..
جوان : يله ميخالف..

عافتنه وراحت..عاين لسلمى مستغربة : شو هاي صايره ادمية شعجب..
سلمى : اي تغيرت الله يچرم..انخطبت حتى..بعد اسبوعين تزوج وتروح..همزين اجه واحد اخذهه..جانت القسمة التجيهه تسوي نفسهه دتدرس وترفض..هسه عمي كام يلح عليهه .. والولد خوش ولد والله..متخرج ويشتغل عاد قبلت ماعدهه حجة بعد..
دنوة : هاا..هم تجيب طاري صگر..
سلمى : يمي لا..بس نوبات اسمعهه تبجي يم شهد..
دنوة : عشتووو..كال تبجي كال..يله تنسى سبحانه الماينسى بقت عليهه قابل..
سلمى : هههههه..اي هاهيه شتسويلهه بعد..

رحت وديت الصينية وكعدت يمهم..وره ما طالعين من يمنه باسبوعين صايرة كعدة بين عشيرة الولد الصايره وياه المشكلة وعشيرتهم..لحدما فضت السالفة وراجعين لبيتهم ببغداد.. فمن اجو باتو تقريب اليومين..
بهليومين جوان بقت على طبيعتهه..يعني تصرفاتهه عادية .. استغربت منهه وفرحت بنفس الوكت..همزين حست على روحهه وان الدتسوي غلط..ولو اذتني..بس كلشي راح بوكته.. وراهه رجعو لبغداد..نظفت وكملت وصعدت فوك اسبح.. كملت وطبيت للغرفة اسمع ايمن يبجي بعياط..
صاح بيه : شنو عايفة ابنج يبجي سطرني..
دنوة : ليش شبي ماشفته..
صگر : لا مالي خلك..تعاي سكتي..

رحت علي سكته..جان التشيرت حاز على ايده ومتضايقه منه .. ادور الجو حار..فحقه كطفل ماعنده غير البچي يحجي بي..بس صگر مدري شبي..
صگر : نزلي يم امي وتعاي..
سكتت بدون مااجاوب..شفته يصيح اكيد ضايج من شي .. نزلته خليته بالحجلة جابهه مخلد راح لغرفة خالة كبل.. عبالك مايندل بس هي..
صعدت فوك..اول ماطبيت كمشني من زندي حيل هو وخازرني : شنو هاي الرسايل..
دنوة : رسايليش حبيبي شبيك..
صگر : وجعي..رسايل بالتلفون..
اخذ التلفون من الميز طلعلياهن..
صگر : هذن..

دنوة : اي انه حجيت وي رزان من رقم رجلهه..تلفونهه جان عاطل ..وهو جاوبني هنا هي ماجانت موجودة..
صگر : منو يكول رجلهه..
دنوة : رجلهه حبيبي شبيك وياي..شنو مامصدكني.. خابره اذا تريد تتأكد..بعدين شنو هاي ايدك دتأذيني..
قفل الباب وكمشني من ايدي بقوة..ماادري شبي .. اول مره هيج يصير وياي..اخذتي ع الجرباية ويبوس بيه بس بحركات توجع وقوية..كمت ابجي ماتحملت .. هو ولا يمه حسيته فصل مااعرف شصار..اخر شي بجيت بصوت ودفعته : شبيييك .. دتوجعني مااتحمل..
ماكدر يكمل..هو اصلا جان متردد من البداية.. كام مني هو ويلبس التشيرت..

فرك وجهه وراح..ضليت مستغربة .. كمشة ايده ولمساته شكد حادة وتجرح..ماتخيلته بيوم يسوي هيج وياي.. كمت لبست ولميت شعري..نزلت جوه مالكيته..
صحت : خااالة..صگر وين..
الحجية : كال رايح لبيت صديقة..عارف مدري شسماه..
بلعت ريكي لمن كالت اسمه..بس لا حيسوي بروحه شي.. يبو علي هسه شجاه..كمت ع التلفون خابرته انطاني رفض .. كمت اكمز..حيسوي شي بروحه ويخليني قلقة علي.. ضليت اليوم كله بالي مشغول اريد يجاوبني ماكو..يا ينطيني رفض يا يطلعلي الجهاز مغلق..اخر شي تركته ورحت انيم ايمن .. صارت بالدعش..نيمته ونزلت يم خالة..

الحجية : يمة شبيج تفرفرين..دستچني ..
دنوة : خالة صگر شلون..حيضل بالي..
الحجية : يااا..خالة شمالج..حبيبة صگر خابرني كال اتأخر يله اجي..عنده شغيلة وي صويحبه..يكمل ويرجع..هيانه الباب مفتوح عود يفتحه ويفوت..
دنوة : هيج تكولين..
الحجية : اي يمة..روحي ارتاحي اليوم اشتغلتي هواي الله يساعد هلرجلين..منا هذا المصگوع بس يبجي..
دنوة : اي ديطلع اسنان وخبصني بالبچي..
الحجية : ديله فوتي نامي..
اخذت نفس بقلة حيلة ورحت للغرفة..تمددت اريد بس يجيني نوم ..ماكو..عبالك عناد..

گلبت بالتلفون..اجت ببالي رزان..دزيتلهه رسالة : رزونة .. انه هلايام جاية لبغداد..بس اشوف صگر شيكول انطيج يوم اكيد علمود اشوفج هناك..
خطية صارلهه شكد تكلي شوكت تروحين..خلاشوفلي يوم قريب كافي تأجيل.. هسة هو غير يجي فت گلبي .. صارت بالثنتين وهو ماكو..نزلت جوه وادك علي..ماكو مايجاوب .. اخر شي سمعت صوت الباب انفتحت ودخل السيارة للكراج .. طلعت بالعجل..طفاهه واجه يمي..
رفع حاجبه وايده بجيوبه : شعندج طالعة..
دنوة : خوفتني عليك شبيك..ليش ماتجاوب ضل بالي
صگر : ماكو شي لايضل بالج..
تقربت منه..شميت ملابسة ..مابيهه ريحة.. هو انه سويت هيج لو تخبل علي..

كمشني من وره رگبتي..حسيت جسمي انشل : عبالج شارب .. لاتخافين مااشرب..الوصاخة ماادنالهه..
عاينت بعيونه وعيوني نحلت من الوضعية..بس وخر ايده انتجيت ع السيارة : شبيك وياي..
صگر : مابيه شي..خشي جوه يله..
عفته وطبيت ركض ابچي..شكد اذاني بتصرفاته اليوم .. هاملني وحتى اسلوبه حيل جاف وقاسي.. صعدت فوك تغطيت ودايرة وجهي ع الجهة اللخ..حسيت علي فات للغرفة .. احس بحركاته هو وينزع ملابسه بس مادرت وجهي.. سويت روحي نايمة..كمل وطفى الضوه واجه يمي.. ضل يگلب بالتلفزيون لحدما بديت اغفى..

انه بين كاعدة وبين نايمة حسيت ايده حاوطت خصري وشفايفه تبوس برگبتي على كيف خاصة من وره.. بقيت على موقفي..كام يتلمس المكان الكمشني منه ..
همس : دناوي..اعتذر ابوية..ماادري شصارلي..
سكتت ماحجيت ..
باسني من خدي وگلبني علي..اخذ ايدي يبوسهه ومغمض عيونه : خوما أذيتج..اسف..
دنوة : انه جنت خايفة عليك..بس مادري شبيك..
صگر : ميخالف..طولي بالج وياي..تعبان ماادري شبيه ..
حركت راسي يعني اي..ابتسم وباسني من راسي.. اخذني لحضنه ويتنفس شعري لحدما غفى..

ثاني يوم هم نفس الحالة..من اقل كلمة مني يزمخ بيه.. بقى هيج اسبوع..ادور راسه يوجعه ويريد يرجع للجكاير .. خبلني .. عبالك طفل واروكض وراه لاتسوي هيج ولاتسوي هيج موزين عليك..بالليل هلكت هلكد مااشتغلت..ماادري شيريد .. كلشي مايقبل..اذا الشغلة تصير من اول مره لازم اسويهه مرتين يله يرضا.. صعدت فوك انام مثل البشر.. لكيته كاعد يكلب بالتلفزيون وشكله مرتاح احسن من الصبح.. اجيت يمه احاجي ..

كمت اتأتئ خايفة يرزلني : اا..نكدر نحجي..
جاوبني بدون مايعاين علي : كولي..
دنوة : اريد اروح لبغداد..مو سولفتلك..
عاينلي وخزرني : ميخالف..شوكت تردين ترحين..
دنوة : شوكت تروح لدوامك اخذني وياك..انه ابات يوم وارجع بالثاني چي الدرب طويل..
صگر : خوش..باجر اروح حضري روحج عود..

حركت راسي بالموافقة وكمت نيمت ايمن..
اخذت التلفون خابرت رزان..كالت ماعندي شي باجر اجي .. ترتبت يعني..

اجيت انام .. هو تقرب مني يشم بشعري..لهناك كام يشهك وبالكوة يجر النفس ابتعدت عنه وكمت جبتله مي..شمدريني عبالي غص بالهوى .. كمش الكلاص مني ركعه بالكع..صار طشار .. ايمن كعد على صوت الگزاز..يبو علي شينيمه هذا..بس انه مبتلية بيهم ثنينهم كمت شلته وافتر بي اريده ينام..
صگر يصيح من مكانه : اذا ماسكت اشمره من الدرج..
شهكت بخوف ورحت يمه : شلون تحجي علي هيج.. شبيك ماتكلي..شمسويلك..
صگر : اخذي وولي من چهرتي..لعبت روحي صياح وبچي بنص الليل..

كام من مكانه واخذ السويچ هو ويلبس : حطلع..اهج .. اهججج..طكت روحي من هلبيت وهلغرفة..احسهه گبر.. گبرررر..
طلع يصيح ويغلط..راسي احسه مثل الجرس..يدكون علي من جهتين..ايمن يبچي بعياط وصگر يصيح علي ويرزلني.. اخذته ونزلت وراه بالعجل..كمشت ايده واعاينله بتوسل : اكعد لاتطلع هسه لخاطري..لخاطر خالة..حاخذه والله مااسمعك حسه .. اسفة ..
رفع ايده..عرفته يريد يضربني راشدي.. ضليت واكفة بمكاني مااريد انهز..هو شافني واكفة عافني وراح بالحديقة يفتر رايح جاي..اعرف شلون اتصرف بمثل هيج موقف.. هواي انضربت راشديات..ايمن شلع گلبي يله نام..تعبني ..رجلية صارن خيوط من الفرة..رايحة رادة..

بين ما غفى جريت كوشة تمددت وخالته على ايدي.. كعدت الصبح اشوف صگر نايم يم ايمن وكامش ايدي.. سحبتهه منه وكمت فوك..غسلت وحضرت جنطة صغيرة الي ولايمن.. خوما اعوفه يم خالة خطية هم تتعب..
شواي واجة صگر يبدل..ردت احضرله الجنطة كمشهه من ايدي وعتهه : لاتكمشين شي يخصني..يله كملي بالعجل خلاولي مالي خلك..
سكتت ماجاوبته..لبست الشال ونزلنه..بدلت لايمن جان تجي خالة شافتنه كاعدين..
الحجية : صباح الخير يمة..اشو من وكت..
صگر : حروح للدوام ..
الحجية : ودنوة شبيهه..ليش هيج عيونج حمر خالة..

ماجاوبهه..وانه التهيت ابدل لايمن..
الحجية : يمعزاي بس لا طاگهه..ازعل عليك والله..
دنوة : لا خالة..بس ايمن ماخلاني انام للصبح..حروح لبغداد باجر اجي..
الحجية : علمود شذيان غير..
دنوة : اي ماكو غيرهه..علمود رزان والله مو گتلج..
الحجية : اي خالة صيري احسن منهه..
اي ..
صگر : يله عاااااد..اريد انگلع..

فزيت من مكاني..شلت ايمن وكعدت بالسيارة انتظره.. اشوفه يحاجي خالة وهي تبوسه من خده وراسه..ماادري شتكلة .. بعدين اجه وطلعنه لبغداد..نص الطريق ونزل جاب اكل.. بس وصلت بغداد خابرت رزان كتلهه وصلت..دلتني ع المكان .. وصلني هناك وانطاني فلوس بدون مايعاين علي.. ماادري شخلص الدرب بدون صوته..
نزل سلم على مهند وصعدت وياه وصلنه لبيت جد رزان.. بكد بيت ابوي بالبصرة هيج مبين من بره..دكيت الباب جان تطلعلي سما..متغيرة ووجهه تعبان..سلمت علي هي وتبچي .. تحضن بيه چن مامصدكة..
سما : سامحيني..الغلط مني..
مسحت دموعهه وبستهه..

دنوة : بعدين نسولف..خلافوت اول..
اخذت ايمن تبوس بي..طبينه للهول واسمع صوت واحد يستفرغ ..شواي ودخل رجال جبير بالعمر.. شعره مشيب بالستينات عمره..وكفت سلمت علي..
رزان : هذا جدو دنوة..
ابتسمت ورجعت كعدت..رجال فقير مبين علي.. وره ربع ساعة اجت سما تحاجيني..
سما : تجين تشوفيهه..
دنوة : يله..وينهه..
سما : بالغرفة..

كمت اشوفهه..ياريتني ماشفتهه..منظرهه يخوف.. وشعرهه خلصان فدور..حتى هي ضعفانة..جان جسمهه متروس وبيهه ضخامة مو ناعمة..هسة منتهية ع الاخير..هي لمن شافتني صدت عني..رحت كعدت يمهه ..
همستلي : شجابج..
دنوة : مو علمودج..بس لخاطر رزان..
شذى : اجيتي تضحكين علي مو..
دنوة : لا..مو بحالج اصلا..بس خافي ربج ببناتج.. شكد أذيتيني وسويتي بيه المايتسوى بعدين لمن اجيت اشوفج تكليلي شجابج..فوك ماتكليلي خلف الله عليج..
شذى : انتي حاطه عينج على عيشتي لحدما مات رجلي وصرت بحالة محد يتمناهه لعدوة..رحتي لسوريا وخلصت منج شرجعج..
دنوة : انه مو يمج..ليش هيج تحاجيني..اجيت اشوفج بس واروح باجر..

دارت وجهها ماجاوبتني..كمت رحت يم رزان..
دنوة : امج لو انطيهه مي عيوني ماتريدني..المحبة مو غصب ولا اجبار..عوفيهه..الله يشافيهه..
راحت يمهه تحاجيهه..فشلت مني : ماما شبيج ويا دنوة.. فوك مااجتي تشوفج..حاجيهه ع الاقل..
شذى : مااريد اشوف خلقتهه..شعندج جايبتهه..
رزان : ماادري شگلج..على راحتج بس هي اجت لخاطري.. ع الاقل شوفيهه علمودي..
شذى : ديله روحي يمهه..اختج ومن حقج..بس اني ميطخ لساني لسانهه والسلام..

عافتهه وكامت..شكد گوية ولو هي مريضة..ماشفت هيج بشر .. چا شكد تكرهني..ادري مرة الاب تكره بت او ابن رجلهه بس مو لهلدرجة..قفلت الموضوع من يمي..المهم سويت العلي وماقصرت..
رزان ضلت تعتذر مني هي وسما..مايدرون انه تاركة الموضوع ومامهتمه..بس فشلو مني..
بقيت عدهم يوم..ايمن خو ماشفته..يا يم رزان ياسما.. بس لمن يبجي يريد حليب اشوفه..
رزان جانو جهالهه يم بيبيتهم بديالى ماجايين..
بالليل غيرت ملابسي ونمت بالغرفة يم سما ..رزان بقت وي شذى جوه..نيمت ايمن واخذت التلفون خابرت صگر.. ضل يدك ..ماجاوبني..دزيتله رسالة : شلونك هسة..هم متضايق

خليته جوه راسي جان تجي رسالة..
- : مابيه شي..باجر يجي السايق يرجعج..
ماجاوبته..ليش عود يسوي هيج..شمسويتله..يعني التلفون بيده بس مايجاوبني..مايريد يسمع صوتي.. نمت مقهورة منه لأول مره بعد فترة طويلة..
كعدت الصبح بدلت وكملت واجاني السايق..ودعتهم ورجعت للبصرة..
كضيت اليوم احاجي خالة..حجيتلهه على شذى وموقفهه..
الحجية : والله هاي مو بشر يخالة..زين رجعتي ماطولتي
دنوة : اي ختولي ماتوقعتهه هيج تكرهني..
الحجية : وهي شدعواهه هيج..البشر عظم ولحم باجر عكبة يموت مايدري شمضمومله..يعني تموت وهي ظالمة بنيه يتيمة .. شحتشوف من حساب..
دنوة : مو كلهه تفكر مثلج خالة..حقوده..

الحجية : عوفينه منهه..هي وربهه..حاجيتي صگر..
دنوة : لا والله..مايقبل يحاجيني..
الحجية : هذا شبي متسودن..اخاف احد محشي براسه حجي..مايگلب هشكل هو..
دنوة : هو حظي كلشي اتوقع منه..
الحجية : لا يمة لاتكولين هيج..ماكو شي يضيع يم ربج.. انه كبل چم يوم شفته متضايگ ومايركد بمكانه.. شديت علگ بالجامة الصغيرة بسيارته..خاف يصير مايصير..
دنوة : وقبل تسوين هيج..
الحجية : اي ليش مايقبل..دخيل اسمه الامام العباس مايرد احد خايب..من بعد ربج ..ادور وحده ماتخاف مسويتله شي ويروح بيهه وليدي..

دنوة : شمدريج..
الحجية : شلون شمدريني خالة..چا هلكبر والشيب شلون صارن..غير اعرف الدنيا وناسهه شنو ماشنو..
دنوة : خالة ادور دتخوفيني اكثر..
الحجية : ولج لاتخليني اتسودن..عَش اخوفج..غير البشر يعرف شديصير..اقلها ينطي احتمال..
دنوة : على كولتج..

بالليل نظفت البيت وصعدت انام..لكيت صگر داك علي مرتين ..دكيت علي جاوبني..
صاح بيه : ليش ماتردين..عايفتني مثل الطرطور انتظر
دنوة : حشاك..بس جنت اشتغل..شبيك..
صگر : شبيه..مابيه شي سلامتج..
دنوة : احجي خوفتني عليك..
جر نفس وزفرة بتعب..ماحجى شي..تمشيت طفيت الضوه وتمددت احاجي : وين انت..
صگر : كاعد بالسيارة بره..ايمن شلونه..
دنوة : زين نومته كبل شوي..
صگر : دناوي..
ها ..
صگر : ماادري شبيه..مختنگ شسوي..

دنوة : اسم الله عليك..خاف تمرضت..
صگر : لا لا..روحي مختنگة مو انه..محتاجج..
سكتت ماجاوبته..تمنيته تسمع دگة گلبي شلون سريعة لمن سمعت كلامه..دقايق وحچى
صگر : نمتي..
دنوة : لا كاعدة..
صگر : نامي خلاسمع انفاسج اريد ارتاح..
ماكلت لا..بس حطيت راسي غفيت بعد ماادري شصار.. ضل كل يومين تلاثة يخابرني بالليل يكلي نامي خلاسمع انفاسج .. مايكدر ينام..هسة لو قريب مني جان شفته اذا رجعله المرض هذاك ..غير يرجع متت على شوفته..ولو يرزلني ويصيح علي بس ع الاقل اشوفه جدامي..

وراهه بفترة خابرني الصبح كال باجر اجي..بس ماكال شوكت اكيد الصبح ماكو غيرهه.. انه سويت الغده جان يدك تلفوني .. كمت اشوفه..نوارة..شلته..
نوارة : الو دنو..
دنوة : هلا عيني..شلونج..
نوارة : على الله..وانتي..
دنوة : بخير الحمدلله..خير خوماكو شي..
نوارة : اريد اگلج شغلة..
دنوة : كولي شكو..
نوارة : جدة متخربطة سوده عليه..
دنوة : يبو شلون..وينهه هسة..
نوارة : بالبيت جانت بالمستشفى..تكدرين تجين..

دنوة : اي اكدر..هسه بس ابدل واجي..
ودعتهه وسديته منهه..كتلهه لخالة كالت اروح وياج..الحجي جان بالبيت فهو وصلنه..طبيت لكيتهه متمددة والبنات يمهه .. بستهه من راسهه وتحمدتلهه ع السلامة..
الحجية غادة : جدة لاتروحين..خليج هنا..اهجسج بمكان وليدي محيي..
هي كالتهه وبچت..حضنتهه وبجيت وياهه..شواي ومسحت دموعهه وغيرت الموضوع..ادور ترجع تتخربط..بقيت يمهه انه وايمن..خالة رجعت .. كالت اخابر صگر اكلة رحنه لبيت جدك علمود مايحجي شي..

مشى الوكت عادي..بس نوارة جانت هنا وبنات عمي فيصل وورود..بس راحن ماضلن هواي..
بالليل كمت اسوي عشه وي نوارة ومرة سالم..هدير.. شواي واسمع صوت عمي قاسم وسالم واحمد هوسة صايره.. نشفت ايدي ورحت..اشوف صگر يصيح وسالم كامشة
صگر : وينههههه..تعاييييي..صيحهه لا اخلص عليهه..
سالم : يابة دصبر شبيهه البنية شمسوية..
صگر : تطلع بدون علمي..چا انه شنوووو..
سالم : الحجية اجت وياهه مااجت بحدهه..على كيفك ..
انه كمت ارجف من سمعته يصيح..ركضت لبست الصاية والشال واخذت ايمن..رحت للصالة لكيته واكف ولابس عسكري توه جاي من بغداد..

مشى باتجاهي وهمس : يله جدامي للبيت..
رحت وياه بس متفشله من الموقف..صگر هو مو مستحيل.. هو مو هيج ابد.. بالسيارة كام يصيح بصوت جنوني.. حتى ايمن فز منه كام يبجي..
دنوة : كافي حباب..اسفة بعد ماعيدهه..شمدريني غير خالة اجت وياي..ليش تسوي هيج..
صگر : خووووش..خوووش وتحجين بعدددد..
دنوة : شحجي....
صگر : اذا فكيتي حلكج الخمج..لاتحجين حرف واحد..
سكتت ماجاوبت..كمت ابجي بدون صوت بس دموعي تصب .. اريد اتذكر شصاير وهيج غيره بس مداالكى شي

رجعت للبيت كبل صعدت فوك..خليت ايمن بجربايته ورحت تمددت وحضنت المخدة ابجي..فشلني وحطني بموقف ابد مامخليني بي كبل..هو مايكول شي اذا طلعت بعدين كتله يدري بيه وين اطلع..يا للدكتور يا لبيت احد من كرايبنه.. بس هلمرة فاجئني..
هلكد مابجيت غفيت..اجتني جوان بالحلم..شفتهه تضحك ووراهه حية ام راسين وتفتر على رجلهه بعدين اجت على صگر تريد تخنگة..كمت ابجي ورحت عليهه ضربتهه بسچينة بعدين فزيت..كعدت مرعوبة ودگات گلبي الف يمكن.. تذكرت جوان الحقيرة ذاك اليوم شكد جانت حبابة وياي..

هو انه المفروض بعد مااثق حتى بخيالي..وانه مثل الثولة خليتهه تصعد لغرفتي..شوف شخلت بالغرفة بحيث خلته يكرهني ويكره مجوده يمي..هو جان يكلي انه من ادخل الغرفة اصير بغير عالم وارتاح..امداني..اضل ثولة شمهما كبرت .. كمت بدلت لايمن ادور انه بدلت..نزلت احاجي خالة ع الحلم
الحجية : ها ولج نزلتي..الخوف اكلني يخالة..خفت لايكون طگج صگر ..
دنوة : لا خالة ماسوالي شي..وينه هو..
الحجية : طالع..ليش هو يركد بالكع..حتى ماقبل ياكل..
دنوة : حتى دنيا ليل شعنده طالع..
الحجية : حظي هذا متعلعل وياه..
دنوة : خالة حلمت حلم مدري شلونه..

كعدت يمهه سولفتلهه الحلم..
شهكت وايدهه على صدرهه : وروح حامد حسيتهه هي ام البلوة..حقيرة ماعدهه احساس..
دنوة : اي هي ماكو غيرهه..انه اعرف شلون اخليهه تحجي .. حجيتهه وسكتت..خالة ضلت تلوب علي..هو شواي واجه ماتأخر..اجت تحاجي تكلة اخذك لسيد يقره عليك
صگر : مااريد صخام بعيني..يمة عوفيني الله ينطيج العافية.. لعبانه روحي من الدنيا..
الحجية : غير اخاف عليك والله گلبي جمر ..
صگر : لاتخافين مابيه شي..

عاين علي وخزرني..دنجت بالعجل..عفتهم كاعدين وصعدت فوك كتبت رسالة لجوان..مااريد اسكت بعد..صگر اعرفه اكثر من روحي..وادري بي اذا ضاج او انغث من شغلة مايطلع حرگته بأحد..وخاصة انه..بالعكس يجي يحجيلي.. فهاي جوان ماكو غيرهه..بعدهه عدهه امل يحجي وياهه.. خلاقطع هذا الامل احسن ..
- : شوفي لج تره عرفت كلشي..عوفيني وعوفي رجلي كافي لاتتقربيلنه عوفينه نعيش مرتاحين..اجيتي يومين گلبي البيت علي عزه..بس بسيطة انه الج..عبالج تسوين بي هيج وتفض على خير..صبرج علي الا ازوعج العافية..لاتنكرين وتكولين مو انه..لا انتي ونص ..

دزيتهه ومسحتهه من يمي..مسحت الرقم هماتين.. بلكت تنجر اذنهه وتفك ياخة من صگر..موتتني لاطشة بي.. شتريد منه .. حتى صار عنده ابن وصار ابو فلان وبعدهه لاطشة.. همزين كلت لخالة خاطر يكون عدهه علم..

وره يومين كعدت الصبح على صياح صگر ويدك بالباب حيل جفلني..كمت من مكاني بالعجل..
دفر الباب واجه يمي كمشني من وجهي حيل..حسيت فچي انفصخ بايده..
صگر : شمسويهههه..انتي ناوية تجلطيني مووووو
دنوة بصعوبة : شكو شمسويه..
كمشني من زندي وصاك اسنانه بوجهي..اجت خالة على صوتنه..كمشته من ايده تريد تفكه بس قوي ماينفك ..
الحجية : يمههه..عوف البنية الله يرضا عليك..لاتسويلهه شي شمسويتلك خطية..

صگر : لج خابرني خالي محسننننن...
يكلي مرتك تتهجم على بنتي وتتهمهه عدهه علاقة وياك .. كتله لا ماتسوي هيج هي..لخمني على حلكي لمن دزلي رسالة الافندية هاي جدامج..
شهكت وكمشت ايده : والله ماكلت هيج .....

يتبـــــــــــــــــــــــع........................

صباح الخير او مساء الخير ع الكل ، مشتاقتلكم والله ، واعتذر ع التأخير ..

تعالو اسولفلكم ليش دااتأخر .. اولا القصة بعدلها ع الاكثر ٧ بارتات وتخلص ، ثانيا نفسيتي مااعرف يعني متقلبة ومديصيرلي واهسي القديم بالكتابة ، شايفين اخر امتحان دائما تحسوه ثقيل ومينتهي بسرعة؟ بالضبط هو هذا الدااحسه مع البارتات الاخيرة ، فانطوني مجال ، ادري تأخرت كثير بس قدرو نفسيتي ..

بالنسبة ليش ماارد ع التعليقات ، هواي بنات ، واني من تشوفوني تأخرت اعرفو هذا السبب ، لكن دااعوضكم وتشوفون البارت طويل صح؟ ..

رقية شلون عرفتي قصة دنوة وصگر ، تعرفيهم او شلون؟ .. خليها بالبارت الاخير اگللكم شلون وصلتني ..

احب اشكر البنات الي اسلوبهم ماشاء الله وردة ، راعوني حتى بكلماتهم ، وسألو عني ، جدا اشكركم واشكر مراعاتكم لظروفي رغم متعرفوها بس شكرا جدًا ..

واخيرا وليس اخرا ، اني من بديت بالقصة ابد ماطلبت كومنت او حتى تصويت ، والبنات الي متابعيني اول بأول حيعرفون اذا كلامي بي مصداقية ام لا ، انتو الي حبيتوا القصة وتفاعلتو معاها ومع شخصياتها ، فتأخيري للبارت لا ارادي ومااقصد بي زيادة كومنتات ..

ووو .. اكو رابط قناة بالوصف بحسابي هنا ع الواتباد .. اشتركوا بيها اذا ممكن .. شكرا للكل ، احبكم .