كان أبوي متقدمهم ، بي جلابيتو البيضاء وعمتو وعصايتو وأمي لابسة توب جميل كانت وفاطمة زيها برضو 😭
قعدوا معاي واتونسو معاي كتييير ، وضحكنا كتير
بس فاطمة 🥺🤦🏾♂️
كانت ساكتة وما بتتكلم معاي ...
وكانت مبتسمة ابتسامة خفيفة ، وقمت سألتها
-مالك يافاطمة زعلانة مني في حاجة !!
رد وقالت لي :
- اي ما بتسأل مني مالك 😭 وبقيت م بتتزكرني وقعدت تبكي
لحظتها انا وقعت ليها في الأرض وبقيت قصاد ركبتها ومسكت ايدها وبقيت بعتزر ليها واحكي ليها الحصل بكيت وحضنتها وفضلنا الإتنين نبكي بي حرقة وشوق 😭
بعدها قالت لي :
- عافية ليك ياود وأمي وأبوي
صحيت من النوم ، لقيت عيوني محمرة شكلي بكيت جد جد 😅
صحيت مبسوووط شديد ، طاير من الفرحة كأنوا صباح الجمعة دا صباح العيد
احساسي كان زي الطفل الصحي الصباح لبسوا لبسة العيد ومشي لي امو عيد عليها وأدتو عيدية ومشي لي أبوهو برضو 😭
الدنيا بتراضي فيني شديد ورحمة ربنا بتنزل علي مطر مطر وبتغسل كل وجع جواي وتبرد كل نار جواي وتطفيها
مسكت تلفوني واخدت لي نفس كداا وملامح وشي تتكشم براها زي الزول البتمغي وغالبوا النوم
إتصلت علي صبري
- ألو حسن كيف ، إمتحاناتك كيف بالله
- تمام والله الحمد لله من الله بسط
- برنامجك شنو لو فاضي ما تجي تقيل معاي الليلة بجاي ، ولا لسة م خلصت امتحانات
- لسة لكن دا اخر اسبوع بخلص التلات ، أسمعني
السوق اليومين ديل ما فيهو عربية معروضة
عاوز لي حديدة
- يازول قول ياعرباات لكن عاوز بيها شنو انا من زمان بحنسك تاخد ليك عربية تريح نفسك من شحططة المواصلات وتقشر بيها في الجامعة وتحشش بيها
هسي مالك غيرت رايك 😅
- بحكي ليك لمن اجيك المهم شوف لي حاجة كويسة كداا ، وسعرها مناسب
كلك ولا دبدوب ولا رضا الوالدين اي شئ
- سمح شايف جمبنا في واحد عارض ليهو مضلع نضيف والله بشوفوا ليك
- خلاص اكان لقيتها نضيفة وسعرها كويس تم الشغلة طوالي بس استعجل لي عاوزها بالكتير كدا اسبوع
- سمح أبشر تب
قفلت من صبري ... وسرحت وبقيت افكر
بعد دااا انا اشتغل علي خطتي الرسمتها ، اصلا اهل روان بعد يعرفو ما عندي اهل حيتحججو بي اني ما كملت قرايتي ويمكن يقولوا ما شغال وما عندي الشي البعرس بيهو
وقررت اسد ليهم النقطة دي ، لازم يعرفوا انو بتهم دي لو دارت النجوم بجيبها ليها
ومشيت حسب الخطة ، قمت صحيت ليك احمد من النوم وسقتو وقعدنا برا ، وقلت افتح معاهو الموضوع
- احمد انا عايزك في موضوع مهم ومصيري
- جدا احكي ، مصحيني من النوم والموضوع م يكون مصيري بضبحك ..
- بي اختصار انا نويت اتقدم لي روان واطلبها من أهلها رايك شنو !!
- شنوو شنو دقيقة نويت تتقدم كدي فهمني ما ترميها لي بب كدا
- ههه طيب افهمك ، انا والله خلاص نويت اتقدم لي روان واحارب عشانها
روان بتحبني وحاربت عشاني وجا دوري احارب عشانها ، يعني بعد العملتوا معاها واني سبتها بدون ما حتي افهمها او اعتزر ليها جاتني لحدي عندي واتمسكت بي وانا ما عاوز غير زول يتمسك بي
اها قلت شنو حتساعدني !!
- يازول انا افديك بعيوني لكن انت عارف الموضوع دا صعب صاح جاهز للامتحان داا !!
- يازول ربك للغلابة م تشيل هم انا اتوكلت تاني البجي من الله راضي بيهو
بعدين انا عندي خطة بت كلب
وقمت حكيت ليهو بالتفصيل حنعمل شنوو
قال لي
- والله اتاريك ياحسن طلعت ثعلب مكار وعامل فيها مسكين
-ههه يازول انت بتلعب ولا شنو انا ود امدر
المهم من هسي لحدي ما نسافر حنمشي خطوة خطوة
اول خطوة هسي عاوزين نعرف من ابوك اذا كان في زول متقدم ليها ولا لأ
بعد داك نمشي وانا بتكلم مع الشيخ
وفي نفس الوقت ابوك يتكلم مع ابوها وكدا نكون ضغطناهو من كل حتة 😅
واهم شئ الزمن لازم نسرع قبل مؤتمن يرجع ويبوظ كل شئ
امين ياصحبي ؟؟
- امين ياحسن
وفعلاً بدينا تنفيذ الخطة ..
بعد يومين اتصل علي صبري وقال انوا ظبط موضوع العربية وكلمني عشان اجي استلمها
اصلا صبري عندو توكيل مني فتم البيعة بدلي
قلت ليهو تمام خليها معاك في البيت قرشها انا بجي بشيلها منك نهاية الاسبوع
قال لي :
- عليك الله يا حسن بتخطط لشنو شكلو في شي والشمار حرقني
- يازول اصبر لامن اجيك بحكي ليك اي شئ
ما تستعجل علي رزقك
- خلاص اسمعني تعال لي الجمعة اصلا عامل لي كرامة كداا المرة دي كانت عيانة وربنا كتب سلامتها.
- وانت لي م بتكلمني انو فايزة عيانة والله بتبالغ عديل من متين ومالها
- والله من بداية جيتك من ود عجبنا ، بعدين قلت ما اشغلك اخليك مع القراية
- غايتوا بالغت هسي تكون زعلت مني خلاص عاين زيد عليهم خروف تاني كرامة وسلامة للعربية بالمرة وانا بجي ومعاي اصحابي تمام !
- يازول ابشر تب
قفلت منو وكنت ماسك شيت بقرااا لانو بكراا خلاص أخر امتحان ...
منتصر واحمد وعبد الله خلصو حظهم فضلت انا
اثناء ما انا بقرا جاني اتصال من روان وطبعاً هي لي هسي ما وريتها اني عاوز اتقدم ليها
عشان خفت تكلم اهلها ويطرشقو الموضوع قبل يبدأ
- حسن حبيب القسي
- المنصفة كيفك
- تمام القراية ماشة كيف خلاص خلصت حمد الله علي السلامة
منتظرة متين تخلص عشان تفضي لي ، كنت مشتاقاك شديد الفترة دي
- هانت خلاص ، اعفي لي بعدت عنك شديد لكن غصب عني بس حعوضك شديد كمان
- بعد تخلص حتجي مع احمد هنا !!
- لالا م حقدر عندي شغل كتير راجيني والدكان محتاج جرد وتصفية حسابات
كان نفسي لكن صعب
لكن لو لقيت طريقة بجي يوم خميس كداا واقعد جمعة سبت وارجع
طبعا روان سكتت والعبرة خنقتها وماعرفت تقول شنو ، بس انا حبيت اعمل ليها كل شئ مفاجأة 😅
لانو لما تتفاجأ اني جيت ود عجبنا حتنبسط وكمان لما الاقيها وافاتحها في موضوع اني عاوز اتقدم ليها
حتتخلع اكتر وتنبسط وتوافق 😅
قلت ليها
- ساكتة مالك !
- لالا ماف شي ، انت كيف مع القراية جاهز لي بكرة ؟؟
طبعاً عملت رايح من زعلها قاصد عشان كل م زعلت اكتر كل ما انبسطت شديد بعدين
- يعني بين بين لكن ربنا يسهلها بس
-طيب اخليك تقرا بي راحتك
- خلي بالك من نفسك وبعدين كدا بتصل عليك اتفقنا !!
- طيب مع السلامة
مع قفلتي للخط جاني احمد جاري مساك تلفونو شكلو كان بتكلم بيهو
- ابسسسط ياعم اتكلمت مع ابوي هسي وطمني قال لي ماف زول متقدم ليها وسألتوا من مؤتمن
قال لي م اتقدم لسة
حتي البينهم دا بس من زمن امو عايشة كلام نسوان يعني
ابشششر ياعريس بعد دا تنجز بس
اثناء كلامنا دا الشباب جوا داخلين وسمعوا ضحكنا وكلمة ابشر ياعريس دي
خشوا ببشرو وينو العريس نبشر ليهو 😅
قمنا حكينا ليهم انا واحمد الموضوع كلوو
وعينكم م تشوف الا النوور 😂
كمية تنمر وهنكرة في الفارغ ، ندموني علي اليوم العرفت فيهو روان
منتصر قال :
- اول شي نوديهو نطهرو عشان نمشي ليهم جاهزين 😂
انفقعنا بالضحك كلنا
طبعا زمان لما كنت بقعد معاهم بكون ساكت وما بتفاعل زي البت في نصهم
كان منتصر بتغاظ مني شديد وبقول لي
انت ياود ما مطهر ؟؟ ما تتفاعل مع البشرية دي 😂
باركوا لي في النهاية وكانوا مبسوطين لي شديد واي واحد فيهم اتجوعل واتضكرن
منتصر قال فنان الحنة عليهو وعبد الله قال حاجات الحنة من اكل وبارد وكل شي عليهو 😍
ياخ والله الاصحاب ديل نعمة من الله لما ربنا يديك اصحاب في الحارة واقفين رتج يشيلو معاك شيلتك ويسعدوك دي ما حاجة هينة
حرفياً انا بعيش حالياً أجمل لحظات عمري
الجميل في الموضوع اني عايش زي باقي الناس والعقدة الكانت جواي اني ما زيهم اتحلت
معاي اصحابي وبحب وعاوز اتزوج ، رجعت انسان من تاني 🥰
مرت الأيام وخلصت امتحانات وجا يوم الجمعة ، اليوم اللي مفروض امشي لي صبري وافاتحو في الموضوع واشوف وضعنا والقروش الفي وكدااا
عشان اكون علي بينة
الصباح صحيت الشباب واصلا كنت مكلمهم انهم يمشوا معاي وهم ماشاء الله ما بقصروا ، محل طقة دا م بقولوا لا 😅
واتحركنا من الداخلية علي بيت صبري في دار السلام ، سافرنا سفر نحن لحدي ما وصلنا
قريب 11 كدااا
خشينا وسلمنا علي الموجودين اها صبري وعبد الرحمن واصحابوا وناس من السوق بعرفهم حتي ناس من سوق امدرمان زمن ابوي زمان
وكانت لمة حلوة شديد ، بطبيعة معرفتي بي ناس السوق كنا قاعدين مع ناس السوق
وبدت الونسة ونصها كانت عن السوق زمان وزمن ابوي الله يرحمو وكانوا بشكرو فيهو وانو في زمنو التجار كانوا بي خيرهم
الونسة دي رجعتني سنين لي وراا ، تفاصيل وحكايات اتزكرناها وزكرتني أبوي
كنت بحس من الونسة انو ريحة ابوي حايمة ، ريحة الدكان حقنا زمان والتفاصيل دي كلها جاتني
كنت مبسوط شديد صراحة وبتونس وبضحك لدرجة الناس بقت تستغرب هل دا حسن
اي دا حسن زاتوو ، حسن الزمان رجع تاني من اول 💜
بعد الفطور والشاي والونسة انفردت بي صبري وعبد الرحمن وطلعنا برا وقفنا جمب العربية
الجابها لي صبري حسب طلبي
كانت اكسنت مضلع نضيفة وشبه جديدة لونها أبيض
صبري طلع المفتاح من جيبو واداني ليهو وعبد الرحمن قال لي ورقها وحاجاتها كلها جواها ، العقود عملها واحد زميلي انت عارف انا موقوف وكداا
اعتزرت ليهو شديد وصراحة كنت خجلان من نفسي قداموا
قال لي :
- لالا يازول والله رجعتك للحياة وللضحك والناس دي عندنا في الدنيا
صبري قال لي :
- قبيل وانت بتتونس جواا مع ناس السوق وانا جاي شايل الشاي وداخل سامع صوتك بتحكي في قصة
انا في الأول قلت دا بشير الغالي
نفس الصوت والنبرة وطريقة الكلام والضحك
الخلف ما مات والله
حمد الله ع سلامتك
رديت ليهم :
- والله يا جماعة انا الماعارف اشكركم كيف وبجد انتو اهلي واخواني وعزوتي وانا بدونكم ولا شئ
المهم انا ما حكيت ليكم قلت احكي ليكم لما نتلاقي
انا صراحة عاوز اعرس 😅
طبعاً الاتنين اتخلعوا وقعدوا يضحكوا
قمت بعدها حكيت ليهم القصة من بدايتها لحدي نهايتها
عجبتهم القصة ووافقوا ودعموني شديد
وقلت ليهم خلاص انا احتمال بكرة اسافر هناك وارتب المواضيع لما نبقي علي المشية بتواصل معاكم عشان تجوا بإعتباركم أهلي بس الكلام دا بيني وبينكم اهلي م يصلهم خبر
م معروف عمي دا ممكن يعمل شنو ..
واتفقنا علي كدااا
في نص وقفتنا جاني اتصال ، وصراحة دا ما اول مرة يتصل
الفترة الفاتت من بعد خلصت امتحانات بقي يتصل علي كتير وانا بكنسل
في اللحظة دي خلاص طفح الكيل
رديت
- الواا منو معاي
- اهلين حسون كيفك ، شنو منو معاي انت نسيت صوتي ولا شنو وبعدين لي ما سجلت رقمي من المرة الفاتت
- واسجل رقم لي يا بت الناس في شنو سبب يخليني اسجلوا
- حسن انت لي بتتكلم معاي كداا ، عادي يعني موش اتكلمنا قبل كداا وبقي في بينا معرفة وكداا
بعدين يا حسن ما تنسي انا منو
انا علا فرنسي ما محتاجة اديك سبب اكبر عشان تحفظ رقمي
- ياخ علا فرنسي مع باقي الطلبة ما انا ، انا شن دخلني بيك يابت الناس الله يرضي عليك انا والله لاقدرك لا مستواك ولاحتي افكارنا واحدة
انتي م بتعرفيني و انا والله م تشوفي شكلي داا انا في تفكيري اكبر من ابوك
لا بتاع قعدات لا بتاع صحبة وانتي عارفة كدا كويس فشنوو انسي الاوهام دي من راسك
- عاين يا حسن انت بتاعي انا خليك عارف المعلومة دي وعلا لمن تخت حاجة في راسها بتجيبها بتجيبها
فما بالك ختتك في قلبها ، شوف انت ممكن تقول علي مجنونة وعايشة دنيتي اولاد وطلوعات ودخلة ومرقة بس انا زاتي مخي يوزن بلد والعاوزاهو بعرف اجيبو وبينا الأيام ياحسن
واتزكر كلامي دا كويس
اثناء ما بتتكلم ما لاحظت انو روان كان خاشة في الانتظار ومتصلة
بعد قفلت الخط وعصبت شديد منها لقيت روان متصلة قريب اربعة مرات ومرسلة لي رسالة
" مشغول مع منو يا ود الناس "
واتزكرت اني الصباح لما اتكلمت معاها في الطريق ونحن جايين قلت ليها برجع ليك بعد الفطور قبل الصلاة
وهسي نسيت وانشغلت مع صبري والونسة
التصرفات دي كانت بتضايقني من نفسي ، لاني ما متعود لسة وخفت روان تكرهني او تسيبني عشان كدااا بس الحاجة الكويسة اني كنت بعتزر ليها دايما
المهم رجعت ليها واثناء م الجرس بدق قلت لنفسي هسي لو سألتني بتتكلم مع منو
اكذب عليها واقول زول ساي ... قمت من التفكير خفت اتلعثم قدامها وتكشفني هي باقي مفتحة 😂
قفلت الخط قبل ترد وقعدت شوية افكر اقول شنو
رجعت لي وهاااك يا شكل
-انت ووما انت وما بعرف شنو ، كيف تقول لي برجع ليك وما ترجع لي انت بتلعب بي وكلام كداا عجيب
بعد خلصت كلامها قلت ليها خلصتي !
قال لي اي رد علي كلامي دا ولا ما عندك رد
- إشتقت ليك وحلو خوفك علي
سكتت 😅
- قلت ليك إشتقت ليك وحلو خوفك علي
- سمعتك اي ، عاين م تحنكني كنت بتتكلم مع منو سريع
كنت مجهز كذبتي ، ما طبعي الكذب بس روان ما كنت بستحمل أخسرها حتي لو اكذب لانو عارف ممكن تزعل وتعمل مشكلة واحتمال موضوع العرس بي سبب الموضوع دا ممكن تحصل فيهو مشاكل
وانا في سباق مع الزمن قبل يرجع مؤتمن
بس قررت بعد العرس احكي ليها كل شئ
ودي كانت غلطة غير مقصودة أدت لي مشكلة كبيرة شديد حنعرفها قدام 🤦🏾♂️
المهم قلت ليها كنت بتكلم مع تاجر بخصوص بضاعة وكداا ووريتها اني مع صبري عامل كرامة وكدااا
بعدها كلمتين حلوات علي كم ضحكة منها وقدرت ادس منها دون تحس
قالت لي عاوزة احكي ليك حاجة بس خايفة تزعل
- احكي في شنو ؟ انتي كويسة حاصلة ليك مشكلة !!
- لالا بس امس المساء ابوي كان بتونس معانا كلنا قام قال حاجة غريبة
قال لي امي انتي بتك دي في مرة في الحلة طلبتها لي ولدها ؟؟
وامي نفت الحاجة دي
قال ليهو برري لي !
قام قال لينا حاج ابراهيم سألوا مني اذا كنت مخطوبة او في زول ناضم فيني
يكون دايرني لي واحد من اولاد اهلوا ولا شنو
انا المطرة صبت فيني ياحسن والله لو طلع صاح انا بموت نفسي انا عاوزاك انت 😭
انا طبعا من جوااا بضحك بس م حسستها بشئ
قلت ليها بي طريقة درامية ومقصودة عشان اوريها بحبها قدر شنو
- كيف يعني يعرسك زول غيري انا والله اكسر ودعجبنا فوق ريسان اهلها انتي حقتي انا فاهمة ولا لأ
ماف زول غيري بعرسك
اطمنت شديد هي وعجبها الكلام وبقت تضحك وتقول لي خلاص م تهيج كداا م تخاف ماف زول غيرك بعرسني 🙈😂
طبعاً اول مرة احس بالدرامات البتحصل في الحب ديك والبشوفها في الجامعة
زمان كنت بقول ديل شنو الاغبياء الشفع ديل بس هسي انا زاتي بقيت زيهم 😂😂
بقيت بتلفت ماف واحد من الشباب شايفني عشان ما يمسك علي زلة
والله زي حرامي الغسيل 😅 الخايف الناس تقبضوا بسرق وخايف الناس تشوفو سارق غسيل 😂
المهم اتونسنا شوية لحدي ما الغداء جا وكورك لي صبري للغداء
استأذنت منها وقلت ليها بعدين بتصل عليك في كلام مهم عاوز اقولوا ليك
وقفلت منها ورجعت جواا اتغدينا وشربنا الشاي وخلاص الواطة قربت تمغرب كدااا
الناس بدت تطلع
قعدت انا والشباب ساعدنا صبري ورتبنا معاهو البيت لانو صبري عندو ولد وبت وصغار
المهم بعد خلصنا وجينا طالعين الشباب اتقدموا علي وانا نسيت اكلمهم بموضوع العربية وكنت عاوز اعملها ليهم مفاجاة ، من زمان بقولو لي جيبها عشان نحوم بيها ونعز روحنا
بس انا كنت رافض
المهم طلعوا وكانوا متحركين علي الظلط الرئيسي وانا ودعت صبري عشان بكرة سفر
وصبري فتح لي الباب وطلعت العربية وركب معاي عبد الرحمن عشان نوصلوا في طريقنا
تصدقوا اول مرة اسوق عربية من بعد عربية ابوي زمان
اول م ركبت فيها ودورتها جاتني زكريات زمان مع ابوي لما كان بعلمني يادوب اسوق كيف
لحظتها اتخيلتوا قاعد ورا وبعاين ليهو بالمراية وبعلم فيني
اضغط كلتش عشق ارخي براحة واضغط بنزين براحة وهكذاااا
اتحركت لحدي م وصلت الشباب كانوا ماشين في نص الشارع قلت اشاغلهم
جريت فيهم نور طويل وبقيت بضرب بوري شديد فيهم 😂😂
اتضايقوا وجنبو وبقوا راجيني عشان يسبو لي بتاع العربية داا قمت انا زدتهم من الشعر بيت
عصرت عليهم لحدي م ضغطتهم ليك مع خيطة كدااا 😂😂
الساعة الهاجوا ليك وبقوا ناس مشاكل ، ولسة ما شافوني
قمت طوالي نزلت ليهم وقلت ليهم :
- سوري ياشباب ما شايفكم 😂 وكنت بضحك لدرجة خليت الباب العربية فاتح ومشيت كم خطوة بعيد وبقيت بضحك
كنت بضحك من قلبي اقسم بالله
اتخلعوا طبعاً بس افتكروا دي عربية عبد الرحمن لمن شافو راكب قدام معاي
وقالوا لي ..
اصلا الواحد لمن يدو يسوق بتعاور في خلق الله بعدين انت اربعة ويا عبدالرحمن الزول دا بقلبها ليك
عبد الرحمن كان بضحك بس
ركبو وراا ..
وبقيت بشاغل فيهم ، لقيت فيهم فرقة خلاص
قلت ليهم :
- من بتين بتتغرفن يا البلابل😂
هم طبعا اتغاظوا وبس احتراما لي عبد الرحمن سكتواا وانا اضحك واشاغل فيهم
اتحركنا من دار السلام وجينا طبعا بي شارع العرضة عشان ماشين بحري نوصل عبد الرحمن اول
جينا بالأحفاد وعاودك الحنين ياقلبي
كان الوقت زي الساعة 6:30
الاحفاد كان عندهم حفلة تقريبا والشارع زحمة والبنات ماشات وطبعا الشباب ما قصرواا
يشاغلوا في دي وفي ديك
انا لحظتها اتزكرت موقف حصل قبل سنين لما فاطمة اختي كانت في سنة اولي يادوب وكان عندهم يوم المراءة وبليل انا جيت سقتها من الجامعة بي عربية ابوي
حرفيا انا اليوم داا خلاني اتزكر احبابي كلهم
فجاءة لاحظت لي بت لابسة توب وكانت بالجهة التانية للظلط وكانت ماشة عكس الشارع مع اتجاه حركتنا نحن
مع العربات الكتيرة ما كانت ملامحها ظاهرة بس لي لحظة من الزمن لمن ركزت لقيتها فاطمة
نفس المشية
لحظتها انا قلبي دا حسيت بيهو وقع ولمن النفس غلبني
ما وعيت بي نفسي الا وعبد الرحمن بلفت فيني وانا واقف في الترتوار وبنده عليها بي اعلي صوت
يافااااااطمة يا بت
انا حسن يابت
يا فااااطمة
لمن وعيت لقيت الشارع فتح وانا قافل الشارع وعبد الرحمن بقي بقول لي ياحسن استغفر دي ما فاطمة
وانا بحلف ليهو دي فاطمة والله فاطمة وعيوني كانوا جاريات مطر
هداني وقال لي خلاص جنب عشان الشارع
ركبنا واتحركت وبقيت اعاين واتلفت عشان اشوفها تاني بس اختفت
جنبت العربية ونزلت وبقيت افتش
زي المجنون وزي م بقولو الغرفان بتعلق بي قشاية
بعد قنعت واستوعبت انو دي مجرد أوهام زعلت 🤦🏾♂️
ركبت العربية ودست بنزين شديد لمن اللستك فحط وبي اقصي سرعة بقيت سايق
الشاب طبعا كانوا مستغربين ومافاهمين اي شئ
بالذات احمد
حسن دا مالوا وفاطمة منو ولانهم طبعا ماعارفين قصتي
منتصر يمكن شوية لانو كان عارف انو وراي قصة وقال يمكن تكون فاطمة دي جزء منها بس برضو ما كان عارف
عبد الرحمن لانوا عارف بقي يقول لي استهدا بالله وركز في الشارع
لمن هديت لقيت نفسي في بحري عديل ، نزلنا عبد الرحمن في المؤسسة ومن هناك هو قال بركب الشعبية مكان ساكن
لمن نزل والشباب نزلو وراهو مفتكرين انو انا حنزل وعبد الرحمن يسوق العربية ويمشي
بس اتفاجؤ لمن عبد الرحمن مشي طوالي وانا ما نزلت وهم نزلوا العورين
ساعتها انا بقيت بضحك فيهم وشوية الموقف دا روقني ورجعني لي طبيعتي
لحظتها اكتشفت اني ما طبيعي ولازم اشوف حل او ع الاقل روان تعرف الحاجة دي
الشباب ركبوا تاني ومنتصر ركب قدام معاي وبقوا يقولو لي احلف بس انها حقتك
قلت ليهم ورقها في المراية تقريبا وبقو يفتشوا لحدي ما لقوا وفعلا صدقوا لما لقوها بي اسمي
طبعاً خلاص اي واحد شيطانو لعب ليهو في راسوا
منتصر قال لي هسي دي تنزل وتخليني اسوق ومسك الدركسون بي يدو 😂
عبد الله حلف طلاق الا يسوق هو اول
اها وبقوا يقولوا الليلة حنصيع وين ومابعرف شنو
احمد ساكت
قمت قلت ليهو وانت ماعاوز تسوق
قال لي
- لالا انا بس مستغرب سنين نحنسك عشان تجيبها الخلاك تجيبها هسي شنو
وظاهر انو كان داير يدورني 🤣
قمت حكيت ليهم انا جبتها عشان شنو
وبقوا يشغلوها لي
اها عشان روان احححححي انا طلعت كلب سرة ساي
الموقف دا خلاهم يكسروا حنك الحصل قبل شوية
مع انوا جواهم الف سؤال واستفسار
لانو موقف زي دا اقل شي ممكن يكون حسسهم انهم م بيعرفوا اي شي عني رغم العشرة دي كلها 🤦🏾
بعدها قلت ليهم حنمشي الداخلية بكرة ورانا سفر
المهم طبعا لانو عارفين السفر دا حيفرقنا وكنا عاوزين نقعد اكتر مع بعض
اقترحوا انو نأجل السفر لي كم يوم ، عشان نصيع ونقضي سوا كم يوم
انا ما كنت موافق لانو بالي كلوا انو اي تأخير ما في صالحي
بس وافقت عشانهم وقلت كل شي لي خير
في الطريق وانا سايق كنا مشغلين بي تلفوني اغناني ورابطنها بي العربية
كان شغال ود الامين عشان كلنا بنحبوا
وبنغني معاهو وقررنا نمشي شارع النيل
طوالي اتحركنا علي كبري المك ونزلنا شارع النيل
المهم في نص الاغنية التلفون ضرب وكان ماسكوا منتصر وبفتش في الاغاني
الحصل انو بالغلط منتصر رد علي الرقم
والصوت كان واضح في السماعات
- الوو حسووون حبيبي كيفك!!
قمت انا زي الحرامي القبضو سريع سريع شلت التلفون وفصلتو وقفلت الخط
الشباب اتصدموا للمرة التانية ، صوت علا كان واضح وكلهم عرفوها
هنا الصمت عم المكان وداخل كل واحد فيهم كان في تفسير
لحظتها بعد سكتوا وكان ظاهر في وشوشهم التغير
حسيتهم زي الانخدعوا فيني
احمد بالذات
لحظتها احمد قال لي :
- انت وقت بتاع بنات وعلا عاجباك عاوز تلعب بي بت الناس " روان " مالك ؟؟
لا وكمان في واحدة مجنناك اسمها فاطمة لدرجة تتجنن وتنزل في نص الشارع وتكورك بي اسمها
وكانت لهجتوا حادة وكلامو زي السكين كان
انا سكت وما عرفت اقول شنو اوو اشرح ليهم الموقف كيف
منتصر قال لي :
الحاصل شنو ياحسن فهمنا حاجة
صحي الكلام داا مجكس علا وبتلعب بي روان
وخادعنا كلنا وما وريتنا لي
خايف نحسدك عليها ولا شنو
عبد الله قال ليهم
- مالكم انتو هو حر روان اخت واحد فيكم ؟؟
ما كلكم مجكسين وعاملين بتحبوا هو مالو ما زول زيكم خلوا يجكس ويعمل العاوزوا خلاص كلكم قلبتوا شيوخ
انا بقيت سااكت وبسمع في النقاش داا
احمد قاطع عبد الله
- اي روان اختي وما برضي ليها كداااا
وبعدين نحن واضحين علي الاقل ما زي الأخ داسي مننا التقول ما اخوانوا
احمد صراحة كان جادي شديد
انا لحظتها كان جواي شي واحد
انهم كيف يفكروا كدا عني كلهم افتكروا اني بلعب بي روان ومجكس علا واني م معتبرهم اخواني
يعني هل بعد العشرة دي كلها يطلعوا ما عارفين انا شنوو وما واثقين فيني ؟؟
لحظتها حسيت انو دي مشكلة كبيرة شديد.
مشكلة ممكن تطيح بي صداقتنا
وتاني رجع الخووف يتملكني
هل حأخسرهم واخسر كل شئ 🤦🏾😭
.
.
.
.
ودي نهاية الجزء الثالث من الرواية ، انتظروا احداث جديدة ومشوقة في الجزء الرابع والأخير
بتمني توروني آرائكم وانتقاداتكم وانطباعكم عن الجزء دا تحديدا وعن الرواية ككل 😊
وما تنسوا توروني الاقتباسات الحسيتوها بتشبهكم 💜
يُتبع
#أبوبكر_علي