درويش ود عجبنا

٢٧

بسم الله قبل ما نبدا ..

الرواية دي قيد الكتابة يعني اول ما الكاتب يرسل انا بانزل باذن الله تعالى .. 

فما تسالوا عن الباقي ..  

قراءة ممتعة 

ــــــــــــــــــــــــــــــــــــــــ

نفسها الأقدار البتبكيك نفسها البتخليك تضحك فرحان ، بس نحنا كبشر ضعاف جدا مع الأقدار الصعبة 💜

وأخيراً الدنيا ضحكت لي ، وابتسمت في وشي وأدتني سبب اعيش عشانوا

حب روان جاني في لحظة انا كنت في أمس ما يكون ليهو ، وتمسكها بي رغم العملتو معاها كان دافع يخليني أستمر عشانها وأحارب

في فرق بين البحبك عشان انت جميل في نظرو او لأي سبب تاني عادي وبين البحبك عشان لقاك ملجأ من خوفو

الحقيقة انو انا كنت هارب طول سنيني وخايف دايماً ولقيت في روان حتة اقدر الجأ ليها وادس روحي فيها

روان كانت محطة وصول بعد رحلة طويلة من التعب ، روان كانت أشبه بي غيمة في عز الصيف وأشبه بي هبة نسيم علي فريع ياسمين

هطول المطرة بعد سنين عجاف وظل شجرة وسط صحراء قاحلة 💜

روان كانت فرصة تانية للعيش ، عمر جديد أعوض بيهو عمري الضاع زمان

روان كانت جميلة للحد الخلاني أنسي كل الغضب الجواي وللحد الخلاني أسامح الجميع

بس طبعاً اكيد الدنيا ما حتسيبني في حالي 😅

دي عشرة سنين معقولة تخليني ساي كداا

قالت لي أفرح حبة وبعد فرحت جاتني الصدمة الجديدة

وعدت الأيام جميلة ....

وفي يوم صحيت علي تلفون من عبد الرحمن .. وكان صوتو مهموم وزعلان لدرجة حسيت بي رجفة في نبرة صوتو علي غير العادة

: مالك ياعبد الرحمن بسم الله في شنوو

: والله ياحسن م عارف اقول ليك شنوو

بس عمك ما خلانا في حالنا

: عمي ؟؟

مالوا تاني عمل شنو

: والله يا حسن الليلة صحيت علي خبر من اصحابي في القضائية والداخلية انو سحبو مني رخصة المحاماة واتحولت للتحقيق بخصوص قضية عمك

لا وكمان القضية اتقفلت بقرار من رئيس القضاة 🤦🏾

: أعفي لي يا عبد الرحمن دخلتك في مشاكل وإتدمرت ليك حياتك بسببي ، بس وريتك زمان قلت ليك عمي بحرو غريق ما سمعت الكلام

: ياحسن تعتزر علي شنو بالعكس انا حاسس بالفخر انو انا وقفت بجانب الحق وما رضيت بالظلم 

والنضال حيستمر انا العاوز اعفي ليك ، اني ما جبت ليك حقك زي ما وعدتك

: عبد الرحمن انا زمان حقي استعوضت فيهو ربنا وما تنسي الله اسمو العدل

ونعم بالله ، المهم انا قلت اوريك عشان تعمل حسابك ما معروف ممكن يعمل شنو تاني

انت اعمل حسابك وخلي الشباب اصحابك دايماً معاك

: يازول م تشيل هم ربك ستار بعدين يا عبد الرحمن زي م بقولوا

" ضربوا الأعور علي عينو "

: ياحسن عمك انت عارفوا والأذية ليها اكتر من طريق وطريق انا بس ماعاوزك تتأذي

يلا انا حقفل عشان اشوف مصيبتي دي وانت اعمل حسابك لحدي ما نتلاقي نشوف حنتصرف كيف

: خير

قفلت التلفون منو ، وتاني رجعت زي أول

تسلل الخوف جواي ، بدون أشعر أصابع يدي بدت ترجف

طلعت سيجارة وبقيت بشرب فيها يمكن اروق لكن العكس كل نفس وكل زرة دخان بنفثها كنت بحس بيها بتختق فيني

الزكريات بدت ترجع ، بقيت اتزكر الحراسة والغرفة الاتحبست فيها 3 شهور وعمي لسة كان ضابط نزل معاش

اها وهسي بعد بقي مسؤول كبير في الحكومة دي وانا عارف الكيزان وقادرين علي الظلم قدر شنو

بشوفهم في اصغر كوز في جامعتنا بكون حايم وموظف نفسو جلاد بين الطلبة كأنوا فرعون علي الأرض

يشوف الشيوعي ويتهمو بالزندقة ويشوف السلفي ويتهموا بالتشدد ، وما بكتفي بكدااا

يسعي جاهد انو يكون مؤذي ليهم

وأنا في عز الخوف الكان مسيطر علي ، لقيت نفسي مسكت تلفوني وإتصلت علي روان

ما كان عندي غيرها ملجأ وركن دافئ يطمني

ردت علي بي صوتها الملائكي :

حبيب قساي وتوب غتاي هههه دي حبوبتي بتقول كداااا

كيفك ياود رضاي

كنت ساكت وبسمع فيها وهي بتتكلم

دي الحاجة الوحيدة الكانت بتطمني وبتروقني

وين في الجامعة ولا وين !!

بالمناسبة انا حرجع بكرة البلد ، وحتجي اختي اصلا حبوبة شكلها حتطول هنا ..

قررو ليها كم عملية

عارف البضحك شنوو 😅 اول امس لما وديناها للدكتور وبعد كشف عليها والفحوصات وكل شي

قرر ليها عمليتين

وحبوبتي علي نياتها ، هي ما كانت تعبانة شديد

وبي فهما البسيط انو الزول الا يتعب شديد بعداك بسو لي عملية 😅

الساعة الهرجت في. الدكتور وقالت ليهو

انا كويسة مافيني عوجة انت دحين ااا الحكيم داير تسو لي عمليتين فوق شنووو

بررري م بعملن يفتحو لي بطني ويشرطوني متل البهايم

انا سعاد بتي دي لمن جيت اولدها قالوا لي قيصري الا عملية ابيت وقلت ليهم اكان اموت م بخش عملية الا ابوي الله يرحمو وخالي ربطوني وودوني المستشفي غصب 😅

حسن هاااا ياود

انا نضامة صاح !! عليك الله قول النصيحة انا نضامة صِح

هي انا عاوز أعترف ليك بي حاجة

اول ايام لما كنا بنتكلم انا اتكلمت معاك زي بنات الخرطوم قاصدة قلت برري يا بت تتكلمي معاهو بي خمجي البلد دا يفر منك 😆😅

لكن انا بنضم متل حبوبتي اصلا

هي ما سألتك م رديت لي :

انا نضامة !!

هااا ود ها ساكت مالك

رديت ليها :

اي انتي نضامة شديد 😅

قاطعتني ..

: يناضمنك الكلاب اسكت قال نضامة قال 😅

انا حبوبتي بتقول عني صيدة الخلا الجافلة

والله انت حظك عان كمان ود الخرتوم المفلهم

ههههههه انتي طيب خليني اتم كلامي

اي انتي نضامة لكن كلامك سمح وبحبو وعلي فكرة انا اصلا عاوز بس اقعد اسمعك وانتي تنضمي وتنضمي وتنضمي

: اي كدي انعدل معاي ، المهم انت مالك صوتك ما عاجبني

: خايف ياروان والله

وحكيت ليها الحصل كلو

ردت لي وكان كلامها رغم بساطتوا الا انو كان نابع عن حب

: شوف يا ود هاا والله زول يهبشك ولا يغلط عليك انا الا امسكو من راسو واظعمطوا

م تخاف انا معاك وجمبك وانت م بقيت براااك

زمان انت حاربت براك عشان كدا خسرت قدام عمك لكن هسي انت م براك معاك انا معاك وجمبك اصحابك

م تشيل الهم يا حسن والله شيل الهم بمرض

خليها علي الله

لما قالت لي كدااا اتزكرت كلام شيخ محمد احمد

وبقت تنضم وتنضم وتنضم 😅

وانا كنت بتطمن اكتر وكنت مبسوط ، اتكلمنا قريب 4 ساعات وما حسيت بالزمن

" بتضحك ينعدل يومي وتتبسم أفرهد خير 🌸 "

" وقت القاها بنسي البي وقت انساها بتجوط لي " 

وبعد قفلت منها ، كل الخوف راح وحسيت بي راحة جواي

عقدت يدي وبقيت اسبح واستغفر واطمنت زيادة ، ساعتها جات في خاطري ودعجبنا بي كل تفاصيلها

اتزكرت شجر النيم وريحة الدعاش الصباح بدري ، إتزكرت شيخ محمد احمد الراجل الطيب

اتزكرت الدرويش واتزكرت تفاصيلوا ، صوتو المبحوح وهو ببكي ، شكلو الغريب تفاصيلوا الغامضة

اتزكرت الراكوبة حقتو والشنطة السوداء ...

شيخ محمد احمد وقت قال لي أنسي الدرويش

كل زول جواهوا سر

كلامو اللين البارد علي القلب الكان بشبهني 💜

وبديت افكر ..!!

ياربي الدرويش دا قصتو شنو ، وسرو شنو الداسيهو مني الشيخ وابي يوريني ليهو

وقررت أسأل أحمد لمن يرجع من الجامعة

اصلا اليوم داك انا كنت اوف ما شغال

وفعلاً جو الشباب بعد خلصوا لقوني شادي ليهم حلة العدس 😅

ودي اول مرة انا اعمل ليهم حاجة ، بنضفوا هم وبعملوا الأكل هم

جوا الشباب داخلين ولقوا العدس ريحتو طاقة ..

- اوووووووو بسم الله الرحمن الرحيم

دا شنووو داااا لاااا دي ماف زول بصدقها

استاذ حسن شادي حلة

- اي استاذ حسن شادي ليكم حلة شفتو انتو محظوظين كيف

طبعاً احمد قري الوضع وبقي بضحك بس

- هوي انت بتضحك مالك ، ماف موضوع وقلت بتجو تعبانين وانا اصلا قاعد ساي 🙊

احمد قال لي :

-لالا ما قاعد ساي ، لكن والله لو عارفين الشغلة فيها عدس وحاجات حلوة كان زمان جبتها روان دي 

وفكوا الضحكة كلهم

طبعا انا خشمي عندي كالعادة وهم ما صدقوا لقوا فرصة فيني 😅

كانت الدنيا ماشة كويس ، او هي ماشة كعب بس في حاجة حلوة في نص الشين الحاصل دا كلوا

شوفوا يا جماعة انا حأختصر ليكم الدنيا دي في كم كلمة

أوعي واحد فيكم يفتكر الدنيا ساهلة او حتعيشها علي كيفك وكل شئ بتتمناهو حيحصل 💜

لالا أبدا والله الدنيا قاسية شديد وظروفها صعبة ، بتديك وبتمنع عنك في نفس اللحظة

بتضحك ساعة وتبكيك قصادها ايام ، الحكمة من دا كلوا انك ترضي بحكم القدر وتخلي يقينك بربنا كبير وكمان عشان م تشيل الحمل براك لأنو شيلة براك قاسية

فتش ليك رفيق يسندك ويقيف جمبك ويشيل معاك حبة 💜

رفيق صادق وما ليهو مصلحة غير يشوفك رايق ومطمئن ، رفيق الحارة والليالي القاسية

عارفين أنا الدنيا دي كلها حالياً بتتمثل لي في عدد بسيط من الناس

اقولهم ليكم :

صبري

- صبري كان اشبه بي أخوي الكبير أو خالي اللي رغم إنو ماف قرابة رحم بينا الا إنو كان راجل معاي 

عبد الرحمن

- رغم انو شاب وقانوني وبعرف يلعب بالقانون كويس وكان ممكن الشيطان يوزو وياكل حقي

بس في ناس في الدنيا دي اتربوا كويس وعمرهم ما عاينوا لي حاجة غيرهم

في ناس م بترضي الظلم وعبد الرحمن دا اكتر واحد شفتوا بكره الظلم

عبد الرحمن أخوي الما ولدتوا أمي

منتصر

- أول رفيق حقيقي في حياتي ، كل أصحابي الزمان لمن وقعت ماف زول فيهم سندني ، البلاقيني فيهم بقول لي وين مختفي كنت رغم انو كنا اصحاب شديد بس الصحبة ما بالعمر الصحبة بالمواقف

منتصر ظهر في وقت انا كنت محتاج فيهو رفيق في سني ومنتصر يا جماعة كان حنين رغم انو ما بعرف يظهر الحاجة دي ، كان لما يشوفني متضايق ما بعرف يتصرف كيف

ممكن بس يقول لي ارح نحضر الكورة او نطلع بس كان حنين شديد

أحمد

- كان واعي ومن جواهو كان اكتر واحد فاهمني وبتعامل معاي بي بالحاجة الهو فاهمها عني

مرات عادي اشاكلوا واسمعوا فارغ بس ما بزعل لانو عارف اني جواي حاجات كتيرة مدفونة

احمد دون الشباب كنت بقدر اخد وادي معاهو براحتي

عبد الله

- عبد الله كان زول كورة وحياتو مافيها شي غير الكورة عشان كداا يمكن ما كان شايف شي تاني

بس عبد الله كان زول حارة وأصلي شديد

عمري ما قصدتو في خدمة وخذلني حتي لو يتقطع حاجتك بقضيها ليك

شيخ محمد أحمد

- فتح عقلي علي حاجات كتيرة كانت غايبة عني وسهل لي الدنيا في مدة ما تامة يوم او يومين الا انو علمني حاجات مهم

كان في حد زاتو راحة نفسية ، كلامو اللين وابتسامتوا والله مهما كنت متضايق ابتسامتوا بتهون عليك وكلاموا بريح

عارفين سر الشيخ شنو

انو لما تكون معاهو بتحس بي نفسك زول كويس حتي لو كنت كعب هو بحسسك انك كويس شديد

آخر حاجة

روان 💜

روان بإختصار كانت نقطة الضوء وسط الظلمة

كتبت عن روان وقلت ..

" المسافات منصفة

والزمن حاشاهو يجور 

ساقتني ليك كل الخطي 

كل الدروب الموحشة 

وعبرت ليك كل البحور 

ولقيت عيونك ياسلام 

راحت هموم فتر السفر

ووصلت بيك حد العشق

فت بيك بعد الهيام 

ونسيت تعب قلبي وشقااه

ونزل علي بردآ سلام 

ياخ المسافات منصفة 

والزمن حاشاهو يجور

بقعد براااااااي 

ما اصلي زول ماعندي زول

بقعد برااااي 

واقعد افكر في اللي جاي 

جواي سؤالآ والف قول 

بقعد برااي 

مرات معاي خاطري السرح

واقعد اتمتم بالكلام 

دايما بقول ..

ياربي هل بلقي الفرح 

بعد التعب وبعد الترح 

وبعد هواجس الانتظر 

الحاسي بالخوف والخطر 

والرهبة من باكر بخيل

لا يجيب لي غيمة ولا مطر 

ياربي هل بلقي الفرح

كان السؤال ؟؟ 

كل الاجابات ما منطقية 

م لقيت جواب 

جربت امشي ورااا السراب 

وراااا الضلام وورااا السحاااب 

حتي الفراغ ...

جربت امشي ورااا الشمس 

جربت ياخ كل المكان 

كل الدروب والازمنة 

وطلع وراااااي 

ضيق الضنااا 

ولقيت كمان 

كل الحزن

طالع وراي 

بكوس معاي ..

برضو م لقيت لي جواااب 

وتعبت جد 

ضقت العنااا

وفي لحظة ياخ القاك معاي 

القاك هنا 

بتغني لي 

تهتمي بي 

وتغلسي دروبي المشيتها 

من تعب السنين 

زي التقول ام الجنااا 

انا في نعيم انا في هنااا

وانا ما براي 

والله جد انا ما برااي 

م بقيت براي 

وبقت معاي كل السعادة الممكنة 

وانا ياخي ممتن للقدر 

وللظروف والانتظار 

ممتن كتير انا للسفر 

الجابني ليك 

موش قلت ليك 

المسافات منصفة 

والزمن حاشاهو يجور 

ساقتني ليك كل الخطي 

كل الدروب الموحشة

وعبرت ليك كل البحور 

ولقيت عيونك ياسلام 

راحت هموم فتر السفر 

ووصلت بيك حد العشق

فت بيك بعد الهيام

ونسيت تعب قلبي وشقااه

ونزل علي بردآ سلام 

ياخ المسافات منصفة 

والزمن حاشاهو يجور

روان كانت المنصفة 💜

.

.

.

يُتبع

#أبوبكر_علي