اسألي عني الليالي

البارت ٥٣

يبو الشَط التعيش وياك .. قصتة .. وطينته .. ومايه ..
شتگل لمشذبات الروس .. لو جن ليك .. شجايه ..

شتگل للطرح .. بين رماح .. كلها وياه كصاية ..

شتگلي ..
وبيك روحي تموت .. وترد بيك تتحايه ..

برجاها ولو كسرها يجيد .. تصرخ وين جباره ..

وثگلها ..
وعادة المضهود .. بالمعبار يتباره ..

ولو جرحك جرف تعيان ..تغفه الآخ باكتاره ..

الـبـارت الـثالث والـخـمـسـون...............

وره هلايام.. المفروض اليوم ينزل صگر فكعدت الصبح غسلت وجهي ونزلت..لكيتهم كاعدين وهاي الطفلة تبجي بت مخلد..سهى..نزلت صبحت عليهم وشلتهه..شوي واندكت الباب..خليت سهى يم امهه ورحت افتحهه..بباب الكليدور واسمع صياح وهوسة..صگر واكف بره وياه زلم بس ما مبينين منو..يا ستار ياربي..توني دا اطلع جان تجي خالة..
الحجية : منو هذول سترك ربي من صبحيات الله..
دنوة : ما ادري انه هم مثلج..
دتحجي جان يجي الحجي..
وائل : حطلع اشوف شكو..ابقو هنا..
راح للباب هو ويعدل بالدشداشة..جان نايم.. ضلو يحجون بالنص ساعة والهوسة والصياح كل شوي يعلى..لحد ما اجه صگر يتمشى جوه ويصيح..وجهه احمر من الصياح..

طلع التلفون من جيبه ويفتر بالطرمة مدري شكو..شوي واجة يمنه..
صگر : يمة جيبي تلفونج..
الحجية : شكو ليش شتسوي بي..
صگر : هذا ابنج الارعن ناوي يسويلي جلطة..دجيبي خلافتهم شمسوي شملوص..والله تعبني شنو ابو انه..
الحجية : هو غير يحجي شمسوي..هسة انه شمعرفني
صگر : يالله انه نفسي ما متأكد من السالفة..هسة جيبيلي التلفون اخابره هذا القندرة الرصيد ميكفي..صار ساعة ادك ما يجاوب..يدري بيه حرزلة واكسف احواله..
اندارتلي تحاجيني : دنوة روحي جيبي بغرفتي..
عفتهم يحجون ورحت للغرفة اخذت التلفون وانطيتهيا.. ضل يدك مرتين..تلاثة..شكدد بعدين يله جاوب..

اول ما جاوب انهد بي..
صگر : لك يا ارعننن..يا صكطططط..عاااار..تاكل فلوس العالم يا جلببب..لك شنو انت شنوووو..والله حرام بيك الكعدة واللكمة الزينة.. اطلع من الصبحيات ما ادخل للبيت كل اسبوعين نوبة بس خاطر اجيب لكمة..كون سم الهاري ببطنك..
الحجية هي وكامشته من جتفه : يمة على كيفك لا تحرك اعصابك..انطي مجال يحجي..
وخر السماعة وحاجاهه : يمة هذا مو مال عيني واغاتي.. فوتي جوه هسة اعرف شسوي..سوي مجال هذول حيفوتون .. اذا خالي محسن كاعد صيحي يجي للصالة..هسة انه ادخلهم واجي احجيلج..
عاينت علي بنظره قلة صبر وطبت..طبيت وراهه..بس اسمع صوته يصيح صار نار سوده عليه..هذا محمد يجيب ويشوط بي..وين اكو أخ هيج يسوي..

لامهم كلهم على الرغم من مصايبهم وساكت لا يحجي ولا يكول..وهم يجازوه بالشين والحجي الماصخ..
اباب الصالة وصار الحجي ابو مخلد بوجهي.. دنجت ورحت للمطبخ هو طلع بره وياهم..هناك ولكيتهن كاعدات كلهن البنات انه حتى من التوتر نسيت الريوك..عفتهم يحجون وكعدت بالركن انتظر يجي صگر يحجي شصاير..الولد راحو للصالة وانسدت الباب..الصالة اللخ صايرة تكملة للاولى..يعني هم بيهه شبابيج وتبين الطرمة..رحت اشوف خاف بعدهم بره.. ما لكيت احد بس سيارة صگر بالكراج..يعني كلهم طبو.. ضليت افتر بالصالة..عدلت الكوشات جان تنفتح باب الصالة.. عدلت الشال ورحت اشوف بلكت صگر طلع..لكيته واكف بباب المطبخ يريد يصيح خالة وصوت البنات انخرس من اجه.. رحت يمه همست : صگر..

اندارلي وحواجبه معكودة بعصبيه..
صگر : ها عيني..
دنوة : شبيك شصاير..
صگر : هسة احجي لامي وسمعي..
صاح : يمههه.. تعاي هنا شوي اذا تكدرين..
اجت يمنه..راح تمشى للصالة كعد ع الكرسي ورجع راسه ليوره من التعب..خالة كعدت يمه تحاجي..
الحجية : ديله احجي مو بطيت كلبي..
صگر : يابة دصبري تره ميت تعب..من عركة لعركة مليت..
الحجية : شكو شمسوي حميدان..
صگر : هذا مدخل روحه بمشاريع اكبر من راسه.. هذوله البره عمام واحد ولد جان شريك محمد بمحل..
الحجية : شمحليش يداده..

صگر : اي دشوفي ابنج شملوص وشخابط..هذا صاحبه جاي من تكريت لهنا..كايلة نفتح محل غذائية منك اكثر من نص الفلوس ومني الباقي..لأن هو حيبقى بمكانه هناك بتكريت بس ياخذ نص الوارد حاله حال الموجود ومحمد يبقى بالمحل.. ابنج الجلب شمسوي .. ماخذ فلوس الرجال تسع ملايين..نصهن منطيهن لأبو الايجار والعمال بالمحل..مشتريله جم كارتونة بيض وجباسة وماخذ الباقي..
الحجية : يمصخم الوجه يمحمد..وين ماخذهن شيسوي بيهن يمعزاي..ما ناوي تخليني ارتاح..
صگر : صارفهن على زهراء الكح...
خالة لطمت على خدهه على كيف : يبو يبو..هاي السعلوة ماخذه فلوسه ومدخلته بسوالف جبيره شتريد منه..
صگر : كولي ابنج شيريد منهه..لاطش روحه بيهه..

هي هاي منو يكلبهه اصلا..عايشة ع الوصاخة..
الحجية : زين هسة شلون..شعدهم جايين..
صگر : هسة يكلي نريد فلوس ابنه تسع ملايين..ما شفتيني اصيح..انصدمت..المبلغ ضخم قابل مية وميتين.. خابرته لهذا الادبسز..كال ماكو هيج حجي..منين انطاني تسعة.. ماكو هيج مشروع انه اشتغل وي فؤاد بمحل الملابس..كام ينكر
الحجية : يمة دشوفهم..تسعة شنو تره هواي..شنو مليارديريه احنه لو بالبرلمان..ناس عاديين..
صگر : ادري هسة دا اتفاهم وياهم..اذا ما قبلوا يقللون المبلغ اخذ من المصرف..حاط هناك الفلوس..
الحجية : ليش هنا ما عندك..
صگر : عندي..بس يمك خوما اخلي تسع ملايين جوه ايدي .. انه محمد كتلهم مسافر بعد ما يرجع..ما اريد يصير شي ادور نرجع لنقطة الصفر..

خلي..ولو ادبسز وهاي حركته الوصخة راح تكلفني.. بس احسن مما يصير شي اضل متندم علي سنين..
الحجية : والله ما ادري شكول يمة..الله يطول بعمرك.. مثل ما كتلك..طول خلك وياهم ادري بيك جبير وعاقل..
صگر : الله كريم..بس خلتفض هاي..
الحجية : الله كريم..زين محمد ما كال لو ضل ينكر..
صگر : لا حجيته..كتله مشكلة جبيرة وانه مالي خلك مشاكل اريد افضهم ويروحون..عاد هو حجالي شكتلج هسة..
خالة كامت من مكانهه تتأفأف وتستغفر : روح شوفهم يمة..
صگر : يله كايم..
كام وانطاهه التلفون..عافنه وراح للهول..خطية ولا يرتاح.. يخلص من اخلاص يجي محمد..هذا محمد ولا يجوز من سوالفه ابد..بكل مرة مسوي مشكلة اكبر من راسه..

ومن طايح بيهه..بس صگر..شوكت ما يصير شي يدكون الباب ها بيت ابو فلان..محمد هيج مسوي..مثل ذاك اليوم شلون تهجولنه يم اخلاص الما تتعاشر..وهسة جايين يردون فلوس .. عاد شلون مبلغ ضخم يصفن الواحد..اكول ليش صگر كال تاكل مال حرام..شاط شوطة مثل من علي باك فلوسه.. اخذت نفس وكمت للمطبخ..مرة مخلد اسماء ضلت تعاينلي من شافتني طبيت..سويت روحي ما شفتهه..بعدين حجت
اسماء : اكول .. شبي رجلج..
دنوة : صايرة مشكلة..
اسماء : ها..الله يستر..
حجتهه ورجعت تحاجي مرة اركان سلمى..ما سمعتهم.. عفتهم والتهيت اسوي الغده..كل تفكيري يم صگر..شسوه وشحيسوي خاف ما يقبلون هو ينطيهم يردون من محمد .. هسة غير يرحون..اريد اعرف شصار..

كملت وطفيت النار..رحت اصعد فوك وسمعت صوت صگر
صگر : تعاي يولي وين صاعدة..
نزلت يمه..واكف ع الباية الاخير..كتله : ها عيني..
صگر : روحي فوك بالكنتور..بالخانة الجوه..تلكين فلوس خمسة وعشرينات جيبيهن وتعاي..بالعجل خيروحون..
دنوة : بس شل... قاطعني..
صگر : بعدين احجيلج هسة ميت تعب..بس اريد افضهه
حركت راسي يعني اي وصعدت فوك..دورت بالمكان الكلي علي لكيتهن وجبتهن..ما ادري شكد ..ما العب بغراضه.. يحطهن يرجع وره شهر يلكاهن بمكانهن..نزلت انطيتهيا.. اخذهن ويحسب بيهن..عاكد حواجبه من العصبية وانفاسه عالية.. دار وجهه وراح للهول..رحت لغرفة خالة لكيتهه دتسبح بالسبحة .. سديت الباب وكعدت يمهه..

الحجية : استغفر الله..ها شكال صگر..
دنوة : اخذ فلوس مدري شكد وراح للهول..بعد ما ادري..
الحجية : الله كريم..ملينه من محمد وسوالفه..
دنوة : اي والله..هسة نفتهم شسوه..بلكت فضت نهائي..
الحجية : بلكت الله..
ضليت كاعدة عدهه..مليت من الانتظار بلشت اغفى.. توني غمضت وسمعت صوت صگر بالغرفة..عدلت كعدتي والشال .. نزل كعد بالكع مقابيل خالة ويحاجيهه..
الحجية : ها يمة بشر..
صگر : ما قبلو ينزلون فلس..يابة عدل بدل..اساعدك بالمحل من يطلع ربح..ماكو قفل فد دور..تالي انطيته مليونين هاي خالهن بالبيت..الباقي انطيهميا بعد يومين..
الحجية : تنطي سبع ملايين..شنو عاقل مخبل.. هذا اخيك ديشتغل وما بي عيب..

اذا ما تحاجي انت جيب انه احاجي..خل يدز شعنده فلوس سدد الدين ولو ربعه والباقي عليك..
صگر : بكيفج حاجي..
الحجية : زين المحل شغال لو متروك..
صگر : يكول يشتغل..بس راس المال ماكو..
الحجية : واحنه شكو..ما يجي يكعد بمحله..لو يريد تجي فلوس ع الحاضر..
صگر : ولو..بس هذا مو عذر يخلي محمد ياخذ فلوسه..
الحجية : ادري يمة..انه دا احجي ع المحل..اذا المحل شغال شكو ياخذ الدين هذا كله..اخذ مليونين والمحل يسدد الباقي شنو بيهه..لو بس من يمنه تتعروج..
صگر : رحم الله والديج..هو انتي كلتيهه..بس من يمنه تتعروج
تمدد وحط راسه على رجلهه وايده على عيونه : الله كريم .. المهم راحو هسة..

والله يبس ريكي هلكد ما حجيت..ارد اقنع .. يمعود بالله عليك ميفيد..كتله قابل انه ماكلك..اساعدك بالمحل قفل بعد..
خلت ايدهه على شعره تمسد بي : الله يحفظك ويطول بعمرك ما ادري بدونك وين نروح..لو ما ربك وانت جان محمد وره الشمس..
ما جاوبهه..بس سحب ايدهه باسهه ..سكت شوي بعدين كال : يله صبو الغده..شمنتظرين..
الحجية : كومي خالة خليساعدنج البنات تصبون الغده.. وياج شوفي خالج وائل طلع لو يتغده ويانه..
دنوة : ماشي..
طلعت وعفتهم..ابتسمت عليهه شلون تراعي بكل كلمة ومهتمتله شلون وكف وي محمد بهاي المرة وكبلهه..عبالك دتشكرله بمكان محمد..هو خطية حتى مابي حيل يجاوب من التعب..

كمت للمطبخ كلبت التمن ورحت اشوف الحجي..مريت بالهول غادي هوسة..كلهم كاعدين..بس الحجي ما شفته كلت بغرفته اكيد..طبيت للغرفة ما لكيته..بس ملابسه ع الجرباية معناهه طلع..سديت الباب ورجعت للمطبخ صبيت الاكل..اجت شهد تحاجيني..
شهد : يله حتصبين..
دنوة : اي..
شهد : وين السفرة علمود افرشهه وناخذ الاكل هناك..
دنوة : هناك بالمجر..وأشرتلهه علي..طلعتهه وراحت تفرشهه .. من صوت البنات والحجية ام مخلد تخيلته بيت جدي.. هم هيج نفس الاجواء انه وسرور ونوارة..دورات ورود ويانه هي وامهه .. ابتسمت بدون ما اندار عليهم..بس انقهرت بداخلي.. كلشي انكلب بلحظة..اكيد بيهه صالح..بس تحز بالخاطر..

انه واصب اجت خالة ويانه..وكفت يمي تحاجيني..
الحجية : يمة بعد لا تطبخين وحدج..صيحي وحده من البنيات يجن وياج..شوفي وين تلحكين هواي..
دنوة : لا عيب شنو مو جايين خطار ويساعدوني..
الحجية : لا لج يمة..هذوله من اهلنه..متعودين عليهم ومتعودين علينه..لا تكولين خطار ادور يزعلون..
عاينت عليهه وابتسمت : شلون بله..
الحجية : من جنه ببغداد هم جانو يجون علينه دائما..حتى من اجيت للبصرة همات يسيرون علينه كل شهر نوبة..مخلد واركان كبرو وي صگر..ولو هو اكبر منهم بس نفس الكصة نكول .. بس بهاء جان صغير بعد ما واعي.. وهاي هيج عشنه سويه لحد كبل السقوط بعد ما شفناهم..
دنوة : هاا..
الحجية : اي..فحخليهن يساعدنج لا وحدج..

دنوة : ميخالف تدللين..
اندارت ع البنات تحاجيهن : جوان كومي وي اختج ساعدو دنوة..لا وحدهه خطية..
جوان : اي خالة صار..
شلون تحاجيهه بدلع..مدري هي هيج طبعهه..كملت صب وعفتهم ياخذونه للصالة..وحت لغرفة خالة اشوف صگر..ما لكيته يمكن صعد فوك..سديت الباب وصعدت.. لكيته متمدد على بطنه وشعره مبلل التشيرت..اخذت الريمونت طفيت السبلت وكعدت يمه..حس بيه هنا..اندارلي واخذ ايدي..
صگر : التهيت بالمشكلة ونسيتج..
دنوة : حقك..صبيت غده تجي تاكل..
صگر : والله تعبان وجوعان..شلون ما ادري..
دنوة : ديله كوم ع الواهس..كلهم كاعدين منتظرينك..

عدل كعدته وسحبني من خصري..خلاني بحضنه وباسني من رگبتي..انفاسه ثكيلة وهادئة..
همس : عوفيهم..بعدين ناكل..كومي قفلي الباب..
دنوة : مو كتلهم حنجي..
صگر : يولي معليج بيهم..انه اهم لو هم..
دنوة : لا انت بس..
خله صبعه على شفافي وهمس : لا بس ولا شي..قفلي الباب وطفي الضوه وتعاي..
انه مدري شصارلي..عيوني ثكلت كمت طفيت الضوه وقفلت الباب واجيت يمه..لفني بحضنه هو ويهمس ويفتح شعري مسويته ضفيرة..
صگر : مشتاكلج..حتى ما خابرتي..
دنوة : اي مو كلت لخالة مشغول ما اكدر احجي..

صگر : افرغ لخاطرج يابة..هي على هاي..
ابتسمت بس ما جاوبت..قربني لصدره وحاوطني من خصري بإديه ومن رجليه همات..
صگر : نامي خلانام ميت نعاس..
دنوة : ها..بس..
صگر : اي بس..
شد علي بحضنه لحد ما غفيت من الاجواء..هدوء وظلمة بس ضوه احمر مالت التيبل لامب مشتغل..
كعدت العصر لكيته ع الكرسي يدخن..لابس فانيلة بدون تشيرت..عدلت كعدتي والنوم بعيوني..
صگر : صح النوم يابة..
ابتسمت : شمدريني نمت وياك..عود انت النعسان..
صگر : اي والله..ما نمت هواي..يله بالليل..
دنوة : تغديت..

صگر : اي حبيبي..نزلي اكلي امي كالت ما متريكة..
دنوة : اي ضل بالي عليك..خاف يصيرلك شي من العصبية
صگر : لا لتخافين..
نزلت رجلية وذبيت الغطى..شفت الابتسامة انرسمت على شفته كتله : شو تتبسم..
صگر : عدلي شعرج..
دنوة : خو انت حاط كورتك وي شعري..يابة هو هيج من الله شسويله..اصلا يخبل..
صگر : ههههههه..اي يخبل ابوية انتي ما كلت شي..
كمت ع المرايه امشط..اجة وراي طفى الجكارة بالنفاضه وحضني..شفايفه يم ركبتي..
صگر : هذوله شكلهم مطولين..
دنوة : شلون شمدريك..
صگر : بهاء مسوي مشكلة هناك يمهم..

صايرة كعدة شكبرهه..جايبين شيخهم..
دنوة : شمسوي..
صگر : عساس انه ما ادري..ديلعبون طوبة بالملعب بعدين متلاغين ومن طالع ضاربه سجينة بخاصرته..
شهكت وانداريت : عزززه هذا هيج..بس مبين علي فقير
صگر : انتي فقيرة والله..ماكو واحد فقير هسة..
دنوة : زين شصار بعدين..
صگر : ماخذين الولد للمستشفى ضال هناك اسبوع.. صار عنده تلف بالكلى وحالته متأزمة..جايبين شيخهم وجايين لبيت خالي محسن..رايدين يكاوموه..بهاء طافر محد شافه بهاي الفترة من صارت الكعدة..كايليلهم ناخذ بنية فصلية وتنطون فلوس..ابوهه ما قابل كايل ما انطي وحدة من بناتي.. تريد فلوس انه حاضر..بس مال فصلية وفلوس ماكو..المهم بعدين دافعين فصل مدري شكثر كايليلهم بس تشيلون منا..

يابة وين نروح..كايلين مشكلتكم..البيت يبقى ينباع بعد معلينه المهم ما نشوفكم بالمنطقة ولا ببغداد..هسة هم عارضين بيتهم للبيع بس محد يشتري..كلهه تدري بي مطلوب عشائريا .. تذكرين من كتلج بهاء ما اشوفه بالبيت..شكيت بالسالفة بس ما ردت اتدخل..بعدين طلع مسوي مشكلة..خالي من عرف بينه رجعنه للبصرة خابرني..كلي رايدك بهيج سالفة وحجالي شحجيتلج هسة..ما كدرت ارده..ترجاني كتله بيتي مفتوح جيب ولدك وتعال..بس ما كتله شكد حتبقى..خلي هو شوف شوكت يدبر امورة ويروح..
دنوة : زين خوما يجون علينه هنا..
صگر : لا يابة شيجيبهم..هم كايليلهم طلعو علمود لا نوصلكم ولا توصلونه..تدري طلعة البيت هاي شكبرهه..بإعتبار اهانة و رد الحك لمكانه..
دنوة : اي سامعة من جدي كبل يحجي هيج..

صگر : لا تجيبين طاري معدتي تكلب..
عافني وراح ع الكنتور طلع تشيرت لبس..انه مشطت شعري ولبست الشال..كتله : حنزل..تجي..
صگر : يله جاي..
عفته يلبس ونزلت..شهد وجوان كاعدات بالصالة التطلع ع الدرج وسهى تلعب يمهن..ابتسمتلهن..بادلوني .. استحيت احجي فرحت للمطبخ..صبيت اكل وكعدت ع الميز اكل.. دقايق وفات صگر..راح ع الثلاجة طلع مي بارد مبين من شكل الكلاص واجة حطه جدامي..كعد مقابيلي وشعل الجكارة
صگر : اكلي زين..ضعفانة من وره اخلاص..
دنوة : حييل..صار شكد من عفتهه..ختولي..
صگر : اي ختولي بس انتي هملتي روحج..ادري من تنقهرين متاكلين..شوف عكس الوادم..
ابتسمت ورفعت حاجبي : شلون بله..

صگر : هي العالم من تضوج تاكل..عودك شنو..علمود تنسى بس انتي متاكلين..تنسين الأكل..
جان حاط ايده ع الميز..مديت ايدي فوكاهه وحاجيته : صحيح شلون منتبه علي..
صگر : اكو واحد ما ينتبه لروحه..
همست : احبك..ورجعت اكل..ضل كاعد يمي يحاجيني.. لحد ما اجة اركان..
اركان : هاي وينك..عبالي نايم كلت اعوفه على راحته..
صگر : لا والله كاعد..خير خوماكو شي..
اركان : سلامتك..بس كاعدين وفكدناك..علي هنا..
طفى الجكارة بالماعون وكام : يله جاي..
طلعو ثنينهم..بالباب اندارلي وابتسم..اعرف هاي ابتسامته شيقصد بيهه..خدي صار احمر يله راح..

كملت وكمت اغسلهن جم ماعون..جان تجي سلمى وجوان يمي يسولفون..
سلمى : تدرين ما شفناج..تعاي كعدي نسولف ندردش..
نشفت ايدي وكعدت يمهن..
جوان : تدرين اني ما تخيلت هيج شكلج..
دنوة : شلون..
جوان : ما ادري يعني حسيتج حيل سمرة وعادية..بس لا طلعتي حلوة والله..وعيونج زايدتج جمال..
ابتسمت وكتلهه : انتي همات ما قاصرة..بس شمعرفج بيه.. ما ملتقين كبل احنه..
جوان : اي ما شايفتج بس اعرف تزوجتي ابن خالتي.. الحجي بيناتنه..ما ادري شلون متستحين منه..
دنوة : ههههه..ليش شبي..
جوان : والله خية اشو بس خزرتة تخلي الواحد يخنس..

عاد من تحاجي شلون..
دنوة : لا شبيكم وياه..تره حباب بس هو ملامحه جدية..
سلمى : زين شكد الفرق بيناتكم..هو جبير..
دنوة : انه ستة وثمانين مواليدي..هو سبعين..يعني ١٦ سنة
جوان : هاااه..بس هواي هيج..
دنوة : اي صارت بعد..الحب ميعرف عمر على كولته..
عاينت علي بنظرة مدري شلونهه : يحبج..
دنوة : اي..
جوان : الله يهنيكم..الولد الصالح ان شاء الله..
دنوة : الله يسلمج..
هي سمعتني كلت هيج شو ضاجت..ضلت كاعدة على عمى عيونهه..بعدين دقايق وراحت..سلمى اندارت تحاجيني
سلمى : هاي شبيهه البنية..شو راحت من وحدهه..

دنوة : خاف تلفونهه دك..
سلمى : على كولتج..امشي نكعد بالصالة شعدنه هنا..
كمنه للصالة كعدنه..جان يجي بهاء..كعد يم سلمى..
بهاء : اكلج اني اريد اطلع..ملان من البيت..
سلمى : لك لك..ما صارلك يومين من كعدت..دصبر..
بهاء : يله هو انتي شوكت ما احاجيج تكليلي اكعد بالبيت .. اريد فد يوم تفرحيني وتكليلي اطلع ماكو..
سلمى : اي شستفادينه من طلعاتك المالهه معنى..
كام يبلعم..سكت ما حجى شي بعد..هو بعده صغير.. حتى اصغر مني..١٨ عمره..لحيته توهه طالعة..فماخذ راحته وي الكل عادي محد يحاجي..احسهه عيب..مدري هم جي بغداديين يمكن تفكيرهم يختلف عنه..
مشى الوكت عادي..كاعدين انه وسلمى وشهد..بس جوان ما شفتهه..

واسماء كالو نايمة هي وبنتهه سالي..بالليل طبيت للمطبخ اسوي عشه جان يجي صگر..
صگر : حبيبي لتسوين عشه..انه اجيب..
كتله انه وارجع الغراض : يله ماشي..شحتجيب..
صگر : هسة اشوف..انتي مشتهية شي اجيبلج..
دنوة : لا شتجيب عادي..
صگر : يله روحي لبسي وتعاي وياي..
دنوة : ماشي..
مريت من يمه وتذكرت الحجي..كتله : اصبر احاجيك..
رفعلي حاجبه وجتف ادية : كولي..
دنوة : ليش الحجي ما يحجي وياهم..حتى وي الولد..
صگر : بالسيارة احجيلج..اكو فلوس ع الميز جيبيهن عود
حركت راسي يعني اي وصعدت فوك..لبست الصاية وغيرت الشال..جبت الفلوس ونزلت..

لكيته واكف يم الدرج ديحاجي مخلد..رحت وكفت وراه .. تانيته يخلص وطلعنه..جوان جانت بالهول كاعدة شافتني مبدلة وطالعة وي صگر اكلتني بنظراتهه..عفتهه ورحت فتحت الباب بين ما صگر طلع السيارة وسديتهه..بعدين صعدت وياه.. مشى بالسيارة لنهاية الفرع وحاجاني..
صگر : دنوة..
دنوة : عيني..
صگر : اختج رزان انخطبت..باجر يلبسون الحلقات..
عاينت علي بصدمة وضحكت : شنو انخطبت..ذاك اليوم حاجتني كالت جدو يريد ياخذنه عنده..
صگر : ادري..مرة ابوج خابرتني حجتلي..
دنوة : شتريد تخابر هاي الحية الجلبة..شكد اكرهها.. ختولي هي وبناتهه لجهنم..ولا وحده بيهن سألت علي.. اختهم انه لو عدوتهم..شمسويتلهم ..

صگر : يابة بالهداوة..ما اريد تنقهرين..انه جاي اكلج.. وانتي بكيفج..تريدين تروحين تسلمين عليهه..براحتج.. متريدين هم براحتج..ما جابرج..
دنوة : لا ما اريد..اذا تريدني اجيهه صدك جان عزمتني هي .. مو تخابر رجللل اختهه تكله خلتجي اختي..عاد ياريت هي الخابرت..
صگر : يولي لا تصيحين..عوفيهه ختولي..انعل زينهه.. انه ردت اكلج بس..براحتج بنيتي انتي..جابرج فديوم على شي
دنوة : لا..
صگر : اي خلص بعد..
درت وجهي ع الجامة واحجي بيني وبين نفسي : فوكاهه تخابر بكل عين صلفة..كون فلك طرج..شكد اكرهها واكره طاريهه..شوفتني الويل..هي وهذني بناتهه..خوات بالجذب.. تغربت وطرحت محد كال شلونج..

محد اجاني للبيت..يابة لتجون..رفعوا تلفون احجو.. اسألو .. هاي لو وحدة منهن صاير بيهه شي..جان اجيتهه للبيت.. بس هو حظي شلونه..اسود مصخم..
حسيت على ايده كمشني من جتفي..انداريتله بس محجيت شي..صدك ضجت من السالفة هاي..
صگر : لو محاجي احسن..يولي ما اريد تنقهرين واعصابج تتوتر..عوفيهه ختولي..
اخذت نفس وسكتت ما جاوبت..غيرت الموضوع : شحتجيب اكل..
صگر : حنزل اوصي على كباب بين ما يصير نفتر شوي واشتريلج جم شغلة..
دنوة : يله..
كرص خدي وابتسم..وره ساعة من الفرة بين ما خلص الكباب اشترالي تحلا وجباسة سوالف احبهه..

هو يشتري بدون ما اكلة اريد هيج..يعرفني..رجعنه للبيت بالباب ردت انزل كمشني من ايدي..
صگر : جيبي العلاكة..هسة يشوفوهه الجهال وياخذوهه..
دنوة : ديله عود انطيهم قابل شكو..
صگر : مو جبتلهم ليش تنطيهم يابة..
دنوة : هااا..ديله اكمش..
انطيتهيا وطبينه..صارت اربع علاليك مدري شكو..تكول عزيمة ع الغده مو عشة..صگر راح للمطبخ حط العلاليك وانه صعدت فوك اغير ملابسي..شواي واجة..نزع الساعة هو ومدنج راسه يحاجيني : دناوي حبيبي..الحزام مال ظهري وين
دنوة : حاطته بالكنتور..ليش كام يوجعك..
صگر : اي شو من كمت من النوم وجعني..
دنوة : هااه..شكلنه..انه احجي وانه اسمع..

يله اليوم اخليلك من هذا الجل والصبح لبسه..عاين علي وابتسم بطرف بشفافه..مادري شديقصد..لبست الشال ونزلت هو نزل وراي..رحت للمطبخ اصب الاكل وياهن..هذني صافنات شهد وجوان..اسماء ملتهية بسهى بس تبجي ما متعودة علينه بعدهه..سلمى مدري وين..كتلهم : شبيكم شو صافنين..ليش ما مسوين الاكل..
جوان : غير انتي تجين عيني..
دنوة : يله عادي..انه انتو ماكو فرق..
صبيتهن بمواعين واخذوهن للهول..توني ردت اطلع جان يجي بهاء مدري شبي مستعجل ضربني بجتفه..
بهاء : اسف اسف..ما اقصد..ما شفتج والله..
جاوبته انه واعدل الشال : لا عادي..شبيك مستعجل..
بهاء : تلفون مخلد هنا يريده..
دنوة : يله اخذه على كيفك شكو قابل..

ابتسم وراح..تصرفاته بيهه عفوية..شعجب هيج مسوي بالولد وضاربه سجينة..يله شعليه..اول ما طلعت من المطبخ صار صگر بوجهي..خزرني وهمس : امشي تعشي..
دنجت ومشيت وراه..كعد ببداية السفرة وأشرلي اكعد يمه .. بس كعد كلهم سكتو..شدعوة يخافون منه هيج..ولو هو صدك يضوج واحد يحجي ع الاكل..وهم عايشين وياه هواي فيعني يعرفون طبعه..خلصنه اكل وكمت وياهن اشيله..بين ما خلصت عيون صگر اكلتني اكل..سويت نفسي ما شفت لأن عرفته يقصد كعدي لا تمشين جدامهم..كملت واجيت كعدت يمه .. ضلو يحجون ومشى الوكت للدعش ونص بعدين كامو يروحون ينامون..اندكت الباب راح صگر يفتحهه..اجة الحجي خطية تعبان وجهه..فات سلم وراح..هو جنه بس انه وخالة وصگر كاعدين..بعدين كمت شلت الماعون مال حب وصعدت فوك .. ذبيت الشال احس اختنكت..

شوي وفات صگر..سد الباب وانتجى عليهه حاجاني بدون مقدمات : لا تحجين وي بهاء بعد..
دنوة : بس محجيت شي..
صگر : ولو..تشوفي من درب طلعي من اللاخ..
دنوة : ماشي..
اجة يمي يفل بشعري وعينه على شفايفي..ما جاوبت بس منتظرته يكمل..دنج باسني واخذ شفافي بين شفافة.. شواربه تحسسني برجولته..خاصة من يبوسني..مد ايده قفل الباب وطفى الضوه..نهاية اليوم جانت بحضنه..نام وهو حاضني انه ضليت كاعدة اتأمل ملامحه لحد ما غفيت..مر اسبوع نفس الشي..بين البنات والمطبخ..علاقتي قوت بيهن..تعودت عليهن من الصبح لحد ما انام..يمكن اشوفهن اكثر من صگر.. الحجي بيوم الجمعة ماعنده دوام..فيضل بالغرفة ما يطلع بس على كد الغده والعشه..لو العصرية يروح لعلي..

الباقين هم تعودت عليهم..العصر لو بالليل من يجتمعون كلهم اكعد وياهم يم صگر..دورات احجي بس شوي واسكت ما احب اطول..احس روحي اتوتر مدري ليش..بس جوان منطلقة ع الاخير وتحجي عادي..من تشوف صگر يضحك لو يسولف تضل فاكة حلكهه..كمت استثقل كعدتهه..شدعوه هلكد عينهه علي..حتى من تشوفني كاعدة وي البنات تجي تسلم وتكعدلهه دقيقة وتروح..ما تتحملني..ولا تساعد بالمطبخ.. مدري شكو خاليهه..بس تغث بيه من فاكة عينهه على صگر..
صگر راح للمصرف سحب فلوس..ومحمد هم حوّله مناك مليونين مال شغله صار فترة يشتغل..بالبداية صگر ماقبل.. كلة خاف تريدهه ومحتاجهه..كال لا كاعد وساكت .. اكل موجود بس على كد الملابس والطلعة..فتواعد وياهم اجو للبيت انطاهم الفلوس وطلعو بعد ما شفناهم..

وره هلاسبوع الظهر كاعدة بالمطبخ توني كملت المواعين جان يجي صگر بيده التلفون..
همس : هاج كمشي..
دنوة : منو ليش..
صگر : دهاج شبيج احجي..
اخذته منه ورافعه حاجبي..منو يعني..كلت الو..
- : دنوة عرفتيني..
دنوة : لا والله..منو انتي..
- : اني سرور شبيج نسيتيني..
عاينت على صگر لا اراديا واحاجيهه مصدومة : صدك.. شجابج..اقصد شلون اخذتي رقم صگر..شلون صار مدا افتهم..
سرور : اووف لج سالفة طويلة طويلة..مشتاقتلج ومشتاقه لايامنه وتعليلاتنه..والله احس روحي وحيدة بدونج..

شلونج..شلونه زواجج..مرتاحة..
عيوني دمعت من حجيهه..يعني واخيرا شخص خابرني لأن تذكرني..مو علمود مشكلة..كتلهه : حتى انه والله..بس انقطعت الطرق بيناتنه من وره جدي..انه زينة انتي شلونج..وينج هسة تزوجتي لا..
سرور : ادري كلشي..والله ابويه كلي ما اخليج تحاجيهه بعد كتله مشكلتهه وياكم..اني ما سوتلي شي..حالهه حال نوارة يعني اختي..الحمدلله كدرت اوصلج والله ما تتخيلين شكد صرتي بعيدة..اني تزوجت صار تلث سنين..هسة عايشة ببغداد ويه حسام..
دنوة : صدك والله..اكول ليش تكولين اني..اي عيني صرتي بغدادية ونسيتينه..الف مبروك ولو متأخرة..
سرور : ههههه..اي تعودت بعد هاي شسوي.. حبيبتي الله يبارك بيج..واصله من زمان..

ردت اكلج بعد كم يوم جاية للبصرة اشوف اهلي..عود امرلج اشوفج..مترهم بس مكالمة..
دنوة : يله هلا بيج بكل وكت ..كليلي صار عندج طفل..
سرور : يمعودة..جبت توم وملتهية بيهم حتى ما اكدر احك راسي..بس حسام ويايه حتى عاف الشغل فترة بين ما خلص الاربعين وكدرت امشي عدل..
دنوة : والله فرحتيني..تستاهلين كل خير..يله عود من تجين اشوفهم..اكيد بيض ثلج مثلج..
سرور : ههههه..اي هو البياض عليه والملامح على حسام..
دنوة : الله يحفظهم والله مشتاقتلج..
حجينه شوي بعدين ودعتهه وسديته..اخذت نفس وابتسمت بس بداخلي مقهورة..رحت يم صگر كتله : حتجي سرور فد يوم .. عادي مو..
صگر : كلشي لخاطرج عادي..ماعدنه شي وياهه..حبابة

دنجت وانطيته التلفون..كتله : تزوجت ورانه هي..هسة عدهه توم تكول..
عيوني غوركت..ما غرت منهه..بس انقهرت على حالي.. ليش هيج انه..اخلاص ما صارلهه شهور من تزوجت وطلعت حامل وسرور تزوجت وراي وحبلت..
رفع راسي باصبعه : مو كايلج انتي بنتي..
هو كاعد ع الكرسي وانه واكفة..كعدت جدامه بالكع وكمشت ايده احاجي : ادري..بس انه اريد طفل..اريد طفل احضنه وانام..اسويله حليب والاعبة..اخذني للدكتورة..انه اروح وحدي ميخالف..بس انطيني فلوس..
ما جاوبني بس شاد على ايدي..دموعي تجمعت بعيوني بس رمشت طاحت..طكيت بجي..خليت راسي على رجله وابجيي حتى نسيت وين انه..

بس الموضوع قهرني..دائما اكول .. شكد خطية انه .. من كبل من ابوي يكتلني ويعوفني نايمة بدون اكل..غيرهه وغيرهه .. وهسة اجت هاي السالفة مال حمل تجمالة..صگر يهدي بيه يريد يسكتني ماكدرت..كمشني من جتفي ويحاجيني
صگر : دناوي..بنيتي..عمري انتي ليش البجي ابوية.. كومي لا تضلين كاعدة بالكع..
كومني وصعدنه فوك هو ومحاوطني من جتفي..انه مثل نفاخة ينفخون بيهه كل يوم شوي ومنتظريهه اطك من وحدهه.. لحد ما طكت..هيج كمت ابجي فرفحت روحي..ادور صگر التهى بيه ميعرف شلون يسكتني..عبالك طفل واخذو منه لعابته.. صعدني فوك وقفل الباب..حطني بحضنه وباسني..
صگر : بس خلافتهم يا يابة..ضجتي ع الطفل..
دنوة : اي..اكو غيره يعني..بس انت متحس..ما اعرف تغلس يمكن..جم مره كتلك اخذني للدكتورة..

وألح عليك بهلموضوع..ليش هيج مستسهلة..
جاوبني هو ويمسح بدموعي : لا ما مستسهلهه حياتي.. بس ما اريد اشوف دموعج..ما اريد افتح الموضوع كبل ادري حيقهرج..انه بالهداوة اخذج للدكتورة وتراجعين عدهه..
دنوة : لا انت تجذب علي..
صگر : ليش اجذب يولي..
دنوة : ما هامك الموضوع حتى..عاجبك نضل هيج..
صگر : حگج تكولين هيج باباتي..هسة عبالج عايف الموضوع علمود اروح اتزوج غيرج مو..
ما جاوبته..سكتت..
دنج راسه صار مقابيل عيوني وهمس : يولي انه لو اموت واروح للجنة هم ما الكى مثلج..احس راحة الدنيا كلهه محطوطة بيج..لو اريد اعوفج جان اقرب فرصة ذبيتج..

من تمرضتي اول مرة..جنة بعدنه ما متزوجين بس عقد.. من يومهه اسوي روحي ما اعرفج ويخلص كلشي بيناتنه.. لو ذاك اليوم لمن مرضتي..لو من طرحتي..لو لو...هواي.. بس انه احبج يولي احبج..يعني ما يهلي اشوف دموعج بعيونج الاحبهن..من عز الهوسة والخبصة لمن تجين على بالي اكول اروح اخابرهه اشوفهه شلونهه..ادري بيهه تستحي ما تخابر .. ومن كتيلي اريد اروح للدكتورة كتلج تأمرين واخذتج.. وكتلج اذا الدكتورة انطتج امل ولو خيط بسيط مستعد اصرف شكد متريدين..كتلج لو صار العكس لا سامح الله فانتي بنتي وروح ابوي..انه مرتاح وياج بكل حالاتج..من اجي تعبان وانام بحضنج احسج بنتي..لو لمن اكل من ايدج احسج امي.. گلبي انتي كافي بجي والله گلبي ينمرد عليج واحير شسوي خاطر تسكتين..هسة كومي..

كمشني من جتفي وكومني..انه مدنجة واسمعله ما رفعت راسي..باسني من راسي وايده محاوطة خصري..
صگر : مسحي دموعج بنيتي..يروحلج فدوة صگر وعشيرته ولا تنزل دمعة منج..باجر العصر اخذج ونروح للدكتورة.. شتريدين انه وياج..بعد تأمرين بشي..
حركت راسي يعني لا..سحبني لحضنه وقفل علي بيده.. باسني من رگبتي ويحاجيني بهمس : اليحاجيج على علموضوع كولي صگر ميريد جهال..يكلج ليش كولي هو ميقبل وخلص..لا تعبين روحج وتكعدين تشرحين..المهم احنه .. انه فاهمج وانتي فاهمتني..
انداريتله وابتسمت : ما ادري شسوي بدونك..ولو مني الصوج بس ما تقبل اكول..ما اعرف شكول بعد..
صگر : لا تكولين يابة..هيانه مبين بعيونج..

باسني من راسي وخدي..بعدين كام ع الكنتور جاب الحلويات والجباسة..راح شغل التلفزيون واجة كعد يمي..فتح جيس حب وكرزات وجبس..
صگر : تعاي اكلي..لا تفكرين بنيتي..
كمت من مكاني رحت كعدت يمه..خليت راسي على جتفة واتفرج وياه..جان طالع فلم رحلة مشبوهة مصري.. ضلينه كاعدين لحد ما خلص جان تندك الباب..بس مدري شلون دكة..كمت افتحهه طلعت سهى زاحفة ع الدرج وجايه ادك بالباب..شلتهه وبستهه احاجيهه : ولج شلون تصعدين.. بله طايحة جان شصار بيج .. اخذتهه وطبيت..صاحني صگر..
صگر : تعاي جيبيهه يمي..
رحت انطيتهيا..ضل يلاعبهه ويدغدغ بيهه..هي بس تضحك وترجع بظهرهه ليورة عود خربانة ضحك..سوالفهه وحركاتهه تضحك..

ادور بعدهه ما تحجي..هيج جم كلمة ومنفتهم عليهه.. هي تحجي وصگر يكللهه اي عفية صحيح..بعدين شواي واجيت اسماء وجهه احمر ومتوترة..
اسماء : اعتذر اخوية..بس خفت على سهى مالكيتهه..
صگر : لا عادي..تعاي اخذيهه..
اجت اخذتهه وترزلهه ع الخفيف ليش صعدتي ومن هلحجي.. ترخصت وراحت..انه سديت الباب وتمشيت للجرباية ألم الكرزات..صگر سحبني من ايدي صرت كلي بحضنه..
صگر : شيليهن وتعاي..
ابتسمت وكمت شلتهن..خليتهن ع الميزتواليت واجيت يمه.. ضل يحجيلي بهمس لحد ما تيهت روحي و كادني هو بدربه احسني شخص ثاني وياه..على طبيعتي كلش..ابجي افرح اضحك اسكت..يتقبلني بكل حالاتي ولا يكول اهو.. دورات اكول شلون يتحملني من ابجي..

اضل الح ما اسكت بالعجل..بس هو باسلوبة يسكتني وينسيني حتى على شنو بجيت..
وره يومين العصر بدلت وخليت عطر ونزلت..صگر جان مبدل ومكمل كبلي كال خلصي وتعاي انتظرج..ع الدرج واسمع جوان تحاجي سلمى..
جوان : لج عيني..اشتميتي عطرة شلون مشى كبله..
سلمى : عيب بابا رجال متزوج اكبر منج بثنعش سنة.. مو بحالج كافي شيلي السوالف هاي من راسج..
جوان : اهوو..هو اني صوجي احجيلج..
سلمى : لج خطية مرته شفتيهه شكد فقيرة.. لا تفرقيهم علمود نفسج..الحجي بيناتنه..لايكين لبعض لا تحشرين روحج على شي ميصير ولا حيصير..
جوان : يلوك لهاي المتخلفة..

عيني اني البغدادية المثقفة..بس شهادتي بطولهه.. هاي شنو بس وداعتج جايبته جايبته..
ضحكت وراحت..انه جسمي فور ضيعت روحي..نزلت بالعجل كمشتهه من زندهه وحاجيتهه بنتر : شعندج وي رجلي حاطة عينج علي..متستحين..
جوان : هاي شنو التبلي هذا..حبيبتي مو يمج الحجي.. انه دا احجي على صديق جنت اعرفه ماجبت طاري زوجج..
دنوة : من اول ما اجيتي ما ارتاحيتلج..فأي شي ممكن يصير بالبيت انتي السبب..صگر يعرفني زين ما اتبلى على احد ولا الي علاقة..رجل دجاجة ما أحل..خاف عبالج تحجيلج جم كلمة وتقنعيهم..
عتيت ايدهه ودفعتهه : الثقافة مو بالشهادة..صيري مثقفة بتفكيرج وعوفي الرجال المتزوج..حيري بروحج خوووش..

كامت تتصافك..عافتني وراحت..حتى ما جاوبت..كبر لفهه حتى كبر..ما صارلهه شهر من اجت وخلت عينهه علي.. هاي الا اذا جان اكو شي قديم لدرجة هيج تريدة..احاجي بالسيارة عليهه بس ما اكلة لكيتهه هيج تحجي..
طبيت للهول لكيته كاعد ويحاجي الحجي ابو مخلد.. ترخص منهم وطلعنه..بالطريق حس علي مثكلة وجهي..
صگر : حبيبي شبيج ضايجة..
دنوة : سلامتك ماكو شي..
صگر : اعرفج يولي..شصاير..
انداريت احاجي بنبرة جدية : شنو رأيك بجوان..
رفعلي حاجبه : جوان..ليش..
دنوة : هيج سؤال عادي..
صگر : بنية عادية..بس ما استلطفهه..احسهه شلولو..

حجيت انه وعاوجه حلكي : اي شلولو عشتووو..
هو طكهه بضحكة وكال : ..ليش شسوتلج..
دنوة : ما سوت شي..بس فاكة عينهه عليك..شكو..شنو جنت تحبهه مدري هي تحبك..
صگر : كايلج ما حاب غيرج..شسوي بيهه احبهه يولي..
دنوة : يجوز جي جبيرة وبيضة..
صگر : جلنار هم جانت بيضة..ما يهمني المظهر لشوكت اضل احجي..عوفيهه لا تحاجيهه..جاهلة هاي..
دنوة : ليش جاهلة بله..مابيهه شي..
صگر : جاهلة..تريد تسوي سوالف اكبر من راسهه .. هسة لا تقهرين بروحج..كليلي جبتي دواج القديم
دنوة : اي..
صگر : يله دقايق ونوصل..

سكتت ما جاوبت..يمكن هي تحبه بس هو ما يريدهه.. لا اكيد مو يمكن..بس ولو..شعدهه فاكة عينهه علي..ادبسز ولا تستحي..انه الهه..اذا ضلت هيج افكس عيونهه.. ضليت افكر بيهه لحد ما حاجاني..
صگر : يله ابوية نزلي..وصلنه..
اخذت الجنطة ونزلت..انتظرته اجه وصعدنه للعيادة فوك.. كالعادة كومة نسوان كاعدات..بقيت اخر وحده وصگر ضل ينتظرني واكف بره..اخر شي صاحت السكرتيرة اسمي ودخلت..سلمت عليهه وحجي عادي بالبداية..عرفتني من حالتي وبلشت تسألني ع العلاج..
الدكتورة : مستمرة ع العلاج لو دتخربطين..
دنوة : دكتورة الصراحة تاركة العلاج صار فترة طويلة.. من الشهر السادس تقريبا..

كامت اتأتأ..ماعجبهه وضعي: ليش هيج ماما..ليش تاركة العلاج..ميصير..يعني اذا جانت نسبة الحمل تلاثين بالمية هسة صارت نصهه..وكل ما تتأخرين تقل النسبة والخلايا تضعف بعد ميصير تلقيح..ما اريد اخوفج..بس اريد انبهج حتى تعرفين الموضوع مو سهل..كليلي اذا ما عندج فلوس وعلى كد حالج حتى اساعدج..
دنوة : لا دكتورة حالتي حيل زينة..بس صارتلي مشكلة وتأزمت حالتي النفسية بعد مكدرت التزم بالعلاج..
الدكتورة : وهسة ضبطت لو بعدهه..
دنوة : اي الحمدلله..
الدكتورة : دوة الحالة النفسية دتاخذي على حسب الوصفة الجديدة الكتبتهه الدكتورة لو رجعتي تاخذين حباية كاملة
دنوة : لا نص حباية مثل كبل..

الدكتورة : جيد..حكتبلج ادوية وياهه ابرتين..بعد موعد ... بيومين..والعلاج مستمرة علي مثل كبل..
ضلت تكتب بالادوية وتحجيلي شكتبت..تشكرت منهه واخذت الراجيته ورحت للصالة..صگر شافني اجه يحاجيني
صگر : ها شكلتلج..
دنوة : اكو امل..بس النسبة قالة للنص..لأن تركته صار فترة طويلة..المفروض استمر علي..
صگر : هو هذا الزعل شيجيب غير المصايب..
عاينت علي بقهر : ماجنت ادري حيصير هيج..
كمشني من جتفي بثنين ادي ويحاجيني : ميخالف حبيبي .. الله موجود والدكتورة محتقصر..انه وياج بكل حالاتج
ابتسمت وكتله : حنزل اجيب الدوايات تشوفهن الدكتورة ونطلع بعد ماعندي شي..

صگر : يله براحتج متفرغلج اليوم..
دنوة : ماشي..
عفته ونزلت..شكد عنده ذوق..ما راد يحرجني..ممكن هاي الادوية بيهه شي لازم البنية تشتري مو مال يجي رجال يكول اريد هذني..فعافني براحتي اجيب الدوة..نزلت ع الصيدلية انطيت الراجيته للصيدلانية انطتني الادوية والأبر.. دفعت فلوس واخذتهن..بعدين صعدت للدكتورة شافتهن وعلمتني عليهن شوكت اخذهن والموعد مالتهن..انطيتهه فلوس مال سونار وفحص وطلعت بعد انه اخر وحدة وتقفل العيادة .. صگر اخذني ونزلنه..بالطريق شغلت الراديو مالت السيارة طلعت قناة مال اغاني..خلصت وحدة وراهه طلعت ذوبت گلبي تذكرت ذاك اليوم من كلهم طلعو بيوم زواجة اخلاص.. عاينت لصگر وابتسمت..
صگر : تذكرين موو..

دنوة : هههه..اي اتذكر..
مد ايده ومسح باصبعه على خدي..لحظات ووخر ايده.. رجعنه للبيت خالة فتحتلنه الباب..طبينه عادي..صگر ضل كاعد جوه وانه صعدت فوك..بدلت ونزلت سويت عشه..هم كعدنه مثل كل مرة بالليل لحد الدعش ونص بعد نعست وصعدت فوك.. اخذت الدوة وضبطت الموعد..كال شهر ورجعيلي..اذا اكو تحسن خير على خير..واذا ماكو فالفترة الاحتاج اتعالج بيهه اقل شي سنة وهم مو شي اكيد..عفت التفكير ورحت فتحت التلفزيون وتمددت بين ما اجه صگر..طفى الضوه واجه حضني
صگر : بنيتي..باجر انزل للواجب..اسبوع واجي..
دنوة : ماشي..
ضليت كاعدة شوي بعدين غفيت..

كعدت الصبح لكيته مدنج ويربط القيطان مالت البسطال.. جريت الغطى تغطيت لحد عيوني الغرفة مجرشة.. ضليت اراقب حركات ايده لحد ما رفع راسه وابتسملي..
صگر : اييي..هسة بلش صباحي..
اجه تمشي يمي باسني من راسي : صباح الخير بنيتي
ابتسمت وجاوبتهه من جوه الغطى : صباح النور..
كعد يمي يمسد بشعري ويحاجيني : لا تقهرين بروحج حبيبي انتي..مو اجي الكاج ضايجة من وره هاي الزعطوطة..
دنوة : ليش شصاير بيناتكم..
صگر : يولي والله ما صاير شي..هي هيج من جانت صغيرة انه بالثاني متوسط..يعني وعت علي لمن تخرجت من المعهد بعد.. بس مو بنفسي..احسهه مثل اخلاص..تصرفاتهه طايشة بس تريد تسوي انتباه..

فانتي شنو حبيبي..اريدج ما تهتميلهه..ختولي هي تحجي وهي تسمع..انتي هنا بس..وأشر على گلبة..
ابتسمت ووخرت الغطى شوي..فتحت ايدي كتله بصوت مبحوح : تعال كبل لا تروح..
حضني ويمسح بشعري..شواي وابتعد عني..كام يعدل القميص مالته..انه هم ذبيت الغطى وكمت مشطت شعري ولبست الشال..رحت غسلت ونزلنه..طلعو متريكين ومتخلصين محد مكعدني..يله..انه هم مدا اشتهي ريوك هلفترة..
ضل كاعد ويانه شوي بعدين كام..طلعت وياه وصاني انتبه لنفسي وما انقهر ادور راح..بالباب مالت الكليدور صارت جوان بوجهي..عيونهه تتفحص المكان الجنة واكفين بي انه وصگر..عفتهه تتفحص براحتهه وطبيت..مو يكولون واثق الخطوة يمشي ملك..انه واثقة بصگر ميسوي شي يأذيني خصوصا بهلفترة..

مخلد استحي من عنده..بس اركان هو اصلا سبورتي يضحك ويشاقة..مرته هم كلش زينة تعجبني..فالعصرية نكعد انه وياهه واركان وشهد..نسوي عصرونية بالصالة لو نكعد بالحديقة.. دورات اجيب الدومنة نلعب..يعني هيج.. بس اكمل الاكي جوان فوك راسي..اعوفهه واكوم.. اسماء ملتهية بسالي وسهى..بس نشوفهه ع الاكل..الحجي بقى على نفس موقفه ولا تغير..خطية ادور تبهذل..الحجي ابو مخلد كاعد هو ومخلد اغلب الوكت..لو العصر يطلعون هو وياه يدورون شغل لمخلد يكول بعد ما اكدر اضل هيج كاعد..
بهاء همات نفس الحالة..بس كاعد الظاهر هو ميشتغل اصلا او يدرس يعني بعده ما متعود ع الشغل..فبس بالبيت .. لو يطلع وي الحجي ابو مخلد دورات..

مرت خمس ايام عادية..وراهه العصر اندكت الباب..عدلت الشال وكمت افتحهه..صارت سرور بوجهي..كامشه بيدهه طفل وبيدهه اللخ همات..شكلهه متغير..كبرانة ومحلوّة زايد .. انه من الصدمة بعد ماعرفت شسوي..حضنتهه ودموعي تصب شلال..صار سنين على هللحظة..اخر مره شفتهه لمن رجعت من سوريا..هي همات حضنتني وتبجي..خطية ولدهه كامشيهه من بنطرونهه عبالهم بيهه شي..مسحت دموعهه وباستهم..
سرور : روحو خلي خالة تبوسكم..
دنجت صرت بمستواهم..حضنتهم ثنينهم..شكد حلوين ومتشابهين كلشش..صدك توم..ادور هي ملبستهم نفس الملابس..ثنينهم ولد..
رفعت راسي احاجيهه : تعاي فوتي شكو واكفة..

سرور : يله افوت ليش لا..
كمت وكمشت واحد من الولد بيدي وسرور اخذت الثاني وطبينه سلمت على خالة والبنات والحجية ام مخلد..متفاجئة .. اول مره تشوفهم..كعدتهه بالصالة ورحت صبيت شربت وكيك .. خليت طبلة وفوكاهه الصينية..اخذت قطعة كيكة وقسمتهه بالنص انطيت كل واحد منهم وحدة..علمود لا يوصخون نفسهم وكعدت ع الكرسي نسولف..
دنوة : ما توقعت اشوفج هيج متغيرة..
سرور : والله اني هم..الوكت يغير خوما نبقى على حالنه.. خالة والله مشتاقتلج ومشتاقه لسوالفج..
الحجية : حبيبتي فدوة لكلبج..يله شنسوي..هي هاي الدنيا صغيرة..وين ما نروح نرجع نلتقي بالنحبهم..
سرور : لا عاب حلكج.. شلونكم بعد..

ضلينه نسولف ونتذكر كبل..عبالك العمر لحظة..ذاك اليوم اجيت من سوريا وشفتهه..فتحتلي الباب وكلتلي ابوج وصى بيج كبل لا يموت..وهسة شفتهه..يعني فرق كلش جبير .. بالمكان والشكل والوكت..
دنحجي وجبتهه على نوارة..كتلهه : نوارة شلونهه..
ابتسمت بتعب : نوارة..ربج يحبهه..
دنوة : شلون يعني....

يتبــــــــــــــــــع.......................