اسألي عني الليالي

البارت ٥٠

احاول .. انسى واتغير .. واتحمل أذى وحرمان ..

أثاري .. ياعيوني انتي ..أخذتي نعمة النسيان ..
شيصبرني على فراگج .. تعالي امليني بأشواگج ..
تعاليلي ..

صدى صوتچ .. يناديني .. يخليني بأمل باقي ..

يعاندني .. يبچيني .. ويزرع حزنه بأوراقي ..
يامنى عيوني تعالي .. اسألي وشوفي احوالي ..
تعاليلي ..

الـبـارت الـخـمـسـون...............

تلفونه دك يمكن عشر مرات..ميقبل اكمشه..يكلي يدك يحترك معليج بي..فعفته..كملت الجراجف..سكت شوي بعدين رجع يدك..دخت وضجت من صوته..رحت اشيله ما مكتوب اسم بس رقم..شلته بدون ما احجي خاف يطلع صديقة ولد ادور يرزلني
- : الو حبيبي وينك صار ساعة ادك عليك..
انه من الصدمة سكتت ما حجيت ولا كلمة..هي رجعت تحجي طبيعي وتسأل..
- : ها شنو يمك مرتك..يله شوف ادري بيك ما تكدر تحجي هسة..بس اليوم تجيني للبيت مو تنسى..
توني دا احجي جان يجي صگر كمش التلفون من ايدي وسد الاتصال..ضليت صافنة بوجهه بحيث عيوني دمعت.. حسيت حرارة الدنيا كلهه صارت براسي..اعصابي انشدت فد دور حتى رجلي تشنجت ما اعرف ليش..
خزرني وضاب ايده ع الميزتواليت : ليش تكمشين تلفوني..

مو كايل معليج بي..يحترك يتصخم..معليج..
هو كال هيج وانهديت بي : معليه..هااااا معليه.. من هاي اشوفك ما تقبل اتقرب من تلفونك..اي منو هاي.. مرتك اكيد..يمكن دتسألك ع الطفل اذا جبتله حليب لو لا..
صگر : ماكو هيج حجي بابا..مرتي شنو..
دنوة : لا مرتك ونصص..تقربت كمشته من تشيرته وادفع بي حتى ما نطيته مجال يحجي..انفجرت بجي ودموعي تصب عشره عشره : ليييش..حقي..تريد تحرمني من الطفل لأن عندك..عندك مره وطفل..وانه محد بحالي..لك اكرهك.. ليش هيج تسوي بيه..مو حرام..حرااام..الله يطلعهه بيكم واحد واحد..انت واخلاص وجلنار وكلكم..كلكم اذيتوني ما بقيتو عقل براسي..تريد تسوي هيج بالعناد مو..خاطر تكول عني مخبلة ليش..چي وحيدة وماعندي احد.. ضحكت على عقلي بهلجم يوم مال سفرة..

خاطر تلهيني عن سالفة زواجتك روح الله يهنيك..تعبت من وراك..تعبت..
ضربته على صدره بايدي وعفته..رحت ع الكنتور لبست الصاية والشال..طلعت جنطة صغيرة اخلي بيهه ملابس ابجي واحجي : حروح لبيت خالتي..اذا اجيت رجعتني احرك روحي خوش لو لا..ما اريدك بعد ما اريدك.. عوفني اتهجول انام بالشارع المهم ما ابقى يمك دقيقة وحدة..
كمشني من زندي ودارني علي : تطلعين من البيت خطوة وحدة بعد متخشين..
صفكت بوجهه وخازرته : فوكاها..فوك هذا كله تهدد.. والله انه الي ما اريد ارجع..وخر ايدك لا تكمشني..وخررررر انت لو مهتم جان كلت خطية اعصابهه تعبانة ما اخليهه تتأذى.. بس ماعندك احساس..
صگر : يولي بس انطيني مجال احجي..

دنوة : شوف بعدني صغيرة بس عشت العاشه الجبير.. لا تحاول تلعب علي..كافي ضحك كافي..اكرهك..واكره هاي الايام الضحكت بيهه علي..تشوفني فقيرة و ع الكدر ماعندي احد تكول خلاسوي شريد..اي شكو هي ما تدري ثو.. غميت روحي ..امدانيييي..امدا حظي الاغبر حتى ام ماعندي اروح يمهه..ولا اب يشوف احوال بنته شلونهه ما لونهه..معذبهه مريحهه..حتى عمامي التربيت عدهم سنين ما يريدوني..انه شنو حظي..وين محطوط بس اريد اعرف.. سكتت وجريت حسرة..صدك جسمي رجف من أثرها.. بس دموعي ما سكتت..سحبت الجنطة وكمت..

اجة كمشني من ايدي يريد ياخذ الجنطة..كام يصيح : لج بابا بس انطيني مجال احجي..انه مامتزوج صدكيني.. هاي مو مرتي..سالفتهه طويلة..
دنوة : طويلة كصيرة شي يخصك..بعد ماارجع للبيت..

جريت الجنطة من ايده ورحت..هو يصيح وانه ابجي.. دموعي تصب مثل الجمر على كلبي..حتى صگر..ليش هو الوحيد بقالي بعدين يطلع يخوني..ليش كال سالفتهه طويلة.. معناهه مرته ومتزوجهه علمود الخلفة..اي مخليني يمه هيج.. بس يضحك علي..

اجه كمشني من ايدي ودارني علي..يحاول يحاجيني بهدوء بس انه طكيت بجي بعد ما اكدر اسكت..كمت ادفع بايده وابجي..كال : بس كافي يالله والله ماكو شي..ماعندي شي وياهه وروح ابوي..هاي وحدة كح...

هو كال هيج انه دموعي جمدت بعيوني..دمي كام يفور.. فوكاهه يحجيهه جدامي ولا عبالك..كتله : فوكاهه تحجي جدامي هيج..شنو من بشر انت..حتى متعرف تحجيلك كلمة بيهه خير..تكلي كح..   دفعته ونزلت اصيح : وصخ.. دير بالك تتقربلي..فاهم لو لا..

انه كتله هيج جان يتخبل.. ما احس الا صار يمي.. كمشني من زندي ونزلني جوه.. حسيت ايدي انخلعت..كمت ابجي وافك ايده بس قوية.. طلعت خالة والحجي على صوتي.. اجت سحبتني منه وهو يصيح حتى دماراته برزت..خفت منه.. رحت ختلت وراههت كامشتها من دشداشتها وابجي..
الحجية : شبيك وياها..ليش هيج تبجي..
صگر : يمه لا تدخلين..عوفيها انه احاچيها..
الحجية : شنو اعوفك تصيح عليها..غير نفتهم شكو..
سكت ما انطى ردة فعل بس ضاب على ايده..انه من قهري وصوت البنية يتردد لإذاني حجيت : خالة صگر يخوني..

تمنيت ساكتة ولا حاجية..كام يصيح صار نار..جرني من وره خالة ويعت بيه..صعدني فوك باية اصعدها واللخ اعثر بيها.. بس اسمع صوت خالة تكله لا تضربها..

وهيج تحجي بحركة تريده يفكني..خطية هي هم مره جبيره يعني مابيهه حيل..هو صار اطرش بس لسانه يشتغل.. شمرني بالغرفة وقفل الباب..نظراته والعصبيه بعيونه مثل نظرات ابوي يوم روان كلتلة دنوة جانت يم صگر الليل كله.. شكد ما هو حباب بس انكلب بدقايق..حسيته حيجي يكتلني مابيهه مجال بعد..شوي وسمعت الباب تندك..
الحجية : صگر افتح الباب لا تسويلهه شي خطية..

رجعت حجت..جان يندار ويدك ع الباب : لحد يجي.. عوفوها .. لحد يدخل ويسوي روحه واكف وياها..
هي سمعت هيج جان يصير هدوء بره..يعني راحت.. كمت كعدت بالركن ومكرفصة روحي..اجه وكف جدامي..

صگر : كومي اوكفي احاجيج..
بس سمعت ما جاوبت..خفت منه..صار عصبي ضعف ذاك اليوم بسبب اخلاص..
دنج صار مقابيلي..مد ايده جر اذني..حسيتها انشلعت.. كمت اصيح وابجي..كامشة ايده اريد يوخر : اذني صگر حباااب.. حسكت والله سكتت مااكول شي..
صگر : كلمة وحدة ماتفكين حلكج..خوش لو لا..هاي وحدة عندي وياها شغلة من وره محمد لا اكثر ولا اقل.. دااكلج گح.. يعني انه اصلي واصوم شعندي وي هيج نماذج.. طلعت وصخ وخاين والحجي كله طلع بره الغرفة..من اليوم ورايح كلمة تطلع بره الغرفة يصير غير حساب وياج.. خليتي حتى خالي يعرف.. متستحين انتي..ماكو خصوصية.. ماكو صخام بعينج..

دنوة : هاااا عبالك تضحك علي بهلجم كلمة..كتلك ما ابقى يمك دقيقة يعني ما ابقى..دفعته وكمت..اخذت الجنطة مال ملابس وجنطة لخ مالتي بيهه فلوس خمسة وسبعين.. ورحت ع الباب فتحت القفل جان يصيح..

صگر : شنو انتي ماتسمعين..شداامسلت انه..
دنوة : حچي يفيدك..اخلاص وجلنار رادو يخبلوني وتخبلت.. هسة اجيت انت تمرضني..
بصياح : لج بابا شمرضج..لتخليني اطلع عن طوري.. كتلج ما عندي شي وياها..يابشررر.. ماعندي..
دنوة : كتلك حجي يفيدك..عفته وطلعت..كام يصيح عرفته يريد يجي يرجعني..نزلت بالعجل حتى خالة ضلت صافنة..
الحجية : وين حتروحين خالة شبيج..
رحت كعدت يمهه وابجي : خالة اذا اضل هنا اتخبل.. الله يخليج ارحميني..ما اكدر اضل هنا..تعبت من اخلاص وجلنار هسة اجاني صگر..
الحجية : وين تروحين حبوبة..هسة هو شمسوي غير نفتهم شو مثل الاطرش بالزفة..
دنوة : هو يحجيلج القصة مالته..انه سمعت باذني بعد لو يحلفلي من الصبح لليل ما اصدك..خالة سمعتهه بإذني تكله انتظرك تجيني للبيت.. شوفي انه شكد مطفية امدانييي ليش هيج حظي..

كمت مااشوف من الدموع..كمت وعفتهه..نسيت نفسي.. طلعت بره حسيت بإيده تسحبني عاينتله بنظره باردة : شتريد مني الله يخليك ارحمني والله اعصابي تلفت..تعبت من المشاكل والامراض من يوم طبيت لهلبيت لحد هسة..واجيت انت تكملها روح تنتظرك تره انه سمعتهه تكول اليوم تجيني..روحلهه.. فكيت ايده وطلعت بره..وكف جدامي يريد يفهمني بس قفلت بعد..

صگر : يولي ليش اريد امرضج..مو اشتعل شيبي يله صرتي زينة..ما اخونج وداعتج..هاي عدهه علاقة بمحمد..

دنوة : لا تجذب..محمد يحب ما عنده وحدة غيرهه..وهي ليش عود تخابرك..ليش انت منو..اخوهه عمهه..
صگر : ابوية انتي امشي طبي جوه..هذا الحجي ميفيد.. مامتزوج غيرج وداعة امي..
دنوة : كلش صدكت..احترم كرامتك وعوفني اروح..لا اريدك ولا تريدني..خلاكمل حياتي بدونك..هو كلهم عافوني بقت عليك حتى جدو..

عفته ورحت اتمشى لبيت خالتي..دموعي عمتني كمت ما اشوف هلكد ما بجيت..هو يمشي وراي ويريد يفهمني بس انطرشت بعد..وصلت لبيتهم لكيت الباب مقفول.. درت وجهي علي : وينهم ليش مقفول..
صگر : شمعرفني..
صدك بلحظتهت حسيت الدنيا صارت بسواد ليلة الوحشة.. قفلت جدامي مثل القفل المحطوط بالباب..كمت ابجي على حالي..ليش ماعندي احد..من دون الناس كلهه صرت انه الوحيدة..انكتلت وتغربت..طرحت وتمرضت امراض مال ناس بالاربعين مو عشرين..رجعت للبيت مثل ما اجيت هنا.. بالباب وتذكرت بيت خالي..عندي خوال ثنين..

واحد منهم باربيل وبعيد حتى ماعندي علاقة بي.. والثاني ببغداد..بيبيتي همات عايشة وياهم..جنت اروحلهم كبل .. انداريت علي وخازرته : اخذني لبيت خالي..
رفعلي حاجبة وزفر الدخان : بيت خالج..
دنوة : اي..ببغداد..وهسة تاخذني..
صگر : وين اخذج هسة بابا دنيا ليل..نوصل الفجر..
دنوة : تاخذني لو لا..لتعبني مابيه حيل..
صگر : لا مااخذج..فوتي جوة وانعلي الشيطان..ماكو شي من هاي افكارج..كتلج وفهمتج كلشي..ليش ما راضية تفتهمين..

دنوة : خوش..عندي فلوس انه اروح للكراج اخذ تكسي واروح لبغداد..عفته ورحت..   عتني من ايدي فوتني جوه..
صگر : اجيب السويج واجي..مو تريدين ترتاحين.. خلاشوف يا راحة هاي التحصليهه هناك..
عافني وراح..انه بس ابجي ما سكتت..شوي واجة شغل السيارة وصاحني..رحت صعدت يمه..الطريق كله دموعي تجري..اختنكت هلكد ما بجيت..كمت اكح..هو بس يصيح
صگر : لج سكتي..سكتي..يعني شسويلج بعد.. دااكلج ماعندي شي وياهه..انطيج تخابريها..
دنوة : ما اريد شي..اريد تعوفني وحدي ولا تجي تصالحني لأن ما اريدك..روح عليهه روووح..
كام يضرب ع الستيرن ويسوق سريع..صحت بي : حنموووت لا تسوق هيج

صگر : وجع حتى وجع..لا تعلين حسج..
دنوة : انه ما احترم..طلكني وخلصني منك..لعبتو جولة بيه جلنار واخلاص وهسة اجيت انت تجمالة..
طبك على صفحة ودار وجهي بايده : لعبان نفس ما اريد.. شطلكج عاقل مخبل..ماصدكت صرتي يمي..
دنوة : و الي ما يصدك يصير يمه شخص يحبه يكوم يخونه ويتزوج من وراه..وخرت ايده ودرت وجهي للشباج : شكد ونوصل..تعبت من الطريق..سكت ما جاوبني..هلكد ما الطريق ممل غفيت..كعدت على صوته يكلي وصلنه..ساعة سته وشوية الفجر.. ضليت اتلفت بالمكان وصگر فاتح الباب يدخن..الجو حار بالسادس..حسيت تندمت على قراري..بس اريد اثبت نفسي ما اريده يكول طفلة وماعدهه احد فامشي عليهه كلامي.. اخذت الجنطة ردت انزل كمش ايدي..
صگر : والله ظالمتني..حجيتلج كلشي..

كتلج ماعندي شي وياهه..هي عدهه علاقة بمحمد ومحمد عايفهه..اجت تريد فلوسهه مني..انه شسوي..
دنوة : لا تجذب..دا اكلك محمد يحب شنو يروح على هاي.. بعدين اذا حجيك صدك ليش تكلك حبيبي وانتظرك بالبيت موعدنه اليوم مو تنسى..راح موعدكم حرامات..اكيد خابرتهه كتلهه مرتي الطفلة عرفت..
ضب على ايدي وخزرني : سويتي كل هذا الفلم الجذب تريديني اكلج ايييي عفيه عليج هو هذا الصار..وانه حاجيتج وفهمتج الموضوع تكليلي جذاب..
دنوة : اي انت جذاب..لا تجيني ولا اجيك..سكتت على زواجتك من جلنار وكلت ميخالف..هو اكيد يحبني بس ميكدر يعوفها علمود ابنها..وشفتك مرتين وياها بالغرفة وعبررررت.. تكلي ماعندي شي وياها..خلتني اتمرض وانت مبقيها .. كلت ميخالف وانتظرت لحد ما طلكتها وخلصت..

وهسة اجيت انت تكمل سواياتهن..مليت والله.. عوفني ارتاح واذا تريد تريحني اكثر طلكني.
صگر : اسف وحكج علي..ما كلت شي..وكل ما تصير مشكلة اجي اعتذر..ادري اعصابج تعبانة ما اريد اتعبج بالزايد.. سمعي كلامي وارجعي حتى عيب هسة الفجر تروحين عليهم ميصير..شتريدين اسوي وترجعين..
دنوة : ما اريد شي..عوفني وبس..جريت ايدي ونزلت.. تمشيت لبيتهم لأن طبك براسي الفرع..لكيت خالو واكف بباب البيت وبيده سويج السيارة..اول ما شافني فتح عيونه على كبرهن.. اخذت نفس ورحت يمه..سلمت علي وحضنته..كمت ابجي لا اراديا..تخيلت امي بي..شوي وابتعدت عنه..حسيت على صگر وراي..خزرته وصديت وجهي..
خالي : هلا بيج خالو..شو هسة خير ان شاء الله..
صگر : مابيهه شي بس رادت تجيكم وما قبلت تنتظر..

دنوة : اي خالو..
خالي : تعالو فوتو..ام سيف كاعده (مرته)..
صگر : الله يسلمك..لا انه اروح عندي شغل..
خالي : هاا..الله وياك ابوية..
سلم علي وراح..درت وجهي لكيته يعاينلي والجكارة ما نزلت من حلكة..هو بدون سبب ويدخن هواي..شحال من يصير شي يغثه..طبينه جوه..مرة خالي تموت مني الى درجة..بس خالو زين حباب وياي ومن اجي يشيلني بالصلوات..ولو يحبني بس يكره ابوي..ما ادري ليش بس يكرهه..على حسب حجية عساس ابوي من خطب امي هو جان ما راضي..المهم هو شي راح وانتهى..وابوي توفى حيصيرله سنتين..

رحت سلمت عليهه..ردت علي طبيعي ولو اعرفهه ما متحملتني بس وين اروح..ميخالف خلاتحمل مو مشكلة..المهم ما اضل يم صگر بعد..خالو ماعنده بس سيف وبنات ثنين اكبر مني متزوجات من كبل لا اروح لسوريا..سيف همات متزوج بس كاعد وياهم بالبيت..كعدت وياهم شوي بعدين كمت انعس.. الطريق يتعب وحده..وانه منا باجية لحد ما تعبانة..فتعبت طبيعي..شوي وفات سيف مبدل يريد يطلع للشغل.. سلمت علي وراح..جيتي بوكت غلط..بس ثولة..ثولة..هسة حتى اذا اكللهم ماكو شي محد حيصدك..اكو واحد يجي بالستة الصبح.. هذوله عدهم شغل ويكعدون..ناس غيرهم نايمين هيج وكت..تسرعت..كلي صگر لتروحين هسة..صبري.. وين اسمع انسدت اذاني..شياطين الدنيا كلهه صارت جدامي.. بله كلشي اعصابي تلفانه..ادور اسمع هيج..شصار بيه دمي فور صيحت وغلطت..

بالبداية حاجاني عيني واغاتي..بعدين شافني الح كام يرزلني لحد اخر لحظة هو يحاول وياي..ارجعي غيري رأيج.. بس قفلت كمت ما اشوف جدامي من العصبية..حتى دوه الاعصاب نسيته..بس مالت الدكتورة النسائية انه اخلي بالجنطة استحي اطلعه جدام صگر..هي حبوب عادية بس استحي مدري ليش..اخذت نفس وترخصت منهم..رحت لغرفة بيبيتي لكيتهه توهه كاعدة..سلمت عليهه وبوستهه..ضليت حاضنتهه ريحتهه ترستني..كتلهه : بيبي حتى ما سألتي عني ليش.. انتي هم تكطعين..باستني من راسي وأشرتلي اكعد يمهه.. كمت كعدت بسدهه ودموعي بعيني..بس انتظرهه تحجي شي خاطر يصير عندي سبب وابجي..
بيبي : حبيبتي والله اوصي خالج عمار (ابو سيف) عليج.. اكله خابرهه شوف وين صفت بيهه الدنيا..ذاك اليوم سمعت ابوج متوفي..حتى رحت للمقبرة..

هم يبقى نسيبي وبعمره ما أذى شهلاء..ما اجتنه زعلانة بيوم حتى هو المحرم ضل يحاول وخطبهه اكثر من مره..بس حكمة ربج بعد..الله يرحمه ويرحمهه..
عاينتلهه لكيت دموعهه بعيونهه..امي صار ١٨ سنه متوفية.. وهي هسة تذكرتهه ودمعت عيونهه عليهه..شكد حنينة الام.. وفية وتذكر تفاصيل حياة ولدهه وبناتهه كبل تفاصيل حياتهه هي نفسهه..تمنيت اجرب شعور من اختنك ما افكر وين اروح لأن عندي ام حتاخذني لحضنهه..كل ما احد يجيب طاري الام تصير غصة بزردومي..احس روحي تفرفح..بس اريد نفس.. ماحسيت بشعورهه ولا اتذكرهه زين..بس بالصور شايفتهه.. حسيتهن التمن كلهن..منا سالفة صگر وما ادري اذا اصدكة لو لا..ومنا بيبي كعدت تحجي بأمي وابوي..القهرة صارت ببلعومي..اختنكت..كمت ابجي ودموعي ما الحك عليهه.. ماعندي حل غير البجي..

ولو ادري ما يفيد بس هيج مجرد دموع تنزل على وجناتي.. هي دمعة بس تحفر گلبي..هسة لا اب ولا ام..صگر ليش سوى هيج..هم ميريدني..اي عادي مو بس هو..حضنتهه وابجي بس بدون صوت..شسوي ما اتحمل..من جنت يم صگر بس اضوج لو اتذكر ابوي اروحله..دورات هو كاعد يم الحجي ومحمد اجي اكعد يمه لو بس اوكف بالباب هو يعرفني شقصد.. يعوفهم ويجي يمي فوك..بس يكلي شبيج اطك بجي وشهكات كل موقف بيناتنه مر جدامي..والموقف الاخير كسر كلشي حلو سوالياه..من سمعتهه تكلة حبيبي..ادور تكلة اليوم تجيني للبيت مو تنسى..هسة اكيد راح عليهه..اي انه شكو.. بكيفة يمكن مرتاح يمهه..وانه يكلي ما اريد طفل بحجة المرض مالتي ما ادري يحجي صدك لو يجذب علي..دخت الى درجة.. بس ساكتة ودموعي تصب..صعبة شكد ما احاول استسهلهه ما اكدر..وين اندار الكاهه صعبة..

بيبي مسحت على راسي واخذت راسي بهدوء خلته على رجلهه ..باستني من خدي وتمسح بدموعي..
بيبي : حبيبة بيبي بس اهدي شويه..صاير شي انتي ورجلج لو شنو..خاف ذكرتج بأبوج تعذريني ما اقصد..
دنوة : لا بيبي ما ذكرتيني..انه ما ناسية اصلا.. بس تعبانة وما عندي احد احجيله..خليني يمج بلكت ارتاح..
بيبي : براحتج عيوني..نامي يمي بالغرفة خاف تريدين تحجين شي اسمعج..هسة تعالي نامي اكيد تعبانة من الدرب.. بعدين عود العصرية نكعد نسولف..
ابتسمت على حجيهه..شكد مهتمة وعرفتني من شكلي شنو بيه حتى كلتلي خوما صاير شي انتي ورجلج..ما ادري احجيلهه لو اضل ساكتة والمشكلة تنحل وحدهه..صگر ادري بي مراح يبقى ساكت..حيجي للبيت يريد يرجعني.. بس محرجع بعد خلص..لأن تعبت..

بستهه وكمت نزعت الشال والصاية..
بيبي : دنو طلعيلج جودلية من كنتوري فرشي ونامي.. اني لو اكدر جان خليتج تنامين ع الجرباية..بس تدرين بيه..
دنوة : اي بيبي ادري..الله يساعدج..عادي هسة افرش وانام اصلا تعبانة بس اريد انام..
بيبي هي وتلبس شالهه : يله اعوفج ترتاحين..اكوم اصلي واكلي لكمة ارد اشرب دواية..
دنوة : عافيات مقدما..ابتسمتلي وراحت..كمت ع الكنتور طلعت جودلية ولحاف..فرشتهه وتغطيت..لأن الغرفة باردة ثلج مو مال غطوة خفيفة..تمددت ردت انام ماكدرت..ضليت اتكلب واتصفن ع الحايط..حتى مابيه حيل ابجي خاطر اكول ابجي وارتاح بعدين انام..متعودة على صگر يحضني وينام.. هسة شلون..ادور كمت اكول تندمت..لو ساكتة وسامعه كلام.. يمكن حجية صدك..بس انه عاندت بعد..

بعدين اكول لا ديجذب علي..يحبهه ومتزوجهه وعنده طفل هسة اكيد..خوما يكعد ينتظرني اصير حامل وانه نسبتي ضعيفة بسبب الادوية..يعني هيج تدمرت بشبابي ليش..شمسوية جوه ربي والله مليت..منين ما افكر واتذكر اشوف روحي ما غلطانة بحق احد..مو بر الوالدين هو الطريق لراحة الابناء.. ابوي شكد اذاني..كلام وفعل..بس ما فديوم رفعت صوتي علي.. يرزلني جدام الكل ابلعهه واسكت..اكول يجي يوم يلين وياي.. وهذا اليوم يجر يوم لحد ما صارن ١٥ سنة..كل يوم رزالة .. يكتلني بس اكلة يابة اريد ملزمة..اريد شي..يكلي كتلج شغلة وحده ما اجيب..عساج راسبة خاطر ابطلج..وهاي هج..بس حظي كل سنة انجح ولازم اتحمل رزالته من اطلب منه شي..يعني كل هذا وانه ما اجاوبه..اسكت..غير المفروض تطلعلي بشي زين مستقبلا..شو كلشي دا اشوفه يأذيني ويقتل كل ذرة براءة بداخلي..تعلمت وحدي..محد علمني..

حتى خيانة سمعتهه بإذاني..حجم الطعنة بكلبي اكبر من عمري بمرتين..كل هاي الافكار واكثر اجت ببالي.. ما ادري ليش كل ما اضوج شريط حياتي يمر جدامي يوم يوم.. اختنكت حسيت روحي صارت بزردومي..خليت وجهي بالمخدة وابجي بس احاول ما اتحرك..ما اريد يبين علي دا ابجي.. دقايق وسمعت تلفوني يدك..جريت الجنطة وطلعته.. حبيبي .. ايدي كامت ترجف..عفته يدك ونمت..ما كعدت للظهر.. على ايد بيبي تكعدني..
بيبي : كومي حبيبتي..صبينه غده متاكلين..
بملل وصوت واحد توه كاعد : اي بيبي كمت..ابتسمت وراحت اخذت التلفون من الجنطة لكيت رسالة من صگر..
- اسف..ما ادري شلون حنام بدونج..صدكيني ماعندي شي وياها..احبج الج..
كلبي كام يدك سريع..مجاوبته بس شفتهه ورجعته..

اريد احسسه بالحسيته من سمعت هاي البنية تكله حبيبي وانتظرك بالبيت..رجعت التلفون وكمت للحمام غسلت ورحت كعدت يمهم بالهول..سلمت على مرة سيف تطلع بكدي.. مشايفتهه كبل لأن متزوج جديد..كعدنه تغدينه بعدين شالت المواعين..وكفت اغسلهن اجت مرة سيف عذراء..
عذراء : هاي شنو حبيبي..عوفيهن من ايدج ميصير مو جاية خطار..يعني لازم ندللج..
ابتسمت : يله قابل غربة..هي مواعين عادي..
اجت وياي تسولف..انه اغسلهن وهي تعزلهن لأن ما اعرف وين يخلونهن..خلصت ورحت كعدت وياهه بالصالة.. فتحت التلفزيون تكلب بالقنوات..
عذراء : اكو مسلسلة دا اتفرجهه..شوفيهه وياي همزين اجيتي بوكتج..اضوج اكعد وحدي..سيف حيطلع للشغل..
دنوة : يله تدللين انه هم ماعندي شي..

كعدت تحجيلي على حياتهه والروتين هنا..يعني حجي عادي مال بنات..بعدين شواي واجت بيبي هي ومرة خالي كعدو يمنه بيبي عادية وياي وتحبني بس مرة خالي..هي تضحك بوجهي عادي..بس انه مره صارلي موقف وياهه..سمعتهه تكول شعدهه جايه هاي..يعني نخلص من امهه تطلع هي.. فادري بيهه ما تريدني..لهلسبب من صارت سالفة جلنار واخلاص ماكدرت اجي هنا..اكول خلاصبر على جلنار احسن من ما اروح لبيت خالي وهاي تحملني منية..ع الاقل هناك هو بيت رجلي منو يطلعني..بس هسة الوضع يختلف.. الاذية جتني من صگر..مو جلنار لو اخلاص خاطر اصبر..شلون حصبر شلون حيوضحلي موقفه..شواي واكول ليش ما صدكته وبقيت كاعدة..هاي اول يوم وهيج راسي حيطك من التفكير.. عاد بعدين شلون..ما ادري..وهاي مرة خالي شكد حتصبرلي.. اسبوع..اسبوعين بالزايد..

مر اليوم عادي..بالليل بيبي اخذت الحباية ونامت خطية هي وتحاجيني كالت نعست..انتظرتهه تنام وكمت ع التلفون قريت الرسالة مال صگر مره لخ..دموعي صارت بعيوني كمت اشوف غواش..غمضت ونزلت دموعي..سديت التلفون ونمت وبخاطري الف سالفة..ثاني يوم مر عادي..بين سالفة وكعده.. احاول اكعد وياهم شكد ما اكدر..ما اريد اتذكر صگر وانقهر.. هو انه ما ناسيه اصلا بس ما ازيد الطين بله..مرت تلث ايام ما دزلي رسالة ولا خابرني..بالليل افرفح بجي دموعي تصب مثل الجمر..الف فكرة تجي ببالي..اكيد هو يمهه.. الحجي اليحجيليا يحجي الهه..هيج سهلة علي يعوفني وحدي.. احسهه سجاجين بكلبي مو افكار..اخر شي اتعب من البجي والتفكير احاول اقنع نفسي..اكول بلكت حجية يطلع صح وماعنده شي وياهه..اي هو ماعنده شي وياهه..هو يحبني ما يغثني انه متأكدة..

اريد اواسي نفسي حتلو جذب..يمكن صدك يمكن لا.. ما ادري..وره هاي التلث ايام خالو عرف ليش جاية..مرته كايلتله لأن سامعتني انه وبيبي دنحجي..هو ما راد يحرجني جدام احد فكعدنه وحدنه وره العشه..كمت اشيل المواعين جان يصيحني..
عمار : خالو من تخلصين اريدج بشغلة..
دنوة : حاضر..كمت وي عذراء سويت المواعين بعدين رحت يمه..كتله : شردت خالو..
عمار : اليوم خابرني صگر..زوجج..
هو كال اسمه وانه راسي احسه صار حار..كتله : ليش
عمار : باجر يجي يريد يرجعج..
دنوة : بس ما اريد ارجع خالو..تعبت خلارتاح يمك شوي.. اذا تضايقك كعدتي اروح لبيت خالة غصون..(هي خالتي الوحيدة بالبصرة اقصد)

عمار : لا خالو قابل اني طردتج..البيت بيتج ثم انتي ما صارلج هواي من اجيتي..كعدي براحتج..بس ردت انطيج خبر يعني شتريدين اكلة اذا خابرني مرة اللخ..
دنوة : كلة متريد ترجع..
عمار : يله مثل متريدين..اني ما ادخل..
ما جاوبت..بس حركت راسي يعني اي وكمت..فشلت منه ما ادري ليش..بالليل تقريب الوحدة ونص كاعدة اتفرج تلفزيون بغرفة بيبي جان يدك التلفون..مخليته بالكنتور بين ما كمت دورته انقفل..فرجعت اتفرج لحد ما خلص الفلم وطفيته.. رحت جبته دورت المكالمات..صگر مخابرني..عفته ما دكيت علي.. ولا حدك لو مدري شيصير..مد ايده علي ولو ما ضربني بس جرة الاذن هاي اعتبرهه هواي..لأن هو حتى صياح ميصيح علي بعدين يجي يجر اذني..

توني خليت راسي ع المخدة جان تجي رسالة..ادري من عنده بس ما اريد افتحهه..ضليت متردده افتحهه لو لا..اخر شي مكدرت..فتحت التلفون وقريتهه..
- باجر حنزل للواجب واجي لبيت خالج..كافي عناد مشتاكلج وروح ابوي..اسف مره لخ..
تنهدت وقربت التلفون لصدري..ما ارجع حتلو مشتاقتله.. شوي ودك التلفون..فزيت وجاوبت كبل لأن صوته عالي ما مسويته صامت..خفت بيبي تكعد..خليته ع اذني بس محجيت انتظرته هو يحجي..
صگر : زين جاوبتي..عاجبتج هاي البهذلة..
سكتت ما جاوبته..بس صوت انفاسي يدري بيه دا اسمعه بس متقصده ما اجاوب..
صگر : احجي شي..حتلو كلمة راضي والله..
بهمس : شكو شتريد..

كتلك ما ارجع لتحاول تجي..
صگر : سهلة..روحي نامي خنشوف وين تاليتهه.. انتي ميفيد بيج الحجي..الا اخلي محمد يحاجيج وهو يفهمج كلشي بنفسه..مدري منو كايلج محمد نبي..
دنوة : لا يفهمني ولا افهمه..انه سمعت كلشي باذني.. وحتلو محمد حاجاني ما اجاوبه خوش لو لا..
يريد يحجي وسديته بوجهه..تخيلت شكله شلون صار عصبي هو يتخبل من واحد يسد التلفون بوجهه..مره ديخابر صديقة جان يسد التلفون..شوي ورجعت خابره..رزله رزاله غسل ولبس..لك شلون تسده بوجهي..زعطوط جدامك انه لو شنو خطية الولد من الفشلة ضل يعتذر منه..هو حجالي طبعا وره ما سده..فكلت شلون صار هسة..اكيد هم صار عصبي.. ولو شسويله..يستاهل..بس هو يسويني عصبية واعصابي تتلف بعدين بكلمة يريدني ارضا وارجعله..

رجعت التلفون ونمت..ثاني يوم الصبح من كعدت حسيت دوخة وايدي تجيهه رجفه خفيفه ثواني وتروح..كلت عادي يمكن لأن توني كاعدة والبارحة انقهرت ونمت..تريكت وكمت ادور الدوه بالجنطة بعدين تذكرت علاج الاعصاب تاركته حيصير اربع ايام.. ودوة الدكتورة الثانية خلص..توترت..يعني حيخرب الكورس كلة علي..وهذا دوه الاعصاب لازم اعيده..ما اريد اتمرض منو يتحملني..اليوم العصر اطلع اجيبه عندي فلوس.. مشى اليوم عادي..العصر رحت للغرفة بدلت بنطرون وقميص والشال..جان تجي بيبي..
بيبي : وين حتروحين عيني..
دنوة : اريد اشتري الدوه مالتي..
بيبي : يله اجي وياج خاف متندلين وحدج..
دنوة : بكيفج بيبي..خاف تعبانة..
بيبي : لا عادي شعندي قابل هو بس بالبيت..

ابتسمت انه واعدل الشال ع المرايه..شوي وسمعت صوت بالهول..عبالي واحد صديق سيف لو شي..بس تقربت وسمعت صوته عرفته..هذا صدك اجه..وشعنده اصلا..ضليت واكف وره الباب واسمعهم..
صگر : هي هنا..
عمار : اي موجودة..
صگر : خالو كتلك اريد ارجعهه..حاجيتهه..
عمار : اي ومتقبل..تكول ما ارجع..خوما بالغصب..
صگر : شلون سالفة هاي..زين بس اشوفهه..ضل بالي عليهه لأن حتى دواهه نسته..
عمار : هسة اصيحلكياهه بعد انتو تفاهمو..اني كتلهه ما ادخل بس كتلج مثل ما كلي..
صگر : الله يسلمك..
لحظات واجه فتح الباب صرت بوجهه..سدهه وهمس..

عمار : رجلج هنا..عيب روحي شوفي ميصير جاي من واجبه علمود يشوفج..روحي تفاهمي وياه..
دنوة : خالو مو كتلك كلة متقبل ترجع..
عمار : اي مو كتله يا خالو..شوفي مبين عنده موضوع مهم وياج..لعد ليش جاي جان من تلفون وراح..
اخذت نفس ودنجت : هسة اروح..
طبطب على ظهري وابتسم..رحت للهول وسديت الباب وراي.. هو جان عاكد حواجبه وعصبي..بس طبيت رخت ملامحة.. تقدمت كعدت ع القنفة وهو كاعد ع الكرسي ومسافة بيناتنه .. بدون مقدمات كتله : شعندك جاي..مو كتلك ما ارجع
صگر : يولي لتعاندين والله ميلوكلج العناد..اسف وحكج علي المفروض ما احاجيهه..بس علمود محمد والله..هسة عفتهه وراحت بدربهه..
دنوة : اي بعديش.. روح كمل وياهه عليش عفتهه..

انه ما ارجع انساني هاهية..نفسيتي تتعب من اشوف البيت والغرفة..عوفني احسن..
صگر : لج لو غلطان والله ما اشوفج وجهي..بس دا احجي الصدك..لا تخليني اتبهذل على شي ممسوي..شتريدين اسوي وترجعين..والله ما طايق البيت بدونج..
دنوة : ما اريد شي..اريد تعوفني..
كام من مكانه كعد يمي..كمشني من ايدي وباسني : شلون يعني..والله مشتاكلج..
دنوة : اي وشسويلك يعني..انت شكو اجيت اصلا.. اريد اروح اشتري دواية خربطت علي العلاج..منو يفيدني اذا تمرضت مرة اللخ..انت لو مرتك الثانية لو ابنك مدري بنتك..
صگر : ها هيج..مو واكف وياج شهور وعايف الشغل وكل يوم اخذ اجازة علمودج اكول ما اعوفهه وحدهه خطية..بعدين تكليلي متفيدني..

ادري ضايجة من السمعتي..بس دا اكلج ما عندي شي وياهه شلون يعني..اجذب..
دنوة : بكيفك..جريت ايدي وكمت..خله باكيت الدوه بايدي وكام بيده التلفون..
صگر : لتخربطين بالموعد..محد يفيدج مثل متكولين..
عافني وراح طلع من الباب مالت الهول..خالو جان بره .. سلم علي وراح..انه رجعت للغرفة والدوه بيدي..
بيبي : ها شنو اشتريتي..
دنوة : لا صگر جابليا..باكيت جديد..
بيبي : شوفي صگر يحبج مو كتلج..حتى ما ناسي دواج..
دنوة : بيبي يحبني ومزوج علي وين صايرة هاي..
بيبي : يمة حبيبتي الرجال ديكلج ماعندي شي وياهه.. يعني شنو يبوس ايدج..بعدين مو كال اخلي محمد يحجيلج كلشي اذا متصدكيني..

دنوة : اي بس كتله ما اريد اسمع منه شي..
بيبي : انتي اعرف بعد..هسة حتطلعين لو لا..
دنوة : لا شسوي طالعة مو جابلي الدوه..
بيبي : والله انتي تفكرين بعدين تتندمين..يله براحتج
سمعتهه وسكتت ما جاوبت..دورات بالليل ما يجيني نوم فاكللهه بيبي كاعدة..تكلي اي..اكعد يمهه احجيلهه.. اكللهه هيج سوالي وسفرني..ومن تمرضت ضل وياي وتحملني.. بس هذا الاتصال شنو وليش..يعني اذا يحجي صدك ليش تخابره قابل هو شيصير منهه..هي تكلي يحبج ومبين ماعنده شي وياهه بس انه قافلة..

صگر : وصلتها لبيت خالها بس مالي نية تبقى هناك.. كل ظني بنص الطريق حتگول رجعني.. ثقتي ناحيتها عمياء لدرجة بعيدة .. تبچي وتصيح وانه ابرر مايفيد.. موعنودية هي ولا يم العناد.. ماادري شجاب العناد وركب راسها بهلموقف.. نزلتها ورجعت .. اول ما فتت اجت امي تعاين وراي عبالها رجعت..

الحجية : ها يمة..وين دنوة..
ذبيت السويچ وگعدت ع القنفة : ماقبلت تجي.. وديتها لبيت خالها..
الحجية : لا حبيبي گول غيرها..دنوة منيلها هلحچي..
عاينت عليها بنظرة ضياع : ماادري..

عفتها وصعدت فوك..هدومها مطشرة بالگع .. ماشات شعرها .. ريحتها وسيت النوم الچانت لابسته .. اتندم لو اتحسر .. وثنينهن بسبب محمد.. دنجت عليهن لميتهن واتخايلها تتمايل يمي تگلي حبيبي تعبت تعال ساعدني.. شلون انام شسوي .. طفيت الضوة وتمددت.. راسي يوجعني بس مايجي لوجع گلبي بهللحظة .. تهربت من كلشي بالنوم.. كعدت مااعرف شوكت شفت روحي شابگ إديه چن حاضنها ونايم.. كمت بدلت وطلعت .. ولو انه لمن انزل من الواجب اضل مگابلها وگاعد.. مااريد اضيع دقيقة بدونها.. اريد اشبع شوف واعوض سنتين سوريا.. بعدين هي تروح بهالسهولة..الطريق كله ابررلها وهي ولا يمها.. شگد الشيطان قوي وهي ضعفت ..

بقيت لنص الليل بره البيت..امي تخابر وخالي.. خليته صامت لحدما حسيت عيوني گامت تسورب .. ماماكل شي .. لفت ورجعت للبيت..اجت امي شبگتني وتبچي ..
الحجية : وينك يمة لاتسوي هيج بعد فدوه اروحلك..
بستها ومسحت دموعها..دخلنا جوه طمنتها وراحت تنام .. طبيت للمطبخ وهيج بيني وبين روحي لساني ماخذ عليها گلت : حبيبي سويلي شي اكله ..
تفطنت هي ماكو .. جريت فواكه اكلت وصعدت انام.. اچذب اذا كلت نمت بدون مااتخايلها ..

وهيج مرت الايام.. دزيتلها اول يوم بس .. شفتها مامهتمة لسؤالي عفتها.. وراها خلصت اجازتي .. كعدت الصبح حضرت الجنطة وبدلت.. درت وجهي عبالي اشوفها گاعدة والنوم بعيونها.. حتى مااخليها تگعد وياي ..اكول تتعب من كلشي وهي نفسيتها مامستقرة..نست كلشي وراحت.. باچر اروح ارجعها مااگدر بلياها.. بنيتي هاي ..دنياتي ماتغفى عيوني الا اشوفها خاتلة بحضني وتتململ تحوص..
اگللها : دناوي خلانام ..
تضحك وتخزر : تضوج مني ..خلص نمت هاهيه..

نزلت واشوف امي تحضر بالريوك..خليت فلوس بيدها وطلعت .. مريت اشوفها وارجعها بس لاقيت برود فضيع .. لو انه بارد هشكل چا حگي..بعد الشفته والتعب التعبه بس ماقل حبها ذرة بگلبي..بالعكس.. لمن اشوفها مريضة اگول وين تروح اذا ماادير بالي عليها .. هي حساسة وكلشي يأذيها .. ماحسبتلي حساب شحيصير بيه لمن اسمع هيچ كلام..

عفتها وطلعت للمقر.. مرت الأيام وخلص دوامي .. مددته بعد مانزلت اجازة.. امي خابرتني تشكيلي من محمد..مهمل ويطلع مايرجع بس تالي الليل.. انه گلبي مورم وهي تسولف بسوالف مخليها آخر همي.. محمد من زمان هيج ومايتعدل لو يگعد ابوي من الگبور..

بالليل طبيت ارتاح اجه الخفر بمكاني.. فتحت التلفون خابرتها اريد بس اسمع صوتها..
جاوبتني هي وتضحك : الو منو..
صگر : انه يولي.. حتى مامنتبهة لرقمي..
دنوة : ها هلا بيك.. خير شكو ..
صگر : الف سلامة.. سمعيني صوتج دناوي..
دنوة : ليش اسم الله.. شنو اشتاقيتلي والله حلوة هاي.. چا ومرتك .. روحلها تريدك اكيد..
صگر : وجع شنو هلحچي الماصخ.. چم مرة فهمتج ماكو شي وهاي صديقة محمد.. دنوة حرام ..خلي مواقفي بين عيونج .. والله مااعير عدوي بس مايصير يولي انتي تصلين وتعرفين ربج يصير هيج..
دنوة : والله ماطول تزوج علي فإي يصير.. الله وياك..

سدته بوجهي..عمري حيخش الاربعين ولا مرة مديت ايدي على بنية.. بس لو هي جدامي وتسوي هيج اگلب الدنيا على راسها .. بكدما احبها بگدما تأذيت منها.. شمرت التلفون تكسر.. اجه واحد ضابط ..
-: ليش هيج سيدي..
صگر : وانت شكو.. قندرة انگلع ..
خلى وراح..

ماادري شلون مشت هلأيام وخلص دوامي.. ضليت افتر ببغداد .. فترة كلها انفجارات الوضع موزين.. فدوامي ديطول.. صار ٢٥ يوم بالدوام ..رجعت للبيت تخيلتها تطلعلي تضحك وتمايل بروحها جدامي.. حبيبي مشتاقتلك"
اصعب ايامي من بعد الايام التمرضت بيهن.. هلمرة هي بعيدة عني بإرادتها..

ضليت الفترة هاي كلها اكعد بالحديقة.. الشهر السابع حار وبوخة موطبيعية.. اكعد الصبح احير شسوي بس اريد ألهي روحي.. رحتلها تلث مرات ارجعها ماتقبل ..حتى ماتطلع تشوفني.. وانه المگابل صورتها لمن سافرنا .. لابسة بنطرون اسود وكفوف من جوه شوي..ضاحكة وكامشة بطرف اصابعها الشفقة دائرية وقميص جو الورك .. كلما اشوفها اگللها هلصورة تخبلين طالعة بيها.. حتى انطيتها فلوس گتلها روحي للمصور جوميها عجبتني.. بيومها اجت وجابتلياها.. گعدت على رجلي ومبتسمة.. : حبيبي دااحسك تچذب علي..
صگر : ها ليش يولي..
دنوة : شو مااحسني حلوة طالعة..
صگر : لا هذا العسل الاسمر هنا بشخصه الكريم..
دنوة : يعني حلوة..
صگر : طبعا حبيبي..

وراها بـ چم يوم كاعد بالهول وادخن..النفاضة متروسة لعينها .. فات محمد كعد جدامي يخابر ويضحك.. شلون محمل علي بگد الدنيا.. تمنيته يحچي كلمة اعرف شسوي بي .. ياما طيحني بمشاكل الها اول مالها تالي.. اوگفله وافزعله .. اگول اخوي والدنيا دوارة مااريد يصير شي موزين بعديت..
سده چان يعاينلي وبنظرة باردة : دنوة وين..
صگر : بيت خالها ماتدري..
محمد : اي ادري بس عبالي رجعتها..
صگر : گوا...كله من وراك.. گوم من وجهي لا ارگع النفاضة براسك..
محمد : انه شعلي تهد علي .. والله يالله .. هي طفلة شسويلها.. بعدين شلك بيها كلها مشاكل وجه نحس..

گلت هاي اجتني من الله..موعصبي وعندي خلگ يتمناه كل واحد.. بس بهللحظة نسيت كلشي ..گمت علي جريته من قميصه ضربته بوكس حلگه طگ دم.. دفرته وطلعته بره..
صگر : وين چنت تنام صارلك شهر.. روح ارجع نام هناك خلاشوف يانغل يلفيك بعد..

رگعت الباب وقفلته .. اجت امي خايفة وتبچي ..
الحجية : ها وك اطرد اخيك ليش يمة..
صگر : طلعيله يله.. يله روحي .. لو انه لو هو..احرگ البيت على روسكم وحگ الله..

اخذت المفتاح فتحتله الباب ودخلته.. اخذت السويچ وطلعت .. تمنيت.. هواي تمنيت.. امي گلبها رهيف على محمد تتعاطف وياه هواي.. ابوي چان يعرفه دوم تگله ليش ماتوكف لمحمد مو ابنك.. يرد عليها : هذا راس البلة.. وهو صدك هيج.. تعبني .. انه ملتهي بدنوة لمن جانت مريضة وهو يخابرني من مركز الشرطة تعال تكفلني وطلعني .. وغيرها وغيرها .. هسه دخل روحه ببيت دعارة وبالگوة عرفت..عاد وراها بيومين جايين الشرطة ماخذيهم..لو هو موجود ولاگي چا مسجون هسه .. بس انه وراه ماتاركه..

وراها بيومين گاعد يم عارف صاحبي.. خابرتني امي تريد شغلات للبيت.. گمت دااطلع حسيت بدوخة قوية ..كمشتني نص ساعة اذا مو اكثر.. بقيت گاعد ماكدرت اگوم..
اجه يمي بيده لبن وملح : ها خوية خيرك..خاف ضغطك نزل..
صگر : اي هي ماكو غيرها..
عارف : بوية دروح للدكتور..شوف روحك ضعفان غادي عودة..
صگر : اي اريد اروح .. ضغطي مديصعد صار اسبوع هابط .. حتى ماانام..
عارف : باچر أمرلك واخذك..هسه گوم شيحتاجون الأهل انه اوصلك..

گمت وياه..نزل اشترى چم شغلة ورجعنا .. ماانطيت خبر لأحد بس هو .. بحسبة محمد وبعد اغلى.. ثاني يوم اجه اخذني ورحنا لدكتور باطنية وضغط.. قاس طولي ووزني.. هو متناسق بس انه ضعفان .. چنت مية وخمسة.. هسه تسعين.. انطاني ادوية تصعد الضغط وتنظمه.. اخذت اول چم يوم وذبيته..

الغرفة هاجرها نهائيا..اذا اصعد بس ابدل وانزل.. طافرة روحي من الدنيا من وره دنياتي.. شكد الانسان أناني حتى تجاه البشر اليحبه.. شكد تحملت وصبرت .. وهي دقايق ماقبلت تسمعني بيها.. بالليل مگابل النفاضة والجگاير .. عارف يخابرني شواي ويروح.. صار عندي فتور لكلشي اشوفه ..اريد الحرارة الچانت بحياتي.. اريدها هي .. عصبيتها الماعندياها .. اكبر رجال مايتنازل التنازلته انه كلشي تريده يصيرلها..وهي بعدها ..

وبيوم ماادري شلون مرني النوم وغفيت والجگارة بيدي .. فزيت على ريحة حرگ.. طفرت من القنفة للباب .. التشيرت صاير علي جمر توه ديحترگ.. نزعته بالعجل وطفيت الجگارة .. صعدت فوگ اصيحها .. طبيت للغرفة مالگيتها .. اخذت التلفون خابرتها.. چانت بالثنتين بالليل ..جاوبتني رأسا.. بكدما چنت كاتم حسرة هاي الأيام بس هسه كلشي حچيته..

صگر : حبيبي .. بنيتي .. لاتحچين بس سمعيني .. والله مشتاگ لحسج يبعد طوايفي ..
حچت وچنها باچية : تعبانة مااگدر..اتركني على راحتي ..
صگر : صار شكد صابر..ابوية انتي يومي ماينحسب يوم بدونج..
دنوة : روحلها ..
بهللحظة الشيطان ركب روحي كلها مو بس راسي.. عطت بيها والدنيا ليل كلها نايمة : ادبسز مو مال احترام.. منين اجيج بعد فهميني.. شتردين .. انتي ليش عنودية نعلعلا رب العناد.. اگلج ماعندي شي وياها افهمي لاتسودنيني.. حتى محمد خابرج وحچتلج.. شفتيني ساكت ومااحچي گلتي ايييي هو يسكت ويتحملني.. يولي لاتستغليني وانه ماخليت مكان مافريتج بي بس تصيرين زينة.. سويتلج كلشي تردي واذا تريدين اكثر اسوي ..

ايدي رجفت من العصبية.. حسيت بحرورة نزلت من خشمي لحلگي.. زفارة الدم صارت بحلگي .. صحت : ارتاحي رعنة.. ماعرفت اتصرف وياج الظاهر..

شمرته حتى ماسديته..نزلت للحمام اغسل والدم يكت.. ضغطي صعد.. امي وخالي ومحمد گعدوا على صوت صياحي .. غسلت وضليت متمدد ورافع راسي.. اخذت من العلاج شوي استعدل .. كمت بهدومي حتى مابدلت..رحت لأمي البشر الوحيد المستحيل يأذيني.. كاعدة ودتسبح توها مصلية .. تمددت بالگع وراسي على رجلها.. باستني منه وتمسد بي..
كمشت ايدها : يمة شسويلها.. تعبتني ..
الحجية : اخابرها انه باچر يمة خلصت سوده علي .. شوف شگد ضعفان حبوبي..
صگر : لا عوفيها..مرتاحة هناك.. وانه اصيحلها بنيتي اگول علمتها على طبعي شلون مااحمل ع البشر ولو كلمة..
الحجية : شابة طايشة.. هسه تعرف غلطتها وتجيك يمة حبيبي انت ماتتعوض وداعة عيونك..
صگر : ماادري هي داست بمصاريني بعد مايهم ترجع لا.. يمة اقري على راسي اريد انام..
گامت تقره وتمسد بشعري.. صار تلث ايام گاعد .. فغفيت ماادري بروحي ..

دنوة : بقيت ع الوضع هذا شهر..شهر كامل لا اخابره ولا شي.. بس هو يخابرني .. مرتين اجة بهلشهر يكلي رجعي وما رجعت بالليل يكعد يدزلي رسايل..مشتاكلج واحبج..اسف خاف تأذيتي من جريت اذنج..

ما تنعاد بس ارجعي والله طالع بالحديقة مااكدر انام بالغرفة وانتي ماكو..وهاي هيج كل يوم يدزلي..بس اقراهن مااجاوب لحد ما بيوم كعدت الصبح مدري شبيه..مختنكة من زردومي واريد ابجي بس ماكو سبب معين..بس رحت تريكت اجيت ع التلفون اقره برسايل صگر..هو لا كل ولا مل.. كل يوم يجيني بحجي جديد..حتى محمد خابرني وما جاوبته.. خابرني مرتين او تلاثة وبعد ماكو..قريت الرسايل من يوم اجيت لبيت خالو لحد هسة..اريد ارجع بعد ما اتحمل هلكد..بس بنفس الوكت ما اريد..شلون هيج..ادور هو شلون يحجي.. هي صح رسالة بس من اقراهه اتخيل صگر مقابيلي وديحجي.. نبرة صوته وشكله من يسولف وكلشي..اخذت نفس وكمت لميت الفراش بعدين رحت وياهم بالمطبخ..شوي واندكت الباب وحده مره جوارينهم اجت..كعدت بيبي ومرة خالي وياهه وانه هم كعدت ما اريد اضل وحدي واختنك..

بقت للظهر بعدين راحت..كمت ويه عذراء سويت الغده.. تغدينه وكملنه طبيعي مثل كل يوم..مليت من الروتين كله نفس الشي مطبخ هول نوم..مرتين طلعت وي بيبي للسوك هيج بس تمشينه ومره طلعت وي عذراء تسوي سونار لأن حامل..وطلع ولد.. الفرحة ملت عيونهه..حتى سيف..مبين يحبهه لأن يداريهه على كلشي..يحط اكل جدامهه..لو بالليل من يجي من الشغل يشوفهه كاعدة دتتفرج تلفزيون وملانة يكللهه لبسي خلنطلع تذكرت صگر نفس الاسلوب وبعد اكثر..سيف يستحي يحجي شي جدام امه لو ابوه..يعني يهتم بالتصرفات.. صگر بكلشي حجي واسلوب وتصرف..اشتاقيت لحضنه ومن يجي يشوفني اسوي اكل يكلي كافي تعبتي من الطبخ امشي نطلع واجيب من بره..بالليل كلت اخابره بعد مااكدر..بس شلون.. اكلة هو يجي ياخذني..يعني زعلانة وارجع بنفسي..خلانتظر هو يجي مرة اللخ وارجع وياه..

اجه الليل ورجع نفس القرص اشتغل..عندي مقطع الاغنية مال اسألي عني الليالي..نصيت الصوت وكعدت بالركن بعيد عن بيبي واسمعها..فرفحت بجي..ادور متغطية ومخليه اللحاف يم حلكي علمود ميطلع صوتي..وانه لو بيدي ابجي بصوت.. ما ادري ليش حاسه بي شي..هذا الشعور ما يجيني بس من يريد يصير شي..خاف مريض..حتى مادزلي شي..كلبي حيطك والله تعبت بعد شلون اضل هنا..حتى مرة خالي بدت تثكل وجهه علي..حيصير شهر ونص..ادور اخر مرتين اجة حتى ما طلعت شفته..وهو مستمر ما مل..يمكن يحجي الصدك.. او اكيد مو يمكن..بعد ما اكدر..لازم اخابره باجر .. مسحت دموعي وكمت لمكاني..تمددت وغفيت..

ثاني يوم ردت اخابر مكدرت..خفت يطلع بي شي بعدين اضل الوم بروحي وره يومين جنت بالمطبخ ويه عذراء..سوت الغده وانه غسلت المواعين..كملت ورحت للغرفة..

شفت التلفون داك..منو..خالة..ام صگر..شعجب.. ادور داكة مرتين..رجعت دكيت عليهه..بالعجل جاوبت..
الحجية : هله عيني..همزين ذكرتي احبابج..
شكد فشلت..حتى معرفت شكللهه : اسفة بس تدرين شلون مقهورة من صگر..شلونج..
الحجية : والله انه بخير..بس صگر لا..
دنوة : ليش شبي..
الحجية : مريض حالته حاله..حبوبة هو هيج اليكطع.. شمسويلج مو خطية..حتى جلنار طلكهه جي أذتج..وهسه انتي هيج تأذينه..هو حجالي كلشي..ومحمد همات.. هاي المره محمد جان يعرفهه..طايش واغبر شسويله..من حاب هاي البغدادية عايفهه..هي من جان يروحلهه مبحوشة بتلفونه ولاكيه رقم صگر..كالت خاف يصير ما يصير عندي واحد اخذ فلوسي منه..وجلبت بصگر..هذا الاول والاخير..

شفتي انه بالبداية شلون وكفت وياج وكتلة لا تضربهه خطية اعصابهه تعبانة..بس من حجالي وعرفت السالفة كلت مالهه داعي تسوي بي هيج..حتى بالليل مينام..مكضيهه جكاير وكاعد بالصالة ميصعد فوك..شوكت ناوية ترجعين..
بلحظتهه لساني انكعد..يعني ما ادري على شنو اجاوب.. والله حسيت بي شي..ما يجيني هلشعور بس من اكو شي.. كتلهه : شبي مريض..اخذتي لدكتور..
الحجية : لا عيني ميقبل معند..محمد جابله دوه من الصيدلية اخذ حبايتين وشمره..
دنوة : زين حرجع باجر بس لا تكليلة..
الحجية : ماشي..خالة كبري عقلج انتي كبرتي..يعني شصار لو سامعه كلامه من البداية..تره صگر كبر..مو صغير ويكعد يتحمل..هو يحبج مو دائما اكلج..لو ما يحبج جان عافج وراح على جلنار ويصير عنده طفل منهه..صح لو لا..

دنوة : صح..
الحجية : يله خلص بعد..انه دا احجي هيج الج ولصگر.. مو تكولين ابنهه وتوكف وياه..بس حاجي الصدك غير.. يله حبيبتي راجعي نفسج وارجعي للبيت..هذا بيتج وهذا رجلج.. ابني واعرفه اذا يحب شي ميعوفه..وانتي مو أي شي..
دنوة : ان شاء الله..ديري بالج علي..مع السلامة..سديته صارت بيبي بوجهي..الظاهر جانت واكفة يم الباب من احجي ما انتبهت عليهه لأن دايرة وجهي..ايدي كامت ترجف صدك بعد ما اتحمل أي شي..اجت يمي تحاجيني..
بيبي : شبيج اشو مخطوف وجهج..
دنوة : ماكو شي بيبي..ليش شبيه..
بيبي : دسولفي شبيج..اجر منج الحجي جر..
دنوة : شحجيلج..صگر مريض..كله بسببي..انه عاندت وهذا مو طبعي..ما اعرف اعاند شجاني سويت هيج..

بيبي : يااا صخام..شبي خطية..
دنوة : شمدريني ما كلتلي..باجر حرجع..اليوم الفجر اخلي خالو ياخذني للكراج شوف هو يرجعني ما ادري..
بيبي : خطية..حاجي خالج شوفي يرجعج هو خوما ترجعين وحدج الفجر ما يصير..
دنوة : بيبي انه صوجي..اهو شلون حضل الوم بروحي..
بيبي : حبيبتي شتسوين..قضاء وقدر..و الي مثل حالتج يمكن يسوون الاكثر..ارتاحي وباجر رجعي شوفي بعد كافي هو هم خطية..وانتي همات..
دنوة : ان شاء الله..ابتسمتلي وراحت..ضليت اليوم كله الوب لحد ما بالليل رجع خالو من الشغل وحاجيته..كتله اريد ارجع للبصرة بعد ما اكدر اضل اكثر وانه اسفة خاف ثكلت عليكم
عمار : لا خالو صدك جذب..هله بيج بكل وكت..ارجعج اني ماعندي شي..الصبح اكعد من وكت دائما..

دنوة : بكيفك..
عمار : يله هاهية..الصبح بالسته الكاج جاهزة..
دنوة : ماشي..ابتسمت وتشكرت منه..رحت للغرفة حضرت ملابسي وكملت كلشي..كمت ع التلفون اكلب بالرسايل ودموعي بعيوني..انه اكول صگر قاسي وما يلين..طلعت انه هيج مو هو..ما ادري شلون غفيت..كعدتني بيبي بالخمسة ونص كمت بدلت جان يجي خالو..اخذني ورجعنه للبصرة.. بين ما وصلنه صاير الظهر..يعني وكت غده..ماقبل يفوت بعدين قنعته..يوم جمعة فالكل كاعد محمد والحجي.. دكيت الباب طلعلي محمد..سلمت علي عادي..ما يهمني المهم اريد اشوف صگر شلونه..شفت الحجي هم سلمت علي ..خالو كعد وياهم بالصالة..وانه رحت على خالة..حضنتهه وبستهه.. صار شكد ما شايفتهه عبالك سنة.. متعودة كل يوم اصبح عليهه.. كتلهه : صگر وين..شلون صار..

الحجية : موجود بغرفتي بس نايم يمكن..الليل كلة كاعد راسه يوجعه..بعده والله مديصير زين..
دنوة : هسة اشوفة..رحت للغرفة على كيفي..طبيت وسديت الباب..كعدت ع الحافة وايدي على شعره امسح علي بهدوء.. عيوني غوركت بعد ماكدرت اشوف..انقهرت على منظره وشكله شلون تعبان..نايم صفح ومكرفص روحه..راسه حار وايده همات..تقربت بسته فز شويه بس مغمض عيونه..
صگر : يمة ما اريد سم..ما اريد اكل..
هو كال هيج وانه طكيت بجي..حضنته وابجي..شكد انقهرت كلش بسببي..ردت ارجع كرامتي بعدين تمرض..كمت ابجي واحاجي : اسفة..اسفة والله بعد ما اعيدهه..ما اقصد يصير بيك هيج..بعد ما اروح وروح اهلي..
هو هلكد ما تعبان من الصخونة بس فتحلي ايده حتى ماكدر يتحرك..بس حاجاني بهمس..

صگر : ميت شوك وروح ابوي..منتظرج تحنين..
حضنته وبسته..ماخليته يحجي هو تعبان خطية..شوي واجت خالة..عدلت كعدتي وهو كامش ايدي..
الحجية : ميقبل ياكل مو..
دنوة : اي..
الحجية : بله عبالك مراهق..شلون بي..
دنوة : هسه احاجي لتخافين..
الحجية : يله شوفي..هاي صبيت اكل للحجي ومحمد وخالج يبقى لو حيرجع بنفس اليوم..
دنوة : لا كال يرجع..
الحجية : خوش..عود صبيلج اكل..حاطته ع الطباخ..
دنوة : ماشي..راحت وردت الباب وراهه..تقربت همست يمه : امشي نصعد فوك..بيك حيل لو متكدر..
صگر : اي..

ابتعدت شوي وهو كام..اول ما وكف صاح راسي.. كمشته من ظهره وصعدته فوك باية باية..تمدد ع الجرباية ونزلت جوه صبيتله اكل ورحت على خالة كتلهه وين الدوايات مالته.. كالت بالكاونتر ليفوك..اخذتهن وصعدت..عدلت كعدته وخليت الصينية ع الكومدي..كام ياكل شوي شوي..انطيته الحباية هو مكتوب عليهه شلون وشوكت ياخذهه..بس خلص تمدد.. اخذت الصينية ونزلت جوه..كتلهه لخالة بس يروح خالو كليلي.. عيب يروح وانه فوك..كالت ميخالف..صعدت نزعت الصاية والشال ورحت يمه..بسته وامسح على شعره : ليش هيج ضعفان.. كله علمودي..وانه قهرتك ما استاهل..
اخذ ايدي خلاهه على صدره ويحجي بهمس كوة تطلع من الكلمة : ماكدرت..يعني اجيج من كل مكان وترفضيني حتى محمد خليته يخابرج ومجاوبتي..
عاينت بعيونه ودنجت : اي ادري..

اسفة بعد ما اعيدهه..احبك وما اكدر بدونك..كلشي سويته جذب بس جنت مقهورة وتعبانة نفسيتي..
صگر : ادري..انه هم احبج وداعت عيونج الاحبهن..
ابتسمت وخليت راسي بحضنه..اخذت نفس ترس جسمي.. مشتاقتله واكابر..بس من شفته مريض سكتت بعد ما اكدر اكابر..ما توقعته هيج مريض..عبالي شي بسيط.. هذا كله علمودي..ما ادري شكول بعد..مرن يومين..داريته واكعد وياه خطوة بخطوة..انطي العلاج بوقته حتى الاكل اصعدليا فوك..ميكدر ينزل رجله توجعه..

اكعد الفجر على صوته مصخن ويحجي ميدري بروحه.. اروح اسويله كمادات لحد ما تفكه الصخونة وانام بالكع بس راسي بحضنه..وره هليومين بالليل تقريب الدعش نزلت اجيبله مي سمعت صوت الباب تندك..جمالة مو دكة عاديه.. مال واحد مستعجل..شفت الحجي كام طلع يفتحهه ومخبوص..منو هاي ياستار....

يتبـــــــــــــــــــــع...........................