اسألي عني الليالي

البارت ٤٦

                اشلون اوصفك ..
وانت كهرب ..وآنه گمرة عيني دمعة ليل ظلمة ..

    اشلون اوصفك ..
وانت دفتر .. وانه چلمة ..

يلـّي ما جاسك فكر بالليل .. وما جاسك سهر ..
يلـّي جرّة سمه بعينك .. خاف افززها من اگلك ..

آنه احبك .. آنه احبك
مامش .. بمامش .. وللمامش
يا ميزان الذهب .. وادغش واحبك

الـبـارت السادس والاربـعـون................

باجر احاجي يعني احاجي..لو مدري شيصير.. بعد يومين ويروح للواجب..ادور يروح وهو زعلان مني وماخذ بخاطره .. عفت كلشي وراي وغفيت..كعدت الصبح على صوت رائد
رائد : كومي احاجيج..
جر الغطى مني..عاينت وراه..اخلاص واكفة وعيونهه حمر مبينه باجية..انه ما نايمة زين منا ..ومنا اجه كعدني من يوكت جانت بالعشرة وشويه..شافني مدا اكوم صاح بيه..
رائد : مسمعتي لو شلووون..
دنوة : شكو شبيك خوفتني..شبيهه اخلاص..شمر التلفون بحضني وصاح بوجهي..
رائد : هاي شنوووو..شمسويهههه..
كمت ارجف..اول مره اشوفه هج عصبي علي..كتله : شنو مدا افتهم احجي شبيك..

كمت من مكاني رحت بالزاوية..خفت منه..كام يصيح كلب الدنيا..انه كل هذا وما مفتهمه شديصير..لحدما حجى..
رائد : شلووون تخلين اخلاص تخابر هذاك السكييير.. لاااا وفوكاهه تخابري من تلفونج..هي هاي الثقه..
شال التلفون هطره بالكع..صار مية وصله..ضليت ساكتة محجيت..شريد احجي..ما اعرف شديصير..
رائد : متحجيييين..لا تفورين دمي..مو احاجييييج..
دنوة : والله ما اعرف شدتقصد..انه شعليه..
رائد : انتي بمكان ما توكفين وياهه وتقنعيهه تنسى هذاك السز..جاية تكليلهه ابقي وياه و رائد حيقتنع..وانه اكوووول ليش لحيتي علي اكثر من مره..وفوك هذا كله مخابرته من تلفونج.. عرفه ولفه..هسة لو ما شايف المكالمات جان كلت جذب بس شفتهن بعيني..

كام يصيح واجة يمي عصبي نار..كمشني من تشيرتي وكاز على اسنانه..انه بعد معرفت شسوي من الحجي السمعته .. شجاب رقمه بتلفوني..شوكت صار كل هذا..ادور رائد شيقنعه ما ادري..دموعي كامت تشرح حالة الخوف والتوتر الطبيت بيهه..خليت ايدي على وجهي ومكرفصة روحي اخاف يضربني..صحت : لااا..الله عليك لا تضربني.. والله مسويت شي..وروح ابوي..جذب كلشي شفته جذب وداعتك.. تقرب مني وانفاسه سرييعه..كلت حيجيني راشدي..
رائد : حسابج بعدين..اعرف شلون اتصرف وياج..
عافني وراح على اخلاص..اخذهه وطلع سد الباب وراه.. او ركعهه بالأصح..هسة حتلو اريد اشوف الرقم التلفون تفلش مابي مجال بعد..ما اريد اضل كاعدة..خلاشوف شكو

طلعت من الغرفة وكفت يم الدرج من فوك..بحيث الصالة كلهه بينت و رائد واكف بنصهه يصيح ووجهه احمر من العصبية
رائد : لج انتي جاهله..مراهقهههه..وتجي دنوة تعلمج .. هسة لو صغيرة جان كلت حقهه وينلعب بعقلهه..بابا شكبرج تصيرين بعد متكليليييي..بس والله..اذا طلع الحجي هذا كله جذب وتلفيق من تلفيقاتج..تشوفين غير شي مني..
اخلاص هي وتبجي : وليش دا اجذب عليك.. دا اكلك هج صار شتريد اسويلك بعد..وانه اعتذر والله بعد ما اعيدهه ولا اسمع كلامهه..هي ضلت تحجي براسي..تكلي حاجي خطية انتي ومبين تحبي..لا تحرمين نفسج منه..
انه من سمعتهه الحرارة صعدت لراسي..نزلت بدون شال كمشتهه من دشداشتهه وادفع بيهه..كمت اصيح : لج جلبههه انه وين حاجيه هج..هاااا تحبينه وتردين تذبيهه براسييي .. ادبسززز جان استحيتي على نفسج..

الله لا ينطيج حقيرهههه..الله شيسوي بيج بعددد..ايدي كامت ترجف وشفايفي..مو خايفة..بس حسيت اعصابي فلتت مني بعد ما اكدر اتحكم بيهه..حسيت على رائد فك ايدي منهه .. خزرته وعتيت ايده : اذا تكمشني اسوي شي نفسي.. عوفني احجي عوفنيييي..هاي جذابه..جذابهههه..تريد تخرب بيناتنه هي وهاي الحيه..وأشرت على جلنار..
جلنار : والله ماكو غيرج الجذاب والماعندة مبدئ..تبوكين من اهل البيت..اني مشايفه هيج وحدة..
دنوة : شبكت لللللج..لا تضلين تمسلتين..انه مو بحالج ولا جاية يمج..هاي خالة موجودة انه حجيتلهه كلشي..
جلنار : لتخافين كتله لرائد كلشي..هو حيتصرف وياج .. الرب يعلم..يمكن اذا بكتيني حتبوكي اله همات..
الحجية : حبوبة لا تجذبين الجذبة وتصدكيهه..حتلو حجيتي لرائد تره يعرفهه شنو..عاشت يمنه ٣ سنين..شنو هسة تفنطت تبوك..وعيب عليج تكولين عليهه هشكل..

دنوة فقيرة وماعدهه هج سوالف..هاي من جوه راسج..
دنوة : وانه اكوووول ليش مغيرته علي..ياجلبهههه محشيه راسه افكار سم..سم الهاري بعينج ياحقيرهههه..الله لا ينطيج ولا ينطي كل واحد اذاني..لج صار تلث سنين شوفتيني الويييل انتي وهاي..هاييييي..اخلاص الي ماعدهه احساس .. كل مره اصبر واكول لخاطر رائد ما اريد تجي حجاية من ورايه بس الظاهر انتن مو مال احترام..
اخلاص : شفتتت..شفت لسانهه..هي هاي على حقيقتهه طلعت ..بس جدامك تتمسكن عبالك فقيرة..
دنوة : هاااا طلعت اتمسكن مووو..جريتهه من شعرهه كطعته بيدي..ذرة اعصاب ماضلت بيه..تهسترت..اجه رائد كمشني من خصري..ايدي كامت ترجف كبل كعدت بالكع متحملت ابقى واكفة اكثر..كمت ابجي..

هي دموع بس تعصر گلبي..تعبت منهم..صار سنين نفس الموال نفس الحجي..بس الافعال دتزيد..يعني تريد تسويني بواكة..ليش..خوب جنت عايشة وي عمامي ثنين والفلوس يجيبوهه جدامي وما امد ايدي..شسوي بالفلوس.. شسوي بالذهب.. رائد ما مقصر وياي بشي..واخاف الله .. عساهه بالحرك ايدي اذا مديتهه على شي ما يخصني..

اجه دنج يمي ورافع راسه يحاجيهن..
رائد : انه سمعتج بس اعرف الصدك وين..فلوسي بالكنتور اروح للواجب سبوعين واجي الكاهن على حطتهن..حتى ما مغيرة مكانهن..مو تجين انتي تكليلي باكتني..هاي السالفة طبت منا طلعت منا..
انداريت علي كمشته من تشيرته : جا شنووو..هااا شنوو .. ليش متغير علي وما تعاين بوجهي..شمسوياتلك هذني .. انه ابجي ومنفعلة..خزرني وحط راسي بحضنه..
اخلاص : هاي بمكان ما تعاتبهه تجي تحضنهه..
رائد : مالج حك تحجين كلمة زايدة..لا تسوين روحج فقيرة .. هي مريضة واعصابهه متوترة..
كومني وأشرلي اصعد فوك..عفته ورحت فوك..سديت الباب وكمت ابجي..احس الدموع نار واطيح على گلبي مو على وجناتي..شيريدون مني..

حتى رائد غيرو علي..ليش هشكل..ادور شلون ملفقات تهايم اكبر من راسهن براسي..وانه لا بيهه ولا عليهه..شلون اقنعه مو انه مخابرته..البارحة عفت التلفون جوه اليوم كلة ما كمشته لحدما صعدت فوك..اخذته ورحت نمت ما فتحته حتى .. غميت روحي..امداية شكد ثوله..ثولههه..بعد كل المريت بي ابقى ما اركز وما ادير بال..كمت ع التلفون لميت غراضة بلكت يفتح .. انه ما اريده اصلا..بس اريد اشوف الرقم هذا منو وشوكت داكات علي الخاتونات..يالله افتح الله يخليك..اشتغل ورجع طفى..رحت خليته ع الشحن وضليت افتر بالغرفة.. بلكت يطلع مابي شحن ..شوي وسمعت صوته فتح..رحت كمشته جان يطب رائد..ضليت صافنة بوجهه..بدون مقدمات كتله : والله مو انه..هاك شوف..هاك خابره كلة منو خابرة من هذا الرقم .. صدكني ما اعرف منو مسوي هج..ما اسوي شي من وراك وروح امي وابوي..

عكد حواجبة واجه اخذه مني..كام يكلب بالارقام..
رائد : لا تفكين حلكج..خلاشوفه شيكول..
خابره وفتح الحاكية..دك اول دكة جان يجاوب..كال الو دنوو ( مو دنوة ) شلونهه اخلاص..انه گلبي كام يدك سريع كمت ارجف متت خوف..رائد سده بوجهه..كمشني من تشيرتي ودفعني ع الجرباية..كام يصيح كلب الدنيا..
رائد : لج شسويلج هسه..شسوييييلج..اكتلللللج .. فشلتيني الله يفشلج..متستحيييين..
ضل كامشني ويصيح بوجهي..كمت ابجي ومخليه ايدي على وجهي اخاف يجيني راشدي..كتله : والله جذب..وداعت طولك جذب..ما اسوي شي وراك والله..
رائد : لج شفته بعيوني..وسمعت باذانيييي..تردين اجذب روحي..شوطتيني حرام عليج..
دنوة : رائد والله....
رائد : اشششش لج لا تحجين شي..حطلع وما اريد اشوفج بعد..ديري بالج تصيرين بطريقي..ما اريد امد ايدي عليج.. خوووش..فهمتي لو لاااا..

وخر ايده وراح اخذ التلفون..كمت يمه كمشته من ايده ودموعي تجري ما سكتت : والله جذب..عاينلي بطرف عينه وراح .. زدت بالبجي ومكرفصة روحي بالزاوية..حتى رائد صدكهم .. الله لا ينطيج اخلاص..انتي وجلنار..شسويتو بيه عساكم مزوعين العافية..ليش هج..يمكم انه..مسويتلكم شي.. كمت احجي وي روحي..راسي كام يدك من الوجع..هلكد ما بجيت وصيحت بس كاتمة صوتي بايدي..رحت تمددت ونمت والدموع بعيني حسبي الله ما اكول غيرهه..نمت وما ادري شكد يله كعدت .. بس شفته واكف يم الجرباية وشابج اديه..مركز نظرة علي من فوك ليجوه..بس شافني كعدت دار وجهه..راح ع الكنتور يحضر جنطته..هو مو اليوم يلتحق..ليش من هسة.. ضليت اتابع حركاته..ما حجة ولا كلمة..حتى صوت انفاس ماكو

كمت من مكاني ورحت يمه..بعدني محجيت شي..
رائد : لا تجين..من اصير بمكان لا تصيرين يمي.. باجر الفجر اطلع لبغداد..عساني بالموت..
دنوة : لاااا..شنو هلحجي..
دار وجهه علي هو وخازرني : يعني زين اخلاص تكلي مرتك تخابر من وراك..هااااا زين..لج لوما احبج جان دفنتج بمكانج روحي من وجهي..لا تشوفيني خلقتج..
بس سكت طكيت بجي..اخذت الشال ونزلت جوه.. شكد صار حاد وياي واسلوبه جاف بس ولا مره حاجاني بهلنبرة .. حسيته مكسور..رحت يم الحجية بغرفتهه..سديت الباب وقفلته ضلت صافنة علي..رحت يمهه..حضنتهه وابجييي .. دموعي تنزل عشرة عشرة..كمت ابجي واشهك حتى مكدرت احجي .. كامت تمسح على جتفي وتهدي بيه..
الحجية : خيرج يمه شبيج..حاجتج اخلاص..

دنوة : ياريت اخلاص ولا رائد خالة ماشفتي شلون حاجاني كرهني بعيشتي..يكلي لا تشوفيني خلقتج..خالة والله ما مسويه شي..جذابة اخلاص..والله جذابة..ليش ما حجيتي شي الله يخليج..ليش خليتي يصير هج وياي..
الحجية : والله حاجيته يمة..شريد اسوي بعد.. كتلة هي اختك ما تجوز ودنوة تلفونهه البارحة ضل بالمطبخ..قابل منو عندج انتي..قصدي منو يخابرج..
دنوة : يعني هو سالفة علي ما صدكهه..هاي شلون يصدكهه شلوون..والله ما مسويه شي بيمن احلف بعد..
الحجية : ادري مصدكتج حبيبتي..هسة من يهدى هو يجيج يحاجيج وتتفاهمون.. رائد يحبج بس الصار مو سهل .. تذكرين من صارت سالفة علي..كتلج انطي فترة ويرجع مثل كبل..ذيج المرة انه حجيتلة وهدأ..

هسة لازم انتي تحاجي..ربج ما يعوف احد مظلوم صدكيني .. حيروح للواجب ومن يرجع حاجي..ان شاء الله يقنع
دنوة : واذا ما قنع شلون..ما اتحمل هج اسلوب..وهو معلمني ع الدلال ويحاجيني بإسلوب هو يعرفه..
الحجية : لا لتخافين..ابني واعرفه..گلبة طيب بس عصبي
اخذت نفس وسكتت محجيت شي بعد..ضليت كاعدة يمهه مطلعت من الغرفة..خفت يشوفني ادور يرزلني..بس بطني كامت توجعني جي ما ماكلة..كمت للمطبخ صبيت اكل وكعدت بالكع اكل..البيت صنطة فد دور..حتى اخلاص وجلنار ماكو مدري شعجب..كملت ورحت للصالة فتحت التلفزيون وكعدت اتفرج..ربع ساعة وفات رائد يلبس بالساعة مشافني .. رفع راسه خزرني وطلع..عيوني دمعت من الموقف..دنجت بعد محجيت شي..

وراهه جان تجي اخلاص..كعدت ع الكرسي مقابيلي
اخلاص : ها مبين متزاعلين..
دنوة : وانتي شعليج بكلشي حاشرة روحج..
اخلاص : لا بس دا اكول..الله يهنيكم شريد منكم..
دنوة : ماعوزج بس تريدين شي..اخذتي كلشي مني شتردين مني متكليلي..هاي جي شفتي ماعندي احد كمتي تحجين شيش بيش..عوفيني اعتقيني الله ينطيج..
اخلاص : كتلج لا تخلين كورتج وياي..قنعي رائد خليقبل بطارق وماقنعتي..استلمي التستحقي عيوني..
دنوة : انه شكو..هو هذا التحبي واحد سرسري..فوك ما خايف عليج وما يريدلج الشينه تجين تسوين بي هج..ميستاهل اخت مثلج..انتي حيوان مو اخت..
اخلاص : لزمي حدودج لا اعرف شسويلج..خفت هج كعدة وي وحده مثلج..وجه البومة وجهه..

عافتني وراحت..شكد اكره هاي البشرية..ذاك اليوم انقهرت عليهه من شفتهه منهارة وتريد تصير يم هذاك اليحبهه .. امداك يگلبي..تنقهر ع الكل وما تنقهر على حالك وحال صاحبتك..شوي واندكت الباب رحت افتحهه..اجه الحجي كامش بيده علاكتين ما ادري شنو بيهن..هو ما جان موجود الصبح وكت اللغوة..فمن شافني ابتسم..
وائل : شلونج خالو..
دنوة : الحمدلله الله يسلمك..تعال فوت..اخذتهن من ايده وطبينه وحده اخذهه لغرفته والثانية بيهه علبتين حلاوة..خلص اليوم لليل و رائد ماكو..ساعه ثنعش ورحت يم خالة..كتلهه بخوف : خالة شو رائد ما اجه..ضل بالي..
الحجية : هسة يجي..خابرني كال اتأخر..
اخذت نفس وزفرته : كله من وراي..
الحجية : لا حبوبة انتي شعليج..روحي نامي هسة يجي ما علي شي..الوضع امان..

دنوة : ان شاء الله..عفتهه ورحت فوك..لملمت الغرفة ورحت رتبت الكنتور..لكيت القرص مالت الاغنية بين ملابسي..ابتسمت وانهضمت بنفس الوقت..اكيد حيفهمني..هو يحبني والله وحيعرف ما غلطت..شلون اسوي هشكل..احبه وما اشوف غيره بالدنيا كلهه..الله كريم..ما اريد احاجي هسة لأن محيسمعني اكيد..هج ححجي لروحي..رحت تمددت بس ما يجيني نوم .. ضليت اعاين للساعة..الدقيقة بساعة..لحدما غفيت .. كعدت الفجر لكيته ماكو..گلبي كام يدك سريع..خفت يكون بعده لسه ما جاي..نزلت بالعجل حتى معاينت جدامي.. بس حسيت انطخيت بي..اخذت نفس طويل كتله : ضل بالي عليك..
رائد : مابيه شي..جنت جوه..
عاينت بعيونه ثواني ودرت وجهي..شكد بارد..صعدت فوك اخذت المخدة وغطى من الكنتور ونمت بالكع..

ما انتبه علي دا اشوفه..غير ملابسة وطفى الضوه..راح ع الجرباية يدخن..يشعل وحده ويطفي اللخ..حسبتهن من صوت الجداحة اربعه لو خمسة..اخر شي حجى..
رائد : تعاي نامي هنا..
دنوة : ما اريد..مرتاحة..
رائد : دا اكول نامي هنا..لا تعاندين..
كمت تمددت ع الحافة ودايرة وجهي..ضليت على نفس الوضعية لحدما نمت..كعدت الصبح ما لكيتة..بس ملابسة ع التعلاكة..كمت ضميتهن ورحت غسلت وجهي ونزلت جوه .. جلنار شافتني جان تبتسم بطرف شفافهه..مفهمت حركتهه هاي..اكيد سالفة تعبانه من سوالفهه..طبيت للمطبخ اكل شي جان تجي هي واخلاص..يتهامسن بيناتهن والضحك بفلس .. هاي اخلاص والله عينهه كوية..

يعني اخوج شايفج تخابرين وانتي عادي ولا كإنه..شنو من نفسية عدهه هاي..خلص اليوم عادي..الحجي شكله داري بالسالفة لأن وجهه ثكيل علي..بالليل صعدت انام واتخيل رائد بالغرفة البارحة من كلي لا تشوفيني خلقتج.. دموعي نزلت بدون ما احس..ضليت ابجي لحدما تعبت..وهاي هج مشت الايام..جلنار واخلاص لازكات بيه..كلساع ذابات حجاية تغث الماينغث..دورات احجي وارد..دورات اسكت مابيه حيل احجي بعد..اعصابي تلفت وانه انتظره كل يوم بلكت يكول لخالة اريد احاجي دنوة لأن تلفوني ماكو اخذه..بس هي اطمني علي تكلي زين بس يكول اطول هلفترة.. هي كالت هج وانه بجيت بجي بحركة..من وراي حيحرم روحه من الراحة .. شدعي عليج اخلاص..عساهه بحظج وبختج..اشو هي صارت هاي السالفة وهي سكتت بعد ماجابت طاري..

شكد حقيرة واكبر حية عرفتهه بحياتي..همزين بلش دوامهه وكامت تولي نص اليوم ما اشوفهه..ترجع تعبانة بس تاكل وتنام ما اشوفهه بس بالليل دورات تجي تكعد تكول ماعندي محاضرات مهمة باجر..محمد هم رجع بس محد حجالة شصاير.. هم هو تعبان بحال هاي السوالف..اصلا الموضوع شبه تقفل من ناحية اخلاص..ولا تجيب هذا الطاري بس تمر من يمي تكلي سودة علي ما يحاجيج مو..اي هو انتي شمعة فكر متعيشين بدون مشاكل..اكوم اتعارك وياهه لحدما اتعب واعوفهه..هي ما تتعب..عدهه استعداد تبقى للصبح على نفس المنوال..عدهه قابلية فضيعة..كبل لا يرجع رائد بيومين صعدت للسطح لميت الملابس وعزلتهن..خليت مال جلنار وطه على صفحة اخر شي نزلت واخذتهن وياي..بباب الغرفة واسمعهه تخابر وتضحك..

جلنار : اي زينة يمعود شبيهه قابل حتموت..ماشي.. يله اروح اسوي اكل لطه..مع السلامة..
فتحت الباب وطبيت جان تجفل..
جلنار : وجع..هو هج يفتحون الباب..خبال حتى خبال..
دنوة : ويامن تحجين..
شالت التلفون بيدهه وتأشرلي بي : ويه رائد عيوني..
دنوة : رائد ما يريد يحاجيج..جذابة ويامن جنتي تحجين .. احجي الصدك لا عبالج تضوجيني..
جلنار : وليش حتى اضوجج..منو انتي مثلا..اني الاصل حبيبتي وانتي الهوامش..اصلا ذاك اليوم لعلمج من رائد تأخر بالرجعة جان يمي..بقينه كاعدين للفجر بس كال ما اكدر ابقى بعد..اروح يمهه فوك خاف تسويلي مشكلة مالي خلك المزعطة..شفتي..انتي زعطوطة مو اكلج..يارب عن قريب واكلج حامل..وانتي تكولين لرائد..

انه مثل واحد ضربوه على راسه بحديدة..بحيث دخت دوخة فضيعة..هو صحيح تأخر ذاك اليوم بس كال جنت جوه .. وانه شلون ما انتبهت على ملابسة..حرارة جسمي كلهه صارت براسي..كمت ما اشوف جدامي..رحت عليهه كمشتهه موتتهه شبعتهه دفرات واضربهه راشديات..جريتهه من شعرهه .. لعبت بيهه فلك..هي ما تخيلتهه هلكد ضعيفة..ما كدرت تسوي شي..كمت ادفرهه واحجي : لج جلبهههه..شتردين منييي هاااا شترديييين..الله لا ينطيج حقيرة..انتي ولا شيييي .. دتفهمييين..لا تحاولين تثبتين وجودج على لا شيء..كمت منهه وهي تبجي..انه هم ابجي من الكلام السمعته .. كل كلمة حفرت گلبي حفر..ما صار شي جدامي بس شكله هو وياهه وانه عايفني انتظره فوك..كتلهه : اذا اجه رائد وكال نفس الحجي اعوفلج البيت كله..وبالعافية عليج رائد وعشيرتة وبيته وكلشي يخصه..

انداريت لكيت خالة والحجي جايين على صوتنه..
وائل : هاي شمسويه بالبنية..مو عيب عليج..شكبرج تصيرين بعد..شمسويتلج ادور بله..
دنوة : ما ادريييي..اسألهه..شوف شمسويه..
جلنار هي وتبجي : خالو وين الغلط من رائد يبات عندي .. ها وين الغلط..مو متزوجني بالحلال وشرع ربنه..
الحجية : صخام..شدتحجين بابا..شنو شرع ربنه شنو رائد شدتحجين..الرجال جان يم خالة منين سويتي جايج
جلنار : بعد طلعوني كذابة..لو بس تردون تسكتون حلك هاي الجاهلة..والله يالله..
انه اسمعهم وابجي..بعد مابيه حيل احجي..اجت خالة اخذتني ورحنه للغرفة..كامت تهدي بيه بس انه انتهيت بعد كل كلمة منهه عصرت كلبي عصر..دموعي تنزل جمر على وجناتي تعبت منهه ومن حجيهه..شوكت تعوفني..

كتلهه : خالة جاي يمهه صدك ليش دتقنعيني..
الحجية : لج يمة جذب..هاي شلون تقتنع..يحبج والله وما يروح عليهه صدكيني..حتى زحمة اخابره هسة تتأكدين..انتظري من يجي هو يحجيلج كلشي..
دنوة : ما اريد..ما اريد اسمه منه شي..خليبقى وياهه هي تفتهم اكثر مني..وانه ثولة ما اعرف..سكتت بس دموعي ما سكتت..ضليت يمهه لحدما غفيت..تمنيت الحجتة يطلع حلم وافز منه..حتلو جان حجيهه جذب بس الطريقة الكالتلي بيهه اذتني..حطمت كل ذرة انوثة عندي..ما ادري شكول.. ادور راح وهو زعلان..اكيد هسة من يجي حيبقى زعلان..الافكار هاي كلهه اجتني بالحلم..بس بشكل كابوس واشياء ما مفهومة .. فزيت من النوم راسي يوجعني ومصخنة..النبضات بكل جسمي..هلكد ما النبضة قوية احس بيهه..

كمت بيه مابيه طلعت من الغرفة..افتريت البيت اريد اشوف خالة وين..بعدين صادفني الحجي..
وائل : شبيج عبالك واحد تايه..
دنوة : لا بس ردت اشوف خالة وين..
وائل : بره بالحديقة..روحي شوفيهه..
حركت راسي يعني اي ورحت..اكو ورد بحديقتنه اصفر وابيض هي واكفة ترشهن..تذكرت ابوي شلون جان يهتم بيهه وعنده شي اساسي..ما ادري اتنهد لو ابتسم..هي حست علي موجودة..اندارت ابتسمتلي وكملت بالعجل بعدين سدت المي..اجت يمي باستني ورفعت حاجبهه..
الحجية : شبيج..مريضة..شو مصخنة..
دنوة : ما ادري..كعدت من النوم راسي يوجعني وجسمي كله يدك من الوجع..انطيني شي اشربه..
الحجية : خالة حبيبتي فدوة اروحلج لا تسوين بروحج هج.. هاي كله علمود جلنار الملعونة..

اعتبريهه وحده عابره ولا تهتمين..جذابة ياعيني..
دنجت وكتلهه : ما ادري..طبينه جوه كلتلي روحي لغرفتي هسة اجيج..رحت تمددت وتغطيت..جسمي حار ومصخنة بس كمت ارجف من البرد..اجت انطتني حباية وسوب حار..
الحجية : شربي السوب اول..ميصير تاخذيهه على معده فارغه لا تروحين تنتكسين بالزايد..
مديت ايدي اخذه بس ترجف بشكل..هي عدلت نومتي وشربتنياه على كيفهه..بعدين انطتني الحباية..انه كل هذا وبعدني ارجف وحرارتي بالصاعد..ادور شربت هذا السوب حار..حسيت الحرارة كلهه صارت براسي..مددتني وتغطيت ببطانيتين..ضليت يومين نايمة بالفراش ماتحركت وخالة هي الوحيدة يمي..بس محمد جاب ادوية من الصيدلية وراح لشغله هم اسبوعين يله يجي..انه اخذ الادوية واشرب سوائل دافية وبعدني مريضة..اصلا بالزايد..

انتهيت كلش..بس اروح للحمام واجي حتى اكل نفسيتي ما تتقبل..وره هليومين اجه رائد..سمعت صوته بالصالة بس مكدرت اكوم..ضليت انتظر كلت هسة يجي..اكيد خالة كلتلة دنوة مريضة..ضليت انتظره لحدما غفيت..لأن جنت الليل كلة ما نايمة من الصخونة..مر اليوم وهو ماكو..سألت خالة علي بالليل كالت بس تغده ويانه بعدين صعد ما شفته..حتى انه ما شفته من اكوم للحمام لو شي..اي اكيد يمهه..جذاب مسوي نفسه فوك وهو كاعد يمهه بالختلة..اي انه شيسوي بيه بعد .. حتى ما سأل علي..ما كال مرتي مريضة..يعني اخلاص ام المشكلة والبلوة شكبرهه يحجي وياهه عادي وانه كلشي ما مسوية ميعبرني..ثاني يوم هم نفس الشي..كمت ابجي فرفحت..شكد ادري بي عصبي وقاسي بس مثل هلمرة ابد .. هو حتى ما يصيح علي..

تالي متالي ما يجي يشوفني..ادور انه مدا اصير زينة تعبت من الصخونة والادوية..حتى مابيه حيل اكل..ومنا رائد ما قصر..بالليل اجت خالة تنام..ما اسألتهه علي كافي..هو ما يريدني ليش اضل اسأل..نمت وكلساع افز.. اخر شي كمت ابجي بس كاتمة صوتي بالمخدة..ما ادري ابجي من المرض لو من رائد لو من شنو بالضبط..عاينت للساعة بعدهه بالثنتين ادور الوكت مديمشي..اريد يخلص الليل وانام ماكو كمت بيه مابيه صعدت فوك..فتحت الباب وطبيت لكيت الغرفة متثعولة دخان مال جكاير والملابس ع الميزتواليت والكومدي.. هو كاعد يكلب بالتلفزيون ويدخن..شافني مثل الانصدم بجيتي بالبداية بعدين صد عني ولا عبالك موجودة..هنا انه جسمي فور نار فوك ما هو الغلطان هو اليسوي نفسه زعلان..سديت الباب ورحت كعدت يمه..ولا عاينلي..

دنوة : رائد..اريد احاجيك..
رائد : خيرج..
دنوة : وين جنت ذاك اليوم من تأخرت بالرجعة..
رائد : يم خالي..
دنوة : جذاب..
رائد : شنو جذاب بابا..بكدج اجذب عليج..
دنوة : اي جنت يم جلنار..ومجددين ليلتكم..الله يهنيكم يارب .. الولد الصالح ان شاء الله..حجتلي كلشي..
عاينلي بنظرة جامدة ورجع يكلب بالتلفزيون : ماكو هج حجي وانتي لا تضلين طفلة شتسمعين تصدكين..
دنوة : لا صدك حجيهه..انت تجذب علي..بعد متحبني .. صار اسبوع مريضة حتى ماجربت تسأل عني وانه وياك بنفس البيت..ماكلت اشوفهه شلونهه..لو عادي عندك..

عادي عندك مريضة ومصخنة حرارتي مدتنزل..هااا عادي مووو ليش هشكل..دا احجي وغصيت..كمت ابجي بحركة كل دمعة تحرك وجنتي شكد انهضمت..كتله : دتعاقبني على شي ما مسويته.. ليش متعاقب اخلاص..هي ام المشكلة مو انه.. سكتت بس دموعي تصب..ردة فعله الباردة كسرت كلشي جنت مخليته ببالي..كبل لا اجي كلت هسة يشوفني منفعله وابجي يتغير يرجع مثل كبل..بس ماكو..صم بكم..حسيت بهضيمة بس الله يعرفهه..لو عندي ام..جان رحت يمهه ولا اشوف هج تعامل جاف..لو ابوي عايش جان رحت يمه..وحيدة واكول رائد يمي ما يهمني احد..شو هو هم كام ما يريدني .. تنهدت وكمت..بالباب حسيت بدوخة قوية..تكومت بمكاني .. اجه يكومني..خزرته : لا تكمشني..وخر ايدك..دفعته من صدره وكمت نزلت جوه..

كعدت ع الباية الاخيرة ومغطية وجهي بايدي..بجيت لحدما تعبت ونمت بمكاني متحركت..كعدت لكيت نفسي بغرفة خالة .. رائد كاعد على حافة الجرباية ويحاجيهه..
رائد : حاخذهه للدكتور اليوم..مدتصير زينة..
الحجية : اي اخذهه..خطية ليش هشكل وياهه..ماعدهه هج سوالف وتحبك..هي منا صارت هاي السالفة وجلنار شوطتهه تكللهه رائد بايت يمي مدري شنو..
رائد : ادري كلتلي..هاي شكد بايخة..
الحجية : هي ماصدكت صار بعد بيناتكم فسوت هج..
رائد : اي رزلتهه طيح الله حظهه..هاي لو انه موجود جان كدرت تحجي شي..بس جي وحدهه..
الحجية : اي والله صحيح..رعنة..بس تكعد صالحهه لا تعوفهه هشكل..
رائد : ميخالف..

سمعت صوت الباب انفتحت معناهه طلعت..وخرت الغطى بس معاينت علي..عفته وصعدت فوك..ولو جنت دايخة بس اريد احسسه بالحسسنياه..خلاني احس روحي ولاشي.. شعور ما ينوصف هلكد ما يأذي ويكسر ويطحن كل ذرة امل جنت شايلتهه من صعدتله فوك..كل ظني حيحضني ويهديني .. ما اجه ببالي حيسوي هج..طلعت جنطة صغيرة خليت بيهه جم قطعة ملابس لبست الصاية والشال..جان يجي..
رائد : شدسوين..
دنوة : حروح لبيت خالتي..ميحتاج توصلني ما اريد..
رائد : وين تروحين وانتي مريضة..
دنوة : ميخصك..لو مهتم جان اجيت سألت عني مو عايفني وحدي حتى ماجبتلي دوة..خلف الله على محمد..
رائد : يولي والله سألت امي عليج..واجي للغرفة من تنامين بس الصار مو هين بالنسبة الي..

دنوة : هاااا مو هين بالنسبة الك..جا وانه..هااا.. انه شنو .. سهل علي الموضوع..انه متعذبة اكثر منك بس متحس.. اي انت متحس..اعصابي تلفت من وره جلنار..اريد ارتاح لا تعذبني اكثر..
تقرب مني وحضني : ماعندي شي وياهه وداعتج..
دنوة : خوش انه جدا اقتنعت..وخرت عنه واخذت الجنطة .. كمشهه من ايدي وخزرني..كتله : خير خيررر..لا يرحم ولا يخلي رحمة الله تنزل..انه من البارحة اجيتك وما بادرتني بشي كرهتك..خوووش..كرهتك..روح عليهه هي تحبك واكبر مني تفتهمك وتسويلك شتريد..تنهدت وحجيت بحيل بايد : عوفني اروح لبيت خالتي..تعبت من البيت ومنك ومن كلشي.. اريد ارتاح شويه..بالعناد تسوي هج لو شنو..جي ماعندي احد .. وانه معتبرتك اهلي والدنيا كلهه..من اريد شي ما احير وين اروح..اكول رائد موجود ما مقصر وياي..

بعدين انت تسوي بيه هج..تصدني وانه لا بيهه ولا عليهه.. ما اريد تاخذني للدكتور..يارب اموت ولا اشوفك انت وياهه.. هو منتجي ع الباب مالت الكنتور ويسمع بدون ما يحجي.. كمت ابجي وذبيت الجنطة..ما ادري وين اروح..شسوي ما ادري ادور هو ما يحجي..احجي كول مامسوين شي.. والله نار اكلت كلبي اكل..تعبت..اجه حضني وانه اقاومة ما اريده صح احبه ويحبني..بس تعبني..اخر شي تعبت وحضنته.. كمت اعصر بتشيرته وابجييي..خلص كلبي..كعد ع الحافة مالت الجرباية كعدني بحضنه يمسح دموعي ويبوسني من خدي

رائد : كافي كافي..اسف يولي..ما صاير شي والله.. لا تشوفين البعد الصار يخليني اروح عليهه..انتي الاصل وداعت عيونج..لا تفكرين مجرد تفكرين يجي يوم وتكدر تخليني يمهه ما اعتبرهه مرتي بس على كد الاسم..انتي كلشي.. ما حسيتي بشعوري من كال اسمج..ما ادري شلون كمشت اعصابي..كلت انه اخلاص ماضربتهه..ادور دنوة.. جنت عصبي وغادي نار..كل كلمة كلتهه حسبيهه ما انكالت.. والله بالواجب وبالي يمج..اكول لو ما كايللهه شي احسن.. مو قصدي اصدج..بنيتي انتي وماشوف غيرج لو مدري شيصير
دنوة : جا ليش تكلي هج..غير صدك..
رائد : يولي جذابة..تريد تضوجج..جنت يم خالي تكدرين تسألي..اصلا رجعت متأخر بالثنتين وشويه..
دنوة : يعني جذب..
رائد : وغلاتج عندي جذب..لو صدك ما احجي..

دنوة : وبعدك زعلان مني..
رائد : لا..راح كلشي بوكته..انه غلطان..
اخذت نفس وكمت..نزعت الصاية والشال ونزلت جوه..طبيت لغرفة خالة تمددت..احس شي فوكاية..لو واحد ديراقبني من الشباج..كمت اتلفت هنا وهنا واحجي وي نفسي : شتريد مني..روح..ما ادري شبيه..ادور جسمي صار نار والنبضات بكل مكان..اخر شي تعبت من التفكير ..درت وجهي للجهة اللخ واتخيل شخص واكف يراقبني يريد يسويلي شي.. وره ساعات انفتحت الباب..درت وجهي لكيت رائد يمي وماعونين مال اكل ع الكومدي..
رائد : كومي اكلي شي..ما ماكلة صارلج هواي..
دنوة : شنو هذا الاكل..منين جبته..
عاينلي بنظرة متفاجئة هو ورافع حاجبة : شنو منين جبته.. غير امي مسويته..شبيج حبيبي..

دنوة : لا تجذب علي..مخليلي شي بالاكل..تريد تخلص مني
رائد : يولي شخليلج..شبيج..
أشرتله ع الشباج..كتله : هناك واحد يكلك سويلهه هج موو .. احجي الصدك..
رائد : باباتي محد اكو بره..عليمن تقصدين..
دنوة : لك هيانههه..شبيك مدتشوفه..راح ع الشباج سد البردة واجه يمي..حط الصينية بحضني..
رائد : اكلي..انه سويته يله..
دنوة : اي ما اكل بس منك..هذول يكرهوني يردون يموتوني .. يخلولي شي بالاكل..شوف سم لو شي..سكت وضل يعاينلي من فوك ليجوه..كتله : شكو تبصبص..دير وجهك.. حرك راسه يعني اي ودار وجهه..كملت وانطيته الصينية..خلاهه ع الكومدي..رحت يمه حضنته وخليت ايده على راسي..كتله : راسي يوجعني كلش..

رائد : اجيبلج براسيتول مادام اكلتي..
دنوة : بكيفك..كمش ايدي جان تصيرلي رعشة..انه فزيت منهه هو ما ادري شصارله..ضل يعاينلي ورافع حاجبة..
رائد : هسة اجي..
راح وانه ضليت خايفة..خايفة من هذا الديشوفني من الشباج ليش بس انه اشوفه..ليش مديشوفه رائد..شوي واجه انطاني الحباية وصعدني فوك..خلص اليوم كله ارجف وخايفة من ما ادري شنو..اهلوس واخبط كلشي..بالليل اجة رائد دينام .. كمت اضحك بدون سبب..بحيث دمعت من الضحك وما ادري على شنو..شي بداخلي متحكم بيه..متحكم بلساني وايدي ورجلي..مو انه داسوي هج..ضل صافن علي ميدري شيسوي وانه بعد ما ادري شدا اسوي بنفسي..مرت اربع ايام نفس الحالة وبالطالع..كمت احجي زايد..من اكعد لحدما انام لساني ميسكت..حتى كتله لرائد انت شيخ لازم توذن بالجامع شجابك هنا..امشي روح تأخرت..

هو صافن علي ماحجى شي..هملت روحي..للحمام ما اروح حتى سبح ما اسبح..يجي هو ياخذني ويمشط شعري.. ساعة ابجي وافرفح مثل طير مذبوح..وساعة اضحك ضحك مصاير ساعة اختنك وتطلع روحي..تصير بزردومي..اكوم اكمز بالغرفة اريد هوى يجيني..يجي رائد يطلعني بالحديقة دورات افصل نهائيا رائد يصيح يمعودة..دنوة.. بنيتي..وانه مو يمي اصلا..اسمع بس ما اجاوب..ما انام..ساعة وحده باليوم بس وهم الفجر..يعني اضل الليل كله كاعدة احجي وابجي.. لو احجي واضحك..رائد حاط ايده على خده ويسمعلي.. وره هلاربع ايام كعدت الصبح مالكيته..متعودة هو ياخذني للحمام هو يمشط شعري..هو كلشي يسوي..حتى يصعدلي الاكل فوك يكلي ما اريدج تشوفين اخلاص ادور يصيرلج شي.. كمت للحمام قفلت الباب وشمرت المفتاح من جوه الباب.. ضليت ساعتين بالحمام..

بس كاعدة بالكع وفاتحة المي ينزل قطرة قطرة..عبالك دا اعذب روحي بايدي..صوت المي والهدوء بالحمام خلاني ابجي.. كمت ادك ع الباب طلعونيييي..قفلتو علي البااااب تردوني اموووت حقرااااء..شتريدون منييي..ضليت ادك بيهه قوي لحدما سمعت صوت القفل وابتعدت شوي..اجه رائد غسل وجهي وايدي لأن تجرحت هلكد ما دكيت الباب..
رائد : شمسويه بنفسج يالله..مو كتلج لتسوين شي الا تصيحيني..شلون احنه..وين اخذج هسة تاهت علي..
طلعني ورحنه للغرفة..حسيت برعشة مشت بكل جسمي ورجلية خدرت..كمشته من بلوزه وتكومت بمكاني..كمت ابجي واعت بي..اكرهكممم..متريدوني اعيييش..انت هم ما تريدني.. كمت اخبط مدري شحجي..بجيت لحدما تعبت..شالني وحطني ع الجرباية..
رائد : انه يمج حبيبي انتي..باجر اخذج لدكتور..

دنوة : لاااا..هذا يريد يموتني..كلكم تردون تموتوني.. هسة يخليلي شي هو وهذاك اليراقبني من الشباج بعدين اموت ويرتاح..تردون تخلصون مني..
رائد : يولي منو يريد يموتج..بس اهدي لا تعبين روحج..
هو سكت وانه اشتغل لساني : انت عميل..جنت تشتغل وي الامريكان..كلكم هج..دير بالك من محمد يريد يحرك البيت .. اي انه اعرف كلشي بس ساكتة..اخاف اكلك خاف ما تصدكني بس هسة كلشي بين..اجاني احساس لازم احجي اخاف عليك لا يسوولك شي..اي وشوف هاي جلنار دتخونك بحجة انت جبير فتجي هي ادور واحد غيرك.. هج كمت احجي وبعد اكثر..حتى كتلة انت اياد علاوي..اشكال كلشي حجيت خطت وخربطت..هو يسمعلي بس ما يحجي شي..
رائد : خلصتي..
دنوة : اي..
رائد : حجيبلج اكل واجي..

نزل وانه رحت ع المرايه افر بوجهي : وجهي صاير بي نور من الله..وشعري طولان بعد اكثر..هو بالحقيقة ماكو هج شي بس انه دا اخربط ما اكدر اتحكم بلساني..كلشي بيه منقاد لأوامر ما اعرف منين..خليت ايدي على بطني : دا احس بيك تتحرك جواية..ولد انت وحسميك جواد..حلو مو..ضليت احجي وي بطني من كل عقلي اكول حامل..شوي واجة رائد بيده صينية صغيرة..شافني مدنجة راسي اهمس وي بطني..ضل صافن علي ما يدري شدا اسوي..كمشني من ايدي وباسني بعدين كعدني بالكع وهو يمي..
رائد : اكلي يله..صارلج اسبوع بس عصاير موزين عليج
عاينت علي..كتله : اكل انت اول..
رائد : بس انه متغدي..
دنوة : اذا متاكل ما اكل..يمكن حاطيلي سم..اكل انت خاطر اتأكد مابي شي..

صگر : يولي انه صبيته بيدي..منو يحطلج سم..
دنوة : اي يجوز انت وانداريت غافلوك وحطولي سم.. مو اكلك يردون يموتوني..كمت احجي وابجي..
رائد : كافي كافي..حاكل ميخالف..بس لا تبجين..
اكل جدامي يله اكلت..وخر الصينية على صفحة واجه حضني ومقفل ايدي بايده..صفنت ع الحايط تذكرت ذاك اليوم من جنت مصخنة..من ذاك اليوم كمت اتخيل واحد واكف يم الشباج ويعاينلي..بس غلست..كلت مصخنة واهلوس مو فدشي .. بس بعدين كمت ادوخ والدم بجسمي احسه ينضخ بقوة لحدما وصلت لهاي الحالة..ثاني يوم العصر انه كاعدة ع الجرباية واحجي..لساني ماسكت..احس روحي تعبانة بس ما اكدر اسكت..اجه رائد اخذ ملابسي ووداني للحمام سبحني بس مدنج عيونه ما يريد يحرجني..بهاي اللحظات سكتت وكلبتهه بجي.. هو توتر..

خلصلي بالعجل وطلعنه..بدلي ملابس طلعة وراح بدل.. خله عطر وخلالي من مالتي..سوه كلشي بدون ما يحجي شي .. بس ساكت..اخذ فلوس وكمشني من ايدي نزلنه جوه.. انه شفت جلنار وتخبلت..كمت اصيح واخرمش بايده : لج حقيره جلبهههه..انتي شيطاااان..وصخه نكسهههه..انداريت ع رائد احاجي وأشر على جلنار : هاي نكسه..طلعوهه من البيت طلعوههههه..كمشني من ظهري وطلعنه بره..
رائد : راحت راحت ختولي..امشي باباتي..
دنوة : وهاي الوصخة متطلعوهه..
رائد : اطلعهه ميخالف تدللين..بس لا تصيرين عصبية اعصابج تلفت..
دنوة : احسن منك..ليش تريد تسويني مخبله..
رائد : والله انه المخبل..امشي حبيبي مابيج شي..
كمش ايدي وصعدني بالسيارة..

ضل يفتر لحدما طبكنه يم مجمع مال دكاترة..نزل واجه ينزلني بعدين صعدنه لاخر طابق..الصالة بيهه تقريب العشر اشخاص واحد مدنج..واحد يبجي..واحد مكرفص روحه ما ادري شنو هذول..مدري جي مريضة معرفتهم شنو.. رائد جر كرسي وكعدني..هو ضل واكف يمي..واحد من الكاعدين مركز نظرة علي..ضجت منه..درت وجهي على رائد..كتله : شو هذا ديتفرج علي..
بهمس : مريض خطية..مو وياج حبيبي..
صفنت شوي بعدين كتله : وانه هم مريضة..
رائد : لا مابيج شي..تعبانة شوي..عادي كلنه نتعب..
درت وجهي محجيت شي..لحدما السكرتير صاح اسمي وطبينه جوه..كعدت و رائد جدامي كاعد..

الدكتور : الاسم..
دنوة : دنوة محيي..
الدكتور : شنو مشكلتج بابا..شدتحسين..
دنوة : احس واحد يراقبني..هسة هو واكف ورة الشباج ينتظرني اطلع ويسويلي شي..راسي يوجعني همات..
الدكتور : طيب..وبعد..
دنوة : بس احجي..تعبت من الحجي ما اكدر اسكت.. تجيني رعشة واكوم ارجف ساعات وحدة وره اللخ..
الدكتور : صايرلج شي كبل متعبج..او مصدومة منه..
دنوة : اي هواي..
الدكتور : شكد عمرج..
دنوة : ثنين وعشرين..
الدكتور : بعدج صغيرة..ششفتي من حياتج..انت ابوهه
رائد : لا دكتور زوجهه..

ضل يسألني عن حياتي..كال احجي اليعجبج انه هنا اسمعج اعتبري محد موجود..كمت اجاوب وابجي..اخر شي خلص اسئلة وسكتت..كام يحجي وي رائد..
الدكتور : عدهه ذهان..النوع الاول من اضطراب ثنائي القطب حسب السمعته منهه..حكتبلهه ادوية ترخي اعصابهه ونوع ثاني يخليهه تنام..واضح عدهه ارق من عيونهه..
رائد : اي مدتنام..يعني اسبوع بس اربع ساعات نايمة
الدكتور : اي مو كتلك..داريهه بالاكل ولا تخليهه تتعرض لأي موقف يشد اعصابهه..المرض النفسي صعب يتعالج يحتاجله فترة..هي الظاهر من زمان اعصابهه مشدوهه بس ما حاسة على نفسهه..حاليا بدت تظهر الاعراض..طبعا اريد انوهلك على شغلة..مريض الذهان يحجي اشكال..بعدين يسألك اي لو لا..اياك ثم اياك توافقه الرأي..

ممكن اذا طابت بعدين حتضل هاي الافكار منسوجة بعقلهه الباطن..هي تكول يريدون موتوني ويخلولي شي بالاكل.. لا تكللهه اي بس لغرض الرضا..اذا مهتم لمستقبلهه وحياتهه لازم تسوي هيج..ممكن تشوفهه حتبجي وتبدي تتصرف تصرفات نكدر نكول عليهه مؤذية بغير قصد منهه..عموما عدهه العافية ان شاء الله..ومثل ما وصيتك..
رائد : ان شاء الله..مشكور ماقصرت..
صافحة واخذ الراجيته بعدين طلعنه ونزلنه جوه ع الصيدلية .. اخذ علاكة ادوية..رائد ضل صافن علي..

رائد : تطلبني بعد ٢٥..بس ارجع للبيت واجيبلكياهن..
- : ماصار شي اخي..
اخذني من ايدي ورجعنه للبيت..صعدنه فوك كبل حتى مشفت احد بس خالة..راح ع الكنتور اخذ فلوس واجه يمي..
رائد : اروح انطي الباقي واجي..لا تطلعين من الغرفة وحدج دقايق ما اتأخر زين..
دنوة : اخذني وياك..ما اريد ابقى وحدي..
رائد : كومي يله..
رحت وياه دفع الباقي ورجعنه للبيت..جانو كلهم كاعدين بالصالة فمن اجينه كعدنه وياهم..بس جلنار ماكو.. رائد كعد يحجي وياهم شكال الدكتور..انه شوي ومدري شجاني كمت احجي خرابيط..اشرت على اخلاص : هاي جلبة.. الله راح يعذبهه بحياتهه..بس انتي حبابة وأشرت على خالة.. انتي داريتي وكبرتي..وين حقج..

هااا وينه..تجي هاي اخلاص تحاجيج بنتر..اشتكي عليهه بالمركز خليذبوهه بالسجن..تستاهل تموت..
اخلاص : هسة هاي تسميهه مريضة..هاي صاحية ودتلعب علينه وعليك انت اول واحد..
رائد : عوفيهه شعليج منهه..كله بسببج انتي وهذيج العكربة دمرتوهه..اعوفهه جنهه وردة واجي الكاهه ذابلة ليش.. مو حرام عليج تحركين گلبي عليهه..ما تكولين حرام اعذب اخوي ما يستاهل..ما وكفت بعينج زيناتي..شنو من بشر انتي.. شوفي حالتهه شوفي..شوفييييي..حتى سبح متسبح..لج رجعت جنهه طفل ميعرف شديكول..حسبي الله عليج انتي وجلنار ما اكول غير شي..
اخلاص : يمة شوفي شلون يتحسب علي..
الحجية : تستاهلين..ماخليتي على حالهه حال.. شمسويتلج جي فقيرة..ماعندج ذرة احساس انتي..

اندار علي همس باذني : كومي نصعد..
صعدنه فوك ومشى الحال هج..شهر كامل انه نفس الشي ولا تحسنت..بس دوة الأرق من اخذه انسطر سطرة مو طبيعية بعدين انام..اضل نايمة اكثر من نص اليوم..من اكعد اضل احجي لحدما يجي موعد الحباية اخذهه وانام..الادوية كامت توجع معدتي..موتتني الم..يجي رائد ينطيني العلاج اكوم ادفع بايدة وابجي..اكلة : رائد لا تنطينياه..ديموتني الله يخليك عوفني..
رائد : حبيبي لازم تاخذي موزين عليج..غير تصيرين زينة ياعيني والله مرمرتي گلبي وياج..
دنوة : دا اكلك يموتني..ديخنكنييييي..انت تريد تموتنيييي .. انت ما تحبني..جذاااب..اكوم ابجي واصيح..يجي يحضني ويهدي بيه..

كمت احس بحركة بزردومي ومعدتي اكلتني اكل..ما اعرف شلون اوصفله لرائد..ما ادري شلون افهمه معدتي دتوجعني ادور شوكت ما يجيبلي اكل احس روحي متخومة وما اريد .. يضل يحاول وياي..بس لكمة مو هواي..اخلي ياكل جدامي يله اكل وراه..بس من اكل احس الاكل يصعد لخشمي.. ولو هو بسيط لو شوربة لو شي خفيف..اخلاص وجلنار ماشفتهن غير مرتين يمكن .. وكل ما اشوفهن اكوم ابجي واخبط حجي

من اشوف جلنار اكوم اصيح نكسة وصخه..طلعوهه لا احرك روحي..ضلت هي واكفة جدامي عبالك مو يمهه الحجي.. عفتهه ورحت للمطبخ شغلت الجداحة وقربتهه من حافة الدشداشة من جوه جان يجي رائد..كمشني من ايدي وكسر الجداحة..كام يصيح هرج البيت..
رائد : يعني وين اخذهه..وييييين..واحد عاقل يفهمني .. اذا ببيت رجلهه ما مرتاحة جا وين ترتااااح..لج انتيييي .. اخلاص وجلنار والله والله..اذا صار بيهه شي اسوي كل وحدة منجن وصلتين..حرام عليكم كافي كافيييي..قضيتو عليهه حسبي الله عليكم..كومني وصعدنه فوك..كمت ابجي وادفع بي : اذا ما طلعتهه اموت نفسي..حباب اسمعني والله هاي تريد تموتني مدا اجذب عليك..انت مو تحبني..ليش مدتسمعني .. ليش عبالك انه مخبلة..هاا ليششش..

رائد : كافي دموع والله تعبت اكثر منج..شوفي شعري ولحيتي طكت شيب..شكبرني صرت..والله تعبت تعبت.. شسوي يعني كليلي شسوي..ادري بيج تعبانة وادري كل هذا ما مسؤولة عنه..بس ابقي هنا..لا تطلعين..اذا تردين تطلعين كليلي انه اخذج وين ما تريدين..بس هذني لا تتدنيلهن .. محد يريد يموتج كافي طلعي هاي الافكار من راسج..
ضليت اعاين بعيونه بالبداية ما بجيت..كتله : والله مو انه.. مدا اعرف شديصير..غمض عيونه واخذ نفس طويل..هنا طكيت بجي..رعشة مشت بكل جسمي..طحت بالكع..دنج يمي حضني صرت كلي بحضنه..كام يمسح على شعري ويحجي وياي..اسمعه بس ما اكدر اجاوب..تعبانة هلكد ما حجيت
رائد : امشي اطلعج تشمين هوى..

غيرلي ملابسي وطلعني..من اشوف الشارع شوي ارتاح بس بعدهه الافكار براسي..من اشوف واحد يعاينلي اتخيلة حيجي يخنكني ويموتني..صارت بيه سولة وي الموت..رائد اخذ اجازة شهر..ضل يمي طول اليوم..وين ما يروح اضل كامشة ايده اخاف وحدي..احس واحد ديراقبني .. وهاي هج مرت الايام .. لحدما بيوم كعدت الصبح لكيت الدوة ع الكومدي ويمة كلاص مي..كالعادة احس روحي متخومة والاكل واصل لخشمي.. عبالك ماكلة بعزيمة..شحال لوما مكضيتهه بس شوربة وجم شغلة لخ معدودة ع الاصابع..شربتهه وكعدت..

ضليت اتصفن واحجي وي روحي..لحدما انفتحت الباب وفات رائد بيده اكل مثل كل مرة..اجة كعد يمي..
رائد : شلونج اليوم..
دنوة : ما ادري..
وكلني لكمة ووخرت ايده..ضل كاعد يمي لحدما حسيت بطعم مر بحلكي..كمت للحمام بالعجل..كمت استفرغ وابجي .. بلعومي اذاني من الحركة..فتحت عيوني وصحت : ررررائد....

يتبـــــــــــــــــــع...................