ﺑـــــﮃﺂآﺂﺂﯾـــة ~
في أحد مطاعم جامعة الملك سعود وعلى الجلسات الخارجية له ، كانت مع جهازها المحمول و الواضح انه شغال لإعداد بحث مادة في التخصص ، انضمت لها لين و هديل بغداهم
لين : يلا فوز نبي نتغدا لمي اوراقك
فوز : صبرشوي برتب هالجزء و بعمل حفظ ، وش جبتولي ؟
هديل : اقول لمي بس انا على لحم بطني من الصبح كافي هالبحث المفاجئ هلكنا
لين : ايه و انت الصادقة
فوز : خلاص يووه كليتوني
هديل : الجوع كافر
لين : الا اقول هديل البنت اللي تمشي مع بنت خالتك نوره وش اسمها ؟
هديل : أي وحده بنت خالتي كل يوم عندها صديقة جديدة
لين : البنت السمراء المليحه اللي شعرها كشه استغفر الله
فوز : هههههه تحش و تقول استغفر الله
لين : لا مو قصدي وربي بس ابي اوصفها لها
هديل : من فيه سمرات مليحات كثير ؟ طيب شفتيها اليوم وش لابسه ؟
لين : ايه اللي كانت قبل شوي في دكتور كيف لابسة بلوزة بنك روجها غامق
هديل : اييييييييه عرفتها يا حليلها
لين : لا و الله ، انا اسئلك عنها !!
هديل : هههههههه ايه آمري وش بغيتي
لين : اممممم هي يعني راعية حركات بنات وخرابيط ؟
هديل بتفكير : امممم لا ما توقع ليه شفتي عليها شي
لين وهي تطلع صحن الغداء : لا بس مرة شفتها ماشية مع شلة مشاعل
فوز : استغفر الله ما لقت الا ذيك
هديل : ايه تقصدين مشاعل هذيك البنت البوي اللي ينادونها مشعل ؟!
فوز : هي مو من دفعتنا صح ؟
هديل : الله يعافيها ولا يبلانا هي وصديقتها
فوز : أي وحده ؟
هديل : ذيك البنت الثانية صديقتها ماعرفتيها اللي يوم كنا مع نجد و أفنان قالت افنان يا أرض احفظي ماعليك
فوز تتذكر : ..... ايه عرفتها ذيك بصراحة حلوة ليش هي بوي ؟ وش فيهم ؟
قطعت حكيهم لين : بنات نبي نآكل ورانا كلاس بعد شوي ، همست لهم : شوفوها جايه من هناك
فوز : مالي شغل بتحكون لي السالفة ...
***
طلعت من مطعم المستشفى رايحة عند غالية فوق ، رن جوالي في الطريق
رديت : هلا رائد
رائد : دلال كيف غالية قامت ؟
دلال : لين قبل شوي لا انا الحين رايحة لها
رائد : طيب شوفيها بس تقوم عطيني خبر انا عندي شغلة بخلصها وبرجع
دلال : إن شاء الله
قفلت منه ودخلت لغالية كانت قاعده و واضح انها مفزوعه من شي ، ركضت لها
: حبيبي غلو وش فيك اسم الله عليك
غالية بنبرة غريبة على دلال : وينه وينه أبي اشوفه
دلال متعجبة حييل : من هو ؟
غالية : رائد يا دلال رائد وينه وينه
قمت من عندها لا شعوريا ودقيت على رائد بعد رنتين وصلني صوته : قامت ؟
دلال : ايه و متخرّعه تسأل عنك !
لفيت على الباب اللي انفتح ودخل من وراه رائد ، قفلت
شفته يقرب مني ابي اقوم له اتحسسه انه بخير ماقدرت ، بصوت كله ألم : رائد انت بخير فيك شي احد مسوي لك شي
رائد متعجب هو الثاني : لا شوفيني طيب قدامك
غالية تبكي : رائد سعود سعود قال بيقتلك و بيقتل الدكتور فارس
قطعت قلبي وهي تبكي : خلاص انا هنا عندك ما راح يصير لي شي ان شاء الله
غالية : اوعدني الله يخليك اوعدني
مسحت دمعتها و انا اناظر فيها بصمت وهي تبكي ، تحبني ولا امانها معي ؟!
***
خلصنا غدا فؤاد قعد في الصالة اللي تحت ابوي ما كان موجود ومتعب على وشك وصول للبيت هو دايم يتأخر عن الغداء مع علمه ان فؤاد بيجي اليوم ، عطيته عصير كوكتيل وقعدت بجنبه : حبيبي
فؤاد بعذوبة : عيونه وقلبه وروحه
قلت بدلع : وش رايك في طبخي ؟
فؤاد : لو هو سم عسل على قلبي
لاشعوريا : اسم الله عليك جعله في عدوينك يا رب
قربني منه وحوطني من خصري وصار راسي على كتفه : تدرين حبيبي
ياسمين : وش ؟
فؤاد : لو قلت مو احبك كلمة اعشقك قليلة عليك
حمرت خدودي ماعرفت ارد بس انقذني دخول متعب : احم احم
تحركت بسرعة من عند فؤاد : هلا هلا متعب
قام فؤاد سلم عليه و سلمت عليه ثم قعد : عندكم عزاب في البيت انتبهوا
أنا وجهي تقلب و فؤاد مجرد ابتسم : وليش ما تعرس و تفكنا
متعب ضحك بقوة : على يدك كلم المدام يمكن تفكر وتحن علي ، ياحسرتي علي بصك الثلاثين ولاحد فكر يلمح لو كذب
ياسمين : بس ما طلبت شي من بكرة بجيب لك احلى عروس
متعب : فديتك ...
كانت جلستهم حلوة والاحلى ياسمين اللي اكتشتف جانب جديد في شخصية متعب ، بس محد اكتشف العيون الحاقدة اللي كانت تراقبهم من اول الجلسة !!!
***
آﺻﮃﻗ̮ـ̃ﺂء ﺂﻟﺳۆء !!
في بارك البيت من الخلف كان معاذ قاعد لحاله و واضح انه سرحان في عالم آخر دخل فارس للبيت وقف سيارته نزل ، وانتبه لمعاذ اللي ما كان حاس بنفسه راح لعنده : معاذ .. معـــــــاذ
معاذ مفزوع : هـ هلا فارس
فارس بنظرا تفحص له : السلام عليكم
معاذ : و عليكم السلام ، آمرني بغيت شي
فارس : توني واصل وش فيك محزن وقاعد هنا فيك شي ؟
معاذ : لا لا فارس ما فيني شي بس انتظر يجهز الغداء
فارس : معاذ أنا اخوك الكبير و صدقني بس ابي مصلحتك لاغير لو في شي قولي يمكن اقدر اساعدك ..
معاذ : ....
فارس : ما ثق فيني يا معاذ ، حتى لو انت غلطـ ..
ما خلاه يكمل كلامه : لا فارس صدقني انا ماغلطت ولا سويت شي
فارس ابتسم بخفه و كأنه إللي معاذ بيحكي له : طيب قول يمكن اقدر اساعدك
معاذ : فارس صدقني انا ما غلطت ولا سويت شي اصلا مدري عنهم هو بس قال سلفني انا عطيته ولا كنت ادري بنواياه
فارس بتركيز : طيب شوي شوي واحكيلي انا اسمع لك
معاذ وكانه لقى حبل نجاه : تذكر ذاك اليوم يوم كنت انت وهنادي و وليد قاعدين وانا جيت و صرخت وعورت دانية ،يومه اكتشفت المشكلة
كنت قاعد بعد صلاة العصر عند المسجد انتظر صديقي احمد اللي قال بيمرني عشان ياخذ مبلغ هو طلبه مني ولاني اعرف بظروفه طلبت من الوالد ولا قصر معي
أحمد : سلام معاذ
قمت له : وعليكم السلام ، هاك تفضل وعطيته المبلغ ، يلا انا لازم امشي اشوفك في المدرسة ان شاء الله
أحمد : لا تعال اصبر شوي بصراحة فيه موضوع بغيت احكي فيه معك
معاذ : لازم الحين ؟
أحمد : ايه والله ، بعدين انت وراك شي
معاذ : لا بس ما استئذنت في البيت اخاف يقلقون علي
أحمد : انت مو صغير بعدين ما بنطول
معاذ : طيب احكي عشان ما يضيع الوقت
أحمد : لعيونك ، بصراحة بقولك وبدون مقدمات .. أنت مدمن حبوب
معاذ منصدم : وش قلت !
أحمد بسخرية : بعذرك مصدوم بس تراك مدمن وعلى فكر المبلغ اللي خذيته منك ثمن للي كنت تاخذه هزيت ميزانيتي انت
فارس قام وقف من صدمته بالكلام اللي سمعه : من جدك معاذ تحكي !
كمل معاذ ..
قلت له : انت تمزح
رد بوقاحة : هالامور ما فيها مزوح
معاذ وجهه احمر دمعته خانته وطاحت : والله العظيم كل شي قلته لك صار مالي ذنب فيه ، رمى في وجهي هالكيس (طلع من جيبه كيس فيه بقايا حبوب ) وقال لي صدقني بتحتاجني وقتها جيب معك مثل هالمبلغ وتعال
فارس يمسح على وجهه : استغفر الله يا رب صبرني يارب صرخ فيه : ليش ما قلت لي من قبل ليش ؟
معاذ : خفت ولا عرفت وش اقول
فارس : وبظنك لو عرفنا بطريقة ثانية افضل لك ، لأن مصيرنا بنعرف !
نزل راسه ماعرف وش يقول ، حسيت فيه للحظة : خل الموضوع بينا بس وانا بتصرف طيب
معاذ بطاعة : طيب ...
***
مكتب سيف في الشركة
سيف : رائد انت مو قدي لا تتحداني حتى غالية ما تقدر تأثر على قرار انا اتخذه
رائد : ما اتحداك انا بس الورقة الرابحه معي
سيف : غلطان انا دائما رابح معي ورقه فيها تدمرك تدمير
رائد : عشان غالية في ذي ما راح تأذيني !
سيف : بس تنصدم غالية فيك , أنا بكون اقرب لها وما بتحتمي غير في حضني انا
رائد : عمي لا تضحكني قلبها مو راضي عليك ، كيف تحتمي بحضنك
سيف : الايام بتوريك ...
وش اللي بين سيف ورائد ، وغاليه في النص ؟؟
***
ھَہّﻟ ھَہّۆ פﻧّ ﺂﻣ̝̚ ...؟!
تفاجأت اليوم بصراحة من مكالمته لي ولا بكل حنان طلب يشوفني !! ، قلبي قارصني
معقولة يا ناس عمي زيد دق علي وقال لي ابي اشوفك !!
مدري وش صاير بس انا بصراحة ماقدرت اقبل عرضه يوم قال اروح بيته ,, من قبل هو اهانّي وطردني منه وغير كذا انا ما اثق فيه !
نبهني صوتها من سرحاني اللي لازمني من بعد من قفلت الخط : هلا
هند : حشى ساعة اناديك
رؤى : آمري وش بغيتي ؟
هند : امك تبيك روحي لها في غرفتها
رؤى : يؤ نسيت اعطيها علاجها وقته الحين
قامت راحت تركتني رجعت لي حالة التفكير في الماضي و المستقبل ..!
***
يالله مو قادرة اتحمل اكثر لي اسبوع في المستشفى قال رعاية خاصة رائد طالبها لي سبحان مغير الاحوال
: رائد كان يطلعني من المستشفى على مسؤوليته عشان ما ابعد عن البيت ونظره الحين مخليني اسبوع في المستشفى يمكن عشان ولده خايف عليه ادري انا ما اهمه ولا يمكن هذا ... بابا هو اللي طلب هالشي !
تفاجأت كثير و انصدمت يوم جاوبت دلال : اتوقع بابا هو اللي طلب هالشي
غالية بدون اي تعبير : بسم الله داخله مخي انت ؟!
دلال وهي ماشي بصينية الاكل : لا
غالية : أجل ؟؟
دلال وهي تحط طاولة الطعام فوقي : انتي تفكرين بصوت علي
احمريت من الاحراج لفيت وجهي اناظر للجهة الثانية : ........
دلال : يلا كلي عشان تتقوين وتروحين البيت ولا عاجبتك القعده هنا
اخذت الملعقة وانا سرحانة بكلمة بابا ، دلال ماحبت تناقشني في الموضوع لانها تعرف انه حساس بالنسبة لي صار الحين اسبوعين تقريبا على هذاك اليوم
قلت بتردد : امممم اقول دلال
دلال : قولي
غالية : الحين انت راضية بوضعك ليش وافقتي تجين عندي للبيت بهـ الوضع ؟!
دلال : بالاول كنت مجبرة ، بس جيت وعرفتك تقبلت الوضع بعدين حبيته لأن على الاقل عرفت لي اخت تحبني حتى لو هي ما تدري !
غالية : طيب نفسي افهم ليش صار كذا يا دلال ليش ؟
دلال : ببساطة عشانك انت كل هالشي صار
غالية : عشاني !!
دلال : ايه عشانك ، اعرف وشلون عايشه وشلون رائد يعاملك وفيه اشياء ثانية ابوي سيف بس كان يبي يعرفها يمكن يعيش اللحظة !
غالية : يعيش اي لحظة ، وش دخله في حياتي من الاساس
دلال : اشياء كثيرة ما تعرفينها وبعضها انا ماعرفها بس الشي اللي انا اعرفه ومتاكدة منك إنه يحاول يحميك
غالية بتعجب واضح : يحميني ؟ مِن مَن ؟ وليش ؟
دلال : كل شي ، فيه شي بعد ماتعرفينه سيف عبد العزيز يموت في التراب اللي تمشين عليه !
سرحت دخل الدكتور و فحصني ، واضح اني تحسنت .. كتب لي خروج ~
***
كنت قاعدة في المجلس افكر باللي سويته وهل هو صح يوم اني قلت لعمي يجيني شقتنا افضل ماما خافت علي ، يحق لها بس انا لازم اسمع له لانه من فضولي اولا وثانيا يمكن حن قلبه علينا ابي اعالجها ، ماستغرقت رن جرس البيت ،، دخلته
عمي زيد : كيفك يا رؤى و كيف الوالدة عساكم بخير
رؤى : عايشة يا عم عايشين
زيد : ادري لك حق تزعلين مني ومن اعمامك ، هذا الشيطان شاطر اعمانا بالفلوس
رؤى : اعماكم بس مو لدرجة ترموني انا وماما في الشارع مالنا لا حول ولا قوة اللقمة عشان نعيش صعب نلقها ونسد الجوع بس وانتم ولا همكم
زيد : أنا جايك يا بنتي أطلب منك ومن امك السماح نبي نفتح صفحة جديدة ولك مني كل اللي يرضيك ماعليك في اخواني انا بتكفل فيكم واللي يبي حياه الله
رؤى : اخاف نصير عالة عليك بعد كم يوم من ما تتكفل فينا ما كأنه حلالنا انا وامي
زيد للحين ماسك اعصابه هو يبي يوصل لهدف : معك حق في كل اللي قلتيته ولا اقدر اجبرك على شي ، متى ما رضيتي عني انا موجود أتمنى بس تعلميني مابي اعيش صراع مع نفسي اكثر ضميري مأنبني ومافي حل الا اني اعيش جو عائلي واعوضك و والدتك كل اللي فقدتوه .. وقف بيطلع : لا تحرمني هالشي يابنت اخوي ، سلام
طلع من عندي وانا كلي اضطرابات وتوتر مو مصدقة ان هذا عمي ولا قادرة اصدق اللي صار !
***
الساعة الحين 5:30 ماما جات تقومني من النوم عشان اروح المدرسة ..
عبير : غالية غلو حياتي غلاي
غالية : هممممم
عبير: سوكرتي يلا قومي بتتاخرين عن المدرسة
غالية : ماما بس شوي بقوم
عبير : لا قومي بتروح صلاة الفجر و بعد ما يميدك تفطرين الا والباص عند الباب
غالية قامت نااظرت امها بحب : صباحو ماما
عبير تبوس بنتها : صباح العسل للعسل يلا قومي
غالية : ماما من الحين اقولك مآبي خبزة جبن بس خبزة كاكاو ولا مابي
عبير تضحك بحنان : طيب
راحت غالية تتجهز وتصلي بتروح المدرسة كانت صف اول متوسط وعبير راحت تجهز إفطار بنتها الوحيدة اللي اليوم بيصير عمرها 12 سنة !
قبل ما تطلع من الباب : ماما اليوم ابي غدا مكرونه مع سطلة خس مابي رز ومرق والله ما آكله حامت كبدي منه
عبير : خلاص اصلا كنت بسويلك مفاجأة يا كبيرة
غالية بحماس ومساكشة اطفال : وشهي ماما وشهي
عبير: خلاص ما راح تظل مفاجأة لو قلت لك
غالية بملامح طفل حزين : ماما لو شي مو حلو ما راح ادرس اليوم ولا شي
غالية تضحك على دلع بنتها : عيون ماما لا اكيد بيعجبك روحي يلا هذا الباص جا
حبت أمها على راسها تحجبت وطلعت رايحة المدرسة بروتينها اليومي حصص و فسحة وآخرها طلعت مع الباص راجعة البيت ، بس اللي ما كان بالحسبان انها تلقى امها متوفية بحريق شب في بيتها مع صديقتها ,, الله يرحمها
***
كان جالس في شقته له كم يوم ما طلع منها ..
: فصلوني من دوامي حسبي عليهم بس ماشي بتفرغ لهم بعدين الحين غالية و رائد وفارس و الله لأدمركم غالية لازم تتعذبين مثلي مو حاسة فيني والنار اللي تشتعل بداخلي يخليك تبكين دم ثم تنتحرين وانت رائد دمارك قريب على يديني و راح تلحقه يا فارس مو انا اللي انرد و انهان بذي الطريقة !
***
رجعت للواقع من سرحان آخر يوم شفت ماما على صوت رائد اللي واضح له فترة قاعد ولا حسيت فيه : وين وصلتي
غالية : رائد انت هنا
رائد : وش رايك ؟
غالية بضعف : رائد انتبه لنفسك الله يخليك مآبي افقدك
رائد بحده : غالية ابوك بيذبحني بيجنني مدري وش سويت له كارهني ومن زمان
غالية ما بيدها شي تسويه : ...........
رائد : غالية لاتفكرين بيوم تنحازين لابوك وتتركيني صدقيني ما برحمك ولا راح اترك ولدي معك دقيقة وحدة
الحين انا وش دخلني بينهم حتى يوم زواجي مآحد منهم شاورني الحين جاي يشتكي ويتوعد فيني لا يهددني بولدي : رائد أنا مالي شغل باللي بينكم أنا بقعد في حالي مع ولدي
هذا اللي يبي يوصل له رائد نقطة ضعف غالية ولدها و مستحيل ترضى على ابوها ، لف للجهة الثانية وعلى وجهه ابتسامة انتصار
مشاعري تجاه رائد ما عادت مثل ما هي من فترة واحس قلبي مل بس ما اتحمل فكرة انه في خطر ! همست : الله يرحمك ماما
***
قدري إني اعيش بالوضع و الظروف ذي ماعرف منهم اهلي ولا ادري عنهم شي حتى اللي ربوني تعبوا مني آخر شي : أصلا لازم لأني مو بنتهم !
استغرقت كثير في التفكير عن حالي ماعرف عن دنياي الا ماما وتوفت فكرت ازور اهلي اللي ربوني كذا مرة بعد التردد في النهاية اقول لا ..
رحت لها ابي اسولف معها شوي ، بس لقيتها في مثل وضعها اللي مثل كل يوم ماتحكي ولا تسولف ولا تسوي اي نشاط هذي هي من البيت للمستشفى و العكس !
رؤى : هنو يا روحي وش فيك مو على بعضك ودووم شاردة
هند : لا ابد بس افكر
رؤى : تعبانه من شي في احد مضايقك مزعلك انتي قولي بس انا اطب لك في بطنه
هند ابتسمت على خبالة رؤى : ....
رؤى : ايه كذا الدنيا ماتسوى لا تعطين الامور اكبر من حجمها
آهـ يا رؤى لو تدرين باللي فيني ما قلت هالكلام : إن شاء الله
رؤى : تأكدي انا بكون معك وجنبك مهما صار و متى ما بغيتي تحكي أنا موجودة
حطت يدينها على يدين هند : أنا اختك
هند تقلب وجهها و خانتها دموعها ، ضمتها