ذٌڳَـــــرِى
مرت علي 3 اشهر كأنها برق رغم ثقل احداثها بس انا تعودت على المر كآنت احداث غريبة تصير بس ماهمتني اصلا وش يهمني .!.
رائد كان مجافيني ما يسأل علي ولا يهمه شي لو جا يآخذ اللي يبيه و يتركني والغريب ان الاتصالات اللي تجيه واحسه يقشعر منها زدات الفترة الماضية ودي اعرف بس ما اتجرأ اسأله صار يمد يده كثير علي مره قص لي شعري ورماني انام بالصالة ناتالي اخذتني غرفتها هدتني ونومتني عندها ...
مستغربة كيف ابوه سامح له ينام برا البيت وهو كان يرفض مدري يمكن عشان سعد رجع !
سعود اختفى من نظري ما عدت اشوفه و اذكر انه اخذ اجازة اسبوعين و رائد وافق له عليها لانه تقرب منه الفترة الماضية بس اللي ماتوقعته الدكتور فارس
يحاول يترقب مني باي طريقة ما احسه ناوي لعب و نظراته لي حنان واحس بعيونه كلام بس ماعمري اهتميت اعرف على اني انشغل بهالسؤال يوم اشوفه !
رؤى تحمست في الدراسة و الشغل اكثر و فعلا صارت محل اعجاب الدكاتره و علاقتها فيني رسمية جدا اليوم مريت من السيب شفتها واقفه مع رائد عند مكتب المدير مدري وش عندها بس نآظرتني بنظرات ارعبتني ورائد ولا التفت لي !
ياسمين يالله كلمه ورد غطاها و هند ما تهتم تحكي معي يعني حكينا حكينا ما حكينا مو شرط !
يزيد كان دووم متلخبط وما يدري وين الله حاطه و ياسر ملقوفنا سمعت انه خطب بنت خاله الله يتمم على خير و
الدكتور نواف تركنا بيكمل دراسته في المانيا الله يوفقه
تعبت من الروتين الممل اليوم انا في وحدة الكلى كانت معي طالبات تدريب وبسبب تفوقي في اغلب التخصصات حطوني مشرفة لهم يا حلوهم 5 بس شكلهم نشيطات الله يوفقهم
جلست اراجع اوراق التقييم لهم ما ودي اظلم الوحده فيهم واكيد عندهم احلام واماني راسمينها احاول اعلمهم والمح لهم طريقة التقييم قبل كل عملية تقييم كمساعده كنت دايخه وحالتي حالة بس اقاوم مرضي مدري فجأة احسني تعبت لا هي انفلونزا ولا شي واقولكم سر .. انا اخاف من الابر كثير على اني محترفة فيها كأنها تخصصي !
شاكه بشي فيني وفي نفس الوقت اقول مستحيل يكون هو اصلا لو عرف رائد بيذبحني ؛ جد ترى ما استهبل !!
نزلني ساهر عند باب البيت على غير العادة أنا طلبت منه لاني بصراحة ابي الف في الحوش ولا ابيه يكون موجود قلت له يروح لاهله لو يبي طلبت من ناتالي تطلع لي الاكل في الحديقة كنت قاعده تحت المظله اللي محوطتها الورود بمسار جميل كان فكرة ناتالي .. أنا أحب المشوي بس نفسي رفضته اليوم ولي كم يوم مدري وش السبب اقصد اخاف يكون هو !
قالي رائد مرة تنسين فكرة يكون عندك ولد بيوم ومني بذبحك واشرب من دمك فاهمة هذا اول ما تزوجني يوم كان عمري 12 سنة ! يالله لي 11 سنة متزوجة ' يعني أمي الله يرحمها لها 11 سنة متوفية الله يعفو و يتجاوز عنك فقدتك يا ماما من رحتي عني لقيتني بعدها باسبوع زوجة لرائد القاسي اللي منزوعه منه الرحمة
اذكر زواجي الفعلي كان وانا بثالث متوسط عمري 14 كرهت عمري وكرهت رائد وقته بس بعده تعودت لان الشي مو بيدي اصلا ولا على كيفي ، زواجي منه كان سري و اللي اعرفه حتى ابوه مو عارف بوجودي
راحت بي الافكار لبعيد ودمعت عيني يوم حاولت اذكر يوم حلو لي مع رائد خلاني احبه غصب رغم قسوته وفي نفس الوقت انا بدونه ولا شي الله يخليه لي
تركت الغداء مكانه وقمت رحت المطبخ عصرت لي برتقاله وليمونه سوا شربتهم بدون سكر .. اشتهيته بس وطلعت انام .. برتاح شوي
***
