اسألي عني الليالي

البارت ٤٢

يالي نويت السفر يا اغلى احبابي ..
لك صح هذا حكم القدر لكن على حسابي ..

ادريك مو مقتنع .. ومن داخلك ممتنع ..
بس روح خلي الدمع ينزل على ثيابي ..

تروح بسلامة وتجي .. تلگاني استناك ..
بس الي عندك طلب خذ هالگلب وياك ..
ولو يسألوك اعلة الجسد ..
گلهم ذبحتة هناك ..

الـبـارت الثاني والاربـعـون...............

مشت السيارة هواي والشمس طلعت..اكو بردة صغيره سديتهه..وانتجيت ع الكرسي..نص الطريق وكفنه يم مطعم ضلينه تقريب الساعة وراهه كملنه الطريق..على فجأة الرجال ضرب بريك قوي..اكو شاب ويانه كاعد يم السايق .. يصب كهوة وينطي كل شوي..ويغير بالاغاني..علمود مينام..اندار علينه

- : هذوله الامريكان..حيفتشون..نزلو وحضرو الجناسي
نزلنا..مشايفتهم كبل..مبينين مو عرب..اخذو الجناسي والمستمسكات..ضلينا ساعتين واكفين..لا يقبلون نرجع للسيارة ولا هم مكملين شيردون يسوون..السايق كام يطكطك خاف .. حتى الزلم الجانو ويانا ونسوانهم..الحجي عادي محد حاجاه بس قرو جنسيته وانطوهيا..خلصو..بس اكو واحد رجال اخذو للدورية مالتهم..السايق ماقبل يرجع..كال ننتظر بعد

مرته كامت تبجي..ولو ما اعرفهه بس وضعهه يقهر شايله بيدهه طفلة وابنهه صغير مجلب بتنورتهه بالاخير يله اجه وراهه طلعنه..جلنار نامت وطه كعد..فجبته بحضني..مشت السيارة بعد كومة..حتى ما حسبت شكد..بس كل تفكيري يم رائد .. سوده عليه..ما ارتاح من مشكلة لمشكلة..الله يفرجهه ونرجع مثل كبل..كلهم نامو بس انه ولو جنت تعبانة من طريق البصرة بس مكدرت اغفى..بس اغمض عيوني يجي رائد جدامي .. شكد صعبة اعوفه بمثل هيج وضع..

خاطر بحياته وعاف البيت والراحة علمودنه..شحجي ماكدر اوصف..مشى الوكت وطبينه الحدود..مشت السيارة بينه بعد..الحجية وجلنار كعدو ..من وصلنه لكراج كال السايق كراج السيدة..نزلنه واخذنه الجنط..شفت واحد يأشر من بعيد بعدين بده يتقرب علينه .. محمد..اجه حضن الحجية وباسهه من راسهه .. اخلاص هماتين والحجي سلم عليهم..سلم علي وابتسم..متغير ..

كبل وره ما صارت سالفة علي كام ما عاينلي يكلي ما اطيقج .. يمكن رائد محاجي..مادري..اخذ الجنط بعدين صعدنه بسيارة تكسي وطلعنه..انه بس صعدت نمت..كلش تعبت من الطريق .. بس طريق البصرة بغداد يتعب وحده..ادور هذا .. احس طبيت بعالم ثاني..مو نفس العراق ابد..مناطق جبلية وباردة..بس حلوه حسب الشفته بالبداية هسة من اسكن بيهه اكيد اشوفهه اكثر..نمت مادري شكد لحدما كعدتني جلنار كالت وصلنه..عماير وحده مقابيل اللخ والفرع مثل الدرابين عدنه بالعراق بس الشوارع نظيفة..

طبينه بوحده من العماير صعدنه بالطابق الثاني..بابين وحدة بسد اللخ ومقابيلهن ثنين محمد كال انه والحجي بهاي الغرفة..وأشر عليهه .. وانتو بهاي البسدنه..جهزتهه وجبيره فوتو شوفوهه..اخذنه الجنط وطبينه صدك جبيره..صالة والمطبخ مفتوح عليهه..غرفتين وحده بسد اللخ..وحده منهن طالعة ع البلكونة..حجت اخلاص

اخلاص : انه وجلنار وطه بغرفة وامي وانتي بغرفة.. ها اريد الي ع البلكونة..مو تردين تخنكيني بهاي الثانية
الحجية : اكلج يمة متسكتين..هسه خلنرتاح عود الله كريم .. شكد تنكنكين..اخوج شلون حيعرف وصلنه..
اخلاص : وانه شمعرفني..اسألي محمد..
دتحجي جان يفوت محمد بيده مفاتيح كال : يمة هاي مفاتيح الغرف وباب الشقة..هسه اروح اجيبلكم شي تاكلوه واخابر رائد اكلة وصلو..
الحجية : شلون حتخابرة..
محمد : اكو محل هنا يخابرون بي دولي..اذا ع الرصيد ينرادلي كارتين بس اكول الو..

حط المفاتيح ع الكاونتر وراح..نزعت الشال واخذت ملابس رحت بدلت بالحمام..الشقة بيهه كاونتر وطباخ وثلاجة وقنفات ثنين .. بس بالغرف شنو ما ادري..بعدني ماطبيت..كعدت ع القنفة رجليه ماحس بيهن بعد..شكد يتعب الطريق .. يمكن هاي اطول مدة اكعد بيهه هلكثر..جريت الكوشة وتمددت .. بس حطيت راسي نمت..هلكد ما فكرت برائد اجاني بالحلم .. بس مو مفهوم..يعني حلم عابر عادي..بس كعدتني الحجية .. فزيت فزة حتى طحت من القنفة..ظهري تكسر..
الحجية : الله الله..كومي خالة..خوما تأذيني..

دنوة : يعني شوي..مدتلي ايدهه..كمت لكيتهم صابين الاكل والحجي يمنه هو ومحمد..لبست الشال وكعدت اكل
الحجية : خابرت رائد..
محمد : اي كتلة وصلو..شكد كالو تبقون..
الحجية : ما تعرف اخوك ما يحجي شي..شمدريني .. خلتخلص هاي الفتالة مالت الطائفية..هاي وين جانتلنه كاعدين بأمان الله..ادور خايفة علي وحده سوده عليه..
محمد : يكول ماعلي شي..الله يحرسه وتفض هاي الازمة
خلصنه اكل..ضميت البقى بالثلاجة ورحت للغرفة البيهه بلكونة بيهه جرابي ثنين وكنتور ابو بابين..بس البلكونة احلى شي .. جبت الجنط خليت الملابس والغراض بالكنتور مالتي ومالت الحجية..خطية وين بيهه حيل..

خليت الجنط فوك الكنتور ونكتت الجرابي..طلعت للصالة صاحت بيه اخلاص..
اخلاص : شو اخذتي الغرفة ليش..
الحجية : انه كتلهه..شعليج والله حلوه هاي..
عاينت علي وراحت..الحجي ومحمد بقو يمنه لليل وراحو .. بقت اخلاص وجلنار بالصالة..عفتهم ورحت انام .. تمددت ع الجرباية رجلية تكرصني من الوجع..ضليت اتكلب لحدما جتي الحجية..اخذت دواهه وحاجتني..
الحجية : متنامين حبوبة..شو كاعده..
دنوة : ركباتي توجعني من الطريق..
الحجية : الله يساعدج..حتى ما نمتي..عندي مسكن الام .. تعاي اخذي ميأثر عادي..

كمت اخذت وشربت مي فوكاه..رجعت تمددت..ضليت اتكلب شوي خف الالم بعدين نمت..مر اسبوع نفس المنوال .. اكعد الصبح الكى محمد جايب على كد الريوك فاسوي..انتظر يطلع يجيبلنه شغلات للغده وجلنار تسوي..هج نتبادل .. جلنار دورات زينه وياي دورات لا..من اخلاص وياهه يصيرن ثنينهن علي..من وحدهه لا عادي تجي تسولف وطبيعية ..

وره هلاسبوع الحجية كالت اريد اخابر رائد.. سويت الغده واجو تغدو عدنه..
الحجية : محمد اريد اخابر اخوك..
محمد : اليوم ميفتح..باجر العصر اخذج خابري..بس انه حجيت وياه اولت البارحة..كال مشغول وما اكدر احجي..
الحجية : شلون مرمرني وياه هلرجال..والله الف حسبة تجي ببالي..ادور صرنه بتلفات الدنيا..
محمد : هو اكيد فكر بالموضوع زين يله سوه هج..
خلصنه اكل..الحجية راحت للغرفة..جلنار واخلاص همات .. ضل الحجي ومحمد وطه..كمت اغسل المواعين واسمع محمد يحاجي الحجي بصوت ناصي..
محمد : خايف على رائد..

الحجي : ليش شبي ياستار..
محمد : خالو ماسمعت صوته..تعبان فد دور..يحجي كلمتين ويسكت..بالكوة اجرجر منه الحجي..هسة اذا امي سمعت صوته تكوم تبجي ويضل بالهه..
الحجي : هو وين يسمع كلام..شكد عنيد..ما حجالك شي .. يعني شبي .. شنو وضع العراق والوضع يمه..
محمد : اي كال الوضع متوتر والعالم كلهه خايفة..
الحجي : الله يحفظه..لا تخاف علي..سبع ورجال..
دنوة : كلبي كام يدك سريع..ايدي ترجف..شنو شبي رائد ليش هيج صايرلة..خاف بي شي وميكول..طاح البلم من ايدي تكسر..السنك عالي فمن طاح صار الكزاز على رجلي .. اجه محمد ع الصوت..فتح عيونه مصدوم..
محمد : هاي شنو رجلج..كعدي حتتأذين..

ما انتبهت الا دنجت..عيوني غوركت بس مخليته يشوفني .. اجت اخلاص كامت تصيح..
اخلاص : شبيج ثوله خوما ثوله..حسرة ما كمشتي شي ينكسر مو اكللكم فكر..فكرررر..امداج..
محمد : بابا شبيج وي البنية..هسه شكو بيهه عادي ما صار شي..شكسرت قابل هو ماعون..يله روحي لغرفتج..
راحت هي ودردم بينهه وبين روحهه..دنجت طلعت الكزاز من رجلي بس شاغت روحي..رجلي مادري منين يطلع الدم .. رحت للحمام غسلتهه ولفيتهه بقطعة قماش قديمة..محمد لام الكزاز وجلنار جايه تخلص المواعين..عفتهم وطبيت للغرفة
الحجية : ها خالة خوما توجعج..

دنوة : مدا احس بيهه هسة..
الحجية : كعدي لا تضلين واكفة..اخلي محمد ياخذج مستشفى شي..خاف بعدهن الكزازات..
دنوة : لا خالة ميحتاج..اصلا حنام اشو راسي يوجعني .. جريت المخده ونمت..اجاني الحلم القديم..نفس الرجال والغرفة كمت ابجي وادك على راسي بالحلم..كعدت من النوم عيوني مبللة وراسي يوجعني وجع مو طبيعي..المن احجي الحلم هذا والله ديعذبني..الف شغلة تجي ببالي..خاف ابوي .. خاف رائد..مشى اليوم بس بالشقة..غسالة ماكو..فانه اغسل ملابس بيدي اجمعهن واغسلهن..حتى مالت محمد والحجي .. ايدي تصير خشبة من المي والتايت..

ادور من تنشف اجي انه المهه واعزلهه اخلاص ولا عليهه..كبل جانت تخاف من رائد .. هسة بكيفهه تصول وتجول..الحجية هي تحجي وهي تسمع هاي شدعوة هلكد راسهه يابس..شكو قابل..انه اتجنب المشاكل واسوي الشغل بدون حجي..مابيه حيلهه..تغثني من تحجي وتعلي صوتهه..يزرف الاذان..احسهه متقصدة هج تصيح يم اذاني..

كمت شريت الملابس وطبيت اكلت شوي ورحت للغرفة..اجت الحجية كعدت جدامي..
الحجية : شبيج يمة..احسج ضايجة..
دنوة : لا خالة مابيه شي..بس باجر من ترحين تخابرين رائد طمنيني عنه..بالي علي..
الحجية : شوف..مو كتلج احس بيج شي..
رحت كعدت يمهه بالكع..كمشت ايدهه كتلهه : خالة..اكو حلم صار شهور يجيني..تعبت ديضوجني..
الحجية : خير ان شاء الله..
سولفتلهه علي كتلهه : حتى من اكعد مختنكة وعيوني مدمعة .. شنو معناه..
الحجية : والله ما اعرف خالة ليش اجذب..بس انتي ما مسوية شي غلط حتى بغيبة رائد..فلا تخافين..

دنوة : مادري بعد..الله كريم..باستني ومسحت على راسي .. خلص اليوم مثل كل يوم..ثاني يوم العصر الحجية طلعت هي ومحمد تخابر رائد..محمد من يروح ميتأخر..نص ساعة بالزايد بس هلمرة مادري ليش تأخرو..رتبت الشقة وكعدت .. رجلي تحسنت شوي..بس من ضل واكفة تكوم تكرصني .. كعدت بالصالة اجت جلنار وبيدهه طه..
جلنار : لج هذا طه مصخن..شلون شسوي..
دنوة : ليش..خاف مستبرد..سبحتي..
جلنار : لا وين..هو اني اخاف علي وما سبحته .. هسة وين صارو هذوله..ع الاقل اخلي محمد ياخذه للمستشفى دكتور شي..وحدي وين اندل..

دنوة : اكلج كولي للحجي..يمكن يندل..
جلنار : لا ما يندل..حسويله كمادات بين ما يجون.. راحت للسنك وكملت حجيهه.. تبهذلنه بدون رائد..وين جان..كبل لا يمر يوم يسوي النريده..
دنوة : باع شتحجي..هو انه اريد انسى ها..وانتي تجين تذكريني..عفتهه وكمت للغرفة..وره نص ساعة اجو..الحجية تبجي ومحمد يريد يسكتهه وماكو..
جلنار : شبيج خالة..محمد شبيهه الحجية..
محمد : صار ساعة اريد احصل رائد ماكو..يطلع خارج منطقة التغطية..دكيت على ابو دنوة ع بالي كل الارقام هيج او اكو فد مشكلة بالشركة..بس جاوب عادي..

جلنار : يعني شنو..ما خابرتوه..
محمد : لا..ميتحصل..
الحجية هي وتبجي : انه بعد ما اضل هنا..اريد اشوف ابني طكت روحي علي..يمة وليدي بس لا بي شي وين انطي وجهي شيبقالي بالدنيا اذا راح رائد..
محمد : يمة هسه بيش طالبتة..انه كبل جم يوم حجيت وياه كال مشغول وطامس لراسي..مابي شي يا عيني..
الحجية : ما تحسون بيه..ما تحسون بالنار البكلبي..هو الدرب لا ساعة ولا ساعتين..لو ضالة يمه احسنلي من حركة الگلب هاي وانه بعيدة عنه..

محمد : قابل ما متعودة على غيبتة..ياما غاب ايام واسابيع بعدين يرجع..بالسقوط من طبو الامريكان خوب ما نزل شهرين ليش هسة..
الحجية : عود جاي تواسيني..اروح ارتاح راسي يوجعني ..
اخذت جنطتهه وراحت للغرفة..ما ادري انقهر ويضل بالي على رائد لو اروح اهدي بالحجية وانه اصلا ما هادية..وينه هسة ليش ما يجاوب..شصايرله..رحت حجيت وي محمد ..كتله : ابوي شلونه..حجيت وياه..
محمد : اي..يكول زين..كال سلملي عليهه..
دنوة بصوت ناصي : الله يسلمه..مشى اليوم مثل البارحة .. طه نزلت حرارته بس بعده مخنطل يعني ماله خلك ..

بالليل ضليت اتكلب بالفراش..ما اجاني نوم..اجه رائد ببالي وابوي وين رائد..شبي..ليش ما يجاوب والله گلبي ديأذيني .. يارب مابي شي..على كولت الحجية..الدرب لا ساعة ولا ساعتين .. شيمشيهن هذني السنتين..انه بالبداية ع بالي سنة ونرجع .. بس سمعت محمد يحجي وي اخلاص كللهه سنتين ع الاقل .. بين ما يهدى الوضع بالعراق..وين جنه ووين صرنه .. لو باقية على غيباته ونزلاته للواجب احسن من البعد هذا.. بس مابيدي شي..توني غفيت واجت الاغنية ببالي

تذكرت من انطانياهه شلون جان مغمض ويسمعهه .. وينتبه على كل كلمة بيهه..اكثر سطر حبيته وحسيته يعوض مكان رائد من كال ..انتي اغلى الناس عندي..جنة خضره وحلم وردي..حتى من طلع هلمقطع رائد ابتسم..شكد عنده احساس وينتبه للصغيرة كبل الجبيرة بحيث اغنية حسيتهه اخذته لغير مكان مو الكاعدين بي..ما ادري شكول .. بس عسى يكون بخير..اخت شي تعبت من التفكير ونمت..

مرت الايام..الشقة صارت هدوء..محد يحجي ..كلنه متوترين على رائد..حتى اخلاص سكتت بعد ما تحاجيني.. هم يخابرون علي ماكو..كمت اكعد الفجر ابجي واختنك..افتح الشباج مالت البلكونة وابجي..الحجية نايمة ما تحس علي..بس مرة كعدت شافتني اصلي..جان ما جايني نوم .. خفت اترك الصلاة ادور ترجعلي الحالة منو الي..كبل جان ابوي يمي لو رائد..هنا الحجية بس هم خطية..وين بيهه حيلي كوة شايلة روحهه..

شافتني اصلي..اجت مسحت على راسي وباستني .. راحت تتوضا..خلصت وانتجيت ع الجرباية..بطني بدت تبين .. خليت ايدي عليهه واهمس : هسة انت ولد لو بنية..بس اذا بنية اكيد رائد حيفرح اكثر..هو جان منتظر هاللحظة..بس وينه هسة بعيد ومحد يعرف اخباره..كلبي يلعب بس اتذكرة..هو اصلا ما راح من بالي..محمد كل يومين تلاثه يروح يخابرة يطلع خارج منطقة التغطية لو مغلق..ما ادري شلون عشت هالايام..انام اكول بلكت يطلع حلم وافز..

اريد افز الكى روحي بغرفتنه بالبيت ورائد يمي حاضني ويلعب بشعري..اشوف نظراته من يعاينلي تختلف عن الكل .. احسه يطلع ع شخصيته الحنينه والحساسة يمي..يم الباقين يبقى بشخصيته الرزنة الهادئة..حاد ويجاوب على كد السؤال لا منا ولا منا..اول فترة جنت اكول هاي شلون حعيش وياه اذا بس يجاوب ويسكت..ما يفتح مواضيع..بعدين شفته غير شكل وياي..ما يوم تشكى لو كال شي يضوجه..كلشي يضمه وانه اجيب واكله ماعندك احساس..مدري شجنت احس..

هسة مشتاقه لكلشي برائد..اسلوبه واهتمامه..حبه وغيرته .. عيونه وصوته الرجولي..كلشي بي مشتاقتله..احساسه وهمساته ..ما اعرف شوكت حننجمع مره لخ..على هذا الوضع بالعراق السالفة مطولة..خلتطول..بس رائد شلون.. گلبي ما يرتاح الا يسمع بطاري..حيصير شهرين يخابرون علي وهو ماكو..وينه هسة..تعبت كل يوم اكعد اكول اليوم يخابروه ويجاوب .. مابي شي متأكدة..اعصابي تلفت كل يوم نفس الحجي اعيده بيني وبين نفسي..

ادور اشوف الكل متوتر انه اتوتر بالزايد..اكوم اصفن وافصل منهم..يحجون انه بس اسمع..الحجية كامت تخاف علي .. تجي يمي بالليل تحاجيني ع الحمل وغيرهه..تكلي اخاف يصيرلج شي وانه مابيه حيل خالة..بيدمن تصيرين .. بيد اخلاص وجلنار..فاسكت..اكول هم صدك ..

كبل فترة .. الحجي جان نايم الصبح ومحمد بالشغل..يشتغل بالشفت المسائي بمطعم .. يطلع من السبعة المغرب لثاني يوم بالوحدة الظهر يجي .. دورات يجيب وياه طعمية يعني فلافل ومسحبة..

الصبح كلت اسوي شي جديد ملينه من البتيته والبيتنجان .. اخذت فلوس..ليرة عدهم وطلعت..افتريت السوك كله اكللهم اريد معجون يكلي مافي عنا هيك شي..وصفتلياه معرفة .. اخر شي تعبت ورجعت..لكيت محمد توه ديطب للشقة .. سلمت علي..كلي وين جنتي..كتلة ردت اجيب معجون يكولون ماعدنه كام يضحك..كتله : شبيك..
محمد : لج يسموه مية بندورا مو معجون..
دنوة : هااا..يله وانه شمعرفني..
محمد : هسة ابدل واطلع اجيبلج..فوتي ارتاحي..
دنوة : ماشي..طبيت وسديت الباب..لكيتهم كاعدين ومتريكين يله انه هم كمت ما اشتهي ريوك ولا اطيق ريحة البيض .. بس مكضيتهه بتيته ولبن..

وره ساعة هيج اجه محمد جايب غراض بانيه ومية بندورا على كولتهم..سويت الاكل وتغدينه عادي..العصر الشقة البسدنه هم عراقيين .. عدهم بنية بكد جلنار تقريبا اجت يمنه..هي كبلهه هم اجت بين جمعة وجمعة.. كعدت تحجي عن اهلهه وعيالهه .. كالت شما اسويلهم ما يكولون امنية سوت هج..هي اسمهه امنية وتكريتية بس تحجي بغدادي مكسر..يعني هج جبناهه ع العيال وهاي فكامت تحجي ..
امنية : انوب تدرين اشنو..
دنوة : شنو..

امنية : امي خابرت على عمتي..وصتهه عليه..اختو لرجلي تقوللهه لا تخافين على بنتج تره اسعد انسانة بالدنيا .. حتى حمايه كام يضحك..كال هاي شتحطلهه وتطيب
دنوة : حماج مبين حباب وما اله اذية عليج..
امنية : لا يمعودة..هم عمن اداري فما يقول اشي..
دنوة : الله يساعدج..فترة زمان وترجعون والله يرزقكم..
امنية : الله يسمع منج..انتي بيا شهر هسة..
دنوة : بالرابع صار اربع ايام..
امنية : اي ما تسوين سونار تشوفين وليد بنية..

دنوة : اي هم هيج كلت..على باجر اروح..بقت يمنه نص ساعة وراحت..ضليت افكر بوضعهه..عدهه اهل تشتاقلهم .. امهه خوانهه وخواتهه..انه شعندي..بس ابوي ورائد..هم ابوي يمكن خابرته بس مرتين..بكل مره اسأله بلكت عنده خبر ع رائد..يكلي ما اعرف والله..كل فترة اسبوع او اسبوعين اروح وي محمد اخابرة تطلعلي شذى الحية..تكلي ابوج نايم لو تعبان مابي حيل يحجي..ما ادري تحجي صدك لو تجذب يمكن ما تريدني احاجي..

مر الوكت..رائد لسه ماله خبر..تعبت نفسيتي .. ما ادري شسوي واطلع نفسي من الكآبة الطبيت بيهه..ادور الكل نفس الشي..كلهم خايفين..محمد راد يرجع الحجية ما خلته .. كلتله اروح انه ولا انت تروح..يعني اخسركم ثنينكم حتى الله ما يرضاهه..وهاي هج ضلينه..ثاني يوم نظفنه الشقة انه وجلنار دفعت القنفة وحدي..ما حسيت بشي..كلت عدت على خير .. بس بالليل من تمددت ارد انام بطني شنطتني .. كامت توجعني..ضليت ساعة اتكلب..

الحجية كلتلي لا تتمددني..كعدي وريحي جسمج لا تشدين علي..ضليت للفجر بعدين نمت ع القنفة ما ادري .. طه كعد مريض ويبجي..لا بلاعيمة ادك ولا فلاونزه..مستبرد سبحته ونامت والشباج مفتوح..ضل ساعة يصير زين تفكة الصخونة وراهه يرجع..الحجي طلع جابله خافض حراره..نزلت حرارته استقرت..وره يومين رجعت ارتفعت حرارته ومنشول..رحت انه وجلنار ومحمد..محمد راح وي جلنار لدكتور اطفال وانه رحت لدكتورة نسائية..نفس المجمع..

سوتلي سونار وتأكدت من وضعي ..
الدكتورة : البيبي بنوتة..بس وضعك حرج..ليش هيك..
دنوة : شلون يعني..
الدكتورة : هو انتي عاملة شي موجعلك ظهرك..
تذكرت من دفعت القنفة كتلهه : اي دفعت القنفة وبطني صارت توجعني..بس صرت زينة..
الدكتورة : لا ماما ما يصير هيك..الجنين بيتأذى واحتمال كبير تسأطي..حكتبلك نوع حبوب واحد تاخذي بعد الفطور صباحا وبدياك ما تعبي حالك ع الائل لمدة اسبوعين .. ما بأصد انك ما تعملي شي..بس خففي حركاتك وألليهه..بعد هيك تعي اعملك فحص تا نتأكد ع وضعك ووضع الجنين..

ابتسمت كتلهه : ان شاء الله دكتورة..شكرا..كمت عدلت ملابسي..كتبتلي الدوة ورحت للصيدلية اخذته وانتظرت جلنار تجي هي ومحمد..طلعو ورجعنه للبيت..كتلهه : شطلع بي
جلنار : كالت نشلة ونازله على بلاعيمة..لو صايره بصدره جان بقت حساسية وكحة لحدما يعبر الدعش سنة..
دنوة : همزين تلاحكتيله خطية..هو صدك ضل كل فترة يصخن ويستعدل وحده..والله تفتهم..انه شكد ثولة..يعني حامل ودفعت قنفة شثكلهه..صدك ثولة..رجعنه للبيت الحجية سألتني شكالت الدكتورة..سولفتلهه..كالت لا تخافين..اخذي الادوية وانه ما اخليج تشتغلين بعد..بين ما تتحسنين..

اخلاص بس سمعت بعد ما اشتغل كامت تصيح..
اخلاص : هاااا ناوين تذبون الشغل علي مو..لا جذابة هاي مابيهه شي بس تريد ما تشتغل..
الحجية : اكلج اذا ما تسكتين اهج واعوفلج البيت .. بابا بنية مريضة شبيج انتي..فوك قهر اخوج اجيتي انتي..
اخلاص : حتضلين كلمة والثانية تكليلي فوك قهر اخوج
الحجية : اي جا شنو الديصير هذا..مو قهر..لو انتي ما تحسين..هاي مرته وبته ببطنهه..شنو مصيرهم اذا هو ماكو .. ما تعرفين تفكرين انتي..اشو روحي من وجهي..

مرت الايام بين مشاكل اخلاص..رائد هم ماكو .. حسيت الامل مل مني..كل يوم الفجر اكعد اصلي وابجي اكول ياربي مابي شي وعايش يشتم الهوى..هسة لو معاندته وباقية وياه المشكلة ما اعرف اعاند..وجدام منو..جدام رائد .. شيكلي اكلة اي..اعصابي تلفت..حتى الدوة تركته بس اول يومين اخذت بعدين عفتة..اكل ما اكل..وجبة وحده وبالكوه هم لوما الحجية تكوم تحجي وتكلي لخاطري يله اكل..تعبت من الوضع تعبت من الغربة..تعبت من غياب رائد..

هسة لو غايب واعرف اخباره جان زين..ع الاقل يرتاح كلبي وانه نفسيا ارتاح..بس وين..اعيش اليوم ع الامل .. بلكت يصير شي ويجاوب..كمت اتصفن هواي..وعلى هلحال مشت الايام..لحدما فديوم فزيت الفجر مرعوبة على صوت جلنار تصيح يمه ابنييي..ابنيييي حيموووت..حجيهههه وينج .. حجيهههه..طلعت من الغرفة بالعجل ما ادري شجاني وتمزلكت  بالباب..طحت على ظهري حسيته نفصخ .. كمت ابجي بدون صوت..اختنكت احس انفاسي نكطعت..

الحجية : الله الله ياستار..شبيج خالة كومي..
اجت تريد تكومني..كمشت ايدهه واحس بطني تشككت من الوجع..وظهري من النهاية متشنج كلش..كمت شلون مجان بس دخت دوخة فضيعة..اشوف الواحد خمسة..الحجية شهكت وخلت ايدهه على حلكهه..
الحجية : لج اخلاااص.. روحي لاخوج..هاي دنوة مدري شبيهه لازم ناخذهه لمستشفى صخام بعيني..
انه من الدوخة بعد ما اعرف راسي من رجليه..بس حسيت على احد حط شال على راسي ونزلنه..بطني وي كل خطوة تكوم توجعني اكثر..كمت ابجي وكامشة محمد من تشيرته اريد يروح الوجع متت..

ما اعرف شكد مر وكت بس طول هلفترة متت من الالم وابجي بس بدون صوت..صوتي ضعيف وجسمي يرجف..اخر شي حسيت شي بارد طب من ايدي لجسمي كله..وراهه غفيت .. كعدت ثاني يوم لكيت جلنار يمي..
جلنار : صباح الخير..شلون صرتي..
دنوة : صباح النور..احسن ماكو الم..شصار ..
جلنار : سقطتي..الدكتورة كالت جان وضع الجنين حرج وملفوف الحبل السري على ركبته من قبل ومتحركة الجاره .. هسة من وكعتي صار عندج اجهاض..
اجت خلت ايدهه على ايدي وباستني من خدي.. ابتسمتلي .. اول مره اشوفهه بهللطف من تحجي وياي..
جلنار : الله يكون بعونج..

عاينت عليهه وكمت ابجي..حضنتهه ودموعي تصب عشرة عشرة..هي الطفلة جانت اخر شي بقالي من رائد..وينه هسة ما يجي يشوف حالتي شلون تبهذلت..ضليت ابجي مادري شكد لحدما طبت الحجية ومحمد..
الحجية : الحمدلله ع السلامة خالة..شلون صرتي..
مسحت دموعي كتلهه : زينة..بقينه كاعدين نص ساعة تقريبا وطلعنه..اخلاص عاينتلي وسكتت ما حجت شي..رحت للغرفة اخذت ملابس وطبيت للحمام سبحت..خليت ايدي على بطني وابجي من كل گلبي..

ليش رحتي..مو تذكريني برائد..انه مهملة وطفلة .. ما عرفت اداري روحي واداريهه..ما ادري شكد ضليت جوه المي بس سمعت الحجي يكلي يله يابة خلصتي..سديت المي بدلت وطلعت..خلصت اليوم كله بس صافنة وما اكلت شي بس اشرب مي .. محمد كام يجيبلي معلاك وسبيناغ .. فواكه ولحم انه بس اشوف الاكل تنسد نفسي..ما اريد شي بس اريد انام ووجع الراس يروح مني..تعبني..بس اكوم احس راسي شكبره من الوجع..

نفسيتي للاسوأ بكل يوم..اكعد الفجر اصلي وابجي .. جنت كبل اكعد اصلي واحجي وياهه..ما ادري جنت احس بشعور حلو وامان..الحجية الوحيدة ضلت وياي وتواسيني .. ما ادري شنو هذا الاكتئاب المو طبيعي الفتت بي..رغم كلشي صارلي كبل بس مادخلت بمثل هيج جو..تكعد على صوتي الفجر من عز نومتهه تحضني وتواسيني..تخلي راسي على رجلهه وتضل تهدي بيه..نفسيتي تعبت واعصابي تلفت..ما ادري شلون حتمر هاي الايام..منا رائد ماكو..

ومنا تمرضت نفسيا وجسديا..بس اكوم ادوخ..محمد يخلي الاكل جدامي بس ما اكل..الحجية تجي بالكوه توكلني لكمة لكمة..تكلي اعتبريهه من رائد بس اكلي مو حتخلصين .. نسوان خسرن ولدهن كل واحد بطول الباب ورجعن اقوى من كبل انتي بعدج ما شفتيهه وهج صرتي..ما ادري شلون اكللهه انه مو ع الطفلة..بس ما ادري شنو هذا الاكتئاب الطبيت بي كلش أذاني..خفت ارجع مثل كبل..

بس كلشي ديصير يدفعني انتكس..رائد ماكو والاسقاط الصار..الوضع المتوتر هنا..والغربة وحدهه موضوع .. صعبة من تطلع تتمشى بالشارع وتشوف الناس كلهه واحد يسلم ع الثاني ويتمشون وانت وحدك جي من بلدك هذا .. العراق على الرغم من وضعه بس يبقى احسن من الغربة..ع الاقل بالعراق ريحة رائد بكل مكان..بالغرفة والصالة..طوله بالغرفة وع الدرج من ينتظرني انزل..من اجيت حضنته..جنت بس افوت للغرفة ارتاح..اكول رائد هنا وحيجي اول وتالي حتلو تأخر .. هسة شريد اكول..

فترة وكمت اتقبل الاكل احسن من اول مره..شوي راحت الدوخة..كام محمد يطلعني كل ما يجي من الشغل انه وجلنار والحجي نتمشى بالحدايق..يشتريلي حب وكرزات .. يضحكني يريد يلهيني..صدك موقفة حلو وما انسالهيا .. حسيته بمكان الاخ..ماقصر بشي ويجيبلي اكل علمود فقر الدم الصار بيه..والادوية..اول فترة صار عندي وجع مو طبيعي يشكك بطني من جوه..اكمش اعصر بملابسي وابجي بس اريده يروح..بعدين الحجية وجلنار اخذوني للدكتورة..

انقهرت على حالتي..نفسهه الاول مره رحتلهه..عرفتني .. فحصتني ضلت صافنة..
الدكتورة : في حدا جابرك تسئطي..او هو مسئطي..
دنوة : لا..
الدكتورة : بس وضعك كتير صعب ويحتاجلك ادوية وابر كمان لازم تبئي لحالك من دون زوج لمدة شهرين..واضح إنك سئطتي بعد الشهر الرابع او فيو..
دنوة : اي بالرابع جان باقيله جم يوم ويخلص..سبع ايام
الدكتورة : اي عم إلك هيك..لا تخافي..بس انتبهي لحركاتك ومواضع نومك..تاخذي العلاجات على توئيتهه ما تتركيهه تحت أي ظرف..هلشي متعلئ بمستئبلك..عم تفهميني..

حركت راسي يعني اي..محمد جابلي الادوية ورجعنه .. بس ضل الموضوع براسي..يعني شنو يصير..انه ليش ما سألتهه خاف يصير شي بعدين..ما ادري..اخلص العلاج وارجعلهه هي كالت..عود اسألهه..مشت الايام عادي..وهاي اخلاص من تريد تحاجيني يجي هو يحاجيهه..يكللهه بنية مريضة شتريدين منهه دعوفيهه ..هي تحجي شوي وتسكت..

على الرغم من كل هذا التحسن بس من اصلي اكوم ابجي .. انقهر ع الوضع الصرت بي..وشلون جنت هامله روحي والحمل وكلشي يخصني..اكوم الوم بنفسي..حتى ابوي نسيت اخابره بعد ..بس محمد من يروح يخابر يشوف رائد اذا موجود لو لا يخابره .. يجي يحجيلي..كتله : شلونه ابوي..خابرته..
محمد : اي..زين الحمدلله..يسأل عليج يكول خلتداري روحهه
دنوة : الله يسلمه..و رائد..ماكو..
محمد : ماكو لسه..ادور سنة ابوي حتطلع بعد شهرين .. ما ادري نرجع لا..ما اعرف والله دخت..حيصيرله خمس شهور ماكو..تلفت اعصابي..هو هم اخوي وماقصر وياي بيوم .. والله مال انزل للعراق..هي هم عيشه هاي..

دنوة : انه اكثر منك والله..بس شسوي..اذا عرف بيك راجع يكلب الدنيا..ومنا الحجية هم متقبل..
محمد : انتي كاعدة بالبيت..انه اطلع واشوف..مليت من الغربة وحشه حيييل..ادور هذول ولد ابو المطعم مدري شيريدون مني .. ما يعجبهم العجب..يشوفون ابوهم يمدحني يتخبلون ها شلون يكلك هج..هو انه بالكوة لكيت شغل فاسكت ما اريد يصير شي ويطردني..خلامشي وضعي هلفترة بعدين الف حلال يحلهه..ويمكن ارجع للعراق..
دنوة : والحجية شلون..
محمد : اذا اضل عليهه ما اكدر اسوي شي..

كمت وكتله : ما ادري..حروح انام راسي موتني صار يومين .. هو راح للشقة وانه طبيت انام..مر اسبوع مثل كل مره..بس تغير شي گلب كلشي..جلنار سوت جاي وكعدنه ع التلفزيون العصرية.. المغرب اندكت الباب مثل واحد مستعجل .. الحجي راح فتحهه..فات محمد كام يبوس بالحجية ويعاين لاخلاص فرحان ويضحك..كلنه صافنين علي..اخر شي حجه الحجي
وائل : شبيك يول..شصاير..
محمد : لك يابة انه الدنيا ما سايعتني من الفرحة..اليوم عازمكم كلكم ع الخبر هذا..
الحجية : شكو يمه ما تحجي..

محمد : رحت للمحل كلت اليوم اخابر رائد اذا ما جاوب انزل لبغداد بعد ما اكدر ابقى هنا..خابرته وجاوبني..الف الحمدلله ما راح الصبر والقلق ع الخالي بلاش..
الحجية كامت تبجي خطية..انه من الفرحه دمعت..المهم عايش ويشتم الهوى..كلنه فرحنه والجو كله تغير..لأن اربع شهور هو ماكو ولا كلمة منه..والقلق يوم عن يوم يصير ضعف .. بس الحمدلله مابي شي..كعد يحجي
الحجية : وشلونه..حاجاك وين جان..
محمد : خطية تعبان..كال الاتصالات انكطعت فد دور بسامرا موجودة بس قليل..بس ببغداد اكو على طول..ومن ينزل لبغداد يضل نايم ميسوي شي .. ادور تلفونه طايحه منه ومتفلش كال ماكدرت اشتري..بس ماخذ السيمكارت..

الحجية : الف الحمدلله..والله خلص كلبي..كل يوم اكول مابي شي..حيخابرنه ونعرف اخباره..
محمد : اي والله..
الحجية : بعد شكلك..ما نرجع لو شلون..
محمد : يكول لا ترجعون ولا شي..الوضع بعده ما مستقر يرادله سنه لخ اذا مو اكثر..
الحجية : وسنة ابوك حتطلع شلون..
محمد : والله ما ادري يمة..ما حاجيته بهلموضوع..هو هم يالله يحجيله كلمتين..صوته تعبان خطية..هسة حروح للشغل فد يومين واخابره احاجي بهلسالفة ميخالف..

كام طلع..رحت وراه سديت الباب..رجعت للغرفة احس رجلية متعيني بعد..شكد فرحت..الدنيا بكبرهه ما وسعتني .. شكد ضجت من الوضع العشنه بي والاسقاط والكآبة الفتت بيهه بس كله راح وخلص من سمعت رائد مجاوب..شلونه صوته هسة..شكد مشتاقتله يالله من يكلي مشتاكلج .. كلشي بي مميز..حتى طريقة الحجي والكلمات حلوه بس من عنده .. مفصله علي تفصال..شحجي خاطر اكدر اوصف السعادة الحسيت بيهه من هلكلمتين..

مر اليوم عادي..شوي ارتاحينه وصار اكو تغيير..بالليل صليت ونمت مرتاحة..ثاني يوم العصر طلعنه نتمشى كلنه محمد طلعنه.. الجو زين وماكو مكان ثاني نروحله..غالية ومحمد ماطلب فلوس من رائد..بس على كد اليجيبه من الشغل نستفاد منه..هاي اخلاص كل فترة تتعارك وياه..عود هي بنية جامعية ومتعوده ع اللبس والفخفخه..تكله اريد ملابس جديدة ماعندي ..هو يكون كبل اسبوع او اسبوعين مشتريلهه خصوصي الهه..يكوم يتعارك وياهه بس ميصيح..ماشفته عصبي بيوم..

العصبية محطوطه لمحمد كلهه..هيج مسجلة باسمه..اكو ناس تصير عصبية بس مو من كلبهه.. بس يصيح وتصير هوسة بعدين يسكت..بس رائد احسه يحجي من كل گلبه..سواء كان الموضوع يخصه او لا..يذب حيله بالشغله لحدما يكملهه .. محمد عكسه..هيج من فوك لفوك..ما يطول خلك خصوصا اذا جانت الشغلة متخصة..يعني صدك ماكو مثل رائد .. لا بطبع ولا باسلوب ولا حتى بشكل..صدك محظوظه بي..واحسب يوم يوم بس خاطر ارجع واشوفة..

انه اتمشى واتذكر..اخر شي ابتسمت ورجعنه للشقة .. جان اجو ٣ ولد شباب واكفين يم باب شقة محمد..من شافوه اجو يسلمون علي..انه عفتهم ورحت للشقة..الحجية واخلاص وجلنار هم اجو وياي..رحت بدلت جان تندك الباب..اجه محمد من الباب حاجاني مستعجل..
محمد : اكلج عيني سوي جايات خمسة..هذول ولد اصدقائي جايين عندي خطار..حطلع اجيب شغلة واجي..
دنوة : ماشي..راح..سديت الباب وطبيت صارت الحجية بوجهي سألتني منو..كتلهه محمد..

الحجية : شيريد مو هسه جنه سوه..
دنوة : اصدقائة جايين ويريد جايات مادري شنو..
الحجية : روحي ارتاحي..هسة اخلاص تسويلهم..انتي مريضة ما لازم تتعبين..
ابتسمت كتلهه : ماشي..رحت للغرفة تمددت..رجلية كامت توجعني من الطريق..هو صح يونس بس يضوج بنفس الوقت طويل وكله صعود يتعب..شوي واجت اخلاص تصيح..
اخلاص : ما تكومين تشتغلين انتي يالخمة يالوصخة .. لو بس حايرة تبيعيهن براسي..شوفي لج تره مالي خلكج..كومي هسة سوي جاي ووديلهم انه شكووو..
عدلت كعدتي..كتلهه : هي الحجية كالت انه معليه..روحي حاجيهه..كامت تصيح بعدين راحت..هاي على كلشي تنكنك شكد تضوج..

سوتهن وراحت..انه طلعت كعدت يمهم بالصالة..شوي وطبت هي ومحمد تبجي وكامشه ايده..هو كامشهه من تشيرتهه .. الحجية راحت علي فكته منهه..
الححية : شبيك وياهه..ليش هشكل..
محمد بعصبية : كاعدة تتمضحك وي هذا الولد صاحبي .. لا وخجلانة هم..شكد حلو..اكلج اخذيهه من جدامي لا اخلص عليهه هسة وروح ابوي..بعد اذا لا تشوفيني خلقتج..
عافهه وطلع..الحجية اندارت عليهه..كمشتهه من زندهه وتعاينلهه بعصبية..
الحجية : لج صدك الكالة اخوج..شعندج وي الولد..

اخلاص هي وتبجي : يمه والله جذاب..ما اتمضحك ولا شي .. هو سرسري..اكله هاي الصينية من محمد ضل يعاين علي ويبتسم..كبور تلفه وتلف هاي الكح....أشرت علي وكملت حجيهه..هاي الجلبة كله من وراهه..لو طالعه انتي .. بس لاااا جانت تدري حيصير هيج..تريد تخلي محمد يكرهني .. لج اكرهجججج..لو ميته انتي والطفل احسن من عيشتج..جنج شمعة فكر..وخري من وجهييييي..وخرييييي..
الحجية : ووجع اي والله..شلون تفشرين عليهه جدامي .. ولا عبالك متربية وجامعية شهادتج بطولج..هي هاي الكدرتي عليهه..كدرتي على هاي الفقيرة..

اخلاص : هاااا اشو ما تحجييين..مخلية امي محامية مالتج تسوين روحج ماعندج لسان..
دمي فار من حجيهه..اكثر من مره فشرت علي وسكتت لخاطر رائد..بس هلمرة ما اسكت..احسهه متقصدة تسوي هج بس تريدني احجي..كتلهه : وشكو تفشرين علي..انه يمج حواليج .. هي الحجية كالت ختسوي..انه شعلي .. لو بكلشي تردين اطلعيني غلطانه وتحمليني مسؤولية..
انه واحجي وياهه جسمي كام يرجف وكلبي يدك سريع .. ما ادري شصار بيه..احس انهاريت..كعدت ع القنفة وايدي على عيوني ابجي..اجت جلنار يمي..
جلنار : لج هاي دترجفين..اهدي شويه شبيج حتموتين .. اخلاص شبيج وياهه خطية..دعوفيهه..هسة يجي محمد وفهمي عدل قابل شحيصير يعني..

انه اسمعهم وساكتة..اعصابي انشدت كلهه..بعد ما اكدر اتحرك..تأذيت..كله بسبب شذى..الله ينتقم منهه..بعدني صغيرة وهيج اعصابي تلفانة..من اكبر شحيصير بيه .. ضليت ساعة هيج..ما احجي ولا اتحرك..بعدين فكيت شوي..كمت سبحت شوي ارتاحيت.. اسبوع ضل محمد زعلان من اخلاص وما يحاجيهه..يجي يتغده ويتعشه ويروح..هي من تشوفه هج تجي تتعارك وياي..ها هاي كله بسببج خربتي علاقتي بأخوي..اسمعهه واسكت..ما اكدر احجي ادور يصيرلي شي تجي تتشمت بيه..بس الحجية تحاجيهه..وراهه اجه محمد للشقة..صاح على اخلاص يحاجيهه..انه دا اسوي عشه واسمعهم..

محمد : فهميني..انه ما افتهم..
حجتله نفس الحجي الجانت تعيده علي من تريد تضوجني وتذكرني بالموقف..كلتله : صاحبك هو الما يحترم روحه .. روح حاجي اله مو انه..
ضلو يحجون..صالحته وكعدو يحجون عادي..صبيت الاكل وكعدنه ناكل..اخلاص تخلي ايدهه على رجل محمد وتحجي بتنعوص اخوي واخوي..تعاينلي بطرف عينهه..هاي شدتحس وين تريد توصل..انه يمهه حواليهه..من كل عقلهه كلما تضوج تكلي انتي السبب بزعلة محمد..لو طالعة انتي بمكاني مجان صار هج..مللتني من الموضوع هذا..كمت من اشوفهه تحجي اعوفهه واروح للغرفة ارتب الملابس لو اشيل الجراجف ابدلهن..المهم الهي نفسي عنهه..

مشت الايام..رحت وي محمد انه والحجية..خابرت رائد .. شكد متغييير .. صوته وكلماته..يحجي كلمتين ويتعب..شكد تعبان .. ماردته يتعب اكثر..بس سألته عن صحته وانطيته للحجية حاجته .. شوكت ارجع واشوفك..مشتاقتله اكثر من الدنيا كلهه .. اذا رجعت بعد ما اعوفه دقيقة..متت من البعد ادور ابتعد مرت اللخ ابد..لو مدري شيصير..احس روحي ردتلي من سمعت صوته صار شهور مسامعته..

انتظرتهم يخلصون بعدين خابرت على ابوي..ماطولت دقايق وسديته..متحسن شوي وانفاسه منتظمة..كبل من جان يحاجيني احسه جان ديركض..يحجي ويلهث..هسة احسن .. سألته..كال كمت اراجع دكتور..صح انه بعيده..بس من اسمع اخابر زينه عن ابوي احس عايشة وياه..افرح على فرحه واحزن على حزنه..من الاشياء الزينة الصارت هلفترة هو هذا اليوم.. ما يمر يوم الا اذا تذكرت الاغنية بالليل كبل لا انام .. احسهه بمكان رائد..صح موجود ومابي شي..بس الفرق من السما للكع..بين بس اسمع اخباره وبين اشوفه بعيوني ..

مرت فترة كصيرة وصارت سنة ابو رائد..الحجية كعدت الصبح كامت تبجي..اخلاص همات..
الحجية : هسة هاي النار البيه شيطفيهه..الناس تريد ترتاح فتروح تزور الكبور..انه شلون ارتاح..هو هلتراب انحرمت من شوفته..ليش هشكل..ليييش.. مسحت دموعهه هي وتعاينلي كالت.. دنوة..روحي شوفي محمد وين..ارد ارجع للعراق .. حتلو ارجع وحدي ميخالف..
بهلاثناء فات محمد..كعد يمهه ويمسح بدموعهه..يحاول يهديهه وهي عبالك ما تسمع..حقهه..رجلهه اول سنة اله هاي وهي ما حتروحله..شكد صعبه عليهه..

انه وجلنار بس ساكتين..يعني شرد احجي..ماكو شي يخفف عنهه..ضليت اسمعهه هي ومحمد..
الحجية : دخابر على رائد شبيك..هسة حتى من الكبور حارمنا..شبي ماتكلي..
محمد : يمه غير خايف عليكم..شبيج اصبري فدوه اروحلج .. فترة زمان ونرجع للعراق عود زوري براحتج..
اخلاص : خابره مراح تخسر شي..يمكن هو مايكول هج .. لا تخليهه حسره بكلبهه خطية..
محمد : ميخالف..باجر ارجع من الشغل اخابره..
ضل كاعد يمهم..كال حجيب اكل خفيف من بره وانتو رتبو ووزعوه..هي جانت اكو ٣ شقق بعد يمنه..يعني محنتعب

شوي وطلع..كعدت يم الحجية اواسي بيهه..كتلهه : ميخالف خالة..هي هاي الدنيا كلهه ظروف وانتي عندج ظرف شتسوين قابل مجبورة ع البعد..مثل الهدت وسكتت..ما ادري شنو احساسهه لأن ما عايشة بهج موقف..ضلت تلوب لحدما اجه محمد جاب اكل..رتبته انه وجلنار واخذه وزعه..

ثاني يوم كال خابرت رائد ميجاوب بس يدك..وراهه بفترة اسبوع او اقل اجه محمد كال خابرته وجاوب..
الحجية : اي وشكال..وين جان..
محمد : كال جنت وياهم علمود السنة مالت ابوي..ورايح للمكبرة..هسة هو نازل للدوام..
الحجية : ولا يرتاح..من مكان لمكان سودة علي..
محمد : حاجيته..كال مرتاح مابيه شي..
الحجية : الله كريم..شسوي..

مرت الايام..الحجية تحسنت شوي ها..او تقبلت الموضوع يمكن رائد ما حاجيته من ذاك اليوم..بس محمد يطمنه عنه كل اسبوع خمس ايام هيج..بس ابوي حاجيته كبل يومين .. كال لا يضل بالج علي..المهم تنتبهين لصحتج..انه زين من اسمع بيج زينة..صدك كلماته اثرت بيه..ولو ينعدن ع الاصابع بس بقن بگلبي فرحني..رجعنه للبيت..بالليل نمت حلمت حلم مدري شلونه مخربط..بس فزيت من النوم مرعوبة..عبالك حقيقة

مهتميت..كلت عادي هواي تجيني هج احلام..وره هليومين اندكت الباب..رحت افتحهه..طب محمد..يعاينلي بنظرات مدري شلون اوصفهه..اول ما فات كال وينهه امي..كتله بغرفة اخلاص كاعدة..عافني وراح للغرفة..سد الباب وراه .. الفضول خلاني اروح للغرفة..سمعته يحاجي الحجية..
محمد : يمه ما ادري شلون اكللهه..هسة هي هاي سالفة .. الله يرحمه.....

يتبــــــــــــــع.......................

اعتذر ع الانقاطع الطويل ، بس نت ماعندي وواهسي للكتابة قل ، هسه احسن ، بس حيصير موعد للتنزيل بين يوم ويوم ساعة ١٢ بالليل ، هيچ زين بالنسبة الي وانتو هم ماعدكم شي يعني كاعدين ، وشكرا❤️؛