#سجين_و_رُوح.
الحلقة العشرين " والاخيرة " 😢
//
//
خش القاضي و صبو اللي قالقاعه ، بعدين قعمزو
القاضي >> المحاميه روح مصطفي
روح >> موجوده
القاضي >> موكلك موجود
روح>> موجود حضرتك
القاضي >> عندك حاجه بتضيفيها الملف القضية ؟
روح >> بنطلب من سيادتك تعطيني شوية وقت انا طامعة في كرم حضرتك انك تسمع مني كل حرف حانقوله ، و بعد نكمل كلامي حانعطيك المستندات اللي عندي
القاضي >> تفضلي بس ياريت يكون الكلام في سياق القضية
روح >> الكلام كله في القضية سيادتك
هز القاضي براسه و روح لبست نظاراتها وكانت القوة اللي عندها مستحيل حد يتصورها ...
حانبدا نحكي من اول ما مسكت القضية وكيف وصلت للي وصلتله ...
بدت روح تحكي وشفت للحاجه االي عطتها ليا قبل ما نخش للمحكمة كانت ورقه فتحتها لقيتها الرسمه اللي كانت ترسم فيها ليا لما بدينا القضية ، كانت الرسمه كامله و بكل تفاصيل وجي تفصيله تفصيله ...
روح >> اول ما جاني ملف القضية بديت فيه من اول وجديد ما اعتديتش بالمحامي اللي قبلي مع احترامي الشديد له .. بديت من هل موكلي
لما مشيت الهل صقر او بالاصح فاطمه اخته
كان من كلامها واضح انه في حد مهددهم ، وكان واضح انه مش متخليين علي ولدهم ...مافيش حد يسيب المكان اللي تربي وعاش فيه ويحول من مكان المكان عشان ولدهم ضارب واحد ؟كنت عارفه انه الموضوع اكبر من هكي ، وربكة فاطمه وسؤالها عن صقر هنّ اللي اكدنلي
لما مشيت الامل ، عرفت انها مخدوعة زي ما انخدع صقر ، بس غلطتها انها صدقت و باعت صقر عشان ولا حاجه ! خافت علي روحها وكانت انانيه وما صبرتش ... لما تلاقيت معاها اول مره كان برضو واضح خوفها علي صقر وواضح انها مش فاهمه شي من القضية ... وحكتلي اللي صار من خشت صقر للحبس بس كانت داسه عليا حاجه
والحاجه هذي هي انها ازوجت واحد عشان فلوسه الحاجه اللي ماكانتش عند صقر واللي عرفته بسهوله من كم بوست عالفيسبوك ! و اللي وصللها انه صقر واخذ مؤبد هو نفس الشخص اللي هدد هل صقر وخلا امل تنسى صقر وتبدا حياة جديد مع راجل ثاني عشان فلوسه بس ! والشخص هضا حنعرفوه قدام
بعد ما كملت من امل قررت نشوف علي ونحكي معاه وجها لوجه ... وفعلا شفته
حاول انه يكون عادي ويحكي بطريقة مريحه عشان انا نصدقه بس كنت اذكى منه بشويه
ولما حكالي انه حب ويبي يستقر ويجوز عشان هكي ابتعد علي صقر ما صدقتش ، من كلام علي وربكته عرفت ان حتي علي متهدد والتهديد كان من نفس الشخص اللي هدد الباقيين ومن هنا الرؤية بدت توضح عندي اكثر و اكثر
وقبل ما نحكي مع علي قررت موضوع الكفاله و قررت اني نطلع صقر علي ذمة التحقيق و بقيود وشروط واجد ! بس تحملتهن كلهن عشان كنت عارفه انه لما صقر يطلع
الهدوء كله حا ينقلب عاصفة !
بعدها حكيت مع ربيع واللي كان كلامي معاه بمثابة " القشه اللتي قسمت ظهر البعير"
كان كلام ربيع فيه اختلاف عن كلام معز صاحب هيثم
اخر شي واالي اثبتلي صحة كلامي لما مشيت الهل المجني عليه "هيثم" ... هنا عرفت انه كل شي مرتبط ببعضه وعرفت انه القصة مش قصة جاني ومجني عليه
القصة فيها عصابات و فيها سرقة و مخذرات
كانو اهل هيثم يحكو عليه وكأنه موجود بينهم ما يحكوش بصيغة انه مخطوف ، واللي زاد شككني اني لما جيتهم كانو بروحهم ومافيش ثواني الا وجا صاحب هيثم اللي كان معاه يوم الجريمه "معز"
يعني فيه حد كلمه و قاله تعال والشي هضا ما ريحنيش!
بعد ما استجوبتهم كلهم رديت و استجوبت "ربيع"
عشان انتأكد ... وفعلا كلام ربيع اكدلي انه القصة مش صافيه و انه هيثم مش مجني عليه ! هو جاني
وروح تحكي نط عوض >> انتي بتقلبي القضية علي خويا حسبي الله ونعم الوكيل
القاضي >> احترم نفسك و اطلع برا ! عشان ما نحكمش عليك باختراق اداب الجلسة
خذا الشرطي عوض وهوا يعيط و طلعه برا
القاضي >> كملي حضرتك
روح>> لما انخطفت طلبت من موكلي صقر انه يرد للحبس ونسحب الكفاله بدون اي تبرير ولا اي اسباب كان يحساب اني تخليت عليه او صدقت انه هو مجرم بس كان العكس " برمت وبحتت الصقر " كنت مآمنه اكثر واكثر انه بريء ، بس بعد خطفتي تأكدت انهم مش حا يخلو صقر في حاله وحايقعدو وراه وراه و حانخسر القضية وصقر حا يضعف ويسلم نفسه عشان يحميني ويعترف بشي هو مش دايره عشان هكي طلبت منه انه يرد للحبس ..
بعد خشت صقر للحبس طلعت قصة الجثه اللي كان مشتبه فيها انها هي جثة هيثم ، و الشي هضا داروه ومعز و عوض باتفاق مع شخص حتعرفوه بعدين طبعا
بعد ما انا جيت و حكيت مع عوض و معز حسو انه القضية حاتاخذ مجرى ثاني غير اللي هما متفقين عليه وحاينفضح سر هيثم ف كان فيه جثة واحد مش ليبي يشتغل عندهم بنفس طول ووزن هيثم طاح من السلوم وهو يشتغل ومات شاء القدر تكون موته بعد جيتي انا و بعد الاحداث الي صارن جت في بالهم الفكره هذي و حرقو الجثه عشان كانو عارفين انه الحرق يخفي معالم الجثه و حايعرفو الشخص من تقرير دكتور الاسنان و الشي هضا حاياخذ وقت والوقت هضا هما اللي يبوه عشان يكسبو الصفقة و يهربو هيثم برا البلاد يحطو اللوم علي صقر بس الي ماكانوش حاسبين حسابه انه صقر رد للحبس قبل ما يديرو جريمتهم و بالشي هضا زاد تأكدي انه صقر بريء ، مشيت للشبح وسألته عن الشخص اللي عرف منه المكان اللي انخطفت فيه و بشوية فلوس قدرت نخليه يحكي وجابلي اسم الشاب الاسمر نفسه اللي كان مصبي عليا يوم خطفتي ...
يوم اللي انخطفت فيه انفتح الباب شويه وشفت شخص مصبي برا ! والشخص هضا كان هيثم !
ايوه هيثم وعرفته بحكم انه صوره عندي في ملف القضية ، هو الشخص اللي هدد هل صقر و هو اللي وصل الامل انه صقر خذا مؤبد و هو اللي هدد علي وخطط الكل شي ! بس عن طريق ناس كان يدز فيهم عشان ما يبانش فالصورة
"كل اللي فالقاعة انصدمو ماعدا معز " بحتت روح في صقر وابتسمت
القاضي >> هدوء ، كملي
روح >> دورت ع الشاب الاسمر اللي كان مصبي عليا يوم خطفتي و من يومين قدرت نشوفه ونحكي معاه و تأكدت منه ان هيثم حي ! و ان هو اللي خطفني وهو اللي دزلي رسالة التهديد
بمساعدة من ؟؟
"برمت وبحتت في معز " بمساعدة عوض ومعز
"معز كان وجه ما يتفسرش وما نطقش بولا حرف "
روح>>غلطتهم انهم لما خطفوني ما قدروش يحكمو الخطة كانو مش متوقعين انه حايجي محامي ثاني يمسك القضية ! كنت انا بمثابة مفاجئة لهم ..كانت خطتهم ماشيه تحت السيطره لعند ما انا بديت نستجوب فيهم واحد واحد من اول و جديد
حكيت مع الشاب الاسمر اللي كان اسمه حسن
وكان يشتغل عشان يلم اكل عيشه و لما زريت عليه وعرف ان القضية فيها حياة وموت حكالي اللي يعرفه و لميت اللي يعرفه هو عاللي نعرفه انا وعرفت اللي صار
نجو القصة هيثم وليش دار هكي اصلا وشن بينه وبين صقر ؟
بالنسبة الهيثم ، من اكثر من ثلاث سنين لما جا هيثم العلي في مكان شغله و كان من سوء حظ صقر انه كان في نفس المكان
كان يومها هيثم جاي العلي فيه بينهم شغل في وصار بينهم خلاف ع الـ فلوس واختلفو وتعاركو و صقر فزع مع صاحبه ومش فاهم شي ضرب هيثم طاح علي حاشية فقد الوعي مشو بيه للمستشفي وخش في غيبوبه و معش ناض وهله معش تنازلو وانحكم علي صقر لعند ما يقدرو حجم الضرر بعد وعيته من الغيبوبه وقعد موكلي ثلاث سنوات وهوا يراجي في اي خيط امل !
بس اللي ما تعرفوش انه هيثم ماكانش في غيبوبه
ولا كان مخطوف اصلا ! هيثم كان هارب ، والقضية هذي كلها تخطيط و تنفيذ من هيثم بذات نفسه
مع مساعدة معز صاحبه اللي هوا اصلا كان ناصب معاه علي نفس العصابه
المهم خش هيثم في غيبوبه فترة بسيطة بعدها لما ناض جت الضربة هذي من صالحه و معز وعوض هربوه من المستشفي و مشى المنطقة ثانيه عشان ماحدش يعرفه و يدوره لانه القصة كلها في وجه ولو ناض من الغيبوبه حا ينفضح وينمسك سوا من الشرطة او من العصابه اللي سارقين منها فلوس
لانه معز صاحبه خلاه ينصب و خذا منه الفلوس بدون ما يطلع فالصورة ف مانضرش ابدا وعشان هكي كان هو طالع فالصوره و متوكل نيابةً عن هل هيثم فالقصة كلها
و بعد ما طلعو هيثم داروه كآنه مخطوف ولفقو برضو تهمة الخطف الصقر عشان تبان القصة كلها انها جريمة، بس عشان يبينو الموضوع طبيعي اكثر و عشان كل العيله تصدق عوض و معز دسو الموضوع عالعيله كلها عشان هكي ام هيثم كانت الوحيده اللي محروقه وهما هضا اللي يبوه يبو كل شي يمشي كانه صاير فعلا
وبعدها مشو الهل صقر وهددوهم ، بس مش هما اللي هددو ، لاء دزو ناس ثانية عشان ما يطلعوش هما فالصوره ولا حتي ١٪ وكان كله تخطيط من هيثم من الالف للياء واللي ينفذ معز وعوض
وعلي كان يساعد في صقر فالبدايه عشان ماكانش فاهم شي كان هو يشتغل مع هيثم بس ماكانش له علاقة لا بفلوس ولا بمافيا ولا بآي حاجه .... بس بعد السنه الاولى وبعد ما هيثم ناض من الغيبوبه و خطط للخطة هذي كلها مشوها حتي علي علي و خاف من التهديد كان يبي يساعد صقر بس كان في نفس الوقت اناني صح ماكانش له دخل باللي صار بس كان يقدر يساعد بآي طريقة
واتفقو انه ينسو صقر بكككككل و يحطو كل شي في وجه ويراجو القضية تاخذ شوية وقت لعند تنتسى و حطو علاء يراقب صقر فالسجن عشان يعرف تحركاته و علي شن ناوي ، و هددو هله و هددو صاحبه و بعدو عنه اي خيط نجاة ممكن انه يخليه يطلع او يفكر انه يطلع .... بس الحظ جابني انا قدامه وقدرت نعرف هضا كله
ومسكت روح الاوراق ومشت عند القاضي ، مدتله الملف
روح>> الملف هضا فيه تسجيلات صوتيه بصوت واحد من افراد العصابه و هو يحكي علي هيثم كيف ضحك عليهم ، بس مانقدرش نعطي اي معلومه كيف تحصلت عليهن احتراما لخصوصيتهم
وهذينا صور الهيثم موثقه بالتواريخ جابهن زميلي فالشغل الهادي يثبتن انه هيثم حر طليق طول فترة وجود موكلي فالحبس
لعند اخر صورة كانت من يومين له وهو ماشي للبنك يسحب في جميع الفلوس اللي في حسابه
وطبعا كل شي مش ب اسمه ب اسم مزور
و الشاهد حسن موجود برا عشان يشهد
القاضي >> نادي عالشاهد
طلع الشرطي كلم الشاهد وخش حسن
القاضي >> قرب واحلف انك تقول الحق
حسن >> اقسم بالله نقول الحق
القاضي >> تفضلي
روح >> حسن يوم اللي انا انخطفت من خطفني
حسن >> هيثم
روح >> وانت شن علاقتك بهيثم ؟
حسن >> نشتغل معاه من زمان بس والله ماليا علاقه بشغله انا في حالي والله
روح >> نعرف ياحسن نعرف والقاضي يعرف
المهم هيثم كان لشن يخطط
حسن >> ماكانش يحكي قدامي واجد انا كنت صبي ندير في شاهي وقهوة بس فالمستودع اللي هما قاعدين فيه ، بس كان يقول انه بياخد الفلوس ويهرب وكانو يجيبو في اسم صقر واجد
روح >> تمام " طلع حسن وروح خذت نفس وبحتت فالقاضي" وكملت كلام
للتوضيح عشان كل الي حاضرين يفهمو الي صار
هيثم كان يتعامل مع عصابة و نصب عليهم هوا ومعز و كان فاليوم هضا جاي العلي كان يبي منه فلوس بالصدفة وقصتهم بعيده عن العصابة
بس هيثم كان متوتر من قصة السرقة و جت فشة الغل في علي و تعاركو علي فلوس كان فلوس شغل بينهم في الكترونيات جايبهن علي من برا و الكلام هضا حكاه ليا ربيع و اللي مبش علي يحكيه ليا
شدت بينهم وصار اللي صار
خشت هيثم للمستشفي جت من صالحة و الف كل القصة و مشاها عالناس كلها و حاول انه يستعطف الرآي العالم و يخلي الناس اتعاطف معاه ، قلب القصة يمين ويسار بس فالاخير لا يصح الا الصحيح
"تنهدت روح و سقمت تصبايتها و بحتت فالقاضي"
روح >> بعد سماع الكلام هضا كله ، نتمني من حضرتك سيادة القاضي تاخذ بالادله و تحكم ببراءة موكلي صقر مع تعويض عن الاضرار المعنويه اللي صارتله طول الفتره السابقه ... وحاليا الشرطة عندها مكان هيثم و مسآلة وقت بس ويكون مقبوض عليه وكل الاوراق موجوده فالمستودع وياريت يطبق عليه القانون جميع التهم المنسبه اليه هو ومعز بما فيها قضية حرق الجثة ... وعلي عوض بتهمة التستر والمساعدة علي الجريمة
كملت روح كلامها ، ونزلت نظاراتها وحطت يدها علي رقبتها بتوتر وبحتت فيا وقعمزت
القاضي >> ترفع الجلسة للنظر والتدقيق و القرار بعد المداوله ، والتواصل مع الاجهزة الامنيه بخصوص المستجدات بالقبض علي المدعو هيثم و الحصول علي الاوراق اللي تثبت ذلك
طلعنا من المحكمه و قعدنا نراجو في الساعه ٢ تجي عشان قرار القاضي
طلعنا وصبيت انا و غسان وبدر والهادي و قبطان وشبح ... وكانو مقابلينه عوض و معز و الشرطة محاصرتهم عشان ما يطلعوش من المحكمه بعد الاتهامات اللي وجهتها لهم ، شفت ام هيثم تبكي الوحيده اللي وجعتني في القصة هذي كلها
الشبح >> انتي قريب ودرتيني في داهية كل شوية شبح عطاني وشبح قالي 😂
غسان >> اوي ؟
الشبح>> سكتنا ازح😂
انا >> انت احمد ربك ان القاضي ما عطاكش تهمة بعد كلامي 😂
الهادي >> انقنك محامية قدعه
انا >> يستر الله من قرار القاضي بس يارب يلحقو يمسكو هيثم يارب
بدر >> طلعتي تلعبي فيها من ورانا
انا>> عيب عليكم اكيد مش كل شي نعرفه نمشي نقوله لكم اسرار مهنه 😂
القبطان >> شكلي بنبدا نهبك في جرائم و نوكلك
روح>> غير اعبى 😂 خليني نشوف صقر قبل ما تبدا الجلسة
خشيت للقاعه كان صقر فالزنزانه مازال ومنذر يحكي معاه من بعيد و الشرطيين واقفين وممنوع حد يقرب بس عشان شاهين يعرفنا خلاني نقرب
روح >> شاهين لو سمحت
شاهين >> مفروض تعطوني هدية انا بعد يطلع السيد من الحبس عمركم شفتو شرطي فري هكي ؟
انا >> انقنك اسد ما فيش كيفك
شاهين غمز للشرطي اللي حذاه و منذر طلع
انا >> عندك العلم انك كنتي خيال ؟؟
طول ما انتي تحكي وانا مش فاطن الشي الا انتي
روح >> نحبك ، بشنو ما يحكم القاضي يحكم اهم شي انا نعرف انك بريء
انا >> وتعرفي اني نحبك صح ؟
روح هزت براسها
انا غمزتلها>> يارب نطلع اليوم بس
روح >> وشن حادير كان طلعت
انا >> حاجات واجد ، كلهن في حوشنا 😉
روح>> من اول يوم شفتك فيه وانا قتلك ان قضيتك اكيد تحرش 😂
انا>> معقوله واحد يتحرش بمراته 😂❤️
روح >> اه انت
انا >>غير نطلع من الحديد اللي انا فيه ونوريك الانت شنو
روح >> امواه باي 💋
برمت روح
انا >> حاناخذها راه وراسك الا واخذها و حقيقيه مش من بعيد
روح ضحكت وما بتش تبرم عليه
كنا كلنا قاعدين برا و نراجو .... وكل شويه نشوف للساعه مانبيش الوقت يفوت والقاضي يآجل الحكم ليوم ثاني ، ماصدقت وصلت هنا ما صدقت انه كل شي قرب ينتهي
كان عندي شعور انه حاياخذ براءة بس كنت متوتره لدرجة مش قادره انتأكد من شي
كلنا نراجو وام صقر كل شويه ترن ويارا اختي ترن و كلهم يبو يعرفو و القضية قاعده واصله ترندعالفيس بوك و كلهم يراجو فالحكم
قعدت نبحت فالوقت و مازال نص ساعه و مافيش ولا اثر الهيثم
روح>> متأكد من المكان يا شبح؟
شبح >> ان شاء لله متأكد لو ما قعدش هرب
روح>> يارب
غسان >> لو ماطلعش هيثم شن حايسير نخسرو القضية
روح>> اكيد القاضي مش حا يحكم ببراءته و فيه حلقة مفقوده
غسان >> باهي والصور اللي جبناهن والاوراق والمستندات
روح>> يخففن الحكم لكن ما يطلعنش براءة وحتي لو القاضي كان مصدق انه هيثم هو اللي مخطط الكل شي بس مستحيل يحكم بعلمه الشخصي
لازم بآدله كامله قدامه
كنت قاعده نبرم فالممر الي مقابل القاعة ، و شفت الشرطه خاشه من بعيد و مكلبشين هيثم
غسان بحت فيا وانا مش مصدقه انه هيثم طاح وقدرت نجيبه
انا >> يسسسسسسسس
غسان >>الحمد لله
بدر >>حلال نمشي نخربله وجه
انا >> ماحدش يقرب ماحد يجي شورحد
خطم هيثم من جنبي و كان ملامح الشر في وجه كانت امه تبكي و معز و عوض يخبطو في يديهم ومش عارفين شن يديرو ورغم هضا كله كنت مازلت مش واثقه من قرار القاضي
كلمنا شاهين نخشو القاعة المحكمة و نردو اماكنا عشان القاضي ينطق بالحكم
خشو كلهم وقعدت انا مصبية برا ، اذكرت لما جيت لصقر اول مره وكيف كان مُحبط
اذكرت لما جيته ثاني مره وكان كيف متلقي خبر وفاة باته ، ولما جيته ثالث مره و طلبت منه يحكيلي عن قصة امل ... مر عليا شريط القضية كله في ثواني
شاهين >> استاذة روح تفضلي بنسكر الباب
روح >> اها ؟هيا تمام
خشيت و بحتت في صقر و درت نفس ما هو يقولي لما يلقاني متوترة ، خذيت شهيق و زفير
وخشيت للقاعة
القاضي >> النطق بالحكم
صبينا كلنا
"صقر "
فاللحظة هذي كنت مغمض عيوني ومنزل راسي ونفسي مقطوع وحسيت الدنيا تبرم بيا ... حياتي كلها موقفه علي كلمة وحده ، كلمة وحده مرتبطه بيها حياتي وحياة ناس غيري كنت مغمض عيوني مش قادر نبحت في روح مش قادر نبحت في حد كانو كلهم متآملين ، كنت نبي ناخذ براءه مش عشاني ! بس عشانهم هما ...
"روح"
كنت عارفه شعور صقر فالوقت هضا وعارفته كيف شايل حمل الكلمة اللي حا يقولها القاضي ، كانت عيني عليه طول الوقت اللي يحكي فيه القاضي كنت شابكه يديا في بعضهن و القوه اللي كانت عندي في بداية المحاكمة كلها انهارت قعدت مش قاده نوقف حسيت الدنيا تبرم بيا وعيوني كانن بس علي صقر
القاضي >> حكمة المحكمة حضورياً ببراءة المتهم " صقر " ومعاقبة كل من هيثم فلان الفلاني و معز فلان الفلاني بالسجن المؤبد وفق نص المادة "***"
ومعاقبة المتهم عوض فلان الفلاني بالسجن لمدة خمس سنوات بتهمة التستر و المساعده الجنائية ، " رُفعت الجلسة "
"صقر "
اول ما قال القاضي كلمة براءة المتهم صقر فتحت عيوني وبحتت في روح اللي لقيتها تبحت فيا ومبتسمة ، اول ما قال القاضي الحكم روح قعمزت معش قدرت تصبي
//
//
طلع القاضي و طلعو اللي فالقاعة كلهم الا انا
كان فيه شوية اوراق لازم يندارن بعدها نطلع
غسان >> انقنك بطلة
بدر >>براڤو يا روح براڤو
منذر >> مش عارفه كيف نشكرك
روح>> ماحدش يشكرني صقر بريء من الاول
الهادي >> تي خبطتيهم في بعضهم
روح >> ماكنتش نقدر ندير شي لولاكم انتو و العم حسن ...
منذر >> حانسبقكم علحوش نقول الهلي و الحقوني اه كلكم معزومين عالغدا
بدر >> تم تم
مشت روح ادير فالاوراق و كلمت هلها و كلمت سارة وطمنتهم وصبت قدام المحكمة تراجي في صقر يطلع و الشباب كانو في سياراتهم يراجو
طلعت انا من المحكمة و نزلت مع الدروج لقيت روحي مقابلتني ، نزلت بخطوات سريعه وجيت مقابلها
روح >> الحمدلله عسلامة
انا >> عادي نروحو علي حوشنا دغري ؟
غسان طالع من روشن السيارة يعيط >> هيا يا عم العاشق جيعانين جيعانين
بدر >> سقدونا يا هوه فشارع راكم
غسان يعيط>> تحرش تحرش
روح تضحك
انا >> يا عليك زقوب ، جايه بسيارتك ؟
روح >> اه
انا >> عطيني المفتاح
مدتله روح المفتاح
انا >> طير يا تافه انت وياه طير
طلعو الشباب بالسيارات شور الحوش و انا خذيت سيارة روح و لحقتهم ، وصلنا للحوش و لقيت هلي دايرين غدا ومكلمين الشارع كله و الشباب كلهم قاعدين و مكلمين هل روح وخالها عمر و كلمو باتها بس ما جش
اول ما خشيت قابلتني امي تبكي وجتني فاطمة
اضبطني و روح مصبيه بعيد تبحت فينا
بعدت امي من عليا وجت عند روح اضبطتها >> الله يربحك يا بنيتي ربي يبعد عليك عيال الحرام ويخليكم البعضكم
روح >> الله يسلمك يا عميمه
طلعت للشباب فالصالون وسيبتهم جوا ، تغدينا وقعدنا كلنا نحكو عالقضية
غسان >> معقوله هيثم يطلع ورا هضا كله ؟
انا >> ماجش في بالي حتي ١٪
غسان >>بس انقنها روح جابتها
انا >>غم باهي
بدر >> رقاله الاسد
انا >> مش تغديتو ؟ متبوش اتفضلو
غسان حط كراع علي كراع >> لا قاعدين
انا >> عليك حفلة
غسان رن تلفونه وطلع
غسان >> قلبي
غفران>> وين عند صقر
غسان >> اه
غفران >> باهي تمام
غسان >> اسمعي راه خلاص انا
غفران >> شن فيه
غسان >> العرس يطلع الشهر الجاي قسم بالله ما عند امي صبر
غفران >> بشويه يا غسان
غسان >> لاشوية لا شي ماتخلينيش نخش نحكي البدر توا
غفران >> خلاص ساهل تو نحكو
غسان >> ايوه
غفران >> مروح توا ؟
غسان >> شويه اخرى
غفران >> باه انا رايفة عليك 😞 من لما طلع بدر معش شفتك
غسان>> عيب يا حبيبي ما تجيش نجي نتحشم
غفران >> مارايفتش عليا ؟
غسان >> عليا الحلال بنموت رياف
غفران >> هههههههه نحبك
غسان >> نموت انا ، تشاو خليني نخشلهم
غفران >> تمام باي
//
//
في الليل روحو كلهم ، خذيت رُوح وطلعت لشقتنا
روح خشت >> ليا فترة ما جيتش هنا من بعد طلعتي من المسشتفي
انا >> بكرا تو نجيب حد يضم خليها توا
روح اتهرب >> لالا خليني نضم بس
انا مسكتها من يدها >> وراس امك هذكي ما تسير
روح >> صقر شن تبي 😭😂
انا >> ينعنجد صقر شن تبي ؟ مش كأنه خلاص ؟؟ ولا تعرفي تحكي ويطلعلك لسان وانا محبوس بس ؟
روح نزلت راسها
انا >> تحبيني ؟؟
روح بحتت فيا وهزت راسها
انا >> قوليها
روح >> لا مش حنقولها عشان تشعف زي ما شعفتني وحكيت
انا خذيتها من يدها ونمشي بيها شور الدار بشوية >> انتي عارفه عليش ساكت طول الفترة اللي فاتت صح ؟
روح تمشي معاه >> اهاه
انا >> تعرفي اني حطيتك في راسي من اول مره نشوفك فيها
روح>> ياسلام ، بس انا فالاول كنت نحس فيك مش طايقني وعلي فكرة حتي انا مش طايقتك
انا وصلت للدار وصكرتها >> باه تبيني نوريك توا انك طايقتيني ؟
روح >> ماتبينيش نحكيلك عالقضية
انا نزلت علي رقبتها >> لالا نبيك تسكتي بس
" خلاص يابنات خلاصصصص " 😂
//
//
قبل الفجر بشوية
انا >> طقتيني توا
روح نعسانه >> بنرقد رقدني
انا نلعب بشعرها >> ارقدي ياعيونه
روح >> صقر اوعدني انك معش اتعبني
انا ضحكت
روح خبطتني بشوية علي صدري >> مش اللي في بالك يا حيوان قصدي فالحياة يعني العادية
انا >> انتي تعرفي يا روحي اني عصبي ومانتحملش فيك شي ف الله غالب تحمليني
روح تغمض في عيونها >> نتحملك بس اوعدني انه اخر مره تحرق اعصابي و تكون اخر قضية
انا >> حاضر يا روحي حاضر
روح >> كنت عارف اني حانطلعك براءة ؟
انا >> كنت واثق فيك حديري اللي تقدري عليه وزيادة لما شفت الرسمه عرفت انك حليتيها يامحاميتي
روح>> محاميتك انت بس ؟؟ وباقي الشعب
انا >> يدورو علي محامي الروحهم اما انتي ماحد ذايقك
روح ضحكت
انا >> اضحكي اضحكي هضا اللي مودرني انا
//
//
بعد ست شهور
غسان وغفران طلع عرسهم بعد الحكم ببراءة صقر ب شهر حددو علي طول العرس 💗
غسان من سجين و مشكلجي، لراجل مسؤل وخلاته غفران يعقل و يفكر فيها هيه بس .
بدر حكى مع صقر بعد ما طلع علي فاطمة اخته ، وصقر حكى الفاطمة ، فالاول رفضت فاطمه عشان ماكانتش حابه تعاود تجربة الخطبة طلبت من صقر انها تحكي مع بدر قبل ما يكون في اي شي رسمي و صقر عشان يعرف بدر كويس وافق ، بس علي اساس حط شروط انه مش كل يوم يحكو بس طبعا ماحدش عبره لا فاطمة ولا بدر 😂🙆🏻♀️
وسام ، طلع من الحبس وقعد صاحب الصقر
اللي قعد داير باله منه انه ما يغلطش ويحاول يساعده قد ما يقدر عشان ما يعاودش تجربة الحبس مره ثانيه
علي اول ما سمع ببراءة صقر جا وعلي اساس بيسلم عليه بس صقر ما عطالش مجال وطلب منه انه يطلع من حياته نهائي
وامل سمعت بطلعت صقر بس زيارتها الاخيره الصقر خلتها تنساااااه " ويابنات والله العظيم علي مش متجوزز امللل قسم بالله ما شور بعضهم 😭😂"
بالنسبة الشاهين كان الشرطي الصالح في الوقت الصاح ، كان مع السجناء مش عليهم يساعد فيهم ضمن القانون ومرات خارج شوية عن القانون 😝
ماننسوش رفيق برضو و الشرطي الي هرب صقر كل حد مر في حياة صقر علّم في حياته وسيبله اثر
بالنسبة قبطان وهادي ، روح خلتهم يشتغلو معاها فالمكتب بعد ما طلبت من استاذ محمود و استاذ محمود وافقلها
دارو صحبة مع بعضهم و كانو متفقين فالشغل
مشكلجيين و صياع بس وقت الشغل شغل
بالنسبه للشبح ما قدرش يسيب شغل المافيات بس مازال متواصل معاهم
وعشان تعرفو ان مش كل النهايات سعيده كلها ف العصابة اللي كان يتعامل معاها هيثم الشرطه ما قدرتش توصللها و قاعده لعند توا حره طليقه بس اهم شي هيثم انمسك
هيثم فالسجن ولقى علاء اللي كان حاطه يراقب في صقر و معاهم معز كانو دايرين عصابة فالحبس مع بعضهم
بالنسبة للباقيين سارة ويارا و هل روح وباتها وهل صقر ومنذر كلهم نفس ما هما ما صارش معاهم جديد في حياتهم
اما بالنسبة الرُوح ، من بعد قضية صقر وقففففت شغل و طلبت اجازه طوييييله .. القضية هذي استهلكت حياتها كلها و استهلكت كل طاقتها
كانت الفترة هذي بمثابة حياة جديده نست كل شي وراها قاعده بس عشان صقر كل يوم كانو يحكو مع بعضهم بدون اي ملل كانو يتعرفو علي تفاصيل بعضهم من اول وجديد ... اشتغل صقر مع بدر وغسان كبرو شغلهم و دارو بزنس سيارات هما الثلاثه و شرا صقر الحوش اللي هما فيه بدا ما كان اجار
//
//
اما انا " من سجين ورا اربع حيطان ، الصقر حر طليق و برُوح جديده "
//
//
روح
كنت قاعده نلبس عشان بنمشي للمكتب ، فتحت الدولاب طاحت شنطة الاوراق ... مسكت الشنطه بنعرفها اطرطشن منها الاوراق ... جت عيني علي ورقة ما كنتش انا اللي كاتبتها ، رفعتها وبحتت فيها كانت كلها خرابيش واسماء
اسم هيثم و اسم معز و اسم الشبح و حاجات واجد والخط كان خط صقر
خش عليا صقر للدار لقاني ماسكة الورقه
روح >> كنت تعرف ان هيثم مش مخطوف ؟
صقر هز براسه
روح >> من امتي ؟
صقر >> من بعد ما انخطفتي
روح >> و كيف عرفت
صقر >> انا لما نكون برا مش بين اربع حيطان نعرف كل حاجه
روح >> وليش ما قتليش ؟
صقر >> كنت نبيك اطلعيني انتي وتعرفي انتي بروحك كل حاجه
روح >> افرض اني انا ما عرفتش ؟ كنت مش حاتقولي ؟ كنت مستعد تقعد فالحبس ؟
صقر >> كنت واثق انك حا طلعيني عشان هكي ما حكيتش ماجش في بالي ١ ٪ انك مش حاتعرفي
روح >> فعلا انت لُغز
صقر>>وقتلك حليني ؟
رُوح>> كل ما نقول اني حليت اللغز الاخير ووصلت لك نلقى روحي في لغز جديد
صقر >> ننسو موضوع القضية ونوصلك للمكتب ممكن ؟؟
روح ابتسمت >> اوكي
جت بتطلع مسكها من يدها >> شروطنا شنو ؟؟
روح >> ما يسكرش عليا باب مع اي موكل و لازم الهادي يكون معايا في المكتب ولو حد تمادا معايا نقولك دغري ومانخليش عيني تجي في عين حد وماحدش ياخذ رقمي الشخصي ياخذو رقم المكتب بس ، تمام ؟
صقر >> لا نسيتي حاجه
روح >> ومانضحكش ولا حتي نبتسم ؟
صقر >> هكي انتي رُوحي ، عطيني بوسه
روح >> ومازلت تبي بوسه ؟ الساعه ٩ وققت هيا
صقر >> صبرني ياربي علي القوانين وخلاص
روح تمشي >> صقر را نردك من وين ما طلعت هيا
صقر >> ياعليك وقت قعدت انا نتهدد😂
طلعو روح وصقر وهما يتناقرو وصلها عالمكتب ومشي هو الشغله
//
//
ديما حاول ماتكونش اناني و ماتحطش في عقلك انه حياتك ملكك بروحك !
مرات تكون حياتك منبني عليها حياة اكثر من شخص !ما تفكرش في روحك بس فكر انه لو تآذيت ممكن في حد ح يتآذي معاك
//
//
بالنسبة للسجن
" كان المكان الي لام جميع الاصناف ، البرىء و المجرم و اللي غلط و اللي متعمد واللي ناوي يرد واللي يتمني يطلع معش يرد ، كلنا بشر ومعرضين للغلط بس الغلط الاكبر انك تستمر فالغلط "
وعلي قولة القانون
" المتهم برىء حتي تثبت ادانته "
رُفعت الجلسة 💙
#النهاية .