سجين و روح

الحلقة التاسعة عشر

#سجين_و_رُوح.
الحلقة التاسعة عشر "ماقبل الاخيرة"
//
//

نزلت الطاقيه علي راسي نزلت تحت بحتت مالقيتش سيارة غسان ! شفت لساعة لقيتها ٣:١٠ !

//
//

ثاني يوم فالسجن

وسام >> صقر صقر
انا >> نعم
وسام >> نوض نطلعو برا
انا >> اطلع تو نلحقك
وسام >> تمام

نطيت من السرير غيرت دبشي و لحقته علي برا

وسام >> اكيد الادرينالين عندك عالي بعد يوم امس
انا >> ركب فيا الرعب علي تكه وكنت حا ننتهي
وسام >> مش منك انظر في شن كنت ادير اللي معش فطنت للوقت
انا >> تأدب اه
وسام >> اوكي اوكي 😂😂

//
//

اللي صار يوم امس

طلعت من السجن وانا نبحت فالساعه لما ما شفتش سيارة غسان توترت

انا >>مش وقت امك يا غسان مش وقتك

بحتت يساري مالقيتش حد بحتت يميني لقيت دورية شرطة مصبية ، عرفت انه غسان شافهم وبعد السيارة عشان ما يشوفونيش ، نزلت راسي وحاولت اني نسرع مشيتي مشيت عكس ماكانت دورية الشرطة موقفه وقعدت ندور في مكان السيارة

انا >> وينك يا غسان وينك

بحتت فساعه لقيتها ٣:١٥ فطنت الضي من بعيد غسان يولع ويطفي بيش نفطنله سرعت مشيتي و قعدت نبحت يمين ويسار ونمشي ركبت فسيارة

غسان >> اربط الحزام

ربطت الحزام و غسان يجري بسرعة ٢٥٠ ، في الوقت هضا كان وسام يراجي فيا فالزنزانه و الشرطي كان قاعد عند نفس الباب اللي طلعني منه و يراجي فيا ويبحت فالساعه

٣:٢٧ دقيقة كنت انا وغسان قدام السجن نزلت نجري حتي باب السيارة ما صكرتش

الشرطي>> دقيقه اخرى كنت حاتودرني وتودر روحك

انا داهش ونتنفس بسرعة و نغير في دبشي
سلحت دبش الامن و لبست دبش السجن و قعد هوا يمشي قدامي و انا نمشي وراه ، فتحلي باب السجن و خشيت لقيت وسام قدامي ، بحتت فالساعه
٣:٣٠ دقيقة

وسام >> اسد والله
انا تنهدت تنهيدة راحه >> عيب

دزيت رسالة الروح من تلفون وسام اني وصلت ونطيت السريري فوق

//
//

عند غسان ، بعد المغامره اللي دارها رد للحوش عالفجر و كان مش فاطن التلفون لقى ١٠ مكالمات من غفران لانه لما صقر دزله المسج كان قاعد يحكي مع غفران وصكر عليها بسرعة ومشاله

طاح علي سريره من ال تعب و رن علي غفران

غفران بصوت ناعس >> انت وين ؟؟؟ شغلتني
غسان >> درت مشوار سريع وجيت
غفران >> وين مشيت فعز الليل ؟
غسان >> حاجه سريعة ماتشغليش بالك
غفران >>مشيت تشوف فيها
غسان ضحك >> اه كشفتيني
غفران>> غسان ما تنرفزنيش 😡
غسان >> صوتك نعسان ارقدي يا بيبي ارقدي بلا عرايك
غفران بصوت واطي>> غسااان 😞
غسان >> ياعيون غسان ، والله موضوع شور صقر طلب مني حاجه و درتها له
غفران >> باهي تمام بترقد
غسان >> رقديني
غفران >> انا نعسانه
غسان>>خليك عالخط لعند نرقد
غفران >> تمام ياروحي

//
//

ثاني يوم بدر وغسان فالشغل

بدر مقعمز وماسك تلفونه وكل شويه يبحت فيه وغسان فاطنله

غسان >> اوي
بدر بحت فيه >> تدويلي ؟
غسان>> لا ندوي الجدك
بدر >> شن تبي ؟
غسان >> وين مودر
بدر >> قاعد يا راجل
غسان >> بجوك

نزل غسان راسه عتلفون وبدر بحت فيه
بدر >> اسمع
غسان >> ياراجل خرفي ها
بدر>> بنحكيلك حاجه بس بينا اه وقولي شن ندير
غسان >> احكي
بدر >> هضك اليوم مش قتلك بنبرم علي هل صقر وهكي ؟؟
غسان >> تمام
بدر >> المهم شفت اخت صقر وهكي و درت سبلة اني نعطيها رقمي بحجه انها لو تستحق الحاجه
واصريت انها تعطيني رقمها عشان عارفها مش حاترن بعد نعدي
غسان >> باهي 😂😂😂😂😂
بدر >> بتضحك بنصبي نكسرلك سنونك
غسان >> سكتت كمل 😂
بدر >> خلاص بعد يومين رنيت عليها نسال علي اساس
غسان >> تو يا غبي البنت عندها خو تعطي فيها في رقمك عشان لو استحقت حاجه ؟ غبي انت
بدر >> ما لقيتش سبله اخرى
غسان >> يانويرتي عالبنت
بدر >> نحكيلك عشان تشفط انا ؟؟
غسان >> غير قولي شن ردت هيه
بدر >> ردت عليا بادب الحق وحاولت نسالها ونهدرز تجاوب علي قد السؤال و بعدها قالت لي بتصكر وهكي وخلاص معش دورتني وانا ماعنديش وجه ندورها

غسان>> اسمع انقنه الموضوع بايخ خصوصا انه صقر توا في محنه وهكي مش وقت الكلام هضا تمام بس لو البنت عاجبتك راجي صقر يطلع وعدي اخطي

بدر >> نبي نعرفها قبل ونبيها تعرف طبعي قبل مانبيش نهد هدود

غسان >> معناها اسمع الجلسة الاخيره الاسبوع الجاي تمام ، راجيها تكمل و ان شاء الله صقر يطلع و احكي معاها واحكيلها انك ناوي علي كذا كذا كذا و احكو شويه و لو تريحت اطلبها رسمي
بدر >> تم والفتره هذي ما ندير شي

غسان >> دز رسالة مره مره هكي جو انك مش ناسي

بدر >> تمام .. بس مش عارف حسيتها هي تحكي عادي
غسان >> اكيد بتحكي عادي ماتبيش تقولك نحبك عاد
بدر >> مثقل دمك
غسان>> دمك هضا وسيب ام التلفون رايح كيف الوليه الحرجانه تراجي في راجلها يرن

بدر >> طالع ندخن اقعد في امها

//
//
في المستشفي عند روح

سمعت ساره اللي صار وجت الروح ثاني يوم

سارة >> ياحيوانه شغلتيني عليكي الحمدلله عسلامة
روح >> الله يسلمك جت بسيطه
سارة >> انظر من اللي واخذ عقلك وانتي تسوقي
يارا >> هو في غيره
روح >> اسكتي انتي يا سوسه اسكتي
يارا >> نازله نجيب نسكافيه 😒

نزلت يارا

سارة>> ما صارش شي جديد
روح >> امس جاني هنا
سارة >> كيف ؟؟
روح>> هبل ياساره هبل
سارة >> انتو الاثنين مش بعقولكم
روح >> هو خذا عقلي
سارة>> والله الا انتي اللي واخذه عقله
روح>> مش عارفه
سارة >> انتي بعقلك ؟؟ بتقنعيني انه واحد يخاطر بحياته كلها و يطلع وهو محبوس وقضيته في كل مكان منتشره عشان يجيك ويشوفك ويطمن عليك
وتقوليلي انه مش عارفه وما يحبنيش؟؟
هضا مش يحبك بس ! هضا رايح فيها ومودر

روح >> ليش ما يحكي ؟؟ ليش كل كلامه غموض والغاز و حركاته شي وكلامه شي ثاني
يقرب مني وفي ثانيه يبعد
يقعد معايا كويس بكل بس كلامه عكس تصرفاته

سارة >> يبي يحاول يبعدك عنك عشان هوا شايف انه هو خطر عليك ! شايف انك انتي ماتستاهليش تكوني معاه ، كل شي شين يسيرلك يشوف فيه انه هو السبب فيه وهضا كله عشان شنو ؟ عشان يحبك صدقيني

روح >> مش عارفه ياساره لو يحكي ويريحني خلاص شن تبي بعد اني انا مراته! الجلسة قربت وكل ما تقرب نخاف نخسر القضية ونخسره
او اني نطلعه براءة و لما نطلعه براءة يختفي من حياتي

علي خشت الممرضة ، دارت تشك علي روح و مر الدكتور وكتبلها خروج

عدت سارة و طلعت روح بس طلعت علي حوش هلها مش علي حوشها

روح >> خلوني نتريح شويه بكرا عندي شغل واجد
ام روح >> تكمل القضية هذي تسيبي اللي اسمه صقر

روح>> ماما انا عمري ما خشيت معاكي في نقاش وكل شي نقولك عليه حاضر بس لعند صقر وستوب
هذي حياتي وانا حره فيها لو سمحتو خلوني انا متريحه وشايفه انه صح ممكن تخلوني ؟

ام روح >> مانبيكش اتمرمدي

روح >> عشان صقر محبوس ؟ ما اهو بابا خذيتيه راجل حر طليق شن دارلك ؟؟ عدا اجوز عليك وتمرمدتي وينه هوا بابا اصلا ؟؟ جا سال عليا يعرف اني فالمستشفي ؟؟ قاعد ما يندريش علينا اصلا
حتي لو كان يصير عزا يجيني ثالث ليله يحسابه صبح

بحتت في يارا >> وانتي يايارا اخر مره تدخلي فيا عارفتكم خايفين عليا بس خلوني في حالي انا مش صغيره

غطت روح وجهها بالبطانيه و امها طلعت من حذاها هي ويارا وصكرن عليها الدار

روح حولت البطانيه من علي وجها و غمضت عيونها زين بتحاول اتخلص من كل شي

//
//

مرن يومين والحال فيهن مستقر

غسان وغفران جوهم عادي نقير ونقار وغسان يوتي في روحه عشان بعد طلعت صقر لو كان طلع بيحدد العرس دغري وكلهم متآملين في طلعته

بدر معش حكى مع فاطمه اكتفي ب انه هوا دزلها مسج يسال عليها و فاطمه ما ردتش عليه ومعش حاول يدز سمع بكلام غسان

وفاطمة كانت لاهيه وعلي اعصابهم مش فاضيه اصلا ترد علي بدر كان كل تفكيرها انه يوم المحكمة قرب و مافيش ولا حتي امل واحد انه اكيد حا ياخذ براءة

اما عند روح كانت واخذه راحه بعد الحادث فالحوش حطت سيارتها فالتصليح عشان حصلت خبطه و تراجي فيها تطلع عشان بكرا تمشي للمكتب ، القضية مازالت زي ما هيه
شن الي وصلتله روح ؟؟ لقت حل ولا ما لقتش ؟ ماحدش يعرف

اما عندي انا ، كنت نحاول اني مانديرش اي شي غلط
مش عشاني ؟ عشان روح بس ! مانبيش اي شي يسير يخربلها اللي هيه بداته
كنت عارف انه القضية هذي اقوي قضية لها
وكنت نبيها تكسبها
اللي كنت نفكر فيه مش القضية ؟ انفكر لو انحكمت شن ممكن يسير ؟ روح حا تخلي عني زي ما كلهم خلوني فالبدايه ؟؟
ولو طلعت روح حاتسامحني وترد تقربني منها ؟؟

//
//

في السجن

وسام >> كنك كيف البنت اللي مصاحبه جديد حاط يدك علي خذك وتفكر

انا >> وانت ماعندكش ما ادير غير يا تنط من هنا وهنا يا تقيد في احوالي

وسام >> ماعنديش ماندير
انا >> طير عدي للساحه
وسام >> مش ماشي يابيبي
انا >> خطرها امتي طالع انت ؟
وسام >> ست شهور
انا >> وبعدها ؟
وسام >> نقعد شهر برا ونرد هنا 😂😂
هنا حوشي انا
انا >> حوش امك مغير نطلع انا معش تحلم تخش هنا
وسام>> غير اعبى ، مليون قضية سرقة تراجي فيا 🤤
انا >> اهمد تل
وسام >> اطلع ندور علي دخان
انا >> دور وجيبلي
وسام>> خدام الوالده انا
انا >> طير

//
//

في المكتب عند روح

خش للمكتب وقفلت علي روحها ، طلعت اوراق القضية كلهن

بدت من اول يوم مشت فيه الصقر ، جابت ورقة كبيره قدامها و خطاط ، و قعدت تكتب في كل شي
بدت من يوم اللي طلعت فيه من صقر للحبس لعند اليوم شن صار

وبدت توصل فالاحداث في بعضهن .... تحاول انها تلقى راس خيط يكون رابط بين حاجتين

بعد كم ساعه تعبت عزقت روحها عالكرسي وغمضت عيونها ... بحتت في تلفونها تشوف فالساعه لقتها ٢ ونص القايله خذيت شنطتها وطلعت من المكتب

//
//

روحت روحش للحوش ساعه ٣ ونص لقت باتها قدامها

روح >> اللهم طولك ياروح
يارا >> من مبدري منزرع هنا
روح >> شن يبي ؟ زيزه واجوزت شن المطلوب
يارا >> جاي يساول فيك😂
روح بحتت فيها وخشت

مصطفي >> كيف حالك
روح >> كويسه ؟؟ شن خطرلك
مصطفي>> كان درنا خير يا ووك وكان درنا شر يا ووكين
روح >> ليا اسبوع دايره الحادث
مصطفي >> ما سمعتهش ما حد قالي
روح >> كان تسأل ديما راك عرفت
مصطفي >> انتي مش متربيه

روح سكتت وما بتش ترد عليه طلعت من حذاه و خشت الدارها وصكرتها

قعد باتها يعارك زي ديما و بعدها طلع

يارا خشت علي روح >> ماتزعليش روحك خلاص حايطلع صقر من الحبس و اتريحي من وجوهنا تقعدي عنده ديما

انا بحتت فيها وعيوني دمعن ، جت يارا جنبي واضبطتني و انفجرت بكا ، ليا زمااااان ماسكه روحي ومانبيش نبكي بس خلاص انفجرت معش قدرت

يارا >>تحبيه يا هبله
روح >> نموت بدونه والله
يارا>> حايطلع صدقيني انتي عمرك ماحطيتي حاجه في راسك وخسرتيها مش روح اللي تخسر حاجه متمسكه بيها
روح>> يارررب يارب
يارا >> عدي اغسلي وجك وتعالي نتغدو امك دايره بشاميل من اللي يحبه قلبك
روح >> تمام

//
//

الليله اللي قبل الجلسة الاخيره
كانت ليلة صعبه علي كل حد عنده علم بالقضية

بدر وغسان خايفين علي صاحبهم
هل صقر يفكرو في ولدهم و امه ما رقدتش الليل

هل روح يفكرو في بنتهم وشن حايسير لو كسبت او خسرت القضيه

روح ما رقدتش الليل كل ما تغمض عيونها يجن قدامها صور التحقيقات و الاستجواب و الاوراق و القضية

اما عندي انا ، كنت مغمض عيوني و نراجي في امتي يمر يوم بكرا بس ! نبيه يمر بخيره وشره .

//
//

يوم المحكمة 🔥

جاني شاهين >> صقر واتي ؟
انا >> اه

برمت علي وسام

وسام >> ان شاء الله براءة "واضبطني "
انا >> هههههه ما تآوڤرش واجد مرات نردلك
وسام >> حشيشة امك نكد
انا >> ردبالك علي روحك سوا رديتلك ولا طلعت
وسام >> نتلاقو برا يالصقر

برمت علي شاهين حطلي الكلبشات في يدي و طلعت صكر باب الزنزانه ومشينا ، طلعنا ومشينا السيارة السجناء ومعانا الشرطي رفيق و شاهين

طول الطريق وانا نراجي فاللحظة اللي يحكم فيها القاضي

//
//

عند روح ..
نضت فالصبح ، ماكنتش راقده الا ساعه بس
غسلت و صليت و طلعت درت ميك اب غطيت بيه كل تعب وجي ..... طلعت لبستي و روب المحكمه و خذيت الاوراق كلهن و طلعت

يارا >> شن الشياكه هذي ؟
روح >> شكلي حلو ؟
يارا >> خياااالي حا اطيحي ام المحكمه كلها
روح >> انا وين وانتي وين 😂 انا طالعه ادعيلي
يارا >> توكلي علي الله بس و انا متأكده انك حاتروحي معاك ورقة البراءة

طلعت وركبت فالسياره و رنت عليا سارة
سارة >> اول ما تطلعي كلميني
روح >> حاضر ادعيلي بس
سارة >> ان شاء الله ماتطلعيش من المحكمه الا وانتي ماسكه في يد صقر
روح >> ههههه صكري صكري بس غسان يرد

رديت علي غسان >> الو
غسان >> طالعين انا وبدر توا
روح >> انا طالعه
غسان >> كل شي تمام
روح >> عندك انت تمام ؟
غسان >> تمام التمام
روح >> نتلاقو
صكرت من غسان و مشيت للمحكمة ، حطيت اغاني بصوت عالللي عشان ما نبيش اي تفكير يجيني

//
//

في المحكمة 🔥

وصلت و قعدت ندور بعيوني علي روح وكل شويه عيني عالباب ، لعند شفتها خاشه ... تقول للقمر انزل وانا نقعد مكانك .... كانت ماشيه ومش فاطنه الحد ... روب المحكمه والاوراق في يدها لابسه نظاراتها و تمشي وتدور فيا بعيونها

صبيت

شاهين >> شن فيه ؟؟

انا نبحت شور الباب
شاهين ضحك ... فطنتلي روح بعد صبيت وجت شوري

روح تحكي مع شاهين >> ممكن خمس دقايق مع موكلي ؟

شاهين يضحك >> تحت امرك

روح جت بتحكي قاطعتها

انا >> نبيك تعرفي شن ما صار اليوم سوا خذيت براءة ولا ما خذيتش براءه اني نحمد في ربي كل يوم عشان خشيت للحبس تعرفي ليش ؟ عشان شفتك و خشيتي حياتي ... نبيك تعرفي قبل ما نخشو لقاعة المحكمه و قبل ما القاضي يحكم اني " نحبك " من اول يوم جيتيني فيه وكنت رافض انك تكوني محاميتي انك لخبطتي حياتي ، كنتي كل يوم تسللي القلبي اكثر واكثر ، قعدتي تمشي فعروقي وتفكيري كله فيك حتي وانا في اسوء حالاتي ما فيش في عقلي الا انتي كنت نموت مليون موته وانا بعيد عليك و ننحرق مليون حرقه لما بس نتخيل انك ممكن تتآذي وانا مانكونش معاك وندافع عليك
تأكدي اني لو خذيت براءة نحبك و لو خذيت مؤبد نحبك
بنقولك الكلام هضا توا عشان ما نبيكش تحطي في بالك انه قرار القاضي هو اللي حدد موقفي ، انا موقفي متحدد من يوم اللي شفتك فيه
طولك شعرك عيونك وتوترك ، ضحكتك و تطبيستك لما اتوتري ولما تحطي يدك علي رقبتك لما تلعبي بنظارتك ورعشتك لما نقرب منك ، هضا كله خلاني مش بس نحبك ، لالا حاجه غلبة الحب اصلا

كانت روح تبحت في صقر و عيونها في عيونه وكانت تسمع فالكلام و زاد الحمل عليها بعد الكلام هضا اضعاف الاضعاف كان صقر قريب منها و مكلبش ماردتش بولا حرف اكتفت بنظرتها بس
"‏"إن النظر إليك طمأنينةً، فكيف العناق؟""

شاهين >> هيا يا عمي السيد اوي الناس كلها تبحت فيكم

علي خشت بدر وغسان ومنذر للمحكمه ، قتلهم مانبيش هلي يحضرو مانبيش امي وفاطمه يشوفوني وانا مكلبش و القاضي يحكم عليا

مسكني شاهين وانا مكلبش ويديا لاوره و بارم ونبحت في روح وهيه تبحت فيا

روح >> صقرر

قربت مني وعطتني حاجه في يدي
خذاني شاهين وخشينا لقاعة المحكمة
خشيت للزنزانه اللي فالمحكمة و صكر شاهين الباب عليا وكانت اليوم محاكمتي انا بس ما فيش معايا سجناء ثانيين ... كانو قدامي بدر وغسان ومنذر وكم حد جاي يحضر لانه المحاكمة مفتوحه مش مغلقه وجايين هل هيثم ، معز وعوض و امه جايه

روح مقعمزه تراجي فالقاضي يخش ، لبست روبها وبحتت فيا

همستلها بدون مانحكي " نحبك " ابتسمت و بحتت قدام ، علي خشت القاضي

# يتبع

#Aya🔮

ياريت ماتنسوش اللايك وتحطولي تعليقكم 🔥