المخلص "باللهجة العراقية "

البارت الثالث عشر

المخلص..
البارت الثالث عشر..
بقلمي رسل..
rasolaa7

انستا  Rasolaa7

مَن أنتِ ؟
أنا زمُرد
أنا تِلك البريئة النَاحِلة
أنا التي تَعرضت لـ أقسى أنواع الإجحاف
وأدمَنت البَقاء مُعْلنَة
القوَة ، الصَبر ، الثَبات
ولَكنَ ..جَوفي أَثِـيـث الوَهن
فَـ إشْتَدَّ الكَرَب على مُهْجَتي
أنني أتألم وقَلبي أَهرِقَ
هُنالك صوت يهَتَف ويَرجو الإغَاثَة
فَـ هَل مِن مخلص يَسعى لـ إغَاثَتي؟
فَـ لا تسئلوني مَن أنتِ
لأن سأبكي قائلة
أنا التي جَار عليها الدَهر
فَـ وقعت بَين أيدي الظَالمين..

بقلم  المبدعه سارونه..

-اشتد النقاش بينه كلش فداء حاول يهدي الوضع تالي
طلع واني مصره ضربته على صدره بقوه انت تفهم
لو لا تفهم يعني شنو ما يريدوني تفهم يعني شنو الي من
دمك ولحمك ما يردون يشوفونك تفهم يعني شنو انت
وحيد ومنبوذ لو بس تعرف تصيح عليه فقدت اصرخ واحجي سكتني صوته العالي وهو يصيح..

-بس اني اريدج لج اني الي اريدج..

-صفنت عليه وتلاشت كل عصبيتي شيء ما جنت متوقعته خصوصا بعد الي صارلي وهو يعرف كل شيء تداركت نفسي وبهاي اللحظات استلم القيادة
عقلي بدل كلبي..

-ضحكت غصب عني.. انت تعرف شنو تحجي شنو اريدج شنو هالسوالف والله اذا ما اخذتوني اروح وحدي ومحد كلك استخطيني حتى تحجي هيج..

-شلت ابني واريد اطلع مستحيل ابقى يمه اي صح هو
زين وياي بس اني بعد الي صار ما اتوقع اكدر اعيش طبيعيه واتقبل واحد بحياتي ومن جهه ثانيه ما اريد واحد يشفق عليه والله شعور الذل يدمر الروح..

-كعد على التخم واشرلي.. تعالي اكعدي خلي نحجي
انتي شنو هذا عنادج شنو هالراس اليابس ماخذتنه بالسانج..

-كعدت وهو كمل.. انتي ما تفكرين بابنج عبالج المخيمات سهله عبالج هم بالنعيم لج بابا المساكين اتعس
عيشه عيشتهم عاجبج وحدج بخيمه عاجبج الف صنف
يتفرجون عليج ولج هناك حسره عليهم اللكمه والمي
المساكين شلون بيج..

-بلعت ريكي تعبانه واحس محد يفهم عليه صفنت
عليه.. لمن يجور عليك الزمن
لمن القريب يتخلى عنك
لما هاي كاع الله الوسيعه تضيك بيك وحتى شبر منها
مالك حق ساعتها تفهمني وتعرف قيمه هالخيمة بالنسبه
الي..

-الي مثل حالي عندهم هالخيمة وطن بكبره رغم كل
الضروف..

-فرك راسه واعرف وصلته مرحله بالاعصاب بس هذا
قراري سواء وافقوا او لا..

-انتي شنو هنا وياشر على راسه شنو بس كليلي يعني
عاجبج تبهذلين هالطفل وتبهذلين روحج..

-احسن ما نكعد على الرصيف نكعد جوه خيمه منا لما
الله يفرجها علينا..

-اشتد النقاش بينا واني مصره تالي زهك وكام.. كومي
وياي..

-وين حلفت اذا ما اخذتني اروح وحدي..

-لج بابا راسج شكد يابس كومي وياي ومعليج انتي مو تردين مكان هذا هو تعالي وياي..

-شلت ابني وطلعت سلمت على مرت فداء وتشكرت منها وهي خلت بيدي جنطه صغيره وهمست.. هاي شوبه ملابس وشغلات تحتاجينها من اخت لاخت اعتبريها لا ترديني..

-اخذتها وبوستها انسانه لطيفه ونفسها طيبه بشكل طلعت وهي تبوس بعلاوي وتتوسل بيه ابقى يمها بس
اعتذرت منها صعبه اصير حملي عليهم..

-ومن جهه رجلها مستند على الحايط ويهز بيده..بلا
هسه اني وشواربي تسحلني مره عايف شغلي وجاي
علمودج شارده التفت على المخلص.. افشر سيدي..

-اكل تبن نوب يستاذن امشي ولي ارجع وغطي عني
بس هاليوم..

-ربي تشوف تعبت واني اغطي ب**** هسه يسحلونه
بعقوبة بسببك وساعتها والله افشر عليك لما يتعب لساني..

-وانتي شبي بيتنا يبزز ما تكعدين بي هذا بيتي جايبه
بفلوس حلال والله فشلتيني وصلتينا رساله بيتكم جايف
محد يتحمله..

-هو يحجي ومرته تضحك واني اضحك والمخلص ينافخ تالي طلعت ويا وهو عصبي ويسوق سريع.. بس خفف علاوي كلبت معدته حجيتها وهو ما سمع صحت بصوت عالي.. خفف خفف شبيك راح تكلبها بينا
ما اريد نزلني اني اخذ سياره على شنو معصب عليه..

-خفف وما رد عليه اختنكت التفتت على الجامه من نزلت دمعتي نهضمت حيل احسه ماخذني ويا على
اعصابه مسحت دموعي من طاح حظ خالي ومرته
فوك بهذلتي بهذلوني..

-شهيق زفير سويتها كم مره اهدي بروحي ما اريد
ابجي خلي الي دمروني يبجون ليش اني الي فوك عذابي لهذا اليوم اعاني واتعذب ليش محد ينصفني
وكلها صارت ضدي وظلمتني ليش محد يحس بغيره
والله كلبي احسه متفتت من سمعت كلام مرت خالي
لهسه ومخنوكه هيج اتمنى كون امي ما جايبتني لهالدنيا..

-شبيج؟!..

-سمعت وما رديت روحي طالعه وهذا يعصب بكيفه
ويغرد ويرجع شبيج..

-انتي عبالج متعاجز منج ليش تفكرين هيج زمرد ما تعرفين تفكرين ماخذه الناس بالسانج يعني بربج تردين
اصفكلج وانتي ماخذه هالطفل وتهجولين بي بالشوارع
مقتنعه بربج جوابي مقتنعه وانتي بنفسج تعرفين شنو
الشارع..

-مجبورة والله مجبورة ردت اروح ادور على المخيمات حقي بكاعي وبيتنا راح عاد اخذ حقي بخيمه
تلمنا اني وهالطفل الي منبوذ من الكل يعني تتوقع بعد
ما سمعت كلام امك والله ما الومها ولا اشيل بخاطري
تبقى هي وتفكيرها وبعدها كلام خالتي وهي تكلي ارجعي لا تجين وين اروح بعد ابو تراب ترى الدنيا
سدت بابها بوجه زمرد ومحد يريدها..

-الوم منو بهالحال الوم دا..عش لو الوم الي اتعس منه
وتغاضى عن كل الي صار وتغاضى عن كل الظلم
الي تعرضنه اله والاصوات الي والله ليلنا كوه تغفى بي
العيون افز من نومي عبالي بعدني بذيج الغرفه وبذيج
الساعة كول الوم منو..

-هو الانسان ليش هيج مجرد من الانسانيه ليش من تنطعن كلها تصير ضدك وبالاخص القريب جنت اتمنى
اخلص من دا..عش وارجع لحياتي بس هسه تندمت والله تندمت وهاي خلصت منهم ويني اني بعدني مشرده
وصرت بحال اتعس القريب يدير وجهه عني والغريب
يسمعني كلام الروح مو حمله ليش شنو ذنبي وشنو
ذنب هالبنات الي يتعذبن كل يوم..

-تجين وياي والله اخليج بعيوني واترس حلكه رصاص
الي يحاول يقلل منج بكلمه..

-ما اكدر اجي وياك ولا راح اجي وياك بعد كلام امك
الله شاهد شكد ممنونه من وكفتك وياي بس طلب اخير
وصلني واخلص من همي..

-خوش ام لسان حجاها ورجع بنظره كدام..

-علاوي بجه واني احاول اسكت بي اخجل ارضعه كدامه هو حس عليه مشى شوي ووكفنا كبال صيدليه
نزل وعيني عليه عبر الشارع ودخل للصيدلية وعلاوي
يبجي حاولت ارضعه بس ما كدرت الناس تروش هو
ما اتاخر ورجع بيده علاكه مدها الي.. هاي لعلاوي..

-فتحتها جانت مميات اثنين صغار وحليب ومي بطلين
فرحتي بيهن بهاللحظة ما اكدر اوصفها هو الظاهر لاحظ هالشيء.. شبيج جنج ما شايفه لعلاوي مو الج..

-خزرته وهو.. هز ايده يضحك واني خبطت ممه تلاثه ارقام مي واثنين حليب وخليتها بحلك علاوي الي عبالك مفجوع ضحكت من اجاني صوته.. سبحانك ربي طالع على امه مفجوع..

-لا تخلي عينك على ابني..

-لا تخافين خليت **** والله خبله انتي..

-دير وجهك وسوق السانك زفر هاي انت دوم هيج
عبالي بس يم القذرين حجيتها وهو يضحك..

-كم ساعه وبهذله الطريق وصلنا يم سيطره مكتوب
عليها محافظة كربلاء المقدسة ترحب بكم..

-دخلنا بكربلاء وما بين ازقتها وفروعها وصلنا البيت
صاير بنص حديقه ومنطقة مبينه زراعيه وتراب التفتت عليه.. وين جايبنا؟!..

-اذ..بحكم هنا ومحد يدري حجاها واني صفنت اكره هالكلمة واحسها رعب لكلبي هالكلمة دا..عش ما جان يمزح بيها هالكلمه جان فعل عندهم هو حس عليه ابتسم شبيج يمعودة اتشاقى..

-زمرد يمعوده صاح بصوت واني احس روحي نسحلت جسمي عرك واتذكر الجندي الي ذب..حوا
بدم بارد صرت اشهك هو مد ايده اخذ علاوي نخبص
فتح بطل المي بالايد الثانيه ويغسل بوجهي.. زمرد
شبيج شوي اتنفسي ولج والله اتشاقى..

-هديت وهو جان فشلان مني اول مره يصير بيه هيج
حتى هو استغرب بس الرجفه الي صارت بجسمي رجعتني لاتعس ايام شوكت اخلص شوكت تطلعون
من راسي تعبت ياربي تعبت..

-شلون صرتي؟!..

-بتعب.. احسن انطيني علاوي اخذته منه وهو قفل
السيارة بعدما نزلنا كبال البيت فتح الباب ودخلنا
واتلكتنا مره جانت شايله خبز ذبته على جهه من شافت
ابو تراب.. الجلب الي يعضك شمرناه..

-هو ضحك وراح باس راسها.. عمه والله شغل اهلي
ما شايفهم شلونج نبعه الريحان شمدريج مشتهي خبز
من ايدج ها زليخه اعترفي اشتميتي ريحتي..

-هي ضربته خاب دولي اشتم ريحته الخايسه الكاطع
ما تسال اكولن عمتي امر عليها اشوفنها..

-لا تحجين هيج ترى امسح اسمج واكتب عليه باكه
الريحان هواي عليج نبع..

-هم يضحكون واني عيني عليها مبين متعلق بيها سوالفهم حلوه جانوا ياشرون عليه والظاهر يحجون بيه
لان عينها جانت عليه وهو يحجي..

علي..

-اسمع اصوات بس اريد اميز كل الي ميزته علي علي انتبهه وهذا الصوت اعرفه ايي صوت..عباس..
وبعدها ارتطم جسمي بالارض بقوة..

-تقدم جندي مني وحرك ايده على نبض عباس..ترى بعده عايش بس كون نلحك عليه..

-بهاي اللحظة مااعرف شصار بيه حتى الم خشمي نسيته شلت عباس على ظهري والموت يحوم فوك راسنا خسرنا شباب بس نفسهم يسوى دا..عش والي
جابهم علينا..

-جنت شايله على ظهري واحجي ويا فقدت ولك عباس فدوه اروحلك لا تروح ابنك ابنك ينتضرك ولك لا تكسر ظهري بيك صار بوجهي حر هذا هو واحد من زلمنا
الي لاوت ذراع الجرذان.. سيارة بسرعة خلي ننقله
فتحلي سيارته واني اصيح اسرع ولك راح يروح من ايدينه وعباس بحضني واني اتوسله بس يفتح عينه بس هو وين غارك بدمه..

-بالمعجزة وصلنه للمستشفى استقبلونا واخذو مني فورا دخل غرفة عمليات واني ما احجيلكم احس حيلي نهد حتى مابيه اوكف بعد كعدت بالباب مال غرفة العمليات واني ادعي الله بس كون يعيش خليت راسي بين رجليه وستمريت بالدعاء احس روحي مربط وعباس جوه يصارع بس ضحكته تسوى التنظيم شلع قلع..

-رفعت راسي للدكتور.. ابني كوم وياي انت معقولة ما جاي تحس على خشمك شوف الدم..

-ما ان نطق كلماته حسيت بالم فضيع والله شوفت عباس وغارك بدمه نستني حتى نفسي كمت وياا وهو سندني عالجني وكال انتظر يخلص المغذي يلا تكوم اباوع على المستشفى والمعدات الي بيها قليلة لان جانت تحت سيطرة التنظيم اصلاً زين لكينه بيها كم طبيب وبعض الاجهزة بعدها واني انتظر المغذي بدت عيوني تنغلق مااعرف تعب لو من تأثير العلاج نسدت عيوني شوي شوي الى ان غفيت..

-فتحت عيوني واني مااعرف شكد نمت الم راسي شوي خف رفعت الكانولا من ايدي وكمت بالي كله يم عباس طلعت متوجهه للغرفة الي بيها عباس من وصلت صار بوجهي الدكتور جان طالع من غرفته..

-دكتور بشرني شلون صار؟!..

-والله احنه سوينا الي علينا ويا هالبطل بس احنا هنا مثل ما تشوف المستشفى شبه منهار حتى معدات ما ضلت والافضل لسلامته تنقلوه المستشفى افضل لان اخاف عليه من المضاعفات بضل هاي التجهيزات الطبية القليلة الي عدنا فياريت انو تنقلوا باسرع وقت..

-اتنهدت.. ان شاء الله بس عينكم عليه..

-بلغت المسؤول علينا وهو كال راح ادز وياك سياره
خاف يتعرضون الكم بالطريق ما الهم امان
بعدها بساعة تم تجهيز سيارة الاسعاف الي راح تنقلنه على مستشفى ببغداد جهزوا عباس واني صعدت وياا بعد ما طلبت من الظابط انو اكون برفقته اباوع عليه ماكو اي حركة بس صوت الاجهزة ينسمع اتذكره قبل ساعات شلون جان يحجي وفرحان بابنه ياربي لا تحرمه ولا تحرم اهله منه شذنب شبابنا هيج يصير
بيها..

-غفيت مرتين وافز والطريق ما يخلص الى ان هلكنا
يلا وصلنا ودخلوا عباس بغرفة بيها عناية خاصة بطلب من مدير المستشفى والسبب بعد ما عرف انو احنا من الح..شد الشع..بي..

-ساعة ورجعت سالت الطبيب على حالته كال حاليا مستقرة ومراح يصحه الا باجر او بعدها فكعدتك يمه
هنا مالها داعي اذا تحب تروح ترتاح وترجع باجر
لان كعدتك ما راح تسويله شيء هو هسه تحت المراقبه..

-والله اني ما كلت لا لان التعب الي احسه حاليا يمكن اذا انام مااكعد الا بعد شهر قررت اروح عالبيت وارجعله الصبح تطمنت عليه ووصيت الطبيب وحتى
الممرض الي جان قريب على غرفته وصيته..

نورا..

-احس شعور حلو وشعور العائلة رجعلي من اجيت هنا
طيبتهم كعدتهم تريح النفس ابد ما حسسوني اني غريبه عنهم الحجيه الي فرحانه بيه وعبالك عروس بضروف غير لارا وام جود الي عبالك اختهم شعور راحه
واني بنصهم..

-كاعدين اني ولارا بالحديقة على المرجوحة جان الوقت العصر والشمس بدت تختفي طول ما اني كاعده اباوع على لارا بس تصفن وبالها مو يمي خليت ايدي على كتفها.. اكو شي ليش احسج مو على بعضج وهواي صفنتي اليوم؟!..

-تعدلت بكعدتي..والله يا نورا مااعرف شنو اكلج سالفة مدوختني كلش..

-احجي لا تكتمين بداخلج يجوز ترتاحين احسن من ما كل شوي تتنهدين وتروحين بغير عالم..

-كعدت كبالها وحجيت لنورا كل شيء حجه جعفر الي قلب موازين تفكيري  شلون هو يحبني وشلون اني اصده وحتى اضطراب مشاعري حجيته الها.. والله يا نورا حتى بعد مااعرف شلون افكر..

-حبيبتي ارتاحي كم يوم وبعدين فكري ولا تضغطين على نفسج واتأكدي انتي مو مجبورة تبادلين الشخص المقابل نفس المشاعر واكلج شغلة ابد لتوافقين اذا جانت موافقتج شفقة على حالة لان هيج راح تأذينه اكثر وراح ينكسر كلبه اكبر من كسر الرفض بس هو خوش منطيج
فرصة فكري زين وان شاء الله خير..

-تعبت من التفكير نورا ومن جهه اخاف من هالدرب
بس نظراته وحركة كلبه تكول هو شكد يحبني..

-ارتاحي هاي اليومين وبعدها فكري محد يجبرج على
شيء خليج انتي صاحبه القرار وهو راد هالشيء من
انطاج مهله..

-عوفج منا زين وانتي وعلي شوضعكم؟!..

-ارتبكت.. ماكو شيء هسه شجاب علي على بالج..

- ولي شكد فاهيه اخوي واكع على وجهه وهاي تكلي
شجابه على بالج شوفي نورا هنا امدج واكسرج بالصونده لو كسرتي كلب اخوي ترى هذا اغلى من روحي..

-وهسه اني شمسويه لاخوج شبيج تخبلتي لو صعدت
عندج الحنيه..

-صعدت نزلت حذرتج بعد..

-بقينا نسولف وكوه خلصت من اسئلتها عبالك الحجية الثانية وره الصلاة كمت ويا ها وحضرنا العشاء خلينا بالصالة جانت كاعدة بيها الحجية وكرار الي مخلي ابنه بحضنه ويلعب ويا وهذا يدور على علي الي فعلا مكانه
خالي بالبيت..

-التفتت على ام جود..ايي فديتجن شلون ثنائي ياربي والله جنت تعبانه عاشت ايدجن خلصتني من العشه..

-ابتسمنه على حجيها اني ولارا الي هزت ايدها جناين
اخر وكت عود مكيفه عندي مرت اخو واكرب عليها..

-تكربين على مرتي ولج لارا؟!..

-يا وسفه شنو مطي واكرب عليها حجتها وكلها ضحكت عليها لارا ضحكة بيتهم والكل يحبها..

-بعدنا تونه اكلنا  وسمعنا الباب نفتح الحجية كالت يمة كرار شوف منو فتح الباب اخاف الجهال..

-قبل لا يطلع كرار من الصالة تفاجانا بدخول علي الي جان عيونه مورمه ووجهه تعبان والدم يابس على ملابسه العسكرية وخشمه مضبر سلم علينا  اباوع على امه الي تركت الاكل وهي تشهك وضربت على صدرها.. ولك يمه هاي شنو شبيك..

زمرد..

-اجتي عليه باستني واخذت علاوي وتبوس بي دمعت
عيوني واني اشوف موقفها وحنيتها الي دخلت لكلبي
وابو تراب واكف مبتسم..

-تعالي يمه تعالي حبيبه زارتنا البركة دخلنا وراها وعلاوي بيدها كعدت وهو بحضنها جانت ضخمه وسمره بتعب بس حلوه ومن تحجي هيج مخبوصه بس
فرحتها بينا هدات من قلقي..

-شوي وكامت جابتلنا مي وكل شوي تلعن بالجرذان
تغدينا يمها وهي مخليه علاوي وتهوس عبالك حفيدها
كل شوي عيني تجي على ابو تراب وابتسم بممنونيه
وهو ياشر على لسانه ويحرك شفايفه.. خانسه ام السان..

-لليل اجتمعنا وحجه ابو تراب انو ابقى يمها احسن من
المخيمات الي من حجه معاناتهم شبعت بجي
عمته جانت فرحانه بينا وكالت يمه اني ما عندي احد
ولدي اثنين ومسافرين من سبع سنين وحتى سؤال عنها
ما يسئلون لهذا هي تحب المخلص تكول اغلى من ولدي
ما تركني ولو تمرضت اشوفه اول واحد فوك راسي..

-جنت خجلانه منها ابقى بس ابو تراب حجه وطمني
وكال خطيه وحده خليج يمها ومن ارجع اشوفكم هذا
الباب ما تفوتين منه عمتي الي يطب الها تحشي بمعدته
ليل ونهار عبالك طلي العيد..

-وره العشه اخذت علاوي وسويتله ممه واليوم خانس
ما اعرف من الطريق مدري ابني مريض شربته ممه
ونومته واني اغفي يمه واسمع صوت ضحكهم وسوالفهم واضحك على ابو تراب ما خلى واحد ما حجه
عليه لو فشر وهي ويا لسانهم متبري منهم..

-فزيت بنص الليل التفتت على ابني وانصدم بي مخنوك
ومتقيأ هواي والوجه ازرك احس روحي ماعت ايدي
ما عانتني اشيله انفخ بوجهه واصرخ باسمه راحت
روحي ايست واني اشوف ابني بهيج حاله انفتح الباب
ودخل ابو تراب على صوتي وهو مرعوب اخذ الطفل
مني كلبه ويدك على ظهره واني روحي فرفحت وصراخي جرح بلاعيمي وابن ماكو نفس منه..

يتبع....

لا تنسون التصويت وتعليقاتكم الحلوه حبايبي..

اللهم صل على محمد وال محمد❤️