اسألي عني الليالي

البارت ٣٣

وازعلك ..
لذتك بالعشگ من تغتاض ..

واتگرط شفافك عسل گنطاري ..

وارضيك بـ ولك ..
يابعد هاي وهاي ..

واتعذر سنة وماتقبل اعذاري ..

واحبك من صدك ..
من حب زمان الفات ..

مو حب هلوكت والعشگ طياري ..

الـبـارت الثالث والـثـلاثـون..............

طبيت للفراش ضليت اتكلب ما اكدر انام..احس الصار حلم مو حقيقة..كعدت اتذكررائد وصوتة ذاك اليوم شكد مقهور..واليوم شلون متغير والفرحة بصوتة مبينة شحال لو بعيونة..ورة ساعه ما اجاني نوم..نزلت جوة اشرب مي واجيب شي اكلة..الباب مالت المطبخ مفتوحة بس الكل نايم..منو برة.. طلعت على كيفي..وكفت بالباب مالت المطبخ..هاي شذى.. شعدهه هسة بالليل..وويامن دتحجي اصلا..شوي وسدت الباب اندارت شافتني..مثل الخطف لونهه..اجت يمي
شذى بهمس : اذا فكيتي حلكج اموتج..لا عبالج جنت طالعة اشوف صاحبي مثلج..هاي مرة صديقتي انطيتهه شغلة
دنوة : وانه شنو..صديقتج يخصج..لا تضلين تهددين هي جم يوم واروح بعد متشوفيني..
شذى : اكص ايدي اذا رحتي باب الحوش..

دنوة : عفتهه ورحت شربت مي..هي قفلت البيبان وطبت لغرفتهه..وانه صعدت فوك..حتى اذا صديقتهه مدري منو بس شنو هسة تتذكر تجي..بـ١٢ ونص بالليل..هذا نهار الله شطولة ..شكد غريبة هاي المرة..تمددت وغفيت..كعدت الصبح كمت غسلت ونزلت جوة..ابوي جان ديحاجي شذى..
محيي : حيجون خواني وعائلة قاسم بس..بيت خالتهه همات ما اريد تحجين شي يسمهم..هي دقايق ويروحون..
شذى : لا عمي براحتهم..قابل هو بس بيتي..
محيي : اي واطلعي وياهه اجريلهه فستان اليوم..هي حتصير خطوبة وعقد بنفس الوكت..مو تنسين..
شذى : ميخالف..هسة نكمل ريوك واخذهه ونروح..
دنوة : ابتسمت ورحت صبحت عليهم..كال حطلع للشغل كبل لا يجون اخابركم ..اكل بالعجل وطلع..اندارتلي شذى
شذى : سمعتي ابوج شكال..لازم اخذج تستنكين فستان للعقد اليوم..اكلي حتى نطلع..

دنوة : اي..حتى من الفرحة ما اشتهي..احس شبعانة.. اكلت لكمتين وزيتون وكمت فوك لبست الصاية والشال ونزلت.. هي هم جانت مبدلة وكاعدة تنتظر..طلعنة للشارع واخذنا تكسي نزلنا عند المحل الاشتريت منة بخطوبة دنيا..ضليت اتصفن ما ادري شختار..عاد الرجال كال لشنو ماخذيهه..
شذى : للعقد مالتهه عيني..
كال اي هذني يناسبن..وشوفنة اكثر من موديل..هي اختارتلي ذوقهه حلو..رحت كدرتة..اجة فت علي..اخذت لونة طوخ عيب من رائد وامة..الرجال كال هسة تدفعون لو من ترجعو مراح تفرق..كلتلة لعد من نرجعة ابوهه يجي..خلاه بعلاكة عليهه اسم المحل وطلعنة..اخذنة تكسي ورجعنة للبيت..مارحت صالون
كلشي يهون لخاطر رائد..مثل ما هو اجة وخطبني اكثر من مرة ولو ابو ميت انه هم اسوي اليطلع بيدي..

وكفت ع الطباخ اسوي الغدة..كملت وصبيتة..رزان وسما كلساع يجون علي..ها محتاجة شي اسوي يالعروسة..شكد فرحت بيهم..حتى شذى ابد ماحجت شي..بالعكس راحت رتبت الصالة الجبيرة وغيرت الديكور هي والبنات..كالت لحد يطب لحدما يجون الجماعة مانريد يتوصخ..تغدينة وكلمنة..كملت داغسل المواعين جان تندك الباب..رحت افتحهه خالتي وبناتهه..بوستهم واضحك
خالتي : اي هسة ردتلج روحج..شلون جنتي ذاك اليوم
دنوة : فدوة لعينج خالة..يلة فوتو..فاتو جوة بالصالة.. اجت شذى كعدت وياهم وسوالف عادي..هاي شعجب تغيرت وياي شو البارحه تكلي اكص ايدي اذا رحتي واليوم طلعت وياي وكعدت وي خالتي تسولف وتضحك..كمت سويت شربت وخليت الحلاوة وقدمتلهم..كعدت يم حلا..

حلا بهمس : اي عيني باع الضحكة رادتلج..خنشوف المسعد شلون حيطلع اليوم..اذا حلو اخذة..
دنوة : ههههه..لج ما اصدك صارت صدك ادور تاخذي..
حلا : لا يابة منو ياخذة..هو يريدج اصلا ميعاين لغيرج
ابتسمت وكعدنة شوي..صعدت فوك انه والبنات..بدلت وهم سوولي شعري وحواجبي..
تارة : اليوم يتخبل عليج رائد..بس اصبري..
حلا : اي عيني يوم السعد هذا..الله واخيرا حتصيرون سوة وتحجون بالعلن..بدون ختلات
دنوة : ضحكت..شوف هاي عافت كلشي واجت ع الحجي بدون ختلات..اي بس هم صدك..
حلا : اي جا شلون..اصبري اشوف شصار جوة..
راحت نزلن بقينة انه وتارة..كملت كلشي وكعدت على صفحة شوي وصعدت حلا تغني..
حلا : يلة عيني تحضري..دقايق ويجون..ابوج هسة جوة ديغير ملابسة..كال ختكمل بالعجل..

جسمي كام يرجف..ما ادري من الفرح لو شنو..ابتسمت وكعدت يمهم..اليوم حشوف سرور..اخر مرة شافتني شكد جنت مقهورة وابجي..هسة اكيد تغيرت..تارة وحلا كل شوي وحدة منهن تكلي ها شبيج خايفة..ترة ماكو شي..اي صدك جنت خايفة..من بعد الصار صارتلي خوفة من كلشي.. اخاف على اخر لحظة وتخرب فرحتي لو يصير شي يخليني ارجع لاول نقطة وصلتلهه..طول الوكت اقرة ايات بگلبي يخلص كلشي على خير..شوي وسمعت صوت هوسة جوة..عاينت لتارة وحلا..جسمي خدر ما اعرف شلون اوصف الحسيتة بالضبط بس من الفرحة احس رجلية ما تعيلني بعد
تارة : حطي شي على راسج خلننزل..ابوج دينتظر جوة

دنوة : خليت شال ع راسي ونزلنا..ابوي جان واكف يم الدرج وداير وجهه ديحجي وي رزان..يكللهه صيحي اختج..
رزان وهي تأشر علي : هياتهه اجت..
اندار شافني وابتسم..نزلت يمه..باسني من خدي وراسي رحت بالمطبخ وي البنات..سلمت عليهم مجان اكو احد غريب سرور ونوارة وخالة ابتسام وجدة..اخلاص وام رائد همات كلتلي شطالعة اليوم تخبلين..ابتسمت وبستهه..كعدنا شوي جان يكولون اجه السيد..

گلبي كام يدك سريع..حصير بإسمه..مااخاف من احجي وياه مااختل بعد.. ابتسمت من الرهبة والموقف المستحيل گلت اصير بي بيوم من الايام..حلا وتارة وخالتي الفرح بوجههم ضعف البوجهي..وكفت وره الباب وأردد وي الشيخ.. اخر شي كال گولي انت وكيلي..
- انت وكيلي..
- على بركة الله..
بچيت من الفرح والدنيا ماسايعتني..يعني صدك.. مدااصدك .. اجت خالة حضنتني وباستني..
ام رائد : الف مبروك حبوبة..
دنوة : فدوه لعينج خالة..
باركولي كلهم ..رحت ع المراية عدلت الكحلة..

شوي وطب رائد بس عمامي وابوي بقو برة..بعدين طبينا احنا.. اول ماطبيت صارت عيني بعينه..جان الكل لابس دشاديش بس رائد قميص ابيض وبنطرون وشكله مبين علي الفرح..كعدت يمه ع القنفة اجه تقرب علي لبسني الحلقة وهو مبتسم..انه هم لبستياهه بنفس الابتسامة جان مشتري محبس وگلادة زنجيلهه رفيع وبي مدالية صغيرة ذوقة من النوع الاحبه..همس باذني..
رائد : والله مستعجل وجبت الحلو الجدامي..نعقد محكمة واجيب غيره..
ابتسمت : هذا كافي..

ضليت اعاينله شلون عيونه تلمع..گلبي رجف وايدي وكلشي بيه.. رجف بحب ولهفة لقربه..كمش ايدي ويحجي وي امه.. ماادري شكللهه بس هي طلعت والبنات هم طلعن : هاي ليش طلعو
رائد بابتسامة : شلج بيهم..ماشبعتي منهم..
دنوة : ها..لا بس اكول..

صارت الصالة هادئة الى درجة..بس صوت انفاسنا.. ماادري شنو التغير..خفت وارتعشت من شميت عطره.. جنت اشمه وابتسم..هسه تغير هلشي.. عاينت بعيونه وإدينا متشابگة.. فك ايده من ايدي ومشاهه على ايدي ومعصمي وزندي.. لحد الفتحة مالت الفستان بچتفي..
همس : خلأحس الصار حقيقة..گربي علي دناوي..
دنجت كمت اعاين بكل مكان بس بعيونه لا : ش..شلون..

حاوط خصري بإيده وقربني علي .. حرارة انفاسه صارت على الجزء المكشوف من چتفي..قرب شفايفه من رگبتي.. شمهه حيل بس بهدوء..لمن ابتعد حسيت سكران..خليت ايدي على ايده اللي على خصري..ردته يشيلهه.. هجستهه رعشت على كيف..
رائد : غمضي حبيبي..
دنوة : ها..ليش ..
رائد : سوي هيج ابوية..
غمضت على كيفي..بلحظة الغمضت حسيت بشي حار احتوى شفايفي ومشى بجسمي كله..من حرارة الموقف تخيلته ساعة مو دقايق.. ابتعد عني ..فتحت عيوني..

رائد : ماتدنيتلهه الا صارت حلالي..
ماعرفت شجاوب..سكتت بس الشعور الحسيته محاسته كبل ابد..عقيل بس باسني شكد ضجت منه ومابادتله بشي تمنيته يبقى بعيد

ابتسمت من شفته..
رائد : شكو..
دنوة : شفايفك عليهه حمرة..
رائد : علامة الحقيقة..يابة شكثر احبج يولي..
دنوة : انه همات احبك..
درت وجهي انطيته كلينسة..مسح حلگه وگام..
رائد : يلة اطلع يمهم..دنج يم اذني وهمس..ما اريد تبجين بعد..كتلج اخذج واخذتج..
ابتسمت : احبك..
رائد : اعشكج..

راح طلع جان يطبون البنات..محد جاي من نسوان عمامي بس خالة ابتسام..اجت سرور كعدت يمي تضحك ورافعة بحاجبهه وتحاجيني..
سرور : ليش طلعتونا..
دنوة : شمعرفني..هو كال لامة مو انه..
سرور : اي وشبيج خجلانة..ماحجينة شي ترة..

دنوة : ابتسمت وسكتت..بعدين سألتهه على حسام..
سرور : زين والله..راد يجي للخطوبة كال هو اجة من خطبتج انه هم المفروض اروحلة..بس ابوه تخربط ..
دنوة : ليش شبي خطية..
سرور : صاير عندة عسر هضم ومختنك كلش..
دنوة : الله يشافي..انتي بمكانة عادي..عاينت علي وابتسمت ضلو يمنة تقريب الساعة بعدين راحو كلهم..الكل باركلي بس سما ورزان مشفتهن..حتى شذى اجت ابتسمتلي بالجذب وكلتلي مبروك..ورة ساعة راحو كلهم.. كمت صعدت فوك.. نزعت الفستان وخليتة بالعلاكة همزين لا توصخ ولا شي.. بدلت ملابس البيت ولميت شعري..اخذت الفستان ونزلت ابوي جان واكف يم الميز ديحجي وي شذى..شافني نزلت

محيي : همزين جيتي..بعدني مامبدل..جيبي الفستان ارجعة اندار على شذى..بيش كلج..
شذى : ٤٥٠ الف..
محيي : جيبي فلوس..بالخانة الفوك..راحت للغرفة..وانه تمشيت يمة..خليت العلاكة ع الميز..انتبه للحلقة بايدي بس هلمرة حتى شكلي وملامحي متغيرة..مو ضايجة ولا مقهورة بالعكس.. كلشي حلو صارلي اليوم..ابتسم بتعب.. خطوط الكبر بينت على اطراف عيونة وشفافة..اجت شذى انطتة فلوس اخذ الفستان وراح..انداريت ارد اصعد فوك..
شذى : تعاي سوي عشة..اليوم تعبت كلش هاي علمودج حتى متكولين شذى ذابة الشغل كلة براسي..
دنوة : اي هسة..كمت احضر الاكل وهي راحت..

شعجب هيج وياي..سبحان مغير الاحوال..خاف ابوي محاجيهه ولو هي حتى من ابوي بعد متخاف بس ما ادري والله.. دا اسوي بالاكل جان يجن رزان وسما..
سما : مبروك عروستنا..
دنوة بابتسامة : الله يبارك بيج..بس اشو مشفتكم
رزان : ماما ماقبلت نجي..كالت من يروحون باركولهه عود قابل هي وين تروح..هياتهه وياكم بالبيت..
دنوة : ها..اي هم صدك..شوكت يبلش الدوام..
رزان : بعد اسبوع تقريبا..
دنوة : خوش..كعدن يمي يسولفن بين ما كملت الاكل وصبيتة جان يجي ابوي..كال اكلوا انتو انه ما اشتهي..راح واحنة كعدنا ع التلفزيون..حطيت راسي ع القنفة وايدي جواه كمت اغفي بعدين نمت محسيت ع روحي..

فزيت مدري شوكت ع صوت التلفون يدك..مدري منو مغطيني ومعدل نومتي.. كمت ع التلفون شلتة وحجيت بصوت نعاس
رائد : كعدتج من النوم..
فزيت..عبالي سرور : لا عادي انت براحتك شتسوي..
رائد : ردت اسمع صوتج كبل لا اطلع للواجب..
دنوة : شنو هاي..ليش هشكل..مصارلك يومين من نزلت
رائد : ضروري بنيتي..انتي بگلبي بكل مكان اروحلة.. رجعي نامي وارتاحي..هلمرة ما اطول..جم يوم..
دنوة : شكد يعني..لا لتروح..ميصير هيج..
رائد بضحكة : يولي بس خلاخذج اضل يمج شهر لا اروح منا ولا منا..حتى تملين مني..خمس ايام بالزايد واجي
دنوة بدلع : لا ما امل..ليش هم ينمل منك..
رائد : ترة هيانة بيتكم..شمرة عصا اصل..
دنوة : شتقصد عود..
رائد : فهمتي قصدي..

صفنت شوي بعدين فهمت : يا..صدك متستحي.. حروح انام..هو ضحك جان يغص..الله الله..
رائد : يابة بعد ما احجي شي..ادور تطلع بية..
ابتسمت : لا احجي براحتك..
رائد : بعد شيبي انتي..
دنوة : عود عندك شيب صدك..
رائد : اي يابة صار سنتين..قابل صغير مثلج انه..
ضحكت بصوت ناصي : بعدك شباب..
رائد : اليشوف عيونج يضل بگلبه ضيم لو قهر.. يلة ماريد الهيج روحي نامي بنيتي..
دنوة : عود ليش تكلي بنيتي..شنو جاهلة..عمري ١٩..
رائد بضحكة : وانه ٣٦..شوفي الفرق شكد..سكتي ونامي بنيتي..متكيفين اكلج هشكل..
دنوة : لا عادي كول..حجينا شوي وراح..بس ضجت عود ليش حينزل للواجب ششفت منة..اخذت نفس وابتسمت..

صدك احس بشعور غريب وي رائد ..وي كلماتة واحساسة وصوتة وطولة وكلشي يخصة..شكد افرح بس من اسمع صوتة شحال لو اصير بكربة ووياه على طول..اخذت البطانية وصعدت فوك تمددت ونمت..كعدت الصبح على صوت الراديو حيل صار شكد ممشغلي..لميت شعري وطبيت للحمام غسلت ونزلت صبحت عليهم ورحت يم شذى خاف تحتاج شي..بس اسمع ابوي يحاجي سما..يكللهه خاف محتاجة شي للدوام.. وسأل رزان هماتين..سمعت وسويت روحي ما اسمع..هاهية تقبلت واقعي..يمكن الدراسة الهم احسن مما تصير الي.. جبت الاكل ع الميز وكعدنة..كل شوي اعاين لابوي اشوفة مركز نظرة ع الحلقة..شنو متندم..بس رائد مو مثل ما متخيلة هو..

كملنا اكل ابوي راح لغرفتة وانه وكفت ع السنك اغسل المواعين وادندن وي الاغنية الطالعة ع الراديو..شوي واجة باسني من خدي وخربط شعري..
محيي : اجيبلج شي وياي..
عاينت علي وابتسمت : سلامتك عيني..راح وسد الباب وراه كملت المواعين كمت افتر بالبيت..ارتب بس خاطر يمشي الوكت مريت من غرفة شذى..الباب جانت مردوده ما مسدودة وكفت ع صفحة اسمعهه..

شذى : اشو مصار شي بيهه..هذيج هي تغسل مواعين.. خاف مترهم بملابسهه..اجيبلج غير شي..لعد ليش مديصير شي شنو..مسمعتج... سكتت بعدين رجعت تحجي..ها باجر يلة انتظر شعندي قابل..انتي بعد بس تجين تشوفيهه شلون مكيفة عبالك اخذت الملك مو رائد..اي واذا مقدم بالجيش يمعودة هي تحبة حتى ابوهه بطلهه من المدرسة ماكالت شي بس انطاهه لرائد سكتت ولا كالت شي..بس هو هيبة والله.. طويل وضخم جسمة مرتب..مبين خوش..المهم اني خابرتج حتى تكليلي اذا حيشتغل عليهه لو ميفيد..هااا خوش لعد.. تعبتج عيني اروح اشوف البيت والبنات..مع السلامة..

دنوة : سدت التلفون وانه صعدت فوك بالعجل..هاي مرتين صار اسمعهه تكول نفس الحجي..بس مدافهم شتقصد كمت ع الكنتور دورت بملابسي..كلهه موجودة..جا شماخذة هي دوختني هاي المرة..شتريد مني..هي بس هل جم يوم واروح بعد تنكسر رجلي اذا اجيت هنا..اذا ردت اشوف ابوي اروح لبيت جدي وهو يجي اشوفة..ذلتني ع الكعدة والنومة.. خلص اليوم مدري شلون..كل شوي اتذكر رائد شلون يكلي بنيتي لو ذاك اليوم من بجيت جدامة وهو كعد يسكت بيه.. باباتي وبنيتي شكد حنين..

لو امي جانت موجودة اكيد حتفرح لفرحي بالليل كمت توضيت وصليتلهه ركعتين.. بس كمت من المصلاية بطني كامت توجعني..رحت شربت مي وتمشيت بالبيت شوي بس كامت توجعني اكثر..متت من الوجع مدري شسوي..كمت الوب بمكاني..اروح منا واجي منا ادور بالثنتين بالليل..حتى اذا ردت اكعد ابوي شحيكول.. هو عبالة نمت..كعدت بالكع وانتجيت ع الحايط..كامت تكصصني احس بيهه سجاجين كمت اعصر ببجامتي وابجيي.. متت من الوجع..ليش شبيه الاكل انه سويتة بيدي ما جاب ابوي من برة خاطر يصير بيه شي..كمت اروح لغرفة ابوي..ادكهه لو خاف يجفل خطية..عفتة ورجعت للمطبخ..متت وجع..مداتحمل احس بطني دتتشكك ادور صوتي راح انبح فدمرة.. مسحت دموعي ورحت لابوي دكيت الباب طلعلي..

جان كاعد شاف عيوني مورمة من البجي وكاعدة ع الباية مالت الدرج غرفتة صايرة جدام الدرج..اجة دنج يمي..
محيي : شبيج بوية..ليش دتبجين..
دنوة : بطني دتوجعني..مداتحمل شسوي..
محيي : خاف مستبردة..
حركت راسي بمعنى لا ودموعي تصب..اخذني من ايدي ورحنة للهول..تمددت وخليت راسي ع رجلة..هو يمسح بشعري ويقرة ايات..شو بدال ما ارتاح اختنكت بالزايد..كمت اشهك يلة اتنفس عدل..
محيي : كومي اخذج للمستشفى..لبسي بالعجل
كمت مكاني وايدي على بطني..طلعت من الهول صارت بوجهي شذى..
شذى : وين مطلعة ابوج بهلوكت..وتدرين الوضع موزين
محيي : جا اعوفهه تموت من الوجع..ماكو رحمة بگلبج انتي طلعيلي فلوس خلاخذهه..خاف بيهه شي

دنوة : عفتهم وصعدت فوك..لبس الصاية والشال شلون مجان ونزلت..ابوي جان برة..شفت الباب مالت المطبخ مفتوحة طلعت وسديتهه وراي..صعدت بالسيارة وتجيت راسي ع الكشن ودموعي تصب متت من الوجع..
محيي : هسة نوصل اصبري..دقايق بس..
دنوة : بين ما وصلنة دموعي خلصت..نزل هو واجة نزلني مدري شلون تمشيت جوة..اجت السستر كالت شبيهه ابوي كللهه بطنهه أذتهه على فجأة..طلعت الدكتورة من الغرفة اللخ اخذتني هي والسستر..قاست ضغطي وسكري.. سألتني جم سؤال..ضلت صافنة..
الدكتورة : حسويلج تحليل دم..ضغطج وسكرج كلة تمام

انه كاعده ع السدية وابجي من الوجع..ولا خف بالعكس ديزيد كل دقيقة..اجت سحبت دم من ايدي وراحت..ورة نص ساعة طلع التحليل..شفتهه دتحجي وي ابوي بالباب..بس مسمعت شديحجون بس ابوي يحاجيهه ويعاين علي..شوي وطب هو وياهه والسستر..تمددت ع السدية..اخذت ايدي خلتلي مدري شنو بالكانونة بس حسيت شي بااارد طب لجسمي كلة كمت اشوف غواش بعدين نمت..كعدت بنفس المكان.. ابوي متجي راسي ع الحايط وغافي..بس تحركت فز

محيي : شلون صرتي..
دنوة : احسن..شوكت نطلع..
محيي : يلة ماعدنه شي..
دنوة : شكالت الدكتورة شبية..
محيي : مابيج شي..شافت التحليل كالت مابيهه شي
ماشي : ماشي..ابوي راح يصيح السستر..شوي واجت شالت الكانونة وراحت..اول ما كمت دخت دوخة فضيعة..ابوي كمشني من جتفي واخذني برة..صعدت بالسيارة ورجعنة للبيت..رزان وسما بالمطبخ كاعدات..اول ما طبينة كامو
رزان : ها بابا شلونهه..شكال الدكتور..
محيي : والله يابة كال مابيهه شي..اليوم اخذهه لدكتور هذول ميتعبون روحهم..جي بلاش..صعدي فوك بوية ارتاحي

عفتهم يحجون وصعدت فوك..اول ما طبيت للغرفة اختنكت گلبي صار بزردومي ويدك..احس حتقيء رحت للحمام بالعجل كمت استفرغ وابجييي..احس گلبي حيطلع متت من الوجع ادور جسمي نحل بعد ما اكدر اوكف على رجلي.. ابوي صعد بالعجل على صوتي..كمشني من جتفي ويوخر بشعري عبالك ماكلة الدنيا كلهه..شحال لوما انه من البارحة بثمانية بالليل مخالة شي بحلكي..كمت ابجي واشهك اريد اجر نفس ما اكدر كمشت ايدة واعاين علي بتوسل وأشر على رگبتي اريد يجيني هوى..مفهمني شقصد..ضل يعاينلي بخوف ميدري شيسوي شصار بية يالله..البارحة جان مابية شي

ذبيت روحي بحضنة وابجي واشهك..اريد اتنفس..اريد هوى يطب لريتي..اخذني من ايدي ونزلنة جوة..مددني ع الجرباية بغرفتة وهو كعد ع الحافة يمسح بشعري ويرتل ايات قرانية.. كام يعلي بصوتة انه هنا تخبلت وخرت ايدة وزمخت بي.. لا تعلي صوتك..يخنكنيييي.. ماريد البيت..ماريييد..طلعني منا فدوة اروحلك احس حموت..ضل صافن بوجهي..كمت من الجرباية وافتر بالبيت رايحة راجعة..
شذى : هاي شبيهه تخبلت ع راسنة..
دنوة : رجلية اخذتني لعدهه..جريت شعرهه واضرب بيهه هي بس تصيح محييي..تعال شوف بتك المخبللهههه..

ابوي اجة من الغرفة بالعجل..سحبني منهه وانه مستمرة اريد اضربهه اعاين لابوي وارد اعاينلهه بس ماكدر احجي صوتي مبحوح ميطلع ..ابوي من شافني ضربني راشدي..
محيي : شبيج تخبلتي..امشي ولي..شمسويتلج هي وتضربيهه روحي فوك يلهههه..عفتهم ورحت كعدت ع الدرج واكرضم بروحي..جسمي كلة يوجعني..احس حجارة ببطني وبزردومي.. صوتي ميطلع اريد احجي ما اكدر..اسمعهه تكلة لابوي هاي مخبلة..وديهه لبيت جدهه واخلص منهه
محيي : لا شلون..يعني انه ابوهه اذبهه..شيكولون علي العصر اخذهه للدكتور..
كمت اضرب على رجلي واكطع بشعري..اريد صوتي يطلع اجت سما شافتني..ضلت صافنة..
سما : باباااا..تعال شوف دنوة شبيهه..

اجه شاف حالتي كمشني من ايدي يريدني ابطل..بس ما اكدر احس مو انه الداسوي هيج..
محيي : شبيج يابة..ليش تسوين هشكل..
ما جاوبتة بس مدنجة راسي وشعري مخربط..كمشني من ايدي واخذني للصالة..كعد ع القنفة..اجيت حضنتة وابجي وأشرلة اريده يفهم شديكول..تعبت احاول افهمة..اخر شي نمت ع رجلة..فزيت العصر على صوتة يحجي وي شذى
محيي : يادكتور اخذهه هسة..ساعة بطني ساعة ماتكدر تحجي..خاف بيهه شي..
شذى : يمعود ترة عيارة..عوفهه هسة تصير زينة..
محيي : بابا شنو انتي..مو بشر..مدتشوفين حالتهه شلون كامت تضرب بروحهه..اشو وخري عن خلقتي..اروح انه اطلع فلوس واخذهه احسن مما اخذج رايج..

اجة علي شافني كاعدة..كعد بسدي وباسني بخدي..
محيي : كومي لبسي اخذج للدكتور..
احس الكلام يطيح بسدي..اسمع بس ما اكدر اجاوب لو اسوي مثل ميريد..صاح على رزان..
محيي : اخذي اختج ساعديهه تبدل..
كمشتني من ايدي وصعدنة فوك..طلعتلي ملابس واخذتني من ايدي لبست وهي خلتلي الشال..نزلت جوة صارت شذى بوجهي كمت ادفع بيهه بدون ما اصيح ماعندي صوت بس هي تصيح محييي..اريد اكمش شعرهه جان يجي ابوي شالني من تشيرتي وكومهه هي طبت للغرفة وسدتهه..
محيي : شبيج يمعودة..خبلتيني..شمسويتلج هي
دنوة : مجاوبتة..اخذني من ايدي وصعدني بالسيارة.. وصلنة لعيادة دكتور..معرفت مال شنو بس من الصيدلية عرفت اكو عيادة فوك..نزلني وصعدنة..كعدنة بالانتظار وانه طول الوكت مدنجة راسي مارفعتة..لحدما صاحت السكرتيرة اسمي وطبينة للدكتور..

الظاهر جان مال انف واذن وحنجرة..
الدكتور : شبيهه..
محيي : البارحة بطنهه وجعتهه على فجأة..اخذتهه للمستشفى ماكو دكتور بالليل..كعدت الصبح حجت عادي بس رجعنة للبيت كامت تستفرغ وماطلع صوتهه بعد..
الدكتور : تفضلي ع السدية اشوفج..
سمعتة ومسويت شي..اجة ابوي كعدني ع السدية..ادور اجة الدكتور فحص اذاني وبلعومي..
الدكتور : مابيهه شي..احتقان بسيط بس ميأثر ع النطق والحبال الصوتية..
محيي : شلون..زين ليش متكدر تحجي..
الدكتور : هي متعرضة لصدمة..فرحانة حزنانة..
محيي : لا عادي..اولت البارحة جانت مابيهه شي..
الدكتور : حكتبلهه علاج للاحتقان..مرتين باليوم

محيي : مشكور دكتور..اجه اخذني من ايدي وبيدة الراجيتة طلعنة ونزلنة للصيدلية..عاينتلة جان يبتسم..اشترى العلاج ورجعنة للبيت..كعدت بالهول وهو بالمطبخ..
شذى : ها شطلع بيهه..
محيي : عدهه احتقان بالحنجرة..سويلهه شوربه فدشي خفيف ع معدتهه..اريد انطيهه الدوة..
دنوة : اجة للهول شغل التلفزيون وكعد بسدي..حضني ويبوس براسي..ويمسد بشعري بس انه ما انطيته اي ردة فعل بس ساكتة..اعرف شديصير واسمع كلشي بس جسمي خردة صاير سانتيم واحد ما اكدر اتحرك..احس مو انه متحكمة بجسمي..شوي واجت شذى بيدهه كاسة..جابت الطبلة وخلتهه عليهه..عاينت علي بطرف عينهه وراحت..شي بداخلي يريد يكتلهه لحدما تنتهي..

ابوي عدل كعدتي ويوكلني شوي شوي كلساع ادفع بايدة وأشرلة كافي..يكلي شلون حتاخذين العلاج اكلي ولو شوي اكلت واخذت الدوة..صاح سما اجت اخذت الصينية..انه كل هذا واحس روحي بس جسم..اسمع بس ماكدر اسوي شي ابوي كاعد يمي ماعافني..اذن المغرب اول ما صاح الله اكبر حسيت الاكل صار بزردومي..رحت بالعجل للحمام كمت استفرغ واشهك..ابوي صاح بشذى
محيي : لج شمخليه بالاكلللل..ليش هشكل صار بيهه
شذى بخوف : والله مامخلية شي..هاي رزان جانت يمي اسألهه اذا تريد..هي بتك مدري شبيهه من البارحة..
عافهه واجة يمي بالحمام..بس رفعت راسي من المغسلة دخت وطحت بعد مادري شصار..

بس كعدت لكيت روحي بغرفة ابوي وهو واكف يمي ديخابر مدري منو..شافني كعدت جان يسدة وكعد بسدي..
محيي : شصار بحالج يابة..ماحاطة شي بحلكج من البارحة ليش هشكل..احد مضوجج..خاف مغثوثة
حركت ايدي يعني لا..اخذني بحضنة ويمسح على راسي وخرت عنه جربت احجي..ماتطلع الكلمات..صوتي انتهى فدنوب حتى بحة مابي..كمت ابجي بحرگة واكطع بشعري واضرب على رجلي ورگبتي اريد يطلع صوتي تهسترت.. ابوي يريد يكمشني ماكدر ضليت ادفر وابجي لحدما ذبيت روحي بحضنة وابجي مثل الطفل واجر ببلوزة..احس البيت شكدوتة بيه..اريد اطلع اهج..بس ما ابقى هنا..ادور شلون افهمة لابوي اريد اطلع..نيمني على رجلة جان تجي شذى

شذى : يلة سويت عشة..تاكلون..
محيي : اكلي انتي والبنات..
دنوة : صفنت ع السكف.. كمت ابجي بدون سبب..انداريت ع ابوي..شاف دموعي تارسة عيوني ووجهي..ميكدر يسألني يدري مراح اجاوب..حضني ويحاول يهدأ بية..ابوي كام كمشتة من ايدة..
محيي : هسة اجي يابة بس انطيني مفكة..
راح وعافني..جان تجي شذى..اول ماطبت كامت تصيح اجت يمي كمشتني من بلوزي تريد اطلعني برة..من كمشتني تهسترت كمت ادفع بيهه واشيل واطب بروحي ما ادري شصارلي هي من شافتني هيج عافتني..طب ابوي شاف حالتي وهي واكفة حاطة ايدهه ع حلكهه..

محيي : شمسويتلهه للبنيه..شلون انه ويااااج..يعني اعوفهه دقيقة تخليهه تصير هيج..كافي روحي نامي يم بناتج عوفيهه يمي اليوم..دتشوفين حالتهه شلونهه..
عاينت علي بحقارة وراحت بدون متحجي شي..ورة ساعه صعدو كلهم فوك..راح للمطبخ مدري شيسوي..شوي واجة بيده ماعون فواكه..
محيي : لازم تاكلين..موزين عليج من البارحة مماكلة..
دنوة : اخذت من ايدة واكلت..بس اخاف استفرغهن فاكلت ع كيفي لحدما خلصت تفاحة ونص برتقالة..اخذ الماعون وراح وداه للمطبخ..اجة للغرفة شغل التلفزيون ع فلم وكعد..ضليت اتفرج بس بالي مو وياه..احس واحد متحكم بية..هو كامشني من زردومي ما اكدر احجي وميطلع صوتي..مدري شوكت غفيت بس فزيت الفجر على صوت الاذان..الجامع كلش قريب علينة والجو هدوء فينسمع بوضوح..

كمت اون بمكاني وابجي وايدي على اذاني اريدة يخلص ابوي كعد ع ونيني..
محيي بنعاس : شبيج يابة..تعاي لتخافين هذا الاذان.. اخذ راسي خلاه ع صدرة ويهدأ بية..لحدما غفيت بس الف حلم اجاني..كلهن ممفهومات بس اسمع صوت صياح.. لمحت روحي بالحلم من طبيت لبيت المرة الاخذتني عليهه روان.. جن شخص واكف وراي من طبيت بعدين اختفى..فزيت الصبح اعاين هنا وهنا..مالكيت ابوي..طلعت للمطبخ بالعجل جان كاعد ع الكرسي ويشرب جاي..رحت يمة بالكع
محيي : كومي بوية..شعندج بالكع..كومني وكعدت ع الكرسي يمة..نفس البارحة وبعد اسوء..

اول ماشفت شذى لعبت روحي وطبيت للحمام بالعجل كمت استفرغ واشهك..بس طلعت من الحمام سمعتة يخابر
محيي : هسة وين اوديهه انه..هج بيوم وليلة تخربطت احوالهه ها انت تكول هيج..اي اندليتة..ماشي حاخذهه شسوي والله كسرت خاطري من البارحة..مع السلامة..اندار ع شذى.. حاخذهه لدكتور نفساني..
شذى : شنو هي مخبلة قابل..
محيي : مو مخبلة..بس صايرلهه شي مخليهه تصير هشكل بلكت ينطيهه مهدأ اعصاب شي..اندار علي واجة يمي.. كمشني من ايدي ورحنة للغرفة..راح جابلي اكل بس ماكلت اخاف استفرغ..دفعتة وكعدت ع صفحة..مشى اليوم ابوي طلع وعافني يم شذى..كال اروح احجز يم الدكتور..اجت شذى يمي ضربتني خفيف ع راسي..
شذى : تكومين ع حيلج وتصعدين فوك لا اصعدج سحل.. لو اليوم هم ناوية تنامين يمي وعلى گلبي..ترة مالي خلكج

انه اسمعهه بس ماكدر اجاوب ولا اعاين بخلقتهه.. كمشتني من بلوزي وصعدتني فوك وانه اصعد باية واعثر باللخ.. طببتني بالغرفة ودفرتني بخاصرتي..كمت ابجي وايدي ع المكان عافتني ابجي وسدت الباب ونزلت..ادور اذن المغرب تهسترت بالزايد كمت ابجي بحرگة واتخيل ناس جدامي غمضت عيوني شفت رائد يحجي بعصبية مدري ويامن كلة كلشي مابيهه بنيتي هاي..ضليت ابجي واشهك شسوي يربي تعبت والله..البشر اذا ميحجي يوم يتخبل..وانه صارلي يومين..الله اعلم شكد حضل ما احجي..زحفت للفراش وتمددت علي..

كرفصت روحي مثل الطفل وضامه راسي بين ادية وابجي بحرگة..وين عافني وراح كمت اكطع بشعري واضرب ع رگبتي اريد صوتي يطلع مليييت..ضليت هج لحدما سمعت صوت الباب..اجة ابوي حضني وكمش ايدي
محيي : شدسوين بروحج يايابة..مو مرمرتي لگلبي شصاير بيج متكليلي..شبيدي اسويلج..
حطيت راسي ع صدرة وابجي لحدما غفيت..استمر حالي هج لمدة يومين..ما اكل بس فاكهه مره وحدة لو مي لو عصير نسيت روحي..حتى سبح ما اسبح بس ع كد الحمام اروح..اكل شرب سبح كلة نسيتة.. شعري مهوس وكاعدة ع الجربايه صافنة بالحايط..اجت ام رائد هي وسرور ونوارة..شافتني كامت تبجي على حالي..تحاول تحجيني بس ماكو ميفيد..سرور تحضن بيه وتبجي..

سرور : دنوة وين ضحكتج..ليش هيج صاير بيج..ولج العقد مالتج بعد جم يوم..كومي بداعة رائد..
بس سمعت اسمة گلبي كام يرجف..مع ذلك مانطيت اي ردة فعل..صوتي بعده ماكو..تجيني حالة اكوم اضرب ع الباب واشيل واركع بروحي..اريد صوتي..لا مريضة خاطر اخذ علاج واصير زينة..ولاشي..شسوي يربي ارحم بحالي تعبت مو كدهه انه..وراهه بيوم ماصار شي لحد العصر كامت شذى لبستني..بعد ما اكدر اسوي شي جسمي مستسلم لكلشي بس الي لا..اجت هي وياي وابوي وطلعنة للدكتور طول الطريق مدنجة وما انطي أي ردة فعل
محيي : نزليهه بين ما اطبك السيارة..

كمشتني من ايدي ونزلنة..ضبت ع ايدي حييل ماسويت شي بس جريت ايدي منهه..اجة ابوي اخذني ورحنة..مجان علي احد بس وحدة كبلنة..بس طلعو طبينة..كعد جدامي الدكتور وابوي وشذى واكفين ع صفحة..
الدكتور : شسمج..
مجاوبته..عاين لابوي..كلة متكدر تحجي..كعد يستفسر وي ابوي عن حالتي..كلة من شوكت هي هج وليش وشنو صاير قبل الحادث منو عايش وياهه بالبيت..شلونهه نفسيتهه ومن هلاسئلة ..بعدين اندار علي..
الدكتور : حسألج الج..وجاوبيني حتلو بالاشاير.. رفعت راسي وعاينتلة بس بالي مو وياه..

عادلي السؤال مرتين..بالثالثة يلة استوعبت..كلي تشوفين شي قديم جدامج..حركت راسي يعني اي..كلي شتحسين بالبيت..ماكدرت احجي بس اشرتلة ع رگبتي وسويت حركة يعني ماكو هوى..كعد يحاجي ابوي
الدكتور : ما اكدر اكلك بيهه اكتئاب..لأن حسب ما كتلي هي فرحانة بخطوبتهه..بس الصايرلهه الظاهر انهيار عصبي من موقف بالبيت خلاهه تخسر صوتهه..حنطيهه علاج لصوتهه ولاعصابهه..بس لازم تنتبه وتنطيهيا بوقتة..هو مرة وحده باليوم لا تفوت ساعة وساعتين..معافاية ان شاء الله.. وكعد يكتب باسماء الادوية ويحاجي ابوي شلون ينطينياهن..انه صافنة ع ايدة شلون يكتب..ابوي همس يمي..
محيي : يلة نروح.. درت وجهي علي جان يبتسم بس مبادلتة بشي..اخذني ورحنة للسيارة..

الطريق كلة يحاول يحاجيني يكلي مشتهية شي اجيبلج عاجبتج شغلة اشتريهه لتخافين احجي وانه مو وياه..لحدما وصلنة للبيت..ردت اصعد فوك اول باية وطحت على وجهي كمت ابجي بدون صوت..اجة ابوي شالني ومشاني لغرفتة كعد يمسح على راسي..نزعني الشال والصاية وصاح على سما..كللهه جيبي فواكه لدنوة.. بين ما جابتلي انه تستهرت چي اذن المغرب..كمت ابجي واجلغ بخدودي ادفع بابوي وهو يحاول يهديني..اجت سما ضلت صافنة علي..كمت عليهه اريد اكتلهه واطلعهه برة..ابوي كمشني من ظهري ويكللهه لسما طلعي يابه..طلعييي.. ما ادري منين جتني هاي القوة بحيث ضليت ادفع بي لحدما خلص الاذان..

طحت بالكع انضرب راسي بالصومية مالت الجرباية تأذيت اي بس مسويت شي..لا صحت ولا بجيت اجة شالني ويمسح بشعري..باسني من راسي وكعدني ع الجرباية يوكلني بالفواكه قطعه قطعه..اكلت بس البرتقالة وشوي موز..جان ع الميز بطلين مي..فتح واحد وانطاني دواية تمددت وهو حاضني ويقرة على راسي ما اسمع منة شي بس حرف لو ثنين..لحدما غفيت..فزيت بالليل عاينت للساعة بالخمسة ابوي متمدد من الجهة اللخ ونايم..ضليت صافنة ع السكف جان يمر الخيال من جدامي بس صار قريب علي هلمرة حسيتة حقيقة كمت ابجي واحاول احجي بس صوتي ميطلع

احرك بيدي خاطر يروح..شوي واختفى رحت فتحت ايد ابوي وضميت راسي بحضنة..فز ع حركتي..رفعت راسي عاينتلة والدموع بعيوني..حضني وغمض عيونة..كعدت الصبح لكيتة ماكو..بقيت بالفراش ومخلية راسي بين ايدي واعاين للفراش ماكدرت اتحرك..شوي وسمعت صوتة..بين اريد افرزنة هو لو لا..وبين متأكدة هذا هو..بس الصار عماني حتى روحي نسيتهه رفعت راسي وشفتة..اي رائد متأكدة..جان يحجي وي ابوي..يكلة وينهه فوك؟..ابوي كلة لا بالغرفة هنا جوة اجة وكف بالباب ..اول ماشافني ضل ساكت..اريد اروح احضنة واكلة اخذني وياك لتروح وتعوفني..

بس السويتة بقيت كاعدة بالفراش واعاينلة..اجة كعد يمي ويعدل بشعري..
رائد : ليش هشكل..شصاير بيج..
مجاوبت..حضني وجاب رجلية صارت فوك رجلة وجسمي كلة بحضنة..تفاجئ مني..ضعفانة كووومة..كام يحاجيني بصوت ناصي وحنين مثل كل مرة..يكلي عفتج جم يوم صرتي هيجي يولي بنيتي باجر العقد مالنا..وين ضحكتج..انه بس مخلية راسي ع جتفة واسمع بدون ماجاوب..اجة ابوي يحاجي
رائد : اخذتهه لدكتور..من شوكت هي هيج
محيي : اي والله اخذتهه..كال عدهه انهيار عصبي ادور هي حتى حجي متكدر تحجي..صوتهه ماكو..
رائد : عفتهه فرحانة..شوكت صار كل هذا..

محيي : ما اعرف..بيوم وليلة كعدت مريضة..هي اول شي بالليل دكت الباب علي كلتلي بطني دتوجعني جانت تحجي عادي اخذتهه للمستشفى..اخذولهه تحاليل..قاسو ضغطهه والسكر كلهن مابيهن شي..والتحاليل سليمة..خلولهه مهدأ ونامت كعدت كالت احسن صرت اريد نرجع للبيت..اخذتهه ورجعنة..كامت تستفرغ بس تاكل شي وتختنك بعدين كامت متكدر تحجي وتبجي المغرب وتكطع بشعرهه..
رائد هو ويمسح بشعري : يادكتور اخذتهه..
محيي : اخذتهه لدكتور انف واذن وحنجرة كلت خاف عدهه مشكلة كلي عدهه احتقان بس ميأثر ع الحبال الصوتية البارحه اخذتهه لدكتور نفساني واعصاب..انطاهه ادوية لصوتهه ولاعصابهه..بعد دانتظر..

ضلو يحجون..انه بس اسمع رائد يحجي..بحرگة وصوته هادئ بنفس الوكت..شوي وراح ابوي..عافنا وحدنا.. تقرب باسني بخدي ويمسد بشعري..ماحجة شي بس اخذ ايدي البيهه الحلقة..عاين عليهه وابتسم بس مقهور ع حالي..
رائد : ماشفتج بهلتعب والضعف ابد..
ماحجيت شي.. حطيت ايدي على ايدة وغمضت..بس منايمة اجة ابوي..حطني ع الجرباية وكام وكف يمة.. شوي وطلعو سمعت صوت الباب مالت المطبخ..تخبلت..ما ادري شجاني ماريدة يروح..كمت بالعجل خطوة اعثر بيهه وخطوة عدلة فتحت باب المطبخ جان تكمشني شذى..
شذى : وين طالعة..عيب واكفين برة وي الزلم..

خزرتهه ووخرت ايدهه..رحت برة ابجي..رائد جان داير وجهه وديحجي مدري ويامن..رحت يمة كمشتة من ايدة.. اندار شافني انصدم..جرني وراه وكللهم من رخصتكم اخذني من ايدي وكعدني ع الدجة ع حافة المطبخ..
رائد : شبيج..
كمت ابجي بحركة وكامشة ايدة..مدري شلون افهمة قصدي لتروح..اشرتله ع الباب واحاول احجي بس ماكو صوت..
رائد : ما اروح؟..
حركت راسي بمعنى اي..كومني وفوتني جوة بالصالة وكعد يمي..لفيت ايدي ع رگبتة وكامشتة من بلوزة..هو يحاول يهدأ بيه بس ما اكدر..مو انه متحكمة بروحي..
رائد : يولي ماروح..بس سكتي..خلص حيلج..
شوي وطب ابوي..جفلت وضميت راسي بحضنة..حسيتة حيجي يضربني راشدي..ماسوى شي كعد ع الكرسي جدام القنفة الكاعدة عليهه ويحاجي رائد..
محيي : بوية عوفي الرجال يروح لشغلة ميصير..
رائد : خليهه..ماعندي شي اليوم..

رفعت راسي عاينت لابوي..جان يعاينلي بقهر وعيونة مدمعة و رائد حاضني صايرة هلكدوتني بحضنة احس بجسمي ضعفان لمدة اربع ايام مماكلة غير تفاح وبرتقال..حتى الماي ما استسيغة..ضليت كامشتة من بلوزة ماتحركت ولا سانتيم بقيت بحضنة لحدما غفيت..كعدت مدري شوكت ع صوت ابوي يخابر مدري منو يمي..يكلة ماكدر اجي بنتي مريضة.. شلون اعوفهه..سكت شوي بعدين كلة حطلع من الغبشة خاطر ارجع بنفس اليوم..سدة واندار علي..مسح ع راسي وابتسم بتعب شلون حيروح ويعوفني..منو يديرلي بال ويطولي خلك ماكو غيرة مشى اليوم..لليل وكلني تفاح وبرتقال وانطاني الدوة اخذني للغرفة وشغل التلفزيون..

اذن العشة..كام للحمام توضى واجة فرش المصلاية يصلي حسيت نار صارت بية تريد تطلع..متت لما كمل..اندار علي شافني انصدم..
محيي : ليش عيونج حمر هشكل..
ماجاوبت..انداريت ع الجهة الثانيه وضابة ايدي حيل ماعرف شوصف احساسي بلحظتهه..كمت ابجي واجلغ برگبتي ورجلي بدون وعي..ابوي ركض علي يكمش بيدي وانه مستمرة ما احس بالوجع الا ثاني يوم وماكدر اكلة هذا المكان يوجعني رزان وسما واكفات يم الباب يعاينون علي ومتفاجئات.. اعرف شداسوي بس ماكدر اكمش روحي..كلشي يصير مامتحكمة بي..شذى اسمعهه تكلة لابوي هاي تخبلت وديهه للشماعية ميفيد بيهه دوة ودكتور..

ابوي كام يصيح كللهه لتشوفيني خلقتج بعد..اجة يمي صافن ميعرف شيسوي.. بجيت وجلغت لحدما تعبت ونمت..هم كعدت الفجر ع صوت الاذان وصوت ابوي ديقرة قرآن ع حافة الجرباية..اول ما كعدت بطني عصرتني عصر..شهكت شهكة ابوي فز من سمعني.. رحت للحمام بالعجل وايدي ع الحايط اخاف اطيح..كمت استفرغ ومغمضة عيوني.. فتحت عيوني وانصدمت......

يتبــــــــــــع...................