سجين و روح

الحلقة التاسعة

#سجين_و_رُوح.
الحلقة التاسعة
.
.
لعند ما عرفت انه هيثم انخطف وهو فالغيبوبه !

روح >> ولفقولك انت التهمه ؟؟

هزيت براسي  >> بزبط !

روح >> وكيف استقبلت الموضوع

انا >> بالاحضان 😂

روح رفعت حاجبها >> صقر ؟ 🙄

انا>> ولا حاجه والله انصدمت واستغربت وماعرفتش ليش حطولي الموضوع انا وشن دخلني نخطف فيه ؟ وعشان هكي القضية قاعده مفتوحه لعند توا وماخذتش حكم نهائي
قضية الضرب خذت حكم بس مش نهائي عشان علي حسب ينوض من الغيبوبه او لا وما وافقوليش نطلع بكفالة

روح >> مكتوب في ملف القضية من المحامي اللي قبل انه منسبينلك التهمه علي اساس عندك حد برا ودازهم يخطفوه ! واللي ناسبلك التهمه خو هيثم !!

انا >> بزبط

روح>> ومادافعتش علي روحك؟؟

انا بحتت فيها وتنهدت >> حتي لو دافعت ما كنتش حا نستفيد ، عشان هكي قتلك من اول يوم قضيتي ما تبيش محامي تبي معجزة من ربي

روح >> تبي تيسير من ربي و شوية ذكاء

انا >> وانتي يا ذكية قدرتي توصلي الشي
روح >> ما اتهزش بقدراتي 😌
المهم نسبولك التهم واضح عشان يخلوك مده اكبر فالحبس ومقدمين اثباتات و دايرن شغل بس القاضي مازال ما حكمش وهضا في صالحنا

انا >> بس حايحكم وحناكلها
روح >> حانطلعك بكفالة
انا >> ماصارش شي من المحكمه؟
روح>> بدلت خطة بخطه
انا >> اديري في خطط وتنفذي ولا اديري بس ؟
روح>> انت مازلت مش واثق فيا

قربت من وذنها وهمستلها >> لو مش واثق فيك ماكنتيش عرفتي عليا المعلومات هذينا كلهن في شهرين !

روح جسمها انتفض لما قربت منها وكنت عارفها مرتبكه

روح >> هذي طريقتي في حل اللغز
انا قربت اكثر >> بس لو مانبيكش تعرفي كان ماخليتكش

برمت وجها وقعدنا متقابلين مافيش بينا الا مقدار شعره ، غمضت عيونها >> مش حاتقدر

صبت وخذت الاوراق و طلعت ... غمضت عيوني و ضحكت

//
//

يوم زيارة غسـان الصقر

انا >> اسمع بدر بيحكي معاك
غسان >> عليش ؟؟
انا >> تستعبط انت ! 🙂
غسان >> لا جاني خناق العرسان 😂
انا >> انقنك تافه 😂 شويه ويجي بدر اليوم ما عندش زيارة بس دويت الشاهين يخليه يطلع
غسان >> تمام

قعدت نحكي انا وغسان و شوية و طلع بدر هدرزو شويه و تعرفو علي بعضهم

انا >> فكوني من الحركات وابدو فالموضوع 🙂
غسان >>😂😂

بدر بجدية>> حكالي صقر علي الي حكيتله فيه و اكيد هو حكالك ظرفي وقالك اللي انا فيه

غسان >> ان شاء الله

بدر>> وانا ما عنديش مانع بس تبي الحق ؟

غسان >> شنو؟؟

بدر >> انا مانبيش خطبة ، لانه عارف خوالي و عارف الهرجه الي بتسير وانت راجل و نبيك تهنيني علي الحوش علي ما انا طلعت لاني مش متهني لا علي امي ولا اختي ... ف لو فيه نصيب حايكون قراية فاتحه دغري لو غير هكي ف سامحني
بس خليني قبل هكي نحكي مع غفران ونشوفها موافقه او لا وبعدها نكلم خوالي علي قراية الفاتحه

انا كنت ساكت ومابيتش نحكي فالموضوع عشان نخليهم براحتهم بس لما بدر حكى علي قصة فاتحه ما فاتحه بحتت في غسان دغري ! عشان كنت عارف ظروف هله ، وعارف انه هله توا وامه بالاصح رافضة الفكره كلها ف حاتجيها صدمه بالفااتحه دغري 😂بس اللي كان صدمة رد غسان ، سكت شويه و كنت عارف انه يفكر في هله

غسان مد يده>> علي بركة الله
بدر مد يده برضو >> تمام

رد بدر للزنزانه بعد ما كمل كلام مع غسان

انا >> انت متأكد ؟؟
غسان>> هكي هكي حاتكون مراتي سوا توا ولا بعدين فما فرقش موعد قراية الفاتحه خليها بالنصيب
انا > علي بركة الله ياصاحبي
غسان >> عقبالك يالصقر
انا >> غير نطلع من هنا حي بعدها ساهل
غسان >> انا نعدي علي حالي خير ما انا اللي مش حا نطلع حي 🙄
انا >> تم 😂
غسان صبا وبرم عليا >> ما تبيش تسأل عالحب وناره ؟؟

انا >> لا شكلك ناوي بجد ما تبيش تطلع من هنا حي ؟

غسان>> 😂😂😂 تشاو

//
//

بعد يومين
زي ما كانت روح متوقعه وافق القاضي علي قرار الكفالة و كان اليوم يوم طلعت صقر من الحبس !

كان يوم طلعته بالنسبه للكل يوم عادي ، زي اي واحد خش وحا يطلع ... بس اللي كانت روح تفكر فيه هو ان شغلها حا يبدا من يوم طلعة صقر .... كانت عارفه انه حاتصير حاجه بعد طلعت صقر  من المعلومات الي جمعتهن بس ماكانتش حاكيه الحد شي و لا تبي تحكي .

وصلت روح هي و غسان قدام الحبس و قعت كم ورقة اجراءت قانونيه و قعدو يستنو برا

غسان >> نقوله انه حا يروح معايا ولا نمشي بيه شور حوشنا دغري

روح >> امشي بيه دغري لانه لو قتله حا يقولك شيلني الحوش هلي
غسان >> هكي هكي حا يطلب اني نشيله
روح >> و حانشيلوه امتي ما يطلب بس مش اليوم خليه يتريح
غسان ضحك >> تمام 😂
روح >> ليش تضحك ؟
غسان >> شي 😂😂

//
//

انفتح باب الحبس و طلعت وانا شعوري ملخبط ، ونفكر في كل شي سيبته قبل ما نطلع !

هلي امل شغلي اصحابي حوشنا حياتي ، كل شي كل شي نفكر فيه ...
لقيت رُوح وغسان مصبيين يراجو فيا ، جيت شورهم ووقفت عند رُوح

روح ابتسمت ومدت يدها >> الحمدلله عالسلامه
انا مديت يدي>> الله يسلمك ❤️

غسان >> نحنُ هنا

روح انحرجت وخرت

برمت علي غسان اظبطني >> الحمدلله عالسلامه يالصقر

انا >> الله يسلمك

روح >> انا حانمشي للمكتب عندي كم شغل نبي نديره

غسان >> هيا معايا

انا >> تمام

مشت روح في سيارتها للمكتب و انا ركبت مع غسان و مشينا وماكنتش عارف وين شايلني وماكنتش نبي نقوله شيلني لحوش هلي ! او بالاصح مش قادر نقوله ...
//
//
وصلنا حوش غسّان

غسان >> الحوش حوشك
انا >> منور

خشينا للصالون و ماكانش فيه حد حطيت دبشي و قعدت وقعدت نهدرز مع غسان علي اجراءات الطلعه وشن صار علي رنت تلفونه بحت فيا

انا >> المدام ؟
غسان >> اه 😌😂
انا >> وريني مكان الحمام بس وين
غسان >> دغري يمين وخوذ راحتك الجناح ما فيش حد

خشيت انا بندوش و هو طلع يحكي مع غفران
كان غسّان مش حاكي مع غفران له يومين كان يفكر من بعد طلعته من عند بدر كيف حا يدير و كيف حا يحكي مع باته

غفران >> الو
غسان >> ايوه
غفران>> انت كويس ؟
غسان >> كويس شن فيه ؟
غفران >> لاتمام مافيش شي ، اوكي
غسان >> شن فيه 🙄
غفران >> يعني لكي يومين مختفي عادي ؟؟
غسان  كان يستفز في غفران >> و انتي شن واجعك
غفران >> ولا حاجه بنسأل وسألت باي

سكرت غفران وهيه متعقده و غسان كان يضحك ، رد عاود عليها

غسان >> في وحده تسكر في وجه راجلها ؟؟
غفران >> كيف ؟؟
غسان >> كلامي واضح
غفران >> واضح بس مش مفهوم راجل من ؟؟ 😂😂😂😂 شن فيه؟؟
غسان >> موعد زيارتك الجايه البدر امتي ؟؟
غفران >> بعد بكرا !
غسان >> باه
غفران >> غسان حكيت مع بدر ؟؟؟ 😨غساااااان ما تحرقش دمي شن فيه فهمني
غسان >> مافيش شي بس تقريبا الاسبوع الجاي حا نقرو الفاتحه 😌

غفران صكرت في وجه الخط و غسان يضحك 🙂

رد جاني للصالون كنت مكمل

انا >> كنك تسهوك؟؟
غسان >>فرحان بطلعتك 😂
انا >> لا تمام صدقت
غسان >> خليني نشوف امي شن معقبه من الغدا بنموت جوع
انا>> قبل ما تمشي الامك بكرا بنمشي الحوش هلي

غسان سكت
انا >> تشيلني ولا نعدي البروحي
غسان >> باهي ازح تو نشيلك
انا >> عطيني رقم روح !
غسان >> حاجه اخرى ؟
انا >> وشحن ايفون 🙂
غسان >> ياعليك حاله 🙄😂

طلع غسان و جابلي الحاجات و عطاني رقم روح وقعد يهدرز معايا وجا باته وحكينا شويه فالقضية و هزب غسان كم هزيبه عالشغل و طلع 😂🤷🏻‍♀️

//
//

ثاني يوم ... رنيت علي روح فالصبح

روح >> الو ؟
انا >> المحامية روح ؟ 😂
روح >> صقرررر ، كيف حالك
انا >> تمام تمام ... اسمعي
روح>> نعمين ؟
انا >> فالقايلة بيشيلني غسان الحوش هلي

روح سكتت

انا >> بس نبيك تمشي معايا
روح >> كيف ؟
انا>> ممكن تكوني معايا ؟
روح >> حاضر بس يعني هضا شي خاص بينك وبين هلك
انا >> انا نبيك تكوني قاعده .
روح >> اي ساعة جايين ؟
انا >> ساعة اخرى
روح >> حاناخذ اذن من المكتب و نسبقكم غادي
انا >> تعرفي العنوان
روح >> ماتنسش اني نعرف حتي كم مره اتنفس فاليوم
انا>> نتلاقو يا المحقق كونان
روح >> تهزا تهزا 😂

//
//

في القايلة كنت انا و غسان وروح قدام حوش هلي نزلت و فتحت باب سيارة روح

انا >> انزلي معايا
روح>> صقر ماتجيش
انا >> لو ما نزلتيش مش حانخش
روح >> ياربيييي

نزلت و غسان قعد في سيارته

وصلت قدام الحوش و نحس في الدنيا تبرم بيا !نبي نخش ومانبيش نخش ... برمت بحتت في حور و غمضتلي بعيونها نظرتها خلتني ندق علي باب الحوش ...
دقيت الباب و قعدت نتمنى انه ماحدش يفتح .. كنت بنواجه و نسأل الاسأله اللي يدورن في بالي بس خايف ما نلقش اجابه

انفتح الباب وكانت فاطمه اختي ! اول ما شافتني ملامح وجهها تجمدن مافيش ولا اي حركه و بدون اي وعي جت اظبطتني وانهارت تبكي وانا جامد في مكاني ، طلعو منذر و  امي بعد ما سمعو صوت بكا فاطمه وامي  و اول ما شافتني جت تجري عليا بدون اي صدمه ولا تفكير و طاحت من طولها من كثر البكا ومنذر واقف والدموع في عيونه
قعدنا فترة ونحن عالحال هضا وحور واقفه فم الباب و تبحت فينا

خشينا جوا و بحتت في حور بمعني تعالي وكلهم يبحتو فيها ومش فاهمين من هي
قعمزنا واللي  كسر حاجز الكلام منذر

منذر >> الحمدلله عالسلامه
انا بحتت فيه
منذر >> عارفك شن تبي تحكي وشن تبي تسأل بس مش بيدي والله ما بيدي

انا >> تقدر تحكيلي بيد من ؟؟ سنتين ماحدش فيكم كلف روحه وجا ؟؟ سنتين باتي ميت وما حد قالي ؟؟ سنتين وانا نحط فاللوم علي روحي ونبي بس حد يفهمني ؟؟

امي كانت تبكي وماحكتش حرف

منذر >> من بعد السنه الاولى معش قدرت نجيك جونا وحدين مسلحين وهددونا بيك !

انا >> كيف ؟؟؟؟؟؟
روح >> من طرف هل هيثم اللي جو ؟؟

منذر بحت في روح

انا >> هذي محاميتي روح !

منذر >> ماكنتش نعرف من هما قالولي لو ماتبيش صقر يموت انسوه ومعش اتواصلو معاه ولو عرفنا انه فيه اي تواصل حاتنقلب حياتنا وحياتك
ووقتها كان باتي فالمستشفي و كنت نعاني فيه خفت عليه وخفت علي اختك وامك وعليك

انا >> ماقدرتش توصلي حتي رساله ؟؟؟ مفكرتش انا شن صاير فيا

منذر>> كنت كل يوم نحاول نوصل فيك باي طريقه بس ما قدرتش ! كنت كل ما نحاول ندير اي حاجه يعرفو و يهددوني ! كنت مراقب !
ما تريحتش الا لما حولنا من المنطقه وبعنا الحوش و قلنالهم اننا حاننسوك بس بشرط ماحدش يجي شورك ولا يسيرلك اي خدش !
يكون في علمك انت في الحبس كنت مراقب كانو يراقبو فيك ! ويقولولنا في كل تفاصيلك ويهددو فينا بيك ! هضا السبب اللي خلانا نحولو

انا >> وباتي ؟؟

منذر >> باتي من زمان عنده القلب وانت عارف ، و تعرف برضو انه كان بيدير عمليه وقتلك الشي هضا انا ، بس قدر الله وما شاء فعل ... درت كل اللي عليا ودبرت كل المبلغ بس للاسف العملية مانجحتش و باتي ما قدرش يتحملها بحكم عامل السن ! يعني انت مالكش ذنب في شي

انا >> ليش يا منذز ! ليش تخلو فيا اكثر من سنتين و انا في عقل مش عقلي كل يوم ناكل في روحي و نحط فاللوم علي روحي عشانكم ! عيشتوني في دوامه وخليتوني نكره روحي

منذر >> يعني نخلوهم يقتلوك ؟؟؟ نخلوهم يآذوك ؟؟ كل شي درناه عشان ماحدش يجي شورك ! كل شي درناه عشان اختك تطلع من الحوش وما حدش يراقب فيها ويهدد فيها
ما تحطش اللوم كله علينا
امك ما ترقدش الليل عشانك محوتك اقنعناها باللي صار

انا >> خلوني بروحي بنقعد بروحي

فاطمة تبكي >> صقر

انا >> فاطمه اطلعي ماحدش يحكي حرف

كانت امي ساكته وماقالتش ولا كلمه و تبكي وخلاص

اما روح كانت مباعده بعيد ومخليتهم بروحهم ، طلعو كلهم و خلوني وقعدت روح
قربت مني و جت قدامي

روح >> تبي اي شي رن عليا

بدون اي وعي و بدون ولا اي حرف رفعت راسي وبحتت فيها و حطيت يدي علي يدها وسحبتها شوري و حضنتها ! حضن كنت محتاجه

رفعت روح يديها بشويه ولفتهن عليا و حطت يدها علي شعري وقعدت ساكته

انا>> روح انتي روحي ! انتي اللي رديتيلي حياتي بعد ما شبه انتهت خليك معايا انا بدونك بلا رُوح

"عندما لا تعرف إلى أين تذهب، إتجه نحوي "💗

روح ساكته و تمسح بيدها علي ظهري وشعري

بعد حضن دام لدقايق كانن كأنهن ساعات وتمنيته يقعد طول العمر ، بعدت شويه و قربت من وجهها

روح >> خليني نعدي ، الساعه قربت ٨ واكيد هلي يرنو عليا

انا >> خليني نوصلك
روح >> خليك مع هلك
انا >> تعالي بس

طلعت من حذاها ومشيت المنذر

انا >> مفتاح سيارتي وين ؟؟
منذر فتح الدرج ومده ليا

خذيت المفتاح وطلعت ركبت روح في سيارتها وانا في سيارتي وراها لعند وصلتها الحوشهم

//
//

مشت الليله عالكل ولا حد فاهم فيها حاجه
واكثر حد كان قاعد في دوامه انا !
كنت مش عارف كيف حا نرد حياتي اللي كانت قبل ما نخش للحبس ، كيف نبي نتعود علي حوش جديد هل مريب منهم بو متوفي وكل شي مختلف ، خشيت شخص و طلعت شخص ثاني ...

.
.
.

ثاني يوم مشت غفران البدر زيارة وحكالها بدر علي اللي صار و علي غسان وطبعا بدر ما يعرفش انه غسان يحكي مع غفران وعلي اساس ما يعرفوش بعضهم  .... وغفران كانت مصدومه ومش متوقعه ان كل شي يسير بالسرعة هذي

بدر >> ها قوليلي رايك عشان نحكي مع الراجل يجي يتقدم رسمي

غفران ساكته

بدر >> غفران عارفك مازلتي صغيره وعارف انك بتكملي حياتك كيفك كيف البنات عشان هكي انا شايف غسان مناسب لكي ، غير انه حالته المادية كويسه وهضا اخر شي نح نفكرو فيه بس راجل و صقر شكره ليا و رغم هكي قبل ما يسير اي شي رسمي خوالك تو يسألو

غفران >> بدر دير اللي تشوفه كويس ليا انت عارف اني نوثق فيك

بدر >> علي بركة الله معناها

طلعت غفران و طلب بدر من الحبس مكالمة ورن علي غسـان و حكاله انه يتقدم رسمي

اما غفران ف طلعت وهي مش عارفه من بعد اليوم شن حايسير
هل غسان هو الشخص الصح ؟؟ هل حا اتريح معاه
خصوصا انه مالهش فتره طويله تعرفه ! بس الشخص يختلف من صديق الحبيب الزوج ....

وصلت للحوش و قررت انها تريح راسها وما تحكيش مع غسان و تشوف شن يسير مع الوقت والايام

//
//

اما عند روح ... كانت فالحوش فالصبح تفطر هي ويارا و تبي تطلع للمكتب ، سمعن الباب يدق

يارا >> اكيد خالو عمر
روح >> عدي افتحي بنخش نغسل يديا

طلعت يارا تفتح و كان خالها اللي جاي

عمر>> اختك طلعت للشغل ؟
يارا >> لالا
روح >> صباح الخير
عمر >> خير ، باتك كان عندي امس و سكنلي
روح >> بخصوص ؟؟
عمر >> نفس الموضوع ..
روح >> مايملش ما يتعبش ؟؟ وهو يعاود في نفس الكلام
عمر >> روح انهيلنا القصة هذي
روح خنقتها العبرة وحست ان الموضوع المره هذي جدي

خشت خذت شنطتها و حاجاتها ومشت للمكتب

//
//

كنت انا وغسان ماشيين للمكتب جا تكى عليا فالصبح بيمشي الباته و قتله خوذني معاك بنشوف روح ... وصلنا و خش غسان الباته وانا خششني لمكتب روح قعدت نراجي فيها

قعدت نشوف فالمكتب الاوراق و الشغل وكل شي

برمت جيت عند الطاوله لقيت مجموعة اوراق وكانن مكتوبات بخط يدها جيت بنقراهن رفعت الورق لفتتني حاجه باينه تحت مرسومة ب قلم الرصاص... رفعت الورقه وكانن ملامحي اللي مرسومات عيوني وحواجبي و بادية شويه فجهة الخشم

علي خشت روح للمكتب وهي مش فاطنتلي

روح بحتت >> بسم الله فجعتني
انا >> اسف بس كنت نراجي فيك و لفتني المكتب

بحتت للي في يدي >> لفتك 🙂

خذت مني الورقه >> عندي عادة من لما بديت شغل ... لما نمسك اي قضية حتي القضايا السخيفة نقعد راسمه صورة المتهم في راسي !
اول مانعرف اي حاجه نرسم جزء من شكل القضية لعند يوم المحاكمه نقعد راسمه تفاصيله كلهن

انا >> انتي راسمه العيون و الحواجب يعني وصلتي الحاجه

روح >> اكيد وصلت 🤷🏻‍♀️

دست الاوراق فالدرج وبرمت قعمزت وانا قعمزت

انا >> جاي بنحكي معاكي فالفلوس ؟؟
روح>> اي فلوس ؟؟

انا >> اولا فلوس الكفالة ، ثانيا اتعابك بعد تكمل القضية .

روح سكتت شويه وقعدت تبحت فيا بنظرة غريبه نظره ما فهمتهش

انا >> المبلغ كبير يعني 🙂
روح >> مانبيش منك فلوس !
انا >> كيف يعني ؟؟؟؟ حتي لو ما تبيهنش نعطيهن لكي واعزقيهن او خليني نشوف حد ثاني كلا هكي ىا يسير شي.
روح >> صقر لو قتلك اتعابي بدال الفلوس تجوزني توافق ؟؟؟؟

#يتبع
#Aya🔮