اسألي عني الليالي

البارت ٢٨

عونَة الشافكم ..يا أغلى الاحباب ..

ومَر من بابكم ..
واشتم الترَاب ..

عونَة الكون بس عاين عليكم ..

عونَة الباع روحه ..
ويشترِيكم ..

الـبـارت الـثـامـن والـعـشـرون ..........

سرور : فكرت بحجيهه يمكن منطقي ويكدر يحلهه ويوضح موقفه..وانه ظلمته بدون ما اگله شكو..مشى الوكت بالگوة..احس كاعده على نار..لحد ما اجه الليل وكلهه نامت..بقيت انه ونوارة..اخذت الرقم ونزلت جوه..اخابره وافهمه كلشي..بعد ما اتحمل اكابر واصبر..رحت للهول..سديت الباب وكعدت يم التلفون..كتبت الرقم وايدي ترجف..اول ما دك شاله بالعجل.. حجيت انه بالبداية..حسام..؟

حسام : اي حسام..كلت بس لا ما تخابر..
سرور : لا اخابر..بس گلي شكو..مو انتهى كلشي..
حسام : لج افهمي..احبج..والله تعبان واريد ارتاح يمج..احجيلي شصاير..ليش رحتي..والله كلشي اسوي..بس اريدج مرتي..تفهميني؟..
سرور : الدموع تجمعت بعيني..كمت ابجي واحجي وياه..والله احبك..وما سويت هج الا من سمعت السالفه كلهه من احمد..
حسام : أي سالفه؟..

....الموقف على لسان احمد....
تخرجت من السادس بس ماقدمت ع الكلية..فگمت ادور شغل..انه اكدر اشتغل وي ابوي بالمحلات مالتة..بس اريد اعتمد على روحي..جان عندي صديق كتله اريد اشتغل والله.. فدلاني على حسام..يصير گرابته..للامانة شفته خوش رجال.. وشكد جان ينطي بالدين ويرجعوله بعدين..بغداد للبصرة كلش بعيده..فابات عندة وارجع للبيت يومين وارجع لبغداد وراهه.. بس فد يوم جنت تعبان فبقيت بعد يوم بالبيت..ثاني يوم توجهت لبغداد الصبح..عندي نسخة من المفاتيح فتحت المحل وطبيت.. لكيت الشرب والحب والكرزات..عفتهن على حطتهن وقفلت المحل..چا هذا جاي يبيعهن براسي ويحجي بالمثاليات وهو يشرب..هو حر..بس شلون الواحد يشرب بباب رزقة..

رحت لبيت خالي هم ببغداد..ضليت عدهم ساعتين بالزايد وطلعت للشغل..من وصلت لكيته شايل البطاله ومنظف المكان..ما اعرف ليش استصغرته..كمت اتضايق من الكعده وياه..ترك المحل بيدي ع الثقة..كمت ما انزل للبصرة بالشهر مره.. والمصرف ما يكفيني..ابوي اذا اگله يدزلي حيكلي چا شعندي مشغلك..كمت اروح اگص بضاعة بمبلغ معين..بعدين ابيع ربعهه واخذ الوارد الي..الباقي ارده للمحل..حسام تقريب الشهر وشويه هو ما منتبه..وراهه كام ياخذ الدفتر الاسجل بي شگصيت بضاعه اليوم والسعر مالت كل شغلة اشتريتهه..كام يشك..هو يروح يگص بضاعة..وانه بس اگعد وره الدخل..

فديوم اجه تعارك وياي..گلي وين تودي الفلوس..اني مأمن بيك وانت تبوگني..گتله فلس احمر ماعندك يمي وبعد ما اجي للمحل.. عفته وطلعت..وراهه ضل يخابرني علمود الفلوس وهم اگله ماعندك فلوس يمي..بعدين اجه للبيت داعاني جدام جدي وجدي انطاه نص المبلغ..والنص الباقي علي..بس ما انطيته.. لحدما فد يوم خابرني..كلي ما اريد الفلوس..بس اريد اخطب سرور..فگتله انته تشرب وتريد تأذيهه وتاخذ حيفك..كلي اشرب؟..انت تعرفني وعشت وياي هواي..شوكت شفتني اشرب..گتله بفلان يوم اجيت الصبح ولكيت الشرب والكرزات.. واستحقرتك..فلوس ماكو..وسرور ما انطيهه..انتهت..گلي الشرب مو الي وحلف بس ما صدگته..
حسام..يعني انت صدك تشرب؟..

حسام : باعي حبيبي..هذا كلة خلي بالزبل..الشرب الشافه احمد جان لصاحبي..وانه كتله..كتله الشرب مو الي وانت تعرفني زين ليش تحاول تلبسنياهه..احبج..واحمد ما دخله بحياتنه..عندي حساب وياه اروح علي مو اعاقب اخته..بعدين اني احبج من قبل لا تصير سالفة احمد..واني تنازلت عن الفلوس اخر شي گتله ما اريد شي بس اريد اخطب سرور وما قبل ينطيج..بس ماهتميت..وكتله اجي يعني اجي وتنطوهه.. بس الرساله الاجت منج خربت كلشي..هسة كافي لا تبجين..اذا اجي اتقدملج تقبلين؟..

سرور : مسحت دموعي..يعني ما ضايج؟..
حسام : مسامحة يحلوه..المهم توكفين وياي من اجي..
سرور : ابتسمت..اي شعندي غيرك..
حسام : مشتااااق بكد الدنيا بالقران..
سرور : حتى انه..بس أيست شسوي..
حسام : فدوه للانه بحلگج..يولي اريدج تصيرين يمي..اباوع براحتي ما اضل اتلفت منا ومنا يله احصل نظره..
سرور : ضحكت بصوت ناصي..شوكت تجي؟..
حسام : شوكت ماعدكم شي اني اجي..تره جاهز..
سرور : هممم..بعد ٣ ايام..او يومين..هيج يعني..
حسام : حاضر..بالج على نفسج..سدي التلفون وروحي.. خاف يجي احد يشوفج..خلتمشي الامور عدل.. ماعندي استعداد اخسرج..ضيعت روحي من بعدج..
سرور : انه اسمع بحچيه ورايحه لغير عالم..شكد فرحت من شفته هلكثر متمسك بيه ويريدني..اي ماشي..انته هم..

سديته ومسحت دموعي..خليت الورقه بردان الدشداشه وصعدت فوك..نوارة شافتني مبتسمه..كامت تحجي بدلع..
نوارة : ها..لازم تصافيتو..
سرور بضحكة : اي..رحت كعدت يمهه..كمشت ايدهه..لج فرحانة..وانتظر بعد يومين يجي..
نوارة : يله عيني شنريد غير راحتج وسعادتج..هسة ممكن تجين تنامين لان متت تعب اليوم مدري ليش..
سرور : اي حقج ناگله حصو..ضحكت وتغطت ونامت..كمت طفيت الضوه واجيت انام..مرت ٣ ايام عادي..دنوة اجت من بيت خالتهه..سالم رجع من شغلة..واخيرا..حكعد يمه واحجيله..بالليل طلعنه فلم..دنوة نامت ع النص ونوارة همات..كعدت بسده..

سالم هو ويكرز حب : شبيج..تردين تحجين شي..
سرور : تذكر حسام؟..عاينلي ورافع حاجبه..
سالم : اي شبي..
سرور : امه خابرتني اليوم..
سالم : شرادت..
سرور : كالت انتي ما خليتي ابني يجرب يجي يخطبج.. فهلمره اطلب منج اجي انه واخواته نخطبج.. عسى ولعل يتيسر الموضوع..شتكول انت؟..
سالم : ليش لا..حسام خوش ولد..واخوج الله يسلمه هو الغلطان..شوكت كالتلج تجي؟..
سرور : يمكن باجر..ع الاكثر يعني..
سالم : خوش يعني انه بالبيت..اعتبريهه تحلت..

سرور : والله الدنيا ما ساعتني من سمعته يكول هج..ابتسمت وكملنه الفلم..بعدين رحت لغرفتي انه ونوارة..ثاني يوم الصبح اجه عمي محيي اخذ دنوة وراحت..البيت فرغ..بس احنه وجدتي وجدي..شكد انقهرت..انه طول اليوم حاطه ايدي ع گلبي..سالم طلع وي صحبانه..جدي اجت يمه جماعه جايين من بغداد خاطر دين وبيع وشرى ورادو يتكفل بيهم هو.. ضلو للعصر واحنه هلكنه من الشغل..ساعه غده..ساعه چايات.. ساعه محليات..للعصر وطلعو..طبينه انه ونوارة نظفنه الديوانيه جدي راح يسبح وغير ملابسه..بين ما كملت الديوانية جان تندك الباب..خليت الشال براسي وطلعت بالعجل..جان سالم ووياه نسوان..بيهن ٥ هيج..ثنين شابات و٣ لا..

سالم : خشي بالعجل جوه..وخبري امي اكو جماعة جايه..
سرور : ابتسمت وفرحت..طبيت جوه رحت لغرفة امي..طبيت ركض هي جانت توهه كايمه من السجادة دتسبح..يمه.. يوووم..مو احاجيج..
ابتسام : استغفر الله..شكو يمه..شبيج..
سرور : اكو نسوان جايات عليج..يله بالعجل..تره دينتظرن
ابتسام : منو اجاني سترك ربي..
سرور : ابتسمت..لا لتخافين..كامت خلت ثوب الصلاة ع الجربايه ولبست شالهه وطلعت..جدة جانت كاعده بالهول هي وعمة سناء..رحت بره شفتهن واكفات دينزعون الاحذية..سلمت عليهم ودخلتهم للصالة..عمتي همات سلمت عليهم وجده..بين ما طبت امي انه خليت الچاي ع النار..اخذت مي وديتلهم.. كعدو عادي سوالف..قدمتلهم چايات..وكعدت وياهم..

گلبي يدك بسرعة..لحد ما وحده مره عمرهه يطلع ببداية الخمسين بس لبسهه تنوره وقميص طويل هج يعني..يمكن هاي امه..خلت گلاص الماي ع الطبلة..
ام حسام : طبعا تعذرونه ع الجية هاي..لا خبرناكم ولا شي.. بس مثل ما تعرفون وضع البلد شلونة يعني گلنه ما نكدر نجي اكثر من مرة..واحنه نعرفكم وتعرفونه مو غربة..احمد مثل ابنّه وجاي يمنه وغيرهه..فاحنه جايين بالحلال نريد نخطب بنتكم سرور لحسام..وحسام شاغول وعنده شهادة محاماة يعني ما يتعاب وبيناتنه الحجي هو رايدهه لسرور..فانتي شتكولين ام سالم..وسرور شنو تكول..
ابتسام : والله انه موافقة..ماعندي اعتراض..حسام ما يتعاب مثل ما كلتي..سرور رايهه من رايي..بس يبقى ابوهه..
ام حسام : يعني شكد وترجعولنه الخبر..
ابتسام : اليوم احاجي بالليل واردلج خبر..
ام حسام : ع الخير لعد..شوكت ما تردولنه الخبر جاهزين

سرور : فرحت فرحة ما تنوصف..وراهه شوي وراحو..انه اخذت صينية الچاي ورحت للمطبخ..امي اجت علي..
ابتسام : ولج سريوة..انتي رايدته مو؟..يعني ما ظلمتج..
سرور : انطيتهه بوسه بالهوى..لا ما سويتي شي غلط..فدوه لعمرج انتي..قابل كل الامهات مثل ابتسام الوردة..
ابتسام : عيني باع شلون تحجي..سكتي لج..
سرور : ضحكت وغسلت الاستكانات..يارب ابوي يقبل..اريد ارتاح يم حسام..هي صدفه بس گلبت كلشي بحياتي..كملت الاستكانات ورجعتهن لمكانهن جان يطب سالم..

سالم : ها شكالت امي..
سرور : مو تدري بيهه شكد فطيرة..قبلت..بس ابوي شيقنعه واحمد وعصام يزنون براسة..
سالم : يابة ما تسكتين..هذوله مزعطه..شبي ابوج قابل ما يعرف يختار لو يرادله استخارة من عصام واحمد..
سرور : ضحكت وخليت ايدي على چتفة..خوش تحجي..
سالم : اعجبج يولي..
سرور : لا وين اكو منك..بس اكول صدك..شلون جبتهم؟..
سالم : جنت طالع للشارع العام وي الولد..بعدين شفت سياره تروح وترجع لنفس الدرب..كلت يمكن متيه..رحت علي سلمت كال اريد بيت الشيخ شامخ..كالو بالديرة..كتله اي انه حفيدة.. واخذني واحد من الولد بسيارته وجبتهم..ضل السايق بره بعده شباب مبين گرابتهم..فاخذته وياي يم الولد لحد ما خابرتة وحده منهم ورجع عليهم..وراهه راحو..هم يالله يلحگون يوصلون..

سرور : اي صدك مسافة بعيده..انه تعبت اليوم كلش..اروح ارتاح شوية..بسته ورحت فوك..نوارة جانت دترتب بالكنتور.. عفتهه وتمددت ونمت..كعدت على صوت هوسة..نوارة مجانت موجودة..نزلت جوه بالعجل..ابوي واكف يم الدرج ديصيح وامي وجدي مناك..وسالم وياهم..

قاسم : لا ما انطيهه..هسة تذكر يجي يخطب..
ابتسام : الرجال وفى بوعده وخطبهه..بعد شنو..
قاسم : كلت ما انطيهه يعني ما انطيهه..شتردون تسوون..
سالم : يابه ما نريد نفتح دفاتر عتيگة وانته مو زينه عليك العصبيه..وافق ع الولد انت ومغمض..حسام ما يتفوت..
قاسم : ليش بله..لازم حضرته ملياردير وما يتفوت..اشو يشرب وابو بنات وعنده مشاكل للستار..
الجد : احنه ما سألنا عنه خاطر تكول هشكل من جيبك.. نروح نسأل ونشوف..تره الوادم ما ترحم من تخرب سمعة أحد..
قاسم : لا نسأل ولا هم يحزنون..ابوهه وبكيفي..ما اريد انطي بنتي لهجي واحد..من اشوف الرجال المناسب عود انطيهه..
ابتسام : بس يابو سالم الرجال خوش..
قاسم : شكرا..خليهه لروحه..خليروح على غيرنه..

سالم : لا عاد..لازم نحجي..من رخصتك جدي..بس هذا السمعته عن حسام كله جذب بجذب..احمد وعصام سوو هج چي احمد بايگه..اي بايگة للرجال..واجه يداعي بفلوسة جدام جدي..وجدي انطاه نص المبلغ..ع اساس الباقي على احمد.. بس كالعاده المحروس فلت ويگله ما عندك فلس احمر يمي.. خلف الله علي الرجال كال انه متنازل ع الفلوس..بس اريد اخطب سرور..بس ما قبل وجاب عصام وكعد يحشي براسه..انه اكول انطيهه وفض السالفة..
قاسم : شنو اليثبت احمد مسوي هج؟..
سالم : هذا جدي موجود واسألة..
الجد : اي صح..انه ما اريدنك تاخذ بخاطرك من احمد.. كتله انطي كلمة للرجال ترجعله فليساته خاطر ما يضل شي بيناتنكم بعد..بس مثل ما كال سالم..ما رجعهن..الولد شاريهه يقاسم..لا تصد قسمتهه..

قاسم : والله ما اعرف شكول..بس اريد احمد..سالم خابرة وگله ابوي رايدك..اريد اعرف اتصرف وي هذا الما متربي..اذا هج الحجي انه موافق..
الجد : بس مانريد هوسة بيناتنه بس..
قاسم : اي لخاطر المرحوم..بس هذا احمد بعد ما يلفي بالبيت ليلة وحدة..بالله ليش ما خبرتوني..عودك ابو انه..
الجد : السالفة انفضت وراحت..بس ابنك ضل مچلب يذب بهلتهايم ع الولد وما ملحك..
ابتسام : طب ارتاح عيني..احمد سالفتة سالفه..

سرور : انه شوي وابجي من سمعت ابوي يكول ما انطيهه.. بس صدك سالم فرحني من وكف بسدي..ابوي راح لغرفتة هو وامي..وجدي همات..سالم عاين علي وابتسم..نزلت بالعجل حضنته وخربطت شعره..انت صدك اسمك أخ..
سالم : خاف مو صدك وتزعلين؟..
سرور بضحكة : لا تخبل فدوه..
سالم : تدرين مامتغدي..سويلي شي اكلة..
سرور : يدلل سلومي الحلو..
سالم : اي عيني يدلل وسلومي هاي چي ساعدتج..
سرور : صوج اليتغزل بيك..عفته ورحت للمطبخ..شوي واجت امي ونوارة..جده همات كعدت يمنه احنه ونسوي العشه..

جدة : شوكت تردون خبر للجماعة..
ابتسام : على باجر حجية..اخذ رقمهم من حميد اول..
جدة : هلاحمد هذا شالع گلبج يايمه..الله يعينج..
ابتسام : اي والله عمة..تعبني..شوفي سالم وشوفي احمد..ولا تكول خوان ونفس البطن شالتهم وجابتهم..
جدة : عندج سالم وسرور ونوارة معوضينج..
امي خلت ايدهه على ظهري وطبطبت علي..كملنه وصبينه الاكل بالصالة..جدي جان نايم فما اجه ويانه..عمتي جايهه رجلهه ورايحة..صدك خِله البيت وما ضلت بي روحه القديمة.. دنوة وعمي محيي وعمي لواء وورود..صحيح اذتنه هي وامهه بس جان البيت ميصير بهلهدوء بس بالليل..كملنه الاكل وغسلت المواعين..صعدت فوك اسولف وي نوارة..

نوارة : يعني صدك انتي هم حتروحين وانه اضل وحدي.. ويامن اتعلل واسولف..مو عيب عليجن..
سرور : كامت تبجي من صدك..حضنتهه وبستهه..لج بعدني مارحت..اصبري شوية شبيج..من هسه تفاولين..
نوارة : ها قصدج انه فگر مو..مشكوره..
سرور : لا مو هيجي يالله..
نوارة : لا هيج هيج.. لا تسوين هسوالف..ديله بله اجاهه حبيبهه يخطبهه كبرت راسهه علينه..
سرور : كمت اضحك عليهه..ادري بيهه دتشاقة بس الموضوع لمسني..صدك حعوف البيت والمطبخ وامي وجدتي وابوي.. كمت طفيت الضوه واجيت نمت..ثاني يوم اجه احمد من الصبح.. ابوي تعارك وياه..كعدت على صوتهم..ونزلت بالعجل..جانو يتصارخون بالممر بين الديوانية والصالة..

قاسم : هاي هيج راحت التربيه بلاش بيك..لگمة حرام ماخششتهه ببطنك وانت رايح تبوگ..وانه كلت اخلي يعتمد على روحه خاطر بعدين مايعاني من الدنيا وتعبهه..بعدين هجي تسوي..شوف امك ماتت يله كبرتك..ذرة غيره ماعندك انت.. المفروض ما استبعد هج شي منك..مادام اتهمت بت وابن عمك متزوجين بالسر بعدين طلع كله تلفيق وجذب من حضرة جنابك الكسيف..
احمد : يابه انت ماتدري انه ششفت وسويت هج..
قاسم : اي بله اتحفني انت وجذبك..منا لباب الحوش بعد ما اصدگك..امشي من جدامي..ولا تشوفني شكلك بعد..
سالم : يابة على كيفك..احمد روح اطلع..
احمد بعصبية : انت لتدخل..اريد اوضح موقفي واروح..
سالم بنتر : مانريدك توضح موقفك..روح وخلص..
احمد : يعني تطردني يابه..جدي ماتحجي شي..
الجد : شتحصد تجني حميدان..والسويته مو هين..
احمد : خوش..بس هذا حسام يشرب..وانه شفت الشرب بمحلة..واذا تريد اسأل بنتك..سرور..

سرور : ابوي ضل يعاين علي..كتله جذاب..هو گلي الشرب مو مالته طلع..لصاحبة..كال هج خاطر ما يرجع الفلوس..
قاسم : اذا بقيت بالبيت لا تشوفني خلقتك..لو انته بالبيت لو انه..ما اريدك تطلع جدامي..
ابتسام : احمد روح هسة..بعدين عود تعال..دتشوف ابوك عصبي لا تحرك اعصابة بالزايد..
سرور : سالم اخذ احمد وطلعو بره..ابوي ضل يحجي علي وكلساع شايغه روحة..يگللهه لامي هاي التربية..تاليهه يطلع يبوك..جدي هم كعد يمه وحاچاه لحدما هدأ..صاحني..اجيت يمه..بسته من راسة وايدة..
قاسم : انه وگفت بسدج وما فرطت بيج..الگلتي صح؟..يعني الشرب مو اله..
سرور : اي يابة الله شاهد..هو احمد حچالي بلسانة..وانه كتلهه لنوارة خاف ما تصدگني..
قاسم : هذا هو..خليتعاقب بلكت يعرف روحه شمخبص.. وانتي يابه..العصر امج ترد خبر للجماعة..حچي نهائي؟..
سرور : دنجت خاطر ما يبين علي رايدته من صدك..اي يابة.. كام على حيله وباسني من راسي..راح لغرفتة وامي راحت وراه..انه طبيت للمطبخ لكيت جدتي كاعدة..صبحت عليهه..

الحجية غادة : بله شفتي هلاحمد شمسوي..شلون شوط ابوه..
سرور : اي ابوي شاط سوده عليه..سويت الريوك بين ما اجت نوارة..صبيناه بالصالة..كعدنه كلنه..ابوي اكل شوي وگام كال اروح للشغل..طلعت امي براه..ما صار شي وراهه..بس جدي طلع وي جماعة يريدون يروحون خطابة واهل البنية رافضين فاجه يريد يصلح بينهم..كال ما ارجع وره صلاة المغرب.. بالليل خابرني حسام على التلفون الارضي..حجينه شوي وصعدت انام..كال عگبة اجي العصر وي ابوي وخواني وعمي..صارت صدك ياربي.. الحمدلله ماراح صبري بلاش..نمت مرتاحة..

دنوة : مدري شلون مشى الوكت..بالليل كلمن راح لغرفته..انه ضليت جوه اشوف تلفزيون..جانت طالعه مسلسله..هيج بس اگضي وكت..صعدت انام..ضليت اتگلب بالفراش..وحدي وما متعوده يعني مكان جديد..نزلت اشرب مي وسمعت صوت طگطگه بالمطبخ..منو كاعد هسة كلهه نامت..رحت على كيفي للمطبخ..محد اكو..چا منين جاي الصوت؟..

مشيت بهداوة للصالة الجبيرة..هي صايرة بسد المطبخ يمكن جاي الصوت منهه..اول ما طبيت انصدمت بالشفتة..يعني شلون..هاي هي لو انه غلطانه؟..رزان كامشة التلفون تخابر وتتمضحك.. مبين دتحجي وي ولد..حبيبي وشوكت تجي.. حسبالي اليوم اشوفك بس هاي الاسمهه اختي مدري منين طلعتلي..شافتني جان تنصدم..سدته بالعجل وخلتة وراهه

رزان بقلق وخوف : ها..هاي شجابج..عساس نمتي..
دنوة : عاينتلهه بنظرات احتقار..صدك كششت منهه..رحت عليهه اخذت التلفون من وره ظهرهه وشمرته ع القنفة..
رزان بعصبية : منو سمحلج عود..
دنوة : انه ما اريد اصير ضدج واعيرج..بس اريد افهمج الدتسوي غلط..والي يريد منج شوفة وماكو بيناتكم شي رسمي هذا يضحك عليج..خلي عقلج براسج..بعدج مراهقة وما تفهمين بهسوالف..لا تمشين وره مشاعرج..تره تطيحين ببلوه ما تكومين منهه الا بالشافعات..انه اختج واكبر منك بيوم افهم منك بسنة..شحال لو اكبر منك بسنتين؟..دتفهميني..حبابة تجيبين التلفون وتمسحين الرقم جدامي..

رزان : انتي مدخلج خوش..اعرف شسوي..
دنوة : ابوي اذا شافج طالعة تشوفين هذا الولد مدري منين شيصير بي؟..ما فكرتي..
رزان : هو يحبني ووعدني يجي يخطبني..
دنوة : عيني انتي بعدج حتى ما مخلصه مدرسة..شوكت يجي يخطبج؟..وابوي دتشوفي شلون مخليج باحسن مدرسه ومدرسين خصوصي مثل ما كتيلي..چا ليش هشكل تأذينة وتريدين تجيبيله المشاكل وطيحة الراس..من تكبرين وتصيرين بالكلية عود خليجي يخطبج اذا هو يحبج صدك..
رزان : يعني شتردين هسة انتي..احبه ويحبني وبس..
دنوة : لج امي مو هج الحجي..ما تعرفين الزلم شنو ما شنو.. هذولة بلوه..انه اختج واريد مصلحتج فدااحجي هيج
رزان : مدخلج..التهي بروحج..

دنوة : راحت اخذت التلفون وصعدت فوك..هاي شبيهه البنية.. الحب عاميهه..عاد شلون حب هو..الولد شغلتهم يعلبون على مشاعر هلمسكينات..بس لازم اضل وراهه..خاف تسوي شي بروحهه من وره هذا مدري منين..حتى المي نسيته..عفته وصعدت فوك انام..بس بالي بقى يمهه..وبالي يم الدراسة.. شلون الحك اتذكر كلشي..لازم اراجعهن اول..شلون حنحط حطه ع الميز هذا..شوي وغفيت..كعدت ثاني يوم على صوت الراديو..رحت للحمام غسلت ونزلت..ابوي جان ديريد يطلع.. شافني صبح علي..
محيي : حطلع اجيب صمون..تجين؟..
شذى : شكو ماخذهه..خايف عليهه من عدنه..
محيي : ما دخلج بله..يله انه بالسيارة..

دنوة : ماكدرت ارده..رحت فوك لبست الصاية والشال ونزلت.. مرة ابوي ضلت تعاينلي من فوك ليجوه وتتأفأف..فتحت الباب وطلعت..ابتسم من شافني..دا احسة يريد يعوضني عن كل يوم حچالي حچايه مو زينة لو حس إنهه أذتني..فتح الراديو وكعد يسولفلي شوكت تبدين دراسة ومن هلحجي..
محيي : نقل ما يصير هسة..بس وداد كملت كلشي وما قصرت والله..كالت عدهه كرابة رجلهه يشتغلون بالتربيه فكملولهه المعاملة بالعجل..
دنوة : ها..اي والله حبابة هاي خالة..

وصلنه للمحل نزل اشترى صمون..توه ديرجع للسيارة جان تطبگ سياره سوده مطللة.. رشت ابو المحل وطلعت بالعجل.. العالم كلهه خافت..ناس طاح منهه الصمون..جهال كامو يبچون..اهل المحلات طلعو يشوفون شكو..الجام تكسر مالت المحل..ابوي بالعجل صعد بالسياره وانفاسة اسمعهن هلكد ما سريعه..انه متت خوف.. حطيت ايدي على حلگي ودموعي كامت تجري..كمت ابجي بس بدون صوت..انهاريت والله.. ماادري شصار بيه.. ابوي شغل السياره وطلع بالعجل..

محيي : لا تبجين..هو هذا حال الناس بهلوكت..نعلة الله على كلمن جاب الطائفيه لهلبلد..هذا الرجال سني..هددوه گبل فتره وسد محلة اسبوعين والبارحه رجع فتحه..الله يرحمه..
دنوة : تنهدت ومسحت دموعي..وصلنا للبيت.. طبك السياره بره وطبينه..ابوي كعد يحجيلهه لشذى ع الصار بره..انه صعدت نزعت الصاية والشال..طلعت من الغرفة جان تصير رزان بوجهي..صدت عني بالعجل..يمكن فشلت من موقفهه البارحة..عفتهه ونزلت جوه..نزلن البنات وكعدنا نتريك.. شلت الاكل وغسلت المواعين.. ابوي طلع لشغلة..شافني ع السنك اغسل بالمواعين..

محيي : محتاجة شي حبيبتي..اجيبلج وياي..
دنوة : تسلم حبيبي..ابتسم وراح..كملت المواعين شفت شذى تعاينلي..دارت وجهه وحجت..
شذى : والله عمي زين..حبيبي وحبيبتي..شو احنا ما يسألنا خاف محتاجين شي..هو هذا حظي..
دنوة : ماجاوبتهه لخاطر ابوي..هسة يكول من اول يوم وتسوي مشاكل..عفتهه وصعدت فوك..فتحت الاضويه والبرده.. فتحت الكتب وكعدت اقره..ماادري شكد مر وكت..بس اجتني رزان على فجأة..عفت الكتب وانداريت عليهه..

رزان : متفاجئة مو..
دنوة : لا عادي..شبيج..
رزان : البارحة صيحت عليج لأن انتي عبالج يجذب علي.. بس هو يحبني والله..حاچي اذا تريدين..
دنوة : لا ميصير..باعتباري شنو خاطر احاچي..ديري بالج على نفسج ولا تصدگين بكلشي..چا سما وينهه..ما تنصحج لو هي تگلج يحبج وتعشم بيج..
رزان : لا تگلي يحبج..بس انتي دتحجين هيج..
دنوة : اي احجي هج چي تهمني مصلحتج..انه نصحتج وسويت العندي..وقد أعذر من انذر..يحبج يجي يخطبج من تكبرين..مو يسوي علاقة بالصغر..شكد عمرج؟..١٧؟
رزان : حطب ١٧..
دنوة : يعني ١٦..انه ١٩..شوفي الفرق..اسمعي مني..لا تحسبين اغار منج واحجي هشكل..
رزان : ما ادري بعد..بالمناسبة..الامتحانات بعد اربع ايام..
دنوة : اها..ماشي..بعد عندي وكت..كالت اي وراحت..

مبينه ثولة..بس امهه تعشم بيهه ضدي..شوف شگايلتلهه..اكيد تحسبني اكرهه وامي مو زينة وأذت ابوهه..مر باقي اليوم عادي..نزلت تغديت ورجعت ادرس..وابوي اجه بالليل..يعني ما صار شي جديد..الصبح ثاني يوم ع الريوك ابوي گال العصر يجون اهلي..
شذى : ها..خير ان شاء الله..
محيي : يريدون يشوفونكم..مو احفادهم؟..
شذى : يله ماگلنه شي..هلا بيهم..
دنوة : سرور تجي؟..
محيي : اي..حيعزمونا لمشيتهه..
دنوة : رفعت راسي وره ما جنت مدنجه داكل..كتله ها؟.. خطوبة سرور؟..شوكت صارت ليش..
محيي : مادري والله..بس هيج گلي قاسم..

دنوة : هاي صدك تحجي عود..شو من رحت انه نخطبت..يله تجي وافتهم منهه..تلعب من وره ظهري..ابوي كمل وراح لشغله..شذى اجتهه النداره هسه..
شذى : يله كملي اكلج.. وتعاي وياي اريد اطلع وجه جديد للبيت..وهذا ديكور الهول معاجبني..
دنوة : ماشي..كملت اكل وشلته..اجيت وياهه لفيت الزوليه وطلعتهه بره الهول..كعدت افر بالقنفات وهي تتأمر على راسي.. لا هاي مو هيج..جيبي القنفة الجبيره هنا..كملته وجبت الزوليه فرشتهه وكنستهه..شغلت بخور وبقيت الشباج مفتوح.. هي كاعده رجل على رجل وتتأمر..كلش ضجت منهه..انه كلت حنسوي انه وياهه شو هاي ذبته كله على راسي..

شذى : يله وين كاعده..شنو تعبتي..كومي جلفي السيراميك مالت المطبخ..اريد يطلعله وجه جديد..وها وياج محجر الدرج حبوبة لا تنسين..سماوي ورزان ديدرسن ما اريد ازعجهن.. انتي اول وتالي ما تنجحين..
دنوة : كلش ضجت من حجايتهه..كتلهه ليش ما انجح.. بالعكس انه شاطره اصلا..
شذى : كال شاطرة كال..ديله جلفي..

دنوة : رحت جبت زاهي وخليته بسطله وجلافه شوي ناعمة.. كمت اجلف بي وامسح..همزين جانت كاعده دتسوي غده..ما اجت على راسي..كملت ورحت ع المحجر..رجليه صارن خيوط تعبت..بعدني ما مكملته جان تصيح مناك..
شذى : مسحي الدرج وياج..
دنوة : استغفر الله..كملت المحجر وجبت وصله مسحته من البداية..غسلت الغراض الاشتغلت بيهن ورجعتهن لمكانهن.. بعد بس تگلي نظفي غرفتي..بين ما كملت هي كملت الغده.. غسلت ايدي واجيت اكل..بس خلصت اكل كمت تمددت.. هلكت من التعب..سما حجت..

سما : شبيهه دنوة..
شذى : مابيهه شي..شغلتهه شوية گلبت الدنيا..
دنوة : ضليت صافنة عليهه..هاي صدك تحجي؟..نظفت البيت كله وهي تكول شوية..عفتهه وكمت..هم زين ما كلتلي غسلي المواعين..رحت للحمام سبحت ولفيت الخاولي على جسمي وطلعت..نسيت اخذ ملابس وياي..فبدلت بالغرفة كمت اهست نشفت شعري بالعجل ونمت..كعدت على صوت نوارة وسرور ذبيت الغطى ونزلت رجلية..

سرور : صح النوم ياحلو..شلونج..
اجت كعدت يمي ونوارة جابت الكرسي وكعدت جدامي.. زينه.. انتو شلونكم..جدة هنا؟..وجدي؟..
سرور : اي جينه كلنه..بس ما نطول جدي كال..
دنوة : شكو شعدكم ابقو..بعدين صدك تعاي جاي..صدك مخطوبة الحقيره وما كتيلي؟..يالماتستحين..
سرور بضحكة : اي اجت النسوان وصارت المشية.. باجر يجون الزلم يقرون الفاتحة..
دنوة : والله عمي زين..ومنو هذا الخطبج..
نوارة كمزت من مكانهه : حبيبهه عيني..تحبه ويحبهه..
دنوة : ضليت فاكة حلكي..لا صدك..

سرور : اي صدك..شبيج مو حاجينلج عنه..
دنوة : اي عبالي غيره.. المهم شوكت الخطوبة..
سرور : باجر بس المشية مالت الزلم..فيعني بس انتو وعمي كاظم وفيصل ولواء وبناتهم..وابوي گال نجيب رائد..
دنوة : عقجت حاجبي..شعنده جاي رائد..
نوارة : چا مو ابن عمهه..ليش ما يجي..
سرور : ابوي همات يريد يحاجي بموضوع..
دنوة : ها..يله شعلي منه..يله خلانزل اسلم عيب..لميت شعري ونزلت..سلمت عليهم وكعدت يم ابوي..جانو ديحجون على خطوبتهه وهاي التفاصيل..جدي كال بيناتنا حتصير الخطوبة لخاطر المرحوم..جابو طاري رائد..

سما ورزان كاعدات ميعرفن شصاير..رائد منو..متزوجة شنو..بعد احسن..وره ساعة تقريبا راحو..وره ما عمي عزم ابوي ع الگعدة..ابوي كلي تعاي وياي عود..شذى ضلت تعاين عود ليش ما گللهه يعني..وره ما راحو ردت اصعد فوك جان يصيحني ابوي..رحت يمه..

محيي : امشي اخذج تشترين هندام..
دنوة : ها..اي يله..رحت لبست بالعجل..ع الدرج صادفتني مرة ابوي..دفعتني وتخوصرت..
شذى : خاف عبالج هذا الدلال حيبقى..لا عيني انسي.. يله ولي من يمي هسة..
دنوة : هاي شبيهه..انه شحاجية..عفتهه ونزلت جوه..ابوي جان شايل السويج وواكف ديحجي وي سما..
محيي : يله امشي..
دنوة : تمشيت وراه وطلعنا..بالطريق اجت ببالي المدرسة.. انه داقرا بس ماعندي جدول..فگتله..
محيي : اي نسيت اگلج..اخذي من خواتج..انطيتهميا..
دنوة : ها ماشي..

نزلنا عند محل ملابس مناسبات..
محيي بهمس : شتريدين اخذي..جايب فلوس تكفيج..
دنوة : ابتسمت وطبينه..وره كومة وكت..اي هذا..لا ماعجبني باللبس..لا هذا ما ادري شلونة..اخذت فستان فوك الركبة بشوي ماروني وبي فتحة من وره وتعلاگاته نازله ع نص الچتف..واخذت كعب همات اسود..صار كله بخمسة وتسعين .. اخذتهن وطرت..صحيح عندي گبل مثله..بس هلمره تختلف.. ابوي هو اخذني بنفسة..وما ضاج مني.. بالعكس.. جان فرحان على فرحي..اول ما صعدنه بالسيارة بسته بخده..
محيي بضحك : خلنوصل للبيت..عيب هنا..
دنوة : شنو عيب وحده تبوس ابوهه..خوش هاي..كام يضحك وشغل السيارة..اخذنه اكل من بره ورجعنه للبيت..

رزان شافت العلاكة بيدي وعلاكة لخ بيهه باكيت مبين مال حذاء..
رزان : عززه..هاي مشتريه من محل فؤاد؟..
محيي : اي وليش ما تشتري..
رزان : لا بس غالي..
دنوة : ابوي حضني ومسح على چتفي..كال اي تدلل هي شعندي غيرهه..طبينه جوه..حط الاكل ع الكاونتر وصاح شذى تعاي سوي الاكل..صعدت فوك اجرب الملابس..انه صح سمره بس مو ذاك السمار الي يخلي الملابس الالوانهه طوخ ما تلوگلي..لا مناسب..ضليت اتمشى جدام المرايه مالت الكنتور جان تدخل رزان..

رزان : الله..شكد حلو..خلاجربة من ترجعين عود..
دنوة : اي عادي جدامج..
رزان : ابتسمت..يله لعد تعاي تعشي..
دنوة : بس ابدل واجي..راحت..غيرت ملابسي وعلگت الفستان نزلت اتعشى..ابوي وشذى گوه متحملين بعض..واحدهم كاعد على اعصابة..مبين متعاركين..زين انه اجيت هنا اخرب علاقتهم..وين ما اروح مشاكل..شبيه غير اعرف..سما شغلت التلفزيون ع قناة بيهه مسلسلة..كملنه اكل وكمت غسلت المواعين..ابوي راح للحمام يسبح..انه وداغسل المواعين جان تجي شذى بيدهه تلفون..

شذى : هاج عيني..هاي بت عمج خابرت..
دنوة : نشفت ايدي واخذته منهه..انتچيت ع الحايط..
سرور : الو دنو..شلونج..
دنوة : هلا عيني..زينة وانتي..
سرور : زينة..لج خوما ما تجين؟..تره ازعل..ام حسام حتجي وخواته اريد يشوفونج شلون اطگين بالكع..
دنوة بضحكة : اي عيني ليش ما اجي..اصلا ابوي اخذني شتريت ملابس..
سرور : لك هلا..باع حتطلع احلى مني الحقيرة..
دنوة : لا وين اكو بحلاتج انتي..
سرور : يله عيني تحضري زين..زين خوش..
دنوة : اي اي ميخالف فهمت..
سرور : يله اروح انام..تعبانه من الهوسة..
دنوة : يله تصبحين على خير..

سديته منهه وخليته ع الكاونتر عود ليش تكلي هيج..انه اكيد حلبس لبس زين..بس يعني جانت تكولهه بطريقة مثل واحد يريد يكول لواحد شغلة بس ميريده يعرفهه..بله انه شكد انگنك..هسة سمعتهه وخلاسكت لازم اكعد ادقق..كملت المواعين وصعدت فوك..گلبت بالكتب وتذكرت الجدول..غرفة البنات بسد غرفتي..كمت رحتلهن.. فتحت الباب ع كيفي وطبيت..

رزان : هلا بيج..تعاي كعدي ويانه..
دنوة : جانو دياكلون حلويات وجايبين حب وكرزات..كعدت يمهم شوية..سوالفهم عادية ومو مثل اول مره..يمكن ابوي محاچيهم يمكن هم شافوني غير عن الفكرة الطابعيهه عني..اكول.. ابوي كال الجدول عند رزان..انطينيا..
رزان : اي يمي..هسة انطيجيا..
دنوة : راحت دورت عنه بكتبهه وانطتنيا..شاورتهه ..ديري بالج ولا تسهلين روحج..انه وياج مو عليج..ابتعدت عنهه وابتسمت.. يله اروح اقره شوي وانام..

رحت للغرفة صفنت ع الكتب.. رائد..شلونه هسة؟..جان كلش متأذي من رحت شفتة..اهو انه ليش هج اسوي بروحي.. هو دائما يوگفلي وانه داحاول اخفي احساسي من سمعت بالموضوع..بس احبه ويحبني..ليش داسوي هشكل..نفضت الافكار من راسي وكعدت اقره.. وره ساعتين كمت انعس.. سديتهن ورحت انام..ضليت اتگلب بالفراش..ماكدرت انام..كمت طلعت من الغرفة..تمشيت بالممر..البنات نايمات.. سمعت صوت ابوي جوه عالي..نزلت ووكفت على نص الدرج ودنجت راسي اسمع بس الباب مسدوده ما سمعت زين.. فنزلت وكفت ع البايه الاخيرة.. واسمعهم يتعاركون..ابوي وشذى..

محيي : تره بنتي هاي..شنو ماكو عگل براسج..
شذى : بنتك حتخرب حياتي وانت السبب..حتخرب كلشي بنيته صار سنين..وانت حضرتك مدللهه ع الاخير وعايف بناتك..لا تفرق بيناتهم دير بالك..
محيي : انتي محتفهمين..لج بابا..هاي معدهه ام..وانه اذيتهه لحد ما الله گال بس..عرفت غلطتي واريد ادللهه واعوضهه.. اريد اصيرلهه اب مثل ما صرت لسما ورزان..كافي تره ادري بدنوة مالهه اذية على احد..وانه موصيهه ما تجاوبج چي ادري بيج حتأذيهه بحجيج بس هي ما تجاوبج..
شذى : ديله عيني..شدعواك..غلطان خليت اخوك يموت بحسرته.. انته هم مو قليل شر..

بعد ما سمعت شي غير صوت راشدي ابوي ضرب باذاني.. فزيت وصعدت فوك بالعجل وتغطيت..يمه هاي ليش هشكل ضربهه..وابوي شمسوي خاطر تكله هج..ليش محد ناوي يحجيلي..ضليت اتگلب بعدين نمت..

كعدت الصبح غسلت ونزلت جوه..ابوي توه كاعد..صبحت علي ورحت بالمطبخ.. كلش ما تتحاچى..خفت احجي شي وياهه..خاف ترزلني..ضليت افكر..ليش ما احاجي ابوي يرجعني لبيت جدي ابقى هناك؟ صارت مشاكل بيناتهم واخاف المشاكل هاي تسوي غير شي بعدين..فزيت من افكاري من سمعت ابوي يكول يله وين الزقنبوت اريد اتزقنب واولي للشغل..خليت الاكل بصينية وحطيته جدامة..رفع راسه يعاينلي..

محيي : العصر اجي اسبح واخذج ونروح لبيت جدج..
حركت راسي بمعنى اي وكعدت يمه..ما اكلت ماشتهي.. اكل وكمل وشلت الاكل..غسلت المواعين ولملمت البيت..خاطر ما تكلي كلساع تعاي سوي هيج وسوي هيج..اصلا هي مبينة عصبية اليوم..كملت وصعدت فوك قريت ورتبت وضعي.. زين اتذكر ما ناسيته كله..

ورهه بساعتين او تلاثة..كمت سبحت وكملت كلشي.. شعري عود اسوي عند نوارة..بس سرحته..تغديت وكعدت وي البنات ع التلفزيون..كمت اغفي فتمددت شوي ع القنفة..كعدت على صوت ابوي ديحجي وي البنات..
محيي : همزين كعدتي..كومي حضري روحج..
دنوة : عاينت ع الساعة..بالاربعه وربع..كمت غسلت وجهي ولبست الفستان والكعب وفوكاه الصاية..طبت رزان وبيدهه علبة مكياج..
رزان : هاج خلي منه..حتى تطلعين تحفة..

دنوة : ضحكت واخذته منهه..خليت كحله وعدلت حاجبي بالملقط..خليت حمرة من اللون الاحبة خاطر ما يبين ومسكارة انداريت عليهه..ها شلوني..سوت حركة بايدهه يعني تخبلين ابتسمت ولبست الشال ونزلت..ابوي جان لابس قاط والحذاء يلمع لمع..يمكن توه طالع من الباكيت..اخذني وطلعنه..ما كال شي ع المكياج همزين..وصلنه للبيت جانت سيارات كومه بالباب..عيني هاي كله لخاطر سرور كلت بگلبي..
محيي : خشي انتي هسة البنات ينتظرنج..وانه حروح من الباب الثاني..

دنوة : ماشي..طبيت اتمشى طلعتلي سرور..عيني تخبل والله..بوستهه وطبيت جوه ..نزعت الصاية والشال خليتهن ع الباب مالت المطبخ..ورحت للصالة الجبيره..نسوان عمامي وبناتهم واكو بنات ما اعرفهن يمكن اهلة.. سلمت عليهم وحده وحده.. تعبت من السلام..
جدة : عيني عبالك انتي المخطوبة..
ضحكت وكتلهه فدوه لعينج جدة..وحدة مره بالخمسينات بس مبينه بغدادية كالت شتصير من سرور البنية..خالة ابتسام گلتلهه بت عمهه..ابتسمتلي..

أشرت لسرور تطلع وراي.. انتظرتهه شوي.. اگلج سراوي..اريد اسوي شعري بالشسوار مالتج..وينه..
سرور بضحكة : اي روحي فوك..بغرفتي..

دنوة : خوش..حسوي وانزل..ضلت تعاينلي بنظرات مدري شلونهه..صعدت فوك دورت ع الشسوار..اول ما شغلته طفت الكهرباء..شلون سالفة هاي..كمت داريد اطلع جان تنفتح الباب وطب شخص..من الظلمة مشفت منو..بس سمعت صوت القفل ........

يتبــــــــــع.................