باوعت من الشباك ع الطفلة ونايمه بريئة من التعب والالم ودمعتها بخدها وابتسامه خفيفه ع شفايفها خفت عليها طفله 4سنوات ممعروفه منين هاي راح تدمر وبوكتها سالفة الخطف ع بنات يسووهم بنات ليل وهاي الطفله خاف تصير ضحيه
رحت باوعت بعيونها نايمه وقررت قرار بنفسي وخطيته وكلت عليك ياالله هاي بنتي وراح اخذها اتكفلها ومااعرف هي منين لذلك راح اسميها بأسمي وراح اختارلها احلى اسم بالكون كله حنين 😍
..
بعد مرور اربع ساعات
فتحت الطفله عيونها وشافت نفاخات وشموع وكيكه ولعبة بابا نويل يمها صارت تضحك اجيت عليها شايل صافورة واصفر وكتلها هلا بحنين صح النوم وهي طفله بريئة متفهم وتضحك وتاكل كيك واجو الممرضات وغنولها وضحكوا واكلنه كيك وكتلها حبيبتي حنين اني من اليوم راح اكون بابا وانتي احلى بنت بالدنيا كلها وشتريدين اسويلج -
رحت للبيت شايل الطفله ع جتفي وهي تضحك وافررها وبيدها نفاخات وخشمها بي ككاو
فوتت السيارة وبقت هي بالسيارة كاعده كتلها انتظريني شويه واجيج وهي كعدت تلعب بالصافورة
رحت فتت للبيت معرفت شلون ابدي الكلام مع امي بس امي مثقفه وحنونه وكلشي تتفهم وتتصرف بأنسانيه قبل كلشي
وحجيتلها كلشششششي
..
واتخبلت وراحت تركض للسيارة وشالتها وحضنتها وكالت هلا ببنتي
طبعا امي فرحت لان تحب البنات كلش وحلمها جان يكونلها طفله
وفاتت حنين للبيت واني قررت من الصبح اشتغل بالاوراق واسجلها بأسمي وتصير من عدنه
واشتغلت ع هاي السالفه وهم بديت اوديها كل بين فترة وفترة اسويلها فحوصات من كلشي اخاف عليها من الهوى الطاير وصارت ماليه ضحكتها علينه البيت وعلى هوستها وخبالها
صارت بنتي صارت تصيحلي بابا وتصيح امي بيبي
مرت سنوات حنين كبرت وحلت وصارت بالاعداديه كلش مرتبه وعاقله وثكيله وشاطره
جانت كلش تحبني وتحب امي وتتخبل اذا حجايه بسيطه تمسنه
اني نسيت نفسي وكبرت بالعمر وحنين نستني حبي التهيت ببنتي درستها وكبرتها وحجيتلها قصص وصارت كل وقتي هي وشغلي وبس
صار عمري 40 ياويلي كبرت بالعمر
امي صارت كلش جبيرة ومتكدر تتحرك
وحنين بنتي صارت تهتم بيها وتداريها
حنين :: بابا كبر بالعمر بسببي ونسى نفسه ومااتزوج وفاته القطار بس هو الف وحدة تتمناه واني راح اساعده يلكه احلى بنيه بالكون
اجتي فترة بابا صار يسافر ويطول بالسفر علمود شغله هواي دول تطلبه صار احسن دكتور بالعراق صرت قليل اشوفه واشتاقله وكل مره اخابره اني وبيبي صورة وصوت
بيبي كلش جبيرة بالعمر واحسن بيبي بالدنيا كلها شجعتني وساندتني ودعمتني وخلتني اكمل واقره بس خلتني اصير جريئة كلش وماتغلط نفس غلطتها مع بابا من سوته خجول
..
اجه السادس واجه موعد جنت ليل ونهار اقره للصبح بابا جان يفهمني ويقريني وميفاركني ويشجعني ويسويلي حلويات بنص الليل وكهوة ومينام يخاف لا اغفه واعوف الكتاب وهو جان الصبح يوصلني للامتحان ويروح للمستشفى هلكان جنت كلش انقهر علي ميرتاح يرجع للعصر يغفه ساعتين ويروح للعيادة
خلصت الامتحانات
..
طلعت النتائج ع الانترنت جنت نايمه العصر وفات بابا يعيط خفت اجيت ركض كتله ها فادي شبيك كلي ها فادي ولج وضحك وعيط كال وين امي واجتي بيبي كالت خيرك يمه ؟؟
كاللها حنين طلعت معدل 97 وصرنه نكمز ونعيط وفرحانين واني كتلهم هش اتخبلتوا هسه الجيران يخافون 😂😂
وضحكنه ورحت لبست الجبه وجبت كيك وعصاير وعزمت صديقتي وكرايب بابا فادي
واحتفلنه بأثناء الحفله انتبهت ع زينب مشالت عينها عن بابا بس خجوله
زينب بنت عم بابا كلش حلوة ونازكه وبيضه وعيونها عسليات وشعرها اسود ليل لجوه خصرها ع29 خريجة معهد تمريض يعني تشتغل ممرضه جوه ايد بابا بالمستشفى وهي حبته وحبت رجولته وشخصيته وبحياته ماانتبه عليها صارلها تحبه من اول مااتعينت بالمستشفى يعني حب 8سنوات اويلي !!!!
شكلها جانت تحب بابا بس تخجل تحجي لان هو ميحب اي وحده وميبادلها شعورها فجانت تخاف تتقربله
رحتلها ولزمت ايدها كتلها كومي نركص واستحت جريتها وركصت وهي شافت بابا يصفك وابتسمت وخجلت
ورجعت كعدت
خلصت الحفله ونمنه ورحت الصبح قدمت ع كلية طب الاسنان لان عشقي وحلمي هاي الكليه
وفعلا تم قبولي وعشت احلى سنين عمري بيها
بس ماحبيت احد ابد كل حبي جان بابا وبيبي مالين كل كلبي بحيث محد كدر ياخذ شعرة من كلبي غيرهم
صرت بالرابع
طبعا اكو صارحوني بس جنت ارفض
ومثل مكتلكم بداية القصه شكلي عادي ومقبول وكلش محبوبه بسرعه ادخل الكلوب 😂😂
مرت ايام راحت ايام
اجه فد يوم بابا فادي للبيت تعبان وشكله مريض كلش وحالته تعبانه ووجهه اصفر خفت وركضت كتله ها فادي شبيك؟؟
كلي فادي مو ؟؟ وضربني راشدي خفيف وضحكت
بس هو شكله كلش تعبان نيمته ع رجلي وكتله بابا شصاير كلي بنتي ماادري الدنيا ثكلت عليه ماادري ليش بلحظه كتله طبعا يابابا انت وحيد ممتزوج وتحتاج شريكة لحياتك تشاركك همومك وتمحي احزانك كلي بنتي انتي كل حياتي كلتله ادري بس الرجل ميكدر يظل اعزب طول عمرة وكال وحنين !!
كتله حنين هسه صايرة جدة وعدها احفاد يابابا كل عقلك تفكر بيها لهسه
كال شو احلم بيها كل يوم تكول فادي لتعوفني واني اركض بالحلم احضنها وابجي ونعيش بالحلم حياة سعيدة ومن افز من الحلم ابجي ماريد اكعد وهي كل يوم تزورني معافتني كل هاي السنين كلتله بابا هي ناسيتك انت صوجك يجوز منسيتها لان سميتني ع اسمها واسمي يذكرك بيها
صفن وكال يعني الحل
كالت لازم تتزوج
كال عندج عروسه ؟؟
كلتله معليك انت اني كلشي عليه 😉 وبسته وكلتله احبك يااحلى بابا وراح نام بغرفته وشويه ارتاح
اني طبعا فاهمه وجبيرة ومرحله رابعه
صدك كلتلكم بالبدايه احب اطبخ بس نسيت اكملكم سالفة الطبخ اتعلمت من بيبي كلشي من جنت صغيرة ماافاركها وهي طبخها يخبل وجانت هم تتابع اكلات بالتلفويون واني جنت اعشق هيج قنوات واتابع وياها وبقيت من صغري الى ان كبرت اطبق اكلات ونص نجحت ونص فشلت الى ان صرت احسن شيفه بالعالم هههههه ، وكل يوم اطبق اكله شكل صرت ارسم الاكله ع شكل فارس احلامي اللي اتخيله
اللي مااجه لحد هسه بس متأكده حيكون احلى امير بالدنيا 😌
..
فديوم قررت اروح لبيت زينب واحاول اوصلهم لبعض هي وفدفودي بابا
رحت سلمت عليهم وضحك وميانه من اول يوم طبعي عفويه بسرعه اتشاقه واسولف سلمت عليهم نفر نفر باستني زينب حسيتها تشتم ريحة بابا بيه
اني ضحكت ، كتلها اويلي ع العشك 😙
، خجلت كالت شقصدج ؟؟
غمزتلها كتلها حبج لبابا بصوت ناصي
وهي كرصتني وخجلت
..
لحو عليه ابقى للعشه وخابرت بابا كتله راح اتعشه بيت عمو ، كلي اوك بابا ديري بالج ع نفسج ب10 اخذج كتله اوك
ورحت ع زينب كتلها شوفيني غرفتج راحت شوفتني وباوعتلها للغرفه كلش نازكه وبسيطه وصدك مال ممرضه نظيفه
ابو زينب صاح زينب وكلتلي ابقي هنا الغرفه غرفتج وطبعا اني حركه وبس اتحرك وشفت البوم صور كلبت بصورها جان اشوف يمكن 20صورة لبابا خطيه انقهرت عليها وسمعت اجت رأسا عفت الالبوم بمكانه وكتلها يلا خلي ننزل
ونزلنه اتعشينه وجان اسمع صوت هورن فرحت رحت اركض عبالي بابا فتحت الباب لكيت شاب طويل حليوة نازل من السيارة يفتح الباب حنطاوي طويل وشعرة اسود اني جنت بوقتها كلش مرتبه وحلوة طالعه صارت عيني بعينه وهو نظرته جانت قويه 🤔 مشالها ومصدوم شلون صار وجهي بوجهه واجت زينب كالت اعرفج هذا اخويه حسين -
خجلت وكلت اهلا وسهلا اتشرفت وهو مد ايدة كلي الشرف الي استحيت مديت ايدي استحيت بس شو كلبي دك !!!!! كبل وخرت ايدي
شعور غريب اول مرة احس بي 🥴
..
حسين اخو زينب عمره 30 مخلص سادس عدادي معدله جان قليل لهذا مقبل يقدم ع كليه وفتح محل موبايلات وحالته توب
..
رحت للحديقه ويه زينب نسيت سالفة زينب وبابا
بس صار بعقلي حسين بالله هذا شلزك ببالي 😂
وره شويه اجه بابا دك هورن رحت ركض ركبت السيارة
..
سألني عن يومي وشلون جان كتله حلو
وشاف اسلوبي متغير بس عادي مااهتملي
رجعت للبيت شلت كلشي من بالي وقررت افكر بزينب وبابا وبس
الكاتبة Ayoo md
..
يتبع