اسألي عني الليالي

البارت ٢٧

يامفتاح روحي ..
      والسوالف بيك تحلَى ..

والهوى يمرني ويرطبني هبوبك ..
      يانِدى الغبشة ..

ياخطار عيني هاكثر مِختاض ..
     مِن رمش لرمش زعلان تتمشى ..

  وانا حبَيبك ..
     عمر زتني حنانك مثل الحمَيمة..

الـبـارت الـسـابـع والـعـشـرون .................

سرور : گبل لا ترجع دنوة بيومين كعدت الصبح مثل كل مره..انه اكعد گبل الكل..اذا جدي كاعد اسويله ريوك ويطلع للفلاليح يشوف شغلهم ويشوف المزرعه..هي بالحقيقة دوانم مساحتهه جبيره كلش بس جزء منهه قريب على بيتنا .. هذا ابوي وعمي فيصل دايرين بالهم علي..والبعيد على جدي.. طلعت من الغرفه والشال على چتافي..طبع بيه هذا..طبيت للحمام غسلت وطلعت لكيت جدي بالباب..صبحت علي..اسويلك ريوك ؟..

الجد : اي والله..دااريد اروح للدوانم اشوف الشغل..
سرور : حاضر..طبيت للمطبخ حضرت الريوك وخليته ع الميز.. اجه جدي وره شوي..لابس دشداشه وفوكاهه مثل الستره چي الجو بارد..كعد تريك..
الجد : يالله..انه اروح..تعاي سدي الباب براي..
سرور : اي ميخالف..طلع وانه وراه..طبعا هو من يطلع بحده لازم وياه سيارتين..بس اذا وياه ابوي لو واحد من عمامي يروحون سوه..من بعيد لمحت واحد لابس كله اسود ومنتچي ع الباب مالت السياره..طوله متوسط..

گلبي ضل يدك..يمكن هو..بس شعنده اجه؟..وهسه؟..ليش عود..انتهى كلشي وماكو مجال خاطر يقبلون..اول ما طلعت السيارات كام يتلفت بعدين حط اديه بجيبه ويتمشى لعند بيتنه..وي كل خطوه يمشيهه گلبي يدك اسرع..لحد ما صار جدامي وتأكدت هذا هو..حسام..اي..حييل صار شكد.. كمشت روحي بدون ما ابجي لو تنزل دمعه مني..شبعت بجي بيوم العرفت بي ماكو نصيب بيناتنا بسبب احمد..تنازلت عن حبي لخاطر اخوي..بس اكو رب ينصف عبده..واكيد يعرف بگلبي شكد متلوع من ٢٠٠٢ نصهه لحد هاي اللحظة.. صار ٣ سنوات..

اول ما شفته تذكرت هاي السنوات كلهه..گلبي ضل يدك سريع..كلشي صار بيناتنا تذكرته..المكالمات والحب واللهفة.. هو جان صديق احمد..كلش صحبان ويجي لبيتنا..احمد بسنة ٢٠٠٢ خلص سادس بس ما قدم ع الكلية..هج لحالة بدون سبب..مدلل ع الاخير..فراح يشتغل وي صديقة ببغداد.. منو صديقه؟ معرفته بالبداية بعدين طلع حسام.. گبلهه اول ما بلش يشتغل وياه يضل ببغداد اسبوع لو ثنين ومن يجي اسمعه يحجي وي ابوي وعصام وسالم عنه..ما ادري حسيته شهم وملامحة حلوه من حچي احمد والمواقف الصايره بيناتهم..

لحد ما فديوم جابه احمد واجه..بهذا اليوم شفته وشافني بالصدفة..حسبته طلع.. فطبيت للديوانية گبل حتى شال ماكو ع راسي..شفته ابتسم من شافني لأن منظري صدك جان يضحك..وانه طابه واحجي ها حماده خلصت..طلع صديقك..وهو جان بالديوان..هم زين ما شافني احمد..جان صارت مشكلة بذاك اليوم..طلعت بالعجل..بعدهه كثرت جياته..انتبهت على نظراته وتصرفاته.. روحي كامت تنجذبله بدون ما احس..كمت ابتسم من اشوفه..احس بشعور غريب من اسمع احمد يكول سوو مجال حسام هنا..دنوة تحجيلي شلون تحس من تشوف رائد لو من تسمع بطاري..ابتسم بداخلي..نفس الشعور احسه من اسمع بحسام..

ضلينه بس نظرات..لحد ما فديوم رجعو بالليل كلش..جانو بالمزرعه.. احمد طب گبل للغرفة ينام..انه جنت گاعده اتعلل وي نوارة..غرفة احمد بسد غرفتنه انه ونوارة..سمعتهه انسدت.. كلت اي اجو..كتلهه لنوارة شوفيلي خاف احمد يكعد لو شي.. نزلت بهدوء..صار جدامي..گلبي ضل يدك حسيته حيطلع من صدري..جانت اول مره ويمكن الاخيره الاصير بيهه وياه بهلقرب..ما بيناتنه مسافه قليله كلش..جنت منتظره يكلي احبج..جانت بعيونه مبينه..وگالهه..هو ويتلفت خاف احد يجي..عبالك جان منتظرني اجي ويگلياهه..شكد بسيطين چنه..الكلمه بصعوبه نحصلهه..شهور انه وحسام بس اشوفه من بعيد حتى ما حاجين وجه لوجه..غير باليوم الطبيت بي للديوانية على فجأه..وهو هذا اليوم الگالي بي احبج..جنت على اول بايه بالدرج وهو توه طلع من الديوانيه..شافني وابتسم..مدري شلون تجرأت وتمشيت يمه..گلي احبج بهمس..سويت نفسي مسمعت..كتله مسمعت؟..رجع گال احبج بس بصوت مسموع..جانت احلى لحظات بحياتي..واتمنى تنعاد..هلحجي ب٢٠٠٣ الشهر الثاني..

احنه طول فترة سنه و٤ شهور يخابرني ونحجي بس بالليل..الحب واللهفة الأحسهه بصوته تعوضني عن كلشي.. كمت امشي واغني واصير فرحانة بدون سبب..

بعدهه بشهر صار السقوط وما شفته ابد..حتى صوته ما سمعته..احمد بطل يروح لبغداد.. من صار السقوط وبلشو يصفون باهل المحلات الضخمة كل يوم اكعد الفجر مرعوبه اصليله وادعي ما يصيرله شي..بوكتهه گطعو الاتصالات.. حتى تلفون ارضي ماكو..وانه ضالة انتظر خبر من احمد.. احمد كلش لوتي..بس احجي كلمة وحده يعرف شقصد..فجنت اخاف اسأله على حسام..ضليت على هاي الحاله شهرين.. بعدين احمد راح لبغداد خاطر يكمل الشغل وي حسام..كعدت احسب ساعات لحتى يرجع واسمعه يحجي وي ابوي واخواني.. بس من رجع جان شكله مختلف..بالبدايه معرفت شصاير..ضل على هاي الحالة شهرين..تعودت على شكله بس طبعه صار اسوء..حتى مايعاين علي..بس وي نوارة عادي.. حبيبي وحياتي..صبيلي اكل ويكعدون يسولفون..بس وياي ما ادري شبي..ضليت هجي..

فد يوم اجت نوارة تركض للغرفة..انه جنت توني طابه للفراش..
نوارة : لج كومي..بالعجللل..
سرور : ياستار استر..شبيج يالله..
نوارة : حسام ع التلفون جوه..بالعجل نزلي حاجي..
سرور : ابد ما انسى هليوم..لمدة ٤ شهور ما سامعة عنه ولا خبر..ولا سامعه صوته..احمد ابد ما جاب طاري..نزلت بالعجل حاچيته..حتى بجيت..جان گلبي غادي نار..شكد صعب الحب گبل..هسة كلشي سهل ويجي بلمح البصر..
حسام : اشش..لا تبجين..مشتاقلج وداعت امي..
جاوبته بصوت بي بچي : حتى انه..ضحك وكال..
حسام : فدوة للانه..بس بحلگج حلوه..احمد همين يكولهه بس محلوة مثل ما انتي تحجيهه..
مثل واحد بعماره وشبت بيهه النار..وغرفته وصلتهه النار بس انطفت بمي بارد..هج جان احساسي..گلبي غدى نار..بس من حاچيته مي بارد نزل على گلبي..مرت الايام..كام يتصل مره وحده كل اسبوع..احمد ضل نفس طبعه ما يحاجيني واذا حاچاني فمن وره خشمه..

وراهه صار الما متوقعي..اجه احمد فرحان مو من عادته..طب لغرفته جان عصام هنا..گله بطلت شغل وي حسام..وره ما اخذت الاريده..ضليت افكر عود شراد منه؟..وهو يخششه للبيت ومأمن علي..شنو معقولة يكون صاير؟..ضلينه عادي يوم اي عشره لا..سألته اذا صاير شي بينه وبين احمد..يگلي ماكو شي ليش شصاير..سولفتله شلون احمد متغير..گلي لا تهتمين..كلشي ينحل..لحد ما فديوم اندگت بابنه العصريه..جدي جان توه جاي من السماوة..وانه جنت نايمة..فما ادري بي جاي بس من كعدت نوارة حجتلي..

نوارة : تره حسام جان هنا..وكعد وي جدي كعده طويله..هو واحمد..هذا اخوج الله اعلم شمسوي مصيبة..
سرور : شمسوي ياحافظ؟..قابل شعنده وياه مو صاحبة..
نوارة : صاحبه عودينه..الله يچرم..
سرور : ديله عود نفتهم بعدين..

مرن يومين وراهه خابرني..جان اسوء يوم بحياتي..حجينه عادي بس صوته متضايق ما عرفت شبي..ما طولت دقايق وسديتة..جان احمد بالباب..جمدت بدمي..هجم علي ضرب ودفرات متت جوه ايده ابجي واصيح..دنوة جانت ما موجوده بهذا اليوم..ببيت خالتهه..ومحد حجالهه من اجت..اجه ابوي فكه مني وكومني من الكع..
قاسم : هاي شكو شصاير؟..شبيك خبل..
احمد بعصبيه ويلهث : بنتك جانت تخابر حسام صاحبي..
ابوي عيونه صارت براسه..كام ضربني راشدي ودفعني للدرج..گلي ما اريد اشوف خلقتج جدامي بعد.. كام مايحاجيني وراد يزوجني بس امي وكفت بوجهه..
ابتسام : لا يابو سالم..لا تتسرع..يمكن الولد رايدهه..
قاسم : يريدهه يجي يخطبهه..مو يخابرهه ويقشمرهه بچلمتين..يومين اذا ما اجه خطبهه انه اعرف شتصرف..

سرور : عشت ايام صعبة..ادور ابوي ما يحاجيني..وانه المدلله مالته وشريد يجيبه جدامي..التغيير الصار دخلني بجو يخليني اتمنى يجي الليل خاطر انام وما اشوف أحد..نوارة خابرت حسام وفهمته كلشي..اجت بالليل جنت ابجي..
نوارة : كومي..خابرته هسه وفهمته كلشي..كتله بعد ماكو مجال..لو تجي لو خلص انتهى كلشي..
جاوبتهه والدموع بعيني وصوتي مبحوح من البجي : ماشي..نزلت اشرب مي وسمعت صوت عصام واحمد بالصالة ديحجون..الباب مفتوحة شوي فصوتهم مسموع..مسحت دموعي ورحت يم الباب اتصنط..

عصام : وانت شمعرفك حسام هيج كفو وگد كلمته؟..
احمد : ادري بي..عاشرته وعرفته زين..هسة بس ابوي يدزله خبر على إن يجي يخطبهه..يجي گبل..شعنده قابل..شهاده ومحل شكبره وخير من الله..وسرور جبيره مو تكول بعدهه جاهلة خاطر يصير عنده عذر..
عصام : يعني شحتسوي؟..غير يحجي هو..
احمد : ابوي اكيد حياخذ رأينة..عود اطلعله عذر..اكله حسام ابو بنات..حرامي..انه عشت وياه واكيد اعرفه فما يشك..
عصام : يله چا خلص..باجر اخبّر ابوي بموضوعه..
عفتهم وصعدت فوك..نمت من الصدمة ومكعدت ثاني يوم الا ب١٢ الظهر..ليش شمسويله وهجي يكرهه..معقولة صدك ابو بنات؟..بس مبين علي مؤدب..لازم اعرف شصاير..

زين حسام اذا اجه يخطبني حيتفشل وما يحصل شي..حسباله سهل الموضوع..انه حنهي كلشي افضل..الظهر شفت محد اكو.. كتبت رقمة بتلفون امي ودزيتلة رساله..
حسام انه سرور..لا تجي تخطبني خلص انتهى كلشي بيناتنه..جان عدنه تلفون طابوگه..ويا دوب يكفي الواحد يدز رسالة بيهه چم كلمة..دزيتهه ومسحتهه بالعجل..بالليل نظفت البيت ورحت دا انام سمعت التلفون الأرضي يدك..ركضت بدون وعي عليه..شلته جان يگب بوجهي يصيح وعصبي.. هو كلش هادئ ومو عصبي ابد..

حسام : انتي صاحية لو شنو؟..لج صار سنتين انتظر واخر شي تردين يخلص كلشي هيج وبدون سبب؟..
سرور : شبيك تصيح..هيج احسن الي والك..
حسام : تحبيني مو؟..واني احبج..ليش هاي الحركة؟..جنت ناوي اجيب امي وخواتي واجي اخطب وافض كلشي بسرعه..شنو الصار فهميني..بلكي اكدر احلهه..
سرور : كمشت دموعي وگتله..لا ماكو شي..بس انه فكرت زين وخلص..بعد لا تتصل..سديتة منه وصعدت فوك ابجي..ما نزلت بعد ابد..لحد بالليل كلش متت جوع فنزلت..سمعت احمد يخابر ويريد يصيح بس كاتم صوتة..رحت اسمعه من الباب يحجي وي واحد.معرفته..بعدين من حجيه طلع حسام..
احمد : ماعندك فلوس يمي خوش..واختي لا توصللهه تره احش رجليك واخليلك تهيمة بكد راسك تخليك تخيس بالسجن..دير بالك توصل للديرة تشوف شي ما يسرك..لاااا لا تضل تلزك حجي من يمك..نهينه السالفة وخلص..

كلت اليوم لازم اعرف كلشي..انه سديت السالفة من يمي بس ظلمته لحسام..فتحت الباب وطبيت..شافني وانصدم..
احمد : شعندج هنا..
سرور : اريد اعرف كلشي..شصاير انت وحسام..ليش ما تقبل يجي يخطبني؟..تره سمعتك انته وعصام تحجون علي..
احمد : وانتي شكو..لازم حابته وتردينه..
سرور : مو موضوعنه هذا..احجيلي..هو انتهى كلشي.. حجالي وصدمني صدمة..كل ما اتذكر الگاله اكوم احقد علي..مو چي حبيت حسام..بس تصرفه ما يسوي بس الحاقد..وراهه مشت الايام عادي..ابوي رجع طبيعي وياي..احمد قدم ع الكلية هم قسم داخلي مثل عصام..سالم جان يشتغل ع الحدود بالموصل وما يجي هلكثر..

الوحيد الي من رجع وشافني مكتولة اخذني لحضنه وطمني..مثل مو عصام واحمد..حسام انقطعت اخباره بعد فدنوب..بس بقيت احبة وكل يوم من تصير بالدعش ونص اتذكر شلون جان يخابرني ونحجي ونضحك...لحد هذا اليوم

شفته..صار بالباب جدامي..نطق اول كلماته..
حسام : شلونج؟..
سرور : صوته متغير..جان من يحاجيني احسه فرحان..هسة مهموم والغصه بزردومه..ابتسمت بهدوء..صح ما شايفته صار كومه..وانحرمت منه بس بعده طاري يهز بدني..كتله..زينة..
حسام : احمد موجود؟..
سرور : لا بالكلية..جر نفس وزفره بتعب..نزع المناظر وكمشهه بيده..دنج راسه وحاجاني..
حسام : تره ضلت حسره بگلبي ليش گطعتي بدون سبب..حتى ما حجيتي شي..وتدرين ما اكدر اخابر علمود خوانج هنا..فانتظرج..وضليت منتظر لحد البارحة كلت لازم اروح اشوفهه ما اتحمل بعد..
سرور : ما اكدر احجي هسة..مد ايده وبيهه ورقه صغيره..
حسام : بالليل خابريني..بس اريد اسمع السبب وارتاح..الي بكدي عدهم طفل واني منتظرج..اجي من بغداد واكطع هاي المسافه كلهه بس حتى المحج..ما اريد اشوفج..بس لمحه..اذا تردين كلشي يبقى مثل ما هو بس احجيلي السبب..
سرور : لبس المناظر ورجع شعره ليوره..نفس حركته من زمان..اخذت الورقه وضبيت ايدي عليهه..دار وجهه وراح..

سمعت صوت ابوي..جسمي ضل يرجف..بس لا شافه..يخلص علي والله.. سديت الباب ودرت وجهي طبيعي
قاسم : منو جان هنا؟..
سرور : ها..لا جدي طلع هسة والحمايه واكفين بره..فكلي سدي الباب وطبي..كال هاا..وراح طب جوه..خليت الورقة بردان الدشداشه خاطر ما تبين..طبيت جوه ومتردده اخابره لو اعوفه..ما اريد احجي السبب وانطي باحمد..اكول لنوارة؟..اي بلكت تنطيني حل..طبيت جوه لكيت امي كاعده..شكد تعبت علينه وكلشي نريده يجي جدامنه..بعدين احمد هج يجازيهه..والله لو تعرف يمكن تنجلط بعيد الشر عنهه..الله يسامحك..عبالك مو من هلبيت وطيبته واهله وناسه..عنده خباثة ويكره بدون سبب..

ابتسام : صباح الخير..ما تنامين انتي تكعدين من الصبح..
سرور : صباح النور يمه..اي شسوي ما اكدر اضل نايمه هواي..اساعدج بشي؟..صدك يمه شوكت تجي دنوة..
ابتسام : لا ما عندي شي هسة حبيبتي..هليومين كال عمج..البيت ضوجه بدونهه..
سرور : اي صدك..شويه وصعدت فوك بالغرفة..نوارة توهه كاعده..كعدت يمهه ع الجربايه..انتبهت على ملامحي شارده واكو كلام بعيوني..
نوارة بنعاس : خيرج..شنو ضايجة؟..
سرور : نوارة..اريد تلكيلي حل..اموت واخلص احسن..
نوارة بفزة : شو دسكتي..فهميني شكو..
سرور : حسام اجه..
نوارة : صخام يداده..شكو شيريد مو خلص كلشي وكلمن راح بدربه..بعدين هاي شنو بايدج؟..
سرور : جانت الورقه بيدي..اخذتهه مني وقرت الرقم..
نوارة : هذا رقمن؟..مالته..؟

سرور : بربج يعني مالمن..غير مالته..كلي خابريني بالليل.. اريد اعرف ليش رحتي بدون سبب واني ضال انتظرج..شتكولين؟..اخابره واحجيله شسمعت وشصار انه واحمد وعصام؟..لو اعوفه..
نوارة : يابه احمد مينطي عين..خل يولي..فوك ما خرب حياتج تردين تنطينه فرصة..جان هسة انتي يم حسام وخلصانه..
سرور : صدك انتي ماعندج غيره..
نوارة : بابا انه افكر بعقلي..فكري مثلي..شوفي يالثولة..جنج دنوة..نفس الشي..اكللهه ولد يحبج تكلي لا يتعاطف وياي..المهم باعيلي..هسة انتي بالليل تروحين تكتبين الرقم وتخابري..اكيد حينتظرج..تكليله ماكو نصيب بيناتنه فما ردتك توهم روحك..ليش تجي تخطبني وبعدين ما ينطوني واهلي يزوجوني..هسة يگلج وليش ما ينطوج؟..قابل اني' على گولته شبيه..ما اشتغل لو ماعندي شهاده..عاد انتي سولفيلة..تره هو يدري باحمد شمسوي..

سرور : الله كريم..فكرت بحجيهه يمكن منطقي ويكدر يحلهه ويوضح موقفه..وانه ظلمته بدون ما اگله شكو..مشى الوكت بالگوة..احس كاعده على نار..لحد ما اجه الليل وكلهه نامت..بقيت انه ونوارة..اخذت الرقم ونزلت جوه..اخابره وافهمه كلشي..بعد ما اتحمل اكابر واصبر.....

دنوة : بالليل كملنه شغل واجن فرح وكوثر ينامن يمي..كتلهم يروحون يفرشون بين ما اجيب مي وچم شغله..خاطر ما اطلع من الغرفة بعد..مريت بغرفة ابوي وسمعته يصيح ويحجي بحرگة..يگله شلون مات يمعود..صدك جذب تحجي؟..

گلبي ضل يدك..منو مات ادور ياربي..تعبت من الاخبار التخلي الواحد يتجمد بمكانه..طلع من الغرفة عرگان وديلبس بقميصة..كتله ..خير شكو؟..
محيي : بعدين..لازم افض السالفة كلهه..تعبت..
دنوة : عافني وراح..شكو..معقولة على سالفة سما ورزان وامهم؟..لو شنو..شوي ونزلت سرور بالصدفة يمكن ما تدري شكو..شافتني واكفه يم باب الغرفة مالت ابوي..
سرور : ها خيرج..شو هنا..
دنوة : ابوي طلع مدري وين..جان يخابر واحد ويگله شلون مات..عصبي ويحجي بصياح..
سرور : اهدي ولا تفكرين بأحد وتنطين احتمالات..هسة يجي ونتفهم منه كلشي..لا تخافين..

دنوة : اجت يمي وطبينا للمطبخ..كعدنا سوه..ساعه تجر ساعه وهو ماكو..جده كعدت..شافتنه بالمطبخ..
الحجية غادة : ها شعدجن يولن..كومن نامن..
سرور : جده عمي محيي طالع مدري وين ودننتظر..
الحجية غادة : استر ياربي..شعنده هلادمي هذا ما يركد بالبيت..ما گللجن شكو..اكو واحد ساعه ثنتين ما راجع..
دنوة : لا ما كال..بلكت يجي هسة..خلننتظر بعد..
الحجية غادة : چا اعوفجن وحدجن؟..ووليدي بره البيت ما ادري بي وين..عمت عيني اذا صدك..
سرور : اسم الله عليك جدة..تعاي كعدي هنا..
دنوة : كعدنه وانه كل بالي يم ابوي..منو مات..وليش يخابرون ابوي قابل هو شعلي..ادور الكل جان نايم من طلع هو..بس جدة كعدت بالصدفة وعرفت..بديت اغفي..عيوني مقفلة.. اصلا جنت جاية من بيت خالتي والطريق يضوج..سرور كاعده يمي ما عافتني..جدة بلشت تغفي خطيه هي جبيره بالعمر اصلا..اخذتهه سرور لغرفتهه تنام..

من راحت سمعت صوت باب سيارة انسد..طلعت گبل بدون تفاهم..شفت ابوي نازل من السياره وديدخن..اول مره اشوفه يدخن..هو ما حاط الجگاره بحلكه..من شوكت هاي عود..تمشيت يمه دار وجهه علي..
محيي : شو مانايمة..
دنوة : انتظرتك تجي..ضل بالي..
محيي : خشي جوه بابا..ماكو شي..لا يضل بالج..بس اريدج توكفين بسد ابوج وخواتج..
دنوة : تفاجئت من كال خواتج..اي بس شنو..
محيي : باجر اجيب شذى والبنات واعترف بيهم جدام الكل..واكو شغلة لخ ضامهه عليج باجر تعرفيهه كلهه..
دنوة : وليش مو هسة؟..
محيي ذب جگارته وزفر انفاسه : باجر افضل..
دنوة : رفعت جتافي بحركة معناهه براحتك..كتله ماشي..زين ما تفوت تنام؟..
محيي : اي يله..دنوة : حط ايده على چتفي وطبينه جوه.. باسني بخدي وراح لغرفتة..سرور توهه طلعت من غرفة جدة..

سرور : ها بشري اجه؟..
دنوة : اي اجه..راح لغرفتة هسه..
سرور : شكو شطلع..جده ما قبلت تنام..بالگوه نيمتهه..
دنوة : ماقبل يحجي..يكلي باجر تعرفين كلشي..
سرور : دنوة حبيبي..لا تضوجين..روحي ارتاحي..
دنوة : ابتسمت من خوفهه علي..اي حروح وانتي هم..حركت راسهه بمعنى اي وراحت فوك..طبيت للفراش بالاربعه الا ربع..ميته نعاس..كعدت الصبح ..سمعت صوت هوسة.. اكيد ابوي جاب شذى والبنات..اول ما طلعت من الغرفة غدير صارت بوجهي..سلمت عليهه وكعدنا بالمطبخ..شكد فشله ..بعدني حتى ما مغسله وجهي..
غدير : ابوج هنا ووياه بنات ٣..
دنوة : ادري..عاينت علي بنظرات غريبه..
غدير : تدرين؟..تدرين ابوج متزوج يعني..
دنوة : اي ادري..اخذني لبيتهم شفتهم..دا احجي وياهه جان تجي سرور..كلتلي روحي للديوانية ابوج رايدج..غسلت وجهي بالعجل ورحت للديوانية..فتحت الباب وطبيت..

محيي : يابه تره اخذتهه لدنوة خاطر تشوفهن..وشافوهه.. خواتهه هذني مو بعيدات..
الجد : اي يابه خلص..الله يهنيكم..بس المفروض تنطيني علم من زمان..هذوله احفادي ومن الغالي بعد..
محيي : يعني هاهية؟..
الجد : هاهية يابه..عاد انت جبير ومسؤول عن نفسك..بس كتلك المفروض تنطيني علم من زمان..المهم هسة ماكو فرق ان شاء الله وعرفناهم وعرفونه..
ابوي باس راس جدي وتشكر منه..عمامي جانو هنا..كاظم وفيصل وقاسم ولواء..البنات جانو مخلين الشال هج شلالي مبين مو محجبات..ولو ما يحتاج حجاب هذوله عمامهه وهذا جدهه..بس بره البيت قصدي..ابتسمت خاطر ما افشل ابوي..كعدو كلهم وصار حجي..
محيي : انه وعدتهه لدنوة يتوضحلهه كلشي..
الجد : اي بعد لازم تعرف..ظلمته لحامد انه بوية..

محيي : الي مات البارحة انمار..الي شهد ضد شهلاء جان السايق مالتهه وشهد ضدهه..وانه من شفت الدليل نهيت كلشي وگطعت الشك من اليقين..لحد ما گبل فتره اجه اعترفلي بكلشي..كال ....( وحچيت الصار گبل فترة والصار بسنة الـ٩٢) ..البارحه توفى بالمستشفى صارت بي جلطه وما متلاحگيله..جنت ناوي اجيبه يحجي هو مو انه..وهسه انه اريد الكل يبري حامد الذمه..بغض النظر عن تصرفاته ونكرانه النا بس ماطعن بيه.. الطعن بيه انمار واحنا مأمنين بي عودك..
قاسم : مبري الذمة الله يرحمه..الصوچ منه..
كاظم : الله يرحمهم..ثنينهم جوه التراب ومايفيد ندم..
فيصل : سوت الماتسوي الغجرية..
الجد : لحد يجيب طاريها بالشينة..توفت ودمها عرفته شني.. جانت غلطة ودفعت ثمنهه باولادي واحفادي..

دنوة : جان يحجي وعيونة تلمع لمع..خاصة من يذكر اسم امي لو اسمي..بكد ما فرحت بهاي اللحظات بس ضجت ضعفهه والدموع بعيوني تريد تطلع بس حابستهم.. يعني امي صدك چانت غلطانة وأذت ابوي.. رائد مكروه من الكل وحتى عمي بسبب أمي والشكوك.. خجلت اعاين بوجه رائد بعد.. مااريد يربطنا شي.. ابوه مات والكل ظالمه بسببها..

بقى بس عمي لواء..جان ديحجي على خطوبة ورود..هاي شوكت انخطبت..
لواء : خطبهه ملازم بالجيش..يعرفه رائد ..
الجد : بالخير..الله يتمم البي خير..
دنوة : يعرفه رئد؟..بس شمعرفة بورود..شدخلني..بكيفهم.. طلع الكل بقى بس جدي..

جدة طبت سلمت عليهم ورحبت بيهم..بس شكلهم منقرفين من عدنه..ما ادري ليش..يمكن چي حجو علينه جدامي فضلت الشغلة ببالي..يعني جده من اجت تسلم عليهم هي وخالة ابتسام وعمتي سناء سلمو من وره خشمهم..حسبالك محملينا منية بسلامهم..ابوي مثل الحس عليهم..
محيي : يله يابه انه اترخص..
الجد : وين النية..ابقوا للغده..
محيي : لا نروح بعد..ما قصرت يابه..
الجد : هذا الواجب..
دنوة : ابوي سلم واخذ البنات ومرته وطلعو..انه بعد طلعت وجدي همات..كال معزوم عند جماعه ديسوون خطوبة ابنهم ما ادري شنو..

صح الفكرت بي؟..لو هاي تفاهات من يمي..هو ابنه اكيد حيطلع مثله..بس ليش جذب علي..ويحجيلي حجي حلو ومتأكد من روحه..من طلعت ما شفت غدير بعد..اريد اروح لخالة ابتسام..سمعتهه تحاجي مرة عمي فيصل نجلاء..
ابتسام : الولد جان رايدهه وكتل روحه عليهه هم ماانطاه..
نجلاء : واللهما اعرف خية..هسه هي منو حياخذهه بعد مدام تطلگت..حتلو ما جاي يمهه..بس يبقى اسمهه مطلگه.. لو يجيهه واحد مطلك وعنده دسته جهال لو جبير بالعمر..
ابتسام : صحيح والله..هسه يمكن حتى هي ما تريده بعد.. لا تشوفينهه هيج..تره تعرف وتلگفهه..
نجلاء : لا تضغطون عليهه..عوفوهه براحتهه..
ابتسام : الله كريم خية..

دنوة : متت قهر..يعني هج انه بعد محد يعاينلي ابد؟..بس بعدني صغيره وما صار شي بيناتنه..ادور كمت افكر غير شكل..مااكدر ادجع علاقتي بي مثل قبل.. فشلة.. انه مستحيل اعيش مثل البشر..لازم تطلعلي شغلة كلساع.. طبيت للمطبخ الهي روحي بشغلة.. كمت اغسل المواعين على فجأه اجت سرور حضنتني..
سرور : شبي ضايج الحلو...
دنوة : ابتسمت..مابيه شي..ندستني..
سرور : تره اعرفج..شبيج..سمعتي حجايه؟..
دنوة : تدرين امي غلطانة وعمي ماچان اله ذنب..
سرور : الله يرحمهه..ويرحمه هو هم..المهم هسه بين الحق.. بس من شنو ضايجة مفهمت..
دنوة : اكيد رائد حيضوج مني ومن ابوي لأن أذى ابوه.. حتى سمعت خالة ابتسام تحاچي خالة نجلاء مرة عمي فيصل..
لمن گالها هيج تغيرت نظرتها..
سرور : تره رائد مو هيج..ليش مفكره هشكل؟..
دنوة : شمعرفج بي لهلدرجة؟..
سرور : بابا يحبج شبيج..اكو واحد يخاطر بروحه ويتعارك بيوم عرسج منو يكول مايخلي طلقة يراسه.. شبيج يمعودة.. لا تصيرين هيجي..
دنوة : درت وجهي عنهه.. ماادري..

ضاجت مني..عافتني وراحت..تفركش كلشي جان ببالي.. شلون يصدك بيه..يمكن حيفكر صدك هي معليها.. شوي وطبت خالة ابتسام..
ابتسام : راحو كلهم..والله انخبصنا خبصة..تعاي ساعديني خالة نسوي الغده..جدة تريد تاخذ دواهه..
دنوة : كمت اساعدهه انه وساكتة..محجيت شي..تكلي جيبي فلان شغله..بزلي التمن..كتلهه انه واحمس الشعرية..خالة..
ابتسام : عيون خالة..كولي حبيبة..
دنوة : شبيهه المطلگة..يعني شلون تعاينولهه..
ابتسام : والله انه مااشوف بيهه شي..بس بعد هاي الوادم ما ترحم بحال احد..ليش تسألين..
دنوة : ماكو شي..ردت اعرف بس..سكتت وكملت شغل..

اجن سرور ونوارة..فرشت السفره بالصالة وبدينه ناخذ الاكل هناك..جده مابيهه حيل تكعد بالكع..جبتلهه كرسي وكعدت يمنه..الكل يحجي ويسولف..كوثر وفرح وسرور ونوارة..
سناء : والله فاگدين ام رائد ..كون تجي ع اللمة هاي..
ابتسام : اي والله..كلنا ندري شكد تحب الديرة وتحبنه..
دنوة : كعدو يستذكرون ذكريات قديمة وجابو امي بوحده من سالفتهم.. بس وجودها شين بيناتنا ماشفتهم ذكروها بشي زين.. بس يتركوها مايكملون السالفة لأن متوفية..

خلصنا اكل..كمت ودخت دوخة مو طبيعية..احس رجلية بالسما وراسي بالكع..صار الاكل بزردومي..رحت للحمام بالعجل..كمت استفرغ واختنگت..اجت كوثر يمي..غسلت وكمشت ايدهه..كمت ما اشوف..اخذتني للغرفة.. راسي كام يدك طبل كلش اذاني وبطني منا توجعني..وجسمي يرجف..
كوثر : شبيج تتراجفين..اجيبلج شي دافي تشربي؟..
دنوة جاوبتهه بصوت ناصي : لا ما اريد..جريت الغطى وتغطيت..وجسمي يرجف متت..اجت عمة سناء..كعدت يمي..وخلت ايدهه على گصتي..
سناء : ما مصخنة..چا ليش ترجفين..
دنوة : عمه ما ادري..غطيني بعد بطانية..غطتني ببطانيه لخ وطفت الضوه وطلعت..شوي شوي هديت وغفيت..

نفس الحلم اجاني..بنفس الوضعية..جنت ابجي واصيح..والغرفة ظلمه كلش..فتح الباب وسدهه وراه..اجه يمي كمشني من شعري وايده اللخ ع رگبتي يخنگني ويكلي رائد ما يريدج..انتي حتأذي..فزيت مرعوبة وانفاس بالگوه اسحبهه..ادور متغطيه ببطانيتين..اختنگت فد مره..وخرتهن..جانت سرور يمي..دترتب بالغرفة..شافتني كعدت اجت يمي..
سرور : شلون صرتي..
دنوة : احسن..بيش ساعه هسة..
سرور : بالخمسة..ام رائد  هنا..هي واخلاص ورائد.. وابوج كال من تكعد اريد اشوفهه شلون صارت..
دنوة : رائد؟..شعنده جاي..
سرور : غير جاب امه واجه..شبيج وياه يمعوده..
دنوة : ماشي..كمت من الفراش شويه احسن..غسلت وجهي وطلعت..سرور ابوي وين..
سرور : بالحديقة كاعد..

دنوة : طلعت للحديقة شفته ديرش بيهه..مثل عادته..شافني راح سد المي واجه يمي..حط ايده ع چتفي وتمشينا..
محيي : شلون صرتي..سمعت مستفرغة..
دنوة : ابتسمت..زينه الحمدلله..بس ع الغده دخت وراسي كام يوجعني بدون سبب هج على فجأة..
محيي : يله ادفي زين بوية لاتفرطين بصحتج.. علمود ترجعين للمدرسة..
دنوة : حركت براسي يعني اي..شكد فرحت وحسيت عندي اب حيوكف وياي لحد الكبر..حضني وخربط شعري بايده.. ابتسمت وبسته بخده..
محيي : باجر الصبح اخذج ونروح للبيت..بعد هناك تستقرين.. اجيبلج كتب وكلشي..ادري بيج شاطرة ومكانج عالي المفروض.. بس صارت بعد وعرفت غلطتي..
دنوة : ميخالف.. باسني وگالي طبي جوه..

طبيت للهول..جان ام رائد هناك..سلمت عليهه هي واخلاص وكعدنه..شوي وسمعت الباب انفتحت..منو طلع..اجت نوارة كعدت يمي..
نوارة : رائد طلع هو وجدي وابوي..
دنوة : ها..على وين؟..
نوارة : ما ادري كال طالعين ع شغلة..ادور سالم حيجي..
دنوة : اي زين..مشى الوكت مدري شلون..سالفة منا حجايه منا..خلص الوكت..ام رائد كالت تبات هنا اليوم..يعني رائد حيبقى هنا استغفر الله..طبيت للمطبخ انه وعمة سناء وسرور نسوي اكل..بين ما خلصنا اجه سالم..صار كوومه ما شايفته..هو اكبر مني بكومة..فرحت بسته مثل الفرحانة بي..وانه متعوده علي اصلا..جان ياخذني من ايدي للمدرسة بالابتدائية ويرجعني..بالامتحانات يبقى واكفلي لحد ما اخلص ويرجعني للبيت بايدة..يعني اخويه مو ابن عمي..جان جايبلي اساور فضة اربعه..ضحكت وبسته مره لخ..هو طويل.. چنا ملتهين بي خواته وعمتي وكوثر وفرح..

اخذت الهديه منه ورحت اضمهه..صار رائد جدامي..ضليت واكفه بمكاني..بس لا شافني من بسته..يله هو شعلي اصلا..تقرب مني وهمس هو وصاك على اسنانة..
رائد : كعدي راحة..تره اشتعل گلبي من شفتكم..
دنوة : عاينتله بنظره باردة وعفته.. مااريد اعلقه بيه

خليت الاساور بالغرفة ورحت للمطبخ..صبينا الاكل بالديوانية.. رائد  طلع مدري وين..جدي وعمي قاسم رجعو..وكعدنا كلنا.. كل ساع اعاين للباب خاف اجه..هسة انه شكو مهتمة.. سالم جان يحجي على شغله ويريد يخطب وحده من بغداد..
الجد : اي يابه..شوكت ناويهه..
سالم : بعد يجدي..عدهه امتحانات الفترة الجايه..
قاسم : حابهه وجايينه..اخر من يعلم..
سالم كام يضحك : بالحلال يابة وداعتك..

دنوة : انتبهت على سالم يلف اكل وينطي لسرور..حتى امهه ما سوت هشكل..ليش هو مهتملهه..وهي تعاينله بنظرات بيهه امان..متقبل تاخذ منه كام يخلي بالماعون لحدما صارن هواي وخلاهن جدامهه..خالة ابتسام تگله هاي اختك هج مدللهه چا مرتك شلون..هو يگللهه سراوي اغلى منهه..شعندي غيرهه..باسهه بخدهه وكام يغسل..

كملنه اكل وبلشنه نشيله انه وكوثر وفرح..كوثر غسلت المواعين وانه رتبت المطبخ ولملمت كلشي..سالم طلع جاب حب وكرزات وجباسه..كال اريد اتعلل وي سرور ونوارة ودنوة..انه هم جنت مو نعسانة..كعدنه بالصالة وشغلنه فلم..سالم كلساع مخربط شعر سرور..ويشاقي نوارة..شكد حلو الأخ بس اكيد مو كل أخ..انه نص الفلم ونعست..
سالم : وين..خليخلص وروحي..
دنوة : ضليت كاعده يمهم..غفيت ع القنفه..كعدني سالم..
سالم : كومي يولي..روحي نامي بغرفتج..
دنوة : ها..اي..رحت للغرفة ميته نعاس..جانن فرح وكوثر موجودات..فرح نايمه ع الجربايه..فانه گبل نمت ع الفراش بالگع..كعدت ثاني يوم على صوت ابوي..

محيي : يله دنو كومي..نريد نروح..
دنوة بنعاس : ليش بيش الساعة هسه..
محيي : بالدعش ونص..
دنوة : كمت لميت الفراش وغسلت وجهي..حضرت ملابسي.. لبست لبس مايتعيب علي..وخليت ملابسي عطوري والاساور مال سالم..وكلشي يخصني..راح اعوف الغرفة هاي..شگد جان شعور يأذي..عبالك واحد تنوخذ منه شغله تخصه بالغصب..طلعت ودعتهم..سرور حضنتني..
سرور : لا تگطعين حبابة..متعودة عليج..
دنوة : ابتسمت..قابل وين حروح..اكيد اجي واخابر..بوستهه هي وخالة ونوارة..سالم سلمت علي وطلعنه..بين ما وصلنه للبيت اجه رائد ببالي..الفكرت بي صح لو حظلمه وياي.. احبه بس السمعته من خالة ابتسام غيرلي كلشي..

وصلنا للبيت..جانت اكو سياره واكفه بره..يمكن جايهم خطار..نزلنا ..ابوي جاب جنطتي وانه طبيت..بس استحيت اطب جوه لحدما هو اجه وياي يله طبيت..جانت مره غريبه هنا..معرفتهه بس ابوي عرفني عليهه..كال هاي وداد اخت شذى..رحت عليهه سلمت.. سلمت على رزان وسما ومرة ابوي همات..وداد حبابه ماكالت شي..بالعكس بوستني وسألتني
وداد : انتي الحتعيدين سنه مو؟..
دنوة : اي انه..
وداد : اي خوش..حتى اسجلج عندي..
دنوة : ابتسمت..كعدنه سوه..وابوي كعد بسدي ويسولف وياهه ع الوضع وعلى رجلهه والولد..عرفت عدهه ولد ٣.. وبنيه جبيره متزوجه..البنات جابو الغده..ابوي ماقبل اروح وياهن..خلصنه اكل عاد كمت شلته وياهن عيب اضل كاعده..
سما : بس جيبيهن..اني اغسلهن..
دنوة : ماشي..جبتهن ورجعت للصالة..

ابوي شاورني..
محيي : كولي لرزان تاخذج لغرفتج..
دنوة : گلت بگلبي..غرفتي؟..وحدي..حسبت اذا اجي هنا حعيش وي البنات..طلعت من الصالة صارت رزان بوجهي..كتلهه مثل ما كالي ابوي..كلتلي امشي..رحت وياهه الغرفه جانت اول ما صعدت الدرج..عافتني وراحت..طبيتلهه.. كلشي بيهه..صدك جايبلي كتب ودفاتر جدد..وملابس مدرسة.. ملزمتين واقلام وچربايه وكنتور وكلشي بيهه..فرحتي متنوصف..بدت حياتي تستعدل..شوي وصعد ابوي..اجه يمي باسني وحضني..
محيي : عجبوج؟..
دنوة : كلش هواي..شكرا على كلشي..
محيي : غير بنتي الجبيره..تدلل وتأمر هي..
دنوة : ضحكت وبسته من ايده..فرحني..

ذبيت الشال ورتبت شعري ونزلت..جانت خالة وداد توهه تريد تطلع..ابتسمتلي وراحت..شكد حبابة..ابوي ضل بالبيت ماطلع..شذى ماحجت شي عبالك ساكته بالغصب..مر الوكت عادي..ماصار شي يعني..كعدنه بالهول ع العشه..
محيي : باجر تبلشين تقرين خاطر الامتحانات..انتي تعرفين المادة بس تراجعينهه غير؟..
دنوة : اي يابة.. هو انه راجعت منها گبل فترة..
محيي : يالله..گدهه ادري بيج..
دنوة : ابتسمت..انتبهت على شذى شلون تعاينلي..مدري شلون مشى الوكت..بالليل كلمن راح لغرفته..انه ضليت جوه اشوف تلفزيون..جانت طالعه مسلسله..هج بس اگضي وكت..صعدت انام..ضليت اتگلب بالفراش..وحدي وما متعوده يعني مكان جديد..نزلت اشرب مي وسمعت صوت طگطگه بالمطبخ..منو كاعد هسة كلهه نامت........

يتبــــــــــع..................