#سجين_و_رُوح.
الحلقة الخامسة
//
//
روح>> الو ؟
غسان>> عرفنا مكان حوش هل صقر
روح>> وين ؟؟ الشاب هضكي قالك؟؟
غسان>> اه توا دزلي العنوان
روح>> تمام ح تمشي ؟؟
غسان >> شن رايك؟
روح>> عادي لو تخليني نمشي انا !
غسان >> اسمعي انتي خشي بس انا حا نجي معاك حنكون برا
روح>> خلاص باه ، بكرا حنمشو
غسان>> اوكي
//
//
صكر غسان ودز الروح العنوان وكان مصبي قدام المحل و لمح غفران
غسان >> اوووبااا
صاحبه>> شن فيه ؟؟
غسان>> صبي هنا بس
صاحبه>>تي وين نصبي
غسان سرحان و متنّح>> اطلع من صوتك بس
صاحبه>> ان شاء الله عقل😂
مشا غسان للمحل لي خشتله غفران وكانت المنطقة فيها محلات وكلهم اصحاب غسان و يعرفهم
غسان >> السلام عليكم ، اوي عصومي
صاحب المحل " عصام" >> مرحبتين
كان غسان يحكي ويبحت في غفران
عصام بحت ووشوشله >> شورك؟؟
غسان>> مش عارف 🤷🏻♀️😂
عصام >> دير جوك طالع انا
طلع عصام وسيب غسان فالمحل ، وكانت غفران بروحها وتشوف فالدبش
غسان>> كيف نقدر نساعدك؟
غفران >> تساعدني بآنك تطلع و تبطل طروح
غسان ضحك >> تعطيني رقمك نطلع
غفران >> ياسلام ؟حول من قدامي بنطلع
غسان قرب خطوه >> اطلعي كذاه ؟
غفران>> يا بني ادم انا نسكن قريب من هنا وخوالي ديما فالمنطقة هذي حول بلا مشاكل
غسان ببرود >>الرقم
كان عارف انه لو مادارش هكي مستحيل حا يحصل الرقم
وغفران كانت عارفه انها مستحيل تطلع الا لو عطاته لرقم و كانت خايفه بكل خصوصا انه غسان مقرب منها بدون اي خوف والمكان عشارع الرئيسي
غسان طلع تلفونه ومده لها ، خذت التلفون وكتبت الرقم وجت بتطلع مسكها من يدها ورن عالرقم
رن التلفون في شنطة غفران
غفران >> اطمنت ؟
غسان ابتسم>>خوذي اللي جايه تاخذيه من المحل وعدي
غفران>> انت كنك مصدق روحك ؟
"وكانت ماسكه في يدها بلوزه ردتها مكانها و طلعت تجري "
غسان خذا البلوزه علي خشت عصام
عصام >> شن درت للبنت
غسان>> ريحلي روحك اه
عصام >> يا عم السيد 😂
غسان>> شوفلي هذي بكم
عصام>> عيب المحل علي حسابك
غسان>> المحل علي حسابك بعدها تشعفني
بحت عالسعر وطلع فلوس مدهن له وخذا البلوزه بدون حتي كيس 😂 وطلع
//
//
ثاني يوم ...
ولعت روح سيارتها ومشت للعنوان الي دزه لها غسان وكان غسان وراها درس في نهاية الشارع وروح وصلت عند الحوش لمكتوب فالعنوان
رنت الجرس وقعدت مصبيه تراجي و مش عارفه ليش متوترة
دقت دقتين عالباب و شويه وسمعت صوت خطوات وصوت بنت بعدها انفتح الباب
البنت >> تفضلي ؟
روح >> انتي اخت صقر ؟؟
البنت جمدت مكانها ووجها تغير لما سمعت اسم صقر
فاطمة >> من انتي ؟؟ ومن وين تعرفي صقر ؟؟؟
روح >> ممكن نخش ؟؟
فاطمة>> لالا مش ممكن اطلعي ومعش تجينا خلينا في حالنا ساد ماجانا اطلعي
جت روح بتحكي شوي سمعت صوت وحده تنادي من جوا بدون ما تطلع >> من يا فطومه؟؟
فاطمة>> ماحد يا ماما وحده غالطة فلحوش
روح>> انا مش غالطة ، نبي نحكي معاك ومع امك ومع خوك ؟ ممكن تعطيني فرصة
فاطمة>> مانبيش نسمع منك شي وانسونا شن تبو منا
صكرت فاطمه الباب في وجه روح ، وروح واقفه مش فاهمه شي
ركبت في سيارتها وتباعدت من الشارع و غسان لحقها وكل حد عدا في طريق ، ورنت علي غسان حكتله الي صار بآختصار
//
//
في الحبس
كان بدر قاعد يفكر وسرحان
انا >> شن فيه
بدر >> لازم نطلع من هنا
انا >> هانت انت مش مطول
بدر >> عارف بس نفكر في بعد ما نطلع شن ندير ، اختي كل يوم تشكيلي من معاملة خوالي لها ... هضا غير انه امي زاد مرضها وتعبها وحتي مش قادرة تجي للزيارة وقعدت اختي تجيني بروحها و خالي يتمحقن عليها اصلا عشان يجيبها تشوفني وتجيبلي كم حاجه
انا>> بعد تطلع من هنا اجر حتي دارين واقعد فيهن انت وامك واختك و اقسى علي روحك واشتغل لعند تصبي علي كرعيك
بدر >> ان شاء الله خير وخلاص ، كنها الطرف معش جاتك؟؟
انا>> طرف من؟؟
بدر>> المحامية 🤤
انا >> زمري ، هضا كنه ؟
بدر >> انقنها سمحه ازح شن بتنكر ؟؟ ❤️
انا >> بتغم ولا نخربلك وجك نخليك تاخذ مؤبد بدال الست شهور ؟
بدر >> احيييىه ونغارو علي محاميتنا
مسكته من رقبته >> محامية امك صكر فمك ازح
بدر يضحك ويفك في روحه>> سكتت خلاص😂
*بصارة مساجين مالناش دعوة *😂🤷🏻♀️
//
//
غسان
روح فالليل للحوش وادوش وخش الداره ... مسك التلفون وخطرت عليه غفران ، بحت فساعة لقاها ١ حط علي رقمها ورن
وقبل ما تفصل الرنه بشوي ردت غفران
غسان >> الو
غفران >> ايوه
غسان >> كويس اني لقيتك واعية
غفران>> شن تبي نعم ؟؟
غسان >> بنهدرز
غفران >> ماعنديش نيه نحكي مع حد
غسان >> بس انا عندي نيه
تنهدت غفران وسكتت ، غسان جاها في اكثر وقت كانت فيه ضعيفة ... خوها محبوس وامها مريضه وخوالها معاملتهم عاديه معاها مش قاسيين بس في نفس الوقت مش فاضيين عشان يشيلوها ويجيبوها ويصرفو عليها كل حد لاهي في عيلته خوالها ثلاثه اثنين متجوزين وواحد شاب وخاله وحده متجوزه وبرا بنغازي
غسان>> ليش ساكته
غفران >> غسان الله يربحك خليني في حالي اللي فيا مكفيني ومافيش داعي تزيدها عليا
غسان حس من صوتها انها مخنوفه >> اعتبريني اي حد توثقي فيه واحكيلي انا بنسمعك
غفران >> ماعنديش مانحكي بس مخنوقة شويه
غسان >> من شنو
غفران >> انت هكي تحب تعرف كل حاجه؟
غسان>> عالناس اللي يخشو راسي بس
غفران >> ياسلام ؟
غسان >> وسلامين اخرى
غفران ضحكت
غسان >> احييييه الضحكة ، ايوه هكي
غفران >> ممكن نعرف شن تبي بزبط ؟ليش خذيت رقمي ؟ وليش كلمتني
غسان >> نبي نتعرف عليك
غفران >> مكسد يعني
غسان >> تؤتؤتؤ كلمة بنتعرف قعد معناها مكسد
غفران >> شباب توا هضا اللي يعرفوه
غسان >> لسانك تبيله قص
غفران >> هههههههههههههههه
كل ما تضحك كل ما غسان قلبه يتحرك ومازال هضا كله عالبر ما عرفوش علي بعضهم شي
غسان >> يعني نتعرف ؟
غفران>> اسمي وتعرفه و غيره ؟
غسان >> عمرك شن تقري كله
غفران >> ٢٠ ، نقرا صيدلة
غسان >> طفلة مازلتي
غفران >> يعني انت الشايب ؟؟ حتي انت باين عليك ٢٥ او اقل
غسان >> شن رايك لو نقولك اني خاش ال ٢٩؟
غفران >> مستحيل؟؟
غسان >> لا مش مستحيل يا صغيرة
وقعدو يهدرزو غسان عجباته الهدرزه و غفران لقت حاجه اطلعها من الي هي فيه
و طبعا مافيش داعي نحكيلكم عالمكالمه الاولى وجمال المكالمه الاولى وتفاصيل المكالمه الاولى 😩❤️
//
//
في الحبس " صقر "
طلعت للزيارة و كنت نحساب جايني غسان بس طلعت ولقيت رُوح ، ماننكرش اني فرحت لما شفتها بس في نفس الوقت كنت مضايق عشان معش جت لها قريب اسبوع .
كريت الكرسي وقعمزت و اتكيت
رُوح >> تؤتؤتؤ مافيش سلام مافيش خير ؟؟
انا >> خير
رُوح >> كثر خيرك 😒
انا>> صارت حاجه جديده فالقضية؟
رُوح >> لاء
انا >> امالا ليش جايه؟؟
"فهمت روح من كلام صقر انه يعزقلها في كلام عشان لها فترة ما جتش "
ضحكت وحطت يدها علي خدها وبحتت فيه >> علي قولتك رياف
كنت ماسك ضحكتي ومانبيش نضحك ، حطيت يدي عليا الطاوله وحطيتها علي خدي وبحتت فيها >> حا نصدق
نزلت روح عيونها من عيوني وحطت يدها علي رقبتها من لاوره بربكة
روُح >> كيف حال صحتك
انا ابتسمت بخبث >> الحمدلله
روح >> ليش مبتسم هكي ؟
انا>> حرام الواحد لو ضحك ؟
روح >> لا مش حرام 😒 المهم خلينا نحكو فالقضية شويه
انا >> عادي نحكو عليك ؟
روح >> كيف ؟
انا >> مازال قدامنا وقت طوييييل وزيارات واجد وانتي في كل مره تجي فيها تعيشي فيا في جو استجواب المره هذي انا حا نسآل وانتي جاوبي
"روح كانت بتخش في اي حوار مع صقر ف وافقت"
انا>> غير انك محامية وعمرك ٢٦ شن ثاني ؟
رُوح >> عندي اختين وانا الوسطية الكبيرة متجوزة وانا والصغيرة قاعدين ، بابا وماما مطلقين ، بابا متجوز بس ما عندش عيال من زوجته
وماما قاعده معانا انا واختي الصغيره
انا >> في حوش بروحكم؟؟
رُوح >> بعد ما بابا طلق ماما ردينا الحوش هل ماما بس ماحدش فينا تريح حوش الجد مش كيف الحوش الخاص هرجة وكل خميس وجمعة يلتمو و معش عرفنا لا نقرو لا نشتغلو ، جدي الله يرحمه كتب الحوش اللي جنب حوشهم باسم ماما وانتقلنا فيه ... يعني قاعدين بروحنا في الحوش بس عيت جدي جنبنا بس معتمده علي روحي وكل شي ندير فيه انا
حسيت من كلام روح انها شايله حمل ومسؤولية هلها كلهم ، تشتغل و تسوق وتصرف فحبيت نسآلها
انا >> يعني انتي اللي شايله المسؤوليه؟؟
رُوح بآحراج وردت حطت يدها ورا رقبتها و نزلت راسها >> تقدر تقول هكي نوعا ما يعني واخذ دور الاب و الاخ اللي ما حصلناهمش
كنت حاب نسآلها اخرى بس حسيتها اضايقت ، اتكيت عالكرسي و سكتت
//
//
من جهة روح
كان صقر عايش دور المحامي و يسآل فيا بس ما كانش قدامي الا اني نجاوب عشان نخش معاه في حديث ونعرف كيف تفكيره و بلكي يتريحلي و يحكيلي علي القضية المعقدة يلي حط روحه فيها
وقعدت نجاوب فيه لعند طق فالموضوع الي انا بروحي مش قادره نحكي فيه مع روحي بس ضغطت علي روحي وجاوبت و حكيت اللي ليا سنين مانبش نحكي فيه ، كمل صقر كلامه او بالآصح وقّف
رُوح>>كمل ليش سكتت
كان متكي عالكرسي و عيونه عليا وكعادته مربع يديه و الهيبة في ملامح وجه
صقر>> خلاص معش عندي اسآله
رُوح>> كويس عشان من يوم وغادي انا حنسآل
صقر>> لا خفت انا
رُوح ضحكت>>اليوم طاقتي كملت بس حط في بالك انه الزيارة الجايه اللي هي الاسبوع الجاي حا نكونو بروحنا ما معانش زيارات ثانيه قدمت طلب المدير السجن واخيرا وافقولي عليه رغم انه هضا شي قانوني بس لازم يعلو قلبي
صقر بسخافة>> بتنفردي بيا
روح >> احترم نفسك
ابتسم و ميّل راسه بلقطة استفزت روح وكان متعمد يديرها
روح تلم في الاوراق وارتبكت من النظرة و الضحكة وكل شي >> من الزيارة الجايه حانبدو نحكو فالقضية خلاص ساد لعب وهدرزة
//
//
"صقر"
كنت عارفها رقالها و كنت حاب نستفزها اكثر كان شكلها حلو وهيه متعصبه ومتلخبطه 😂
انا >> بس اعترفي انه الهدرزه معايا ما ينملش منها
رُوح >> صقر انت متهم وانا محاميتك حطها في بالك كويس مش جايين نقولو نكت و نبصرو
انا >> تحقي فيا فاتحلك مسرح مصر ؟؟
واساسا ما جبرتكش تحكي حكيتي بروحك
رُوح >> حكيت عشان نبي نخفف عليك ونخليك اتريح وانلطف الجو
حسيت اني ضايقتها واجد بالكلام وهيه كانت متعصبه وشكلها يضحك بس كنت ماسك ضحكتي
انا >> نتلاقو الزيارة الجايه ، و اسف سيادة المحامية
صبت وخذت شنطتها بدون ما تحكيلي حرف وعيونها بيطلع منهن شرار وكان هضا الطف رد فعل نشوفه ❤️
//
//
مرن يومين ومافيش فيهن زيارة وكان الوضع فالحبس مافيش جديد وبدر زادت صحبتي بيه خصوصا بعد حكالي قصته حسيت انه مظلوم كيفي كيفه
غفران و غسان كل يوم يحكو كل حد فيهم لقى الي ناقصة هو كامل فالشخص الثاني
وروح كانت ماترقدش لا ليل ولانهار ادور و تبحث في القضية ومش مبينه الحد شي
//
//
كان يوم عادي وجايني فيه غسان زيارة ، كنت نهدرز معاه و فطنتله كل شويه يبحت جهه بدر واخته
انا >> اسمع يا تفهم امي القصة يا وديني نخليك الليلة تبات معايا
غسان >> ياراجل كنك 😂😂😂😂
انا>> لا كنك لاشي ! بآختصار لعب لا اه
نحكي جد ياغسان ، اخت بدر لا
غسان >> تي غير ركح واسمع
انا >> انت اللي اسمعني ، راهم علي قد حالهم لعند خلاص وظروهم للصفر والبنت نفسيتها زي نفسية خوها المحبوس ف يعني مش ناقصه بكل
كان غسان يسمع فيا بتركيز
انا >> سمعت انت ولا متنح؟
غسان>> تقدر تحكيلي اللي تعرفه عليهم
انا >> زمري !يارا روح ومعش تجيني
غسان >> تي غير احكي 😂 والله جدي المره هذي معقوله السمعة هذي ازح 😂
انا حكيت الغسان شوية علي قصة بدر و الي قاله ليا ونبهته وحذرته مليون مره
غسان >> خلاص ياراجل سكنت
انا >> طير علي حالك
غسان>> تسلم عليك سيادة المحامية
انا >> غسان ازح
غسان>> طالع 😂😂😂
//
//
طلع غسان وقعد مصبي عند الباب ، شويه وطلعت غفران
غسان >> وليش ما تقولي قبل ما تجي ؟
غفران >> بسم الله الرحمن الرحيم فجعتني
"وحطت يدها علي قلبها"
غسان >> كملتي فجعة؟
غفران >> بنطلع خالي برا
غسان مسك يدها بالقوه>> مش امس كنت نحكي معاك ؟ ماقلتيش انك جايه ليش
غفران>> غسان كنك مصدق روحك 😂 وبعدين معروف انه يوم زيارة ف اكيد حا نجي ؟ وين الكارثه لي درتها وبعدين ليش مهتم واجد سوا جيت ولا ماجيتش
غسان >> هضا كلامك ؟
غفران طلعت يدها >> اهو انت جيت وما قتليش ؟ شن صار فالدنيا ؟
برمت وطلعت من قدامه
غسان >> ساهل يا غفران
//
//
عند روح ، كانت تفكر في فكرة والفكرة هذي مش معروف لو هيه حا تساعدها في التحقيق ولا مش حاتساعدها بس المجازفه تجري في دمها 🤷🏻♀️
برمت عالارشيف وطلعت ملف القضية القديم ، اللي مكتوب فيه عنوان هل المشتكي، كتبت العنوان في تلفونها و ردت الملف مكانه
* معلومه سريعة ، المشتكي >> هو الشخص اللي يرفع الدعوى
ورنت علي صاحبتها كانت معاها فالجامعة
روح>> الو
سارة >> تي وينك من مبدري نرن
روح>> كنت نشتغل مش فاضية
سارة>> بتجي ولا لا ؟؟
روح>> اه توا جايه وانتي وين ؟؟
سارة>> اهو توا حميدا خويا بيوصلني
روح>> كيف حرجانه؟ 😂
سارة>> ييييه تو نتلاقو ونحكيلك
طلعت روح وكانت متفقه هي وصاحبتها يتغدن في مطعم ... سارة وروح صحبات من الثانوي وخشن جامعة مع بعضهن بس روح كملت ماجستير و اشتغلت و سارة وقفت بعد البكالوريوس واجوزت
//
//
في المطعم كانن البنات يهدرزن و طلبن غدا
روح >> قوليلي شن قصتك وانتي ديما عند هلك
سارة >> تعبت والله علي قصة الحمل لا انا ولا هو متكلمين بس كل ما يمشي الهله يروحلي متعقد و انتعاكو
روح تاكل >> قتلك نطلقك انتي لي ماتبيش
سارة >> النبي وانتي كل شي عندك رفع قضية
روح >> ها شن اديري بتقعدي حرجانه عند هلك ؟؟ لكي ثلاث سنين متجوزه ! الايام الي قعدتي فيهن عند هلك اكثر من حوشكم
سارة >> كل ما بنطلق مانتخيلش حياتي بدونه نحبه بس هو حيوان
روح>> خلي الحب ينفعك 😒
سارة >> اس انتي يا حيط ، قوليلي شن جو شغلك
روح >> تمام ماسكة قضية الفترة هذي ونشتغل عليها
سارة >> شن قصتها
روح >> لو فاهمه قصتها كان حليتها من زمان 😂
سارة >> تحكي جد قصدك من العيار الثقيل؟
روح>> شكله هك
سارة >> وانتي هضا اللي تبيه 💃طول عمرك تحلمي تمسكي قضية قويه وتحليها و تنشهري 😍
روح >> هو فعلا نبيه بس خايفه نخسرها ووقتها حا ندمر بجد
سارة >> الخسارة مش عار
روح >> القضية هذي بذات مش مستعده نخسرها
سارة >> المتهم مُز ؟ 🌚
روح>> مالك و ماله خليك في راجلك😂
سارة >> خليني نرن علي حميدا يجيني علي ما كملنا
روح >> نوصلك ؟؟
سارة >> لالا بنتكي علي عيت عمي هلي غادي
روح>> تمام باهي
//
//
عند غسان ... كان حاط غفران في راسه بدون اي سبب 🙂
غسان برج الكلب زي اغلب الشباب لما حد يستكرده ينهار ويقعد يحاول بآي طريقة لعند يوصل للي يبيه 😂🤷🏻♀️
غفران كانت مش في مزاج ولا ظروف ولا وقت يسمحنلها انها تحب واتعرف وحتي تنعجب ولا هي في وقت منافسة و فرض عضلات من غسان ، والشي هضا هو اللي مخلي غسان مصر عليها
كانت لاقيه في غسان الل ناقصها بس مش ظروفها اقوي منها
رن غسان علي غفران و ماردتش من اول مره عشان كانت حذا امها ، الرنه التانيه ردت
غفران>> وبعدين ؟
غسان >> مش فاضية ؟
غفران >> غسان والله ما انا البنت اللي تصلح بيك ولا انا البنت اللي مهيئه انها اتعرف ... صح كنت ضعيفه ومحتاجه حد يسمعني عشان هكي حكيت معاك
غسان >> وكيف عرفتي انك ما تصلحيش بيا !
غفران>> واضح انك ولد ناس و مشاء الله عليك ، و انا علي قد حالي و فوق راسي مليون مسؤوليه ابداهن من خويا المحبوس
غسان >> ليش ما تعطينيش فرصة و انا حانساعدك
غفران >> وتساعدني هكي بدون مقابل ؟؟؟ وبشنو حاتقدر تساعدني اصلا ؟
غسان >> نزوجو 🤷🏻♀️
غفران ضحكت ضحكة طوووووووييييله 😂😂😂😂😂 وغسان ساكت يراجي فيها تكمل
غفران >> لعند دمعت من الضحك والله ، انت من اي طينه ؟ غسان شن فيه 😂😂😂
غسان >> واضح يعني اني ماننفعش نكون جدي !
غفران >> واضح بكل 😂😂
قعدو يهدرزو شويه و صكرت غفران و حطت التلفون علي جنب ، وقعدت تفكر شن فيها او الكلمه اللي قالها غسان هذي كانت حقيقيه ... و فعلا خذت غسان
غفران >> اوووووف غفران كنك انكلبتي شخص ما لكش كم يوم تعرفيه شنو الهبال هضا
//
//
يوم الزيارة
قدمت روح طلب انه المره هذي الزيارة تكون انفراديه ، يعني المحامي و المتهم فقط ...
وفي اي قانون انه لقاء المحامي والمتهم يكون سري بكككل، يعني ما فيش معاهم لا شرطي ولا اي حد جوا ، بس الشرطي يكون قدام الباب
خشت روح وقعدت تستني في صقر يجي
//
//
من جهة صقر
وصلت لمكان الزيارة وكان مش المكان اللي ديما نمشوله ... بس ايام المحامي االي فات كانو يجيبو فيا هنا
خشيت ولقيت روح
انا >> اوباا زيارة من نوع خاص 😂
رُوح >> لو يوزعو في جوائز في الحبس كان عطوك جائز اخف دم 🙂
انا قعمزت >> واخذها بلا جوائز
رُوح لبست النظارات >> ممكن نحكو فالقضية
انا >> لا يعني لما لبستي النظارات حانخاف ؟
روح ضحكت >> صقر عاد 😭😂
انا اتكيت عالكرسي وربعت يديا ووخرت راسي >> اسمي معناه قوي ويقولو كل حد له من اسمه نصيب ، بس لما تقوليه نحس انه حاجه هادية و مالش علاقه بمعناه
روح >> وهذي حاجه كويسه ولا شينه ؟
انا >> كويسه
رُوح>> و المعني ؟
انا >> حاتعرفيه بعدين
رُوح >> اممم تمام نحكو فالقضية ؟ واليوم حا تحكيلي ارجوك !
انا >> اسألي ونجاوب
رُوح >> تمام .... احكيلي علي يوم الجريمة من بدايته
انا >> ....
#يتبع
#AYA🔮