روايه
#راجل_بنت_خالتي
الحلقة 15 (حقيقية)
للكاتبة رواسي بحرالدين
صفاء: مقعمزة ع تلفونها
زمزم: وتت سفرة العشاء و جت تتفرج ع التلفزون
و بعد مرور وقت
عزو: السلام عليكم
صفاء: عليكم السلام انست عزو
عزو: بيك تم ياطايشة شن جوك
صفاء: ماشية حمدلله
عزو: وين خالتي
صفاء: ثواني نشوفها
عزو: ماطولي تخلوني بروحي نزعل و نروح راه
صفاء: باهي يابارد .... و مشت لقت امها تصب في العشاء رفعت السفرة و خشت هي وياها
قعمزو يهدرزو من موضوع لموضوع لين ......
زمزم:عزو ياولدي مش حتلايم بروحك هكي الاحسن تتزوج و تجيب بنت حلال تصونك
عزو: اييي ياخالتي نلحقو عليه الموضوع هذا
زمزم:لا وقته و نا نبي نتريح عليك و ع صفاء
صفاء: خلوني انا توا اشقي بعزو
زمزم: ما انا نبيكم لبعض💔
صفاء: 😨😨😨
عزو:😥😥😥😥
صفاء: امي شن قصدك
زمزم: ايه يابنتي انا كبرت في العمر و مش معروف امتي يومي نبيك تتزوجي مش نموت ونا مرتاحه عليك و ع ورثتي و ورث بوك ومافيش احسن من عزالدين حيحافظ عليكم
صفاء: واااااك يام شن هل قطاف و بعد عمر طويل و حطت الكشيك و ناضت رقيت لدارها
عزو: مستغرب ولا كلمه
زمزم: وانت ياعزالدين ليش ساكت
عزو: ياخالتي انا حاطك في مثابة امي و مستحيل نرفضلك كلمة لاكن من ناحيه صفاء مستحيل نفكر فيها
و دايرها بمثابة اختي وبنتي اعذريني .......و ناض من السفرة .... هي تصبحو ع خير
زمزم:توترت اكثر من الموضوع 😓😓
_________________
صباح اليوم الثاني ☁🌞
صفاء:ناضت غسلت و لبست و نزلت لقت امها مجهزه الفطور .... صباح الخير
زمزم: صباح النور تعالي افطري يابنتي
صفاء: صحيتي ماخاطري
زمزم:مزال زعلانه ؟
صفاء: امي صبح فكينا من السيره هذي
زمزم: بس يابنتي....
صفاء: امي انا عارفتك تبي تتريحي عليا بس مش بالطريقه هذي عزو راجل اختي الله يرحمها مستحيل نفكر فيه حتي التفكير
زمزم: تنهدت و هزت راسها ..... يصير خير
_________________
اما جوري ناضت كالعادة وتت الفطور و ساعدتها امها يلي سبحان الله حياتها و صحتها ردنلها و كل مالها للاحسن فطرت مع امها و حتمشي كالعادة للثانوية
جوري :سلام
ماجده: سلام بنتي ديري بالك ع روحك
جوري : نشاءالله
______________
عزو: كان يخمم في موضوع امس يبي يتجوز و يستقر و يدير عيال بس في نفس الوقت 😣😣
خايف من موضوع انه يفقد شخص ثاني من عيلته😔💔
__________________
رواسي بحرالدين✨💕
في حوش زمزم:-
علي: السلام عليكم
زمزم: ناضت حظناته ....و عليكم السلام نورت نورت استاحشناك
علي: تسلمي .... و خذا يدها باسها و باسها فوق راسها ❤❤
زمزم :ربي يحفظك و يرعاك لي
علي: نشاءالله .. وين صفاء ؟
زمزم: مشت للمدرسة
علي؛ جبتلها كم حاجة هي و خالتي و بنتها بعدين تمشي تعطيهم ليها
زمزم: سلم ولدي بعدين نمشو مع بعضنا... بس شكلك مش جايبلي شي 😅
علي: اوووه معقولة ننساك يام خبريني شن اخباركم و وين عزو و ادياره
زمزم:اييي ياولدي امس فتحت موضوع الزواج عليه ماعجبه 😥
علي:عنده الحق يام يلي صار معاه مش اشوي 😞
_____________
في مدرسة صفاء:-
كانت صفاء مقعمزة في الكرسي الثاني مع بنت اسمها "نجوى" و في وراها بنت اسمها "تسنيم"
تسنيم: نجوى بدليلي الكرسي نقعمز مع صفاء اشوي
نجوى:شن فيه مال
صفاء: ساكته 😶
تسنيم: غير نبيها اشوي
نجوى: هي تمام تعالي ... بس تجي الابلة نردي لكرسي
تسنيم: تمام ... و جت قعمزت مع صفاء .... خير صفصف شخبارك
صفاء: حمدلله وانتي
تسنيم: بخير ... نبي نسالك
صفاء: اسالي نشاءلله خير
تسنيم: انتي في حافلة عمي حسام صاح
صفاء: اها ليش
تسنيم: الايام يلي فاتن كان مش هو يلي يشيل فينا في الحافلة
صفاء: اي جا واحد ثاني تقريبا خوه ولا ولد عمه مش مذكرة .... خيرك تسالي انتي ؟؟
تسنيم: مدتلها مذكرة ... هنا مكتوب رقمه هو بعتني يبي يكلمك
صفاء: ردتلها يدها... وليش نكلمه ؟
تسنيم: واضح شن يبي و صدقيني زياد ولد حلال و مش متاع بنات راه
صفاء: ههههه وهو في ولد في ليبيا مش متاع بنات غير درجات بس 😄😅
تسنيم: لا بس زياد راسه وراس خدمته ماعنداش هلبا ع الوجيج و انتي عجبتيه
صفاء: فيه فوق ال10 بنات في الحافلة انا عجبته ولا كلهم عجبوه ،..، فكيني يابنت ماعندي راس للعلاقات
تسنيم: بس...
صفاء: كلامي واضح ...وتلفت ورا نجوى ردي مكانك
__________________
جوري : زي ما قاللها عزو تأقلمت مع جو الثانوية و يوم بعد يوم تكون في صداقات و تتعرف ع بنات جدد و اختارت شلتها كانن 3 بنات
"زهور"
"رغد"
"موده"
رغد: حليتن الواجب يا بنات
موده؛ حليت مسألة و 3 لا
زهور: انا حليتهن كلهن بس مش عارفة صح ولا غلط ... وانتي ياجوري
جوري : فتحت شنطتها و طلعت الكراسة ... انا حليتهن كلهن
رغد: اوووووه و فرطت منها الكراسة
جوري : بشوي تمزقيها
رغد: 😅😅
زهور : ترا نشوف حلي صح ولا ....
موده؛ متاكده انك انهن صح ياجوري
جوري : اي 100% لانه عزو علمني كيف نحلهن و جربت ع المسائل المحلولة و طلع حلهن صح
زهور: ومن يكون عزو ؟
رغد: بالك حبيب القلب ❤
جوري : بلاش قطاف راجل غادة الله برحمها
موده؛ ومن تكون هي ؟
جوري : #راجل_بنت_خالتي 💔💔
زهور: و يجي لحوشكم عادي ؟؟؟😕
موده: بلاش قصقصة و خلنها تفهما الحل
و تجمعن البنات ع جوري كانت حصة "رياضة" عندهم و هي الحصة "الثانية"
و فجأة تلفون يرن
ترن ترن ترن
ابلة الرياضة (سالمين) : تلفون من يلي يرن 😠😠😠😠
البنات في الساحة كانن متفرقات بس فيه مجموعتين مقعمزات و ابلة الرياضة مقعمزة ع الكرسي بعيده عنهم اشوي
رغد: ضمني يا بنات ضمني
موده: جايبه تلفونك يابنت😮😮😮
رغد: حطت يدها في صدرها و فصلت التلفون
جوري : ترعش مع بعضها
زهور: احرف منها
غطن البنات بعضهن و قفلت رغد التلفون
(سالمين) : متاكده سمعت صوت تلفون يرن
وحده من بنات المجموعة الثانية : مش عندنا يا ابلة
سالمين: تكذبي فيا تعالن كلكن صبن هنا
رغد: يابنات استرن عليا تربحن 😣😣💔
موده: اسكتي اهم شي قفلتيه ولا
سالمي:انتن من غادي تعالن صبن
ناض البنات كلهن صبن قدامها
سالمين :توا بتعترفن من يلي جايبة تلفونها ولا
بنت 1: والله مش اني يا ابلة
بنت 2:فتشي يا ابلة و حتلقيها
سالمين: اقعدن واقفات ... و نادت ع بنت كانت مقعمز بعيد عنهن . نادي ع الاخصائية الاجتماعيه (بسمة)
البنت:حاظرر
وقعدن البنات واقفات لعند جت الاخصائية و خبرتها انا سمعت تلفون رن
بسمه: هي خشن يابنات ورايا
و طبعا مانخبركن البنات كان صاير فيهن حال الله
مشت الاخصائية و وراها البنات و الخلف بكل ابلة الرياضة و خشن لمكتب الاخصائية
و فتشن المدرسات ولقو عند بنت مرايا و وحده ثانيه كانت ضامه اكسسورات في جيبها خذوهن منها
اما رغد مالقوش عندها شي ابصر وين ضامته 😂🙊
سالمين: تبن تعترفن ولا شنو
زهور: يابلة ريتي بعينك مافي شي بشن نعترفو
سالمين : يلي هي تعترف ولا حنطردكن كلكن مع استدعاء ولي امر
و بدن البنات في اللك لك و يتهرجن في بعضن و يلي خايفه و يلي متوترة و يلي مش معدلة واثقة من نفسها
اما المدرسات كانن يقنعن في سالمين ممكن تكون غالطة او مش هذين يلي عندهن التلفون بس هي مسكره راسها
و اخر حل وصلو له
بسمه: توا كل وحده منكن تتصل باهلها و تقوللهم شن صار و الحل يجيبو تلفون كل وحده منكن
طبعا 3 بنات ماكنش عندهن تلفون و تاكدو من الشي هذا و ال4 عندها ايباد حجمه كبيره ماعندها كيف تظمه
و كل مرة وحده من الباقية ترفع التلفون الارضي و ترن ع اهلها
لعند وصل الدور في جوري
جوري : ماعندناش ارض
بسمه: هاك تلفوني رني منه ولا بتقولي مش حافظة الرقمه😕
جوري : لالا حافظته و رفعت و رنت ع امها
ماجده: ايوه من معايا
جوري: انا جوري ياماما
ماجده :جوري بنتي 😮 كيف مش انتي في المدرسة
جوري : ايه نرن عليك من وسط الثانوية .. قتلك ضروري يا ماما تبعتيلي تلفوني ولا حننطرد اسبوع
ماجده؛ كيف ؟؟!!!
جوري : لما نروح نشرحلك بس توا تلفوني ع الشحن تلقيه جيبيه ليا
ماجده: باهي حاظر يابنتي سكري توا
جوري ؛ تمام و سكرت الخط
____________
ماجده : خشت للدار رفعت تلفون جوري بس كيف حتوصله ليها هي مش ماشية للثانوية
اتصلت بزمزم ماردتش
اخر شي رفعت اتصلت بعزو
عزو:ايوه خالتي
ماجده . ايوه وليدي بالله عليك تعال نبيك توصل لحاجة لجوري البنت هذي مافهمت شن صاير معاها
عزو . انا في المكتب يا خالتي مسافة الطريق و نجيك
ماجده . تمام نراجي فيك
وجا عزو و خذا التلفون من ماجده و طلع للثانوية و هم مش فاهمين حاجة
_______________
اما في الثانوية سالمين مصغرة عقلها و حاطة راسها تبي اطلع التلفون
رغد : طلعت مش ساهله اهلها جابولها التلفون و طلعت بريئة 😑
زهور: تهزب في رغد انها دخلت البنات في مشاكل بس التلفون سري ماتقدرش تفضح روحها
موده؛طلعت من الموضوع مع اول البنات لانه ماعندهاش تلفون
_________
في حجرة الاخصائية :-
بسمه؛ ياسالمين درتي موضوع بلا موضوع قعدن بنتين توا هذي بنت ماجده و الثانية ابتهال يا وحده منهن عندها التلفون يا انتي دخلتينا في المشاكل و نشاءلله نلقوها كان هذا ربك يستر مع المديره و اولياء الامور
سالمين: تي بوذني سمعت رنت التلفون
بسمه: معقولة غير انتي سمعتيها ؟؟ وبه وينه
سالمين: توا..
عزو: السلام عليكم
بسمه :😍😍😍 وعليكم السلام
جوري : كانت متلبكه عزو 😳
عزو: هنا مكتب الاخصائية الاجتماعية ؟؟
بسمه:ايي تفضل
عزو؛ تفضلي هذا تلفون جوري هيثم قالولي نجيبه هنا
بسمه: ايي اي تمام خلاص رده للحوش . جوري تقدري تطلعي
سالمين : وين تطلع ؟؟ انت حظرتك من ؟
عزو: كيف ؟
سالمين:هي وحيده لا اخت لا خو و اكيده مش بوها انت من تكون الله يعلم مرات تكون صاحبها جاي تغطي عليها
جوري : انصدمت من كلام الابلة😦😥😥
عزو: انا خطيبها عندك مانع توا 😏😌
جوري :....
......يتبع
رأيكم في الحلقة و توقعاتكم ❤👇