سجين و روح

الحلقة الاولى

#سجين_و_رُوح.
الحلقة الأولى
.
.
‏"لن يتوقف الكون لأنك قد كُسرت ، ولن تقام طقوس العزاء لأنك حزنت ، الجميع قادر على تأمل لحظة سقوطك ، لذا قف و انهض و رمم نفسك بنفسك "
.
.
الشرطي>> غسان ومحمد و طارق
عندكم زيارة ، هيا
انا>> وانا ؟؟ مافيش زيارة
الشرطي >> لكي اكثر من سنتين تسأل في نفس السؤال يا صقر ! ونقولك لا ! مافيش زيارة

طلعو الشباب اللي عندهم زيارة و حطيت راسي عالساس وغمضت عيوني ! نبي نذكر ملامح هلي اللي ليا سنتين ما شفتهمش !
سنتين مافيش ولا خبر منهم ؟

قعدت نذكر اخر مره جاني فيها منذر خويا من سنتين

//
//

منذر >> امي دزتلك شوية حاجات ، قاعدات برا فالتفتيش تو يجيبوهن لكي
انا>> مانبيش شي انا انتو كيف حالكم؟؟ امي وباتي شن دايرين
منذر "سكت شوية" >> كويسين الحمدلله
انا >> منذر حافظك راه ! مانعرفكش امس انا
منذر>> نقولك الي صار بس النبي ما فيش داعي تحسس روحك بالذنب اللي صار مكتوب حا يصير بيك وبلاك

سكتت معش عرفت شن نقول ! حسيت بالذنب من قبل حتي ما يكمل كلامه

منذر >> امك بالها مشغول عليك وماتسكتش لا ليل لا نهار ، وباتك تعب علينا وقالو لازم يدير عملية عالقلب والعملية كبيرة ، واختك فسخت خطبتها !

انا >> باتي تعب قلبة مني صح ؟ و اختك انفسخت خطبتها اكيد مني ! اصلا من حا يرضى ياخذ وحده خوها محبوس

منذر >> نحن عارفين انه اللي صار ما لكش ذنب فيه كله قضاء وقدر ! ماتندمنيش اني حكيتلك بس لازم تعرف اللي صار ، اختك حا يجيها نصيبها و باتك فهل يومين ندبر في فلوس عشان العملية

انا>> شغلك ماشي ؟
منذر >> تمام تمام
انا >> يعني معاك فلوس ؟
منذر>> كل شي تمام ماتفكرش فينا كون في روحك
انا >> تمام بس ماطولش عليا طمني عليكم
منذر>> حاضر

وكانت هذي اخر مره نشوف فيها منذر خويا و نسمع فيها اي خبر علي هلي

باتي دار العملية ولا لا ؟ و فاطمة شن صار فيها ؟ امي ازعمك شن دايره في غيبتي ومنذر ملحق عالمصاريف؟؟ كان يلم في فلوسة عشان يستقر ويجوز بس مش عارفه شن صار

//
//

قطع تفكيري صوت غسان وهو خاش للزنزانة !

انا >> شفتهم؟
غسان>> اه ، تخيل الفرخة اختي الفترة الجاية بيحددو العرس😂
انا >>كل شي عالبركة يا معلم عقبالك
غسان>> لا راحت علينا نحن 😂
انا>> بلكي تلحق عالعرس؟
غسان>>اه قتلهم يهلبو الشهر هضا خلاص مازالي اسبوعين
انا>> تمام
غسان >> "بحت فيا وجا قعمز حذايا"
حا نطلعك من هنا وعد اول ما نطلع

ضحكت علي كلامة و رديت نفكر

//
//

لما انحكم عليا وخشيت للحبس

انقلبت الدنيا عزا ، وكآني ماشي للموت
امي طاحت و باتي حط يده علي قلبه خويا مش عارف كيف يلم الدنيا

اول فترة كانت الزيارة ممنوعة بعدها قعد مره فالاسبوع
كانو يجو هلي كلهم ملامح الحزن علي وجوهم بس كل حد يحاول يبين العكس

من بعد السنتين الاولة معش حد جاني ، اخر شي قعد خويا منذر يجي بروحه وبعدها حتي منذر معش شفته
//
//

غسان>> صقر صقر
انا>> شن فيه ؟
غسان>> كان تحب نقولو تفكر فيها ، وين سارح ياراجل من اول ما جيتنا وانت عقلك هارب
انا>> لازم نحب عشان نفكر ؟ 😂
غسان>> باه بطل دراما وتفضل عالغدا
انا >> ازعمك رز بالخلطة ؟
غسان>> وعصبان

خش علينا محمد دوبة كيف مكمل الزيارة >> اه وشن رايكم في ببسي بعدها ؟
انا >> ما لكم الا الرز اليابس
غسان >> والطبيخة المصقعة 🙄

جا الشرطي فتحلنا الزنزانه و مشينا لمكان اللي نتغدو فيه ، كلنا طابور ورا بعضنا

قعمزنا في مكانة الي ديما نقعدو فيه انا وغسان ومحمد وطارق

في الحبس حدير عداوات اكثر من انك ادير اصحاب ، وكل حد تاخذه علي انه صاحب يطلع وسخ ، المكان هذا اقذر مكان! مستحيل مخيلتكم تجيب كمية الوساخة اللي هنا

القسم اللي كنت فيه يعتبر اهون من الاقسام الثانيه ..

//
//

غسان>> تي كول ازف
انا>> وهو هضا وكال يتاكل
محمد >> تبي بيتزا يا بيبي ولا شيش طاووق 😂
انا>> زمري خليك في وكالك

ونحن ناكلو سمعنا صوت عركة

غسان ياكل>> اكيده الذيب وعلاء
انا >> خاطري نعرف عليش كل يوم لازم عركة
محمد>> اللي سمعته انه فيه بينهم عداوه من قبل حتي ما يخشو الحبس
انا>> عليك صداع ازح

طبعا نحن نهدرزو عادي متعودين عالجو هضا ، دقيقتين وخشو الحراس كلبشوهم وشالوهم
//
//

كملنا غدا واليوم كان راحة مافيش شغل ، طبعا نضامنا هنا اخدم نفسك بنفسك ، مقسمينه مجموعات مجموعة للغسل ومجموعه للتنظيف ومجموعة للمطبخ وهكذا، هضا هو شغلنا

فيه عندنا تلفزون بس حاطين لنا ساعات معينه فاليوم

محمد >> مازالك اسبوعين يا طير وتشم طعمة الحرية ؟ 😂
غسان>> حا ترايفو عليا شكلكم 😂
انا "بحتت فيه">> حا نتقاطعو انا ومحمد بعد تطلع بعدك مافيش من يحز بينا 😂
غسان>> اديروها عارفكم 😂
انا>> غير مش لما تطلع معش تورينا وجك افجعني و ديرلي زيارة ، ماتخليكش كيف اللي معش جو !
غسان>> عشرة عمر راه ! اصلا مش حا نزورك انت حا تزورني وفي حوشنا
محمد>> هضا عشان باته محامي قاطع الناس وعد الحبس كله انه يبي يطلعه😂
انا >> تي باته حتي هو ما بش يطلعه بيطلعنا نحن
غسان>> شفطو باهي راكم تسكتو 🙂

//
//

حطيت راسي عالمخدة وقعدت نذكر في امل ، امل البنت الي حبيتها واللي كنت عايش عمري عشانها

لما خشيت للحبس جاني صاحبي زيارة ، واللي حتي هو معش جاني من بعد السنة الاولى

علي >> طيري
انا >> مرحبتين
علي >> ربي يفك اسرك ياطير
انا >> امل كيف حالها ! مافيش اي اخبار عليها !
علي >> قتلك حكت معايا كم مره سألت عليك وهكي وبعدها ! "وسكت"
انا >> احكي ؟ قالت لك كل حد في طريق
علي >> ماتزعلش روحك يا طير اللي جابها يجيب غيرها
انا >> علي را قسمابالله ماعندي خلوق اناقش بكل ! احكي
علي >> رنت عليا من شهر هكي ، وقالت لي مش ح نقدر نراجي صقر و هلي اصلا مش ح يرضو بيه بعد ما يطلع من الحبس و دوا واجده

انا >> عشان انحبست يعني ؟؟

علي >> هذي اخر مره حكت معايا فيها ! ومنها معش كلمتني ولا انا حاولت نرن عليها !

//
//

نضت ثاني يوم و انا جسمي متكسر بكل

غسان >> مش ح تطلع؟
انا>> مش قادر نصبي
غسان >> شن فيه ؟
انا>> شكله برد قوي
غسان >> تو نقول لشاهين يشيلوك للمستوصف
انا >> فكني يارا بنرقد بس
غسان>> كنك تقول امس خشيت! مانك عارف ممنوع يقعد حد فالزنزانه بعد ال ٩ !
انا >>زمري

غطيت وجي وطلع غسان دوا الشاهين
"شاهين هضا شرطي و مسؤول علينا تقدر تقولو يعني هكي ماسك قسمنا "

شاهين >> صقر صقر
انا>> مش قادر نطلع مانبيش فطور !
شاهين>> صبي معايا

صبيت وانا مش حاس بكرعيا ، جسمي ينمل و كرعيا يرجفن

//
//

قبل ثلاث سنين ، قبل ما نخش للحبس

كنت في داري مريض وعندي برد قوي

امي >>صقر كنك يا يمي ما عديت الشغلك
انا >> امس كنت ماسك وروحت الصبح
امي >> كنك ترعش علي بعضك
انا >> شكلي واخذ برد
منذر >> يدلع هضا
امي >> اسكت انت ، تو نخش نديرلك برودو ساخن "فاطمة يا فاطمة "

فاطمه>> نعم
امي >> ديري الخوك كمادات و جيبي حبتين بنادول
فاطمة>> كنه
منذر>> يدلع😂😂
فاطمة>> هاك هاك بنادول وارقد فكنا من هرجتك
منذر>> طالع مسيبها لك🙄

اتكيت وانا نسمع في قطاف منذر و فاطمه ، جابتلي امي برودو ساخن و خذيت بعده الدوا و حسيت روحي كويس

مسكت تلفوني ولقيت رسالة من امل " حبيبي مازلت مريض طمني عليك "

//
//

في السجن

الممرض >> احسن ؟

انا فتحت عيوني وبحتت فيه وماكنتش فاطن الشي

الممرض >> اغمي عليك من الضعف ركبتلك تغذية وشويه وتقعد احسن ، الحمدلله توا احسن تكمل التغذية ويجو ياخذوك للزنزانه

طلع وسكر الباب عليا ووقتها معش قدرت نمسك دموعي ! بكيت كيف العيل الصغير ! معش قدرت ، اذكرت امي وخوفها عليا ، منذر خويا و فاطمه اختي الصغيرة وهما ينابشو فيا ! كنت علي قد ما المرض فيا علي قد ما يكون ولا حاجه وهما جنبي وحذايا ، بس توا طشة برد حاسه كأنه فيروس منتشر في جسمي ويقطع فيا تقطيع.

//
//

غسان >> شن صار فيك
طارق >> لاباس ياطير
غسان >> دايرين عشا مكرونه علي كيف كيفك تو تصحصح
انا >> بنرقد الله والنبي خلوني في حالي
طارق >> يارا بلا دلع ازح كنك رايح كيف البنات
انا >> طارق ! خطا اهلي اه
غسان غمز الطارق يسكت

مشيت شور سريري و صكر شاهين علينا الزنزانه وحطيت راسي ورقدت

//
//

ثاني يوم كنا في مكان الوكال

غسان >> الذيب و علاء ازح خلاص كل يوم عركة
انا>> ما في حد منهم مات ويريح امنا ازف !
طارق >> نعن اصلهم بكل الواحد مش ناقصه
انا>> قعمز بس فكنا منهم

صبا طارق و مشا شور العركة وكانو علاء والذيب يضاربو و ما حدش يحز كلهم مصبيين يتفرجو لانه اصلا لو حد حز ح ياكلها علي راسه

خش شاهين ومعاه اثنين خبط بالحديده اللي علي يده عالطاوله وعيط بصوت عالي كلهم سكتو

شاهين>> ذيب و علاء قدامي

الذيب >> اقسم بالله نقتلك ! كان ما شربت من دمك

جا علاء بيرد

شاهين>> ذيب صكر فمك واطلع قدامي

طلعو هما الاثنين و ردينا مكاناتنا

انا >> مكثر ام هرجتهم
غسان >> مش مصدق امتي نطلع من هنا !
انا >> غير راك تردلنا السنة الجايه
غسان>> لا خلاص حرمت 😂
طارق >> المره الجايه باته ح يخليهم يحكمو عليه اعدام
غسان >> شنقاً حتي الموت 😂😂

//
//

قبل ثلاث سنين

كنت نشتغل عسكري ، كل مره نمسك في مكان
اسبوع نمسكو في جامعة ، اسبوع قدام مستشفي
و اسبوع في مدرسة وهكذا

علي >> ماسك اليوم
انا >> لالا اليوم ماعنديش شي
علي >> انا ماسك عند الجلاء
انا >> تم
علي >> تجي تكسد بعدين
انا >> لا والله مافيهش نعسان ونبي نرقد

روحت للحوش لقيت فاطمه اختي

انا>> ديري عشا
فاطمة>> ليش ما جبت معاك وانت جاي
انا >> فاطمة بديري ولا ماتبيش
فاطمة>>نقول لا بيش بعدها امك تقتلني
انا >> معناها خلاص خشي ديري 🤷🏻‍♀️

خشيت للدار غيرت دبشي ورنيت علي امل

انا >> ايوه
امل>> ساعة وانا نراجي فيك
انا>> مروح بدري راه اليوم
امل >> وين بدري ١١
انا >> المهم روحت ورنيت عليك
امل >> طبعا مستحيل نغلبك فالكلام
انا >> انتي بديري موضوع وخلاص 🤣
امل >> ساهل ساهل ياصقر
انا >> لا خفت بكل😂
امل >> سامط😭😂

قعدت نهدرز معاها لعند نعست و رقدت ، بحتت فالساعة لقيتها ١ وانا نومي طار لبست جاكتي وخذيت سلاحي و قلت نمشي العلي صاحبي وين ما ماسك نكسد مع الشباب

//
//

فالحبس

وانا نذكر فاللي صار سمعت صوت غسان

غسان >> نوص ازح رايح ترقد واجد
طارق>> تقول يتوحم😂
انا >> ماعندكمش شغل ؟مافيش حاجه تخاطو بيها وجي
طارق>> عنجد ماعندكمش شغل

محمد>> لا واخذين اجازة علي كريسمس يا بيبي

انا>> دمكم رايح خاف مشاء الله 🙂
غسان>> وجوهنا في وجوه بعضنا كل حد يتعلم من ثقالة الثاني 🙂 ، صبي وراك غسل دبش هضا هو الشغل

انا >> لا انا اليوم فالمطبخ انا و طارق
محمد>> تقول خوات دايرات جدول في كوش
انا >> ومعلقاته عتلاجة😂
طارق >> تي غير عدي استلم برادة الذيب عالوكال
غسان >> ان شاء الله يكونو حطوه انفرادي
انا >> ياريت عشان كان ما حطوش هوا ولقيته قدامي حا يحطوني انا
غسان>> هنيلي روحك مش ناقصة

فتحلنا شاهين الزنزانه ومشينا كل حد لشغله

خلوني نحكيلكم شوية علي الحبس لي احنا فيه ، اكيد اتفرجو علي مسلسلات والافلام الاجنبية وتشوفو في نظام السجون عندهم ! نظامهم مش زي نظامنا وحرام حتي اللي نشوفو فيه نقولو عليه سجن !
هنا غابة ، فيها القوي يحكم
ماعندنش نظام ماشيين عليه ! لاء فيه فلوس
عندك فلوس تعيش ملك !

وبالنسبة للشغل جوا السجن هضا نظام عالمي ، علي اساس مركز اصلاح وتأهيل يطبقو فيه علينا بس كله شكليات

طلعنا للمطبخ انا وطارق ولقينا الذيب قاعد مش حاطينه انفرادي

انا >> هضا شن يطلع في امه
طارق >> واسطات يا سي
انا>> شكله حطو علاء انفرادي
طارق>> اه بس فوته انت

الذيب جا عندنا خذا غداه ما بحتش فينا بكل

طارق >> نعن اصله بكل حركاته مستفزات
انا >> ما تركزش معاه

كملنا و قعمزنا ناكلو حطيت الوكال قدامي

//
//

قبل ثلاث سنين

علي >> كيف صار
انا >> والله ما جاني نوم
علي >> ايوا
انا >> صقع ازح
علي >> بككككل بس الله غالب

قعدنا مكسدين فالصقع رن تلفوني وكانت امل تباعدت بنرد

علي >> جاي تهدرز معانا ولا معاها
انا ضحكت>> المدام عاد ما نقدرش

ركبت فسيارة و رديت عليها

امل >> الو
انا >> مش رقدتي انتي
امل >> مش عارفه رقدت شويه ونضت
انا >> كنك تحسي ف حاجه
امل>> لالا يا روحي بس متوترة من الامتحانات
انا >> انتي قدها ماتخافيش كل سنة اديري فطروح وتنجحي
امل>> هههههههه ، وين قاعد
انا >> طلعت للشباب
امل>> صقر شن قلنا نحن ! ساد انك تمسك فالليل ريحني عليك وبعدين مش علي اساس بترقد
انا >> شويه ومروح كنت نعسان طار النوم
امل>> لالا توا تروح ! و الشغل هضا كله انا مش خاش راسي
انا >> الله غالب ما لقيتش غيره ! ونحط في حد جهدي كله فيه عشان من ؟ ماهو عشانك
امل >> سيب و دور اي شغل ثاني ، عندك تقرير انت ان عندك ضيق فالتنفس وماتقدرش تمسك دور اي شي تاني انا راضية
انا >> امل صكريلنا عالموضوع خلاص مروح توا
امل >> ديما تسكت فيا ومش معبر كلامي تمام تمام

صكرت من امل وكنت مضايق من نفس الكلام نزلت من سيارتي وبحتت لقيت سيارة مدرسة و علي مقدم شورها ، نزلت بنقوللهم اني مروح

//
//

غسان >> السرحان هضا مطول
انا بحتت فيه >> طالع الاسبوع الجاي ؟
غسان >> اه ، ماتخافش ح نمشي الهلك
انا >> كان عرفت عليهم حاجه مافيش حد طلع من هنا و رد عليا
غسان >> انا مش كيف اي حد ! رفيقي انت يالهبل
انا >> غير راك تردلنا هنا اخرى
غسان>> لا خلاص حرّمت
انا >> معش تكسر يد حد 😂
غسان>> تي اين كسر درتله عاهة
محمد >> ههههههههههههه يستر الله بعد تطلع شن يدير فيك
غسان >> باتي سكتهم
طارق >> عليش ما يطلعك
غسان>> يبيني نتربى
انا >> ان شاء الله اتربى😂
غسان>> تو نشوفو 😂

كملنا و مشينا شور الزنزانه

#يتبع
#Aya🔮

الحلقة الاولى مش طويلة واجد بس كانها تعريف للقصة 🙆🏻‍♀️ نتمني اللي يقرا يعطيني رايه .