اسألي عني الليالي

البارت ٢٥

حمام احمل لهم وياك مرسال ..
مرسال ..
الدمع بفرگاهم ياناس ..
مرسال ..

مُر إسأل متى يعودون ..
شيصبر گلوبنا ببعاد الحباب ..
يابه ..يا يابه ..

والله ياطير الحمام الي تسافر ..
ودّي لاحبابي السلام ..
واحمل بجنحك رسايل من تهاجر ..

الـبـارت الـخـامـس والـعـشـرون...............

روان : اندگت الباب المغربيه..رحت افتحهه حسبالي امي لو اي احد ثاني..ما توقعته عقيل..لأن عقيل يجي الصبح اكثر شي..
عقيل؟..تعال طب..

وجهه جان مصوفر ومدنج راسه..اول ما طب راح للغرفة وصاحني ..اجيت وراه وسديت الباب..گعدت بصفه..

شبيك حبيبي شو تعبان..ومسحت على شعره..
عقيل : مختنك..احس روحي حتطلع..بس من اطب للغرفة ارتاح..شلون يعني اضل هنا ما اطلع؟..دا افكر اروح لشيخ سيد يقره علي..خوما اضل هشكل..

فزيت من كال اروح لشيخ..حيعرف مسويلة عمل ادور يضل يحجي ويشك بالكل رجلي واعرفة..

روان : ها..بكيفك..بس مراح يكلك شي..تعال اني (اكول اني لأن بغداديه) اقره عليك..تمدد وخلى راسه على رجلي ومغمض عيونه..

كل ما اشوفه اتخيله هو ودنوة..احس نار تصير بداخلي..جانت نيتي اسويلهه الهه مو لعقيل..بس صارت بعد..وبديت اتندم..يجي مخنوك وضايج حتى امه من تحاچي يغلس عليهه ويجي للغرفة..

شفته غفى كمت بهدوء وجريت مخده خليتهه جوه راسه..رحت للهول دكيت رقم المره الي سويت عدهه العمل.. رجلي حيروح من ايدي واني شايله ابنه ببطني واحبه.. جاوبتني ..الو ..مرحبا خالة..شلونج..

ام علي : هلا بنتي..الحمد لله على الله..خيرج..
روان : گلت بگلبي..هم زين تعرفين الله..لا خالة بس كلت اريد اشوفج اذا ما عندج شي باجر الصبح..

ام علي : اي تعالي ما عندي شي..موجوده..
روان : ان شاء الله..مع السلامة..

سديته منهه ورحت للمطبخ سويت اكل للعشه..اني واسوي افكر شلون بعقيل اذا ما صار زين..سويت مخلمة وزلاطه..

جانت دنوة تسوي اكل..هسه انذبت براسي..يله المهم راحت وخلصت منهه..انوب مسويلهه بيت وحدهه ويروح يمهه بالليل..اوف يا ربي بس لا تصير حامل..شيفضج يا طلابه..

خليت الاكل بمواعين وصبيته بالديوانية..طلعت منه شويه لعقيل..يضوج من الكعده هناك.. صتحهم حتى يجون ياكلون وطلعت..

ام عقيل : شنو ما تجين تاكلين؟
روان : لا عمة صبيت لعقيل وحروح اكل وياه..
ام عقيل : عمت عيني على وليدي شصار بي المسكين..هاي الحية دنيوة شوف شسوت بي..الله لا يوفقهه الملعونة..
روان : عوفيهه عمة..

باوعت عليه بنظرات..هي تدري بيه اكرهه ما اطيقهه..وما اضيع فرصه الا احجي عليهه..شعجب هسة كتلهه عوفيهه..

اخذت الاكل ورحت للغرفة..خليته ع الميز وسديت الباب وراي..اجيت كعدت ع طرف الجربايه..خليت ايدي ع چتفه..

حبيبي عقيل..كوم اكل مو زين عليك هيج..دار وجهه عليه..
عقيل : جيبي..شسويتي اكل..
روان : مخلمة..مو تحبهه؟..
عقيل : اي..المهم شي من ايدج..وابتسم..

روان : جبت الصينيه وكعدنه ناكل..هو وياكل اني اباوعلة.. عمتني الغيره..لازم اشوف حل..انتبه دا اباوعله..
عقيل بنظرات متسائلة : خيرج؟..اكو شي..
روان : لا..بس اكول اذا تبات هنا اليوم..يصير؟..
عقيل : اي هو ناوي ابات هنا..لعبت روحي من البيت ذاك..لو مطلگهه وخلصان من البداية ولا هاي السالفة..

روان : صفنت شويه..زين شكد سويتو المؤخر؟..
عقيل : ١٥ مليون..
روان : شهگت..يا ستار..شدعوه عيني..قابل منو هي..
عقيل : ما يصير..هم حقهه..بنية بت بيت وانه متزوج..
روان : بدت الغيره تحرگ بيه..عوجت حلگي وكتله ..شو اشوفك مقهور عليهه..شكو يعني؟..لو نسيتني..
تقرب عليه وباسني بخدي..
عقيل : لا شلون انساج..عمري انتي..

حضنته وبسته من جتفه..كملنه وراهه وديت الصينيه للمطبخ.. شفت حنين دتغسل المواعين..
حنين : ها خلصتو..خليهن يمج..هسة اجي اغسلهن..
روان : ماشي عيني..غسلت ايدي ورجعت للغرفة..ما لكيته.. يمكن راح يسبح..كعدت ع طرف الجربايه انتظره..

حسبه تجيبني وحسبة توديني..شلون بيه اذا ما قبلت تفك العمل.. اجه شافني صافنه..
عقيل : شبيهه الحلوة شارده..
روان : ابتسمت ورحت لعنده..خليت ايدي ع شعره..سلامتك عيني..بس دا افكر بيك شلون صرت..
عقيل : يمج اصير زين..

روان : بسته بخده ورحت شغلت التلفزيون..طلعت اقراص دي ڤدي وكعدنه نشوف فلم لحد ما غفيت..

كعدت الصبح لكيته نايم..شفت الساعه والنوم بعيوني..بعدهه ب٩..هاي فرصتي خلاطلع واشوف شنو تاليتهه..كمت على كيفي..رحت للحمام غسلت وجهي ورجعت للغرفه لكيته كاعد..
اني والبس ملابسي كتله :
صباح الخير حبيبي..اني اريد اطلع بشغلة..

عقيل : على وين من الصبح..
روان : مو البارحه خابرتني صديقتي وتريد تروح للمستشفى تسوي فحص علمود الطفل..فكلت اروح وياهه..اذا تقبل طبعا..
عقيل : اي روحي..بس لا تتأخرين..
روان : تدلل..رحت عليه بسته وابتسمتله وطلعت..لاگتني عمتي بالباب..

ام عقيل : خير يمه..وين النية ؟..
روان : صديقتي حتروح للمستشفى فحروح وياهه..
ام عقيل : ها..يله بالسلامة..

روان : طلعت وسديت الباب ورايه..تمشيت للشارع العام..اخذت تكسي ودليته ع المكان الاريد اوصلة..بس قبل لا اوصل نزلت..لأن صايره بعيده هي..وماكو سياره تدخل..دفعت الكروه ونزلت اتمشى..الجو بارد..كمت اطگطگ..وصلتلهه..
دكيت الباب ..طلعتلي..شكلهه مره عاديه..طبيت جوه..

ام علي : خير بنتي..شعندج؟..
روان : والله يا خالة..رجلي مدا يكدر يعيش مثل الاوادم..خايفه عليه..يكول بس اطلع باب الحوش اختنك..شلون يعني يضل هيج حاله؟..هم يبقى رجلي واخاف عليه..ما اكدر اشوفه يتعذب هيج..اريدج تفكين العمل..وشكد ما تريدين اني حاضره..
ام علي : شوفي يمه..انه اكدر افكلچيا..بس لازم تجيبين مرته الثانيه..
روان : شهكت وخليت ايدي على صدري..ليش خالة؟..تريدين تأذيهه؟..لو شنو..

ام علي : لا يولي..ليش اذيهه..بس انه سويت العمل چي هو كام يحبهه مثل ما گتيلي..هسه اذا فكيته انه راح يرجع يحبهه..بس الفرق يرجع مثل ما جان بالاول..بس اذا هي فكته وانه وياهه طبعا خوما وحدهه..يكوم يكرهه..او ينساهه..

روان : زين شنو نوع العمل هذا حتى يشترط ان هي تجي تفكه؟..
ام علي : هذا ما يخصج..عوفيهه علي..بس جيبيلي البنيه نسيت اسمهه..داني؟..مدري شني..
روان : دنوة خاله..زين شكد تاخذين؟..
ام علي : شكد تنطيني نعم الله..
روان : ٢٠٠ الف كافية؟..
ام علي : كلش زين..انه موجوده شوكت ما تجيبين البنيه وتجين اسوي الج..

روان : مشكوره..ما تقصرين..زين البنيه خوما يصيرلهه شي ..كلت بگلبي اني شدعوه مهتمتلهه هلكد..
ام علي : لا..لا تخافين..
روان : ع الخير لعد..

ترخصت منهه وطلعت..جنت ناويه اليوم اروح اجيب دنوة..بس وصلت للبيت لكيته مگلوب.. لكيت عقيل يصيح وعمتي كاعده يمه تهدئ بي..نزعت شالي واجيت على صوت الصياح..

عقيل : شفتي يمه!..اگللهه ما اطلكج الا تتنازلين عن المؤخر والمقدم تكلي اي قابلة واتنازل..بس تريد اطلگهه..عاد انه صرت بموقف سخيف..مو مال اچلب بيهه..

ام عقيل : يمه شبيك مجلب بيهه..مره ما تريدك..عوفهه ختولي.. طلگهه واخلص منهه..هاي مرتك هياتهه ..شحلاتهه حامل وحتجيبلك ولد بعد شنو حجتك خاطر تبقي هاي المسمومة ما ادري شسوتلك عمت عيني..

بلشت تبجي ودموعهه تصب..باسهه من راسهه گللهه يله خلص..باجر الصبح اخذهه ونروح للمحكمة..اطلگهه واخلص..
روان : شافني واكفه يم الباب...شكو فهمني؟..
عقيل : البارحه دنوة جاي ابوهه ماخذهه من البيت..وهسة تريد اطلگهه..كتلهه اذا تنازلتي ع الحاضر والغايب اطلگج..كالت اي موافقة..بدون ما تفكر حتى..

روان : اي بعد احسن..حخلص منهه واخيرا..
اجيت وكفت يمه..شعندك بيهه حبيبي..اني وابنك يمك..
ام عقيل : يله اعوفكم سوه..اروح اصلي..التهيت بعقيل..
روان : تقبل الله مقدما عمة..
ام عقيل : منا ومنكم يمه..

روان : كعدت بمكان عمتي..خليت ايدي على ايده..وباوعتله بنظرات اريد اشوف جوابهن بعيونه..عقيل؟..
عقيل : عيني..
روان : تحب دنوة؟..

عقيل : شنو هلسؤال..طبعا لا..شيحببني بيهه..معقولة انساج واحب غيرج؟ عشت وياج الحلو والمر..وزواجتي هاي ما أثرت على حبنه..بس جنت متلهف يصير عندي طفل والحمد لله انرزقت الحلوه مالتي بطفل حيملي حياتنه فرح..

روان : ابتسمت وفرحت على كلامة..خلص يومي مابي شي جديد..مثل البارحه..سويت اكل وتغدينه..عقيل طلع لشغله..بلكي مابي شي..او متحسن..

العصريه لبست عباتي ورحت تمشيت لبيت الشيخ..اني نوارة صديقتي كلش..كلشي يصير تحجيلي واحجيلهه..طبيت للبيت سلمت عليهم وكعدنه بالمطبخ..سألت عن دنوة..
ابتسام : راحت وي البنات للمزرعه..
روان : ونوارة وياهن؟..
ابتسام : لا بغرفتهه يمكن..روحيلهه اذا تردين..
روان : اي هسة..

جانت البيبي بالمطبخ وملتهين بالسوالف وياهه..طلعت ختله ورحت فوك لغرفة نوارة..دكيت الباب وطبيت..
نوارة : باع منو اجاني..
روان : رحت عليهه حضنتهه وبوستهه..صار هواي ما شايفتهه..كعدنه ع الجربايه..
نوارة : شخبار الطفل..اوضاعج بالحمل؟..كله زين..؟
روان : اي الحمد لله زين..ما مصدكة تدرين..صار شكد انتظر..همزين فرحت..المهم..تعاي سولفيلي شكو ماكو..منا منا..

نوارة : كل الخير..عقيل حيطلك دنوة..ارتاحي بعد..بس تعاي صدك..انتي مسوية عمل لعقيل ؟..
روان : شمعرفج؟..
نوارة : سرور سامعتج تخابرين مدري منو..احجيلي..لأن عقيل كاتلهه لدنوة مدميهه..حتى خشمهه صاير بي فصخ..ما ادري شمسويلهه عوذه..رجال هذا..

روان : ولج..لا تحجين على رجلي..
نوارة : اي عيني نسينه..سولفي..

روان : اي سويتله..بس شمعرفني هيج يصير..عبالي عادي..بس يكوم يكره دنوة..شو حتى كام يكره اهله والشغل.. رحت ع المره السويت عدهه..كلتلي اگدر افكه بس بشرط..لازم مرته الثانيه تجي..يعني لازم اجيب دنوة وياي يله..
نوارة : عززه!..خاف تسويلهه لدنوة شي؟..
روان : لا كالت ما يصيرلهه شي..بس حتى هي تفكه وميروح بدون فايده..

نوارة : هاا..جا خوش..يله انه اروح جوه يم البنات..صعدت اجيب جرجف نفرشه..
روان : يله اني هم راجعه للبيت..بوستهه ونزلت..
طبيت للمطبخ سألتني بيبي عن حملي..

الجدة : يمه شلونه حملج..
روان : الحمد لله بيبي..ماكو شي..
الجدة : يالله خير ان شاء الله..حبوبه شلونه عقيل؟..
روان : زين..

ضلينه نسولف شويه بعدين طلعت..رجعت للبيت جان توه صاير المغرب..سوينه العشه اني وحنين..طلعت لعقيل على صفحه ورحت وياهم للديوانية..تعشينه وكملنه..رحت للمطبخ دا اغسل المواعين..حسيت على شخص يحضني من وره..درت وجهي شفته عقيل..باسني..

عقيل : ليش متعبه روحج..
روان : لا بس مليت واجيت اغسلهن..خليتلك اكل..اكيد جوعان مو؟..
عقيل : حيل مو شوي..صبيلي..
روان : غسلت ايدي وصبيتله الاكل..

خلص اليوم مثل البارحه.. ثاني يوم الصبح كعدت ما لكيت عقيل..تذكرت اليوم حيروح يطلكهه لدنوة..اي اليوم يومي..

وره الوحده الظهر اندكت الباب..طلعت افتح الباب..جان عقيل..طب بدون ما يحجي شي..رحت وراه والف سؤال على بالي..سديت الباب وكعدت يمه..شبيك ياستار؟..

عقيل بصياح : مابيه شي..عوفيني ارتاح..
روان : فزيت منه..سكتت..
عقيل : طلعيلي هندام للشغل..خلاطلع واخلص..
روان : كمت طلعتله ملابسه للشغل..خليته يمه ع الميزتواليت.. كام يبدل وطلع..اصبر عقيل..

عقيل : خير شكو..
روان : ما تريد تتغده؟..
عقيل : ما اريد سم..ما اريد..
روان : هذا شبي عود من كل عقله ضايج لأن طلگهه؟..عفته ورحت جوه..

خابرت امي..الو ها يمه شلونج..
ام روان : هلا عيني..زينه بنتي..انتي شلونج..رجلج..
روان : اني زينة..بس رجلي مدري شبي يمه..اشو هو طلك هاي الملعونه منا وهو تخبل عليه..ما ادري شبي..يعني بس كتله عقيل تتغده لو لا..يكلي ما اريد سم..ويحجي بصياح.. راح طلع للشغل..هو البارحه كال اطلگهه واخلص منهه..شنو الغيره هسه..

ام روان : والله ما اعرف..قابل رجلي..بس انتي سايري..يجوز مسمعي حجايه لو شي وضاج..ما ضايج من الطلاگة..
روان : الله اعلم..ظافر شلونه؟..(اخويه)..
ام روان : شلونه يعني..صرع راسي بحنين..انوب هو يخابرهه ويبقون لصبح يحجون..
روان : دزوجيهيا شبيج..

ام روان : شنو يمه نسيتي؟..ابني شحلاته صيدلاني والكل يحلف براسه..وهاي من الديرة وحايره بالطبخ والكنس..اريدله وحده مثله توكف الشارع اذا مرت..

روان : تره حنين هم مخلصه سادس..يعني تكدر تكمل يمكم..
ام روان : اي قابل مخلصه الكلية مثلا لو المعهد؟..لو مدري شيصير ما اخذلهيا..خل تضل تحبه..اني حخطبله بت خالج.. شلونهه تخبل..جمال وشهاده..تلوك لظفوري..
روان : يمه..بكيفج..اني حروح انام راسي يوجعني..

سديته منهه ورحت نمت..كعدت على صوت عقيل يكعدني المغربيه..
عقيل : روان كومي..روحي بزردومي..مخنوك للستار..
روان : يمه اسم الله..عيني شكو خوفتني..

كمت من مكاني وكفت كدامه..لزمته من رگبته..خاف مصخن لو مريض..اووف شسويت بعقيل اني..عمى بعيني..نطلع بره؟..تغير جو..
عقيل : لا هو انه رجعت من بره چي مخنوك..احس المحل يضيك بيه يوم عن يوم..كل ما يوذن المغرب اشوف الكل شياطين..ياهو اليحاچيني ازمخ بي..
روان : سلامتك حبيبي..يمكن تعبان..

تمدد وصاحني اجي يمه..كعدت من الطرف الثاني ع الحافه وامسح على شعره واقره عليه..اكو وحده عاقلة تسوي لرجلهه هيج؟..شنو جان براسي من سويت هيج..هسه هي طفله شلون فكرت ممكن يحبهه..اهوو..هسه اضل اتندم وآكل بروحي..باجر اروح عليهه اخذهه للمره هذيج وتخلص السالفة..

ما ادري شلون خلص الوكت..ورا التسعه صبيتله اكل..شويه تحسن..راح يسبح..اني شغلت التلفزيون على فلم وانتظرته يجي..تمدد بصفي وحضني ونمنه..

كعدت الفجر..بعدهه الشمس ما طالعه..على صوته يون..ويفتح بالكنتور ويسده..باوعتله والنوم بعيوني.. حتى ما سمعت زين..
عقيل : وين الشال..عيوني حتطلع من مكانهه من الوجع..

كمت اشوف شبي..فتحتله الكنتور وطلعتله الشال..اخذه وشد بي راسه..هو كعد ع الجربايه جان يلزم بطنه..راح للحمام وكام يستفرغ..رحت وراه على صوته..شاغت روحه..امداج روان..اوف يالله..شسويت بي..ضليت يمه لحد ما خلص.. اخذته للغرفه..تمدد واجيت يمه..ضل يون ويبجي بجي..

عقيل : اااخ يااابه..لج شصاير بيه..احس راح اموت..لو ميت ولا هذا الدا اشوفة..
روان : لا اسم الله عليك من الموت..بس اهدى شويه..
خله راسه ع المخده وايده على راسه..بسته من خده..
حبيبي باجر اخذك لشيخ يقره عليك..
عقيل : للااا..ما اريد..مااا اريد..

كام يصيح جفلني..شبيك عيني..يله لتريد مو مشكلة..ضل يون بالساعه..واني اغفى واكعد على صوت ونينه..كلت باجر لازم اروح لدنوة بعد مابيهه مجال..وشتريد اسويلهه بس حتى تجي ويايه..ليروح عقيل بداهية من ورايه..

رحت للحمام ورجعت لكيته نايم..غطيته ونمت بصفه..كعدت الصبح من وكت..حتى ما كتله راح اطلع..كمت لبست وغسلت وجهي ..اخذت فلوس ٢٥٠ الف..ضميتهن بجنطه صغيره جوه العبايه..وطلعت بهدوء..

المشكله اني بس مره رايحه لبيتهم جانت ويا سرور ونوارة وامهم..فخاف اتيه من اوصل..طلعت للشارع العام..خابرت المره..الو هلا خالة شلونج..اني روان..
ام علي : اي خالة عرفتج..شلونج زينه؟..
روان : اي الحمد لله..بس اذا ماعندج شي بعد شويه اجيب البنيه واجي..
ام علي : يله ماعندي شي انتظرج..
روان : ماشي..

سديته منهه واخذت تكسي..وصلت للمنطقه الي هم ساكنين بيهه..سألت عن بيت ام دنيا..وحده مره عمرهه متوسط بالمنطقه.. دلتني عليهم..طبكلي ابو التكسي براس الفرع ونزلت گلبي يدك الف..والله خايفه خاف ما تقبل تجي ويايه..

دنوة : صعدت ارجع انام..كعدت وي البنات الصبح وبالليل جنت سهرانة..سمعت الباب تندك بقوه..سترك ربي..منو هسة من الصبح؟..نزلت بسرعه شفت خالتي واكفه بالباب تخاف تفتحهه..الدگه مو طبيعية.. مال واحد مستعجل لو مضيعله شي..طلعت افتحهه وانصدمت باللي جان يدك الباب..

روان؟ شجابهه؟ من محبتهه الزايده بيه يعني لو شنو؟..
روان : شلونج دنوة..
دنوة : هلا بيج..تفضلي جوه..طبت جوه ووجهه علي الف علامه..شتريد مني؟ مو طلگني..

طببتهه للهول جان تجي خالتي..عاينت علي بنظرات متسائله..
خالتي : منو هاي؟..
دنوة : خاله هاي مرة عقيل روان..هسه اشوفهه شتريد واجي.. لا تخافين..
خالتي : ماشي..
راحت وانه طبيت يمهه بالهول..قدمتلهه كلاص مي..وكعدت ع القنفه الثانية..خير عيني..خوما اكو شي؟..

روان : دنوة..سمعت من نوارة إنه انتي تدرين سويت عمل لعقيل..
دنوة : شنو المطلوب مني؟..
روان : خية عقيل حيموت بسببي..مداينام الليل..رحت ع المره الي سويت عدهه العمل كلتلي اكدر افكه بس لازم تجي مرته الثانيه..
دنوة : هاي شدتحجي؟..انه شكو..كتلهه ..ليش انه شعلي؟..
روان : هي هيج كلتلي..حبابه تعاي..والله ما تسويلج شي.. ترضين ابني يتيتم؟..

كامت تبجي..ودموعهه تصب عشره عشره..قهرتني..زين اجي ميخالف..شوكت تردين ترحين؟..
روان : هسه..
دنوة : يله انتظريني بس البس صايتي..
عفتهه وصعدت فوك.. طلعت صايتي لبستهه هي والشال..
جان تجي خالتي..
خالتي : ها خالة..خير..وين رايحة..
دنوة : هاي روان رايدتني بشغلة..
خالتي : شعدهه هاي الحية..ختولي خالة..كليلهه ما اكدر اطلع..شبيج ما تعرفين طلعين اعذار..
دنوة : لا حبيبتي مو موضوع مهم..هسة ما اتأخر..بوستهه ونزلت..

طبيت للهول..يله عيني امشينه..عدلت عبايتهه وطلعنه..تمشينه الشارع جان تمر سيارة تكسي..اشرتله..بس ما اعرف وين صاير مكان المره هاي..فروان حجت..كال ميخالف..صعدنه وضلت السياره تمشي بينه تقريب الثلث ساعه..طول الطريق افكر ليش عود المره تريدني؟..انه شعلي..بعدين انه طليقته صرت مو مرته..بس لا مشكله لخ ياربي..مابيه حيل بعد...

كلتله يمك ودفعت فلوس..نزلنه وتمشينه جوه..لحد ما وصلنه لبيت بابه كلش صغيره لونهه اسود وصايره ركن بدربونه..

دكت الباب طلعتلهه مره داگه تاتو مال اهل گبل بحنچهه وعلى اطراف حواجبهه..سلمت على روان وعلي وطبينه جوه..
ام علي : هاي مرته الثانيه؟..
روان : اي خالة..
ام علي : ما شاء الله..حجتلج روان ع المفروض تسوي؟..
دنوة : حجتلي..بس ما فهمت..شنو المفروض اسوي يعني؟..
ام علي : تعالن وراي..

راحت وراحت روان وراهه..كالتلي تعاي..
كمت وراهن..طبينه لغرفه صغيره..بس مليانه غراض..ملابس زلم وبنات..قطع منهه..مثلا قطعه من فانيله..لو ملابس داخليه لبنات..شعر بنيه..لعابه صغيره..ابر..كشت روحي..

ضليت واكفه بالباب.. يمه هاي صدك سحاره..شكو اجيت..ليش ما عفتهه..شسويله لعقيل طبه مرض..من ايده صار بي هجي..استر ياربي..
ام علي : بلا امر عليج بنتي سدي الباب وتعاي كعدي بسدي..
شيسويني بنتج عوذه منج كلت بگلبي..

سديت الباب وكعدت يمهه..جان گبالهه جيس اسود مشدود وصاير مثل الطوبه..
ام علي : شوفي عيني..اريدج تقرين المعوذات واية الكرسي وسورة التين..وتضلين تكررين بيهن انتي وتفتحين هذا الجيس..بس لا تخافين..بس جيبي ايدج اغسلهه..

انطيتهه ايدي..جانت روان كامشه بيدهه مثل الطاسه بيهه ماي وجوه ايدي اكو طاسه فارغه..ذبت روان ماي شوي شوي والمره تغسل بايدي وتقره مدري شنو ما فهمتهه..انه هي وتغسل ايدي استغفر..متت خوف..بعدين جابتلي الجيس وبلشت افتحه واقره السور بصوت مسموع..

شفت فانيله لعقيل انه شايفته لابسهه گبل..يمه هاي صدك مسويتله شي..صدك ما تخاف ربهه..ولو أذاني بس خطيه.. جانت وي الفانيله اوراق صغيره مكتوب بيهه كتابات بخط ناعم كلش..اخذتهن مني وغسلتهن بالماي بعد ما كبت الماي من الشباج الي صار بالطاسه من غسلت ايدي..هي وتقره ايات قرانية غسلت الفانيله والاوراق شگتهن وذبتهن بالماي..

روان بخوف وصوت مهزوز : ها خالة..بشري..
ام علي : هاي هي يمه..بس حيضل اليوم تعبان وضايج.. وراههه يتحسن ويرجع مثل گبل..
جريت نفس بصعوبة وكمت..انطتني خاولي نشفت ايدي..بس لساني ماسكت عن الدعاء والايات القرانية..روان انطتهه فلوس
ام علي : ٢٠٠ مثل ما اتفقنه؟..
روان : اي خالة..وياهه زياده..
ام علي : نعم الله..

طلعنه من الغرفه بعد ما اكلتهه اكل روان بالشكر..
عفتهن وطلعت بره انتظرهه..اعاين للمنطقه..تقبض الگلب وكئيبه..خوب بيتهه..بعد اكثر كآبه..شوي وطلعت..تمشينه بره واخذت تكسي..طول الطريق تتشكر مني..
روان : ما اعرف شلون اشكرچ..ما انسى فضلج عليه والله..
دنوة ابتسمت : عادي ماسويت شي..

وصلتني لبيت خالتي وراحت هي..دكيت الباب جان تطلعلي خالتي..وجهه مخطوف ومصفَر..
خالتي : هاي وينج يمعوده..ضل بالي عليج خاف سوتلج شي هاي الخبيثة..
دنوة : لا ماسوت شي..يله راحت بعد ما تجي اصلا..
طبينه جوه..
خالتي : سولفيلي شرادت منج..وليش طلعتو..همزين ابوج ما اجه..جان خبصني وما يخليج تجين بعد..
دنوة : ليش شنو كال اجي؟..
خالتي : اي كال اجي..يريد يگلج شغله..
دنوة : شنو هلشغله؟..شعجب ما گالج..
شو صفنت..كامت تبلعم..يمكن كايللهه بس ما يقبل تگلي..
خالتي : خالة هو يجي يگلج احسن..المهم سولفيلي لا تعوفين السالفة مگطمه..

ضحكت على كلمتهه..اي ..
هاي روان مسويه عمل لعقيل چي تزوجني وكام يجي للغرفه هواي خاطر يكرهني..انه اصلا لا احبه ولا اريده..بس هي ما ادري شلون تفكر الله يسلمهه..شو هذا بدال ما يحبهه تخبل عليهه وكام يكره البيت والشغل ومريض طول الوكت..راحت ع المره الي سوت عدهه العمل خاطر تفكه وما قابله الا تجي مرته الثانيه يعني انه..رحت وياهه وسويت الگالتليا المره وانفك عنه..بس ليش انه ما ادري.. حتى هي ما كلتلي..وانه بعد ما سألت..

خالتي : يمه عزه بعينهه..خاف يصير بيج شي خالة..هاي شتريد منج..خوب انتي من مشكله لمشكلة..عيشي حياتج كافي..بعد لو تگلج عقيل مات لا تروحين وياهه..ما تستاهل.. الي تسوي لرجلهه هج شتتوقعين منهه؟..

دنوة : اي والله صحيح..بعد الله كريم..لا ان شاء الله ماكو شي..هسة حفوت اسبح..
خالتي : انه طار النوم من عيني..اسويلج ريوك وياي؟..
دنوة : على راحتج خالة حبيبتي..
خالتي : يله خوش..
ابتسمت وصعدت فوك..

طلعت ملابس من الجنطه..جان بيهه جيب صفح..خليت ايدي علي..جان بنصه شي..بس ما اذكر خليت بي حاجة..جانت رسالة صغيره وبنصهه سيمكارت.. مكتوب بيهه رقم وبصفه اسم رائد ..گلبي ضل يدك..عود منو كاتبلي اسمه ورقمه.. ادور سيمكارت همين..منين اجه هذا..هاي سوالف البنات اكيد..خل يرجعن واشوف منو خلته..ولو انه بداخلي فرحت..حكوم اسمع صوتة وكلماته..

ابتسمت بدون ما ادري..رجعته لمكانه واخذت ملابس وطبيت للحمام.. سبحت وكملت..لفيت شعري بالخاولي ونزلت..
خالتي : دنوة حبيبتي روحي بغرفتي اكو شسوار نشفي شعرج..الجو بارد كلش..لا تروحين تتمرضين..كملي وتعاي تريگي..
دنوة : اي ميخالف..

رحت للغرفة نشفت شعري بالشسوار.. الغرفه بيهه صورتين لرجل خالتي..شكد وفية..بناتهه جانن كلش صغار من توفى هو..وهي بعدهه تحبه وصوره موجوده بغرفتهه..ما تزوجت وراه ضلت تربي بجهالهه..البيت هذا جان ما كامل..هي كملته براتبهه ماقبلت تكعد يم اخوهه الي هو خالي..أجرت بيت وكعدت بي الى أن كملت بيتهه وانتقلت بي..
رجعت الشسوار وطلعت..

خالتي : ها خلصتي..تعاي بالهول..
رحت للهول وتريگنه..سولفنه شوي لحد ما سمعت الباب تندك..طلعت افتحهه..جان ابوي..بوسته وحضنته..
طب جوه كعد ويانه..
ابو دنوة : يله بنتي..لبسي وتعاي وياي..
دنوة : كالتلي خالتي..بس وين حنروح؟..
ابو دنوة : تجين وتعرفين وين..

كمت غسلت ايدي وصعدت فوك..لبست الشال والصايه ونزلت..لكيته واكف يم الباب ويحجي وي خالتي..شافني كال يله امشي صعدي بالسيارة بره..تمشيت جدامه وصعدت بالسياره..هو هم اجه صعد وطلعنه..

الطريق الطبينه بي شايفته گبل..بس ما ادري وين..ضليت بحيرة..شايفته لو دااتخيل؟..اذا شايفته فوين؟..لحد ما طبينه للشارع الي تذكرت وين شايفته..بس بعدني بشكوكي..لحد ما وصلنه للباب الي شفت عدهه سيارة ابوي قبل..

ابو دنوة : نزلي..
ها اي..نزلت وسديت الباب..مشى هو جدامي ودك الباب..يمه گلبي طاح من مكانة من تأكدت..يعني صدك السالفة؟.. والسيارة الشفتهه ذاك اليوم صدك مالته..

زين ليش ما معترف بيهه؟..شنو الصار..هو مو جان يكره امي ليش ما كال هاي مرتي..الف سؤال صار براسي..

فتحتله الباب بنيه مبينه بگدي او اصغر مني..ملامحهه ما تشبه ابوي بس الشگار..باسهه وصاحني ادخل..

اول ما طبيت گلي هاي سما بنتي..بعدين رجع گللهه هاي دنوة بنتي..ادور طبينه جوه..جان تجي مره يطلع عمرهه بنهاية الثلاثين..عاينت علي بطرف عينهه..حمره ومورمه..مبين باجيه ما ادري شبيهه..وراهه وحده لخ تشبه سما يعني مبينات خوات..

محيي : سما..رزان..شذى..هاي دنوة بنتي..صار هواي من كلت اجيبهه خاطر تتعرفون عليهه..
سما : شنو حتعيش ويانه؟..
ابو دنوة : اي..بس مو هسة..
حسيتهن ضاجن..تضايقت ..اذا هو بس عرفني عليهم ضاجو مني..ادور اعيش وياهن؟..عفت كلشي وابتسمت..چي شفت ابوي مبتسم ويريدنه نصير سوه..يعرفوني واعرفهم..

شذى (ام سما) من وره خشمهه : هلا بيج..البيت بيتج..
دنوة : الله يسلمج خالة..
محيي : انه رايح للشغل..العصر اجي اخذج..
باسني وراح..ما اعرف شسوي..ما اعرفهم..خواتي بس بالاسم..

صاحتني رزان وياهه فوك..صعدت هي بعدين صعدت وراهه..شوي واجت سما..طبيت لغرفه جبيره بيهه جربايتين وكنتور جبير..تعلاگة مال ملابس معلگين عليهه صدريتين وقمصان..وميوزه ثنين مال قراية..انقبض گلبي من شفت الكتب ع الميز..ليش مو انه مثلهم وعندي ميز واقره واروح للمدرسه..هن مو بناته وانه هم بنته..شنو الاختلاف؟..

سما : سمعنه انتي من الديرة..
دنوة : ابتسمت وكتلهه..اي مناك..
رزان : ايع يعني عايشة وي البقر والحيوانات..
انهضمت من كلماتهه..ولو هاي مو عيشتنهه..كتلهه ..لا ليش عايشه وي البقر..جدي عنده فلاحين للمزرعه..
سما : جدج الي كتل .....

نغزتهه رزان وسكتت..
دنوة : شنو؟..شبي جدي..
رزان : مابي شي عيني..اي انتي شمخلصه دراسه؟..
ما ارتاحيت لهلكلمتين..احس اكو شي وراهن..كتلهه : سادس ادبي كملت هلسنه..
سما : ويا كلية رحتي؟..
جاوبتهه بهضيمة : ما داومت..
رزان : اي هم هذوله اهل الزرع..قابل يخلوهم يكملون دراسه..
ما جاوبتهه..غيرت الموضوع وكتلهه انتي شمخلصه؟..

رزان : اني خامس علمي..مقدمة سنه اني وسما..
ها..سهل صعب؟..
سما : لا صعب..بس باباتي فديته مدخلنه خصوصي فماكو شي صعب علينه..
ابتسمت بس انقهرت بداخلي..
يعني ابوي جان ضام كل هذا علي؟..وشلون معيشهن شكد حلو ودراسه وبيت بالمدينه..صح احب الديره والمزرعه..بس هنا اكيد يفرق..

خلص الوكت كله ينغزون بيه واغلس..لحد ما حجت سما حجايه احس دموعي صارت بطرف عيوني وره ما نزلنه جوه..امهه جانت دتغسل مواعين وتطبخ تتحرك هنا وهناك
سما : الاصيله تبقى ببيتهه معززه مكرمة..وانتي فهميهه..
دنوة : اي صحيح..فهمت شنو قصدهه..

كمت للحمام..سديت الباب وفتحت المي..كمت ابچي خاطر ما يسمعوني..شكد حقيرة..بس صوج ابوي مخرب سمعة امي جدام هاي النماذج..عود هاي اخت؟..شكد انقهرت وانهضمت منهه..بعدني اول يوم هنا ولو هو مو يوم..وهج سوو بيه..بعدين شحيسوون؟..يمكن يذبون بلوه براسي..ما بجيت هواي خاطر ما يبين علي..غسلت وجهي واخذت نفس وطلعت..

عاينت للساعه..لكيتهه ب٣..سألت مرة ابوي..
دنوة : خالة شوكت يجي ابوي من الشغل؟..
شذى : بالخمسة..

بعد ساعتين..شيمشيهه هاي..صبو غده بالمطبخ..كعدت وياهم بس استحي حتى اكل..اكلت من جدامي بس..
شذى : انتي ما تدرسين؟..
دنوة : لا بطلني ابوي..
شذى : هاا..خوش..

ما ادري شنو غايتهه من السؤال هذا..كملت اكل وكمت اغسل..رجعت لكيتهن ديتعاركن منو تشيل الاكل وتغسل مواعين..كتلهم : انه اغسلهن..
سما : اي بعد احسن..خفة وراحة..
شلتهن وغسلتهن..اجت مرة ابوي شافتني..
شذى : اي باع البخت..خوما مثلي..يتناگرن مثل الچناين..ما تشوفن اختجن شلونهه..
رزان : اختنه؟..
مرة ابوي خلت ايد على ايد وكالت : اي الله يچرم...

غلست وكملت المواعين..راحن هن مدري وين..طبيت للهول تمددت..كاعده من وكت..نمت شوي..بعدين اجه ابوي كعدني..

محيي : دنو..تبقين هنا لو ارجعج لبيت خالتج؟..
دنوة والنوم بعيوني : لا ارجع للبيت احسن..
ابو دنوة : يله..انه بالسياره بره..
كمت عدلت ملابسي وطلعت..البنات ما شفتهن..بعد احسن..صعدت بالسياره وطلعنه لبيت خالتي..اكول؟..

ابو دنوة : كولي يابه..
دنوة : بيت خالة ام رائد وينه؟..خالة ابتسام كالت قريب ع بيت خالتج..
ابو دنوة : اي..هسه نوصل واشوفجيا..
دخلنه لفرع بيت خالتي..براس الفرع..الركن يعني من الجهة المقابيل بيت خالتي جان بيت رائد..گلبي كام يدك..شكد قريب عليهه..
محيي : هذا بيتهم..واشر علي..
اي عرفته..

مشت السياره شوي ووصلت لبيت خالتي..بوسني ونزلت..دكيت الباب..طلعتلي حلا..ابوي من شاف الباب انفتحت راح..معناهه اطمن..

حلا : هاي وينج..تعودنه عليج..تعاي طبي..
باستني وطبينه جوه..تارة كاعده هي وخالتي..سلمت عليهم وكعدنه..
خالتي : شفتي خواتج؟..
حلا : ياخوات هذني استر ياربي؟..
خالتي : ابو دنوة متزوج..وعنده بنات ثنين من مرته..اليوم اخذ دنوة خلاهه تتعرف عليهن..
دنوة : اي شفتهن..زينات..

اخذتنه السوالف..لحدما كامت خالتي تسوي عشه..سألت البنات اذا عدهم دوام باجر..
حلا : لا ماكو..باجر اوف..حتى تارة همات..
دنوة : اي هم زين..حتى نتعلل اليوم..
تارة : جبتلج هدية عيني..
دنوة : شنو هي؟..
تارة : بعدين تعرفين..هسة كومي نسوي العشه وي امي..
كمت انه ذبيت الصايه والشال وساعدتهم بالعشه..خلصنه.. صعدت تارة فوك وصاحتني..كتلهه اريد اغسل المواعين..
حلا : امشي ولج..انا اغسلهن..

ابتسمت وصعدت فوك..تارة اول ما طبيت خلت بيدي تلفون بالباكيت وفوكاهه ورقه وسيمكارت..
تارة : هاج عيني..هذا تلفون جديد وسيمكارت ورقم رئودي.. وجهي صار احمر اخذته منهه..
تارة : يله خلي السيمكارت وخزني رقم رائد..
خاطر تخابري بعدين..
ولج شنو هلحجي..قابل هو متفرغلي..عوفي الرجال عيب..هسه شيكول علي..ما شايفه وتخابرني..

تارة : لج انتي حتجلطيني..يله بس خلي رقمه لتخابري..
عود انا اكله يخابرج..
ابتسمت والفرحه بداخلي..خليت السيمكارت وكتبت اسمه والرقم..گلبي يرجف من ينذكر اسمه ادور اكتبه بايدي..وره شوي صعدت تارة وبيدهه صينيه حب وكرزات..

كعدنه نسولف ونضحك..تارة كل ساع تكول لو شفتي وجه دنوة من انطيتهه التلفون..تكول طماطه مووو لو لا..انه اسمعهه واضحك..بس بداخلي شعور حلو..

ما جنت مخليه ببالي احب..لو احس بشعور الحب ع الي شفته يم ابوي وبالديرة كلهه..ومنو حبني؟ رائد... الي من يجي والله ننخبص ونسوي احلى الاكل..

وره وكت..صارت الساعه بالوحده الا ربع..متت عطش..
اصبرو اجيب ماي واجي..نزلت اجيب..سمعت صوت طلقات جمدت بمكاني..ما حسيت الا تارة وحلا يمي...خالتي طلعت من غرفتهه بسرعه والشال على راسهه..طلعت بره ..ما اسمع غير صوت شهگتهه..وكلماتهه : هاي الطلقات من بيت رائد .. هنا بعد ما اعرف شحجي ......

يتبـــــــــع.......................