#أبي_لم_يكن_إنساناً
البارت التاسع
للكاتبة لبنى الموسوي
بس حچاها طفر عمو قبل الكل
- شنو تاخذها !!
و وين دتاخذها رزاق شبيك تخبلتتتتتتت
رزاق.. لا ما تخبلت
بس عقدتلها على أرشد ولازم اخذها هسة الة لأن هذا وينة واگف بالباب ينتظر عروستة
ما اعرف أوصف شعوري من سمعت هالجملة بالتحديد
مچنت افهم شنو هو الزواج وشيصير بي
كل اللي فهمتة ساعتها منتظرتني حياة صعبة متقل عن صعوبة الحياة القصيرة العاشتها ماما
كل خوف الدنيا أرتكز بية بـ هاللحظات الصعبة
وقبل الكل خفت على أختي رحمة
شلون راح تعيش اذا طلعت اني من هـ الغابة وشتسوي حتى تگدر تتغلب على وحوشها
وثاني خوف تملكني بسبب بدراستي
حلمي ومستقبلي البعيد
حتى اگدر أعتمد على نفسي ومنحتاج لا اني ولا أختي لأي بشر كان
وبنفس الوقت حبيت أحقق الشي السعى عمو حامد الله يرحمه حتى يخليني أوصل الة
والخوف الأكبر من المستقبل المجهول
ويا رجال يشبه أبوية حتى بـ أنعدام المبادئ والقيم
وهالشي كان واضح جداً
بعد ما قبل على نفسة يتزوج من طفلة قاصر!!! لسة ما فهمت من هالحياة شي
فزيت على عصبية عمو محمود ديشحرج ويا أبوية
- من كل عقلك رزاااااااق
والله العظيم أدفنك بـ أيدي وما انطي طيبة لـ هالسافل تسمعني لو لاااااا
- مو بكيفك زوجتها بعد
- اااااانتَ المووو بكيفكككككك رزاااااق
- لتصيح خلي نتفاهم
- ماكو تفاهم بـ هالموضوع لتحاول ابد ويلا أطلع برة
- ما أطلع اذا ما اخذ طيبة اليوم
- واني گلت طيبة متطلع من هذا البيت إلا بـ موتي
- محموووود لتخليني ابتلي بيك ******
سمير.. لتغلط على أبووووية حتى لا تجبرني أنزع ثوب أخلاقي وياااااااك
سعد.. أطلع منا أحسن ما نطلعك جنازة هااااا
رزاق.. موووو بكيفكم بنتي يا ناااااااااس بنتتتتتي
سعد.. هه يا بنية الله يخليك
البنية الدتحچي عنها يتيمة لا عدها أب ولا أم والوحيد المسؤول عنها بهذا البيت هو أبوية
سمير.. خلي سعد خلي مصدگ روحة هو أب
لا وجاي بكل عين صلفة حتى ياخذها ليش بوية أحد مقشمر عليك وگايلك الشغلة تايهتلك
- أخذها وغصباً ع الكل
حچيكم هذا نگعوا واشربوا مية عقدت الها بعد وصارت مرة لأرشد من هاللحظة
بس حچاها هجم صالح علي بعد هدوء عجيب
ما ادري بشنو چان يفكر
بس كل العرفتة هو مو مثلهم لأن أحتاج وقت طويل حتى يطلع من صدمة الخبر النزل على روسنا مثل الصاعقة
صالح.. الله ياااااااخذك ياااااااااا حيواااااااااان
شبقيت بعد ما سويتة بالطفلة ؟!!
يُتم ويتمتها
تعذيب وعذبتها
حالة نفسية وسويت بيها بسبب أجرامك يا مجررررم
وأخر شي أجيت حتى تكمل عليها
بعد ما زوجتها من واحد عااار وأبن سطعش عااار على شاكلتك
اليوم موتك يصير على أيدي بلكي يخلص هالبيت من شرك الما يخلص
ضربة بوكس بوجهة ركض علي عمي و ولدة
حاولوا يبعدوا ما گدروا
كلما يسحبوا منة يرجع يهجم بقوة أكبر من القبلها أخر شي سعد قيد أيدة ليورة يلا سيطروا علي
صالح.. عوفوني ولكمممممم
خلوني اخلص هالبيت من شرة ليش دتمنعوني ليششش
محمود.. عمي صالح مو وهيچ أصبر خل نتفاهم شوية
- شنتفاهم عمي شنتفاهم
متسمعه يگول عاقد الها والرجال هذا وينة ينتظر برة حتى ياخذها
- ميخالف اهدأ وليدي
بس اطلعوا انتم من هالسالفة واني راح أحل الموضوع ويا رزاق
سعد.. يابة شتحچي ويا بعد
العقد وتم شيفيد الحچي بعد متگولي والله اليوم منعوفة يطلع منا عايش
حچاها وركض هجم على أبوية وتبعة سمير
عاد صالح شلون ميريدلة حجة حتى يطلع حرگة گلبة بي فـ التموا علي ثلاثتهم
ظل عمو واگف بيناتهم يحاول يفكه من أيدهم ماكو
أخر شي عاط بكل صوتة كاااااااااااافي
اليوم السالفة ما راح تنحل للصبح اذا تظلون هيچ بس عااااد اهدوا شوية وخلوني اتفاهم ويا
الكل سكت على صوتة
التفت على بابا يلا رزاق أطلع منا وحدك ولا تفكر تاخذ طيبة وياك لا اليوم ولا بعد عشرين سنة
- ههههههههه شنو هي السالفة بكيفكم
استوعبوا عاد طيبة تزوجت
يعني من اليوم شورها لا بـ ايدي ولا بـ ايد واحد منكم شورها بـ ايد رجلها وبس
محمود.. هذا يا رجلها التزوجتة بدون موافقتها
رزاق.. اني أبوها واني زوجتها
- واذا يعني أبوها
رضاها واجب يا شرع يحلل الك تزوجها بدون متاخذ شورها ورضاها
- حلل محمود حلل وتم العقد رضيت ولا ما رضيت
- رزاق وتالي وياك مو راح تموتني ناقص عمر
- خوية الرجال واگف بالباب
يعني لازم ياخذ طيبة بعد مو بكيفكم تمنعوا عنها صارت زوجتة والكلمة الأولى والأخيرة الة
صالح.. عمي دعوووووفني
خلي اموتة الـ هالعاااار ترى عقلي راح يوگف من حقارتة
- يابة دفضها عاد
طلعة منا وخلصنا من شرة ترى السالفة صارت بلا ملح
محمود.. واذا ما انطيتها الة شيسوي فهمني
- ههههههههه تسأل عن أرشد شيسوي ؟!!
ليش انتَ متعرف أرشد منو
ياخذها خوية ياخذها برضاكم أو غصباً عنكم متصعب على صاحب رزاق
سمير.. يمعود شو دسكتتتتت
لا بكيفك ولا بكيفة السالفة اكو زلم بالبيت يمنعوكم
التفتت على عمو مدنگ راسة للگاع
هنا عرفت كل شي انتهى والموضوع طلع عن سيطرتهم يعني من اليوم انتهت حياتچ طيبة
صالح.. عمي شو ساكت
أبووووس أيدك لاااا تسكت احچي شي راح أتخبببببل
- شحچي عمي متسمعة شگال
- شنو يعني راح تسلمة طيبة بـ هالسهولة ؟!!
- ليش اكو حل حاچيني
ديگولك عاقد الها على الرجال هو أبوها وهو ولي أمرها يعني الشغلة لا بـ ايدي ولا بـ ايدك
- لا عمي غلطان بـ ايدنا ونص
سچينة وحدة بنص گلبة ونفتك منة ومن شر هالحيوان المسويلي روحة أبو براس هالطفلة
حچاها ورجع يتضارب ويا أبوية
البيت أنخبص
ناس تجر بالطول وناس تجر بالعرض
منشوف إلا صالح ركض للمطبخ شوية وطلع السچينة بـ ايدة
صارت عمة گبالة تبوس بـ أيدة ميسويها
اني أتوسل بي
سعد وسمير يتلاوون ويا حتى ياخذون السچينة
بيبي تدگ وتلطم.. عمي يرزل ويغلط
نريدة يهدأ ماكو تخبل ميشوف گدامة بعد بس أبوية
محمود.. كافي صالح كااااافي
الدتسوي مو حل ترى وكتلتة شيصير بعدين ؟!!
تنحل هالسالفة يعني
وداعتك كل شي مراح يصير بس انتَ تروح بيها وطيبة غصباً عليك وعلية يجي رجلها وياخذها
ما سمع منة
ظل يحاول يوصل الة بـ أي طريقة
هنا اني انتهيت
بديت أفقد توازني شوية ووگعت يم رجل صالح
فتحت عيني بالغرفة وكلهم فوگ راسي
صالح.. ها طيبة شبيچ شدتحسين خوفتينا عليچ
طيبة.. عمو ما اريد أتزوج
فدوة لا تخلي رزاق ياخذني لهذا الرجال حيل خايفة
محمود.. يعني شبيدي عليچ ي بعد عمچ
غير هو أبوچ وأمرچ بـ أيده
عقدلچ على أرشد وهذا وينة برة كل شي منگدر نسوي بعد سامحيني عمي سامحيني
صالح.. طيبة متطلع منا عمي لو اعرف اكتلهم اثنينهم بـ ايدي وروح أبوية
محمود.. انتَ مخبل صالح
زين واعي على نفسك شدتحچي لو لاااااا
واذا كتلتهم تنحل السالفة ؟!!
اكيد متنحل بس تروح انتَ للسجن ويضيع مستقبلك ويضيعون أمك وأختك وياك
يعني ما فكرت منو يظل الهم من بعدك ؟!!
سنيين واني متحمل مسؤوليتكم
اجة الوكت التساعدوني عمي تراني تعبت كلش واحس روحي استهلكت
بعدين روح الأجرام هاي ما أحبها اني
مو كلمن يأذيك تكتلة بـ ايدك ترى الدنيا مو غابة وليدي ربك فوگ وشايف وعالم بكل شي
طيبة.. أسمع كلام عمي صالح
صح اني ما اريد اتزوج بس رغم هذا ما أقبل بالدم ولا أريدك تتورط بسببي وعمتي ما عدها غيرك
بس حچيتها حضنتني عمة تبچي
- سامحيني بنتي سامحيني لأن ما گدرت أحميچ
- ما قصرتي عمة كفيتي و وفيتي
- لتخافين ي يمة
گلبي حاس رب العالمين راح يفرجها عليچ عن قريب وگولي عمتي گالت
- شلون عمة شلون ؟!!
يعني رجال بگد أبوية واني طفلة كل شي ما افهم شلون راح أعيش ويا !!!
شراح يصير بية بعد هاليوم !!!
وأختي عمة !!!
دراستي !!!
مستقبلي !!!
وين الخير بعد ما أخسر كل هذا وينة بس فهميني
ماكو أي خير
الظاهر مكتوب علية أعيش نفس العذاب العاشتة أمي الله يرحمها
بالأول طفولة صعبة وذل اليُتم
وتالي رجال حيوان ميخاف الله يكتلني على أيدة بلا ميرفلة جفن مثل ما سوة رزاق بيها
- لا يبعد عمتچ لتگولين هيچ
عمرچ أطول من عمري ان شاء الله بس قوي نفسچ وربچ ميعوفچ صدگيني
اني راح ادعيلچ لليل نهار
عسى ان تكرهوا شيئاً وهو خير لكم
يعني يمكن الله كاتبلچ ترتاحين بحياتچ الجديدة وكل الصار بي صالح حتى تخلصين من ضيم رزاق
- عمة وأختي ؟!!
شلون بيها وشراح تسوي من بعدي فهميني
- قبل لا تكون أختچ هي بنيتي الربيتها على أيدي هاي يعني معقولة اخلي واحد يأذيها واني موجودة
محمود.. طيبة عني اسمعيني... گعد يم رجلي ورجع كمل كلامة
أختچ بـ هالرگبه واذا واحد أذاها أو مسها يعني مسني وأذاني لا تصدگين يصير الها شي من ترحين واني عايش
بس حچاها دنگت اشهگ من گلبي
رفع راسي يمسح بدموعي لمحت صالح يفتر بالغرفة رايح جاي من العصبية حتى أنفاسة تنسمع
نهاية.. أبو سعد خوية بلا زحمة عليك
أخذ صالح وأطلع لان اريد أحچي ويا طيبة على أنفراد
صالح.. شنو يمة شتردين تحچين وياها ؟!!
نهاية.. شعليك انتَ
سالفة بيني وبينها مالك دخل بيها دطلع عاد مو شلعت گلبي اليوم
بس حچتها دفر الباب بكل قوتة وطلع
- الله ياخذك رزاق
الله ياخذك ي الحيوان اذا ما تصير نهايتك على أيدي فلا أتسمى صالح وهسة تشوفون كلكم
راحت عمة سدت الباب وراهم ورجعت گعدت بصفي
- حبيبتي طيوب اسمعيني
والله ما اعرف شلون افتح وياها الموضوع... وفركت أيدها بتوتر
- احچي عمة شنو !!
- انتِ بعد من اليوم صرتي مرة متزوجة
يعني من واجبي كـ أم
أوعيچ وأفهمچ حتى تتعلمين شنو ألچ وشنو عليچ من حقوق و واجبات زوجية
استغربت من كلامها كلش شتريد تحچي يعني ؟!!
أعرف شنو هو الزواج
اثنين يتزوجون ويصير عدهم جهال شنو أكثر من هالشي وما أعرفه اني
بدت عمة تشرحلي بـ ارتباك متعرف شلون ترتب الكلام
واني شويه أفهمها
وشوية أخاف واتلعثم من كلامها الفوگ مستوى أسيعابي
- ها يمة افتهمتيني لو لا ؟؟
- عمة خايفة والله
عفية شسوي ما اريد اتزوج شنو هذا الحچي الدتحچي
- حضنتني تبچي شبيدي عليچ بنيتي
بس صدگيني راح اظل يوميا ادعيلچ الله ينور طريقچ ويهدي هالرجال عليچ
بعدها تحاول تهديني صاح أبوية
- يلا طيبة وينچ الرجال صارلة ساعة واگف بالباب
- وگفت امسح بدموعي عمة وين أختي
- بالغرفة ويا البنات
- جيبيها فدوة اريد أشبع منها قبل لا اروح
هزت براسها وطلعت تركض
وگفت الم ملابسي بالعلاگة وأبچي من گلبي فجأة صارت عيوني على جنطة المدرسة
رحت ع السريع
ضميت كل الكتب بيها وخليتها يم ملابسي
ما اعرف ليش !!!
رغم اني متأكدة مراح أكمل دراستي بس مو بـ ايدي أحب كتبي هذني بيهن كل مستقلبي الچنت أحلم بي كل يوم
توني سديت السحاب دخلت رحمة
ركضت ضميتها الحضني اناشغ من البچي حتى النفس حسيتة انحجب عني
- يا طيبة شبيچ تبچين لأن بابا تعارك وياچ
- لا حبيبتي
ما بية شي بس أحبچ هواي بگد الدنيا والناس كلها
- واني هم أحبچ
- أسمعيني رحومة اني صار لازم اروح منا
- وين ترحين ؟!!
- لغير بيت لأن تزوجت مثل كل البنات
- واني لعد شلون تعوفيني وحدي
- حضنتها اناشغ لا اكيد مو وحدچ
ماما نهاية موجودة وياچ
وصالح وصفاء يمچ واني هم اجي دائماً أشوفچ لتخافين مراح اعوفچ ابد
- اخذيني وياچ حبابة ما أريد تعوفيني هنا وترحين
نهاية.. يا رحمة ترحين وتعوفيني وحدي
والله إلا اگوم ابچي عليچ وحتى أكل ما اكل من وراچ
رحمة.. لا ماما ما اعوفچ بس طيبة شلون ؟!!
نهاية.. احنة نروح نشوفها بـ استمرار
وهي هم تجي تشوفنا وين رايحة قابل غير يمنة ببغداد
اقتنعت بكلام عمة وسكتت
ظليت حاضنتها أحاول أملي ريتي من ريحتها الطيبة
گلبي معصور كلش
عندي أحساس بعد ما اشوفها
ما ادري ليش حاسة هذا أخر لقاء يجمعني بيها والله يستر من أحساسي
گمت خليت أيدي بـ أيدها وطلعت
داشيل غراضي عمة شالتهن قبلي باوعت عليها عمة بلا زحمة عليچ جيبي الجنطة
- شتسوين بيها حبيبتي معقولة راح يخليچ تداومين
- حتى لو ما داومت أريدها
- باچر الصبح اني اجيبها الچ عوفيها هسة
- لا فدوة جيبيها
ما جادلتني أكثر
شالتها وطلعت لگيت عمي يتعارك ويا أبوية على نفس الموضوع
- حتى لا عرس لا صخام صدگ چذب
- هو رجال چبير وينة وين الاعراس يا محمود
- والمهر
- كل شي محفوظ لتخاف مهرها يسوة هذا أرشد بعد
- لعد وينة ما قبضت البنية شي
- خلي تروح هسة البيت رجلها
وباچر أخذك ونروحلة للبيت هم نوصي عليها وهم نقبض مهرها ونسلمة الها
بس شافوني واگفة گدامهم قطعوا الحديث
باوعت بوجوههم واني اودعهم بنظراتي واحد بعد واحد
صفاء زينة حبيباتي وخواتي
العاشن وياية سنين طفولتي بألمها وحزنها
شگد لعبنا سوة... درسنا سوة... ونجحنا هم سوة
يصعب علية فراگكم كلش بس هذا قدري وهذا نصيبي من هالحياة
بيبي الأتذكر بيها ريحة أغلى المفقودين
أم گلب الطيب الربت وتعبت وما لگت مجازاة لترباتها
مو سهلة راح افارگچ
بس اتمنى متنسيني من دعائچ وادريچ صاحبة بخت يم رب العالمين
سعد سمير صالح
أخواني اللي ما جابتهم أمي والـ سندوني لحد أخر لحظة جمعتني بيهم اليوم
عمو محمود العوضني عن غياب عمي
ودافع عني بكل قوتة
لكن القدر وحيلة أبوية ومكرة چانوا اقوى منة بالنهاية وگدروا يتغلبون علي
عمة نهاية
اااااااخ يا عمة نهاية لو تدرين شگد صعب علية فراگچ
انتِ مو مرت عم وبس
لا انتِ أمي اللي لولا دعمها ومساندتها الي ما گدرت أصير قوية ولا گدرت أستمر بحياتي لحد هاليوم
سندتيني وكملتي مشوار عمو حامد من بعده
ربيتيني وربيتي أخواني
حرمتي نفسچ من ان تعيشين حياتچ مثل باقي الناس ودفنتي روحچ بالحياة بس حتى لا ننظام من بعدچ
رحمة خيتي الغالية
چنت اتصبر بيچ على فراگ رحيم شلون بية هسة واني فقدتكم اثنيناتكم وبشنو أصبر روحي بعد ؟!!
صحيت من صفنتي الكل يباوعون بوجهي
رحت أركض شمرت نفسي بحضن بيبي أنحب بصوت عالي
صفية.. الله لا يوفقك رزاق
الله يطلع حوبة هالمسكينة بيك بجاه كلمن عندة جاه وهذا دعاء أم محروگ گلبها من عمايل أبنها
مسحت على راسي عفتها ورحت الحضن عمي
- شكراً عمو على كل شي سويتة وياية بس ما اوصيك على أختي امانتك هاي فدوة
- لا تشكريني على واجبي بنيتي
وأختچ برگبتي لحد ما أموت اتطمني ي بعد عمچ
درت وجهي عمة تباوعلي وتبچي ركضت حضنتها
- أحبچ عمة
والله العظيم أحبچ بگد مچنت أحب أمي الله يرحمها
نهاية.. والله يشهد ي طيبة
اني حبيتچ انتِ ورحمة بگد حبي لجهالي وأكثر
ولچ انتِ بنيتي لما جابتها بطني وتدرين الأم الاربي مو التجيب وبس
رفعت راسي من حضنها للزاوية
صالح وسعد وسمير واگفين سوة وعيونهم علية صح ما يبچون بس واضح لازمين روحهم بالگوة
هزيت راسي الهم
ابتسموا بـ أبتسامة خفيفة ودنگوا كلهم بنفس اللحظة
اخذ عمو محمود الغراض من عمة
لزمهن بـ أيد ولزمني بـ الأيد الثانية وطلعت ويا للمجهول
امشي واتلفت وراية
لا هم بعدوا نظرهم عني ولا اني
ليش ما ادري يمكن لأن هم ديحسون مثلي هذا وداع ما بعدة لقاء بعد
ظليت اباوعلهم لحد ما وصلنا للحديقة
فتح عمي الباب صار رجال چبير بالعمر گدامي باوعتلة بخوف
أصلع وسمين كلش حتى رگبة ما عندة
بس كل هذا يهون
مقابل عيونـة الجاحظة بوضوح بحيث حسيت شكلـة يشبه المجرمين
- لا ارادياً لزمت أيد عمي محمود عمو والله خايفة
- لتخافين حبيبتي
هسة راح اوصي عليچ وان شاء الله ميأذيچ
امشي وعيونة علي يباوعلي ويضحك
تسالم ويا عمي وراها ظل يوصي علية أكثر من دقيقة
أرشد.. طيبة بعيوني محمود لتخاف عليها
محمود.. ان شاء الله تكون گد كلمتك
أرشد.. گدها يمعود صدگ چذب
رزاق... يلا بابا روحي لرجلچ
هو حچاها لو فز كل الحقد والكره الـ بداخلي أتجاها
باوعتلة بنظرة كلها كره وأشمئزاز
أبتسم بوجهي بعدت نظري عنة لو بـ أيدي اكتلة هسة گدامهم واخلص من هيچ أب حقير
أرشد.. يلا طيبة تعالي وياية
سعد.. بلا انت متستحي
ماخذلك بنية طفلة بگد جهالك وانتَ رجلك بباب الگبر
أرشد.. هذا منو الديطول لسانة وياية !!!
رزاق.. عيب عمي لتحچي هيچ ويا رجل بت عمك
سمير.. العيب عليك وعلي مو على سعد
محمود.. كافي لغوة وخلوا هذا اليوم يخلص على خير
بس حچاها سحبني الرجال من أيد عمي
مشيت ويا بخطوات باردة
حاسة روحي رايحة للموت برجلية وما ادري بنفسي
يا ترى وين رايحة
وشنو من أيام تنتظرني ويا رجال بگد أبوية وبي شبه منه حتى بالشر الـ بشكلة
وصلنا لسيارتة
فتح باب الصدر وأشرلي أصعد
توني تقدمت أجاني صوت صالح صاح أحبچ طيبة !!!
درت وجهي مستغربة كلامة
أخر مره سمعت منه كلمة أحبچ او حبيبتي چانت بعمر التسع سنين
وراها حسيتة گام يتجنب مثل هالكلام وياية
ومرات چنت أزعل لأن اشوفة بدا يتغير
بس عمة چانت تقنعني لمن تگول انتم كبرتوا وعيب بعد يحچي وياچ بـ هالسوالف حتى حرام
احتجيت عليها بـ هالكلمات
بس هو يگول الصفاء حبيبتي وميستحي من هالشي
ردت علية صفاء أختة بس انتِ تظلين بت عمة وتحلين علي
التفتت على عمو والولد
كلهم عيونهم على صالح مستغربين كلامة مثلي وأكثر
أبتسمت ويا نفسي
يجوز حب يودعني بكلمة حلوة قبل لا نتفارگ
اشرتلة بـ أيدي مع السلامه وصعدت للسياره ع السريع
تحركنا مسافة وعيني ما انرفعت من عليهم
شوية واختفوا من انظاري
درت وجهي اباوع للطريق هدوء قاتل لا هو حچة شي ولا اني سألتة وين رايحين
بعدني أباوع من الجامة سمعت صوت الأغاني أرتفع
- ليش ساكتة طيبة شنو مستحية مني
- شوكت نوصل و وين رايحين احنة
- للبيت غير
- شو الطريق طويل كلش ليش وين عايش انتَ
- ههههههههه ببغداد وعيونچ
- لعد ليش طولنا هيچ
- هي بغداد چبيره بس الظاهر انتِ ممفترة بيها
صفنت على كلامة مستحية
صح وين طالعة اني من البيت للمدرسة ومن المدرسة للبيت هيچ مشت كل حياتي
وين يلا وصلنا
فتح الباب ونزلني باوعت ع البيت متعجبة
كلش چبير وحديث هم
من خلال سيارتة وبيتة والفلوس الدفعهن الأبوية عرفت بي متمكن وعايش بنص العز
- ليش صافنة يلا امشي ندخل
- هذا بيتك ؟!!
- لا مو بيتي بيتنا اثنيناتنا
شو هذا يحچي بـ أسلوب حلو !!!
معقولة هو حباب
لو هاي بس بالبداية وبعدين يبين على حقيقتة المرة
فتح الباب وبـ أيدة غراضي
دخل دخلت ورى
امشي واباوع للبيت أول شي ممر طويل بعدين صالة كلش چبيرة
چانت عيوني ع السگف مسوي بطريقة احترافية
نزلت راسي أكمل الأستطلاع
چان تصير گدامي مرة كبيره بالعمر گاعدة على الكرسي المتحرك بس شفتها نزلت دموعي تشبه بيبي حيل
التفتت للجانب
بنية بعمري وشاب گاعدين وياها أول مشافوني گاموا على حيلهم مستغربين
أرشد.. السلام عليكم
همام.. أرشد !!!
شديصير هنا ومنو هاي البنية الوياك
- وانتَ شكو ليش دتسأل ممكن افهم ؟!!
- بس لا.... !!!!!
لا أرشد لا لتگولها بروح أبوك لتگولها
- أي همام
هاي مرتي واليوم عقدت عليها الكم شي يمي ؟!!....
يتبع
لتنسووون ⭐⭐⭐⭐⭐⭐
كل الحب ❤🥀