اول سؤال سألته لأبويه بعدما نمت ورغم تعبي
كتله بابا:
ابويه اجه يمي .. كال ها باباتي:
كتله : بابا اني شجان بيه؟؟
والدي جر حسرة قويه وكلي اسمع بوية...
بيوم (6/5/2000) الساعه ب4 العصر بمنطقة "الحيانية" بالبصره
رحنه اني وامك للسوگ نجيب مسواگ للبيت ونرجع ، ف طلعنه من البيت وعفنه المفتاح عند ابو الاسواق اليمنه (ابو قيس*) كلناله حجي بس يرجع رحيم انطي المفتاح ، خاف يريد يرجع يدخل للبيت تعبان ودير بالك علي فدوه خاف نتأخر بالسوك إحنه.
ابو قيس كالي يمعوود لا توصيني احطه بعيوني تدللون روحو كملو شغلكم براحتكم رحيم مثل ابني ترا
و الجيران اهل مو بس بالأسم جيران!
..احنه شكرنه ابو قيس على كلامة الحلو ورحنه..
انت جنت تلعب وي صديقك المقرب (علاوي*) بالساحة مال طوبة واحنه مأمنين لان نعرفك تحب علاوي وهو هم سبع مايعوفك ..
علاوي صديقك يكول:
جنه كاعدين نلعب طوبه اني ورحيم واصدقائنه بالساحة، بالشوط الثاني رحيم جان حيل ضايج لان فريقنه خسر بهدفين وهو هواي يحب الطوبه ف شفته كلش مزاجه تعبان ومغثوث وضاج من اللعبه..
لمن خلصت اللعبه رحيم كال اني راح اروح للبيت اسبح واغسل ونطلع
-بس مبين من صوته حيل ضايج-
اني كلت ماعوفه ، لان ادري برحيم بسرعه يضوج ويبجي من نخسر دائماً
تركت رحيم يروح وحده للبيت وكلت اني اغسل بسرعه والحكه - لان احنه بيتنه قريب ع ساحة ما اتأخر هواي على ما اوصل لبيتنه وارجع لرحيم -
فـ غسلت بسرعة وطلعت امشي بسرعة لبيت رحيم بالي يمه ، دخلت بالفرع مال بيتهم تقربت على بيت رحيم
شفت ولد اثنين (ملثمين) طبكو بسيارتهم كبال بيت رحيم ودخلوا للبيت بطريقه غريبه!! بحيث طفرو السياج ودخلوا وشكلهم جان كلش يخووف!!
انصدمت ذول منو؟ وشعدهم داخلين لبيت رحيم؟
ضل جسمي كله يرجف وحرت شسووي !!
اصرخ ، ابجي ، اركض ماعرفت شتصرف ابد !!
رحت بسرعة اركض على اسواق ابو قيس القريب من بيت رحيم
كتله : حجي ابوو قيس الحگ ولد ملثمين يخوفون طفروا على بيت ابو رحيم ، يمكن حراميه ورحيم جوه بالبيت الحكله فدووه ماعرف شسوي اني ساعدني فدووه راح اموت..
ابو قيس انصدم وتخربطت احوالة بس صار سبع
اتصل بالتلفون بسرعة على المركز مال للشرطه الي بمنطقتنه وبلغهم انو اكو حالة خطف بالفرع مالتنه ونطاهم العنوان
اني بقيت اباوع على البيت من بعيد خاف يطلعون وجسمي كله يرجف وخفت لا يكتلون رحيم ويموتونه واشوف هل شي بعيوني ..
الدوريه جان كلش قريب مكانها على بيت رحيم بس تأخرت علينه ماعرف ليش؟
فجأة: شفتهم طلعو من البيت مخلين وصلة على وجه رحيم وشالو بسرعه وذبو بالسياره وره وطلعوا
اني كمت اصرخ حرااامية ياناس الحكوووا
وابو قيس يصييح هم بصوت عالي ، ياناس يا عالم الحكووووا ابن ابو رحيم انخطططف الحكووا اهل الغيره وينكم جيرانه الحكوا ، العالم كلها طلعت تركض ومرعوبة ، والسياره تمشي بسرعتها بالفرع...
بهل اثناء وصلت الدوريه مال شرطة ، كبل صعدنه بيها اني وابو قيس
وبقينه نمشي ورا السياره واني اصييح بسررعه عمو فدوه الحكوهم، السياره مال ملثمين جانت حيل سريعة ، بس الشرطه جانوا سباع ويسوقون بذكاء
دخلت السياره مالت الملثمين بشارع كلش ضيق وجانو يدخلون من فرع لفرع .
حاولو يشردون من ابو النجده بس الشرطه ما خلوهم ، وجانوا حيل مركزين ع الشارع ومانطوهم فرصة يشردون ابد ، حسيتهم (ذيابه مو شرطه والله)
سياقتهم جانت كلش عجيبة وينداون باللاسلكي ويسوقون بكل سرعه وذكاء، بحيث الشرطي السايق ركزت بي عينه ما رمشت ابد على طول ما يسوق...
فجأة واحد من الشرطه ،سحب اقسام بالمسدس وضل يضرب ع التاير مال سيارة الخاطفين رحيم ، ف انفجر التاير مالتهم وهم يمشون والسياره مالتهم جانت حيل سريعة ، السايق مالتهم ما سيطر ع السياره وضربها بالحايط بكل سرعته وسوه حادث جبير و وكفت سيارتهم.
واحد من الملثمين والي هو جان السايق مات بمكانه من قوة الضربة ، ورحيم والولد الثاني انترسوا دم بس بعدهم يتنفسون ..
اجت الشرطه وكفت فوك سيارتهم ، وخابروا الاسعاف اخذو رحيم للمستشفى والبقيه هم ، اني شبگت ابو قيس وكمنه نبجي اثنينه لان كدرنه نخلص رحيم من هل مجرمين ، بس خايفين من الحادث حيل لان جان كلش قوي وخفنه نخسر رحيم
ابو قيس راح وياهم للمستشفى القريبه من منطقتنه وكلي :
عمو علاوي انت ارجع لبيت ابو رحيم بلغهم بمكان المستشفى وكلهم ع الي صار اكيد هسه ضال بالهم لان تعرف اهل رحيم ماعدهم بس هو ، وحيل متعلقين بي ويحبونه..
رجعت اني اركض ، صرت قريب من الفرع مال بيت رحيم
شفت الناس تارسه الشارع، والجيران كلهم ملتمين
تقدمت واني ارجف من الخوف والتوتر والقلق، وافكر شنو هسه صاير بأهل رحيم وشلون راح احجي وياهم..
شفت ام رحيم بمنظر يبچي مايروح من بالي
جانت ام رحيم طايحه بالكاع والمسواك مطشر وتصرخ وتدك على راسها حيل
وتصييح (يمه وليدي وينك ، وينك ياهو اخذك مني ، كووون اموت ولا يصير بيك شي رحووووومي يمه) وتصرخ يبووي بصووت عالي وتدك على وجهه
وابو رحيم جان منهار ويبجي وحاير شيسوي يهدأ ام رحيم لو يلطم مثلها، كاعد يم ام رحيم وكامشها ويبجي هم ...
لمن انتبهو ولد المنطقه انو اني اجيت ، صاحووا اجه علاوي اجه علاوي
اجت ام رحيم وزوجها يبجون ويركضون عليه ويصيحوون ولك بشر علاوي فدوه رحيم وين منو خطفه احجي ابوس ايدك احجي وين ابنه!
اني كمت ابجي وارجف وامتمت بالكلام
كوه كدرت اكول الهم: لاتخافون الحمدلله الشرطه كدرت توكف سيارة الخطفوا رحيم...!
ام رحيم انغمة عليها من الفرحه
والمنطقه كلها صاحت : يااالله وفرحووا حيل واغلبهم جانت تكول (يا الله الحمدلله ربي)
وابو رحيم جان يبجي ويصيح : جيبوا ماي اذبه على ام رحيم راح تموت الحكووني بسرعة
ذب ماي على وجه ام رحيم
كعدت ام رحيم وفزت بعدما أغمى عليها
ابو رحيم سألني كلي علاوي: لعد وينه ابني ليش ما اجه وياك ؟
كتله : عمو صار حادث من لحكوهم الشرطة ورحيم هسه بالمستشفى
ام رحيم مالحكت حتى ترفع عبايتها وتروح للمستشفى حتى تطمأن على ابنها و واحد من الجيران
تبرع كال اني اخذكم بسيارتي واخذهم وراح بسرعه..
رحيم بهل اثناء جان صافن ونايم ع الجربايه ويسمع القصه بتركيز من والده
كله بابا : زين اني ليش ما ادري بهذا كله لمن صار وما اتذكره؟؟!
ابو رحيم كله: لان جانوا مخلين قطعه قماش بيها مادة مخدرة على وجهك
بدون متنتبه خلوها على وجهك (ولمن طحت) شالوك واخذوك للسيارة .
رحيم: زين بابا ذول ليش خطفوني شنو جانوا يردون مني؟
ابو رحيم: بابا ولد الحرام هواي ، وهذول ناس تربية شارع يشربون مخدرات ويسكرون ويسوون كلشي موزين
الشرطه لمن حققت وي الشخص البقه عايش منهم ، اعترف انو هم جانو ناويين يعتدون عليك (ويغتصبونك!!!!!!)
رحيم : شنو يعني يغتصبوني يعني جانو رايدين يموتوني قصدك؟
ابو رحيم بحسرة : اي بابا اي .. (يموتونك بس وانت عدل!!)
رحيم: زين بابا شنو صار بعدين بالمستشفى من رحتوا ؟
ابو رحيم: صعدنه اني وامك بالسياره واول ما وصلنه للمستشفى ، امك جانت تدور عليك وتصرخ
دخلنه كبل عرفو انو احنه اهل الولد المخطوف لان جانت الشرطه تنتظرنه..
الدكتور طلع من عندك وي دخولنه، رحنه سألنه الدكتور
الدكتور كال: رحيم حالته كلش خطرة ، وتعرض لإرتجاج بالمخ وفطر بالجمجمة ، حالياً هو فاقد للوعي وداخل بغيبوبة ، نتمنى يرجع لوعية، لان اذا بقه هيج ، احتمال نفقدة!
امك بقت تبجي وتصرخ وتدك على راسها بالمستشفى
وانت بقيت اسبوع كامل فاقد للوعي ، بحيث الدكتور كال اعتبروا رحيم ميت سريرياً
بس اني وامك .. بقينة مؤمنين بأنو ربنا اعطف وأرحم على عبادة من كل موقف مؤذي، وجان عدنا ايمان عالي بـ انه الله جاي يختبرنا بهل مصيبة واكيد راح نتجاوزها..
رحنه اني وامك لكربلاء بنية صادقة للزياره
وزرنه وبجينه هواي بالامام الحسين ع واخيه العباس ع
وجنه نكله بجاهك عند الله، ساعد ابنه يكوم بسلامة وصلينه ركعتين لوجه الله هناك ورجعنه للبصره بنفس اليوم
جبنه ويانه "علگ اخضر*" مسحنه بي وجهك وانت بالفراش وامك جانت تبجي وتمسح بوجهك
الدكتور اجه باليوم السادس كال اذا باجر رحيم ما فز من الغيبوبة معناها كلش خطره حالته وما تبشر بخير ابد.
ثاني يوم احنه ما نمنه ابد بس نريدك تصحة ، وجنه كلش خايفين عليك
الليل كله ندعي ونبجي الى أن نمنه اثنينه بدون ما نحس
وانت فزيت بوقتها وحيل فرحنه بيك..
المنطقه كلها يا بابه تحبك ، وهسه تشوف كلها راح تجي تزورك وتطمأن على صحتك ، صح احنه مرينه بظروف صعبه ، بس حب الناس النه هواي فرحنه ، ودعائهم النه ساعدنه نطلع من هل محنه ، لان احنة
زرعنه طيب بهذا المكان .. والي يزرع طيب يابابا يحصد طيب
موقف الجيران جان عبالك اهل ، الجار اذا ردت تعتبرة جار ، لازم من تصير بيك شده، تلكاه هو اول واحد يمك، لان هو اقرب الناس الك .. والحمدلله جورتنا رفعوا راسنا...
فـ اوصيك يابابا خاف تكبر ، دير بالك تأذي جيرانك ودير بالك عليهم مثل متدير بالك على اهلك
رحيم بهدوء كال لابو: الحمدلله بابا وانشالله خير وغفة ونام من التعب.
-
فترة نمو رحيم بدت من هذا الموقف، وجان هذا الحادث الي تعرضلة ، كأنما رسالة مشفرة لعقله بعنوان (الحياة راح تصدمك هواي!)
ومن عدها رحيم بدة يحس بصعوبة الحياة وجان دائماً يسئل امة : شنو اصعب شي بالحياة؟
جانت ام رحيم دائماً تكول لرحيم: ابني الحياة راح تشوف بيها كلشي قاسي وما متخيله يصير ، توقع بلحظة يروح منك اكثر شي تحبه ، تخسر كلشي ما تتوقع تخسره، تنتقل حياتك لواقع ما متخيل يصير فد يوم، وتعيش ايام ما جنت متخيل تعيشها ، بس خليك قوي، دائماً خليك قوي لان الحياة ما يستحقها بس الناس الأقوياء ، الجبناء ما راح يكدرون يعيشون بهذي الدنيا ، الدنيا هذي خُلقت للأقوياء الي يواجهون مشاكلهم بـ عقل وصبر وأمل مو للي يتشردون من واقعهم ..
كدرت ام رحيم تزرع الشجاعة والقوه بشخصية رحيم وتخلي عنده امل جبير
اما ابو رحيم فـ علم رحيم شنو معنى انك تكون مخلص، ونطاه درس بالرجوله
يكول رحيم : امي وابوية جانواً حرفياً بمثابة خيمة فوگ راسي ، بحيث صدك حتى من تمطر جنت اروح اشرد بحضنهم.
ابو رحيم جان كلش هواي يحب يكتب إقتباسات ويخليها بغرفتة
يكول رحيم لمن جنن افوت لغرفة ابويه اول عبارة تصير كبالي
"الشيئ الوحيد اللذي يستحق أن نخاف منه، هو الخوف نفسه"
والعبارة الثانيه
كانت مقولة للإمام علي ع
"لا تخافوا الموت فمرارته في خوفه"
والثالثة جانت
"شيئان يُحددان من أنت ؟
صبرك حينما لا تملك كل شيئ
واخلاقك حينما تمتلك كل شيئ"
وهواي اقتباسات حلوه
هذا شكل العائله الي تربه بيها رحيم
عائلة ، شجاعة ، نقية ، قوية ، ومؤمنة ومثقفة وحنونة حيل ...
رحيم بقه يكمل دراسته وسط هل عائلة الحنونه
وبعد ما فاتت ايام سقوط بغداد سنه 2003 العصيبة
واحداث الكوارث الطائفية بالعراق ب2006
الى أن صار بصف سادس علمي بسنة 2008 بعد ما فاتت سنه من عمرة بسبب الحادث والاوضاع
جان حلم رحيم يصير "دكتور" مثل ما رادت والدته وابو.. وبالفعل اهلة وفروا كلشي لرحيم، احسن اكل واحسن ملابس وكلشي يحتاجة من مستلزمات دراسية حتى يحقق حلمة ، و رحيم جان يدرس بقوة وبواهس حتى يحقق حلمة وحلم والدته ويفرح اهله الي تعبوا علي ويرفع راسهم ويجازيهم على تعبهم بكل السنين..
جان رحيم يكول: الشهادة الجامعية الي ياخذها أي إنسان ، احسها مو منصفة .. لان جان لازم ينكتب بيها
(بـ تعب امك وابوك عليك ... حصلت على هذي النتيجة)
تقديراً لتعب الأهل وحرصهم..
المهم: استمر رحيم بالدراسه وقرب موعد إمتحانات نهاية السنة وقربت ايام تحقيق حلمة
الساعة ب1:00ص من يوم 1/5/2008
اقتربت مواعيد امتحانات نهاية السنه لرحيم
وجان كلش عنده واهس يمتحن حتى يفرح اهله بأسرع وقت
يكول رحيم جنت دائماً من انام احلم.. أرجع بيدي الشهاده وادخل اركض من الباب وأكول لإمي وابوي
افرحووو صار ابنكم دكتوورررررر واشبكهم حيييل!
لكن الي جان عايش بسنه 2008 بالبصره يعرف شكد جانت هل ايام كلش قاسية على اهلها ...
بهذي السنه جانت اكو معركة بالبصره وقتال بإسم "صولة الفرسان* " بدأ بيوم 28/3/2008
واهل البصره يتذكرون هذي المعركة كلش زين .. ويعرفون شكد جانت شرسة وقويه..
جانت المعركة بين ابناء حزب معين والقوات الحكومية
بيت رحيم جان بمنطقة "الحيانية" الي مليانة اشخاص من الحزب الفلاني بالبصره وهذا الشي كلها تعرفه بالبصره...
وجان بيتهم أساساً مناصف وي بيت قيادي جبير في الحزب المعارض بذاك الوقت
يكول رحيم اني جنت نايم وسمعت رمي بصوت عالي كعدني من النوم
والجام مال بيتنه تكسر والرمي چان كأنما يطلع من سطح بيتنه ، والرد على الرمي هم جان مباشر ، على بيتنة
اني فزيت مرعوب ، و كـ العادة رحت اركض لغرفة اهلي لان حيل جان الصوت مرعب وردت اكون يمهم حتى احس بالأمان
دخلت لغرفة اهلي ، لكيت جام الغرفه مكسر
وابوي وامي متغطين ونايمين والضوه طافي
ركضت عليهم صرت بنصهم اريد اشبكهم
كلتلهم اكعددووو يمعوودين متسمعون صوت الرمي هي مال نووم..؟
بس محد رد عليه!
حضنت امي حيل اشو ما حضنتني مثل كل مره!!
تعجبت معقولة امي احضنها وتعوفني؟؟!!!
فززت ابويه ما يرد عليه؟
ضليييت اصرررخ بويه اكعدوووا اكعدووا
محد بيهم يرد ؟
رحت اركض للضوه فتحته لان جانت الغرفه حيل ضلمة
بس اشتغل الضوه..
باوعت للدكمة لكيتها كلها دم !!
باوعت لأيدي لكيتها متروسه دم !!
درت على اهلي واني ارجف وخايف واباوع بخوف
شفتهم متمددين واكو ........؟
يتبع
شنو تتوقعون صار بعائلة رحيم؟
————————————-
معلومة:حادث الاغتصاب حقيقية في منطقة الحيانية
معلومة: حادثة السياره والشرطة حقيقية كذلك
*علاوي : دلع لأسم علي: وفي القصه هو الصديق الأقرب لرحيم.
*علك أخضر: قطعة قماش باللون الأخضر ، يقوم الزائر بمسح شبابيك الأمام المقدس لديهم ثم يهدوها لشخص معين ، كأنها تحمل رائحة وبركات ذلك المكان.
*صولة الفرسان
معركة حدثت في 28/3/2008 في محافظة البصره، بقيادة نوري المالكي ، وامتدت الى باقي المحافظات بعد ذلك، وراح ضحيتها المئات من اهالي العراق، وكانت تهدف الى فرض القانون.