افكار مراهق

عايز أرتبط !!

- انا : هو انا مش هرتبط بقا ؟!😢

-انا برضه :اسكت ياض ، انت عارف انك مش جاهز و معملتش اللي تستحق عليه لقب "راجل" لسه لخطوة زي دي

- انت عارف اني اكتر ذكر في العالم يقدر يشيل مسؤولية و بالتالي انا راجل ، صحيح مأثبتش كده عمليًا لسه بس المسؤولية الوحيدة اللي شلتها و هي الدراسة ، نجحت فيها بجدارة ، و هشيل مسؤولية بنت عادي يعني مش حوار ، انا قلتلك ان انا مش راجل بس عشان مبقاش زي الجهلة ، تلاقي السرسجي من دول ماشي عمال يقول قصايد في نفسه و رجولته و وقت الجد متلاقيش حد ، عشان كده بس قلت اني مش راجل لأني عايز أثبت ده عمليًا الاول ، زي ما كانت حكمة سقراط في الإعتراف بجهله، انا حكمتي في الإعتراف بعدم إثبات رجولتي ، "رحم الله إمرء عرف قدر نفسه" ، و انت عارف اني هعمل اي حاجة عشان استحق اللقب ده  ،
هو اصلا محدش معجب بيا عشان مش حليوة زي المغنيين و الممثلين

- طب خد مني القلمين دول بقا ، انت ياض مش كنت بتقول ان دي حاجة كويسة انك مش جميل شكلا و إن ده هيخلي البنات تعجب بيك او متعجبش بنائًا عالشخصية مش الشكل ، مش ده اللي انت عاوزه ؟

-تمام صح ، بس برضه محتاج حد يبينلي انه معجب بييا و ابينله اني معجب بيه و كده

- لا حول ولا قوة إلا بالله ، ولاه انت هتجنني ، هيتنييلوا بيك ازاااي لو انت اصلا معرفتهمش انت مين و كل اللي يعرفوك ميكملوش عشرة و انت اساسا مش باصصلهم بالطريقة دي و هما كمان  ،و بعدين خد هنا ، يعني لما واحدة تعجب بيك ايه اللي هيتغيير يعني ، هتفضل انت نفس الشخص و بعدين هي مين دي اصلا اللي تحكم عليك ، و بعدين لو كل البنات اللي في الدنيا عرفوك و مفيش ولا واحدة اُعجبت بيك فطز فيهم ، أنت هو أنت ، لو عجبتهم اهلا وسهلا لو معجبتهمش ، مع ألف سلامة ، مش هتغيرني (نفسك) للأسوأ عشان حد ......أي حد

- طب ليه حاسس بالشعور ده ، ليه عايز ارتبط بحد ؟!!! ليه مقاومة الشعور ده صعبة ؟!! ، ليه بكراش على بنت و انا عارف ان فرصتي عشان ابقى معاها لطول العمر صعبة جدا !!!

-انت مش لوحدك و انت عارف كده كويس ، سنك سن المراهقه ، سِن خنزير ، علييا الطلاق بالتلاتة خنزير ابن خنازير ، لازم في الفترة دي تحس بكل المشاعر دي ، دي مجرد محاولة من جنسك لحفظ نوعه ، و انت بتدفع تمن كونك متحضر بده ، زمان كان طبيعي جدا تتجوز و انت اقل من ١٤ سنة حتى ، بالرغم من كل العيوب لده بس كانت كل المشاعر دي مش بتيجي للناس اللي بتتجوز في السن ده ، كانوا بيرتاحوا من البداية و بيلاقوا حد يشاركوا مشاعرهم معاه ، حد يسندوه لما يقع ، و يحضنهم لما يتكسروا ، و يبقوا معاه عالحلوة و المرة ، انت مش عندك ده وانا (اللي هو انت ) عارف كل ده كويس ، فمتستعبطش علييا :)

- طب هو ممكن طييب لو عرفت اكلم الكراش اني ارتبط بيها و لا هتحسسني بالذنب زي كل مرة ؟

- اولا انا مبحسسكش بالذنب إلا على حاجة غلط ، انا واثق فيك ، بالرغم من انك بتغلط كتير بس عندك خطوط حمرا ، متأكد انك هتعامل البنت دي زي ما تحب ان أختك تتعامل ، و انك مش هتعمل حاجة غلط ، بس انا خايف ، خايف البنت دي تاخدك مني ، خايف تخليك متسمعش كلامي ولا تقبل نصيحتي ، خايف تخليك تتجاهل معاقبتي ليك على اي غلطة بتعملها ، مش بس كدا ، خايف عليك انت كمان ، خايف تكسر قلبك ، او تكون مش مناسبة بالنسبالك فتسيبها انت و تكسر قلبها من غير ما يكون ليها ذنب ، خايف يبقى نفسك تتجوزها بهبل و اول ما تتجوزها تحس ان الوضع مش زي ما انت كنت متخييل فتكرهها ، بعدين افرض سافرت برا لأي سبب ، هل هتسيبها وراك ولا هتشيل مسئولية في طريق انت متعلمتش تمشي فيه لسه عشان يشيلوك حمولة مهمة ، خايف تأذيك او تأذيها في دينك او دينها ، خايف تخسرك مبادئك او تخليك تضحك على نفسك ، هتضحك علييا يا خالد ؟!!!

- كل اللي انت قلته مش هيحصل ان شاءالله ، و بعدين انت ليه بتفترض الأسوء ، ممكن تطلع ملتزمة و محترمة جدا ، و تقربك مني و تقربني من ديني اكتر مثلا ، او تزوود التزامي بمبادئي ، او بالأحرى متبوظش التزامي بمبادئي لإنها مش هتعرف تزودها اكتر من كده ، و البركة فيك طبعا :) ، و بعدين زي ما انت قلت ، انا هعاملها زي ما احب أن اختي تتعامل ، غير كده انا مش هقولها بحبك و الكلام العاطفي بحت ده ، اوكي ، ممكن بس مش خبط لزق كده ، مش هعمل كده إلا لما اتأكد ١٠٠٪ انها مناسبة لييا و اني مناسب ليها  و اعرف شخصيتها و التزامها و مبادئها و لو حبيتها هخطبها ، في البداية هقولها اني انا محايد من ناحيتها و اني هبقى راجل مش كويس لو قلتلها "بحبك" بس لمجرد ان شكلها حلو ، بس اني في نفس الوقت معحب بيها ، صدقني مش هكسرها ، مش هعلقها بييا و خلاص عشان اتسلى ، هحافظ عليها زي ما تكون ورقة ، هتبقى بالنسبالي شيك بنكي ميتقدرش بفلوس الدنيا كلها ، ورقة خفيفة ، صغييرة, بتتقطع بسهولة بس متتقدرش بتمن ، فدايمًا هاخد بالي منها و هسقيها من الاهتمام بحر .

-لا يا راجل , طب هي هتوافق لما تقولها : اهلا ، انا خالد وليد , مبحبكيش بس معجب بيكي ويلا عرفيني اكتر عنك عشان احبك ؟   ، انت عبيط يبني ، هتبلع بلوك و كرامتك هتتجرح و انت عارفني ، لو ده حصل هدوس عليك اكتر عشان متكررهاش تاني ، انا مبرحمش !!

- لا مش كده ، بس انا متأكد أن هي كمان هتستجيب لو عبرت عن مشاعري بأدب ، لإن ببساطة هي في نفس عمري و بتمر بنفس المرحلة ، البنات في السن ده بيبقوا محتاجين حد يقولهم كلمة حلوة ، اي كلمة حلوة من اي حد ، محتاجين انهم يحسوا ان فيه حد مهتم بيهم ، البنت بتفترض انها طالما حد عاكسها يبقى هي حلوة كفاية عشان تتعاكس و ده بيرفع معنوياتها ، و متفهمنيش غلط ، انا مش بشجع عالمعاكسة و مش بقول ان البنت بتحب اللي بيعاكسها ، بالعكس هتديلو بالقلم عشان يحترم نفسوا لإن هو إنسان زبالة ، بس من جواها بتبقى مبسوطة  ، و لو انا استخدمت نفس المبدأ ، هي كمان هتتبسط انها كانت جميلة كفاية عشان تخليني اُعجب بيها ، مع الفرق اني مش بعاكس و بتكلم  بأدب و إحترام ، ناهيك عن الكاريزما

- لا يا اخويا ، هجيبلك طشط عشان الكاريزما اللي بتقع منك دي متروحش عالأرض ⁦ಠ︵ಠ⁩ ، طب و لو قالتلك "لا" ، منظرك قدامي هيبقى عامل ازاي ، هتعرف تبص في عيني يا خالد ؟

- عامتًا ، لو قالتلي "لا" هحارب عشانها حبتين حلوين  ، بس لو مصرة عالرفض هحترم قرارها و هعتذر لإزعاجها و هنسحب في هدوء ، بس ده لو رفضتي بإحترام و ادب ،اما لو رفضتني بأسلوب يحسسني اني مش محترم او بعاكس .......هعتذر برضه و همشي لإني هبقى نوعا ما الغلطان بس اعتقد حاجة فيا هتتكسر ، انا بحب كرامتي ، بس متقلقش ، هي لو رفضتني هترفضني بأدب ، عشان انا هكلمها بأدب ،
"هَلْ جَزَاءُ الإحْسَانِ إِلا الإحْسَانُ"
و بعدين خلي بالك ، حتى لو انا اترفضت ، فمش هبقى حاسس اني اترفضت عشان وحش ، لإنها معلش يعني مش هتلاقي عريس احسن مني :) ، بس هفهم ان رفضها لييا عشان انا مش مناسب ليها او هي مش عايزة ترتبط بحد حاليا .

-بدأنا غرور بقا !!!!!

- خلاص آسف ، مش قصدي يعني ، بس انا هعامل حبيبيتي كأميرة ، لو هي مش عايزة تبقى اميرتي ، خلاص براحتها ، ربنا يكرمها بحد يكون مناسب ليها و يحبها في المستقبل ، و بعدين لو رفضتني بأدب ، هزعل على نفسي بس هبقى مبسوط عشانها ، اكيد هي هتفرح لما تعرف ان حد بيكراش عليها و معجب بيها ، حتى لو رفضته ، و ربنا يكرمني ببنت تانية تحبني و ب ولد تاني يحبها ،

- من امتى ياض و انت حكيم كده ، مش دايما ببقى انا الحكيم و انت العبيط

-مش عارف :) ، بس عموما ، حابب اسألك سؤال ، تتوقع ان حد بيكراش عليك حاليا ولا لا ؟

- لا طبعا ، بص .......عشان حد يكراش عليك هتحتاج تبقى حاجة من الاتنين , يا اما تبقى sexy و ده هيخليهم يحبوا جسمك مش يحبوك انت ، او تبقى وسيم اوفر يعني و هنا هيحبوك عشان وشك برضه مش عشانك يعني  ، و انت ولا عندك ده ولا عندك ده

-متشكر عالمعنويات الصراحة

- يا اهبل يا عبيط انت ، دي حاجة مش وحشة ، كده لما حد يحبك يبقى بيحبك بجد ، +ان مش لازم شكلك بس اللي يخليهم يكراشوا يعني ، ممكن ادبك و تفوقك اللي بيظهروا في كل مكان ، غير كده  ، ممكن فعلا يكون فيه حد بيكراش عليك و انت مش واخد بالك ، عادي يعني ، زي ما الكراش بتاعتك مش واخدة بالها ، انت مش واخد بالك من اللي بتكراش عليك ، فمتهتمش كتير ، ركز في دراستك و علمك اللي برا الدراسة ، و اشتغل على نفسك ، و بكرا تلاقي الف مين يكراش عليك .

-عارف .........
بالرغم اني بكرهك عشان بتبهدلني كل مرة بغلط فيها بس برضه بحبك ، انت بتمنعني عن كل غلط

- انا هو انت يا خالد و انا و انت عارفين انك مخترعني في دماغك و بتتكلم معايا و بتحكيلي من سنين ، مش هاجي دلوقتي و اتخلى عنك ، هديك بالجزمة كل ما تغلط   و هقول فيك اشعار لما تعمل حاجة صح , انا ضميرك و صاحبك و اخوك و حبيبك و خصمك اللي بتحاول كل يوم تغلبه عالطول و مش عارف ولا هتعرف ، انا اللي هقف جنبك لما حد يكسرك و افكرك بمين انت او الومك عشان كنت انت السبب ، و انا اللي هنفخك لما تغلط عشان ده ميليقش بيك ، انا بخاف عليك اقل من امك بس اكتر مني انا نفسي ، انا مش موجود في الحقيقة ، بس انا اكتر من مجرد وهم في خيالك .......
انا مجرد من المشاعر ، مجرد من الأخطاء ، انت صنعتني عشان ابقى نسخة مثالية منك ، موجودة جواك ، بتصحح طريقك ، بتضغط عليك عشان توصلها ، انا هو  تخييل ليك لنفسك في احسن صورة، انا دايمًا هقولك عالصح ، انا دايمًا هبقى جنبك .