اسألي عني الليالي

البارت ٢٠

الـبـارت الـعـشـرون..............

ثاني يوم العصر بدلت واجه خطيب حلا أخذها..ماگالت لخالة حنروح للمستشفى..انه نص الطريق وتراجعت.. خفت اشوف ابوي هناك لو واحد من عمامي..تعبت من التفكير آخر شي شفت روحي بباب المستشفى ومهند داير وجهه علي..
مهند : يله خوية تنزلين واحنا هنا ننتظرج..

دنوة : لا عفية اخاف..خلوني وياكم لمن تريدون ترجعون رجعوني.. مااطب للمستشفى ..
حلا : حبي شنو السالفة..چا ليش خليتينا نجي لهنا..
دنوة : ماادري..
حلا : شوفي روحي نزلي..وهسه وكت صلاة فمااعتقد عمامچ موجودين..دخلي شوفي وتعاي.. هاچ هذا تلفوني خابريني على رقم مهند لمن تطلعين..
دنوة : ها هيج تگولين..
حلا : اي هيج اشوف..
انطتني تلفونها..خليته بالجنطة ونزلت..

كلشي بيه يرجف..خايفة من هواي شغلات.. خفت اشوف ام رائد وترزلني على موقفي اليفشل.. لو اشوف ابوي ويكتلني ماعنده مانع.. من بين ضجة الأفكار انتبهت لروحي داامشي بالصالة الچبيرة مالت المستشفى والاستعلامات جدامي.. تمشيت حاچيت البنية الواگفة..
دنوة : عيني بس غرفة رائد حامد..
- : ماتعرفين رقمها..
دنوة : لا ..
- : شتصيرين منه..منكدر نفوت أي شخص..
دنوة : خطيبته اصير..لازم اشوفه حبابة..
طلعت من مكانها وتمشت جدامي..مشيت وياها لحدما وصلنا لغرفة..اندارتلي وأشرت : هنا..تفضلي..

تشكرت منها..عافتني وراحت..منو يمه هسه.. شسويت بروحي ليش اجيت..ضليت استغفر وألف آية قرآنية على لساني.. فتحت الباب على كيف واشوف ام رائد فارشة مصلاية دتصلي .. محد اكو بس هي..تفاجئت وبنفس الوكت حمدت ربي چي ماكو أحد..هي لمن شافتني گطعت صلاتها وتستغفر.. سديت الباب ووگفت وراها ..
گامت : يمة شجابج..ابوج وين..ويامن اجيتي..
ماجاوبتها..تقربت عليها شبگتها وبچيت : خالة سامحيني.. ماچنت ادري حيصيرله هيج..

سكتت بس اسمع صوت بچيها وشهگاتها..وخرت عنها امسح دموعها.. : شلونج خالة حبيبتي..اسفة سامحيني..
ام رائد : شلوني وحال وليدي هيج..هيج يمة ماغزرت بيج زينات رائد..رأسا قبلتي وطاوعتي ابوج..
عاينتلها ودموعي تصب..غلطت اي..بس اكو شي بداخلي يگلي انتي مامسؤولة عن الغلط هذا..لأن اكو سلطة اكبر منج فرضت رأيها وجبروتها عليج..

ضلت تبچي وتحاچيني..سولفتلها شلون اجيت وشصار بيه هالفترة..
دنوة : خالة عمو وين..بس انتي هنا..
ام رائد : لا چان موجود بس راح للبيت كال ينام ساعتين هيج ويجي..
دنوة : زين خالة انتي كملي صلاتج انه مااتأخر والله بس اگعد يمه شوي خالة احبه مااحب غيره وداعته..بس ابوي..
عاينتلي بنظرة مكسورة..مثل فوات الأوان.. راحت تصلي..

انداريتله وعيوني تتفحص نومته..نايم بهدوء .. ملامحه قاسية حتى بنومه..حواجبه عيونه رسمة شفايفه كل وحدة منهن احسها تعاتبني..تصدح بكلام مكتوم..تسرد مشاعر خيبة ظن وسوء فهم وحب..تضاد واضطراب بالمشاعر تأدي لاضطراب بنبضات القلب..مو مرض ملموس ولا مكتوب عنه.. مرض مايحس بي بس العنده شي اسمه ضمير..يأنبه على افعاله الموزينة..ضميري ديأنبني ويجرحني..شلون اشوف حبيبي داخل بغيبوبة من وراي..

اكو كرسي يم السدية..تمشيت گعدت علي..عيوني راحت على ايده اشوفه لابس الحلقة مانازعها..طگيت بچي.. اخذت ايده وتقربت منه خليتها على خدي وابچي بحرگة وخوف..
مااكدر احچي بس بداخلي هواي كلام : حبيبي اسفة.. سامحني فدوه اروحلك..حبيبي خايفة عليك والله ماانام الا اصليلك وادعيلك تگوم بصحة وعافية..سويت كلشي علمودي وانه تنازلت عنك..ادري صعبة عليك بس والله هي همات صعبة علي ومتأذية بسببها..

ايده باردة بس راحتها دافية..تذكرته لمن يمسح دموعي ويبوس خدي گبل لا انزل للمدرسة..شكد اگول احبه..بس ماثبتت حبي بس بالكلام..ماگدرت اسوي شي يثبت..
گمت تقربت منه بسته من خده..ادري حرام..ولو هو گاعد مايقبل اتقربله هيج..
چا گلي : باباتي روحي لاتتقربيلي انه رجال واغلط.. سبحانه المايغلط خليني گاعد..
بچيت على كلشي صار بيناتنا من سنة ٢٠٠٣ لحد هاي السنة .. سنتين احبه وهو خمس سنين وي هالسنتين سبعة وبعده صابر علي..ياربي دخيلك والله تسرعت وطاوعت ابوي بس احبه مااگدر بدونه..

ابتعد عنه چان تنفتح الباب..وكفت جامدة بمكاني.. عمي حامد فات..لمن شافني عيونه نطت من مكانها..
اجه يمي بالعجل خزرني ويحچي من بين اسنانه بعصبية : شعندج..بس گليلي شعندج..امشي طلعي لج بهذلتي ابني.. خليتي مثل الأعمى يمشي وراج..
دنوة : عمو والله .....
قاطعني : بت محيي بعد..اذا هو الله مايجرعه چا انتي شونج هسه..تعرفين رائد شنو وشدارس وشمسوي..انتي ماتوصليله.. ابوج نفسه اجاوز علي لحدما الله گال بس.. بس چي هو صاحب مبدأ ماقبل يسويله شي..ابوج حتى كتله.. شوفي عينه شلون مورمة..عوفي خليرتاح الله ينطيج العافية..
كلامه جرحني..طعن بصدري بكل قوته..مارحمني ابد.. بكل حقد وكره حاچاني ويحاول بكل الطرق يبين التفاوت بيني وبين رائد..من ناحية الدراسة والثقافة وحتى التربية.. ديگلي انه ربيت ابني تربية تخلي يصبر ويتحمل وانتي من كلمة تنازلتي عنه ونكرتي..

بچيت من حچيه مااعرف اجاوبه..بس ابچي ومنصية راسي .. اجت خالة كمشته من چتفه تهدي..
ام رائد : عيني حامد فدوه اروحلك خطية البت لاتسوي بيها هيج.. ماتعرف محيي اذا راد يسوي شي يسوي..هي همات خطية..
حامد : لا موخطية..طلعي وروحي ويامن اجيتي..يله ولي لايجي واحد من عمامج حسباله شاردة..هو وليدي ورايح مايدري بالدنيا..عليمن جاية..

اجت يمي تمسح دموعي وتستغفر..اخذتني على صفحة اكو مغسلة غسلت وجهي ونشفته..ماگدرت اعاين بوجه عمي.. فشلت وكرامتي انحطت بأسفل السافلين..طلعت بالعجل خابرت على حلا كالت بالباب انه..طلعت وصعدت وياهم كلشي ماحچيت ساكتة..سألتني شلونه رائد گتلها ماكو شي.. بعده بالغيبوبة.. هو طلعها وضل يفرفر بيها ..لحد المغرب بحدود السبعة ونص رجعنا..

ضليت ببيت خالتي تلث ايام..بس گاعدة مالي واهس احجي حتى.. باليوم الرابع اجه ابوي رجعني ..تفاجئت بي شلون ملامحه راخية حتى ماخزرني..خفت يكون هدوء ماقبل العاصفة.. گبل لا انزل اندارلي..
محيي : فوتي لغرفتج البنات ينتظرنج..
دنوة : يابنات..
محيي : بنات عمج..عقيل حيجي يعقد عليج..بدون هوسة اسبوع وتعقدون محكمة..شني كل يوم الله بالخير..
عاينتله بقهر..فوگاها..ماتحمليت طگيت بوجهه : ليش بابا.. حتى هاي هيج عزيتها علي..مااحب عقيل مااريده.. تحرش بيه لمن عزمونا..

عيونه صارت بگصته..ضربني راشدي قوي وعاط : تعرفين شدتكولين.. بگد القندرة وهيج تتبلين ..اكو وحدة تروح لبيت ناس وتگول ابنهم يتحارش بيه..امشي نزلي خلصيني مااريدنج تبقين يمي..
دموعي نزلت وتذكرت كلامي بذاك اليوم..عرفت حيگلي هيج.. مايصدكني..خصوصا بهيج وكت هسه يكول تريد تخلص منه فگالت هيج..هو شخط السيارة وطلع..طبيت سلمت عليهم ورحت للغرفة..لكيت سرور گاعدة دترتب بالچرباية ونوارة تمسح.. اجيت يمها ندهتها..
اندارتلي : ها ولج اجيتي..
شبگتها حيل وابچي بحرگة : سرور شفت رائد بالمستشفى..
بعدتني عنها وكامشتني من چتافي بخوف : چذابة.. شدتحجين ولج..شوداج يمعزاية..

كعدت بالگع بعد مابيه حيل اوكف..گلبي انشلع من البچي والحسرة الصرت بيها.. سولفتلها شلون رحت وكلام عمو حامد .. ضلت يمي تواسيني بس مايفيد الحچي..
سرور : حبيبتي تره عقيل هم حباب..شوفي اكيد ربج ماقاسملكم شتسوين..مو كلشي نريده يصير..
خزرتها وصحت بيها : عقيل حباب..چلب هذا..لج تحرش بيه لمن عزمونا..باس ايدي وزندي وهددني مااحچي..
شهگت هي وتعاين لنوارة بخوف.. : استغفرالله.. شنو من بشر هذا عفية حتى لو حيوان چا ماسوى هيج..

ماجاوبتها بس ابچي..ماادري شكد مر وكت..بس سمعت صوت حنين دخلت للغرفة..ضليت اتوسل بالرايح والجاي مااريد عقيل..اكرهه..محد مهتم لرأيي..كلها منتظرة عقيل يجي ويجيب الشيخ يعقدلنا..وانه..وگلبي..محد سألني..

آخر شي گمت غسلت وجهي ولبست تنورة بينصل وقميص .. تمنيت اطلع مايتباوع بوجهي..مااريد اعجب احد.. فلبست أي شي.. تذكرت يومي وي رائد شكد جنت فرحانة والدنيا ماسايعتني.. ماخليت قطرة مكياج بس كحلة ..ضليت گاعدة واهجس نار جوايه..بگلبي وبعقلي..شصار بينا..ليش هيج.. حرام اعيش مثل الناس لو شنو..اووف ياگلبي..

فزيت على صوت خالة ابتسام..
ابتسام : يله يمة اجه الشيخ..
گمت جسد بلا روح..دخلت للاستقبال والشيخ وره الباب يسألني.. لعبت روحي وبالگوة اجاوبه ..لحدما خلص وراح.. اجن يباركنلي وانه حتى مااجاوب..ياربي دخيلك شسوي.. مشت نص ساعة بهالحدود ودخل هو..تمنيت اشوف رائد مو عقيل..تذكرت موقفي وياه ببيتهم شكد چان مقرف هو وكامشني بكل قوته..عاينتله بقرف ودرت وجهي.. اجه گعد يمي لبسني الحلقة ومبتسم بحقارة..ايدي رجفت لمن اخذت الحلقة من ايده اريد البسهيا..مااريد هيج..مااريد.. رأسا بچيت بس منصية راسي محد يشوفني..
همس : لاتفشلينا..
لبستهيا بالعجل ومسحت دموعي..النسوان اجن يباركنله.. چن سعادتي من سعادته..ماطول هو فرحان فاكيد انه همات حفرح بهالزواجة الفاشلة..

ضلن گاعدات شواي وطلعن..مااحس غير تقرب مني حيل وايده تمشي على فخاذي..دفعته بفزة اريد اگوم جرني وثبتني أمامه ..
صك على اسنانه : اثبتني مااسويلج شي..
دنوة : شتريد مني انت..وخر عيب موهيج..
عصر زندي بإيده : موهيج موو..لازم تعرفين شيسوون..
ماجاوبته استحيت..انه مااقصد هيج..كام وكف وقربني علي.. حسيت بحرارة جسمه..جلدي كزبر ماادري شصار بيه.. ارد ادفعه وكامشني مثل الصياد مايريد فريسته تفلت منه..

ايده تمشي من چتفي لزنودي لخصري..تجرأ اكثر وصار يفتح دگم القميص..تخبلت هنا كمت ابچي وادفع بي.. : عقيل وخر كافي عيييب..عقيل..
ولا يمه..فتح اول تلث دگم وقرب شفايفه من المنطقة جوه الرگبة .. حسيت بشعور غريب بس مقرف..حسيت بالفرق بين رائد وعقيل..شكد رائد صابر ومتحمل مافديوم باسني غصب عني..وهذا بعدنا بس عاقدين ومن وده ياخذني بهاللحظة..
لحيته وشواربه لامست جسمي..لوما هو كامشني ومقربني علي چا طحت..ذبلت وكلشي بيه ينبض..بس ادفع بي مامستسلمة.. دقايق وهدني گعد ع القنفة ..
عاينلي بنظرات شهوانية : دگمي القميص..
صديت عنه ودگمتهن..دموعي تصب من القهر والموقف السخيف.. بس طلع هو طلعت وراه رأسا رحت للغرفة اخذت هدوم وركضت للحمام..

كمت اناشغ وابچي وانزع القميص..عاينت لروحي بالمراية .. شهگت وخليت ايدي على حلگي..اكو طگع على عظمة الترقوة وجواها..مااعرف شنو هذني وليش..عبالي مرض.. طبيت جوه الدوش واغسل بالمكانات بلكت تروح الطگع..ضليت هواي لحدما خلصت ورجعت اشوفهن بعدهن ماراحن..لبست بالعجل وطلعت ادور على خالة ابتسام..ماعندي غيرها .. لگيتها بالغرفة دتصلي المغرب..گعدت يمها بين ما خلصت..
اندارتلي هي وتعدل بحواجبي : ها ماما شبيج..
استحيت احچيلها..سكتت..
ابتسام : شبيج حبيبتي..ليش سابحة المغرب مايصلح..
دنوة : خالة اريد اشوفج شي..بس حبابة لاتفهميني غلط والله ماچان بيدي..
ابتسام : اسم الله..لا ماافهمج غلط شوفيني..
وخرت الشال من يم رگبتي ونزلت فتحة الدشداشة شوي..
شهگت وكمشتني من ايدي : هذا عقيل..
حركت راسي يعني مااعرف وابچي.. : خالة ماادري هذا شنو گليلي ..مديروح المنظر من بالي.. احسه يريد ينهشني مو يتقربلي..
ابتسام : يمة شون نذل هذا..مايصير بعد مااخلي يشوفج.. لايروح يسوي شي..حبيبة لمن تزوجين تعرفين..عوفي هسه يومين تلاثة ويروح..

ماحجيت بس خليت راسي بحضنها وابچي..هي تمسح على راسي وتهدي بيه..ماكتلها شفت رائد لأن ادري ماتقبل.. شكدما هي متعاطفة وياي بس لمن نجي يم نقاط معينة توگف..

مشى اليوم بطلاع الروح..عرفت مشتري ذهب بس ماجابه بيوم العقد ماادري ليش..ومشتري غرفة جديدة همات.. مااهتميت .. طز بكلشي..اصلا الدنيا كلها باهتة بعيوني.. اريد ألمح لون غير الرصاصي ماكو ..بالليل دااريد انام وشفت الحلقة بيدي.. روح عقيل بيها وتصرفاته الماتنهضم..نزعتها خليتها ع الكومدي وتمددت..خليت ايدي جوه المخدة وتذكرت اليوم السويت بي هاي الحركة ولگيت قصيدة عريان مكتوبة بخط رائد.. گمت لا اراديا دورت بالدفاتر والكتب..لگيتها بيناتهن واخذتها.. شميت الورقة لأن دائما اخليها بجيب الصدرية وانه اخلي من العطر الجابليا..فبعدها الريحة بيها.. كمت ابچي واقره بيها وعيوني مغوشة من الدموع..مدااصدك.. ضليت واكفة هواي حتى ماانتبهت ع الوكت..رجعت ضميتها ورحت نمت..

كعدت الصبح على صوت هلاهل وهوسة..بيبان تنفتح وتنسد.. عاينت للساعة..بالستة الصبح..شكو.. كمت بالعجل لبست شال وطلعت للحمام غسلت..اشوف الكل ملتهي يروح منا ويجي هنا..فتت المطبخ صارت سرور بوجهي تضحك..
دنوة : سرور شكو فهميني..
سرور : غير رائد فايق من الغيبوبة اليوم الفجر..
ضليت اعاينلها مصدومة..لساني انربط..من الفرحة والصدمة گعدت بالكع ماكدرت ابقى واكفة..نزلت يمي تگومني عبالها صار بيه شي..
سرور : شبيج حبي اسم الله..
كمشت چتافها بخوف : چذابة..احجيلي الحقيقة..صدك فاق حبابة لاتجذبين..
سرور : ولج وداعتج دااحجي صدك..حتى جدو اول ما عرف طلع هسه هو هناك..
بچيت من الفرح..مامصدكة..اويلي لو جان بيناتنا الحلال.. چا اجيتك كبلهم كلهم..بس صرت لغيرك..ماادري ابجي على حظي بقهر لو ع الفرحة بگومته بالسلامة..

مشى اليوم ساكتة بمعنى الكلمة..كل الحچيته چم كلمة.. الظهر رجع جدي وعمامي..رأسا صبينا الأكل.. انه انگل الاكل وبداخلي اريد اسمع شي عنه..
شامخ : الحمدلله كام بالسلامة..الاطباء خايفين بالبداية چي طول اكثر من خمس تيام..
فيصل : بوية زينات البني آدمي وين تروح..
شامخ : اي بالله لاعاب حلگك..

اسمعهم ومهضومة بداخلي..وره ما تغدينا وغسلنا مواعين.. شي راح ينام شي طلعوا لشغلهم..المهم البيت شبه سكن.. ضليت أدور بالمطبخ بلكت واحد ناسي تلفونه.. انه وأدور سمعت صوت تلفون يدك..مال خالة ابتسام..اخذته لكيت اختها دتخابرها..تركته يفصل وحده وسحبت روحي لغرفتي.. سديت الباب وقفلتها..شدااسوي.. لازم اخابره.. حتلو بس اطمن علي مااتحمل هيج..
كتبت رقمه ودگيت..ضل يدك هواي وفصل ماجاوبني.. كعدت بالكع ومخليته جدامي متأملة يشوف الاتصال يرجع يتصل..

دقايق وفزيت ع التلفون يدك..رقمه هذا..رأسا جاوبته..
دنوة : الو رائد..
حچه بنبرة باردة : دنوة..
: اي..
رائد : اهلا..شجابني على بالج..
دنوة : انت على بالي دائما..الحمدلله على سلامتك..
رائد : الله يسلمج..
انهضمت من نبرة الصوت هاي..بچيت بدون صوت بس دموعي تنزل..اسمع انفاسه مامنتظمة ومزعوجة.. : اسفة..

تنهد بهدوء : مايحتاج ابوية..مايحتاج..يله اروح انه..
بچيت بصوت وصوتي على : رائد..اسمعني ..
تغيرت نبرته : لاتبچين..كولي اسمعج..

دنوة : انه..ماادري منين ابدي..سامحني..ابوي تعرفه.. أذاني وجبرني..بس انه احبك رائد..والله احبك وحتى لمن چنت بالغيبوبة اجيت شفتك و... وعمو حامد شافني..
رائد : ابوي ..
: اي..
رائد : شسوى..

دنوة : رزلني..گال رجعي وعوفي ابني أذيتي..بس انه والله مااقصد رائد..حتى مداانام وتعبانة بدونك..
جر حسرة طويلة وحچه برزانة مثل عوايده بس بعتاب : يولي انتي ماخليتيلي مقام..فشلتيني الله يسامحج..انه وياج.. فديوم تركتج بنص الطريق..مافوتت لحظة بدونج حتى لمن انزل من واجبي المفروض ارتاح بس اجي يمج واخذج لمدرستج اكول انه من اشوفها ارتاح مايحتاج انام واگضيها بالبيت.. والله ماتنازلت عنج متمسك بيج حد گطع النفس..بس لمن شفتج تكولين مااريده كلت بسك رائد ماتريدك البت اتركها..
قاطعته انه وابچي : بس انه اريدك والله انجبرت..
رائد : اعرف..انطيت كلمة لأبوج اذا سمعت التنازل بلسانج اعوفج واطلكج..وسمعته ترس اذني..شفتي وجهي شلون مخرط وعيني مورمة..يولي انه ابوي لمن چنت مراهق مامد ايده علي.. بعدين اجه ابوج هيج يسويلي..كل هذا ميخالف.. چنت اكدر ارجع اخطب لو شوف شسوي..بس لمن سمعت البيت دينباع تسودنت..ليش يولي..مو تعبت بي..حتى اثاث بديت اخلي بي..بعدني مامسدد الدين وچروب انباع..
ماعرفت اجاوبه بس ابچي..صح ومو صح..صح لأن هو واكف وياي..المفروض گبل لا اطاوع ابوي افكر ان رائد لو وصل اله خبر حيوگف وياي وينهي هاي المهزلة..موصح تكفيرا عن الذنب السويته لا اكثر..

سمعت صوت جداحة اشتغلت..جر نفس وحچه : لاتبچين كافي بسج..
سكتت ماحچيت..هو همات ساكت..شكد عاتبني بسكوته.. أذاني اكثر من كلامه.. ماكو دقايق وسمعت واحد يصيحه.. ماادري منو..
گال : حروح انه..تردين شي..
دنوة : ها.. لا مااريد..
رائد : يله اروح..كومي غسلي لاتبچين..
دنوة : ماشي..
رائد : يله مع السلامة..

سديته وهواي افكار اجت ببالي..ليش ماسألني على عقيل ولا كال شي يخصه..خاف مايدري..هو مايقبل بالحرام اي لو يدري چا ماقبل..ماعاتبني ع الشي هذا..بس ع البيت والطلاك.. ماادري اوووف هم جديد فوك همومي ..كمت وديت التلفون ورجعت للغرفة..

مر چم يوم هدوء..عرفت جدي متكتم ع الموضوع ماحاچي ومنطي خبر لعمامي مايگولون لرائد انه وعقيل تزوجنا.. مو علمود شي بس سكره بعده مامستقر ومعرض لكلشي..

وره اسبوع بهالحدود بالليل اجه ابوي شمر السويچ ع الكاونتر وكعد ع الكرسي..
صاح : صبيلي اكل..شمسوين عشه..
دنوة : شتحب اسويلك..
محيي : سويلي من الاكل الأكله دوم..قولوني يوجعني..
دنوة : اي هسه.. بديت اطلع اكل واسويله..
گال بنتر : باچر الصبح نروح نعقد محكمة..يومين ويصير العرس..
دنوة : بس بابا مامستعدة..
محيي : لا مستعدة ونص..لاتضوجيني يله فضيني اريد اخلص من هالسالفة گبل لايعرف رائد يخبصنا..

دمعتي صارت بعيني بس بالگوة ساكتة..هواي بجيت بعد مالي حيل.. صبيتله اكل وكعدت على صفحة انتظرته يكمل وغسلت مواعين..رحت للغرفة تمددت وافكر الى أن تعبت ونمت.. كعدت الصبح بدلت ومتثاقلة الدنيا كلها..شواي واجه عقيل اخذنا انه وابوي وجدي وعمي كاظم..امه هماتين اجت ورحنا للمحكمة..ماتخيلت فديوم اوصل لهالمكان.. اوصل اله حتى أوقع سند ملكي لشخص مااطيق حتى اسمه.. هو اشوفه فرحان ويضحك..شگد اكرهك.. بدا القاضي يسأل ونجاوب.. بعدين سوينا تحليل دم طلع متطابق .. بصمت وهو همات..امه طشت چكليت.. عاينتلها بحقد وكلت بداخلي : هاي زواجته الثانية وهيج تسوين..چا بالاولى شسويتي..

رجعت للبيت جسد بلاية روح..كلهم نزلوا ردت انزل كمشني من معصم ايدي وغمزلي : الترف حيصير كله بيدي..
دنوة : لاتحاچيني هيج..
عفته ونزلت اسمع صوت الضحك ماله..استحقرت روحي.. طبيت شفتهم ملتهين ديخبزون ويحضرون الريوك..يباركولي حسبالهم فرحانة.. عفتهم يشتغلون ورحت للغرفة نمت ..
كعدت الظهر جسمي مورث نار وأون من الوجع.. كلت فلاونزا عادية هسه چم يوم وتروح..اخذت ادوية ومسكنات نفس الشي.. بالليل من الصخونة كمت اتخيل اشكال الوان.. لساني فلت مني كلشي احچي مامسؤولة عنه..بس الشي الوحيد الحسيت بي وجود خالة ابتسام يمي..

ماادري شلون گضى الليل.. فزيت الصبح ثاني يوم لكيت سرور كاعدة يمي وعاگدة حواجبها بخوف..
لمن شافتني فتحت عيوني خلت ايدها على گصتي تشوف حرارتي.. كمشت ايدها بخوف : شبيج سرور..
سرور : شلونج..شدتحسين هسه زينة..
حركت راسي بمعنى اي..
تقربت مني تحاچيني وعينها ع الباب : ابوج گلب البيت على راسنا البارحة..
دنوة : ليش شكو..

سرور : غير البارحة تهذين بإسم رائد..
گلبي دك سريع..خفت من ابوي : چذب..شحجيت سرور مااتذكر والله..كليلي..
سرور : يمعودة.. تكولين رائد احبك لاتعوفني..سامحني.. احبك الك مااحب عقيل.. انتي ودتحچين اجه ابوج سمعج وتسودن..راد يكعدج بس ابوي وگف بوجهه..كال عوفها مريضة .. بس خية خاف جان عندج أمل ترجعون انتي وياه.. هسه انسي هاهيه راح بعد..
دمعت عيوني..ماجاوبتها..درت وجهي ودموعي تنزل بحرارة على خدي للمخدة..

ضليت اربع ايام الصخونة مافكتني.. العرس تأجل لحدما اطيب ومدااطيب..حتى أبر جابلي ابوي مافادتني.. وره هالأربع ايام كعدت الظهر على صوت هوسة..من بين الهوسة كلها شدني صوت رائد..كمت على كيفي وساندة روحي ع الحايط..طلعت من الغرفة واشوف النسوان رايحة جاية.. رحت على خالة ابتسام..
دنوة : خالة شكو..فهميني..
ابتسام : شگومج انتي..رجعي ارتاحي مايصير يمة..
دنوة : خالة احچي حبابة مابيه شي بس احجي..سمعت صوت رائد..
ابتسام : اووف اوف..اي هيانه اجه اليوم يصخمنا..

كالت هيج وراحت..رحت على جديتي ماكو غيرها.. كاعدة بالاستقبال وادك الگع بالعوچية بعصبية وتستغفر..
كعدت يمها واعاينلها بتعب : شكو جدة احجيلي..
الحجية غادة : رائد هنا شني الصاير قابل..
دنوة : شلون شعنده ..
الحجية غادة : داري بالصار انتي وعقيل..
عاينتلها مصدومة..كمت تمشيت لباب المضيف ومتچية روحي ع الحايط واسمع..

لواء : بوية بعد عمك البت تزوجت مايصير ينجاب اسمها بغير لسان زلمتها..
رائد : ليش عقيل محسوب ع الزلم..هاي هيج استغليتوني .. خلف الله عليكم..
كاظم : ماادري شحاسب روحك..دمشي اطلع بره.. ماخليت مقام لعمك انت هلكثر مستهتر وارعن..
صاح : والله ماكو غيركم المامخلين مقام..وگفت بوجه الكل بس علمود اخذها..بعدين بس اديور وجهي تنطونها.. بالله گليل بحگكم كلشي شين..

صار صياح وجدي ادخل..انه تغاضيت عن كل الاصوات بس اسمع صوته شلون يحچي بحرگة ويصيح من گلبه مو من حنجرته.. ضليت واگفة لحدما سمعت باب المضيف انفتح يعني واحد طلع.. صوته اختفى يعني هو راح ..شيگدر يسوي بعد حتى فشلة جدام الزلم يريد بنية هي گالت مااريدك..

مشت تلث ايام عايشة بضيم وبچي..مدااصير زينة.. تعبت من الصخونة كلشي بيه هلك..جسمي مايعينلي بس على گد روحة الحمام..حتى الاكل استصعبه.. كلشي اشوفه يتعبني .. عرفت رائد لمن حيعرف متزوجة مايتقربلي بعد ولايسمع صوتي.. وانه روحي شايغة علي بس اريد اسمع صوته.. ماادري شسوي حرت.. بيوم كمت على سرور صعدت فوك باية باية .. فتحت الباب وطبيت..كامت من مكانها متفاجئة..
سرور : هاي شجابج حبيبتي..موزينة عليج الوگفة..
تمشيت كعدت يمها : سرور حبابة الله يخليج.. روحي جيبي تلفون خابري رائد..بس اسمع صوته مااحچي..
سرور : ولج شبيج خاف مصخنة ودتهذين..
دنوة : لا لا مابيه شي..حبابة بس روحي..
سرور : يله هسه أمري لله..

راحت نزلت جوة..شواي واجت قفلت الباب وكعدت يمي.. رديتلها الرقم وخابرته..فتحت حاكية وتحاچي..
جاوبها بتعب : الو..
سرور : هلا خوية..شونك..
رائد : اهلا.. سرور لو نوارة..
سرور : لا انه سرور..
رائد : هلا بيج..زين الحمدلله..خير خوماكو شي..
سرور : لا ماكو شي..بس شونك انت..سكرك..
رائد : شلوني.. ماادري والله..شتكولين شلوني..
سرور : الله يساعدك..بس دنوة همات تعبانة..عمو فرض رأيه عليها شبيدها قابل..
رائد : لا الحچي مو وياها..الحچي وي عقيل..
عاينتلي بخوف وحچت : شلون يعني..
رائد : بس اكمشه ادخله سجن..والله كريم..
سرور : لا عيني لاتودي روحك بداهية..هاهيه انساها شتسوي موكلشي نريده نحصله..
رائد : خير خوية..ديري بالج عليها سمعت مريضة..
سرور : اي ماندري شبيها مدتصير زينة..
رائد : اخذوها لدكتور لاتضلون على ادوية الصيدلية.. ماتفيدها.. هسه اروح انه بالدوام..
سرور : ماشي اخذ راحتك..مع السلامة..

سدته واندارتلي.. صوته تعبان منتهي ..صارت غصة بزردومي من كلامه ونبرة صوته..يحچي بالگوة يجر الكلمة.. عفتها ونزلت جوة.. لكيت نسوان جوارينا جايات علينا .. طبيت سلمت وگعدت.. شافني مخنطلة ولساني ثگيل..
وحدة منهن حجت : شبيها الحبوبة..
ابتسام : اندري خالة..اشو هي على فجأة صخنت ومادتنزل حرارتها صار فوك الاسبوع..حتى أبر جبنالها..
- : خية اخذيها لأم جمال..هيانها براس الفرع.. هي تقره ع الوادم المرضى..مايضر شي اذا اخذتيها..
ابتسام : ها هيج تكولين..
- : اي وعلي..شوفيها واندعيلي..
ابتسام : ان شاء الله خية ابو سالم ياخذنا..

وصدك بس راحن اجه عمو قاسم اخذنا لبيت هاي المرية.. انه رجلية ماتعيلني امشي بس خالة ساندتني هي وعمو.. دگ الباب جان تطلعلنا مرة چبيرة بالعمر..استقبلتنا وعمو بقى بره كال انتظركم.. بيت قديم مكركب ..كعدتنا بالهول وجابت ماي بگلاص تقره علي..نزلت كعدت يمي وترش على وجهي وتقره مااعرف شنو..أدعية وآيات..
- : شنهي علتج يوم..
ابتسام : مدتصير زينة خالة..عساس فلاونزا بس طولت حتى ماتكدر تشيل روحها..

شو هاي عاينت بوجهي وتمسح على خدي وتحچي : حنطاوي طويل وضخم..عنده شامتين بنحره.. هو هماتين يحبج حبيبة..
اخذت چف ايدي وتمشي بأصبعها المكچي من الكبر : اشوفكم سوة وعدكم جهال ثنين..هو ضابط بالجيش.. حيسعدج كلش..

خالة ابتسام تسودنت..عاينتلها وتحچي بنتر : حجية البت متزوجة شنو هالحچي هذا..
- : انه هيج اشوفن يمة..شني قابل من جيبي..
ابتسام : مشكورة ماقصرتي..كومي ماما نرجع للبيت..
اجت گومتني وتعدل بعباتي..طلعت منها مصدومة.. شلون عدنا جهال ثنين واحنا افترگنا..اكيد دتهلوس هاي..

رجعنا للبيت خالة ماحچت بكلام المرية هاي..كالت بس قرت على راسها وهاهيه.. انه يومين بالثالث حسيت روحي تحسنت.. الصخونة راحت بس جسمي يوجعني شوي .. عقيل ماصدك يسمع بيه زينة..يومين ودز امه وغدير جابنلي هدوم ومكياج وبعد كومة شغلات طبيعي كمهر يعني..گال فلوس الصالون لمن ترحين انطيچياهن..عساس انه كلش مهتمة للصالون وفلوسك..

وره هاليومين گعدت الصبح مخنوگة وخايفة..اليوم زواجي.. حصير يمه..مدااصدك..لعبانة روحي حتى بطني توجعني.. اجت غدير علي اخذتني للحمام استحيت منها فطلعتها ماقبلت تبقى..بقيت لحدما كملت وطلعت.. مشى اليوم بس اتصفن بالوجوه..كلهم فرحانين..شنو متبادلين الأدوار.. يشوفوني ضايجة يگولون خطية حقها احنا كلنا خفنا بأول ليلة.. من ودي اكتلهن بس اسكت ..لعبت نفسي من حچيهن.. لحد الظهر رحنا للصالون..خالتي اجت وياي ودنيا.. كالت البنات بالبيت..ام الصالون بدت تحفلي وتسويلي شعري.. سوتلي مكياج وانه بس اتنعوص عليها..مااريد هاي ومااريد هاي.. برغم هواي شغلات تنازلت عنهن ماخليتهن بس طلعت بشكل مقبول.. ضلينا للعصر چان يخابر ابوي.. شلته..
محيي : ها كملتي بوية..
دنوة : اي..
محيي : خوش انه بالطريق..
دنوة : ماشي..

سديته وگمت طلعنلي البدلة..الاستاذ مايقبل الا ردان.. صحيح حلوة بس ماردت هيج انه..كله ذوقه هو وامه حتى ماانطوني مجال اختار..اليسمعه ويشوف ذوقه شلون محكم من وده يخليني بعلبة يگول نيال اخلاقه..هو واحد تفكيره شاطح ودنيء.. لبستها وعاينت لروحي بالمراية..مااحسني حلوة.. محلوة بس يم رائد حلوة..ردت ابچي وبالكوة ساكتة.. شواي واجه ابوي..خلولي الچادر وشايلتها مدري شلون بس اريد اصعد بالسيارة.. صعدت وخالة ابتسام يمي هي وسرور.. الباقيات اجه عمي لواء رجعهن.. طبيت گعدت بالاستقبال وأفرك بإيدي خايفة ومتوترة..اريد اطك بچي.. اووف ياربي دخيلك وين وصلت..

مر الوكت ماادري شلون..لهناك واسمع صوت صياح زلم.. حضرني الموقف لمن صار عقدي وي رائد..گمت اشوف شكو.. بس مايبين شي..رجعت گعدت انتظر وحدة من البنات تحچيلي..

دقايق واجت غدير بس شكلها مرتاح..
كعدت يمي تهدي بيه : لاتخافين حبي..هي بس هالليلة صعبة بعدين تگضي..
كمشت ايدها : غدير شكو بره..
تنهدت : شكو غير رائد..
دمعت عيوني بس حاولت ماابين..نصيت راسي : زين وينه هسه..راح..
غدير : اي راح..اجه عمي حامد اخذه..

مرت نص ساعة وراها گالوا حتصير الزفة..گمت واعاين بوجوههم.. محد فك حلگه لصالحي..كلها چانت ضدنا وضد حبنا.. نصيت ماگدرت ..اجت خالة ابتسام تحاچيني تحاول تعلمني علمود لا اخاف من الحيصير..بيئتنا تخلينا مانعرف شحيصير بين المتزوجين الا لمن نتزوج..
باستني وتعاينلي بنظرات أم حنينة : يمة عيشي حياتج هاهيه.. هذا زوجج وهذا بيتج ..رائد راح..
شبگتها وتنهدت تنهيدة جرحت گلبي.. دقايق وطلعت بعد.. ابوي وعمامي وجدي واگفين بره وعقيل وياهم.. ولأول مرة اشوف هيج حنية غريبة من ابوي..تقرب مني باس راسي وخدودي..
گال لعقيل : ديربالك عليها..بعدها صغيرة وفقيرة..
عقيل : بعيوني..

ديريد يقدمني اله وكمشت ايده..دموعي نزلت.. احتاجيت امي وياي..احتاجيت شخص اگله عقلي مديتقبل الواقع هذا.. گلبي دينذبح مثل الطير..انداريت على ابوي حضنته حيل وابچي.. اسمع النسوان تگول لاتبچين المكياج يخرب..مااهتميت عساني اطلع أرملة مايهم..هو شبگني ويمسد على ظهري..
گال : الله يسعدج بابا..
كلت بگلبي ياسعادة هاي الدفنتها بيدك..

بعد دقايق من الوداع دخلت للبيت ورود عدلتلي المكياج وطلعت.. روحي بقت بالبيت ..يم الشباچ والرسايل.. هدومي والعطر.. صعدت بالسيارة وتفكيري كله يم رائد ..شلونه هسه شديسوي..گلبه ديعاتبني لو يعذرني.. عيونه دمعت علي لو تأذى بسببي بعد مايهتم..الفززني من افكاري ايد عقيل.. كعد يمي وكامش ايدي..تخيلته وي روان ويبوسها ويتقربلها بعدين يجي يتقربلي.. درت وجهي ودموعي بعيوني ..شعور مقرف ردت ابچي..

زفونا للبيت وراحوا..نزلت وشايلة البدلة اريد بس ادخل علمود اذبها ضجت منها.. تمشيت بالبيت فارغ مابي احد.. بس احنا.. انداريت شفته ديقفل البيبان ..شمر المفاتيح ع الكاونتر ويتمشى بإتجاهي..
تقرب مني رفع الغشوة وإبهامه يتلمس شفايفي.. دفعته : عقيل..
عقيل : اويلي فديته لإسمي بصوتج..گولي..
درت وجهي : عوفني شوي اخاف واستحي..
ضحك ماجاوبني..صعد فوك وصاحني.. ياربي شنو حصعدله يعني..شلون بعدني مامستوعبة.. شافني ماانطيته جواب رجع صاحني.. : ها..اي هسه..
شربت مي اريد ابلل ريگي اختنكت..صعدت فوك ..

البيبان مسدودة بس باب وحدة مفتوحة.. تمشيت على كيفي وطبيت..لكيته واگف يم الكنتور ديطلع هدوم اله..
عقيل : تعاي فوتي لاتخافين..
كعدت ع الچرباية واتفرج ع الغرفة..حلوة واثاث مصري دمياطي ضخم..قنفة شكلها حلو تك تچوة ملائمة وي الغرفة.. اجه وكف جدامي ورفع راسي..
عقيل : كومي سبحي حنزل جوه بين ماتخلصين..
سكتت ماجاوبته..عافني وراح..تمشيت ع الكنتور مليان هدوم.. مال بيت وطلعة وسيتات نوم ..ماادري شلبس.. مستحيل البسله سيت نوم..اخذت دشداشة جوه الركبة بشبرين ونص ردن..نزعت البدلة علگتها ورحت للحمام اسبح وافكر بكلام خالة..

حرام افكر برائد وانه مزوجة..لازم ماافكر بعد..بس شلون .. مدااگدر ولا حگدر..ياربي شنو هالأختبار الصعب والله مااكدر انجح بي..

كملت وبدلت..لفيت شعري بخاولي وطلعت للغرفة.. گمزت لمن شفته كاعد رجل على رجل يگلب بالتلفزيون.. دار وجهه علي وخزرني : هاي شلابسة..
عاينت لروحي : شلابسة..
گام يستغفر وراح ع الكنتور يدور بالسيتات..شمر واحد ع الچرباية ورجع كعد.. : لبسي هذا وتعاي..
دنوة : عقيل مااكدر فدوة انطيني مجال..
اجه يمي فتح شعري وينشف بي : مجالج يمي.. هنا بحضني.. روحي لبسي وجهزيلي روحج ..
سكتت بس جسمي فور من كلامه..احسه ديستغلني.. اخذت السيت ورحت البسه..شلون حطلع هيج..مااكدر فد دور مفضوح..ضليت صافنة البسه لو لا.. فزيت ع الباب تندك يكلي يله كملتي..كتله اي..

لبسته ونشفت شعري..اكو شسوار بالحمام..طلعت امشي وانزل بأطرافه..ماتوقعت حيكون هيج جريئ ومن اول ليلة يجبرني اسوي اليريده.. فتحت الباب هو رأسا وكف ويعاينلي بنفس نظرات يوم العقد..تقرب مني وسحبني لحضنه واخذني للچرباية..تمدد ومخليني يمه..متت من الخجل حتى راسي كام يوجعني.. هو يمشي بأصابيعه على فخاذي وزنودي ويتغزل بيهن.. ردت اموت بس اريده يسكت ويبطل يلمسني ..
آخر شي بحركة سريعة صرت جواه وهو فوكاي..مثبت ايده يم چتفي وايده اللخ تمشي على جسمي..

بدا يتقرب اكثر ويبوس رگبتي وإذاني..عظم الترقوة وكل جزء بيه..ماانكر دخت وذبلت بحركاته كأي بنية تصير بهيج موقف موغريبة..حسيته فارض روحه حتى بحركاته اكو قسوة.. بلحظة صار عندي وجع قوي..كمت اصارخ وابچي.. حط ايده على حلگي وانفاسه سريعة حارة..عيونه حمر وعرگان : لاتتحركين كافي..تحملي..
اريد اوخر ايده مااگدر..ضليت بس ابچي عيوني احسها نطت من مكانها..عضيت ايده وعطت بدموع : وخررر دتأذيني..
ماجاوبني ولا چن يمه الموضوع..ضل ع الوضع هذا دقايق وابتعد صدره يصعد وينزل ويتنفس بقوة..كمش وجهي يريد اعاين بعيونه..مااكدر مستحية ومتوجعة وجع فضيع.. گام مني رفعت راسي شفت الدم تخبلت..كمشت ايده وابچي : عقيل..
دار وجهه علي : لاتخافين عادي لازم يصير هيج..گومي لبسي وسبحي بعدين غيري الفرشة..

عافني وراح..اريد اتحرك مااگدر..ضليت ابچي واحاول اگوم.. شكد حقير حتى ماساعدني اگوم.. كمت على كيفي وساندة روحي ع الحايط..لبست الدشداشة ورحت للحمام.. سبحت بس بحركات متثاقلة..عيوني وگلبي وكلشي بيه يبچي من الوجع.. خلصت وسديت الماي..رجعت للغرفة شلت الفرشة غسلت مكان الدم وشريتها..اجيت فرشت غيرها وتمددت ميتة وجع..هو اجه جايب اكل..
وكف جدامي ورفع الغطى عني : تعاي اكلي..
دنوة : مااريد..عوفني.. عوفني..
سكت ماگال شي.. تغطيت ومگرفصة روحي..قريت كل آية قرآنية حافظتها بس علمود مااحس بالوجع..بعدين غفيت ماادري شلون..

ثاني يوم گعدني الصبح هو ويفتر بالغرفة يبدل ويخلي عطر.. انتبهت علي لابسة دشداشة ..اجه كعد يمي ويمسد بشعري : شون صرتي..
ركزت بعيونه وتذكرت شصار..ردت ابچي شكد أذاني.. سكتت عن هذا وجاوبته : زينة..
عقيل : يله كومي ينتظرونا جوة..

ذبيت الغطى وگمت..اكو وجع بس احسن من البارحة.. رحت بدلت گلبية خليجية بيها عرض شوي بس موبشكل مبالغ بي.. شسورت شعري وظفرته للنص النهاية تركتها بدون ظفر.. توني داانزل چان تجي غدير وياها اختها من غير ام.. براء اسمها.. همات متزوجة..اجن يمي وسدن الباب..
غدير : حبيبتي صباح الخير..
دنوة : صباح النور.. شو اجيتوا..هسه دااريد انزل..
براء : وين نازلة هيج حبي..غير تخلين شي على وجهج..
عاينتلها ببرود : شخلي يعني..
جرت الطبلة مالت الميزتواليت وگعدتني عليها.. خلتلي حمرة خفيفة وكحلة..مسكارا همات..وراها نزلنا..

اشوف الكل فرحان وملتهي يبارك..هو واكف يم باب المطبخ يحاچي امه..عاينلي وابتسم..مابادلته..رحت يم النسوان باركنلي ومنهن تنطيني فلوس..اووف ياربي من ودي اعوف البيت واطلع..لعبانة روحي من كلشي..دااتظاهر الفرح وابتسم بوجه اليبتسملي..مشى اليوم ماادري شلون..بس المهم مشى بثگل والدقيقة بساعة..ماصعدت فوك بس جوة.. اخاف اصعد واشوفه ويأذيني.. واكفة يم المغسلة دااغسل وحسيت بنغزة قوية اسفل بطني.. هو جان واكف قريب علي..
اجه يمي حاوط چتفي وهمس : خيرج شبيج..
دنوة : مااعرف..بطني توجعني..
عقيل : تعاي گعدي لاتوگفين بعد..

مشاني للهول..اجت خالة ابتسام اخذتني وكعدتني يمها.. النسوان ملتهيات محد انتبه علي..
عاينتلها واريد اطك بچي : خالة ..
ابتسام : ها ماما..بعدها توجعج..
تقربت شاورتها..خلت ايدها على صدرها بخوف : ولج ليش ماحچيتي..كومي للحمام شوفي روحج اكو دم يا لا..
دنوة : اخاف خالة..
ابتسام : دگومي حبيبتي لايصير بيج شي اسم الله..
سندتني ورحت للحمام..كمت ابچي لمن شفت الدم.. ماتخيلت هيج حيصير بيه.. طلعت گتلها وجهها صار اصفر.. لبستني شال وعباية واجت جديتي وامه ويانا.. هو مااجه ..ماادري منو وصلنا للمستشفى لأن من الوجع بس مخلية راسي بحضن خالة ودموعي تصب.. لحدما وصلنا سمعت صوت ابوي عرفت هو جابنا.. اجت دكتورة اخذتني لصالة چبيرة وبيها سدية.. تمددت وخالة يم راسي.. كمشت ايدها وابچي..
اجت الدكتورة وكفت يمي : شبيها الحلوة.. لاتخافين بس لاتقلصين روحج امي..

هي تريد تفحصني وادفع بيها..مستحية شلون اصير بيدها مدااصدك الديصير بيه..
آخر شي ضاجت : رجاءً أحد منكم يلزمها..
ام عقيل كمشت إديه وانه مثل الطير المذبوح روحي طلعت.. وجع وخوف وخجل..شكد كرهت هاليوم وكرهت كلشي يخص الزواج.. شكد چنت متمنية هاليوم يصير وي رائد .. يصير يوم رومنسي وهادئ مو هيج كله آلام..

شواي وابتعدت مخنزرة : شوكت متزوجة البنية..
ام عقيل : البارحة..بعدها عروس..
- : عجيب يعني عروس وهيج تتعنف..
ابتسام : يعني شبيها دكتورة..
- : صاير تمزق شديد بالغشاء.. أدوية ومسكنات تصير احسن.. بس ممنوع يتقربلها ١٥ ايام..

عاينت لخالة ابتسام شلون تعاين لأم عقيل بنظرات عتب.. اجت گومتني وساندتني..طلعتني صار عقيل بوجهي.. صديت عنه لعبت روحي منه..اريد اضل هنا..بأي مكان..بس ماادخل للغرفة.. اووف ياربي دخيلك ..انتبهت ابوي واگف غادي ويروح ويجي بقلق.. لمن شافنا طلعنا اجه يم خالة ماادري شحاچته.. عاينلي بنظرة مكسورة واخذني لحضنه.. مشاني للسيارة وراح يجيب الأدوية..شواي واجه بعدين رحنا للبيت.. اول ماوصلت اسمع اسمي على لسان كل وحدة گاعدة.. حتى ماعاينتلهن.. اجت غدير وبراء صعدني فوك ..بس تمددت غطيت راسي ماجاوبت أحد بعد..

گلبي يوجعني من كلشي.. حاولت اغفى..مااريد اسمع شي بعد.. بين نايمة وگاعدة سمعت الباب انفتحت ورجعت انسدت.. اشتميت عطره..عقيل.. گرفصت روحي ومغطية وجهي..كعد ع الچرباية وشال الغطى من راسي..
عقيل : ليش ماگتيلي متوجعة..
خزرته وانداريت..انطيته ظهري ..مد ايده جوه راسي وقربني علي..صار راسي على صدره ..
عقيل : اسف..
شلت روحي منه..رأسا بچيت : عوفني لاتتقرب..
عقيل : بس...
دنوة : لابس ولاشي..حباب الله يخليك..
سكت ماحچه..تمددت من الجهة اللخ بس مانمت..احس بي يتمشى بالغرفة..نزع الدشداشة لبس غير شي وطلع.. بالليل كمت للحمام بدلت ورجعت..لگيته ديگلب بالتلفزيون ويمه صينية مال اكل..اكلت شوي واخذت الدوة ورحت نمت..

رائد .....

فقت من الغيبوبة..چنت حسبالي نايم..شفت روحي بالمستشفى وامي وابوي يمي..شفتها تبچي وكامشة ايدي.. شلت راسي بس اهجسه هلكده ويوجعني.. بچت اكثر واجت شبگتني.. حاوطت چتفها وامسح دموعها ..شفت ابوي واگف ليغاد ومخلي ايده على حلگه عيونه مدمعة..

مشى الوكت واجه الدكتور چيكني كال عادي خليطلع بس ممنوع انفعالات وعصبية علمود السكر يبقى مستقر.. اجه جدي وعمامي حتى عمي محيي..تحمدلي ع السلامة ماجاوبته.. يگبح ويصبح عيني عينك..

للصبح طلعنا من المستشفى رجعت للبيت..اجتني اخلاص تبچي..يابة البنات شگد حنينات.. فتحتلهيا ايدي واجت شبگتني..
اخلاص : رائد صدك صرت زين وكعدت مدااصدك..
ابتسمت وبست خدها : الحمدلله يابة..
اجه ابوي سندني ومحمد وطبيت..رجلي خدرانة ومعرضة للتجلط لأن على نفس النومة فترة طويلة.. مرت أيام كلشي بداخلي هادئ..بس المحيط هوسة..گرابتنا يجون يتحمدولي ع السلامة..صحباني ضباط ومنتسبين..طبعا عارف ماقصر هو وياي ع الخط..گايم بالواجب هو ومحمد وابوي..

وهاي هيج مرت أيامي..الحلقة بيدي مانازعها..  اجه اليوم الخابرتني بي..مثل مكان هادئ ومر بي اعصار قوي دمره.. هيج حسيت.. كل ذرة هدوء وصمود بداخلي تحركت أو انهارت بشكل أصح..ادور اشوفنها تبچي وتشهك..ادري بيها حساسة وتبچي على اقل شي..بس گلبي حسسني اكو شي ثاني غير تأنيبها لكلامها برفضي..

اشوف ابوي ساكت وامي همات..انه مايصير اطلع بعدني مو هلكثر.. روحي لابت اريد اعرف شكو ..آخر شي خابرت على عارف..حاچيته طبيعي..
بعدين كتله : خوية رايدك بشغلة..
عارف : ابشر ..
رائد : روح لبيت جدي..يعرفونك مايكولون شي..شوفلي شعدهم ليش هالهدوء هذا كله..
عارف : ياستار شبيك بوية..غير عمامك ماتخابرهم تشوفهم..
رائد : لك قابل مااخابرهم..بس اكو شي صاير مااعرفه.. روح وانت بعد مايحتاج اعلمك شلون تحچي..
عارف : يله ماشي..ماعندي شي اليوم اروحلهم واخابرك..
رائد : اتانيك مو تنساني..
عارف : لا تدلل شلون انساك..
رائد : خوش هاهيه..مشكور..

ضليت كاعد اليوم كله على اعصابي..طلعت وي محمد اريد يخلص اليوم.. بالليل تانيته يخابر ماكو ..گلت ماصارتله فرصة يجوز..ثاني يوم الصبح لكيته داك علي تلث مرات..خابرته..
گبل لا يفصل جاوبني : ها خوية..
رائد : وينك يول من البارحة انتظرك..
عارف : تعذرني بعد البارحة طفيت تره..شونك انت..
شفته مدري شلون يحچي.. : شو ماادري شلونك..شصاير..
عارف : رحتلهم امس..
رائد : اي وشصار ..
عارف : ابن عمك عقيل عاقد عليها لمن چنت نايم مستشفى.. وهاي كبل چم يوم عاقدين محكمة..

ايدي رجفت وراسي يدك بكل قوة.. : عارف.. يول لاتچذب.. تره هالحچي اكبر من ان ينگال..
عارف : خوية وداعتك هو هذا الصاير..خايفين يحچولك چي مريض وسكرك مامستقر..
سديته بدون مااجاوبه..يريد يسودني هذا..شنو عاقد عليها.. چا وانه.. شمرته ورحت بدلت بالعجل ..طلعت اصيح اجه ابوي من فوك..
حامد : وين طالع موزين عليك اكعد..
رائد : يابة جنت تدري معقود عليها..
عاينلي ورفع حاجبه بإنكار : لا ماادري..عليمن تقصد..
رائد : عليمن يعني..دنوة ..ليش ماگتلي ليش ضميتوا..

عفته وطلعت بالعجل..اسمع حسه وراي يندهني.. قطعت كل طريقة تخليني استقبل الكلام من أحد.. صعدت بالسيارة وطلعت لبيتهم واسوق بسرعة جنونية..عرفت..حسيت.. احساسي مايخيب..اشوفها تبچي وتشهك وتعتذر.. ااااخ يابة ليش يولي مرته صرتي مرته.. وصلت لبيتهم طبيت من باب المضيف لكيتهم كلهم كاعدين..تعاركت وصيحت.. واكف على نار اريد بشر منهم يوگف وياي ماكو..كل هالكلام ماأثر بيه..

بس لمن جدي گال : انت على عيني وراسي بوية.. ماگصرت وكفت وي الكل وسويت العليك وابو زايد..چا انه اگولن رائد ابو اصل واخو خيته تالي تجي تعارك عمومتك ووليداتهم خاطر مرة متزوجة..حرمة غيرك مايصير تحچي بيها..لمن اجيت نهيت عليها وكفت بسدك كتلك وليدي سدك أمين والبت حلالك.. بس يبوي البت تنازلت وعرسها بعد چم يوم..

كلامه چان مثل ضوة الشمس ع الجزء المتغاضي عنه.. نورني ومن كثر النور عماني..

عاينتله وچن كلامه صحيح..اكيد مو ممكن..انه اكثر شخص يستحرم يكمش مرة مابيناتهم شي رسمي .. بوكت هي شبگتني وتتگرب مني اشوفها مبتسمة ع العطر مالي ماحاولت اكمشها.. وهسه وبعد ما صارت لغيري اجي اخرق كلشي شبيت علي.. مستحيل.. كلامي مو وياها ولساني مايطخ لسانها دامها على ذمة غيري..بس الحچي وي عقيل..

ترخصت منهم وطلعت..لكيت ابوي واكف يم سيارتي ويروح ويرجع .. عاينتله وصعدت ماحاچيته ..

مرت ايام ساكت ع الاخير..ولا كلمة حچيت..بس افكاري تحچي براسي.. احس دنابيس بي من الوجع ..كلساع اشيل التلفون اريد اخابر سرور اگللها سمعيني صوتها بعدين استغفر واتعوذ.. لا مو هيج رائد.. ادور سمعت بيها مريضة ..اويلي يابة ماتتحمل هيج ضعيفة..  بهالأيام كلشي طلع بيدي سويته..تعاركت وي عقيل وكتلته.. ناس فاككونا بالشارع ..رحت لعمي محيي كلت عسى ولعل يتراجع وينطيها.. هددته..هددت عقيل افضحه يم الكل يشرب وابو نسوان..حتى مرته وصلتلها گتلها شيطلع بيدج خربيها لاتخلين الزواجة تصير..بس الظاهر هي قابلة..

وبليلة گاعد بالغرفة ادخن والسلاح ع الكومدي.. الشيطان وزني .. اكتله خلاص..حتروح مني وانه ماصدكت اشوفها.. كمت طفيت الجگارة واخذت السلاح خليته بخاصرتي وطلعت من كل عقلي..سقت لبيتهم ضليت واكف بره نص ساعة..طلعت السلاح خليته جدامي..
شلون تروح مني..مدااصدك تصير يمه بقذارته ووصاخته.. دخيلك يالله .. استغفرت وتعوذت..اذا كتلته انسجن وتنذب الرتبة مني وانه توني مترفع مقدم..رجعت للبيت ضليت أحوم بالغرفة..باكيت الجگاير خلص..طلعت افتر اريدلي محل مفتح ماكو.. حظر تجوال ..بالاخير رجعت طبگت السيارة بالگراج ونمت ماطبيت للبيت..

مرن يومين وبالثالث سمعت اليوم عرسها..يايابة روحي شاغت.. مايطلع حلم..روحي دتنوخذ مني جدام عيوني.. شسوي بعد.. اكو شي ماسويته..نهيت عليها..اشتريت بيت.. اداينت من كل خلگ الله..كلشي راده ابوها جبته يمه بس ماياخذها مني.. تعاركت وي الكل..عقيل وابوها وعمامي.. انه المحد ماد ايده علي حتى لمن چنت طالب مدرسة اجه محيي زورگلي عيني بس سكتت ماكبرتها..كله علمودها..

بيوم العرس گلت اروح وساعة على ساعة فرج..عاركتهم..نار صارت براسي لمن شفت عقيل لابس بنطرون وقميص مال عرسان.. بيه مابيه من بينهم كلهم دفرته شگيت القميص وضربته بوكس.. : هاي بمكان الضربة بيوم عقدي ياگواااا...

فقدت علي منين ما اضربه تجيني اقوى..لحدما حسيت على ابوي سحبني من ظهري هو وعارف..طلعت منهم بس روحي هناك.. ابوي يحچي وعصبي وانه گلبي موچر عليها.. حتروح لبيته.. وهيج بيني وبين روحي گلت دخيلك ياعلي راحت دنياتي مني..

صعدت بالسيارة وابوي بسيارته.. ماردت اروح ..طبگتها بعيد ابوي عباله رجعت للبيت..
اجه يحاچيني : لك يمعود امشي للبيت دخيل ربك..
رائد : يابة روح انت..عارف يمي هسه شواي واجي لايضل بالك..
ماقبل يروح متت يله قنعته..

ضليت گاعد بالسيارة وادخن..مااعرف شگد مر وكت بس لمحت البدلة البيضة من الباب..لحدما شفتها شبگت ابوها.. ااااخ يبعد الروح.. عيوني دمعت ..گلبي عبالك بي نار ديحترگ.. تانيت الزفة تخلص يله رحت..سقت لبيت عارف مارحت لبيتنا.. خابرت ابوي..
حامد : ها يابة وينك تأخرت..
رائد : حبات يم عارف لايضل بالك..
حامد : روح بس تعال الصبح لاتبطي..
رائد : ميخالف..

اخذت عارف ورحنا لبيته..عاينت علي وانطيته السويچ : روح جيب شي زين..
عاينلي متفاجئ : شجيب خوية..
رائد : سم وزقنبوت..
عارف : لا يابو خيولي وينك وين الشرب خوية لاتسويها..
صحت بي : جيب نعلعلا شرفك لاتضوجني.. گلبي موچر يايابة الدنيا شكد صغيرة..
اخذ السويچ وطلع..اويلي يابة راحت مني.. هيج صافن ع الحايط داادخن وتخيلتها يمه.. بيني وبين روحي ماچنت اتخيلها بهيج وضعية..هسه شجاني .. ماادري بس كون ماي بارد ينصب على گلبي..صدري ضاگ علي حتى النفس بالگوة اجره..

وره ساعة بهالحدود اجه عارف جايب خوش..كرزات وحب.. گعد يسويها ويرتب الوضع..اخذت گلاص واتحسف على روحي وعلى كلمرة چنت احرم الشرب علي..هسه هيج انه اجيته برجليه.. طعمه يلعب الروح..بس تناسيت الطعم لمن شربت اكثر من واحد.. فقدت كمت اشوف كلشي اربعة ..ماحسيت بشي بس اذكر چنت ادخن ودموعي تنزل بدون صوت .. اهجسهن نار دتاخذ مجراها على كوم قش..صار سنين ماباچي..حتى ناسي شنو السبب البچاني بذيج السنة.. اجه عارف جدامي انطاني ماي..
عارف : غسل وجهك يابة..راحت بعد..
اخذته من ايده خليته يمي ماغسلت..هسه بحضنه..عاقد عليها يعني مرتي ولا مرة تجرأت ابوسها من شفايفها..اگول بعدها بت بيت وتحسب هالشي مايصير بس لمن تروح لبيت رجلها.. هسه هذا الخسيس كمشها..حيأذيها هالقندرة..بعد متزوج ومتعود يحسبها مثل مرته فيتصرف بدون حساب..
صحت : دخيلك يالله..  بچيت ومخلي ايدي على عيوني.. تبهذلت حالي من اسوأ لأسوأ..

مااعرف شلون خلص الليل..غفيت الفجر..  كعدت الصبح راسي يوجعني وجع موطبيعي..كمت اكعد بعارف.. : حطلع للبيت يول تعال اقفل الباب..
كام رأسا كال : لاتضل تاكل بروحك..سويت العليك واكثر..
خليت ايدي على چتفه وطلعت.. طبيت للبيت كلهم نايمين .. عندي نسخة من المفاتيح دائما اخليها بالسيارة خاف يصير مايصير.. ففتحت الباب ودخلت..رحت سبحت وغسلت الهدوم ماخليتهن وي الباقيات..شريتهن وره البيت ودخلت نمت اريد يروح الصداع دمرني..

كعدت العصر على صوت التلفون يدك..عارف..
جاوبته : ها يابة..
عارف : خوية انه بالمستشفى..
كمت بالعجل وذبيت الغطى : ياستار شكو..
عارف : والله والدتي متخربطة وجبتها..تعال اخذني.. طلعت مستعجل حتى كروة مااخذت..
رائد : هسه جايك بس ابدل..

سديته وكمت بدلت ورحتله..الدكتور كال بعدلها أبرة ماادري ماليش تاخذها يله تطلع..  كعدت بالانتظار..عارف راح يشتري الأبرة انطيته فلوس يجيبها.. شواي واسمع صوت وحدة تصيح بحدية : رجاءً يعني اكو شي اسمه تعامل واسلوب..البنت من هيج تنوخذ..
مااهتميت كلت يجوز مشكلة ويامكثرهن..  دقايق واجه عارف يعاين ع الممر الچان يطلع منه صوت الصياح..
عارف : هاي بت عمك دنوة جايبيها هنا..
وكفت على حيلي وگلبي يتصافك .. : منو وياها..
عارف : ابوها وبعد نسوان ماادري منو..
رأسا طخت ببالي..ااااخ والله عرفت..اويلي يابة شصاير بيها هسه.. كعدت بيأس وگلبي يدك سريع چنه يريد يطلع من صدري..

خنگني المكان..ماادري شلون مشى الوكت واخذت عارف وامه رجعتهم للبيت وطلعت لبيتنا..لكيت امي تحوم علي.. اجت باستني وتحاچيني..
الحجية : شونك حبيبي يمة لاتخوفني عليك..وين چنت..
رائد : لاتخافين ماكو شي..ام عارف متخربطة ورحتله..
الحجية : يله حبوبي تعال فوت صبيتلك اكل ماماكل من البارحة عمت عيني..
رائد : اسم الله لاتحچين هيج..
مشيت وياها للمطبخ تغديت.. يومين والتحقت ....

يتبــــــــــــــــــــع...................