Selam
ليث : و عمبالك وين راهم ولا راكي تخلطي برك
زينب و هي تتمعجن : امممم يكونو درك راقدين مع بعضاهم حرام تروح ليهم
ليث : ر&/ قوليلي وين راهم و انا ندبر راسي فيهم
زينب : منيتك نقولك
سمعو محرز( حطها في القول ) يبكي و بما انو ليث ذكي جداً راح يجري ليه مع الاول سكتو مي كي جات زينب ماحبش يمدولها هز سلاحو ( كان مزال لابس لاتوني )
ليث : تتحركي يروح بنك
زينب تشوكات ناضت تبكي : لالا تعيش بني واش دخلو ياك صغير مادار والو واش ذنبو
ليث : ذنبو انو امو ميش انسانة تخمم غير على روحها سوو بلاما يكبر المسكين و يعرف حقيقتك لي ماتشرفش ههه
زينب : ليث نعرف ماتقدرش تكون بلا قلب للدرجة هادي
ليث : بلعيييي وين تعرفيني اااه
و دار السلاح على راسو و قاللها : و درك خممي يا تقوليلي وين راهم و تدي بنك و ياويلك و تكذبي عليا و تهربي من السماء نجبدك من الارض نجبدك ، ولا تحبي تسيقي دماوات ابنك و تديري جنازة صغيرة عليه ، القرار في يدك
سنان : ايييييييي ليث تي شبيييك سيب ولدي ( تونسية اصحبي مانلعبوش )
ليث : زينب هايا
زينب : ماعمباليش اكزاكت وين راحو بسك قاللي نبدل لبلاسة خلي لغدوة و روح
ليث : امممم اوك خيرتي دوزيام شوا معليش
زينب : نووووو والله ماني نكذب قاللي نبدل لبلاسة مي ماقالليش لوين هاه ديجا درك نعيطلو
عيطت مي تيليفونو مسكر
زينب : والله ماني نكذب ماعمباليش وين راح يروحو
ليث : امين ارواح لم حوايج الطفل عندنا ضيف الليلة
امين قدم جهة ليث و قاللو : منيتك و شكون راح يتهلا فيه
ليث : هزهم و بلع عليا
امين : هز وحدك
ليث : امييين
امين : سامط / راح لم حوايجو بالسيف هو يهز و زينب تكارشي فيهم
خرجو من ثم راحو للدار ليث عيط لتيم يجيب معاه زوج خدامات علاجال لبيبي ( و نظن عرفتو شكون ) لمزية رايحين في طيارة بسك بطوموبيل يباتو في الطريق وي
ليث مالقا مايدير عمبالو بلي ماخرجوش من لبلاد برك
امين : ليث واش راح تدير
ليث : والله ماعلابالي لي نخمملها نلقاها ميش هي
امين : ونتا صح آمنت زينب ، يعني تقدر تكون مريم خ....
ليث : ااسسس ، مريم نعرفها ماتديرهاش اصلا هي تكرهو
امين : تعرفو ؟؟؟
ليث : وي تلاقيناه عند دايفيد هدر معاها و مبعدا تبعنا للدار و قاللي بعد عليها و لخرطي هاداك
امين : ياسوبهان الله على هاد العباد كيفاه مصورين ، مي هادا ماعندوش ذرة رجولة
ليث : ....
سكت كي سمع محرز يبكي راح يجري ليه هو و امين
ليث : و درك هادا كيفاه نديرولو
امين : ربي يسهل عليك نتا لي جبت البلا لدارك
ليث : بلع تهدر على ملائكة هكذ
امين : لي يسمع مايقولش بلي نتا لي كنت شعرة و تقتلو
ليث : باه نخوفها برك ، الخطرة الجاية يروحو يتعلمو هي و شريكها كيفاه يخطفو الناس و شكون ي....
سمع تيليفونو يصوني راح يجري وخلى امين مع الطفل
امين : ايييه درك الواحد مايقدرش يكمل هدرتو كي العباد
امين قعد يلعب مع لبيبي( بطلت مانزيدش نسميه ) حتى يهجم عليه ليث
ليث : لقيييييييييييتهاااااااااا
//////////////////////////////////////////////////
نروحو لمريم لي طلعت هي و الياس
الياس : ا انا نعست
مريم : ااااا كي حلات السهرة زيد شوي
الياس : غالي و طلب الرخيس
مريم تمتمت - تمعني على روحك يالرخيس
الياس : هايا لشمبرتك
مريم : الالا حابة نشوف الدار
الياس : شنهي لينارجي لي جاتك في نص ليل
مريم قالتلو بتشناف : على حد علمي رقدت بزاف اليوم
الياس حط يدو على كتفها : صح عندك الحق منين حابة تبداي
مريم نحاتلو يدو : هادي دارك ؟؟؟
الياس : نن تاع جونسون مي لا عجباتك نشريها نورمال
مريم : وانا واش دخلني فيك
الياس : هههههه معليش ، المهم هايا للصالون هو اكثر بلاسة تعجبني هنا
راحو للصالون كبير مايخلاصش و في كوتي كاينة كشغل مكتبة صغيرة وحدها مريم قعدت تدور اما الياس قعد برك اكتاشفاتو ماخلات والو سيرتو المكتبة الصغيرة هاديك هادا اوووكل باه تضيع الوقت ، دارت تلقا الياس راقد راحت ليه بالعقل بالعقل نحاتلو تيليفون و راحت لشمبرتها لمزية حافظة النمبر تاع ليث عيطت هز عليها
ليث : آلو وي
مريم : ليييث
ليث : شكون معايا
مريم : جيلالي ولد قدور صاحب احمد الجزار
ليث : مرررررييم هادي نتييييي
مريم : اونفان عرفتني
ليث :توحشتك ياعمري واش راكي وين راكي تاعمن نيميرو هادا و وين داك الخنثة هاداك
مريم : لاباس الحمد لله مزلت عايشة راني في الدار النيميرو هادا تاع الخنثة كيما قلت و راني في الدار كيما قلت درك نبعثلك وين قدقد و ماتجيش وحدك فهمت ماهوش ساهل اللعب معاه
ليث : هيه و ماتخافيش اوك نحبك و اتهلاي في روحك نعرفك تقدريلو
مريم : ايه ايه ايا صحا سينون يفيقلي
كوبات و قلبها مزال يخبط نص من الخلعة كون يدخل عليها الياس و نص من هدرتها مع ليث
ولات سيبريمات الهدرة و خرجت تلقا الياس مزال بنفس البوزيسيون قلبت التيليفون لجيبو هي جات توقف حتى أوب تتقلب الحالة ولات هي قاعدة في لفوتاي و الياس حاكملها يديها و مقابلها
الياس : خلصتي الهدرة معاه
مريم : ايه و راهو يسالي عليك بزاااف
الياس : ههههههه عمبالك شنهي يعجبني فيك ، ماتخافيش يالوكان تكوني راح تموتي ماتخافيش
مريم : الخوف من ربي فهمت العبد ماعندو مايدير
الياس : امممم و درك نستناو حبيب القلب ولا نبدلو البلاسة ، همممم نظن ماعجباتكش الدار هادي
مريم : اووو ديجا راح تهرب هههه كون راجل خطرة في حياتك و قابل بلاما تهرب كي لفار
الياس خبط الطابلة توالو : اااااااااا مريم ماتخلينيش نتلاح ليك اسكتي
مريم : ههههه و الطابلة مسكينة علاه
الياس حكمها يكركر فيها هي تتعافر مي ماقدرتلوش مهما كان هو ذكر مايجوزش نسميه راجل داها لشمبرتها و سكر عليها الباب
مريم و هي تعيط باه يسمعها : واااااوو للدرجة هادي تخاف مني باه تحبسني مليح ، مي كي يجي ليث عيطلي نجي نتفرج فهمت
قعدت تدور مبعدا بدلت قشها لبست بيجاما مستورة و ضربتها بسبات
4:00 am
الياس كان راقد بعدما خلى رجال يعسو الدار فطن على عياطهم خرج يطل يلقا نصهم مطايشين في الجاردان هاديك كي الذبان ، راح لبس فاست و جا خارج حتى يقابلو في وجهو ليث بلا اي كلمة يعطيه ببوكس لوجهو جابهالو على غفلة طاح للأرض طول و ليث كمل عليه ماحبش يحبس دمدملو وجهو كي عيا قاللو و هو ينهج
ليث : وين راهيييي ويبين ديتها
الياس : تحلم نقولك
ليث زاد ضربو : قلتلك قووووووول
الياس : ...
داخ ماقدرش يهدر ناض ليث قال للي معاه يحوسو عليها و هو تاني طلع قلبو الدار ماكانش
حتى ينطق واحد منهم : سيير كاين الباب هادا برك لي مسكر
راح ليث خبط خبط ماكاين والو ولى قرر يكسرو الباب ، خبطة زوج تحل
ليث : اقعدو هنا
دخل حوس من و من حتى يشوف عبد فوق سرير راح يجري لقاها مريم ، لظ راسها لصدور حتى تكالما هو شوي مي هي مافطنتش
ليث : مريم نوضي حبيبي ( مقتبسة شفت وحد العباد يهدرو هكذ مانيش انا والله ههه) نوضي اني جيت
مي وجهها لقاها تغلي نحا لغطا عليها يشوف في السرير احمر معمر دم
ليث ناض طول متشوكي مافهم والو دار يلقا الياس جاي توالو
الياس : خلاص مرتك ولات ليا
ليث : ااااااااااااااااااا موتك على يدي يالرخيييييس
و انقض عليه مام الياس ضربو ليسونسيال قلبوها بوكسينغ مي ليث كان هبل في راسو كيفاه مس مريم تاعو و دارلها هكداك ، بالسيف باه قدرو يفكوهم راحو هزو الياس دارولو لي ميونت و ليث ماخلاهمش يدخلو توالها هي مزالت في غيبوبة راح دارلها خيمارها و خرج هازها ركب في طوموبيل ديريكسيون للوبيتال تاعهم ، دخل كي المهبول
ليث : طبيبييييبة جيبو طبيبييييبة وين راااكم
علو عياطو هاداك جاو يجريو
ليث : وين راهي جد الطبيبة هادي
جات وحدة تمشي و تتكسل
طبيبة : خير موسيو
ليث : ارواحي شوفيها بركاي ماتتعوجي ، و كون ماتداويهاش روحك نخرجهالك هاياااااا
الطبيبة : اوك اوك جيبها للشمبرة نشوفها
داها للشمبرة حطها و قعد عند راسها
الطبيبة : معليش تخرج تخليني نشوف خدمتي
ليث : شوفيها و انا هنا و ماتكثريش الهدرة
الطبيبة : مي بصفتك شكون
ليث : هادي مرتي ، و درك شوفيها لا السلاح هادا نفرغو في راسك
قالت الطبيبة هاديك الريدو : مانقدرش نخدم و نتا عند راسي اقعد هنا
ليث : بفففف اوك
قعدت الطبيبة هاديك شي نص ساعة ليث ستنا ستنا ولى خرج ، هي زادت شوي و خرجت ليه
ليث : واش بيها ، كشما دارلها ، ضرها
الطبيبة : ........
سلااااااااام
توحشتكوووووووووووم
كنت في العصر البلاانترناتي و عجزت ندير بارت
عجبكم هادا؟؟؟؟
ديقوتيت فيه شوي مانعرف كيفاه جاني المهم
آراءكم
توقعاتكم ، في رايكم واش راح تقوللو الطبيبة و ليث راح يكمل مع مريم ولا؟؟
شااو