Selaaaam
تلقاه امين كان لابس لا توني تاعو و واقف يشوف فيها مشوكي
امين : نتي مريم ياك
مريم : لالا بنت عمها نايس تو ميت يو
امين : بفف مريم فسختيلي قلبي واش جابك لهنا
مريم : رجليا مثلا
امين : نن سيريو علاه جيتي و كيفاه
مريم : ااا امين كشغل ماعجبكش الحال كي جيت
امين : ااه والله والو ههههههههه جيست تشوكيت كيفاه وصلتي
مريم : هههه جا داني ليث
امين : اصبري ماتقوليليش برك علاجال لفوطو تاع تيم
مريم : هي بالذات ( خلود اكملي الجملة لو سمحتشي )
امين : يايماااا على المهبوووول غار من تيم ، حمار عمبالو بلي هو اونكوبل و جامي يخمم في هاداك التخمام و هكذاك و دار رايو
مريم : ههههههه حبيت نهبلو لصقت ، و درك وين راه
امين : يخدم بيانسير ، راح النوم في كاس زيت
مريم : اا مي ماريحش مرره
امين : ماعندو مايدير ديجا راحلو يوم هكداك
مريم : و واش قالولو
امين : قلتلهم نسا لاكارت تاعو في الدار ، و هوما يعرفوه سيريو في الخدمة يسما امنوني نورمال
مريم : و وكتاه يهديكم ربي تفهموني في خدمتكم
أمين : انا كون تديريلي حاجة تؤكل نشرحلك بالتفصيل الممل
مريم : بمعنى ارشيني باه نهدر ، طير عليا ديجا ماعمباليش واش راح ندير مرره ، ايه يعني انا تاني نحوس ناكل
امين : كي تفهمي روحك تلقايني في الصالون نستنا فيك
مريم : ناناك لاه نخدم عليك ، ارواح وجد الطابلة و انا نشوف كشما ندير عفسة خفيفة
امين : امري لله / و راح تبعها للكوزينة جبدت لحوايج لي لقاتهم في لفريجيدار اوكل
أمين : واش ناوية تديري
مريم : اممم شكشوكة و فريت
امين : هاتي نقطع لحوايج
مريم : اوووو لاه تشتي تخدم في الكوزينة
امين : وييي نص حياتي راح فيها
مريم : يو ار ذبااسط اخويا ، غدوة ليالي،، مرتك تتهنا معاك
امين : هههههه انا و تيم نعرفو نورمال مي ليث لاعلاقة معاها اذا دخل لازم يحرق حاجة
مريم : ااه زهري ولد حرام و نعرفو
امين : ههههه معليه عندو ايجابيات اخرى
مريم : مانعرف وين راهم
امين : مع الوقت تشوفيهم
مريم : ايي امين مالقيتش لمقلاة
امين : شوفي لفوق
مريم سوطات سوطات مي الله غالب بينازة
مريم : اععع امين اجبدها
امين لاح يدو جبدها : هههههه سنفورة
مريم : هاهاها نتا لي بوطو
امين : اممم فاقوو
مريم : عمود الإنارة
امين : سنفورة ههههه كنتي عاقلة اسيدي ولا العقلية تاع برا ميش كي تاع الداخل
مريم : ااه انا عاقلة
امين : مريم لي كانت تقرا عندي ماكانتش تقوللي بوطو كيما مرت خويا هههه
مريم : ااا هاديك لازم الاحترام و نخليو الحدود مع لي بروف ، مي درك راك سلفي ( اخ الزوج ) يعني كي خويا لكبير
امين : اووووو صافي بليزير نكون خوك
مريم : ايا صاي كشما تستحق برك قوللي
أمين : اي حاجة
مريم و هي تحرك في شكشوكة : ويي
امين : اممم حاب نسقسيك
مريم : بدينا ههه وي تفضل
امين : ااا والفتي لفيلا خير ولا الدار خير
مريم : ممم للزوج مي لفيلا خير
امين : اااه علاه
مريم : بسك مانقعدش وحدي ثما كاين لبنات
امين : ايا بيان يسما درتي صحبة ثما
مريم : ويي سيرتو وحدة وسمها ليالين
امين : اااه ليالين ايه ناس ملاح
مريم تبسمت بدات تجبد في الهدرة : اااا ونتا وين تعرفها بلي ناس ملاح
امين كان يقطع في لبطاطا حبس : اا اه ا باينة يعني ليث ميش راح يجيب عباد للفيلا لي نديرو فيها كلش
مريم : هممم فيراج و نامن ، نتا شفت غير ليالين
امين : اااع افهمي كيما تحبي
مريم : احم انا كشغل بديت نشم وحد الريحة
امين : التشكوكة تاعك راهي طابت
مريم : وكتاه ناوي تهدر معاها
امين : معامن
مريم : مع خيرة بنت الطاوس على بنت عمها وردية لي عجباتك ، على ليالين علامن
امين : بفف نتي لصقة
مريم : بركا ماتبدل الهدرة
امين : مانعرف اصلا مزلت ماعمباليش مامبا اذا عندها واحد في حياتها ولا و مانعرف عليها والو
مريم : امم انا مانقدر نقولك والو ابار انو ماهيش اونكوبل يعني عندك شونص و حاجة اخرى تقولهالك هي ، يسما ازرب اهدر معاها
امين حكملها كتافها : يااااا مرسيييي ختيتيييي انا والله ناويها للحلال و ان شاء الله تكون قدها
مريم : هههههه انا مادرت والو الصح أوكل مزال عليك و كونك راجل معاها تاني ، و درك شوف لبطاطا هاديك بيدما نوجد صالاد دو فروي
بدات مريم تقطع في لي فروي جبدتهم اوكل و طاحت فيهم اقوش ادروات حتى تقسم يدها
ياس كالعادة لازم تزيد سيكاتريس في يدها كلما تدخل للكوزينة
مريم : شيييت درك كيفاه نكمل
جا امين : اوووو واش هذا
مريم : أحم كشغل ماراكش تشوف في الفوارة لي راهي في يدي
امين : بييي مزلتي صغيرة تقسمي يدك
مريم : ياخويا هادا ميش موس ، شاقور وي
امين : بفف طفلة صغيرة هههه استناي نجيبلك لفاصما و حبة حلوة باه تسكتي
مريم : روح برك رووووح
راح امين جاب لفاصما و قعد يديرلها و هو يعكي ( يتمسخر ) عليها و هي تعيط عليه كي الطفلة صغيرة حتى يسمعو واحد يحمحم دارو لقاوه ليث واقف في الباب
امين : اووو صحبي واش هاداوين
ليث و هو حاكم روحو بالسيف : وي ، من الصباح و انا نحوس عليك و نتا قاعدلي هنا ~_~
امين : يخي عمبالك بلي نخلص الصباح
ليث قدم جيهتهم : امممم ايه ، واش راكم ديرو
امين : هههههه هاني نيتواييلها في جرحها مزالت صغيرونة تجرح يدها
مريم و هي تخبط في رجليها كي لولاد : ااعع امييين اسكت
امين : هههههه لاه راني نكذب
ليث : مريم ارواحي معايا للشمبرة
مريم : كمل قطعهم و ديرهم في لكيسان درك نجي ، هاتلي نكمل للبونداج وحدي
ليث : هاياااا
مريم : بعقلك يخي راني جاية
راح يمشي و هي موراه دخل للشمبرة و جبدها من يدها دخلها لظها للباب بعدما سكرو
ليث : شنهي هادا لي راني نشوف فيه ، من وكتاه و نتي تهدري و تضحكي مع امين اااه
مريم : ليث نحي يدك
ليث : زعما مدايرة حدود مي راني نشوف في العكس بعدتك من تيم لقيتك مع امين مي نتي غرااف
مريم : ليث قلتلك نحي ر@& يدك
ليث : لاه ماعجبكش الحال و لا عجبك كي كان امين حاكمهالك ااه
مريم : ايييييي صااااي واش بيييييييك هبلللت - وجبدت يدها على غفلة منو - مي نتا وليت ماتفهمش خلاااااص شنهي العقلية هادي لي خرجتلي بيها اااه نضالو نعاودو في الهدرة حناا ولا كيفاااه ، شوف تخمامك هادا خليه ليك انا رباني راجل ميش واحد كيفك يجي يقوللي هكذ و هادو يالسي الفاهم هوما اوموا محتارميني و مدايريني كي اختهم فهمت
سكتت دنقت ليه لقاتو مركز في حاجة شافت وين راهو يشوف تلقا يدها معمرة دم
جا راح يحكملها يدها بعدتها و دارت حلت الباب ييب مسكر
مريم : حل عزرين الباب
ليث جبدها من ذراعها : هاتي نشوف يدك
مريم : قلتلك حل الباب
ليث : يي هاتي يدك ميش وقت تيبسي راسك
دارت ليه : ابووون درك وليت انا لي نيبس راسي مليح ، السيد جايني يبريزونتي في روحو يعيط على سوجي و هو ميش فاهمو حتى و يحكي كيما يحب و يزيرلي على يدي و مبعدا نظهر انا لي ميبسة راسي و انا سباب المشاكل ياك
ليث : هاتي نغسللك يدك و ربي و رحمتو
مريم : ايي ماتمسنييش صااااي كرهت المعاملة هادي كل دقيقة تجي ترخسني و مبعدا تولي نورمال ، قالولك لقاوني في الكارطي ماعندي حتى واحد ولا مانقدرش على شقايا
ليث : مي شوفي يدك
مريم : خليها ، نتا شفت غير يدي ماراك تشوف في حتى حاجة - سكتت شوي مبعدا نطقت - ليث اخرج خليني وحدي
ليث : مي ..
مريم : هه يدي درك نتلها بيها روح برك اخطيني ، اخرج علياا ميش حابة نشوف خليقتك ، أفهمني يالز خطرة في حياتك
و دارت نحات العباية ( ماعمباليش واش يسموها مي هاديك العفسة لي نصليو بيها ) راحت قعدت على السرير تستنا فيه يخرج هو راح نحا الفاست و اوووب تلقا راسها في صدرو ياس تحضنها
- سووي ( كيما sorry تاع ميلا { عائلة الاناصالة }
مريم كانت حاكمة روحها باه ماتطرطقش بالبكي بالسيف : اخطينييييي
قالتلو و هي تغلي مي هو زاد زير عليها يزيد شوي يقسملها ضلوعها ، المهم مريم قعدت هكداك تبعد فيه على روحها ، هههه قصدي تدير في حركات برك بسك هو ماتحركش شبر و قعد هكداك حتى يحس فيها حبست و تريكوه بدا يتشمخ ، قعدو هكداك هي تبكي صاي ماقدرتش تحكم روحها
اول مرة تبين ضعفها لواحد ، اول مرة تبكي توال واحد ، يادرا هاد الواحد يستاهل الثقة و المرتبة لي عطاهالو قلبها ولا ( اني بديت نخرط )
هو كانت يدو طالعة هابطة على ظهرها يكالمي فيها حتى حبست بعد عليها دنق في وجهها معمر دموع خدودها و نيفها حومر
ولى مسحلها دموعها و هو يقول : ششش عمري( مرمر تفكرت زينب خخخخ ) خلاص كالمي صاي
مريم كانت تتنفس بالقاوي ، ولى هزها للدوش غسللها وجهها تكالمات شوي داها للسرير مريم تكسلت و عطاتو بظهر ما خسرت عليه حتى كلمة ابار : اخرج
مي كالعادة ليث أكيد ميش راح ياخذلها الراي ، راح من الجيهة الاخرى قابل وجهها قعد على الارض و يدو في شعرها بعدت راسها و دارت للكوتي لوخرى {يسما نقعدو ندورو حنا ياك } ليث ناض قعد فوق السرير و قعد يلعب بشعرها ستناها تنوض تعيط عليه ولا مي هي قالتلو
مريم : علاه
ليث : شنهي علاه
مريم : علاه راك تدير هكذ
ليث : ما مزالش بزاف و تفهمي كلش اصبريني برك
مريم : ههه مزلت تتمسخر بيا ، اخرج تعيش
ليث : تشفاي النهار الاول تاع عرسنا يخي كي قلتلك كلش قلتيلي روح اخرج و انا خرجت نورمال مي درك مانخرجش ديري واش تحبي سبي اضربي ديري لي تحييه مي مانخليكش وحدك ، النهار الاول خليتك وحدك بسك ماكنتيش تعنيلي كنتي بالنسبة ليا وحدة من العباد لي نتعامل معاهم في لي ميسيون تاعي تخلاص لميسيون تخلاص المعرفة تاعي معاهم مي نتي نن ، نتي صاي والفتك وليتي جزء من نهاري مايعقبش يوم عليا بلا مانشوف وجهك ولا نسمع صوتك والفتك، صح مدة قليلة مي ادمنتك حابك تكوني ليا حدي تقدري تقولي تخمام متخلف مزال يحب يتملك هيه صح حابك تكوني ملكي واحد مايقدر يديك عليا لدرجة انو ماقدرتش نتخيلك مع واحد اوخر ماقدرتش نتقبل حتى فكرة انو تباتي بعيدة عليا مع واحد غريب عليك مالغري هو كي خويا و كبرنا مع بعض مي ماقدرتش و اللي كمل عليا كي شفتك مع امين الصباح صاي ماعرفتش صلاحي مرره ، مريم نتي لي ملكتي هادا { و هو يشر على قلبو } مانقدرش نعاود نكسبو درك مره مي نقدر نكسبك نتي ، ماتخافيش ما مزالش بزاف و تفهمي كلش و راح ندير لي نقدر عليه باه تولي ليا
{ جرنان أجدك واش رايكم يخرج عليا نكتب رومانس ولا ماكالاه }
سكتت مي مزال يلعب بشعرها قالتلو : من نهار عرفت صلاحي جامي درت كونفيونص في عبد باه مبعدا كي يبانلي وجهو لوخر مانتشوكاش منو و صح تصرا و نضحك عليهم كي يقولولي تقبلتيها نورمال ، مي نتا غلطت و امنتك من النهار الاول هاه خرجتلي بهاديك الخرجة تاع كلش خطة برك ، و تحوسني درك نولي نورمال ، واعرة يا ليث واعرة عليا بزااف
ليث هبط سلم على راسها و قاللها : وانا ان شاء الله نقدرلها و نقلبك ليا
و هز روحو خرج طوول سمعت امين هدر معاه مي ماريبوندالوش خرج طول
مريم تقلبت منا و منا باه ترقد مي ماقدرتش وااااي
بيكوز راهي جيعانة ولات ناضت من بلاستها غسلت يدها لي يبس الدم فيها و دارتلها لبونداج و لبست هاديك العباية و خرجت تلقا امين ماكانش عرفاتو في شمبرتو راحت للكوزينة تسخن في الماكلة على سعدها و هي هكذاك يخرجلها امين من البالكون ( كاين petite balcon ثما ) هي ماكانش عمبالها بلي كاين طوول
مريم : توبة بسم الله الرحمان الرحيم ، منين خرجتلي
امين : من البالكون ، ههههههه خلعتك
مريم : لالا جيست طيحتلي قلبي لرجليا برك
امين : ههههههه معليه درك يولي
مريم : تغديت ؟.؟
امين : بيانسير و اذا حبيتي نعاود معاك نورمال
مريم : يخي عندك ايسطوما وحدة
أمين : مي كبييرة
مريم : هههههه ارواح اسيدي انا لولة مانشتيش ناكل وحدي
وجدت مريم كلاو و خلصو غسلت لماعن و وجدت قهوة ليها و ليه قعدو هكداك مقصرين امين يحكيلها على مغامراتو في دزاير و واش صرالو و منين تسقسيه على الخدمة يليكيديها و يبدللها الموضوع حتان عيطلها ليث راحت للشمبرة
[ في رايكم باه تهدر معاه خخخخ لاه منيتكم بعد الهدرة هاديك راح تامنو طول يي لازم شوي تعذيب ]
كوبات عليه و ولات عيطت لامها قعدت مجمعة معاها شي ساعة ولا اكثر مبعدا عيطت لماريا تاني كيف كيف قعدت تحكيلها على حمزة لي مهبلها و الخبر اللخر السمانة الجاية يروح هو و اهلو يديولها الخاتم - تولي مختشوبة - مريم كلاها قلبها سخفت تكون معاها و تهبلها كيما هبلتها هي كي راح يخطبها ليث ، المهم عقبت لعشية هاديك و هي مشايخة نسات بيها شوي واش صرا مبعدا خرجت راحت للكوزينة كشما تخلط للعشا حتى يجي امين
امين : ااا مريم كنتي راقدة ؟؟
مريم : نن علاه
امين : بسك ليث قاللي حرق التيليفون و نتي ماهزيتي
مريم ~ يهيهيهييي مزية حطيتو في لاليست روج حتان خلصت الهدرة ~ : لاه شنهي يحوس
امين : عندنا صاحبنا عارضنا للعشا او بالأحرى مرت صاحبنا حابة تتعرف عليك عرضاتك للعشا و حنا رايحين معاك جرة برك ههههه
مريم : ههههههه اوك مي وين ، بعيدة؟
امين : واشمن بعيدة يابنتي يسكنو تحتنا برك هو تاني خدام معانا
مريم : ايا اوك ، مي مزال الحال ندير كاش عفسة هكدا قاطو ولا عيب نروح بيديا
امين : كيما تحبي مي شوفي لحوايج لي يخصوك بسك ماكانش حوايج القاطو في الدار
راحت مريم قعدت تقلب في تيليفون لقات لاروسات لي كانت تحوس عليها راحت شافت في الكوزينة لحوايج و كتبت للي يخصها باه يشريه امين
المهم
وجدت مريم les macarons
و دارت شوي ماكياج و لبست وقعدت تستنا في ليث يجي بيانسير ميش راح تروح وحدها
جا ليث بدل قشو
لبسو هكذ
كي كانو خارجين سبق ليث مريم اللي راحت تجيب القاطو لحق بيه امين
امين : اوووووو جيتو كوبل يهبل الله يبارك - قدم لليث و قاللو - يسما انا نبات برا لعشية
ليث : طير من وجهي لاقدر لا سيدي زكري
أمين : اووو زعما راجل من هادوك تاع عهد سيسيلفو لي يحشمو
ليث : امين عمبالك واش راني نخمم درك
امين : ااااا مادام بدا ليث يخمم انا نروح الحقوني
و هرب يجري بسك اذا قال ليث هكذ اعرفو بلي ختامها ميش راح يكون مسك إطلاقا
مريم : ااا امين سبقنا ، هههه قاللي راهو ميت بالجوع مكراش هادا
ليث قدم ليها : امممم مفهمتش نتي لاه تحبي تهبليني ، لاه تلبسي غير لاكولور لي نشتيها ، مي لافيريتي وليت نعشق في لي لاحمر تاع خدودك
مريم : ااا هاك احكم عليا نشوف خيماري
لبث : هههه هاتي
دارت روحها تسقم في خيمارها مبعدا دارت ليه و هو شبك يدو مع يدها و هبطو لقاو امين يستنا فيهم
امين : كون بتتو خير
ليث : صوني و بلع
حلو عليهم الباب دخلو لدار صاحبو سنان
هو تونسي لي حل عليهم الباب و مرتو تاني لي استقبلتهم اسمها زينب
هي باباها تركي و امها جزائرية و عاشت في لندن و عندها بون بون صغيرووون كيووت يجوز أكله اسمو محرز ( شوي وطنينة ههه)
المهم
سنان سلم على ليث و امين و مريم سلمت على زينب مبعدا سنان جا راح يبونجر على مريم سبق ليث بونجر عليه : ماتبونجرش على الرجالة
سنان :اااه هههه ديزولي ياك سافا
مريم : معليه ، سافا حمد لله ونتيي
سنان : حمد لله
و دخلو قعدو في الصالون مع بعض زينب و مريم في كوتي و لوخرين في كوتي مريم قعدت حاكمة محرز ( جاني الاسم بيزار الخاوة ) تولهت لحاجة منين تهز راسها تلقا سنان يدنق فيها قالت لاعوش راهو مع مرتو ولا ابنو ، ليسونسيال كملت مريم تهدر مع زينب تعرفوا على بعضاهم مليح مي مريم فهمت بلي زينب و سنان علاقتهم ميش مليحة كاي زوجين سبب وي داونت ناو
اممم لحق وقت لعشا مريم ناضت مع زينب باه يحطو العشا خلاو البيبي عند باباه هه زينب كانت تحط في الطباسا و توجد و مريم تدي للطابلة كي كانت مولية تخبطت في عبد ولات للور لقاتو سنان
مريم : ديزولي - قالتها و كانت رايحة للكوزينة مي وقفلها في طريقها -
مريم : معليش تبعد
سنان : زوينة الله يبارك
مريم : pardon ?.?
هو سكتت و هي عقبت عليه زاد لحقها مي راح يهدر مع زينب
سنان : زينب روحي بحذا محروز راهو شيبنا
زينب :اوك اني جاية ، مريم تعيشي كملي هادو برك و ديزولييي بسك لصقتهم فيك
مريم : روحي لابنك برك روحيي
راحت زينب تجري بسك سمعاتو يبكي اما مريم كملت تحط وجدت كلش في بلاطو كي دارت تديهم للصال امونجي تلقا ....
هااااااااااي توحشكوووووووووم
توحشتوني ياك
سبوني بالصف لو سمحتو او بالأحرى سبو زهري المسود بيكوز كنت مستعمرة من طرف أعداء الانترنت تحت شعار " ماكانش قراية ماكانش إنترنت "
المهم كتبت هاد البارت في فترة الاحتلال كنت راح نديرو طوييييل مي قسمتو ل2 بارت باه مايجيش صامط مالغري نجي نحبس تجيني فكرة طويلة و لكن
تنتظركم احداث مشوقة هههه انا راهي جايتني نورمال مي ان شاء الله تعجبكم و واخيرااا راح ندخل شوي اكشن بسك قد ماحبيت ندخلها ماقدرتش بسك حبيتها تبان قصة واقعية مالغري فيها شوي خرطي مي كوفو رواحكم برك
ايه عجبكم اسم محرز خخخخخخ هو انا درتو بسك تفكرت صاحب ولد خالتي تاني اسمو محرز يسما قلت نسميه هكذ وخلاص
المهم
آراءكم
توقعاتكم
اند قوروشوروز