#يمامه_خلف_القضبان# البارت الثلاثين
غدير وسام ....
مصطفى ...💐🌸
الان تستقر الذكريات
نظرة منك ام بعض الكلمات
ستبرح العصافير ....ثم ستطلق الزقزقات
مابال قلبي ...💙كالبحر الهائج ارتعدت فيه النبضات 💓
حملت في هواك ..مالايحتمل وها انت الان امامي تضع ا النهايه .. و كان ماكان بيننا محض سراب .
💐🌸💮🏵🏵🏵
الحب الجنت شايله لزينه حب وعيت عليه كل حركه
كل ضحكه تاسرني .. بس جنت راسم بالي هدف تخرجي ضابط .. وراها اتزوج واستقر عمري متخيلت غيرها بحياتي
تهورت فتره وبديت اتصل بيها بعد ما طلبت من امي تحجي وياهم . واجتني الموافقه اعتبرتها خلص حلالي واليه واكيد مو اني الانظر الها بغير نظره . .. بس للاسف دفعتت ثمن تهوري غالي خسرتها وخسرت احترام ولد خالتي الي جنت اعتبرهم اخوتي .. صح زينه ضاعت مني وارتبطت بشخص ثاتي ومكدرت اعترض لان ربطني سؤ تصرفي الي ماتجاوز كم مكالمه وطلب تنتظرني
تعبت هواي لحد ماكدرت ارجع علاقتي بولد خالتي . وامي الي جانت تبجي ليل نهار على اختها وعلى زينه الي تمنتها عروس اليه .. ذبحتني من كالت شاهين مزوجها لواحد بكده ومزوج . شكد حاولت وياهم بس ماطوني مجال
لحد قبل فتره جانت امي يم خالتي . ومريت عليها من وصلت يمهم شفت بنيه نزلت من سيارة مؤيد دكت الباب ومحد فتحه .. تقربت فتحته من السركي كتلها فوتي
انتي بت مؤيد
وفاء ..ايي
فتت بيها شبه من زينه ضحكت صاير اشوف كل البنات يشبهونها
امي ورا كم يوم كالت تعبت اريدك تتزوج
يمه اذا ماتخرج ماتزوج
واني مافكرت بيه اخوتك كلمن ازوج وطلع واني لوحدي
شبيدي عليج .
بيدك تتزوج واني اخطبلك اريد وفاء بت مؤيد
صدك تحجين يمه اني جنت رايد عمتها واحبها
رايدها لاخاطب ولااعاقد .
عوفي الموضوع يمه
ماعوفه . هسه اريد جواب شبيها وفاء شتفرق عن زينه
ماكدر افهميني العيب لابالبنيه ولاباي احد العيب بيه
اظلمها وياي مااتقبل غيرها
تتقبل انت بس كول اي وشوف شلون تحبها ولك بلسم .
جنها
((((غدير وسام ..)))
جنها نسمة هوا لاتسمع صوت ولا نفس . وحنينه
يمه شرايده لاتحاولين
عفتها وطلعت .. بس وين امي تجوز . خلتني كطعت اجازتي ورجعت للدوام
من رجعت لكيتها قافله طلبت منها تاجلها للتخرج واصلا ماباقيلي شي
بس اخطبها الك
لا
لك يوم .تروح مثل زينه
لا يعني لا ... زعلت مني واجازتين هي متحجي وياي واني امي بعز الهوا عندي من اروح خواتي يتناوبن عليها
ومرات نسوان اخوتي بس هي مترتاح
جاي اطلع للدوام كالت ذبني بيت خالتك
صار يدلل الحلو . .. عافتني وراحت
وصلتها . باوعتلها امي تعبانه وتستاهل اضحيلها هو حب عمري خسرته عليمن مكابر ويجوز مؤيد مينطيها
البنيه صغيرونه وتدرس . اكيد ميوافقون واصلا الحل والربط بيد شاهين صح تصالحنه بس ادري بي بعده ميطيقني
يمه
ها
اخطبيها البنيه بس ماكو زواج اله ورا التخرج وارتب وضعي يله
براحتك
شبيج شو مافرحتي
دارت وجهة مني
شنو مسوي عليه فضل تحلم انت بوحده مثلها
عمي مااحلم .. ومامسوي فضل بس لاتزعلين عليه والتردي يصير بعد
تتزوج هسه خلال شهر
صدك جذب يمه
هذا العندي لشوكت اني اتوسل بيك .خليك لمن تجي فد يوم تلكاني ميته وحدي وكتها عود تندم عليه وابجيلك دمعتين
اسم الله عليج هسه ليش هذا الحجي بشنو مقصر اني
روح مصطفى مامقصر وماخطب الك وانت حر عيش مثل متريد
مو كلنه موافقين
لاتحجي هيج اني البنيه هم ماريد اكسر ركبتها .لو موافق من كلبك لو تسكت
موافق وداعتج موافق وشتردين سوي عسه ماباجر تحددين العرس
نزلت يم بيت خالتي واني داومت خلص وين متوصل خل توصل
من رجعت توقعت خاطبه بس كالت محجيت انتظرك تفكر زين
خلص يمه كيفج
خالتي متخربطه كالت وديني الهم ذبيتها بيتهم ولحكت الولد للمستشفى . لكيتها زينه وصاحيه .
طلعناها وامي باتت يمها . ثاني يوم دك عليه شاهين
لك شعندك وحدك بالبيت تعال تغدا ويانه
صار هسه اجي
وعلى الغدا امي فاتحتهم عبالي بينها وبين خالني امها وابوها هاي طكتها والادهى زينه كاعده شفتها رفعت عينها متفاجأة
مؤيد . كبعي واخذي خالتي العزيزه
لمياء .ها .. والله تفاجئنه الصراحه اني مافكره ازوجها هسه كلت تكمل دراسه
تكمل يمي مصطفى ميكول لا
شاهين . ساكت . بس جنه موافق
زينه الحمد لله شبعت
البنيه اصلا من امي حجت انهزمت
خلصو وصارت مناقشات .وسئلني شاهين شناوي
مصطفى ... عبالي اخطب ومن اتخرج نتزوج بس الوالده تكول هسه
مؤيد . بس اسئل البنيه اذا توافق توكلو لان اني موافق
شاهين .خلص اطي مجال يحجي وياها
ام مصطفى كومي يمه لمياء سئليها عليمن المجال كلنه هنا حتى نفتهم
مؤيد خلص يابه شوفيها خالتي مستعجله
مصطفى فاتت بقه املي بالبنيه متقبل وامها هم جنهاماراضيه .؟؟؟؟؟
(()غدير وسام ))))*****
لمياء ... تعالي يمامه
ولج شلون شسوي
سئليها .
شسئل . مو جان رايد عمتها وتحبه ويحبها شوفي وجهة مبين مغصوب
ومؤيد لاكال نفكر لاتفاجأ راسا وافق
شكلج . شوفي بنتج
تعاي ماما .وفاء . سمعتي الحجي
نعم ماما
شكلتي .
مادري ماما اني اريد اكمل دراسه
اي شلج بالزواج .. ودوخته ادرسي احسن لاحكه
طلعت تركض ..
لمياء ..تريد تكمل دراسه ممفكره بالزواج هسه
مو كتلح تكمل يمي صيحيها .وفاء بيبيي تعاي حبيبتي
نعم بيبي
كعدي يمي
شوفي اني اريدج لمصطاف . تبقين عندي وتكملين يمي والتردي يصيرلج
بس بيبي ..
ماكو بس انت علمود الدراسه والدراسه نحلت بعد ماتردين تجين يمي وتداريني واداريج
وفاء ..💐🌸💮🏵🌹
قررت اخذ كل شيء مني
وقررت انا مجبره ان ابيعك كل ايام عمرري
ان اغدو امامك . بلا اي مشاعر
قررت ان اكتم انفاس حبي حديثة الولاده
وان تصفر اوراق ربيعي قبل الخريف
وان اقبل منك ولو ببعض الحب .
💐🌸💮🏵🌹🌹
طبع الهدؤ غالب على كل تصرفاتي . احب اسوي كلشي بتأني وبعد تفكير . حتى المدرسات بالمدرسه . باي شرح او امتحان ينطوني وقتي الكل يخلص واني على كيفي رغم ضابطه الماده والحلول بس احب اراجع كلشي
احب بيت جدي وبيبيتي هي الربتني من طلعنه بيت وحد جنت اخلصها بجي دائما اجي يمها . وهي تحب شغلي
مرت عموجعفرر نهاد تسميني الفاهيه البارده بس والله مو برود ولافهاوة بس احب اضبط الشي والكلمه اوزنها قبل لااكولها
من فتره واحس كلبي من يشوف مصطفى يظل يرعد
من يوم الشفت ظله خيم على ظلي وفتحلي الباب نظراتي تقابلت ويا نظرات . مجانت تحمل اي شاعر لاحظت اهتمام بسيط سرعان ماختفه ..
بيبي ام مصطفى احبها هواي من خطبتني ا
بصراحه خفت ومن شفت امي مهاويه الموضوع قررت ارفض
بس من حاجتني بيبي استحيت اردها
هو جان مقابيلي معاني وجهة منطت اي تعبير فرحان ضايج مترقب حسيت اي رد مراح يفرق عنده ان كان رفض او موافقه
طلبت مهلة افكر بس حاصرتني بيبي .. متنطي مجال
اضطريت انطي رد بالموافقه
وانسحبت اريد افكر مع انو مو من طبعي اتسرع بقرار بس . .نتيجة الضغط والالحاح .
رجعنه للبيت وبيبي اتفقت تجي ونحجي بكلشي
وجانت مستعجله كلش لمن رجعنه ماما عاتبت بابا
لمياء انت متعرف تكول نفكر اكو ناس نتناقش وياها شبيك نطيت كبعي واخذي
لعد شكلها تردين افشل خالني
لا تطيح حضنه
ليش شبي مصطفى ولد خلوق ومسؤول
ممعترضه عليه بس البنيه طفله شبيك انت هي هاي مال زواج طفله طفله
ولان طفله اطيتها لخالتي احسن ماكو احن منها عليها تعلمها وتربيها وهي هم تدير بالها عليها
ناطي بتك للخدمه
لج شبيج انتي انسب قسمه هاي الها التعرفه احسن من المتعرفه
نقاشهم احتد وصل للصياح والزعل وبالنهايه العناد
ابويه عاند اله اتزوج وبلغ امي تطلع منها فسكتت ماريد ازيد المشكله واختاريت الصمت والموافقه
بعدها بيومين اجت واتفقت على اجازته خطبه وعقد وتلبيسه
وبعدها نقررموعد للزواج
اخذني هي وماما اشترينا ذهب وملابس وجهزوني من كلشي
واخذتلي امي فستان ماروني . مرتب ردن طويل ومكسم
والخطبه اتفقو بيت جدو
مصطفى . بعد ماوافقت البنيه او بعد ماحاصرتها امي من كل الجهات . وخلتها تقبل استسلمت بس موضوع الدراسه ماجنت حابه وكلت لامي ليش اطيتي وعد اني جايبها تداريج لو تدرس وتداوم
كالت معليك اني ادبرها ونهتم بالبيت ودراستها وفاء شاطره
بكيفج بس اذا شفت تقصير اكعدها
لا شنو تكعدها تكمل شكو عندي
رحت لدوامي وامي بدت تجهز كلشي مرات اكول لعد ليش على زينه جنت بارد لو متحركين هيج وخاطبها جان هي اليه هسه ومو بحضن غيري
شكد اتمنى اعرف بعدها تفكر بيه لو عايشه مرتاحه
حبته . استغفر الله
انوب امي راحت خطبت بنت اخوها لو خاطبه غير وحده يمكن ماهتم . بعد ميفيد الحجي والي مسكتني
امي كلش تحبها وتمدح بيها اني شريد اهم شي تدير بلها عليهة وهاي المره الايام مشت بسرعه لان ماريد تخلص
نزلت للبيت
لكيت امي وخواتي كالباته على البطانه وغرفتي مفرغتها وصابغتها باقي بس غرفة نوم جديده طالعه مشتريه ذهب ومجهزه كلشي
اني هم سايرتها وماكسرت بخاطرها
(((غدير وسام )))
وفاء .. اجت بيبي حددت المشيه .لان زوجها الله يرحمه من غير عشيره راح يجيب عمامه ويجي يتقدم اليه هاي المراسم اني ماهتميت الها بيبي كملت تجهيز وخذتني .اني وماما اشترينه
اني استحي توكفني مامد ايدي لمن جزعت كالت شلون
عاد كامت تجيب تكلي حلو اسكت
لمياء ..خاله هاي من تشوفينها شي وتسكت معناها ماعاجبها بس تستحي تكول لا انتي عرفيها من تشوفيها تكلب بشي لو تباوع عليه اخذ بنيتي واعرفها
وفاء .جان صدك . هذا طبعي
كالت اختاري شكم قطعه وبعدين اطيج فلوس وروحي انتي وامج اختاري براحتج
بيوم الجمعه .رحت للصالون ولبست الفستان الماروني الاخذته ومكياج خفيف بس الحمره طوخ بلون الفستان
من كملت .ماحبيت لون الحمره حسيته اوفر هواي بس جان مات صعب امسحه والكل ماقبلن اغيره رجعنه للبيت . بيبي جايه ويمامه والكل بس عمه زينه لان حامل يخافون عليها من الطريق كامو همة يرحو لها
ماما مجهزه كل ترتيبات المهر الصينيه وبيها كلششي ابيض
ونبات السكر والمي ورد والياس حتى جابتلي مثل الكبوس مكتوب اسمي واسمه كله جهزته من النت
من رادو يعقدولنه نطتني السكر نبات وكالت خلي تحت لسانج من يفوت هو بعد العقد انطي اله
وبس كملو العقد طب يلبسني اشرتلي امي . اطيتهيا وهو بيبي مفهمته على هاي الفقره . اخذه وخلاها بحلكه ويضحك على بيبي فدوه صفنت بضحكته تخبل
اندار كال مبروك
وفاء.. الله يبارك بيك
لبسني الذهب . وكعد شويه بعدين طلع وراها بدت حفلتنه سوا بنات صديقاتي عزمتهن والكرايب
صارت حفله ولمه حلوة . لليل رجعنه لبيتنه بس مادري ليش ماحاسه بفرحه واكو شي مبهم مافاهمته
يمامه .. بالخطوبه . شاهين كالعاده تدقيق على اللبس المكياج هذا اي هذا لا .. زينه ماجت للخطوبه وحامها نحس وهم الشغله صعبه على الطرفين .صح تحب زوجها بس هم كان اكو موده بينهم
اكو شغله استجدت . ميوره بس اتركها بمكان شويه اجي الكاها . ناطه من البجي . تخبلت جهالي طبعهم حلو يحبون اهلهم .يعني اذا بقو يم بيبي لو ابوهم لو
يم عمهم عادي بس ميار الها فتره هيج والاغلب من شاهين هنا كلت يجووز تريد ابوها وهو من يسمعها تبجي يفقد سكتيها
مره فتتلها لكيتها بغرفة امي مفرفحه امي جانت بالحمام كالت هسه عفتها لحكني هو كال ضاربتها
لا والله
لج خدها احمر بت الاوادم مو اكلج لاتضربيها
باوعت صدك خدها احمر
طبعا شاهين فقدت مصداقيتي عنده من كتله مضاربتها وبعدين عرف اني ضربتها كام كلما يسمعها تبجي كال ضربتيها .
كمت اشكلها على ايدي واشتغل صارت كلش نحسه وبس تبجي . ومتريد احد بس اني وابوها يعني من شاهين بالبيت ارتاح ياخذها واكمل شغلي
امي كالت هاي محسوده على سوالفها وحلاتها وهي سمينه وبيضه تنكرط .
قتيبه .. طلع صارف هواي من فلوس شقته وعلى شغلات متسوه وهو هذا القاهر امي ومتخربطه تكله ليش تصرف بيهن على شغلات مابيها خير شوفلك بيت شقه
فتت مره وسمعتها تحجي ويا ويه شاهين
شاهين .اني كل العندي صرفتهن واصلا اداينت من امي
قتيبه شلون يعني بيت ململم وحلو اضيعه علمود جم مليون اطوني من حصة زينه وارجعها
شاهين حصة زينه محد يمد ايده عليهة
.اني اخابرها وادين منها .اذا انتو كلكم شلتو ايديكم مني
شاهين ..انت خبل فلوس هلكد بضرف كم شهر وين صرفتهن وشنو اليستاهل وجبته اشو ماشفت عندك شي جديد
قتيبه انصرفن بعد
شاهين جيب الباقي يمي واسويلك سلفه ويا جماعتي يقبضوك اول اسم و وكمل فلوس البيت
اتحسر واستغفر .
يعني ماراح تنطوني انت امي
شاهين لو عندي ماتاخر عليك بس فتت بيهن بشغله وهاي امي كدامك يمه خذت منج فلوس لولا
.اي والله اطيته كل العندي شوف ذهب مرتك
شسالفه يمه عروس ابيعها ذهبها
غير تريدولكم بيت
حتى لو شنو اكلها اطيني
بدون ماتكول هي مو مرتك وتشوفك محتار على الفلوس
عوفو خيولي ااجر واطلع
ليش تطلع احد يمك
والله امك ومرتك حاطاتها بالهن وممرتاحين
شاهين .. رجعنه ليش شحجينه احنه شغل النسوان لاتتدخل بي ولاتنطي اذانك لمره
سمعت ميار صرخت رحتلها ولج ماما شبيج .
اجه شاهين شكو متكليلي شبيها
مادري والله مادري كمت اصيح اظل معلكتج بركبتي ماعندي شغل وعمل غيرج
شاهين وجع صوتج لاتصيحين متشوفيها مفرفحه جيبيها ولي كملي .اخذه سكتت يمه بس تشهك
شويه وصاح .
شاهين . اكلج انتي عاقله مخبله اكو طفله بعمرها تنكرص هيج كرصه .
شنوووو
شوفي طلع زرها ازرك مال واحد شالعه لحمه منها ولاادهي لكه وحده زركه بجتفها
لزمتها بوستها سوده عليه هاي شنو
اي انتي ضربي بيها وانوب ظلي ابجي وبوسي بيها
يمامه .شاهين تتصور اني هيج اسوي بنتي
لعد منو ام الرشديات
هي مره وحده وحلفت ماعيدها
خذتها وكلساع اباوع عليها وابجي ومن يومها كلت بنتي ابد ماعوفها .
بس شاهين شيقنعه شبه متاكد اني الاضربها .
وكلب خلقته عليه
ومن راح للداوم وكف يمي وفاجئني من كال
يمامه بروح ابوج لاتضربيها بعد
يمامه شاهين وروحه لابويه ماضاربتها هي مره صارت واني حلفت مامد ايدي
راح ونظرات الشك ماليه عيونه . واني خايفه من الجاي بيت كثرت بي عداوات اليه وماكمت اعرف منو غريمي الي يريد ينتقم مني بنتي صار هاجس عندي ماتركها ولالحضه حتى يم امي ماامن للحمام افوت ركض واقفل باب الغرفه عليهم . ومن اشتغل محمد اخلي بكرسي وهي شايلتها بس اذا قريب للطباخ انيمها بالمطبخ وعيني عليها
........................
زينه ... خالتي ابد متخليني وهذا الشي خله اسماء تحتج وتشتكي لفريد . تكله كل الشغل عليه واني ماعايفتها اشتغل خفايفي بس خالتي متخليني ورغم حجيها اكوم للمواعين بلوجبات اغسلهن بس كنس مسح لا
الملابس بس اخليهم بلغساله وخاله من اكمل تكلها انتي شريهن هي تشيل نفسها وتلطخها بالكاع واني مرات انقهر لان اخلي نفسي بمكانها اذا احد هيج عاملني اكلب الدنيا
مره سمعتها تشكيله ..جاوبها
فريد .. اسماء زينه تعتبر تمر بفتره حرجه وان شاء الله من تعدي فتره الخطوره راح تشتغل حالها حالج يعني هذا وضع مؤقت . اعتبريها مموجوده
عفته يحجي وياها وفتت لغرفتي
فريد مساء الخير شلونج اليوم
زينه ... الحمد لله .
تغسل
اي اسماء حضرتلي الحمام .هسه اغسل
يعني احضرلك الاكل
ياريت عيني لان جوعان من الصبح اكلت شويه
من عيوني تطلع تلكاه جاهز
رحت للمطبخ لكيت اسماء تحضر .وكفت يمها شاخذ تجره من ايدي .
روحي عيني لاتصير علينه قصه
زينه . رحت كعدت مالي خلكها .طلع فريد شافني ابتسم .كعد يمي لزم بطني شلونهم الحلوين
منوووو
هههه انتي وابني
ها تفاجاة منو الحلوين . هههه الحمد لله
اي شكو ماكو
غدير وسام )))*****
ماكوو ضوجه حتى شغل ميخلوني اشتغل
ميخالف حبيبي تحملي فتره وراها كل الشغل انتي تكملي
امممم .. اريد اطلع ضجت
فريد ..باجر اليوم تعبان
تقرب همسلي ومشتااااق
اجت اسماء جايبه الاكل .كعدت كباله بالكاع واني بقيت على القنفه
تعاي اكلي
شبعانه .بالعافيه
الله يعافيج
اسماء ... وديني لاهلي عندي مراجعه للدكتوره
صار . شوكت تردين ترحين
اذا تكدر ورا الغدا لان ماما حاجزتلي
تمام جهزي نفسج
زينه اشو اني اكله يكلي تعبان وهي بس حجت راسا وافق .. باوعتلهم صفح ورحت لغرفتي .. صاح سويلي جاي وحضريلي ملابس طلعه
صارر.
ذبيت الجاي على النار ورجت طلعتله قميص اسود وبنطرون جوزي .. جواريب وحذاء . رتبتله شيحتاج
لكيته يغسل رحت اصبله الجاي
اسماء رايحه ابدل .عود غسلي المواعين . وياج
تمام روحي كملت المطبخ شفتهم طلعوو
فريد محتاجه شي
لا .
يله في امان الله
الله وياكم
كملت المطبخ ورحت تمددت
كلبت بالفيس والمواقع خابرت على يمامه مشتاقتلهم
الووو هلو زيونه شلونج
الحمد لله وانتي شلونج .الجهال شاهينوو امي
الكل بخير
امي زينه
الحمد لله احسن بس تتعب بسرعه صايره حتى الجهال مالها خلكهم
سوده عليه . ديري بالج عليها يمامه فدوه
لاتوصيني امي هاي الله شاهد احبها مثلها واكثر
فدوه لكلبج اني ماامن بغيرج
امني وارتاحي
شأخبار العرسان
منو وفاء قصدج .. مادري خالتج مستعجله تريد تسوي العرس هسه ومؤيد كلها خلي تخلص السادس
زينه . وهو
مادري مشايفته
الله يتمملهم على خير
يمامه ..زينه شبيج خوما ضايجه
لا بس ؟؟؟؟ مادري شلون اوصلج الفكره .صح احب فريد ونسيت كلشي بس اكو غصه مادري شنو يعني تمنيت يتزوج .ويعيش ..بس مو وفاء
شنو الفرق
لج شلون .. شنو الفرق هاي بنت اخويه اتمنالها الاحسن مو تتزوج واحد كلبه ويا غيرها
الله يزرع الحب والموده بينهن
بقينه نسولف ..الى ان قفلت من النعس كتلها راح انام سديته باوعت وين صار التعبان اشو صار ساعه من طلع مو على اساس يوصلها ويرجع
فات للغرفه بأيده علاليك وعلب كومه
باوعتله
هلو
زينه هلوو شنو هاي
شفتج متشتهين شي ولاتطلبين جبتلج حلويات عصاير . حتى من تشتهين كلشي يمج
امممم فتحت العلاليك كلشي جايب بس اني ماشتهي ابد رتبتهن بلثلاجه
كعدت يمه بدل لبس شورت وفانيله .. جرني لحضنه
وباس ركبتي . باوعتله . ضحكت
شبيج
ماكو شي . تاخرت
وصلتهن يم الدكتوره . ورجعت كالت انتظرني بلكي اخلص تالي طلع سراها يتاخر رجعت وامها تجيبها
اها . مو كلت خطيه تعبان
ليش احس بنبره صوتج شي غريب
شلون يعني
يعني تتكنين عليه
لا يابوي واني اكدر
احجي زينه بكلبج شي كولي
اي اكو ليش من كتلك نطلع كلت تعبان وهي بعدها ممكمله ركضت وديتها
باوعلي ... انتي ردتي طلعه تغيرين جو هاي يرادلها بال صافي وراحه . انما هي بس اوصلها وثانيا موعدها من ذاك الشهر منتظرته هي واي تاخير لازم تنتظر شهر لاخ
زينه .شفتهمت هسه اني
حبيبتي .اني ممتعاجز منج ولاكايلج مااطلعج بس اكو مهم واكو اهم
ها .واسماء اهم
لج انتي ليش زعطوطه وتفسرين الكلام بلي يعجبج
يعني اكلج مراجعه عدهة وموعد يتاجل لو طلعتنا الي شوكت ميعجبنه نطلعها .
ماريد .حتى الطلعه ماريدها
مو اكلج زعطوطه والنوب خبلاات الحمل وياها لا والله طكن فيوزاتج .
ابتسمت جذب.هههه متضحك
جرني هسه زعلانه انتي واني كلت البيت فرغ والجو خلا النه
ماااااا ماحبك
اه ..
والله
بس اني احبج واموت عليج
باسني بين عيوني . وخدي وخر شعري وباس ركبتي .
باوعتله واني ذايبه سئلته ..؟؟؟منو تحب اكثر اني لو اسماء
باوعلي باستغراب
زينه ..لا تفكرين هيج . اثنينكم احبكم والكم معزه خاصه
اريد جواب
ماعندي جواب
يعني متحبني يتبع ...
مساء النور . هذا البارت خصصته للتعريف عن ابطالنه الجدد
وفاء ومصطفى الي راح يكون الهم قصه ضمن سطور قصتنه في الايام القادمه .. قرائه ممتعه
دعم للحلوات بدون امر عليكم .تابعوهم
https://my.w.tt/sTZfOoz0s2
https://my.w.tt/RDlAwdq0s2
https://my.w.tt/wCuLKNx0s2