اسألي عني الليالي

البارت ٦

الــبــارت الــســادس............

اجيت كعدت يمها رادت تكوم وكمشتها..
محيي : صبرج علي يبت الحلال.. انطيني مجال اشوفج واتگرب لروحج اكثر.. صدكيني كامش روحي عنج لخاطرج.. بس هلمرة صرت أناني.. انه عصبي وطبعي صعب ماارضا بشي بالعجل.. انتي صرتي شريكتي.. بعد كلشي يصير هنا مايطلع باب الغرفة..
هدى : يعني ماتتخلى عني..
محيي : لا مااتخلى.. شني ناقصج شي واعوفنج..
كمت بستها من خدها وراسها واجيت تمددت .. شبگتها واطمنها مااعوفها..

مرت تلث أيام بالليل صعدت أحضر هدومي لكيتها مجهزتلياهن حتى الكتب والأوراق شادتهن بمثل الرباط بس مال كتب.. كاعدة يم الكنتور تصفط هدومها.. كعدت يمها حاوطت چتفها..
محيي : ماشفتج اليوم..
هدى : اي چنت يم عمة.. وأمي اجت..
محيي : صدك.. شوكت..
هدى : العصرية هيج..
محيي : هاي جنيوة خوما حچت شي وياج..
اندارتلي وضحكت : لا تخاف منك..
محيي : اي تستاهل.. كومي اريد اطفي الضوة باچر اروح الصبح..
كامت وانه رحت طفيت الضوة.. تمددت واجت يمي.. بين غافي وبين كاعد أسمعها تهمس يم إذاني.. : يصير ماتروح.. وعلي أخافن بلياك..
حسيت على شي دافي صار على رگبتي.. كمشت ايدها وعدلت كعدتي..
محيي : شبيج بوية..    شبگتني وتبچي..
هدى : أهجس روحي وحيدة لمن تروح..
محيي : ليش مو أختي يمج.. أمي..

هدى : ادري بس چن يحسبوني صغيرونة ومااعرف.. انه كبرت مو..
محيي : هههههه.. دورات تبينين چبيرة دورات لا.. شون بهالحالة..
هدى : اي شفت.. يعني مايتحملوني..
محيي : ميخالف بوية.. چم يوم واجي.. وانتي حبابة ماتسوين شي غلط.. چا هذول العساكر شيكولن نسوانهم.. اكثر من نص الشهر بره البيت..
خلت ايدها على حلگي وتقربت مني : لاتحچي هيج.. غير أموتن..
ابتسمت ووخرتها.. بست خدها.. : شوفي هسه چبيرة..

الغرفة ظلمة ويادوب اشوفها.. بس احس بحركاتها.. حطت إديها على خدي واهجسها ترجف..
هدى : محيي.. ارد اگلك شي..
محيي : اسمعنج..
هدى : انه.. انه احبنك وعلي.. هيج اضل اتفرج على طولك لمن تمشي وتصيحني اجيبلك أكل لو شي ثاني.. انه خدامة الك..
محيي : شني هالحچي هذا بابا انه چم مرة فهمتج لاتحچين هيج..
هدى : شسوي.. غير احبك..
محيي : اي بوية الحب مو بهالشكل.. مايصير.. انه رجلج مو شي ثاني خاطر تصيرين خدامتي..
هدى : اسفة..  زين انت تحبني..
محيي : هداوي وراي طريق.. خليني انام..
هدى : احچي حباب فدوة..

كمشت إديها وبستهن بهدوء.. شكد ترفات هي مدبدبة وبيها ضخامة.. تعجبني هيج.. : اگلج احبنج وبعدين.. انه احبج بأفعالي.. الحچي سهل..
سكتت ماحچت.. مااريد احچي شي مامتأكد منه.. اكدر اكللها احبج بس تتعشم حريمة.. شبگتها ونيمتها بحضني..

ثاني يوم الصبح خليتها نايمة وطلعت بهدوء.. اخذت قاسم ولواء وطلعنا لبغداد.. بلشت الامتحانات واشوف زينب متغيرة.. مااهتميت كلت ضغوط الامتحان وعادي.. الى أن آخر امتحان طلعت بره انتظر قاسم يطلع وگاعد ع المصطبة.. الجو بي حرارة.. اجت وكفت جدامي..
ورأسا بدون سلام حچت : سمعت متزوج..
رفعت حاجبي باستغراب : شمعلمج..
زينب : سمعتك تحچي ويا اخوك ذاك اليوم عن وحدة اسمها هدى.. هي هاي مرتك مو..
محيي : اي مرتي.. شني سؤالج هسه شرايدة..
زينب : ردت اگلك انت شايف بغداد وتعرف طبعك بغدادي.. المفروض متاخذ وحدة أمية وكلشي متعرف..
كمت على حيلي اريد اصيح بس كامش اعصابي : وانتي شني بوية.. المرة مرتي وانه مرتاح وياها.. عندج شي وياي.. أمية دارسة همجية شعليج..
عاينتلي ودموعها نزلت : للأسف متوقعتك هيج.. عموما.. الله يوفقك..

دارت وجهها تريد تروح وندهتها : تعاي جاي.. شني هالحچي الماصخ.. انه عشمتج بشي وماوفيت بي..
سكتت..
صحت بيها : احچي.. خاطر اعرف روحي شمسوي..
زينب : لا..
محيي : چا خلص.. مجرد زمالة بيناتنا لاتجين تلفقيلي تهايم خوش بوية.. يله توكلي الله يسهلج..

راحت رأسا.. ادور ماعلي بس المشاكل..  شواي واجه قاسم اخذته ورحت لكلية لواء همات اخذته ورحنا للشقة.. طبيت بس سبحت ونمت.. كعدت العصر نزلت اشتريت غدة وكعدتهم چنهم نايمين نومة الكهف.. تغديت وكملت بعدين طلعت للمحلات اشوف شكو ماكو.. صار هواي ماجاي.. انه ودااتمشى بالشارع واشوف زلم ستة سبعة من هذول الچحنتية (عراكة وضخام) واكفين بباب محل الگصابة.. تگربت اكثر شفت ابوي واكف وياهم.. يصيحون وعلى اعصابهم.. ابوي مايتعارك ولا يصيح چنه حامد.. فديحاول يحچي بهدوء..
- : لااااا ابنك فيصل كاتل ابننا.. وهسه نطلع تقرير طبي شنو تچذبونا احنا وعگلنا..
شامخ : حشاكم بس وليدي ماطالع باب الدار.. منين يتعارك.. عمي تحگوني بشي.. هيانه بيتي يرن بالبصرة كلها.. بس گول ابو كاظم الشيخ..شني ماكلكم انه قابل..

- : شيخنا هذا ابننا شوفه شلون عينه مزورگة من وره ابنك..
شامخ : بوية هذا باب رزق.. مامسموحلك نهائيا تجي اطالبني بحگ انه مامتأكد منه بهالمكان..

صحت بي : انت شمالك ماتعرف تسولف.. دنگلك بيتنا مفتوح وبيك زود جيب تقرير طبي.. مابي شي هياته مايطگه عرج.. بس لنكم عراكة ونصابة تردون تاكلون فصل عدنا..
واحد منهم صاح : اذا ماناخذ فصل ع الكتلة ناخذ ع الحچي هذا.. نروح هسه ونجيكم بالبصرة نعرف شنسوي..
خلى وراح.. ابوي كل مرة يتفشل من وره هذول الطلابة.. كل يومية الله بالخير والهوسة بباب المحل.. وجهه صار احمر من العصبية الكاتمها.. اخذته جوه غسل وجهه واجه بات يمنا بالشقة.. ثاني يوم من الصبح رجعنا..

طبينا للديوانية رأسا..صاح على فيصل.. اجه متفاجئ من عصبية ابوي نادرا يصير عصبي..
فيصل : تأمر بوية..
شامخ : عامر ابن حقي وياك بالمدرسة.. تعرفه..
فيصل : اي اعرفه شبي..
شامخ : انت طاگه ويردون فصل مني هسه.. احچي الحگ خاطر مااتفشل جدام الوادم..
فيصل : لا والقرآن ماكتلته بوية.. هو گبل آخر امتحان اندگر بيه وهملته.. ماطگيته بريشة.. ادور گام جابلي جماعة باليوم الأخير طگوني سووا علي ولية كمت دفرته ودفعته..
محيي : الولد عينه مزورگة وانت تكول دفرته..
فيصل : وداعتك بوية مااچذب..هو هذا الصاير.. يعني جايبلي جماعة يولوني واسكت.. شمالي خيخة..
شامخ : تعرفهم هذول اذا شفتهم..
فيصل : اي اعرف حگ المعرفة.. ثنين منهم ولد الحارس وبعد چم واحد هنا بيوتهم..
شامخ : خوش هاهيه.. روح ولمن يجون اندهلك اجيب الجماعة وتنفض.. شون طلايب انه اطيح على راسه..

مشى الوكت للظهر واندگت الباب اجو الجماعة.. ابوي كال مانجيبهم احنا.. لا نروحلهم.. علمود خاف ينكرون ويگولون انتم جايبيهم بعد يصيرون جدام أمر الواقع..
شامخ : حگكم يوصل لداركم واحنا الممنونين.. بس عندي حچاية لازم تعرفونها..
- : تفضل..
شامخ : ابنكم عامر وانت أبيه تجون وياي لجماعة.. انه حگاني والحگ مايضيع يمي.. تردون مساعدة افرشلكم العين فراش والجفن غطى.. بس لمن تصير ولية ولعب بالذيال لا هنا نقطة ..انه ولدي مايتعاركون.. لو جاي گايل محيي متعارك وطاگه اي اقبل.. چي ادري بي عراك وعصبي.. بس فيصل والباقين ابد..

طلعنا وفيصل اجه ويانا.. دلانا على بيت الولد.. لمن شافوا فيصل وهذا الولد مكتول جروا بوش.. دخلوا وصارت الگعدة ببيتهم.. راح ابنهم عامر جاب ولد الحارس وابوهم وياهم گعدوا بالگعدة.. ابوي فرهم فر وگعدهم صافي طلعوا بلاية فلس أحمر بس متفشلين.. جابوا شاهد طرف ثالث والولد اعترفوا ضده على يابو عامر لامهم علمود يطگون فيصل.. مسألة غيرة مو اكثر.. انفضت وطلعوا مطوطحين..

رجعنا للبيت العصر.. انه لا سابح ولا مبدل بهدوم البارحة.. طبيت جوه سلمت وصعدت فوك.. اول مافتحت صارت هدى بوجهي.. لافة الخاولي عليها ورجليها مبينات.. زنودها وشعرها ينگط ماي.. توها سابحة.. حسيتها ارتبكت وفتحت باب الكنتور صارت وراه.. ابتسمت وسديت الباب.. رحت تمددت وداير وجهي.. تانيتها تكمل واجت كعدت يمي..
هدى : الحمدلله ع السلامة..
محيي : الله يسلمج بوية.. شونج فاگدج..
هدى : عززه صدك مشتاقلي.. انه همات مشتاقتلك..
محيي : هههههه.. اي وداعتج.. عندج شغل لو مكملة..
هدى : لا ماعندي شي..
جريتها من ايدها مددتها يمي وأشم برگبتها.. مطبگة مرمر هلكد نظيفة.. شبگتها وغفيت عليها تمسد بشعري..

كعدت لكيتها منظفة الغرفة ومرجعة غراضي لمكانهن.. كمت سبحت ونزلت جوه.. هي مثل الكبرت وتصرفاتها موزونة اكثر.. بس أمها مسببلتي عائق.. ماادري ليش هلكثر مامرتاحلها.. لمن تطلع هي تجيني هدى تعاينلي بحزن وتشبگني حيل.. حتى دورات اتفاجئ واسألها تكول ماكو شي..

رجعت لشغل الحلال والمحلات بباب متناوب بين قاسم وكاظم.. ابوي قلل روحاته لهناك لأن كاظم علمه لقاسم ع الشغل.. فبهالشكل صارت.. انه بالحلال اكثر شي والگعدات..  طلعت من الشغل بالليل متأخر.. بالوحدة هيج.. الشارع هندس ومن الجهتين شجر وثيل استوحشت.. ركضت للبيت من لاچارة.. وانه دااوصل بيني وبينه بحدود البيتين واشوف واحد واگف ليجاي من الباب ويحوص رايح راجع.. لمن شافني ابتعد.. اول مافتحت الباب صارت هدى جدامي ولابسة دشداشة گصيفة جوه الركبة بشوي وزنودها طالعة.. توسدنت انه.. ادور مالابسة شال وهذاك واكف بره.. كمشتها من شعرها وسحلتها جوه..
محيي : بت القنادر شعندج بره بهيج هدوم..انعل ابوج لابو بت الكلب..
هي تبچي وكاتمة صوتها : محيي فدوة اسمعني ماعندي شي والله بس ردت اشوفك اجيت يا لا..
شمرتها بالهول يم أمي كاعدة دتصلي.. طگيتها راشدي فريت راسها ودفرتها بخاصرتها كامت تلوب وأمي تستغفر گطعت صلاتها وتتوسل بيه مااطلع.. خليت وطلعت بعد شياطين الدنيا كلها ركبت راسي.. تذكرت مرة ابوي.. مااريد القرص ينعادلي .. انه شذنبي..

بس طلعت شفت الولد ركض.. ركضت وراه ووين مايفوت افوتله.. الديرة ديرتي واعرفها متر متر.. فات بدربونة واجيته من الجهة اللخ كمشته من قميصه انشگ بيدي.. رگعته بالحايط واصيح : قندرة ابن النعال شعندك تبصبص لداري..
- : عمي والله مو يمك والله..
محيي : اليوم اخلي چيلة براسك انت وياها مناعيل الوالدين..
اخذته سحل شبعته كتل.. لحدما وصلت للباب طلعت أمي لابسة عباية وتتلفت ادورني.. اجيت يمها وهذا خرگة بيدي..

شهگت ودگت على خدها : شمسوي بالزلمة لا ماارضا عليك يمة.. هسه افتهم اول شمالك تسودنت..
محيي : هاا تردين اسكت.. وچ انه مااريد ماضي ام حامد ينعادلي يووووم.. البت اذا لعبت بذيالها اگصه لذيلها واگص راسها وراها وحگ هو ربج..

جريته من زياگه دااريد افوته وكمشتني من ايدي تترجاني : يمة دخيلك لايگعد ابوك وتصير چبيرة.. انه دزيتها تشوفك اذا اجيت لو لا..
محيي : لا صدگت هاهيه.. اگلج اذبحها وخري عن طريقي لاتخليني اسوي شي مايسعدج..
الحجية غادة : يعني ماتصدك أمك.. حرام عليك لاتخطي (لاتغلط) فدوة أغديلك يمة.. وداعة طولك انه دزيتها البت ماتدري بالرجال واگف بره.. خالة انت شعندك يم دارنا.. هذا بيت الشيخ شامخ..
- : حجية وداعة عرضي وعرض جهالي جاي لگرابتي وشبهت بالبيت والله.. هاي اول مرة أجي وماعندي كروة أرجع.. ادور شفت الرجال عصبي كلت خاف عباله حرامي..
محيي : وين گرابتك.. وديني عليهم هسه.. بيت ابو منو..
انطاني اسمهم وهو خايف مني لا اسويها وياه گعدة عشاير.. اندليت البيت ورحتلهم..

ضليت ادگ بالباب لحدما طلعوا أهله.. اول ماشافوه تفاجئوا بمنظره والوضع البي هو.. تأكدت گرابته هذول والحچاه صدك.. اعتذرت منه ورجعت للبيت انطيته قميص جديد وفلوس يرجع بيهن..
محيي : تعذرني.. بس مانريدها توصل للشيوخ والدواوين..
- : لا عمي اني هماتين غلطان.. وگفتي غلط..
محيي : هاهيه.. شتريد حاضر هيانه بيتنا..
- : مشكور ماتقصر..

ترخصت منه وطلعت.. الظاهر هو فقير لدرجة مايتحمل فلوس فصل.. انه تسرعت والعصبية عمت علي.. اااخ شلون طبع وصخ.. طبيت للبيت ورحت للهول لگيت هدى بحضن أمي تبچي .. لمن شافتني رجعت اندارت وتبچي بحرگة..
أمي عاينتلي بقهر وعتاب : زين هيج.. ماتجوز ابد ماتجوز..
محيي : يمة ماشفتي الموقف شكد يفشل.. تره طگت روحي لاتذبينها براسي.. هي همات خاطية.. مايصير تطلع بهيج هدوم وين صايرة هاي..
الحجية غادة : الوادم كلها نايمة وانه هياني يمها.. هي صغيرونة وتغلط.. سبحانه المايغلط.. علمها مو اطگها..
سكتت ونزلت يمها درت وجهها ومسحت دموعها.. گومتها ماتقبل تگوم..
الحجية غادة : الحمدلله أبوك مامد ايده علي.. چا انت عليمن طالع تمد ايدك ع النسوان.. عيفها يمي..

محيي : يمة شمالج لاتكبرين راسها..
الحجية غادة : اگلك عيفها شني ماتسمع الچلمة..
محيي : حعوفها.. بس لاتخليها تستهتر ..

تركتها وصعدت فوك.. ماگدرت انام ضليت اتگلب.. ضميري يأنبني وكلما اغمض تجيني صورتها شون تتوسل بيه وانه شبعتها كتل.. دخيلك يالله..لحدما طلعت الشمس الصبح يله نمت.. كعدت الظهرية.. منا متأخر بالنوم ومنا جاي من الشغل تالي الليل.. درت وجهي لگيتها واكفة يم الميزتواليت دتصفط الهدوم.. عاينتلي واندارت..
ذبيت الغطى وعدلت گعدي : هدى تعاي..
هدى : نعم..
محيي : تعاي اگلج هنا..
اجت يمي وتعاينلي ببرود.. اجيت انفجر بوجهها اتسودن من هيج نظرات.. : بوية اعتذر..
هدى : مقبول اعتذارك.. عندي شغل..
راحت تكمل شغلها بهدوء..

عفتها ورحت سبحت.. زعلانة ومااعرف اراضي النسوان.. شون بلوة هاي.. مرت تلث أيام تسويلي كلشي هي وساكتة حتى مااسمع حسها بالبيت.. كمت أحس بالنقص والأفتقار لشي چان مثل الماي بالساجية.. بدونه مالها فايدة..

خلصت شغلي وطلعت شوي أوكت.. مريت لمحل ذهب ابنه يصير صاحبي.. طبيت سلمت وأختاريت بتين اول ماشفتهن جذبني.. هي أيدها متروسة حتلوگلها.. كتله باچر اجي انطيك الفلوس.. ماگال شي بس انطيته عربون.. رجعت للبيت نايمين انه اخر واحد افوت.. بس غسلت وصعدت.. لگيتها متمددة وشامرة الغطى حارة.. كعدت يمها أعدل بخصلات شعرها..
محيي : هدى.. بوية گاعدة..
رفعت راسها بدون ماتحچي.. بست راسها وخدها : اسف يابوية.. مو تدرين بيه عصبي واعصابي متبرية مني..
اخذت ايدها لبستها البتين وشبگتها : تره روحي متعلمة عليج والله.. شون هيج صادتني تسودنت..
ابتسمت وخزرتني : اصلا ردت ازعل بعد.. بس لمن گتلي متعلم عليج رضيت..
محيي : هههههه.. وچ مايلوگلج الزعل.. گليلي حلوات..
هدى : اي حبيتهن.. شكرا..
محيي : تأمرين أمر..
أخذتها بطريقتي مشتاگلها ولهدوئها لمن تصير بحضني.. نامت وضليت اتفرج عليها لحدما غفيت..

وره فترة انه كاعد بالهول واجت هدى وسدت الباب وراها.. تفاجئت.. البيت هوسة وجايين خطار منو يهتم..
هدى : اريد احاچيك بشغلة..
محيي : گولي بلاية سؤال..
ابتسمت وتگربت من إذني شاورتني : اا.. انه حامل..
كمشتها من چتافها عاينتلها متفاجئ : صدك هالحچي..
هدى : اي والله.. سألت عمة وكلتلي اي..

محيي : الف مبروك عيوني انتي..
جريتها من ايدها كعدتها على رجلي وبستها من خدها.. هي تريد تگوم مستحية وخايفة يفوتون علينا..
هدى : محيي حباب وخر.. اخاف يجي قاسم..
محيي : انعل شرفه شني صدك چذب..
هدى : يعني انت فرحان..
محيي : والله كلش فرحان.. ماطوله منج..
هدى : زين انه باچر اريد اروح لأمي.. أخذني..
محيي : تدللين ماعندي شي..
باست خدي وكامت بالعجل زرگت من ايدي.. طلعت تضحك وگصيبتها متينة من جوه الشال..

ثاني يوم العصرية اخذتها ورحنا لبيت أمها.. كعدت وياها كلت شواي واطلع.. هي عود دتبشر أمها كلتلها حامل.. هاي وجهها كام ينطي الوان وتوترت ماادري شبيها.. هو انه من اول ماشفتها ماارتاحيتلها..
ام هدى : ها.. اي يمة مبروك..
هدى : شبيج يمة ليش هيج تحاچيني..
ام هدى : لا عيني شگايلة قابل..
محيي : اعوفج يم امج.. ساعتين واجي لو شكد تردين..
هدى : اي زين هيج..

خليت وطلعت.. بالليل صبوا العشة مااشتهيته بلياها.. رحت للبيت دگيت الباب طلعتلي ومنصية راسها ماعاينتلي.. اخذتها ورجعت.. رادت تصعد فوك وكمشت ايدها..
محيي : وين رايدة.. تعاي تعشي.. مااشتهي بلياج..
هدى : مااريد نعسانة.. اكل انت بالعافية..
فلتت ايدي وراح.. شمالها هاي.. رحت كعدت كتلهم تعبة مالها حيل.. بقيت كاعد لليل اجو عمام ابوي والتهيت.. بين ما راحوا وصعدت.. بالباب وسمعت صوتها تبچي.. كمت اتسودن لمن اشوفها تبچي.. احبها والأيام حببتني بيها.. فتحت الباب وطبيت.. مسحت دموعها رأسا.. اجيت شبگتها ومحاوطها من خصرها.. خلت راسها على صدري وتبچي بحرگة..
محيي : شجاريلج بوية هداوي.. أمج حچت شي..
هدى : مااريد اشوفها بعد.. مااريد..
محيي : شني هالحچي.. لا مايصير تبقى أمج..
كمشت ايدي وگربتها لخدها : انه احبنك.. وروح ابوي.. لاتشكك بهالشي فديوم..
محيي : اي بابا ادري بس فهميني شصاير..
هدى : أمي ماتحبني وتأذيني بحچيها دوم.. انت صح ترزلني بس احسن منها..

محيي : وهسه انه همات ارزلج..
صفنت : مااذكر شوكت.. صار هواي.. لا صرت حباب..
محيي : هههههه.. لعيونج اصير وردة مو بس حباب.. غمزتلها وأخذتها من ايدها.. وكفت جدامي وتعدل بالياخة مالت القميص..
محيي : عندي الج حچاية..
هدى : اي شنيه..
محيي : احبنج..
فكت عيونها متفاجئة.. تگربت مني وتعاين بعيوني : صدك.. عليك الله..
محيي : اي وعلي على گولتج..

شبگتها وكلشي بداخلي تغير بهاللحظة.. كمت اشوفها مرة كاملة رغم صغر سنها.. خصوصا بعد ما صارت حامل.. ارجع من الشغل بس اريد اشوفها.. هي دلوعة وانوثتها طاغية .. تمشي من جدامي انجبر اتفرج عليها.. گلبي دگلها ومايدك لغيرها..

بمرة انه وواگف وي العمال دااشتغل اجه ابن عم ابوي صغير جرني من قميصي..
- : عمو عمووو باوعلي..
محيي : شبيك بابا..
- : خالة هدى ماادري شبيها بالبيت..تعاللها بيبي تكول..
ذبيت الفاس من ايدي وركضت للبيت.. طبيت لكيتها بغرفة أمي متمددة ووجهها اصفر كركم.. كعدت يمها..
محيي : سلامتج بنتي.. شبيج..
بچت وحطت راسها بحضني.. : ماادري شبيه.. بطني دتلويني مامرتاحة..
صحت على أمي بدلتلها وأخذتها بيدي لدكتورة.. تسودنت عليها.. ماارضا يجيسها الهوى ادور ماادري شبيها مريضة.. فحصتها كالت مسوية حركة قوية على فجأة.. لازم ماتتحرك هواي خاف يصير شي ع الطفل.. كتبتلها چم شغلة اشتريتهن ورجعت للبيت.. صعدتها فوك وعلمتها علي..

محيي : انه هالأيام ضروري اروح لبغداد..
هدى : وتعوفني.. عفية ليش..
محيي : لازم والله.. قاسم مسافر وكاظم صارله اسبوعين هناك.. هم يريد يشوف اهله..
كمشت ايدها وبست خدها : ديري بالج على روحج بوية.. هلمرة صارت مرة اللخ ماتتكرر..
هدى : ماشي..

وره يومين رجع كاظم وانه ثاني يوم من الصبح اخذت السيارة ورحت لبغداد.. حياتي كلها ركض بركض.. زهگت روحي.. هاي عود احنا خمس خوان.. لو بس انه چا شون.. مرن چم يوم وراها العصرية خليت العامل وره الدخل وطلعت تمشيت بالكرادة.. من بعيد لمحت واحد بهيئة ابوي هيج ضخم وطويل.. تگربت اكثر شفته حامد..واكف بباب محل.. اول ماشافني سوه روحه مايعرفني.. سلمت علي وسألته ع المحل كال محلي ووياي واحد شراكة..
بنص الحچي وغير الموضوع : سمعت بيك متزوج..
محيي : وانت ياهو مالتك..لاتدخل بحياتي.. نرفزني لمن گلب الموضوع واحنا دنحچي بغير شي..
حامد : ديله عساس هي مرة وينحلف بيها.. شحال لوما طفلة وشمروها عليكم شمر..
هو كال هيج وتسودنت علي.. اليجيسها بماي اجيسه بدم.. كمشته من قميصه ضربته بوكس بعينه.. كام يصيح ويغلط على ابوي.. شون ثنين بغلاة روحي.. شبعته كتل مانطيته مجال يفك حلگه.. الوادم اجت تفاككنا .. شالوني منه وكامشيني تلث زلم.. اول ماگام تفل بنص وجهي..
حامد : امشي بره محلي ياگواااا...
هذا يتفل علي.. هديت علي كسرت المحل البيض والقواطي شيجي بيدي رگعته.. صارت هوسة للظالين بس ماادخلت الشرطة.. عفته وطلعت..

رجعت للمحل متكسر.. هو همات طگني بس مو مثلي.. الولد جابولي ثلج خليت على شفايفي وغسلت..هو انه وياه من الصغر مانتوالم.. حتى گبل لايصير ذاك اليوم.. بقيت بالشغل اسبوعين ورجعت للبيت ابوي عاتبني ع العركة خصوص فچي ورم وبقى فترة طويلة ازرك وجوه عيني زراك هماتين..
محيي : بوية ماشفته هذا سرسري وچلب.. چا فلشت الگزاز براسه بس مااريد أموته..
شامخ : شحدك تموته اشك حلگك.. أخيك هذا مهما يكون.. تشوف روحك ماتوالمه ابعد عنه شمالك مسودن انت هم فد واحد.. روح بس تتعارك ماخليت على حالي حال..
محيي : هو انت دومك تنطي أعذار.. هذا ابن الگح...

عفته وصعدت فوك.. نزعت القميص والفانيلة لبست غيرها وفاتت هدى..اجت تعاين بعيوني وكامشة ايدي بخوف..
هدى : خفت عليك.. خوما يوجعك شي..
محيي : يوجعني گلبي..
هدى : اسم الله ليش..
محيي : مشتاگلج.. هو انه اگدر علي..
ضحكت وخلت ايدها على چتفي : هههههه.. عبالي صدك.. انه همات مشتاقتلك كومة كومة.. يمكن تنساتني حتصير بيك..
محيي : ههههههه.. دخيلك ياعلي.. نعلعلا شرف الشغل وبغداد ..انتي بالبصرة شسوي بيها..
ضلت تضحك وانه صافن على ضحكتها.. بستها وتفقدت أحوالها.. كلشي ماشي عدل وهي همات دايرة بالها على روحها..

مرت الأيام وهدى بطنها كبرت.. تخلي ايدها على خصرها وتتمشى اويلي شون انه روحي تسيح بكل حركة من حركاتها .. دورات اكول چنت اريد وحدة بغدادية مو منا.. مثلي تدرس وشخصيتها قوية.. اجتني هدى عكس كلشي ببالي بس مرتاح وياها حد الاكتفاء.. أشوفها تتعب يوم عن يوم فخليت أمي ماتشغلها بعد.. مرة كاظم من حبلت چانت گوية وبحيلها ولا چن.. بس هاي تكسر خاطري..
اجيت متأخر من الشغل لكيتها تروح وتجي.. أول ماشافتني اجت تبوسني وتكمش ايدي..
هدى : عبالي ماتجي.. اووف گلبي غدى نار عليك..
محيي : اويلي.. هههههه.. اغديله فدوة لگلبج..
هدى : هسه لاتخليني استحي.. اگعد بينما أصبلك اكل..
دارت وجهها دتروح وجريتها.. طاحت بحضني : وين رايدة.. انه اليوم اتعشه بيج..مامشتهي أكل..
هدى : عزه محيي لاتحاچيني هيج عفية..
شاورتها بشغلة غطت وجهها مستحية.. اتقصد احچي هيج اتونس بسوالفها لمن تستحي.. أخذتها وصعدت فوك..

بالشتا اجو علي صحباني بحجة ناسيهم.. عزمتهم على گعدة بالگهوة.. أخذتهم وطلعنا.. رجعت العصرية وانه بالباب اسمع صوت صياح نسوان وصوت هدى بارز.. طبيت بالعجل واشوف مرة كاظم يردن يكمشنها النسوان وهي تدفر بهدى وتجر بشعرها.. هي هاي الفطيرة گاعد وتبچي حتى مالها حيل تدفع بيها لو تكتلها..

اجيت متسودن عليها جريتها من دشداشتها شمرتها ليغاد وعطت بيها : بت الكلب شون تمدين ايدج عليها منعولة الوالدين كاظم ماجر اذنج..
درت وجهي وانصدمت بمنظر هدى.. شعرها مهوش والدم هواي جواها.. مامفهمت شني سبب العركة بس متحلف لجنة املخها بيدي.. نزلت يمها اگومها.. عاطت وكامشة قمصلتي حيل..
هدى : محيي مااكدر اگوم مااكدر..
محيي : بابا لازم شوفي شصار..
گومتها شون ماچان.. أمي جابت العباية لبستهيا واخذتها طاير بالسيارة للمستشفى.. هي تتلوى من الوجع وتبچي بچي ماصاير.. بين ما وصلنا اجت الطبيبة اخذتها وانه ضليت واكف انتظر.. محد بالبيت من الزلم.. قاسم وكاظم ببغداد والباقين طالعين..

مااعرف شكد واجت الطبيبة..
محيي : شصار دكتورة..
- : سقطت البنت.. زوجتك..
محيي : اي مرتي..
- : تحتاج يندارلها دم لأن خسرت كمية كبيرة.. وراها تكدر تاخذها عادي..
محيي : زين انه اخذي مني..
- : تفضل سوي تحليل علمود نعرف اذا متطابق لو لا.. ميصير ندير بدون منتأكد..
محيي : اي ماعندي مشكلة..

مشيت وياها سحبوا مني دم وضليت اتاني لحدما طلعت النتيجة كالت متطابق.. ماادري منو من أهلي اجه بس سمعت صوت بره.. گلبي عاصرني على هدى.. اجت سحبت مني دم مااعرف شكثر ميخالف.. بين ما كملت وطلعت لكيت ابوي وأمي وأمها جايين.. امها ولا مقهورة.. اااخ كون اذبحها.. دوم چانت تكللها مايحتاج تحبلين هسه..شون أم هاي ماادري.. انه ساكت لخاطرها الا چا سويت المايتسوى.. ابوي عاينلي بقهر وسكت.. بحدود الساعة ونص دخلت شفتها متمددة ودموعها تارسة المخدة.. وكفت يمها وبست راسها.. مسحت دموعها وايدي ترجف.. مقهور ميت قهر.. حامل بالسادس وسقطت.. شكبرها هاي..
محيي : الحمدلله ع السلامة بوية..
كمشت ايدي وخلتها على خدها : ماچنت مسوية شي والله هي أذتني.. راح الطفل..
محيي : المهم انتي زينة يروحي.. هاي انه الها لاتخلين بالج يمها..
هدى : مازعلان يعني..
محيي : لا بوية شون ازعل شمالي مسودن..

بستها وطلعت جبتلها هدوم من البيت بين ما كملت واخذتها.. راحت لغرفة أمي وانه طبيت اصيح صاير عطاب..
محيي : وينها هاي وينهااا..
طلعتلي من الاستقبال تحچي بهدوء : تفضل.. مامسموحلك تجاوز علي..
محيي : والله اكسر راسج.. خاف شايفة كاظم ساكت عبالج انه مثله.. لا بوية افصم ظهرج وحگ لا اله الا الله.. لو هدى صايرلها شي ماتشوفين خير مني..
شامخ : اتركها بوية.. يجي رجلها ويتصرف وياها..
محيي : شفتها شسوت بهدى.. ليش تمدين ايدج عليها.. أمها اختها رجلها عمها.. مرة حماها لاتنسين حدودج..
جنة : هي تراددني وضوجتني وانه عصبية مااحمل.. كتلها ساعديني بالتنظيف تكلي محيي مايقبل..
محيي : اي مااقبل وغصبا ما على راسج.. انسانة ماتفهم بالكلام.. كاظم يتصرف وياج بعد مو مال حچي انتي..

عفتهم ورحت لهدى سندتها على صدري وصعدتها فوك.. ضليت كاعد يمها..كل شوي تبچي تغدي جمرة من البچي والوجه يصير احمر دم.. انه همات مقهور بس مداابين مااريدها تتأذى اكثر..

بالليل اخذتلها أكل وصعدتلهيا تاكل.. مرت الأيام وحرت شسويلها.. ضايجة دائما وتبچي على غفلة.. بطنها توجعها وعدها وجع داخلي.. أخذتها طبيبتين ونفس الحچي ثنينهن.. تعبت وتركت كلشي بس ملتهي بيها.. كاظم أخذ مرته وراح للبيت الثاني الچانت عايشة بي أم حامد.. ابوي جاب تنازل من حامد وتحول بأسم كاظم.. هو حامد مارايده من الأساس فرأسا تنازل عنه.. أم هدى مااجت عليها.. كل يوم أعد وأصف عليها شني من أم هاي.. مكيفة چي هدى طرحت..

الى أن وراها بفترة رجعت من الشغل هلكان من التعب صعدت لكيتها سابحة ومغيرة هدومها وتتمشى بالغرفة تلملم بالغراض .. اجت يمي وباست خدي..
هدى : الله يساعدك حبيبي..
محيي : فدوة لحلگج.. شونج زينة..
هدى : اي الحمدلله.. حتى چنت جوه شوي ساعدت عمتي بالشغل وهيج..
شبگتها حيل وشميتها لحدما حسيت الدخل ريتي ريحتها مو الهوى.. شسوي بدونها اتسودن.. لاليلي ليل ولانهاري نهار خفت تروح مني وهي تتلوى من الوجع وتبچي..
ضليت شابگها واسولف وياها.. رجعت تضحكلي وتتلگاني بكل مرة اجي بيها من الشغل..

بس أمها بعدها مسببتلي قلق.. كلما تجي بروحتها هدى تنتكس وتبچي.. حاولت وحاولت هواي بس اريدها تحچي تكول هي تجرحني بكلامها.. ماكو غير هالكلمتين..

حامد .......
ثاني يوم الصبح اخذتها واخذته ورحنا للمستشفى سويتله شهادة ولادة وسجلت اسمه رائد .. بالمحل معاميلي يصيحولي ابو رائد بعد قليل يگلولي حامد.. كل يوم ارجع للبيت اشوفه واتخيله شلون يكبر وشيصير بالمستقبل..

مرت أيامي هادئة مابيها شي.. سارة ورائد كل ذرة سعادة بحياتي فتكون بسببهم.. اني أفرح لمن اشوفها تتلگاني واجي اخذ رائد بحضني..عائلتي بسيطة وململة.. خالة غادة تجيني كل شهرين مرة هي وسناء واستقبلهم طبيعي.. احبها واريد خاطرها بالعكس أفرح لمن تجيني..

رائد صار عمره عشر شهور بس سمين وبي طول من صغره فمبين أكبر من عمره.. اجيت من الشغل بالليل تعبان.. سارة محضرتلي الأكل فصبتليا.. توها دتگعد وبچى رائد..
سارة : اهو هسه شگعده..
حامد : جيبي يمي..
سارة : لا مو انت تعبان شتسوي بي..
حامد : جيبي مشتاقله السرسري..
راحت جابته وملبسته هدوم هواي.. الشتا يگص گص.. خليته بحضني رأسا سكت..
حامد : ها لك ترس شو تنام..
سارة : حبيبي شلونه الشغل..
حامد : زين الحمدلله.. بس هلكني..بعد چم سنة شيصير بيه انتهي..
سارة : شوف مهدي شيگول.. كتلك من البداية فتح انشائية لو هاي الاحتياط مالت السيارات..
حامد : هذني الهن أماكنهن الخاصة لازم افتح بباب الشرجي مو بالكرادة.. اشوف هسه الله كريم.. باچر اني بالبيت..
سارة : يله على راحتك..

وره فترة قصيرة اني واكف بالمحل وأشوف محيي جايني.. هذا شجابه.. منا طاگة روحي من الدنيا چنت حلمان بأمي ويومي كله صار مظلم وبي ضجة بداخلي.. اجه يحاچيني .. صارت مشادة كلامية ماردت تصير عركة فغيرت الموضوع وسألت عن مرته.. شو هذا گام وجاوبني بحدة واسلوبه الهمجي مامتغير.. تعاركت وياه بس ماگدرتله.. هو لزمني بالأول و ولاني فشي طبيعي مااگدر .. لحدما اجت الزلم فاككونا تفلت بوجهه وطردته.. كسرني كسرة نزلت راسي للكاع.. بدم عيني سويت المحل وصرفت كل فلوسي ع البرادات والرفوف بغض النظر عن البضاعة.. بعدين اجه كسر البضاعة واني نصهن مامسدد دينهن للجملة.. آخر شي دفعته بره المحل واجوا العمال لميت الكسره وعزلت .. اجاني مهدي هو يدري بمحيي اني وياه علاقتنا بالحضيض فماحچه شي.. اخذني ورحنا للمستشفى.. وجهي زورگ وعيني ورمت كامت تذب جراحة .. انطاني الدكتور قطرات وبعد چم شغلة وراها رجعت للبيت..
مهدي : باچر اجي وياك نروح لدكتور.. ميصير تضل هيج..
حامد : مااروح شعندي قابل..
مهدي : شنو متروح يمعود.. لعد زين هيج عينك حتنعمي لاسامح الله..
حامد : اخوية اذا ماصرت زين انطيك خبر.. انت بحسبة الأخ قابل اخجل منك..
مهدي : هاهيه مثل متريد.. ابقالك بالبيت فد اسبوع واني بالمحل لتخلي بالك يمه..
حامد : يكون أفضل..
مهدي : ماشي.. عندك العافية هم أمرلك عود..
حامد : هلا بيك بكل وكت..
ودعني وراح.. دكيت الباب طلعتلي سارة.. شهكت وخلت ايدها على حلگها.. عفتها بطور الصدمة وطبيت جوه.. اجاني رائد يزحف يريد اشيله.. خليته بحضني وانطيته السويچ علمود الصوت .. اجت سارة كعدت يمي..
سارة : ياستار حبيبي شصايرلك اسم الله.. شنو متعارك..
حامد : اي والله.. هذا محيي الكلب ابن الكلب اجه للمحل و.... حچيتلها شصار بالضبط..
سارة : هسه شكو اجه.. شنو من محبته الزايدة..
حامد : والله ماادري.. نعلعلا عرضه هو اني ميت على شوفتك..
سارة : عوفه خيولي.. عينك شلونها هسه..
حامد : توجعني احس واجة بيها نار..
سارة : فدوه اروحلك خلنروح للدكتور لتعاند..
حامد : مابيه حيل أمشي منا لهنا.. عوفيني بس ارتاح..
سارة : لعد وعينك شلوون..
حامد : جبت أدوية واذا ماصرت زين اروح وداعة رائد..
اجت يمي حضنتني وساكتة.. شوية وحسيت عليها تبچي.. رفعت راسها : شبيج سري.. ليش البچي..
سارة : خاف يصيرلك شي.. وين نروح بدونك اسم الله عليك..
حامد : ماكو شي ان شاء الله.. خليچ يمي لتروحين واني أتحسن..
سكتت وكامت ساعدتني اگوم ..غسلت وجهي وشعري هي غسلته مااكدر ادنك لو أمد ايدي.. متكسر..

مرت خمس أيام بهالحدود واندگت الباب طلعت سارة تفتحها.. ثواني وفاتت هي وابوية.. كمت سلمت علي بس من ودي اطرده..
حامد : تفضل محتاج شي.. فوك ما ابنك كتلني جايني على شنو..
شامخ : ابنك شني.. هذا أخيك لاتسوي هيج.. باچر عكبة ابنك يحتاج عمامه وولدهم .. لاتصير طايش وانه اعرفنك عگلك براسك وتفتهم..
حامد : ابني ميحتاجكم حشاه من العازة.. اني وين اروح حتى يريدكم..
شامخ : الدنيا كلشي بيها وانت ادرى بهالشي.. انه غسلت ايدي منك بس تبقى ابني وتربيت بداري واكلت من چدي (تعبي وجهدي) فأجيت اريدن الخلاف الصار بينكم تنساه والخسارة بالمحل أعوضلكياها ماعندي مانع..
حامد : ألف شكر متقصر بس ممحتاج عندي فلوس وأعوض..
شامخ : حچي اكيد..
حامد : اكيد.. مااحتاج أحد.. وانت بالذات مااخذ منك فلس أحمر..
شامخ : رحم الله والديك.. اترخص هسه..
خلى وراح.. طلعت سارة سدت الباب واجت..
سارة : حرام هيج تحچي وياه.. خاف رائد يردلكياها والزمن دوار حامد..
حامد : لو بدون سبب اكول اي.. انتي اكثر شي شخص يعرف شكد مجروح منه.. البهذلة سنة بالسعدون والسجن كلها منه.. لتذكريني سارة والله تعبان..
سارة : الله يساعدك ادري والله بس شلون يعني مننسى..
حامد : اني ماانسى لو مدري شيصير..

عفتها وطلعت.. رحت فتحت شوية تحسنت.. بس صارت سمعة محلوة ع المحل وصاحبه .. اسمع الناس تكول هذا متعارك ويا أخوه وصاروا ملايخ.. لو معاميلي لمن يجون يشترون مني يسألوني شصاير گبل چم يوم.. يعني تفشلت بشكل مؤذي.. واني مااتحمل واحد يحچي عليه بشي غلط .. بنيت السمعة بطيب التعامل والطولة البال بعدين هذا المستهتر دمرلي كلشي.. تركت الموضوع مبدئيا كلت فترة وتنسي بس الناس لطشت.. زحمة عركة بين الخوان والفشار ع الأهل..
اجاني مهدي للمحل ينفث..
حامد : شبيك شنو چنت تركض..
مهدي : لا شفايتلي ع الركض.. جنت اتعارك ويا واحد قندرة..
حامد : خو انت تكيف ع العركات.. شبي..
مهدي : يحچي علينا وعلى سمعة المحل.. لزمته تفتفته وراح..
صفنت ومتوقع الديصير.. : اترك السالفة اخوية.. اليوم بالليل تعال لبيتي عندي وياك حچاية..
مهدي : يله ماكو مشكلة اجيك.. بس شكلت ع العركة..
ضليت احجي وياه ولاشيت الموضوع مااريد يصيرله شي وهو ماله ذنب.. بين ما صارت بالدعش ونص عزلت ورجعت للبيت.. بس سبحت وبدلت هو اجه.. استقبلته وجبناها حچي..

بالأخير فتحت الموضوع : اني اكول نبيع المحل وكلمن يستلم حصته منه..
مهدي : نبيعه ليش يمعود..
حامد : احسن.. السالفة لطشت وحتى ابو الملك كال اني قبلك خمسة مستأجرين المحل ولا مرة صارت هيج عركة وهوسة ممقبول هالحچي.. واني تدري بيه اتخبل واحد يحجي عليه حتلو شي صح.. نبيع الرفوف والبرادات والبضاعة اني اسويلها جرد وابيعها لأن احنا سويناه مو من ضمن اثاث المحل.. بعد انت ادرى شلون چان..
مهدي : خوية شنو السالفة.. شو على غفلة هيج فكرت ميصير.. دانش فكرك..
حامد : لا صارلي شهر افكر وهذا احسن حل.. عود نشوفلنا غير شغلة..
مهدي : والله مااعرف.. صدمتني.. انطيني مجال افكر..
حامد : انت مو عندك شهادة.. ذب الفايل مالتك بلكت يطلع تعيينك..
مهدي : هسه اني سهل.. بيت ابوية عامر والحمدلله.. بس انت شلون.. قابل مو صاحبي لو بس بالأسم.. لازم اشوفلك شغلة ويايه..
حامد : اذا هلكد مصر اني ماعندي مشكلة.. عوف البيع عليه ويجي يمك الصافي بين ما تدورلك على شغل تسند روحك علي..
ضلينا نحجي لحدما صفينا على رأيي وراح..

بلشت اجراءات البيع وجردت البضاعة كلها ورقة وقلم وباقي الشغلات.. ابو الملك نفسه جابلي واحد شراي.. واشتراه بسعر لايختلف عليه.. استلمت المبلغ بوجود مهدي واخذته لبيتي.. قسمته بما يرضي الله وانطيتهيا.. ضل كاعد يمي لحد المغربية هيج وطلع..

اجت سارة تبچي.. حضنتني وتحجي..
سارة : ليش هيج سويت.. مو چنا عايشين..
حامد : الله كريم يابة.. هواي فرص اكدر اشتغل بيهن.. بس لتوتريني..
سارة : هسه شكد حتضل كاعد بين ما تلم ايدك مرة اللخ وتشتغل.. حتضل تگرط بيهن لحدما يخلصن..
حامد : اهوو يمعودة بيش طالبتني.. لتكولين هيج ماكو شي ان شاء الله واني ححاول الگى بأسرع وقت..
سارة : اتمنى يكون هيج..
بست راسها ومسحت دموعها : اي حبيبة گلبي.. بس ارتاحلي فترة

بمرور فترة عشرين يوم اني كاعد بالبيت.. عبالك الشغل طار.. وين مااروح ماالاگي شغل .. بديت أتوتر بس حاولت ماابين.. الفلوس جوه ايدي اصرف منهن بس أحس نفسي مقصر تجاه البيت والعيشة.. مدااجيب مثل قبل .. ايدي انكمشت مو طلقة.. بيوم اخذت سارة ورائد لبيت أهلها رادت تروح واني بقيت وياها.. بالليل كالت اريد ابات.. خليتها عدهم ورجعت اتمشى للبياع.. هستوني طبيت للفرع وأسمع صوت صياح من ثاني بيت.. رحت للبيت ركض لكيت الباب مفلگحة ومحد بالطابق الجوة.. صعدت فوك لكيت وحدة اول مرة اشوفها بهدوم فاضحة وشعرها مهوس وواحد فتح باب الترك يريد يطلع.. ركضت وراه شفت شكله بس مالحگتله.. درت وجهي رأسا وشمرت عليها الچرچف.. شو هاي كامت تصيح بالزايد وتكول هذا تعدى عليه ياناس لحگولي.. ادور الناس كلها اجت اهل الفرع الجوارين..

ابو كريم : شو السالفة ابو رائد..
حامد : عمي تحجون صدك.. والله سمعتها تصيح واجيت عبالي حرامي لو شي شمدريني شكو.. هاي مو انتو جيتوا حالكم من حالي..
- : لا عمو هو اعتدى عليه.. شوف شسوه..
وذبت الچرچف.. دخيلك يالله هاي شبيها بت القندرة.. مااكتل النسوان بس لو مثل محيي جان لزمتها شبعتها كتل لحدما تعترف..
ابو كريم : بابا غطي نفسج ميصير هالحچي.. ابو رائد ضاعت علينا..
ابو انمار : حجي شنو قابل نشكك بأبو رائد.. ميصير الزلمة من عدنا وبينا وداخل لبيوتنا ونعرفه عز المعرفة.. لعد شلون أمنا علي..
حامد : رحم الله والديك.. انتو اكثر ناس تعرفني.. اروح للشغل واجي شعندي ببنات الناس واني والله وداعة ابني ماشايفها..
- : شقصدك يعني اني اتبلى عليك..
حامد : اي تتبلين عليه بكد القندرة وتتبلين ع الزلم.. اني شفته لهذا الچان يمج بس الزمه يصير غير حچي..
ابو كريم : يعني مو انت جنت هنا أول..
حامد : طبعا مو اني حجي شبيك صدك چذب..
ابو انمار : المرة عايشة وحدها والصراحة منعرف عنها شي مثل منعرف عن حامد.. يجون أهلج وناسج يله نتقدم..

- : شنو من ناس انتم.. دتشوفون بعيونكم ومتصدكون..
ابو كريم : اي طبعا منصدك.. جيبيلنا أهلج يله نتصرف..
ضلينا واكفين والناس كلها طلعت.. ابو انمار مختار المنطقة فهو يعرف ناسها نفر نفر لهالسبب دافعلي ووكف ويايه.. طلعنا منهم وانطى خبر للناس الحق مامعروف بس ابو رائد كلنا نعرفه ونعرف اخلاقه.. فكت وكلمن راح لداره..

تمشيت للبيت داافوت واجه لزمني من چتفي..
ابو انمار : لتخاف اخوية.. هاي اذا جابت اهلها وچبيرها شتريد انطيك.. هي الغلطانة.. واني خليت ثنين ولد يشوفون منو يفوتلها ويطلع.. تعرف شكله لهذا الولد..
حامد : الله يسلمك.. اي اعرفه..
ابو انمار : شلون گايل..
حامد : قصير وأصلع..
ابو انمار : هاهيه فوت والباقي يمي..

ترخصت منه وطبيت ماكدرت انام الليل افكر بسارة شيصير بيها من تسمع هالحچي.. اكيد حتصدكني بس الحچي موسهل.. ثاني يوم الصبح بس بدلت ورحت لبيت أهلها جبتها ورجعت.. دخلت تسولف وتضحك اني ساكت بس اسمع..
انتبهت عليه : شبيك عيوني مو على بعضك..
حامد : كعدي اريد احجيلج شغلة صارت البارحة..
اجت كعدت يمي.. حچيتلها شصار وموقف ابو انمار..
حامد : مااريد تفهميني غلط وانتي واكفة ويايه صار سنين.. لتخلين هالموقف يخرب الثقة بيناتنا سري..
سارة : لا واثقة منك.. بس اكيد ضايج علمود الصار والسمعة..
حامد : ميخالف هسه تصلح بس يعرفون الحق وين..
سارة : وأبو انمار يسوي شي برأيك..
حامد : اي يسوي هو المختار بعد.. واني مظلوم قابل شعندي..

مشى الوكت كاعد على نار.. خاف يجون أهلها ويطلع عدها ظهر واني وحدي.. ماكو دليل يكول مو اني سويت هيج بس ربي شاهد على حچيي ومنتظر كلمة ابو انمار.. مرت تلث أيام الناس اداعيها تجيب أهلها وهي تكول مسافرين.. مو هسه يجون.. انطوني مجال.. احنا العرفناه عساس هي مطلقة واطفالها يم رجلها ميقبل ينطيهيا وأمها تريد تعيش وياها بس هسه مسافرة علمود علاج لمرض معين..

وره هالتلث أيام بالليل اندكت الباب قوي.. حتى رائد كعد.. طلعت بالعجل بدون ماالبس شي ثخين.. الجو بارد.. لكيت ابو انمار وياه ثنين زلم لازمين واحد أصلع من ياخته..
ابو انمار : تعذرني اجيتك بهيج وكت.. بس هذا نفسه..
رفعت راسه بس باوعتله عرفته.. قصير واصلع وجهه مخرط مبين عراك.. : اي حجي هذا..
ابو انمار : فوت البسلك شي انتظرك يم بيت المرة ام نصر..
طبيت جوه لبست بلوز وطلعت وراه بالعجل.. لكيتها اطگطك من الخوف..
- : خير شنو المطلوب..
ابو انمار : هذا الولد صارله چم يوم يحوم داير مداير بيتج.. تعرفين الحديدة بعدها حامية ومشككين بموضوعج انتي وأبو رائد.. هذا منو..
- : مااعرفه.. منين جايبي تردون تلبسوني تهمة شرف.. المفروض اني اشتكي عليكم لأن دتبرون ابو رائد وهو الغلطان..
حامد : لتجاوزين وخليني محترمج.. خافي ربج لتحچين بكيفج..

ابو انمار : تره ابو حامد شيخ چبير والبصرة كلها تعرفه.. اعترفي وخلينا نفضها باليسر احسن مما يجي هو يعرف شلون يحچيج..
احنا ودنحچي وياها هذا الرجال الأصلع نطق : عمي عوفوه للزلمة.. المرة اعرفها وعندي علاقة بيها..
وجهها صوفر صارت هندس بعد ماحچت حرف.. كامت اتأتئ واطلع اعذار مدري منين مامنين.. آخر شي انفضت وانكشفت هي شنو.. ابو انمار دز على صاحب البيت وحچاله الموقف رأسا كال باچر تشيل واذا مشالت اجيب دورية عليها يشيلوها اجباري..

رجعتلي سمعتي والحمدلله.. مامسوي غلط ليش حريمة انظلم واني رجال أمشي بصف الحايط.. وره فترة قصيرة اجاني ابوية للبيت طلب مني ابيع حصتي من البيت لأن ورث.. رحت وياه وبعته.. بعد هواي اجراءات لحدما خلصت المعاملة واستلمت حصتي سجلتها بأسم سارة بالمصرف..

بيوم راجع من بره طالع داادور شغل بس كالعادة ماكو شي راسي طگه الشيب ..لكيت سارة وحدها بالبيت..
حامد : لعد رائد وين..
اجت يمي خايفة وتفرك بإديها : حامد.. رائد ماادري وينه..
حامد : شنو عيني.. شنو ماادري وينه..
سارة : مااعرف دخيلك والله.. رحت يم ام كريم سوينا ثواب لأبوها واخذت رائد ويايه.. دااطلع ومالگيته..
حامد : استغفرالله.. ليش هيج مهملة.. اكو وحدة متدري ابنها وين.. صارله شكد..
سارة : ساعتين هيج..
حامد : لا انتي تردين تخبليني.. ساعتين ومتدرين بي.. دخيل ربج شكد مطفية..
عفتها وطلعت لزمت الاطفال واحد واحد سألته على رائد محد شايفه.. تخبلت وين راح.. بعده يادوب سنة ونص.. آخر شي تمشيت ليغاد يم الجامع وسمعت واحد يگول هسه هذا صغير شلون نسأله وين أهلك وشسمك.. طبيت رأسا شفته شايل رائد ..

حامد : خوية هذا ابني..
- : منو يكول..
حامد : اني ابوه.. هسه يعرفني بس انطينيا..
انطانيا وهو شبه مطمن.. لأن يشبهني كلش..
حامد : وين لگيته..
- : والله چنت راجع من الشغل ولكيته يمشي ويوگع بالشارع .. محد اكو الجهال كلها بالبيوت.. اخذته كلت اخلي بالجامع يصيحون عنه..
حامد : الله يسلمك ماقصرت..

مديلته ايدي صافحته وتعرفت علي.. دنحچي ومن ضمن الكلام ادرجنا موضوع الشغل..
- : شتشتغل حضرتك..
حامد : چان عندي محل غذائية بس بعته وهسه كاعد..
- : لا صدك.. لعد شلون المصرف وهالأمور..
حامد : عندي چم فلس جوة ايدي ودااقتصر بين ما الاگي شغل يسندني..
- : شوف اخوية اني ارتاحيتلك الصراحة.. ليش متجي باچر لهذا الجامع وتجيبلي جنسيتك وبعد چم شغلة.. أذبلك فايلك واعينك بمعمل ابو غريب..
حامد : ويصير اتعين.. غير مخصصات لو شلون..
- : خليها عليه.. بس جيبلي مستمسكاتك وشهادة تخرجك وأردلك خبر ان شاء الله..
حامد : ماشي مااطول عليك باچر اشوفك..
- : يله منختلف عليها..

ترخصت منها ورجعت للبيت.. لكيت سارة تبچي.. خليت رائد بحضنها وسولفتلها ع الشغلة هاي.. يالله حلم علم يجيني شغل.. صدك ثاني يوم اخذت الشهادة مالتي والجنسية وصور خليتهن بفايل وانطيتهيا.. دليته على بيتنا كال اذا ماانقبلت خلي شغلك عليه.. اني اجيبه لعندك.. هذا ماادري شنو يعني ربي دزليا منقذ والحمدلله..

محيي ......
انه وراجع من بغداد اليوم خلصت امتحانات.. دخيلك يالله بعد بس سنة وأخلص.. شني هاي لعبت روحي.. عاد ياريت أتعينلي بمكان زين.. نزلت يم محل اشتريت ماي وشي أحلي بي حلگي وراها رجعت انه والولد وياي..

اجت هدى تتمشى بدلع جدامي وكامشة الظفيرة بيدها.. باستني واخذت الغراض من ايدي..
هدى : الحمدلله ع السلامة عيوني..
محيي : وانه اگول ليش الدنيا فاهية.. اثاري الحلاوة مگطوعة عني.. اغديلج فدوة.. الله يسلمج يكل الدنيا..
هدى : هههههه.. لاتخجلني.. تعال فوت ليش واگف..
محيي : واگف وهالجمال يگلي امشي.. چا طبعا امشي.. اروحن للگمر.. فوتي بعد گلبي..
طبت تضحك وفرحانة.. انه كاعد واتفرج عليها.. صبتلي أكل تغديت وصعدت فوك سبحت ونمت..

بمرور اسبوع طلعت اتمشى ماادري شبيه من الصبح محتصر وضايج.. چني اريد اتعارك.. ضليت برة لليل.. انه وداامشي اريد ارجع وسمعت صوت بت تصيح وواحد چن ديسد حلگها.. اتبعت الصوت وشفت بت صدك بنفس الوضعية التخيلتها ببالي.. كزبر جلدي شون نفسية علي.. كمشته من زياگه دفرته ليغاد.. حرت شون استرها..
محيي : بوية انتي منين.. شجابج هنا..
هي وتبچي : خوية هنا بيتنا والله طلعت أجيب القابلة أمي دتجيب وهذا ماادري منين طلعلي..
محيي : وين بيتكم.. گريب منا..
- : اي هيانه..   وأشرت بنهاية الشارع..
درت وجهي دااشوف وهذا طگني بنص فچي.. من وين طلعلي اليوم اذب حرگتي كلها بي.. كمشته ذبحته كتل.. عراك وطاح بيد محيي.. اتسودن ع العركات..
انداريتلها : ماتگومين يبت الناس.. روحي لدارج شمتانية..
- : وانت شون..
محيي : دروحي هسه شون سالفة هاي.. بالعجللل..

زرگت من وراي وراحت.. هي راحت وانه حسيت بشي مثل السيخ دخل بكرشة رجلي وطلع بالعجل.. بحيث صارت حارة المنطقة.. نصيت راسي وخليت ايدي ع المكان.. دم حار نزل وأهجس المكان مفتوح.. هذا شرد بلمحة ماشفته بعد.. ضربني سچينة من نعلعلا شرفه..

تمشيت لبيتنا وأمشي بالگوة.. طلعلي قاسم ادروش من شافني.. اخذني بالسيارة ورحنا للمستشفى..كال لازم خياط .. يابوية شاغت روحي بين ما كمل.. انطاني مهدأ بعدين طلعت.. لگيت ابوي بالباب توه ديفوت.. سكتت رأسا ماحچيت تعبان من الجرح.. قاسم حچاله..
شامخ : ضل انت أغم وبس تتعارك..
محيي : بوية رحمة لأهلك.. والله تعبان..
سكت واجه هو سندني وصعدني بالسيارة رجعنا للبيت.. بقيت بالهول ماصعدت فوك.. اشوف هدى واكفة بالباب وعيونها مدمعة مستحية من ابوي وخواني كلهم گاعدين..

ضلوا بحدود النص ساعة بعدين راحوا وانه تمددت ع الكرويتة مخلي ايدي على عيوني دااريد انام والوجع يصل علي.. حسيت على شخص واگف يم راسي.. وخرت ايدي لكيت هدى.. فتحتلها إديه واجت شبگتني تبچي..
هدى : اسم الله عليك الحمدلله ع السلامة.. انه من الصبح خايفة عليك شفتك مغنتب..
محيي : اووف هداوي فدوة اروحلج.. انه لمن أشوفج ارتاح..
ابتعدت وباست خدي.. ضلت گاعدة يمي وتمسح بشعري ماادري هيج على ريحة شالها غفيت..  كعدت الصبح لكيتها يمي جايبتلي هدوم.. گمت وياها سبحت ومغطي رجلي مايوصلها ماي.. هي تضمدلياها وتعقمها ولو مااطلب منها اگول خطية تشوف خياط وجرح ماتعرف بعدهي صغيرة.. اول فترة قليل امشي بس علمود يمشي الدم.. بعدين شوي شوي تحسنت واتمشى براحتي بس مثل النغزات بمكان الجرح.. رحت للمستشفى شلت الخيط وهاهيه..

صعدت فوك صار شكد ماصاعد.. لگيتها مرتبتها مثل كل مرة .. تمددت وخليتها يمي صار شكد ماشابگها هيج براحتي..  الى أن اجه اليوم.. من أول ماكعدت الصبح هدى يم راسي تبوس بيه وتشبگني.. حتى ماطلعت للشغل علمودها.. تبچي ومااعرف شسويلها.. سألتها خاف ضايجة من الشغل اطلعها اشتريلها شي.. مارادت شي بس ساكتة..

العصرية صارتلي شغلة ضرورية واضطريت اطلع.. ضليت من شغلة لشغلة ماانهديت.. رحت للعمارة انه وبعد چم واحد.. جبنا شغلات للزرع ورجعت.. بعد سلمتهم كلشي ورحت للبيت .. أول ماطبيت اشوف الوجوه مصوفرة.. هدى مااجت استقبلتني.. تفاجئت ..
محيي : يمة هدى وين..
الحجية غادة : ماادري ..
عيوني نطت من مكنها : شنيييي......

يتبــــــــــــــــــــع.................