#أبي_لم_يكن_إنساناً
البارت الرابع
للكاتبة لبنى الموسوي
طيبة.. چان اكو كتلي بي ماي حار ع البريمز
شال الكتلي وشمرة على جسمي حيل شاغت روحي من الألم الحسيت بي ساعتها
مو وجع لااااا
حسيت جسمي گام ينغز بگلبي مثل السچين
فرفحت من البچي
التفتت عليهم اناشغ ااااااخ بيبي لحگيلي ااااااحترگت
أجتني عمة نهاية تركض
شالتني بحضنها تصيح اسم الله عليچ يمةةة اسم الله
گبل بيبي ركضت على أبوية
ضربتة حيل بالعصا على ظهرة وصوت صياحها تـرس البيت احتارت شتحچي وشتدعي علي
طلعت بية عمة الغرفتها
نومتني ع الچرباية واني أون من الألم
انخبصت خطية
ظلت تفتر على روحها وتصيح
شسوي يربي شسووووي الطفلة راااااح ترووووح مني
دخل صالح يركض باوع علية وصاح
- اليوم اكتله لهذا الحيوان
ما اطلع صالح اذا ميكون موت هالعااااااااار على أيدي
- انچب صالح
سوالف كبار لتتدخل بيها ولتحچي على عمك عييييب
- سوالف كبار گلتيلي ؟!!
بس دوري وجهچ وشوفي شسوة بطيبة قبل لا تحچين هالحچي باوعي بعينچ باوعي شبيچ صافنة !!!
سوالف كبار مو يمة سوالف كباااار من الله ياخذ هالكبار ويريحنا
بعدة منفعل ويحچي على بيت جدي
بچوا أخواني
ما أعرف أحير بروحي البدت تطلع من الألم
لو بيهم واني أشوف عمة مشغولة عنهم بصالح دتحاول تمنعة علمود ليطلع يتعارك ويا أبوية
ما تحملت أكثر
صرخت بيهم تعالوا ساعدوني راح امووووت
گبل ركضوا علية
صاحت عمة شنسوي رد صالح ناخذها للمستشفى غير چان يدخل عمو واخيراً
حامد.. شكو شصار أمي ورزاق لويش ديتعاركون
- الحگ حاااااامد
أخوك ذب الماي الحاااار على طيبة وأحترگت رجلهااااا
بس حچتها ركض عمو شالني الحضنة
- ولك رزااااااق
دخل أرجع اذا ما احرگك بنفس الماااااااي الحرگت بي الطفلة ما أطلع اني حااااااامد
چان بابا واگف بالصالة گبل جاوبة
- دنچب واكل ***
بنتي واني حر بيها غير اگص ايدك اذا نمدت علية مرت الثانية
ما رد علي لأن بالة كلة وياية
طلع عمو ديفتح الباب دخل جدو للبيت شصاير حامد شبيها طيبةةةةة
- أبنك الحشرة حرگها بالماي الحاااااار
- الله ينتقم منك ي رزااااااق
شلون بييييك ولك اني حاس موتي على أيدك تاليهااااا
عافة عمو وصعدني بالسيارة
گبل جدو فتح الباب وصعد قبلة صاح تحرك بسرعة لا يصير شي للطفلة حاااااامد
وصلنا للمستشفى من الباب أخذوني منهم
چان الحرگ كلش قوي
ظليت أسبوعين هناك وبس الله الـ يعلم شنو من أيام عشتها وشگد ألم تجرعت بيها
كلما يجوون ينظفون الحرگ الية تشوغ روحي للسما
الموت أرحم بهواي من هالوجع
صدگ حسيت بالذل بغياب ماما رغم عمي حامد وجدو ما عافوني ولا لحظة وحدة
وكلة بكفة ومنظر الحرگ بكفة ثانية
مچنت اتجرأ اباوع على جسمي وكلما اصحى واشوف عمو حامد يمي أشكيلة من هالموضوع
چان دوم يصبرني بـ هالكلام
- لتخافين عمو همَ هنا ديعالجون الحرگ
يعني مراح يظل أثر بجسمچ بس شنو صيري سباعية وتحملي شوية بعد
ساندني بكل ما بي
چنت كلما أضعف يشد من عزيمتي
واذا شاف الخوف بعيوني يگول لتخافين ما دام حامد يمچ الشر ما يجيچ من اليوم
كلامة چان مصدر قوة الي
لأن كلما يجي ويحچي وياية يخف الخوف الـ بداخلي من المستقبل المجهول ويا أب مثل رزاق
وبعد أسبوعين طلعوني من المستشفى
صح الألم خف عن أول أيام
بس المنطقة تخوف بـ شكل بحيث أخاف اباوع عليها
الطريق كلة أفكر بالموقف العشتة بذاك اليوم
ما أعرف شلون وصلنا للبيت
نزلني عمو وفتح الباب راد يدخل لزمت ايدة خايفة گبل باوعلي
- عمو الله يخليك لترجعني للبيت
- شلون لعد حبيبتي
تردين نعوف عمتچ وأخوانچ وصالح وصفاء وحدهم
- لا منعوفهم... صفنت شوية
زين ليش متسوي النة بيت عمو نروح نعيش بي سوية ونعوف بابا هنا وحدة
- وجدو وبيبي شلون ؟!!
- ناخذهم ويانا طبعاً لأن أخاف بابا يأذيهم مثل ميأذيني
- الله كريم بنيتي
أوعدچ راح أحاول بهذا الموضوع
بس أرفعي أيدچ الحلوة وأدعي وياية بلكي رب العالمين يسد حلگ ابوچ عنة ويقبل أخذكم
بس حچاها رفعت أيدي للسما ادعي من گلبي
- يا حبيبي يا الله
خلي بابا يسكت عنة ويقبل ينطينا العمو حامد
وبعد لتخلي يضربني ولا يضرب أخواني خطية بعدهم صغار ميتحملون كل هالقسوة
نزلت راسي شفت عيونة تلمع مسحت على وجهة
- عمو لتبچي حباب اني صرت زينة
وأوعدك مراح اخاف طول ما انت موجود مو هذا كلامك
- عفية ببنتي السباعية... وگرصني من خدي حيل
فتح الباب ودخلنا
بعدني ما عتبت الصالة أجت عمة نهاية تركض أخذتني الحضنها تبوس بية وتبچي
- يعمري طيوبة الحلوة
والله يوميا اسأل عمو حامد شلون صارت بنيتي
بس ما گدرت أجيچ لأن تدرين أخوانچ ما عدهم غيري بهذا البيت وبيبيتچ مريضة
- لتخافين عمة
كل شي ما بية اني بطلة عمو حامد هيچ يگولي دوووم
- عفية بالحلوة
دومچ بطلة ان شاء الله تربية نسرين بعد منو گدچ
بعدني بحضنها أجت بيبي تركض
سحبتني من عمة
تبچي وتبوس بية انقهرت عليها أريدها تسكت ماكو
- يبعد گلب ببيتچ كون بية هالوجع ولا بيچ
- لا بيبي اسم الله
متدرين هالوجع شلون يأذي يموووت
اكيد متتحملي بس اني لأن بطلة تحملتة وهم أذاني كلش
بس حچيتها عيونهم صارت تلمع
شوية وبچن بيبي وعمة بصوت عالي باوعتلهم خايفة
- عمة ليش دتبچون أخواني بيهم شي ؟!!
- لا حبيبتي كل شي ما بيهم
هاي وينهم يم صالح ديلاعبهم تعالي خنروح نشوفهم
حچتها وسحبتني من أيدي
دخلنا للغرفة بس شافوني صفاء وصالح ركضوا حضنوني وهمْ حالهم حال الكل يبچون
صالح.. حبيبتي طيوب شلونچ شلون صرتي
والله بالي يمچ يوميا چنت ابچي عليچ كلما أذكر شلون گمتي تصرخين من الألم
صفاء.. واني هم
- شبيكم لتبچون
كل شي ما بية متشوفني طلعت من المستشفى مگاعد احس بـ أي ألم بعد صرت زينة لتخافون
صالح.. دومچ ان شاء الله متحسين بـ أي ألم
هزيت راسي بـ أبتسامة
التفتت للزاوية لگيت أخواني بالگاع
محللتهم عمة وديحركون بـ أديهم تفاجأت هاي شوكت كبروا هيچ
گبل رحت يمهم
گعدت فوگ راسهم وشبعتهم بوس ريحتهم تاخذ العقل
- الله عمة شگد حلوة هاي الريحة البيهم
- بعد عمتچ انتِ هم ريحتچ تخبل
بس حچتها شميت نفسي
- لا عمة بس ريحتهم حلوة اني ريحتي كلها ديتول مال مستشفى ودويات ايييع
- ههههههههه
دگومي اغسلچ وهسة تصير ريحتچ حتى أطيب منهم
- أي حبابة
- انتِ تأمرين بعد هالحبابة لويش ؟!!
مدت أيدها لزمت بيها وگمت
دخلتني للحمام
طول ما هي تسبحني تباوع على جسمي وترجع تمسح بدموعها مفهمت شبيها
- عمة ليش دتبچين.... ومررت أصابيعي جوة عيونها
- غير فرحانة برجعتچ لأن اشتاقيتلچ هواااااي
- اني احبچ بگد السما تدرين ؟؟
- يعمري انتِ
واني هم اموت عليچ احبچ بكد ما احب بنيتي صفاوي
- باوعتلها ودنگت
رجعت رفعت راسي عمة تقبلين أحضنچ لأن اشتاقيت لـ ماما
بس حچيتها سحبتني الصدرها تبچي
- اني الأحضنچ حبيبتي اني الأحضنچ غير انتِ بنيتي
صدگ هنا حسيت بـ نفسي حاضنة روح أمي
بچيت بحضنها لحد ما ارتاحيت
شوية ورجعت تسبحني
طلعت من الحمام للصالة صار بابا گدامي بس شفتـة رجفت خوف هذا شجابة يربي
- ها ولچ رجعتي لا هلا ولا مرحبا
نهاية.. رزاق وتالي يعني
الله يخليك ااااترك الطفله بحالها متخاف الله انتَ ؟!!
- وانتِ شكووو
بعدين شلون ترفعين صوتچ بوجهي متستحييييين
- خليت الخجل الك
ولتگول مرة ومتگدر علية لا والله
اكلك بسنوني بس تأذي طيبة لو واحد من الجهال تفهم
بس حچتها ركض بكل سرعتة
راد يضربها گبل رجعت ليورة وخلت أيدها گدامة تحمي نفسها منسمع إلا صوت عمو حامد رج البيت رج
- لكككككككككككك رزاااااااااااااااااق
- شكوووووو شبيك تجوعر
- لك انت شجابك للبيت بعد العملة السويتها
لا وفوگاها تريد تمد أيدك على مرتي اني اعلمك اليوم
حچاها وركض ضرب أبوية بـ وجهة
راد يدافع عن نفسة
شال المزهرية رگعها براسة داخ وگع من طولة گبل عمو دفرة بـ رجلة حيل
دخلوا جدو وعمي محمود بـ هالأثناء
گبل عمو صاح
- حامد هاي شبيك تخبلتتتتت ليش هيچ ويا أخوك
دحام.. لتتدخل محمووووووود
خلي يربي لـ هالحيوان شوية الظاهر اني معرفت أربي عدل مدري السجون خبلتة علينة
صفية.. يمة رزاق شجاك
شوكت الله يهديك بس فهمننننني
عود انتَ ليش هيچ؟! متحس على روحك شدتسوي !!
استلموا كل واحد يرزل من صفحة
اخير شي صاح بيهم
دنعل أبوكم لابو اليوم الشفت وجهكم بي ********
حامد.. ولك هاي عليمن دتغلط ؟!!
حتى أمك وأبوك ما خلصوا من حقارتك ********
حچاها وضربة مرت الخ
ظل عمو محمود بيناتهم يحاول يفكهم بس ماكو
أخر شي گام عمو حامد
دفع أخو حيل وشال بابا من ياختة يسحل بي لـ الباب
- أطلع برررررررررررة
يلا أطلع بساع ولا تلفي لـ هالبيت بعد لحد متصير أدمي
- موووووو بكيفك وتطردني هذا مو بيتتتتتتتتتك
دحام.. لا بيتة ي رزاااااق
اني قابل يصير بيتة ومثل ما هو گالها
اني راح أرجع واگولها
أطلع برة بوية منريد نشوف خلقتك الزفرة بـ هالبيت
- أخذ جهالي بالأول بعدين أطلع
حچاها وسحبني من أيدي
ركض عمو حامد أخذني من عندة وصاح بصوت عالي
متاخذهم لو أعرف أحرگك بنفط گدام عيونهم
- شنو بكيفك قابل
- اي طبعاً بكيفي
وهالمرة أخليك تعفن بالسجن اذا تجرأت وسويت شي
أخاف ذيچ المرة نقذت روحك ما اعرف شلون
هسة لا اگعدلك ركبة ونص
يا اني يا انت ويلا ولي منا أحسن ما أموتك بـ هالساعه
طال النقاش بيناتهم
أخر شي طلع أبوية من البيت يهدد ويتوعد بالكل
- يعني صرتوا كلكم علية مو بس بسيطة
اني الكم والله
إلا ارجع لهذا البيت وغصباً ما عليكم وموتك ي حامد على أيدي تسمع موتك على أيدددددي
- درب يسد ميرد
سبع حجارات وراك ي الخاييييس عساااااك لا رجعت
محمود.. ليش حامد ليششش
شلون تطرد أخوك من كل عقلك يعني لو تخبلتتتتتت
حامد.. ما عاجبك امشي أطلع ورى
رزاق بعد مالة گعدة بـ هالبيت إلا واني ميت تسمعووون
بس حچاها طلع عمي يدردم عليهم
لليل اجة عمو حامد جايبلي ملابس جديدة للمدرسـة بدل الملابس الـ مزقهن بابا
صاحني گعدني بحضنة وباسني من خدي
- من باچر تداومين طيوب
وهسة تعالي حتى نكتب الواجبات الفاتتچ وراها نحفظ الدروس وكل شي يصير تمام
- حضنتة بفرحة احبك عمو هوااااي احبك
- ههههههه واني هم احبچ
گعد يدرسني ما شلعت گلبة بسرعة احفظ
- باوعلي مبتسم شاطرة بنيتي
اني متأكد راح تطلعين دكتورة على هذا ذكائچ
وهسة يلا گومي بوسي أخوانچ ونامي
حتى تگعدين من الصبح ترحين للمدرسة ويا صفاوي
بوستة ورحت بست عمة وأخواني
نمت بالغرفة يم صفاء
باوعت الصالح نايم بالزاوية شافني اباوع علي أشرلي بخشمة وحط أيدة جوة راسة يعني نامي
رجعتلة الحركة وابتسمت
احس هو سندي بـ هالدنيا من بعد عمو حامد
أأمن واني يمة
رغم بعدة لسة صغير يعني ميگدر يدافع عني مثل أبو
ثاني يوم گعدت للمدرسة
أول ما دگ الجرس اجت المعلمة جايبتلي هدية وخلت طلاب يصفگولي أستغربت تصرفها
بعدين عرفت منها
عمو حامد جاي للمدرسة وماخذلي اجازة بعد ما شارح الهم حالتي
مرت سنة واحنة منعرف أي شي عن بابا
ارتاحيت كلش لأن خلصت منه
صح كل الـ بالبيت يعاملوني بقسوة بغياب عمو حامد بس ع الأقل من يجي يسكتون ويتركوني بحالي
صار عمر أخواني سنة وشهرين
بدوا يفتهمون وبديت اتعلق بيهم كلش بحيث ما انام اذا مينامون يمي
صارو يخبلون فدوة
مدنفشين توهم ديتعلمون الحركة والحچي
أول كلمة گالوها ممة (ماما)
من حچوها حسيت عمة ملكت الدنيا من الفرح وراها گالوا ببة (بابا) لعمو حامد
نجحت للثاني والحمد لله طلعت الأولى على صفي
خلصت العطلة ع السريع وبدت السنة الثانية
بـ أول يوم دوام دنروح للمدرسة اني و ولد عمو حامد صار بابا گدامي
رجفت من شفتة واگف مقابيلي
كل شريط ذكرياتة البشعة انرسم بعيوني من موت ماما لحد يوم الحرگني بالماي الحار
بعدني صافنة بوجهة اجة بـ أتجاهي
گبل صار صالح گدامي
فتح أيدة يحميني منة وصاح بي وخرررر عنها لتأذيها تسممممع
رزاق.. شو دوخرررر ولكككك
يعني اني أخلص من أبوك العاااار تجي الدور اااااانتَ
- ماااااا اوخر
شرجعك متگولي مو چنا خلصانين منك ومن شررررك
- عليمن هاي ولك ؟!!
حچاها ورفع أيدة حتى يضربة
گبل صالح لزم أيدي اني وأختـة وشما بيچ ي رجلينـة أركضي
حسيت علي ديركض ورانة بس ما لحگ
چنا قريبين ع المدرسة
گبل دخلنا الها وخلصنا من شرة
ما اعرف شلون عدة اليوم علية من الخوف الحسيت بي بعد ما شفت أبوية من جديد
دگ الجرس وما طلعنا إلا من اجة صالح علينة
الطريق كلة أمشي واتلفت
خايفة لا يرجع يطلع بوجهي وهالمرة ميخلصني من شره غير بس رب العالمين
أول ما وصلت للبيت ركضت البيبيتي
- بيبي بيبي
- ها ي بيبي
ليش دتركضين هيچ وشبي لونچ مخطوف صاير شي
- شفت بابا بطريق المدرسة
وراد يضربني بس صالح أخذني وركض ما لحگ علينة
- صخام الصخم وجهة
صدگ يحچي وشعندة راجع هالدماغ سزززززززز
باوعت علية أرجف
- لتخافين بيبي ميگدر يجي يمچ وعمچ حامد موجود
- واذا شفتة مرة ثانية
- ما تشوفي لأن راح اخلي عمچ يوصلكم منا ورايح
مر شهر تقريباً على دوامي
والحمد لله من يومها ما رجعت شفت أبوية بعد
أول أيام وصلنا عمو حامد
بعدين رجع الوضع مثل ما كان بس رغم كل شي ظل كابوس الخوف مرافقني بسببة
وهيچ مرت سنة ثانية من حياتي بشكل هادئ
ما صدگت ارتاحيت من أبوية
بس أجذب لو گلت گدرت أنسى رزاق وأشيل كابوسة من راسي
دوم أحساس الخوف متملكني ومسيطر على تفكيري
اكو شي بـ داخلي ممرتاح
ما ادري ليش احس اكو عاصفة بعد كل هـ الهدوء وهاي الراحة ما راح تدوملي هواي
نجحت للثالث وهم طلعت الأولى
وكلما چنت أنجح لصف جديد عمو حامد چان يشتريلي أشكال الهدايا والألعاب حتى يشجعني
حسيتة فعلاً صارلي أب وأكثر
بحيث ما فد يوم فرق بيني وبين بنتة صفاء واكيد عمة نهاية هم نفس الشي وياية وويا أخواني
بدوا رحمة ورحيم يكبرون وصاروا روحي من الدنيا
چنت أول ما أرجع من المدرسة اركض احضنهم
اما عطرهم فـ صارلي أدماان لأن بيهم أتذكر ماما الله يرحمها
وهم كذالك تعلقوا بيه كلش
بحيث من أرجع من المدرسة الگاهم ينتظروني بالباب ويتلگوني حادة تيبة عود حاجة طيبة
واكيد عمو ممقصر وياية
چان ينطيني فلوس فوگ حاجتي
بحيث أشتري الي واشبع
ويزود منهن أشتري الأخواني وياية واني راجعة بالطريق
صار السقوط وبدت الاوضاع تتأزم ببغداد
مرت أيام صعبة بشكل
صارت حتى الطلعة ممنوعة علينة يا دوب عمو يودينا ويجيبنا للمدارس بالشافعات
اجتني أيام ما أنام الليل
حاضنة أخواني وابچي خوف عليهم ابد مو على نفسي وتظل صفاء تقنع بية لحد ما اسكت
وبعد فترة من السقوط
عمو حامد واگف ويا جدو بالشارع يسولفون
واني وصالح وصفاء وجهال عمو محمود دنلعب توكي يمهم بباب الحوش
فجأة سمعنا سيارة بيكم شخطت مقابيلنا
رفعت راسي بخوف
شفت اثنين ملثمين نزلوا من السيارة رفعوا أسلحتهم وگاموا يرمون سريع على عمو حامد
كل الجهال دنگوا بالگاع وخلو أيدهم على راسهم
إلا اني وصالح
ظلينا نباوع عليهم نريد نعرف شديصير ومنو ذولةةة
بس رموا على عمي شمر جدي نفسة علي
حضنة حيل
صار ظهر على المسلحين ولأن ديرمون عشوائي خرطوا ظهر جدو من الطول للطول
وگعوا من طولهم
گبل شغلوا السيارة وتحركوا ع السريع
محد تتدخل بوقتها الوضع تعبان والناس يخافون من المشاكل الدتصير بعد السقوط
التفتت على عمو چان ديباوع علينة اني وصالح
تقربت منة ودموعي تجري بصدمة
من ماتت أمي ابد ما چنت اعرف شنو يعني المـوـوت
بس هسه عرفت معنى
ومو بس عرفتة لا تذوقت مرارتة هم بعد ما اخذ مني شكو غالي وعزيز
گعدت يمهم غرگانين بدمهم
جدو گبل غمض بس عمو لا لسة عينة مفتوحة يباوع علينة ويحرك بشفتة يمكن يريد يحچي
ركض صالح حضنة
صاح بكل صوتة لااااااااا بابا لتعوفونة الله يخليك
رفع أيدة حطها على صدر صالح من جهة گلبة
حاول يحچي هواي
أخر شي جر شهگة وگال بصوت ناصي بالگوه ينسمـع
حامد.. أمك وأختك وجهال عمك رزاق أمانة برگبتك
انت رجال البيت من بعدي
دير بالك على بيبي ولا تخلوها وحدها ما اوصيك وليدي
حچاها والتفت على جدي
رفع أيدة بالگوة حطها على راس أبو
شهگ شهگة قوية وراها غمض عيونة ووگع راسة صفح
گام صالح يدگ على راسة
صاح بكل صوتة لا بوية لتروووووووح
والله ننولي من بعدك مووو انت تدري محد يرحمنا اذا رحت
رفعت أيدي الترجف
خليت وحدة على وجه عمو حامد والثانية امسح بيها عيون جدو لسة ممصدگه الصار گدامي
- عمو حامد جدو حبيبي وين عفتونا ورحتوا
بعد منو اليدافعلي اذا بابا اجة وضربني منو اليحميني منة اذا كلكم تركتوني
عمو انت مو وعدتني هااااا
مو گلت مراح أعوفچ وراح اظل أحميچ طول حياتي
هسة منو الي بعد ؟!!
منو يحميني ؟!!
منو يخلصني من شر أبوية ؟!!
عمو حاچينييييي فدوة گوم فتح عينننننك وحاچيني
نمت عليهم اشهگ من گلبي
التموا الناس بعدونة عنهم حسيت روحي انترست دم
صاحوا شيلوهم بسرعة بلكت بيهم نفس وننقذهم
گمت اركض أمشي وأعثر من الصدمة
حسيت الطريق للبيت شطولة رغم احنة بصفة بس اريد أوصل العمة واحچيلها المصيبة
دخلت للبيت لگيتهم بالممر
يباوعون بخوف الظاهر سمعوا صوت الرمي گبل صحت الحگوا يمعووودين
نهاية.. شصار طيبة
شنو هالصوت مال الرمي وهذا الدم الـ بملابسچ شنووو
- عمة جدووووو
عمو حامد عمةةةة.... جدو وعمو جدووو وعمووووو
- شبيهم ولچ
اااااحچي شصااااار مو وگعتي گلبي والله
- مااااااااتوا عمةةةةة
مدري منو رمى عليهم بالرشاشة وماتوا
ذولة وينهم
برة بالشارع واگعين وسابحين بدمهم....
حچيتها وشهگت بصوت عالي
ما احس إلا بيبي وگعت من طولها بالگاع وعمة انهارت تدگ على راسها وتصيح يبووو بكل صوتها.....
يتبع
لتنسووون ⭐⭐⭐⭐⭐⭐
كل الحب ❤🥀