يوميات موظفين

الحلقة الخامسة عشر

#يوميات_موظفين~
الحلقة الخامسة عشر 📍

//
//
لايك + كومنت
.
.
انا >> وانا مروحه .....
وحكيتله اللي صار كله ، صدمة قيس وانا نحكيله فالكلام كيف صدمتي بالزبط

وانا نحكي جهاد طلع من المكتب وخبط الباب

أنا "انفجعت وبحتت في قيس ورديت بحتت في جهاد ">> من امتي انت هنا
جهاد "بعصبية وما ردش علي كلامي" >> كملي الكلام!!

قعدت نبكي معش عرفت نحكي 😭 اول ما شفت جهاد خفت تصيرله حاجه او يديروله حاجه كنت خايفه بكلللللل و قللبي يدق وجميع الاحداث الي ممكن يسيرن عقلي جابهن ! قعدت نمسح في دموعي ونحاول نحكي والكلام مايبيش يطلع

جهاد قرب مني ومسك وجي وقعد يمسحلي في دموعي ، ورفعلي راسي وعيوني جن في عيونه ! وكانت هذي اول مره عيني تجي في وسط عيونه ! كنا ديما نجنبو نبحتو في عيون بعضنا

"والمره هذي قيس كان واقف زي الفازه مش انا 😂"

جهاد>> اهدي شن فيه عليش البكا
انا >> خايفه يديرولك حاجه😭
جهاد >> ماحد حا يقدر يهوب لا شوري ولا شورك
انا >> انت ما تعرفش ادم ! شن علاقتك بيه ليش هو وصاحبة يهددو فيك ؟
جهاد>> صاحبة ما تعرفيش ؟؟
انا >> لالا اول مره نشوفه اسمر شويه وطويل و شعره خفيف

قيس وجهاد بحتو في بعضهم

قيس مسك تلفونه وحط عالصور ووراني صورة
كانت النفس الشخص والغريب انه كان جهاد جنبه فالصورة و يضحكو

انا >> ايوه هوا شن تعرفه ؟؟؟؟ منو هضا
قيس>>الله يلعنك يا طه
جهاد>> اهدي بس ، تقدري توريني صورة ادم ؟
انا >> ماعنديش صورة له ماسحه كل شي له علاقة بيه بعدين ما انت شفته لما جا هنا مره.
جهاد>> بنأكد بس ما ركزتش في شكله عندك اسمه عالفيسبوك؟
انا >> اها

عطاني قيس تلفونه و خشيت علي صفحة ادم

جهاد >> هو !!!
قيس بحت في جهاد

جهاد>> تذكر مره مشيت لجامعة شفت طه مصبي مع واحد هو ادم كان شكله مش غريب عليا من يوم لي جانا فالمعمل
بس كان واقف من الجنب ما زبطتش ولما شافني عدا وقعد طه بروحه

قيس>> الحل توا شنو ؟؟
جهاد >> الموضوع عندي
قيس>> مروح انا ونرجاك فاليل عند انس
جهاد >> تم

طلع قيس وقعمز جهاد جنبي عالكرسي وقرب مني

جهاد>> مانبيكش تخافي من شي !
ولا اي حاجه طول ما انا جنبك مستحيل يصيرلك شي

انا >> خايفه عليك انت
جهاد >> مش انا معاك ! انتي حاتكوني معايا !
انا هزيت براسي بمعنى ايوه
جهاد >> معناها انا حنكون بخير
ابتسمت رغم الخوف اللي فيا وتريحت ، مسك يدي وبحت فيا ، توا نبيكي تحكيلي قصة ادم بتفصيل

خذيت نفس وبديت نحكيله

انا >> ادم من سنة تقريبا هكي كنت نعرفة وكنت غبية  واول مره حد يعطيني رقمة و يطلب مني اني نحكي معاه وفعلا حكيت معاه وكان شخص قمة الادب! قعدنا كم شهر كويسين ويبي يخطبني
بعدها مره بالصدفة بعد تخرجت اشتغلت في شركة شهر بس و تعرفت فيها علي بنت و من هنا وهنا طلعت تعرف ادم ! وقالت لي انه هوا اكبر تاجر حشيش في منطقتهم ومعروف بكل انه واحد وسخ ومش متربي !

طبعا الصدمه يلي حصلتها خلتني حتي ما قدرتش نواجه ادم ! قبل ما نخاف علي روحي خفت علي مالك خويا توقعت لو واجهة ادم حايجي ويحكي المالك واحد زي هكي بايع الدنيا نتوقع منه اي شي ! قعدت يومين وانا خايفة و كل ما يرن عليا نحاول اني نتحجج لعند اخر شي اعترفتله بكل شي علي قد ما كان الشي يلي يدير فيه ادم غلط !
علي قد ما انا كنت نحبه ! كنت حايره وواقفة فالنص بين عقلي وقلبي
كان رد ادم عليا واحد بس

ادم >> و انك عرفتي شن حا يتغير ؟
انا>> ادم حاجه كيف هذي انت عارف كيف انه مافيش ولا حد حايتقبلها انت كيف درت في روحك هكي ؟
ادم>> تبي تبدي فالحكم والمواعض فوتيني واطلعي من راسي ! انا واحد ماعنديش بال للكلام الفاضي هضا
انا>> معش ترن عليا وطلعني من حياتك بكل !
ادم >> بجوي انا ما نتهددش !

من بعد المكالمة هذي معش نندري عليه بكل ولانه المكالمه انتهت بعركة ف زدت خفت
مرت فترة وكنت علي اعصابي وادم معش رن عليا اطمنت وقلت اكيد نساني مسحت رقمه و كل شي يتعلق بيه وكذبت علي مالك خويا قتله انه شفرتي كنت مطلعتها بنعلقها في تلفون نور راحت مني وكسرت الشفره و شريت وحده ثانيه
بعد فترة رن ادم علي نور صاحبتي بحكم انه مره رنيت عليه من رقمها ماكنتش متوقعته خزن الرقم ، حطاته نور فالحظر لعند ما اخر مره رن برقم غريب زر عليها فالكلام و عطاته عنوان الشغل

طول ما انا نحكي طول ما. ملامح جهاد يزيدن جدية وعصبية

جهاد >> وليش راد توا ؟
انا >> هضا اللي مدوخني الموضوع مر عليه سنه ! انا ليش خطرت له توا ؟
جهاد >> طلعي الموضوع هضا من راسك بكل
انا مش ح ندير شي توا بس لو تعرضلك مره ثانيه حا نوديه ورا الشمس
انا>> والله مانبي مشاكل !
جهاد>> ما فيش حد حا يديرلك مشاكل وانا قاعد ! خلاص اطمني وبطلي خوف

مشعارفه ليش وثقت فيه وفي كلامه

وانا نحكي كان مالك يرن عليا
انا>>> يييييه السااعة كم
جهاد>> اربعة ونص

مسكت تلفوني ورديت علي مالك وطلعت من جنب جهاد

مالك يهزب>> تي مش حطيتك فالحوش انا !!!!!! وين مشيتي ؟
انا>> طلعت عندي شغل دزولي سواق المعمل في بضاعة ولازم نوقع عليها
مالك>> وكنك ما رنيتي قلتي ؟ولا قلتي الامك
انا>> دوبني وصلت للحوش رنو والمعمل قريب السواق عشر دقايق ووصل مابيتش نخش عشان امك ما تمسكنيش تعطلني
مالك>> نجي نروح بيك؟
انا>> اه تعال !
مالك>> تمام تمام

سكرت وبرمت لقيت جهاد متكي عالباب

انا >> مش ناقصني مالك يفتحلي تحقيق بكل
جهاد>> لو تبي ننزل نحكيله اي شي بخصوص الشغل
انا>> لالا تو نصرف معاه

رنت عليا ندي مسكت التلفون ورديت

انا >> خلاص سكنتو مروحه
ندي>> ياكلبة لما بديري حاجه قوليلي
انا>> قاعده فالشغل شن هربت؟ 😂
ندي>> نننننن قولي المالك يجيب معاه حليب
انا>> باهي

صكرت من ندي وجاني مالك

انا>> مروحه
جهاد>>  طالع وراك ، بعد اتريحي رني عليا
انا>> اوكي

نزلت وركبت فسيارة وبدا مالك تحقيق لعند وجعلي راسي وانا مش ناقصصصصة ، قلت في عقلي هضا كله وقتله شغل كان قتله علي الحقيقه شن كان دار !

//
//

جهاد

روحت للحوش خشيت دوشت و غيرت دبشي وخذيت دخان ونزلت لقيت امي

امي>> خوك مش عاجبني
جهاد>> كنه ؟؟
امي >> من بعد موتت رانيا وهو متكدر مر قريب شهر وهو مازال خاطره واجعة
جهاد>> امي راه شهر مش سنه ! وغير هكي مافيش حد ينسى حد بسرعة خصوصا انه كان يبيها عطوه شوية وقت
امي >> مغير خايفه عليه
جهاد>> ماتخافيش تحت عيونا كان طلع مع ناصر صاحبة وانتي تعرفي ناصر وفي الشغل هديل بارك الله فيها مش مسيبته لحظة وفي الحوش نحن يعني  مش بروحه
امي >> وهديل هذي من !
جهاد >> انتن الصبايا تسيبن الموضوع الرئيسي وتمسكن فالباقي😂 موظفه معانا
امي>> باه كويسه ؟؟ كيف شكلها
جهاد>> امي الله يربحك مانيش خالتي انا 😂بنطلع ، بعدين شن يهم كان عرفتي التفاصيل
امي >> عدي عدي تو نعرف كيف نجيب اخبارها

طلعت وانا نضحك علي امي ومشيت شور الشباب القيتهم كلهم ملتمين

جهاد >> اكيده قيس حكالكم لي صار؟!
انس >> ونحن عالموت معاك
جهاد >> غير اهدا بس ! انا نعرف كيف نصرف معاهم بس تعرف شنو ؟
انس >> شنو
جهاد >> المره هذي مشكلتي مش مع طه بس فيه ادم وغير هكي حطو حساب انه لو صارت حاجه حا تنضر شهد ولو شهد انضرت حانخلي فيها قطع رقابي

رجب>> اهدا بسس وقول شن تبي ادير
جهاد>> مش هما دايرين جو مافيات ويهددو؟ حانلعبها لهم عالحامي
قيس>> غير بس خلي عندنا علم شن حدير
جهاد >> حاليا مش حاندير شي بس نحكي مع شهد السبت فالشغل و بعدها ساهل
رجب >> بس طه شن يعرف ادم
انس >> تي ادم اصلا شن يعرف شهد
جهاد "طلعت دخاني وبحتت في انس ">> زي ما انا كنت نعرف بيسان

سكتو كلهم ، طلعت الولاعه ولعت الدخان و طلعت برا ندخن

انس >> كان بس يقوللنا في شن يفكر
رجب >> جهاد هكي طبعه

رن تلفون انس وكانت نور تباعد من حذاهم وسيب قيس ورجب يحكو ورد عليها

نور >> ايوه
انس >> شنجوك
نور>> شن الجو عندك انت ! شهد مشغوله علي جهاد
انس >> حكتلك الي صار
نور>> حكتلي والله خفت بكل شنو هضا معقوله في ناس هكي شهد مافهمتش منها كويس يدوبك كم دقيقه عتلفون وقالت بنرق
انس >> قوليلها ماتحطش في بالها كلنا معاها ماتخافش
نور >> بكرا جمعة عطلتها تو نمشيلها ، جهاد كويس
انس >>زي القرد يدخن قاعد 😂
نور >> هههههههههه ، انت كيف حالك
انس >> باهي لي خطرت عليك
نور>> بلا دراما 🙄😂
انس >> ماشي 😂🙃

قعدو نور وانس يحكو و مواضيع شهد وجهاد يقربن فيهم بزيادة علي قولة المثل "مصائب قوم عند قوم فوائدُ" 😂😂😂

//
//

شهد

روحت من الشغل و علي طول خشيت دوشت بميه ساخنه وطلعت لبست بجامتي و انعزقت عالسرير

انا >> ندي وراسك تطلعي تقري فالصالون تعبانه بكل والله
ندي >> عليك لز
انا >> وراس ندوش
ندي >> باهي راك تبكي 😂 بنركب نقرا فالسطاح
انا >> تمام

طلعت ندي وقعدت نتقلب واذكرت هديل مسكينه فجعتها ، قعدت نفكر شن نقولهاا مابيتش نشهدر القصة

رنيت عليها اعتذرتلها وكذبت عليها قتلها اني نسيت اوراق شغل ضروري ولازم نرد ناخذهن من الابتوب قبل ما جهاد يغلط ويمسحن ، طبعا بان عليا اني نكذب بس مشتني وخلاص

رنيت علي اللي فاهمتني نور ما قدرتش نشرحلها حكيتلها بأختصار الي صار

نور>> انا مصدوووووومه
انا>> شن تقولي عليا انا
نور>> شن بديري باهي
انا >> والله ماني عارفه حايسه وخايفه علي جهاد
نور>> ادم الحقير هضاااا ومن طه
انا>> الله اعلم بس شكله حد يعرفه جهاد مش فاهمه ولا اي حاجه
نور>> معش تفكري سكري تلفونك وارقدي شكلك تعبانه
انا >> بككككل

صكرت من نور ودزيت الجهاد رسالة اني كويسه ونبي نرقد ، حطيت تلفوني عالصامت و قعدت نفكر واذكرت كلام زياد اللي قاله ليا حتي هو موضوعه بروحه
مابيتش نقوله الجهاد ونزيد القصة قصتين !

//
//

يوم الجمعة جت شيماء الباردة متغديه عندنا 🙄
شيماء>> كنه وجك اصفر
انا >> ووووه عليا بتبدا
شيماء>> رايحه جالطه
انا >> انتي تنابشي

خشي علينا مالك >> درتو شاهي
ندي>> كيف الشايب 🙄
امي >> صبي نديوا ديري
مالك>> قتلك عمي عمر عطا بنته ناديه
امي >> مشاء الله " وعطتني نظره متاع مش كان وافقتي"

انا >> مع النظرة هذي خلوني نخش انا
مالك>> فتحت جبهه 😂😂

خشيت وسيبتهم يهدرزو مع هرجه عيال شيماء

مسكت تلفوني ورنيت علي جهاد

انا >> الو
جهاد >> يا الوين
انا >>كيف حالك
جهاد >> توا قعدت كويس
انا >> هههههههه امس ما قدرتش نرن عليك كنت تعبانه
جهاد >> يلا نمشيها لكي
انا >> ياسلام
جهاد >> لا سلام لا حرب
انا >> دودو معش تعاودهاااا😭
جهاد>> شن قلنا عالاسم هضا ؟
انا>> قول بروحك انا بنقوله ، المهم قولي شنصار
جهاد>> في شنو ؟
انا >> جهاد انت عارف !
جهاد >> مش قتلك حولي الموضوع هضا من بالك !
انا >> بس !
جهاد>> بدون بس والله ماحاتنضري
انا >> مش خايفه علي روحي بس افهمني!
جهاد>> خايفه عليا !؟
انا سكتت ومعش عرفت شن نقول 🤤
جهاد ضحك >> ماتخافيش
انا >> حاضر 😩

سكرت من جهاد وانا مطمنه ومتريحه بكل كان صوته الحاجه الوحيده اللي تهدي فيا

//
//
جهاد

كنت نحكي مع شهد و كان باين انها خايفه من الموضوع

سكرت منها ولقيت فيه رسالة جايتني من بشرى ! مكتوب فيها "ياريت نحكو "

جهاد>> زمريييي عاد هذي شن تبي

خشيت علي رقمها وحولته من الحظر ورنيت عليها وردت عليا دغري
جهاد >> الو !!
بشرى>> عارفة اللي صار كله نبيك تسمعني
جهاد >> قبل ما انتي تحكي خليني انا نحكى ! لما جيت وحكيتلك ماكنتش نعرف انه فرخت الحرام هذكي اختك !
بشرى>> جهاد احكي باسلوب
جهاد>> تحمد ربها اني ماشربتش من دمها مش نحكي ب اسلوب وانا غلطت لما خذيت رقمك خلاص فضيها سيرة
بشرى>> بيسان حكتلي بس انا برضو ما كنتش نعرف شي ، شن ذنبي انا
جهاد >> تو مش من البداية قلتيلي معش ترن عليا ؟؟؟؟ وقلتيلي فوتني ! شن سبب رنتك توا!
بشرى>> خلاص فهمت ! كنت جايه نقولك اني مالش ذنب في يلي صار كله
جهاد>> ولا انا ليا ذنب !

صكرت في وجه بشرى علي قد ما كنت نحكي معاها بعصبية علي قد ما وجعتني انه هي مالهش ذنب وانا لي حطيتها فالموقف البايخ هضا
عزقت التلفون ونزلت لوطا لقيت حازم مقعمز ويدير في اوراق

جهاد>> حتي الجمعة شغل ؟
حازم >> ماعندي ما ندير
جهاد>> امك مشغولة عليك راه !
حازم>> ماعندها ليش بتنشغل كويس انا
وكان يحكي ويقلب فالاوراق
جهاد>> تي في شن ادور ؟؟
حازم >> يارا هديل وين حطت الورقة
جهاد >> خطرها علي هديل هلكت البنت راه
حازم حط الاوراق وبحت فيا>> كيف يعني ؟ هي اللي تجي و تساعد
جهاد>> من بابا الذوق تجي ! بس انت زودت امها
حازم>> يعني تجي تقولي تبي مساعده نقوللها لا جهاد قالي زودت امها ؟
جهاد >> بطل معيله ! و انت فاهم كويس

صبيت و خذيت دخاني وطلعت للسياره بحتت فالسااعة لقيتها اربعه القايله وماعنديش نيه نمشي شور حد من الشباب ، قعدت ندخن ونبرم بالسيارة
ونفكر فالشي يلي بنديره هل صح ولا لا
من ناحية قلبي يقول صح ! من ناحية عقلي يقول لا !

كانن مليون فكرة وفكرة في راسي ، قعدت نبرم لقيت روحي كالعاده مدرس قدام حوش انس ، خشيت وما حكيتش ولا حرف دخان ورا دخان بعدها بحتت في انس

جهاد>> طه كل يوم يجي لجامعة؟
انس >> شبه يومي !
"طلعت تلفوني ووريته صورة ادم "
جهاد>> تشوف في فرخ الحرام هضا فالجامعة ؟؟
انس >> اه نشوف فيه ديما مع طه !بس فرخ حرام متاع حشيش و كلام كيف هضا
جهاد>> نعرف نعرف ، بكرا امتي تكمل محاضراتك؟
انس >> عال ٢ هكي
جهاد >> تم نطلع من الشغل ونجيك ما تقولش القيس تو يديرلي موضوع
انس >> كان بدير عركة قوللنا بيش الواحد يعرف وين حاط روحه
جهاد >> لالا

//
//

ثاني يوم فالشغل

شهد

جيت وكنت نراجي في جهاد يجي
جهاد >> صباح الخير
انا >> صباح النور
جهاد >> ماحد ضايقك؟
انا >> لاء ، شنصار معاك
جهاد>> طلعي الموضوع من راسك بس ومتفكريش فيه

خشت علينا هديل

هديل >> جهودي وين استاذ حازم
جهاد >> وحده جهودي ولخرا دودو و كلا حازم ما ينقااله الا استاذ حازم 🙄
انا >>ههههههههههه حازم شفته نازل لوطا
هديل >> غريبه قبل كل ما يجي يناديني عالشغل
جهاد >> بلكي مايبيش يتعبك
هديل >> ما علينا

طلعت هديل و بحت فيا جهاد

انا >>انتو يا عيال حامد متعبين بكل
جهاد >> وانتي مش متعبة ؟ وراسك يابس "وقرب خطوه"
انا >> لاء انا اعقل مني ما فيش

خش قيس و بعد مني جهاد وانا وخرت

قيس يضحك >> معلش عاد 😂😂😂😂
قطعنا الليله
جهاد >> هي وكالة من غير بواب جت عليك 🌚

وانا واقفه زي الفازه طبعا

قيس >> يبيك حازم تحت
جهاد >> حازم يقول الهديل تريحي و يجي عندي انا يصدع ام راسي

نزل جهاد وانا لهيت في شغلي

//
//

جهاد

كملت شغلي وركبت قلت الشهد عندي موضوع مع انس صاحبي فالشغل وهكي و طلعت

مشيت شور الجامعة لقيت انس يرجي فيا

جهاد >> ما شفتش ؟؟
انس >> لالا مش باين بكل
جهاد>> حتي الفرخ لاخرر؟
انس >> لا

مع جيت رجب
رجب >> شن في راسك ؟
جهاد >> بنشوفه بس نبي نحط عيني في عينه !
رجب >> تعال شور الكافي كان جا اكيد حا يخطم غادي

مشيت شور الكافي انا والشباب و قعمزنا طلعت دخاني وقعدن عيوني عالباب نراجي فيه يخش ، برمت راسي هكي وبحتت ورايا و حقيت ...

\\
#يتبع
#AYA🔮