Olaaa
بارت في الشباب استمتعووو
ناضت صباح ذسايم روتين ، اليوم تقرا نص نهار برك مي عندها بحث لازم تخدمو مع ماريا سو راح تستغل الڤيد هادا ، طبعا قالت لنبع الحنان ماهيش ناوية تطلعلها لاطونسيون
المهم خرجت صباح خلات أمال برك قاعدة اما جوري و الباقي في سبات ( واش تغيضني روحي كي نكون انا برك لي ننوض و الباقي سيتمتع بالدفئ و الحنان السريري
قرأت الساعة الاولى عند امين لي شيباتو بلي كيستيون المخلوق زوج جمل يتعاودو في فمو يا " هادي عندها درس وحدو" يا" هادي مزال الحال باه تقراوها" هههههه حتى عاد يحسب في الثواني باه يسلك منها
، كي خرج من لونفي لقا ميساج من عند نجوى قالتلو ~قول لليث يريبوندي عليا ~
ولا عيطلو في تيليفون تاع البيرو بسك لقا تيليفونو مسكر وقاللو
ليث ولى شعل تيليفونو بسك كانت الباتري تاعو ناشفة عيطلها حكى معاها شوي لبلابلابلا تاع سافا و..... و مبعدا قالتلو
نجوى : ليث وكتاه تطلع خالتي لهنا
ليث : لاه توحشتيها هههه صاي نحكمها عندي
نجوى : سيريو
ليث : والله ماعلابالي ، لاه؟؟؟
نجوى : شوف نقوللك وماكالاه تنوض تعرش . ايه و كي تقول لخالتي ماكالاه تخلعها بسك انا ماقلتلهاش تعرفني مانقدرش نحكم فمي و نخرجلها طاي طاي
ليث : و درك راح تقوليلي ولا تزيدي تحرقيلي زغبة الصبر لي مزالت
نجوى : هي يعني ميش حاجة بيزار ولا..
ليث : تنطقي ولا
نجوى : بلع خليني نهدر. قلتلك ماما قاست روحها بالموس( ليلى لي هي أمها مريضة بالسكر ) و انا درك راني قاعدة معاها مي عبالك لقراية و بلابلابلا ماقدرتش نخليها وحدها سو قلت خالتي سميرة هي الحل
ليث : اوووووووووووو و لاه ماقلتيش من نهار الاول و درك قداه عندها
نجوى : ابيبري 4 ايام
ليث : اوك درك نريزارڤيلها بلاسة اليوم اذا قدرت و نقوللها اتهناي
نجوى : مرسييييي لبغل نتاعي
ليث : بلعي و طيري ريحي توال خالتي
كوبا عليها و راح ديراكت للاجونس الحمد الله مزالو لبلايس سلك و راح ديراكت للدار ، دخل لقا تيم كي العادة يدور كي الزربوط و يتمهبل و سميرة في الكوزينة زدم عليها مود سيلونس
ليث : واااااش مااااذر واااااش درتييييلنااا للغدااا
سميرة : توبة بسمله ، يابغل لاه الناس يدخلو هكذ اوموا قول السلام باه نعرفو بلي جيت
ليث : قلت نتي لي ماسمعتينيش
سميرة : همممم درت محاجب ، مي لاه جيت
ليث : احححححح لي زووم نتي قصدي لي فاااام
سميرة : عمبالي انا ذباسط ، المهم لاه خرجت درك ، يابني على حساب خروجك كل دقيقة ماكاين لا خدمة لا قدمة
ليث : ااه ماكانش خدمة غراف و اصلا جيتك على سوجي مي ماتتخلعيش بسك ماهوش بيزار
سميرة : كي قلتلي هكذ لي تخلعت بل بيان تعرف تكالمي بسلامتك ، ليسونسيال هات من اللخر
ليث : اااه خالتي ليلى جرحت روحها ولازم تروحي توالها باه تتهلاي فيها بسك نجوى راهي تعطلت في قرايتها علاجالها
سميرة : ياوخضييي على ختي يايماااا
ليث : هادا كي قلتلك ماهيش بيزار
سميرة : روح اجري اشريلي بيي درك نعيطلها و نلم قشي يالااه
ليث : كالم داون مام كالمي ، اني شريت و خلصت . الڤول تاعك على التسعة تاع ليل و نجوى قالتلي راهي لاباس و قشك ماكالاه يخي عندك لهيه أدي نيسيسار برك ولا ناوية تطولي ثم
سميرة : حتى ترتاح ليلى باه نولي مايهنينيش قلبي نجي و نخليها و نتوما راكم كبار تقدرو نقعدو بلابيا نورمال شنهي بالعقل على تيم برك
ليث : اوك اوك انا ني طالع
هدرت سميرة مع ليلى لي تحلف و تعاود بلي ماهيش مضرورة، و مبعدا لمت حوايجها و حطت لغدا كي خلصو بعدما لمت الحالة قعدت تتفرج مبعدا ناضت راحت لليث بعدما سينيالاتلها فكرة في راسها دخلت لقاتو يخدم بالبيسي كي شافها سكرو و سقم روحو
ليث : واش مام كشما سحقيتي
سميرة : تفكرت عمك محمد يادرا واش راه
ليث : علمي علمك ديجا انا وين عمبالي
سميرة : واش رايك نروحو ليه
ليث : واااااااااات ( وهو ميت بالسعادة مي كوف روحو)
سميرة : ياو في بالك ماهوش غير طاكسيور لي حاكمينو راحو لانتيم تاع باباك الله يرحمو و كان يعزك اكثر من عمامك تاع الصح يو ناو ايت
ليث : و انا ماقلت والو
سميرة : شفتك تشوكيت
ليث : احم مي مانعرفوش دارو
سميرة : بيي هادي نسيتها هو انا نعرف لبلاسة مي الدار اكزاكت والله ماعلابالي
ليث : نعيطولو
سميرة : كون نعيطولو تخاف يقول ماكلاه و ....
ليث : اممم نروحو لثم و نعيطولو ينعتلنا الدار بسك وقتها مايقدرش يقول ماكالاه ( وهو يحوس يلقا السبة باه يروحو)
سميرة : اوك ، و خرجت و ليث عيط لمريم لي كي بالسيف باه هزت عليه
مريم : وي
ليث : واش سافا
مريم : الحمد لله ، خير لاه عيطت
ليث : مام انا الحمد لله مرسي على لكيستيون
مريم : ههههه واش يخصك باه نسقسي عليك
ليث : وين راكي ؟
مريم : راني مع مار... اصبر اصبر لاه تحوس وين راني وا.....
ليث : حبسي ماتبدايش تعرشي قوليلي راكي برا
مريم : هيه و واش دخلك
ليث : ماطوليش برا اوك ، وكوبا عليها
مريم دنقت في ماريا مافاهمة والو ، ولات كملت كتبتها هوما اصلا مامزالش بزاف و يخلصو
اما ليث راح دوش و ضربها بتبييشة كي العادة مع Dior Sauvage الله الله و خرج هو و نبع الحنان في الطريق
ليث : ماميتووو
سميرة : امممم
ليث : ماميييييي
سميرة : هاد الماميتو و المامي فيهم اللوش واش خير
ليث ( ياحبيبي درك تبدا تسمر ): نحوس نقولك حاجة مي ماتبهدلينيش اوك
سميرة دنقت فيه تاع هات من اللخر بلا تكسار راس
ليث : نحوس نتزوج
سميرة : هاه وانا لاه
ليث : واو كم انتي باردة ، يخي نتي لي تخطبيلي والله
سميرة : لاه انا لي راح نتزوج ولا نتا ييدبر وحدة و سقسي عليها هذا اذا عاد ماعندكش طبعا ذي كسع نروح نخطبها
ليث : ااااااا ماكانش مي عجبتني وحدة
سميرة : الله يبارك و شكون المغبونة هادي
ليث : لاه مغبونة هادا مزهورة لي راح تدي واحد كيفي سيد الرجالة شبيك
سميرة : فاقو
ليث : مااااا لاه راكي تسابوطي فيا طلعيلي المورال شوي يالز
سميرة ضرباتو وقالت : ههههههههه نقصر برك عمبالي وليدي راجل و فحل و عندها الزهر لي راح تديك ، وماتديهاش في روحك فهمت
ليث : تطلعي المورال للسماء السابعة ثم ثم تهبطيه لأسفل السافلين
سميرة : هايا قوللي شكون هادي منا و لا منهيه اذا عادت منهيه غير ماكالاه فهمت
ليث : ههههه اتهناي منا
سميرة : مليح شكون هي نعرفها ولا نن مانظنش نعرفها بسم تاع لافامي ماحبيتش تقبل بيهم مام بنات صحاباتي همممم لازم تسقسي على اصلها و فصلها قبل مانيش حابة نت....
سكتها كي قاللها ياااو مريم
سميرة : وينا مريم ااااااااا ماتقولليش بنت عمك الكبير لالالاااااا غير بنت المسمامة هاديك لي ماتدخلش داري
ليث خبط وجهو و قاللها : ياو بنت عمي محمد
سميرة : وااااااااااااااااااااااااااااااااااااااااات
ليث : يسموها وذني يا الام
سميرة : ياعمريييييييي على وليديييي يعرف يخير وي مريم طفلة تهبل الله يبارك اونبليس عاقلة و متربية ظرافة ووو مي اصبر كيشغل مزالت صغيرة نن
ليث : نن تقرا في الجامعة يعني تكون 19 ولا مانعرف المهم
سميرة : يااااااااااا ياربي و تقبل
ليث : لاه ماتقبلش واش خصني انا
سميرة : ياحمار الطفلة تحوس تولي طبيبة
ليث : نورمال نخليها تكمل قرايتها
سميرة : مانعرف درك نشوفو و نهدر مع باباها ياك
ليث : كي نعودو قريب نخرجو و قوليلو اوك
سميرة : اوك
المهم نعقبو الطريق و كي عيطولهم
وصلو للدار استقبلوهم محمد و ليث قاعدين مع بعض سوجي يجبد سوجي أما النسا تاني مع بعض سميرة تولهت لمريم ماكانش قالولها تقرا المهم قعدو شوي مبعدا سميرة قالتلهم نشوف محمد راحت هدرت معاه مع لول احوالك وبلابلابلا و معبدا جبدتلو الموضوع محمد قعد يدنق في ليث لي حشم و قاللها انا نروح لبرا راني نستنا فيك هرب ههههه هو جا خارج و يتحل الباب مريم لي جات هي شافتو المخلوقة ولات للور فيراج ماتقلبت حكمت في روحها و زاد حكمها
مريم : اومايقووووش غلطت في الدار واقيلا
ولات قرصاتو
ليث : اااااااو وشبييييك
مريم : والله غير هو واااااااااااع واش راك دير في دارنا
ليث سمع هدرة امو و هي تبقي فيهم بالسلامة طلقها و قاللها مبعدا ني نعيطلك و قوليلي رايك
مريم. ماجات تهدر حتى راح لطوموبيلو دارت تلقا سميرة مقابلتها سلمت عليها و ولات طلعت ......
طيييييييييييط
جمعة مباركة
سلاااااام اركداشلاااااار كي راكم
احوالكم
واش راكم مدايرين فيها
عجبكم البارت
رايكم
توقعاتكم مريم و محمد يقبلو ولا نن
خليو رايكم في كومونت ماتقراوش كي جنود الخفاء
Ciao