هذا طلع ٢٨٠٠ مو ٢٠٠٠🥴
ميخالف تستاهلوون
#هديه_في_حي_الرجال
#بقلم_زينب_العبيدي(الزينبيه سابقاً)
#بارت٤
وسمعت صوت الحجيه زري خايبه يلنكريزيه ماتذبين الزباله لاتدش علينه هاي الملعونه وتبديها طاحت وذره من اللساني وانه اكلهن لا تنسن الزباله لاتنسن الزباله هاي اليوم الي على عذيره هل برص ماتذب الزباله انجان الحايط يسمع هي تسمع الخارمه
بيلسان هسه شنو تغديني اسوي خالتي
الحجيه زري. خايبه من كون وجت بيج نار ابراهيم وذوبت الثلج البيج جاي اكلج ذبي الزباله لاتدش علينه البزونه
فتحت عيوني على كبرهم وهمست اني ثلج لو انتي لتلبكين صاغ ساعه وما افهم شنو تكولين
حجيت ابصوت مسموع وين اشمغها خالتي
-تلكين يم الباب البرى واحد مال الزباله ذبيه ابطنه موش تذبينها بالكاع من حيث اعرفج فاهيه
فتحت عيوني عززه تكول فاهيه لا و تعغفني بعد هاي شحجي وياها الخغفانه(الخرفانه) زين الواحد شنو اطلع واشوف
رحت ع المطبخ واخذت جيس الزباله وطلعت للحديقه
باوعت بالهدوء الي يعم باالجو بشكل عام وباالحديقه والطاغمه مالتهم ونصها ضلمه خصوصا من ناحيه الحديقه بس صوت الصغصغ(الصرصر) مسموع
هاي صدوك تحجي الحجيه الخغفانه تغيدني اطلع اذب الزباله بهذا الليل اخاف والغب كون الغب يحاسبج كون تكوبسين بجني تغكي واثغم يغطن (تركي واثرم يرطن)عليج لصبح وماتفهمينه لحد تختلين عقليا ويصيغ بيج غمشه(رمشه) لا اغاديه بجفن العين اخذت جيس الزباله وطلعت واني اتلفت يمنه ويسرى والغب اخاف وفجئه طلع شي كبالي يماااااااااه جني يمااااااااه ضليت اصرخ
ارغد. يماااااااااه حوريه.... ملاك..... روح
بيلسان واني ايدي ع حلكي وادعي عليه صحت بي انته شبيك تمشي بالظلمه ومنو انته وشدخلك اهنا هااااا يله احجي(الدمعه بطرف عيني من الخرعه)
ارغد. حبه حبه يمااااي انه بيا سمه كاعد معقوله انتي حوريه ونازله شنهي
بيلسان. حظغتك(حظرتك) ضغيف لو دمك خفيف لو صايغ بالخغيف
ارغد لا والله انه جدا خفيف ومن شفتج صرت كلش سخيف دخيل الاغغ المافهمت منها شي
بيلسان. اكول كول منو انته احسلك لا احطك بهذا الجيس
ارغد لادخيلج يابروسلي انه ارغد ابن شيخ عبد الله انتي منهي
بيلسان. هاااا هيج .ءء اسفه اني بيلسان بنت حامد صديق عمو عبدالله(ورجعت حجيت بعصبيه) بسسس تغى كلش خوفتني
ارغد البقيه بحياتج وانه اعتذر ترى حتى انه اخترعت اول مره اشوفج وابيتنه حسبالي حور العين والله حن علي وكطفها الي
-هههههه اسفه مغه لخ
-احوو على المغه ادفن نمل واشيع صراصر من وغه المغه
-عزه دتقلد علي
-لا والله جاي اقلد على حظي الماشافج من كبل
-بله هسه اني شحجي
-هههه اسف خويه ترى اتشاقه بس جاي اضحكج ترى انه والا اجذب بالذات هسه وحاليا (ورفع راسه للسمه) اللهي انت اعرف باالنوايه
ضحكت وعفته صاح علي هووب هووب وين رايحه طالعه للباب
-اغيد اشمغ هاذي الزباله
-انطينياها اشمغها
(خذاها مني ) دخلي جوه خويه شمطلعج خاف تطلعين والوادم حسبالها صار الصبح
ضحكت عليه ورحت جوه وهو طلع يذب الزباله
دخلت للغرفه نمت لحد ماسمعت صوت عالي بنص الصاله كعدت مخترعه وايدي على كلبي
يمااااا هاي شكوو باوعت على دره وعذره كعدن بس ما مخترعات مثلي كلشي عادي
التفتت علي دره صباح الخير خيه
-صب صباح النوغ حبيبتي بس ش شصايغ
وطكتها ضحكه عذراء وهي تكول خطيه لبنيه اخترعت شكول على جدي حسبالها نامت وصحت بمعركه بدر
-لا صدوك شنو صايغ
دره وهي تضحك خيه لاتخافين هذا ابوي الشيخ ياذن باالبيت كل يوم الفجر حتى يوعينه انصلي من حيث يكول البيت الي ياذن بي راعيه ما يصيبه الفكر
عذراء هههههه خيه هاي لو مااذن ابوي جان شكلتي عود هذا جدي الشايب العايب
دره عمه بعينج اعذيره صلي اعلى النبي لاتخرسين ابوج عمه بعينج
بيلسان هههه لو يش ابوج صوته عالي
عذاراء ليش ماسمعتي هذاك اليوم شلون يرعد علينه بس اطمني ههههه هو ما ايأذن اله من جدي مريض لو تعبان
بيلسان ههههههه همزين
وكامن طلعن يتوضن واني رجعت اتكلب باالفراش لحد ما خلصن صلاة عذراء ضلت تقره دروسها ودره طلعت
تاأفأفت
عذراء ها شبيج طارت نومت عينج
بيلسان اي والغب وضايجه كلش واشتاقيت البابا حبيبي و لصديقاتي ابغداد احس نفسي مخنوكه من وفات بابا والهسه مامتعلمه انحبس هلكد باالبيت
عذراء الله يساعدج حياتج انكلبت جدي سولف عنج يكول جانت حيل مدلله من حيث ابوها مارافض الها طلب كلش ويفرفرها من مكان المكان
بيلسان اتحسرت تصدكين عذغاء بابا طول عمره من وعيت ع الدنيه لحد ماتغكني ما يوم اذاني بحجايه او صاح علي كله ينصحني بااسلوبه الحلو صاغ امي وابوي وصديقي وحبيبي يفاجئني بعيد ميلادي يطلعني يعشيني واذا ضايجه مايغتاح اذا ميضحكني تتصوغين وغه وفات ماما دخلت بنوبه حزن مخله مكان ماوداني ومخله شي بنفسي بس في سبيل ايطلعني من نوبه حزني اووف ......هواي تغك الي من ذكغياته احس صاغ فغاغ(فراغ) كبيغ بحياتي لمن غاح عني
عذراء سدت الكتاب الله يرحمه ويصبرج على فراكه صدك والله الابو مريود وفراكه صعب انه هم فكدت امي وحاسه بيج
-اشكغج حبيبتي الغب يحفظلج ابوج
-زين مشينه انروح باالحديقه من حيث هسه فجر الجو يخبل والنسايم عليله وهم ترتاح نفسيتج
هزيت راسي بمعنى اي
طلعنه وجانوا كاعدين الشيخ والحجيات
والباقين كل واحد بمكان
صباح الخيغ
الكل صباح النور
الشيخ عبدالله هابويه عسى بس نمتي زين
بيلسان اي عمو نمت
عذراء يله تعاي
طلعنه برى وجان الجو صدك يجنن الضوه طالع بس ماكو شمس والجو بي بروده اواخر الخريف وصوت العصافير جو يجنن
فتحت ايدي باالهوه واستنشقت الهوه حيل وغمضت عيوني واني مبتسمه اشتم ريحه الشجر
وبعدها صعدت باالمرجوحه وعذراء تدفعني وتصعد توكف وراي وتدفعنه ونضحك
شفنه دره جايه من الحديقه الجانبيه وبيدها صف خبز حار جانت تخبز صاحت يله تعالن تريكن ودخلت للمطبخ
عذراء يله امشينه
بيلسان ما اغيد( حجيت واني مبتسمه) خليني كاعده هنا هذا الجو يجنن
عذراء دكومي كومي يمعوده
بيلسان لاوالغب ما اغيد غيوك عوفيني
عذراء ها اخليج مو
شفتها كمزت من وراي ودفعتني باالمرجوحه حيل وجنت ما كامشه عدل فا وكعت عن المرجوحه يم الزرع وجانت هستوه ساقينه وصارن رجلي كلهن طين لان كعدت على اركباتي
كمت ركضت وراها الحديقه كلها واني بيدي صم طين وهي تضحك واني اصيح عليها لحد مادخلت باالبيت واني عافسه وجهي وادردم على عذراء بصوت ناصي شكد طفله الغبيه الحقيغه
'''''''''''''''''''''''''''''''''''''''''''''''''''''''''''
بنفس الوكت جوى باالبيت
دره خويه احمد حظرتلك الحمام بس مالكيت منشفك
احمد انه اجيبه شكرا حبيبتي
راح يجيبه
دخلت واني ادردم اني الج اعذيغه الحقيغه اذا ماخليت الطين بحلكج وانتي نايمه هيج تسوين بيه
دخلت للحمام اغسل
شوي وسمعت صوت دك على الباب وصوت يصيح
درررره ولج درررره منو باالحمام
بيلسان ياا منو هذا صحت ابصوت اني
احمد منو انتي عذره عمو طلعي اريد اسبح وراي دوام مستعجل
بيلسان اهووو هذا شبي لزك
فتحت الباب بسرعه واني ضايجه صحت بي
نعم نعم نعم يعني شلون الحمام الك وحدك ممنوع ندخله لو مسجلي بااسمك ولازم ناخذ اذن قبل لاندخله
(جنت احجي بسرعه بدون ما اخذ نفس وناسيه روحي باوعت على الواكف كبالي وهو فاتح عيونه وحلكه)
احمد انتي ...انتي منو( ودار وجها بسرعه)
بيلسان واني احك بشعري اني اسفه موقصدي اصيح بوجهك وصدكني بس منفعله شوي م. م
قاطعني
احمد ماصار شي بس منو انتي لاصغر بيج (هذا كله وهو داير نظرات عيونه)
بيلسان اني بيلسان بنت حامدصديق العمو عبد الله
احمد هاا اسف خويه والبقيه بحياتج وان شاء الله خاتمة الاحزان
بيلسان اشكغك اخوي
احمد هااا ..دار وجها وضحك يله يله اخذي راحتج خويه
بيلسان لا خلصت جنت اغسل لان عذغاء العوبه وكعتني باالطين
طلعت واني رافعه دشداشتي شوي لان امبلله
اتحمحم هو وشال عيونه بسرعه عني ودخل للحمام
ورحت للغرفه وقبل ما ادخل سمعت صوت احلام هيييي وين كاعدين امطلعه رجليج وتمشين خايبين صدك الي استحو ماتو
بيلسان دشادشتي امبلله
احلام والماي يجوي لو يكرص نزلي هدومج كولي وياي زلم باالبيت عيب لو شافوني هيج مطلعه رجليج بيض يجيبن التايه شيكولون
دخلت للغرفه ما رديت عليها ياغب شلون ح عيش وي هذول الناس حياتهم مو مثل حياتي وديحاسبوني على شي ممفغوض علي اووف والحل شسوي بيئتهم تختلف عن بيئتي ومعتقداتهم بعيده عن معتقداتي بعد السما عن الاغض شسوي
كمشت التليفون ابسرعه اتصلت على جنى الو
جنى الو هلو ياحب
بيلسان هلو بيج جنى
-شبي صوتج بيلسان اكو شي مضوجج
-غاح اموت ياجنى احس نفسي مخنوكه والغب مخنوكه
-لويش أذوج هذول الناس
-اووف شحجي ياجنى اغيد بابا اغيد حياتي القديمه هذول الناس حياتهم غيغ عن حياتي طغيقه عيشتهم مختلفه والغب تعبت ديحاسبوني على لبسي واحسهم متقيدين بيه حتى ميباوعون بوجهي لان مو مثل لبسهم لاو يصيحون علي انكليزيه لويش منو كلهم اني امغيكيه لو غوسيه او اوغبيه (اوربيه)ماادغي احس نفسي مخنوكه يمهم
-الرب يساعدج بس حبيبتي بيلسان ممجبوره تضلين يمهم
-وين اغوح جنى اذا اخواني احقغ منهم مشفت وخوالي الي من وفات بابا الهسه ماسالوا عني وحتى من اتصلت عليهم وشكيت الهم حالتي وي اخواني ما اجوني وما كالوا بنت اختنه احسهم حاقدين علي مثل ماحقدوا على بابا من وفاة ماما وهما كلبوا علينه ومحملينه المسؤليه اووف
- زين احجي وي الشيخ ابوهم خلي يجوزون من يمج وميحاسبوج
-هما مو كلهم ديحاسبوني على لبسي بس احسهم متقيدين وخصوصا الشباب الي عدهم مو بس هيج احس اني ثقل عليهم كاعده ابيتهم بصفتي شنو اكل واشغب ومشاغكه البنات بغغفتهن (بغرفتهن)
اغيد الكالي شغل واشتغل حتى اكدغ اعيش الوحدي
-اي افضل حل اشتغلي واني ح ادورلج شغل ...وبعدين تعالي انتي لويش مدتداومين
-خطيه العمو عبد الله كال دايشوفلي سايق ثقه حتى يوصلني للجامعه
-تمام يعني تداومين باجر
-اي على ما اعتقد
-تمام باي هسه لان عندي محاظره
-باي سجليها مو تنسين
اشوي ودخلت دره وياها بنيه تشبها بس اطول منها واسمن منها شوي
واجت سلمت علي وهي تكول هلا خيه بيلسان شلونج وبوستني كمر ماشاء الله كمر
كلتلها هلو بيج حبيبتي اشكغج عيونج الحلوه
-فدوه نوب اللسان مكسوره ههههه
-ههههه اي
-اكيد ماتعرفيني
- بيلسان الصغاحه ماعغفتج بس حسب الشبه البينج وبين دغه اتصوغ انتي اختها
-اي عليج نور اختها خليصتها من امها وابوها (والتفتت على دره وحجت) والنبي خوش يسوي ابوج بقراره البنيه كمر شحلاتها و..
وبعدها مامكمله كرصتها دره وهي تضحك وتغير الموضوع
دره اكول عليا مو ابوي كال تاخذين بيلسان تشتريلها هدوم وشغلات يله يله جا لاتتاخرن
رفعت حاجبي باأستغراب ليش كرصتها شكو شضامين عني
عليا. اي صدك يله حبيبه بدلي هدومج وخلي نروح
بيلسان اي ثواني
عليه بس خيه بلا امر عليج ولو جاي نضغط عليج ونضوج يابعد عمري لبسي هاي
وانطتني جبه وشال
(وكملت حجيها )خيه من حيث اهنا بحي الرجال عدنه الحرمه فضيحه اذا طلعت من غير الحجاب ومايدرون انج مسيحيه
وراح يأاذونج من الحجي والنظرات الموش خوش
طبعا بكيفج اذا عجبج اذا ماعجبج تولي ومشينه مثل ماتردين بس ترى خوفا عليج وانتي صرتي بنيتنه
ابتسمت لا حبيبتي ح البس اصلا هذه البسه حلوه
ورحت لبست بنطرون وبدي وفوكاهم الجبه حطيت كحل وماسكره وحاولت الف الربطه بس ما اعارف رحت لعليا لفتها الي
وهي تكول بويه عين الله عليج اتخبلين باالحجاب يهنياله الياخذج (وباوعت على دره وابتسمت ودره بادلتها الابتسامه)
وطلعنه هي لابسه عبايه واكيد احلام لازم اتذب الها حجايه من طلعنه وكالت
يااا شعجب لابسه ومحتشمه
عليا. احلام اتجافي شري مابيه اصيح من الصبح
احلام على كيفج عليا خاتون شكون حجيت جنج جبريت بس تريدين تكبين
عليا امشي خيه بيلسان امشي لان اذا انهديت عليها ماتخلص دحرتنه لحد مايدخل ابوي لو بوعذاب ويفكنه
''''''''''''''''''''''''''''''''''''''''''''''''''
بنفس الوقت بديوان الشيخ عبد الله جان كل زلم العائله متجمعين
ارغد وسعيد وجبر ولد الشيخ وعذاب حفيده واحمد دخل عليهم وهو يكول
ها بويه شخيرك ترى تعطلت وراي دوام مايصير اتأجل موضوعك
الشيخ استريح يبوك استريح على ما يجي جبيركم
شوي ودخل هزاع الله باالخير
الكل الله باالخير والكرامه
هزاع ها بويه عسى الجمعه خير
عذاب لابويه السبت خير
باوع عليه وخزره وصاح جم مره اكلك لاتصير دوني وسخيف
عذاب بويه اعتذغ
ارغد ماصاغ شي بعد عمك
هزاع كاااافي خل نفتهم شصاير والتفت على الشيخ خير بو هزاع
الشيخ الخير بوجهك يبو عذاب استريح
كعد يم ابوه
الشيخ سمعوا بويه كلكم اتعرفون حجي حامد وغلاته عندي اخو دنيه الله يرحمه
وكبل لايموت امن ابنيته يمنه
والبنيه امسجينه ما الها احد عكبنه وانتم تدرون الدنيه الزلمه ماترحمه شحال لو بنيه وطفله ومالها والي
من هيج انه قررت اتضل تعيش ويانه كل عمرها تحت اجناحي واجناحكم
بس ماهي حلوه تعيش عدنه غريبه وانتم كلكم ازلام وهي موش محرمه عليكم وديرتنه وسلفنه مايرحمها ولايرحمكم من هيج ابوها هداها الواحد منكم كال انت تخير الزين بيهم وامن بنيتي يمه
هزاع شنهي يعني
الشيخ بويه شنهي بعد تزوجونها
ارغده عااا بويه يعني كل احنه نتزوجه
احمد كافي سخافه ارغده خل نفهم من الحجي
عذاب بس جدي ترى مايصير الابو والابن ياخذون وحده اكول ابوي شيله من القايمه
هزاع عذيييب اكول سد حلكك خل نفهم لوتطلع منا وتراويني عرض مكفاك
(والتفت على الشيخ) بويه وضح حجايتك شتقصد
الشيخ يابويه كال الحجي حامد اتخير الزين وانه ولدي كلهم زينين لجن من حيث سعيد وعذاب اصغر من البنيه هي ١٨ وهذا ١٧ وهذاك ١٦ وماهي حلوه
سعيد بويه تراها سنه وحده ماتضر
عذاب. وحتى لو سنتين هم موش مشكله
الشيخ لابويه انتم الثنين لا وهم جبر لا
جبر .ليش يبوي
الشيخ من حيث انت متزوج
جبر وشنهي يعني احط الثانيه على راسه هاي انت موش ماخذ ثلاثه
الشيخ. بويه انه لبنيه امانه عندي وما اريدلها الضر واذا انطيها الك راح تشبع قهر
جبر. (حجه بهمس )جا موش نسوانك شابعات قهر
ارغد .كمل يشيخ بسم الله
الشيخ .وانت يا ارغد هم لا
ارغد. ليش يبوي لاني متزوج ولاني زغير
الشيخ. بس انت مو مال زواج ومحد يعرفك كثري واكو الانسب منك يبوك
ارغد. بويه اخطبها هسه واتزوجها بعد ست سبع سنين
الشيخ كافي ياارغد تتعاركون على الفرخه صدك هديه بحي الرجال تمالختو عليها
عذاب جدي مابقه غير ابوي وعمي احمد ومادري اذا هما لو لا جايز انت رايدها وجاي اتطشر بينه واحد واحد
الشيخ جب عذيب واسمعوني زين مثل ما كلت انت مابقه غير ابوك وعمك
وانه تارك الهم الخيار
عذاب والطماطه المن تخليها
هزاع كككم اطلع بره طاح حظك
عذاب لابويه وعلي ماراح احجي اها (وحط ايده على حلكه)
الشيخ ها يبوي شكلتو
حجو سوه احمد وهزاع
هزاع كال احمد يناسبها
واحمد كال بو عذاب ياخذها
ارغد. خايبين صدك ينطي الجوز للماعنده اضروس واحد يشمرها اعله الثاني
هز ايده ودار
جبر بو عذاب انت مو رايدلك مره تربي ابنيتك الصغيره هاي اجتك هديه بعد شرايد
هزاع انه رايد مره بس موش هاي من حيث هاي مو من ثوبنه ولا مواخيذنه وانه لو ردت اخذ ماخذلي وحده جاهله بكد بزري تريد ليربيها موش هي تربي
الشيخ .ماهي جاهله البنيه عمرها ١٨ وداشه ب ١٩ ودارسه وفاهمه
احمد بويه انه مارايد اتزوج هسه
الشيخ. اسمع يبو حسن انت وليدك اصغير وماله احد باجر عماته يتزوجن بيدمن يضل وامك مره جبيره
هزاع. بويه احمد عمره اكرب العمرها انه جبير عليها
الشيخ بويه انت ٣٦ واحمد ٣٠ وثنينكم بحاجه مره وثنينكم عدكم بزر صغار يابويه والبنيه يتيمه والكم يم الله اجر اذا احتويتوها من حيث الرسول يكول انا وكافل اليتم ك هاتين والبنيه مزيونه وحليوه وحرامات ياخذها الغريب وابوها راد واحد من زلامي يصون بنيته
وله شرايكم يبويه هذا اقل شي اقدمه لصويحبي
واحد باوع على الثاني احمد وهزاع وكأنما واحد يكول للخ انت اخذها الخاطري وكل واحد اله ضروفه الخاصه الي تمنعه
الشيخ يله بويه كل واحد على شغله وفكروا زين من حيث راح احاجي البنيه واشوفها تميل المن بيكم
طلعوا كلهم عدا هزاع
الشيخ ها بويه بحلكك حجي يبو عذاب
هزاع اي حجي البنيه ما تناسبني هواي فروقات ابينه وانه ماتحلالي هيج وحده واخاف اظلمها ياحجي
الشيخ شبيها بويه شكاصرها
هزاع. بويه البنيه من الجمال شايلته كله بس موش هذا قصدي
الشيخ. جا شنهي يبو عذاب
هزاع. البنيه وموش محجبه ادري دينها مو مثل ديني ومامجبوره تستر روحها بس بويه غيرتي ماتسمحلي اخذ وحده عيون الزلم تاكل بيها بويه لبنيه ماهاويها وانه الكالي لتناسبني
الشيخ بويه البنيه صغيره وياحلاتها تربيها وتعلمها اعله طبايعنه وطبايعك وعلمها على الحشمه حتى لو دينها موش من دينه انت ذكي يبو عذاب وادريك راح تسويها مثل ما تريد
هزاع بويه اذا قبلت تلبس لبسنه او على الاقل تنستر بحجاب انه ما عندي مانع بس هيج لابويه حيل تعذرني
الشيخ انه خلي احاجيها واشوف رايها وتالي اكعد وياها انته واقنعا بسلوبك يامعدل وادريك تكدر تقنعها واذا ما اقتنعت مامجبور بيها يبوك
هزاع صار شيخ بس باالاول شوف احمد ياريت يقتنع بيها كبلي وهي تقنع بي
الشيخ ان شاالله بويه وهسه اريدك تروح تشوف كاعنه الشماليه وشوف شغل الفلاليح من حيث واردها قل
هزاع اي حجي انه رايح الها كبل لاتكول في امان الله
وراح
''''''''''''''''''''''''''''''''''''''''''''''''''''''
وبعد فره ساعتين كامله باالسوك الصراحه ذوقي صعب وخصوصا قررت اخذ ملابس مثل ملابسهم على الاقل البسهم بهذي الفتره الي ح اضلها يمهم حتى اتكافه الكلام
عليا .خايبه بيلسان والله طاحن رجلي شنهي ما يعجبج العجب ولاالصيام برجب
بيلسان. اسفه ياعمغي بس شسوي دا اشوف الملابس الي تناسب جسمي وبشغتي
عليا. فلك طرج وفر بيج يخيه انوب اتدور شي يناسب بشرتها وجسمها اكول امشي وفضينه ااااخ يارجلي
بيلسان. ههههه يله عمغي مضل شي
ورجعت اخذ الملابس طبعا الفلوس انطتنياهن عندي الي انطاهن الها الشيخ وكالت فلوسج وتصرفي بيهن
اخذت دشاديش طوال بس اخذتهم شوي مخصرات لان ما احب الشي الفضفاض وبعض الاقمشه كالت عليا تعرف خياطه مضبوطه وراح تخيطلي ياهم واخذتلي كم تنوره وقميص للدوام وكم عطر وكم قطعة مكياج
عليا. يمه ولج خايبه كافيج جا بجهازج شتسوين
بيلسان هههه خلصت يله يله
صعدنه بتكسي وابو التكسي ماشال عيونه مني
كلت العليا عزا بعينه شوفي هذا حيدعمنه
عليه .شفته الخايس راح تطلع اعيونه من وجهه حكري يخيه ولاتباوعيله وضلينه نسولف ونسولف واحسها تريد توصل الشي معين بسوالفها بس عن اخوانها
اخر شي كالت
كليلي شلونج مرتاحه عد اهلي
بيلسان والغب اهلج ماكو مثلهم وماكو من كغمهم عمو عبدالله انسان غائع
عليه . ههههه هذا من طيب اصلج والولد شلون شفتيهم من حجي عنهم هسه
بيلسان منو قصدج اخوانج وابن اخوج
عليه. اي بو عذاب واحمد وارغد بذات ذول
بيلسان ماشفت منهم شي حتى يستحون يحطون عينهم بعيني مؤدبين واغغد(ارغد) وعذاب دمهم يجنن
عليا الحمد لله زين ياخيه اذا صار و.....
يتبع.....