البارت 5 من الجزء 3
#Hoda
#تائهة_بين_اروقة_الماضي
#بقلم_الكاتبة_nuha-d-h
هيام
كعدت عالسرير وظليت اباوع مصدومة على ريمة
حسيت رجع بية الزمن وصرت اشوف شريط ذكرياتي
كبال عيني يمشي كدام عيني نفس الموقف ونفس الكسرة
اي ميس مثلي تقريباً هم اتعشمت وحبت الشخص الخطاء حسيت بكلبي نغزني واتذكرت شصار بحالي
وشلون اتحطمت نفسيتي بس عالاقل ايمن ما معشم ميس بشي ولا جندها وسرق احلى سنوات من شبابها
صحيح ايمن مو مثل نبراس بس كسرة الكلب نفسها والالم واحد
حجيت بقهر اسأل عن ميس
.. دخيلك ياربي وهسة ميس شنو عرفت بالموضوع لو بعدها
ريام.. لا بعدها سمعت خالة هيفاء تحجي وية بيبي خاجية علمود تروح هي وبيبي وخالة حليمة يشوفون البنية وتريد تاخذ ميس علمود هي صديقتها وتعرفها عليهم اني سمعت الكلام منا واني كبل اجيت عليج اريدج تساعديني نلحك ميس خطية تدرين هيام
موقف ميس ذكرني بيج وانا خايفة عليها اخاف يصير بيها مثلما صار بيج وتنتكس
هيام.. والله اعرف بالله شو خلي ننزل ونشوف
نزلت ريمة ورحت للغرفة البس شالي
وصادف ضرغام طلع من الحمام دينشف شعره بالمنشفة
.. هَـا ام علاوي اشتغلت رحمة الله هذا اول بوري
يعني خوش سويتيها وحدة بوحدة
جان عقلي فاصل رحت اخذتلي شال وحطيته على راسي واجيت اطلع بالي كلة يم ميس
حسيت على ايد لزمتني من زندي
ضرغام عاقد حواجبه .. شنو هيام مو جاي احجي وياج بالج وين ليش مو يمي
هيام.. ضرغام عفية شغلة ضرورية لازم انزل واكون موجودة وبعدين افهمك عليها
.. شنو الي شغلج عني
ابتعدت عنة وحجيت بعجلة .. لا ماكو شي بس خالة تريدني ضروري
.. وتالي وياج شنو بالله ناخذ وياج موعد علمود تصفين
لضرغامج
.. لتضوج عفية هسة ما اتأخر وارجعلك
ضرغام .. اصلا ما يحتاج ترجعين انا هم راح انزل
وهذا وجهي بعد اذا كدرت اشوفج لان راح اغرك بالخطار وجماعتي راح يجوني
وانتي ظلي كلها اهم مني
طلع وتركني عدلت شالي ونزلت جوة وشفت ريام واكفة يم باب المطبخ واشرتلي اجي
رحت لعندها
.. هَـا شنو وين ميس
.. ستوها صاحتها خالة حليمة لان خالة هيفاء تريد تحجي وياها علمود صديقتها وتسألها عنها كم سؤال
لطمت وجهي يايمة عزة بعيني خطية ميس
وهسة همة وين كاعدين اشرتلي على غرفة بيبي خاجية
جان مسدود الباب
ظلينا نحوم انا وريمة يم باب غرفة بيبي
ريام .. هاي دائما من يكون عندهم شي خاص وموضوع خطبة او عرس او مصيبة او كارثة لازم يصير الاجتماع بغرفة بيبي خاجية
يحسسوني بي عبالك مقر الامم المتحدة البيت الابيض
هسة غير يكعدون حالهم حال الناس بالصالة هسة شنو ذنبنا احنا نريد نعرف شصار حتى نتلاحك للبنية
باوعت لريام لأول مرة بحياتي اتمنى اروح اتسمع
وحسيت بلحظتها بشعور ريمة
بالله شو خلي نشوف شكو
ما كدرت اصبر اكثر دكيت الباب ودخلت وسويت الامر طبيعي هو قابل شجاي يحجون
هي سالفة خطوبة
كعدت اباوع على ميس الي واكفة مصدومة
الظاهر عرفت بالموضوع انتبهت لريمة شلون تراقبها
بخوف
هيفاء.. عفية عمة ميسة بالله خابري عليها واتفقي وياها
وكليلها الباجر عمتي وبيبي راح يجونكم علمود
نتفق بالبداية ونشوف شنو طلباتهم وبعدين تصير مشية الزلم
ميس
جانت عمتي تحجي وانا وية كل كلمة تطلع منها
احس بطعنة خنجرتطعن بكلبي وكفت وما رمشت لان اضن اذا ترمش عيوني راح تخوني دموعي
وبساعتها دموعي راح تحجي المحظور وانفضح بين اهلي وناسي
حسيت بقالب ثلج جمد اطرافي يمكن خبر خطوبة ايمن لهالة صديقتي
سرق الدم من وجهي وصرت بلا روح
عبالك جاي اباوع حلم واشوف نفسي شلون واكفة بنصهم صار اجتيازي للخبر امتحان صعب ولازم ابين كدامهم ان الموضوع عادي وطبيعي بالنسبة الي
هو صحيح الخبر صعب بس الاصعب منه ان تدعي
اللامبالات وابين ان ممتأثرة
كدام اقرب الناس الي صعبة حيل صعبة لان اعز ناسك يعرف عنك كل صغيرة وكبيرة وبسرعة راح يلاحظ عليك الحزن لو مهما حاولت
لازم امثل كدامهم واتصنع الفرحة
وابين الهم انا بخير
جليت صوتي واتلاحكت نفسي اي اتلاحكت لأخر ذرة تعقل باقية براسي لان انا ميس بنت راضي وتربية خاجية انا الي كالو عني اخوهم الرابع
انا الي لبست ثوب الرجال وصرت اشبهم بردود الافعال ومثل هيج موقف ما راح اتركه يهزني
واذا جنت مقهورة وانزف من داخلي
فخلي للكرامة مكاني اروح الجيء له حتى العق جروحي بي واضمد كسرة كلبي بيه بعيد عنهم ولوحدي
ابتسمت بوجه عمتي وكلبي معصورمختنكة يارب اريد الهوى ومنك اريد الصبر
.. عمة زين ما اختاريتو لأيمن هالة صديقتي بنية حبابة وبنت ناس خيرة واخلاقها حلوة واهم شي
هي بنية نازكة وتملك كل صفات الانوثة
ابتسمت بأستهزاء
الحجية خاجية .. يا يمة بالمبارك عليج وعلى وليدج
شايفين الف خير
التفتت على ميس .. ويوم الالج جدة ميسة
اشوفج عروس وداعتج الا ازوجج لواحد الناس كلها تحلف براسه وكون من يجيب ناسه وشيوخه يسد الشارع من الطول للطول ويصير الرايح والجاي يسأل هذا العرس منين
حسيت ببي خاجية تعرف بكلب ميسة مكسور معقولة بيبي منتبهة على ميس وحبها لأيمن
وهسة بهذا كلامها تجبر خاطرها بي
هيفاء.. ان شاء الله يمة يطول بعمرج وتزوجينها وتفرحين بشوفة اولادها هاي ميسة العزيزة تربات ايديج
الحجية خاجية.. امين يارب
انتبهت لميس حجت
.. جدة منو يكول راح اتزوج شكلي راح ابقى على كلبج بعدين تصحيح بالجامع يا اهل الرحم منو عندة عريس لميسة
الكل صار يضحك الا ميس مضحكت
جانت تتعمد تركص على جروحها وتهلهل
ما جذبت بيبي خاجية من سمتج ذيبة
اباوع عليها ظلت صامدة وتحجي وياهم
بس ما فاتتني رجفة ايدها
التفتت واترخصت من عمتها وبيبي
هيفاء.. هَـا عمة ميسة على وين رايحة انتظري هسة ايمن جاي فد مرة خلي يجي حتى نهوسله ونباركله
ميس.. لاحكين عالهوسات والهلاهل الا اخليه يحلف ما يعزمني بعرسه من ورة هوساتي وصوتي العالي
طلعت وتركتهم ورحت صعدت فوك لاكاني ضاري
.. هَـا ابو الشباب يالله خلي نلعب داس طوبة حتى اغسلج
تركته وكملت طريقي اصعد فوك سمعته حجة من وراي .. ميس خير سالمين اصغر عيالج انا وتلبسيني
من احجي وياج توكفين سامعة
التفتت عليه .. ما عاش الي يقلل قدرك بس تعذرني اليوم ما اكدر العب وياك
باوعت عليه عكد حواجبه مستغرب
.. احم هاي من شوكت صايرة محترمة لا لا اليوم راح يصير شي بالكون ميسي صاير حباب
سحبت نفس عميق اطلب الصبر هو هذا عيب بيتنا
ما يعوفون الواحد بحاله حتى من يريد يحزن لوحده
لازم عشرة فوك راسه يباوعون عليه شلون يبجي
ما ينطون مجال ما ردت اروح لغرفتي لان غرفتي جوة ومحد راح يتركني بحالي كلت اصعد فوك وهذا ضاري ماناوي يتركني بحالي شكلي حتى بالحزن مالي حق احزن
احتاج مساحتي الخاصة خصوصاً هسة مجابته ودنكت راسي بخذلان وقلة حيلة
ميس.. عوفني بحالي ياخوية صدكني ما افيدك هو لو بية خير جان ماعافني الطير
ضاري.. عفو عليج هاي من شوكت ميس تجاوبني
وبعيونها انكسار
اقترب مني وضربني على كتفي عبالك واحد من ربعه وخربط شعري
.. ولج ميسة ما اريد اشوفج انهزامية حتى لو وياي اريدج دوم قوية وتتعاركين
ميس.. شبيك يا اخوي استغلها فرصة واتونس على حسابي مو كل مرة تحصل هيج فرصة وتشوفني زعلانة و مسكورة الخاطر
ضاري .. ولج ميسة ما عاش اليكسرج وانتي
اخت ضرغام و ضرار وثالثهم انا
هاي النظرة الي بعيونج امحيها وداعت ضاري عليج تعاي نزلي خلي اغسلج باللعبة
واحجيلي منو مزعلج ولو انا متأكد شي اكيد هاي امي مزعلتج ماكو غيرها
باوعت عليه مستغربة
مرات اكو اشخاص يحسون بألمنا ويحاولون يمحون الالم عنا بدون ميعرفون سبب حزنا وهذا الشي ينطبق على ضاري اخوي صحيح هو ما يعرف شنو علتي ولا هو داري عني بشنو افكر لكن يكفي انه شاف نظرة عيوني المكسورة وحجة هذا الكلام ربي يخليهم الي ذخر وما يحرمني منهم
.. خليها غير مرة والله تعبانة
ضاري.. ميخالف ما علينا نخليها غير مرة ونشوف من بينا يفوز هسة انا راح اطلع تردين اشتريلج وياي جبس وحلويات
حصرتني البجية ياربي .. براحتك اذا تكدر عادي اشتريلي وياك
ضاري.. اي هسة هذا اخوي ميسي ما يفوت فرصة الا يستغلها لمصلحته
ابتسمت على كلامه
نزل وتركني كملت الدرج وصعدت فوك للسطح لان هذا المكان الوحيد الي اضمن روحي محد راح يلكاني ويكعد ينك على راسي
صفنت اباع لنفسي لشكلي انا شكد اتغيرت وغيرت
من نفسي لبست ثوب انا ما هاويته وانجبرت اتصنع بتصرفاتي واتدلع دلع ماصخ تافه علمود الفت نظره
وصرت احجي بكلام مو الي لحتى ينعجب بية وعسى ولعل يوكع بحبي
بس مو ذنبه كلبه ما هواني وفضل غيري
استاهل الي كاعد يصير وياي اني الي
بنيت عليه امالي ووهمت نفسي بحبه
اتمنيت اعبر عن حزني وابجي مثل البنات
هرب حظي انا حتى بهاي ما فالحة صدك لو كال ابو طبع ما يغير طبعه تربيت بين اخواني وصرت مثلهم
حتى بالطبع وصار جلدي خشن يتحمل اللدغات
سمعت صوت ريام تصيحني غمضت عيوني
وجاوبتها
لحظات واجتي يمي
ريام .. هاي ليش هنا كاعدة لوحدج
جانت تحجي وحاطة ايدها على صدرها تتنفس سريع
.. خرب يومج يعني ما لكيتي غير هذا المكان تختلين بي والله احس كلبي راح يطلع من صدري من ورة الدرج
باوعت عليها ورفعت حاجبي
جنت لازمة بيدي غصن يابس وكاعدة اكسر بي وكاعدة كعدة صبيان ومتكية على حايط سطحنا
.. شعندج صاعدة وراي انتو شنو مصيبتكم
ما تخلون الواحد ياخذ راحته يا اختي عتقوني لوجه الله تعالى يعني ماعندكم غير ميس بالبيت
تكعدون تنكون على راسها
ريام.. اهووو بلا حجي زايد بالله شو سويلي مجال يمج خلي اكعد
ميس.. اللهم صبرج ياروح انتي شنو مشكلتج
وياي ليش انتي هشكل لزكة
ريام.. يا اختي اتحمليني ضرار ما موجود وين اروح
كلت اجي يم ميس حبيبتي اغير جو
ميس.. ريمة خلينا لا نضحك على نفسنا فوتي كبل بالموضوع شكلج جاية تتطمنين على ميس من بعدما انكسر كلبها وتردين تعرفين شنو حالي هسة
ريام.. عفية عيلج والله بس انتي تفهميني
انتبهت لريام تحجي وياي بحذر وتراقب ردود افعالي بقلق صدك ضحكتني
ميس.. وهسة شكلج انصدمتي بية مو ؟؟؟
صعدتي وراي وجنتي متوقعة راح تشوفيني
كاتلة روحي بالبجي وعيوني حمر
.. هَـا تردين الصدك اي والله جنت اتوقع راح اشوفج منهارة ومكسرة نص غراض غرفتج رحت دورت عليج وما لكيتج بغرفتج
بعدها كعدت ادور عليج بخوف كلت هاي بس لا راح تسوي بروحها شي
ميس.. حييييييل خرب بس لا عبالج اشمر روحي من السطح علمود ايمن ما اتزوجني
ريام.. لا عاد مو لهلدرجة بس خفت عليج تأذين نفسج
بس صدك شمعنا اختاريتي السطح رحتي كعدتي بي
.. شكلي منا ورايح راح يصير السطح مكاني الخاص حتى اخذ راحتي بي
تدرين احس بروحي راح اصير مثل فتون اخت مانع ودواس بمسلسل الحيالة
من عنست صار السطح مكانها الخاص تصعد تشرب نركيلة من وراهم وتكعد تحلم بدسوكي المصري بياع القناني تتأمل يجي يخطبها هيج كاعد اتخيل حالي
جانت ميس تحجي وتضحك
.. بربج شلوني بالتشبيه
ابتسمت وياها واني كلبي ممرود عليها حتى وهي زعلانة تصنف على نفسها ادري بيها
مجروحة وتضحك حتى تهرب من حزنها
احيانا الاشخاص الي يضحكون هواي يخفون بداخلهم جروح عميقة
ريام.. تدرين ميس كل يوم اكتشف بيج ميزة تخليني اتعلم منج هواي اشياء
ميس.. لا عفية هذا الحجي روحي احجي يم امي
خليها تعرف ميس صارو البنات يقتدون بيها
ريام.. شبيج من صدك احجي والله قوة شخصيتج
وثقتج بنفسج خلتني احسدج
ميس.. على شنو تحسديني يا حسرة اشو عريس الغفلة وطار من بين ايدية بح والي جنت اتعشم بي يصير حلالي صفة تالي الوكت من نصيب وحدة غيري
ريام.. لا ميس انتي ذهب والظاهر ايمن مو كفو ولا هو الشخص المناسب الج انتي تستاهلين واحد يكون قوي
ورجال كفو يعرف قيمتج صدكيني الله حابج ايمن
مو الج وكولي كالت ريام
ميس.. ريمة مو بيدي هذا حظي كلبي اغبر ما عرف يختار المحب اجذب عليج ان كلت مامقهورة وجاي انكوي بناري يمكن تكولين هي فترة وتعدي
بس الي كاعدة احس بي وجع ما ظن يجي اليوم واكدر انساه
ريام.. لا بهاي انا اكلج صدكي راح يجي اليوم الي تنسين بي ايمن وايامه تدرين ليش
لان اختي هيام مثلج ويمكن اقوى من جرحج
جانت طول عمرها تعرف بنبراس هو نصيبها اذا كان انتي ايمن ما عشمج بالزواج فهيام نبراس وواعدها
بالزواج وموبس هشكل جان كلما يجوها خطابة
يطردهم لو يظل يلح عليها حتى ترفضهم
وتالي من فكر يتزوج راح اختار وحدة غيرها
انتي زين هسة صامدة وقوية وما اهتزيتي
عكس هيام بوكتها انهارت ودخلت مستشفى
من بعد ما عرفت بخبر زواجه من وحدة غيرها
وهاي هي كدامج هسة شوفيها شلون مجنونة بحب ضرغام وابنها علاوي والزمن كفيل بتضميد الجرح
واذا ورد ذكر نبراس كدامها تشوفيها تضحك على نفسها وتكول انا شنو جنت احس بيوم
حبيته
ميس.. صدك الي كال الي يشوف بلوى الناس تهون
عليه بلوته
بس تدرين شنو الحلو بالموضوع
ريام.. شنو ؟
.. الحلو بهذا كله انا بعد ما راح اكعد اهتم بسوالف البنات
يعني راح ارجع مسي الاولي
حكيت راسي
خرب ما اعرف شلون انتو تتحملون تكعدون بالساعات علمود تشسورون وتحطون ميك اب وتختارون اللبسة وتطولون اظافيركم وتصبغونها
تدرين كلما اسمع بأيمن راح يجي لبيتنا لازم اروح اكلب الكنتور كلاب علمود اختار اللبسة
احس بروحي داخلة امتحان ولازم احضرله
ومن يجي احس بنفسي عبالك لابسة حزام الامان
متقيدة يا اختي شنو هاي صدك هذا ابتلاء حشة مو حب
الله يلعن الحب واليحبون
ضحكت على طريقة كلامها
.. والله انتي جوهرة نادرة
ميس.. لا انا طفرة وراثية عن بنات جيلي تدرين
ابوي مرات يكول انتي بالغلط صرتي بنية المفروض انا ولد
ريام.. والله احلى ولد خرب بقلاوة
نغزتها من خصرها وضحكت
قاطعنا صوت ضرار الخشن
ضرار.. من احتركت عشيرتجن شعندج انتي وياها فوك السطح يعني خلصت الاماكن وما بقى الا السطح تكعدن تسولفن بي ما تكلولي شعندكم هنا
ريام.. نريد متنفس مختنكين
محد يطلعنا
ميس.. كلنا نصعد هنا للسطح انطير طيور
ونغير جو
ضرار.. اكلجن تكومن تنزلن هسة كدامي لا اطك راس براس كال تطير طيور هي بس هاي الناقصة
تصيرين مطيرجي حتى تكمل
ريام برطمت
.. يالله خية كومي امشينا خل ننزل هذا الرجال مخلوق بس علمود يخرب علينا اللحظة
يعني لا انطيك ولا اخلي رحمة الله تنزل عليك
كمنا
وانتبهت لميس نفضت ملابسها وايديها من التراب
جرت حسرة
.. امشي خلي ننزل امري لله انتي ورجلج اكبر لزكة
شفتها بحياتي حتى خربتي ام القهرة
شتتي افكاري الله يلعن بليسكم
ريام.. وهو المطلوب اشتت افكارج وما انطيج مجال حتى تزعلين وتتقوقعين على نفسج
ميس.. امشي امشي كدامي لا احط ييج دفرة واشمرج انتي وابنج من فوك الدرج وارحم اخوي من النكة مالتج
يا لزكة
دخل ضرار ورانا وقفل باب السطح
.. نوب خلي اشوف وحدة بيجن صاعدة السطح والله اكسر رجليها
ريام.. هاج يالله استلمي انا الله بلاني بحب ضابط
يعني مطبق قوانين السجن كلها براسي
ومقيدني وحسرة علية اتنفس
ميس .. كسرتي خاطري وراح تخليني ابجي عليج
عايز بعد بس تغنين لأم كلثوم
اعطني حريتي واطلق يدية
نزلنا وصارت. هيام بوجهنا وونقلت نظراتها بيني وبين ميس جانت شايلة علاوي
هيام.. ميس وين جنتي هذا كلب البيت من البجي عليج
ميس.. استغفر الله ولك عمة علاوي حتى انت كمت علية شنو اليوم كلكم متفقين على ميس
مدت ايدها واخذته من هيام
.. تعال بعد عمتو خلي اطلع جناني عليك شكلي محد
راح يفهمني بس انت اخذته ووراحت
ضرار.. ريمة سويلنا جاي اجو جماعتنا
دخلت للمطبخ وشفت رفاه دتحجي بالنقال وية رنا
ومن خلال حجيها افتهمت ان اكو شي صاير
جانت رفاه تبجي وتحجي وية اختها
شافتني وسدت النقال
بسرعة
ريام.. شنو شبيج ليش تبجين
رفاه.. ريام والله خايفة من ضاري احس اكو وحدة ثانية بحياته
ريام.. بالله شو تعاي خلي اسوي اي واحجيلي خلي افتهم منج شنو السالف وشلون استنتجتي ضاري عندة وحدة
رفاه.. اختي رنا كلفت صديقتها حنين تراقبلي ضاري وتجس نبضه
وحنين تكول هذا ضاري واحد ملعب
.. وشلون الست عرفت ملعب
.. تكول متصلة عليه على اساس رقم غلط وهو
استلمها ذمة وظل كل ساعة يتصل عليها ومو بس هشكل يكللها انتي منو وكعد يعدد اسماء البنات الي مصادقهن
ريام.. اي وانتي الغبية صدكتي كلام وحدة مثل حنين
رفاه.. بس هي صديقة رنا روح بالروح
ريام.. اتمنى اضربج على حلكج على هاي فهاوتج
يا اختي هي منو حنين حتى تحطيها رقيب على حياتج انتي وزوجج ومع احتراماتي لرنا اختج
هي بالاول خلي تفلح بحياتها وبعدين تجي تصلح حياتج
هي لو بيها خير ما اتطلكت مرتين ادري هذا كلامي راح يخشن خاطرج بس يا اختي كلامج يدق الواحد
هو ضاري لو يريد يلعب جان ما اتزوجج
وخلي ببالج اذا بقيتي على هذا هوسج وظليتي تمشين ورة كلام رنا اختج راح تفلسين
وراح اكلج ترة ضاري شاب والف من تتمناه
وبنات هالوكت يلفون الرجال لف
رفاه.. ما اعرف بس تصرفاته باخر ايام تستدعي للشك
ريام.. اي حقه يطفش منج انتي شايفة روحج شلون
كالبة الخلقة ومطنكرة اباوع عليه شلون يراضيج
وحضرتج بسرعة تتمزعلين
يا اختي كون انطيج ضرار ويعلمج الزعل على اصوله
صيري جنته خليه يرجع للبيت متلهف حتى يلكة راحته بحضنج
رفاه.. والله اني نفس تفكيرج بس غصب عني
الشيطان يكعد يوسوسلي
.. قصدج اختج ما تريد تتركج بحالج
رفاه.. لا تصرفات ضاري هي الي تحجيني
وتخليني عايشة بقلق
روحي هسة دوري على زوجج وشوفي وين
وروحي يمه
مسحت دموعها .. راح اسوي الي كلتي عليه
بس صدكي اذا اشوف شي على ضاري ما راح ايكتله هلمرة
اني اتحمل كلشي الا الخيانة هذا الشي ما اتحمله
(((((((((()))))))))))
ضاري .. اكول ضرغام ابوي صدك مسافر لو هذا فلم من يمك علمود امي متشك
ضرغام.. والله بالحقيقية ابوك ما مسافر
بس انا حجيت هشكل علمود امي متحس عليه ادري بيها راح تموت قهر اذا عرفت
هو يم ذيج مرته
.. زين انت مو كلت راح احط حل للموضوع
.. اي وانا كاعد اشتغل عالموضوع بس بطريقتي الخاصة وصارت كلها مسألة وقت ويرجع كلشي بمكانه
جنت احجي وية ضرغام بالمكتب
وملتهي ونقالي ما بطل رسايل واتس اب
اباوع عالمرسل هاي نفسها االبنية صاحبة الصورة
هاي صدك تحجي شتحس كل يوم راسلتي اشعتر وحبيات واغاني وصباحيات هاي مبينة بطرانة وبنرادلها واحد فارغ لهاي السوالف
هو انا لو هيج فارغ جان فرغت لرفاه المكرود
ما اشوفها الا بالليل
تركت النقال وباوعت لضرغام
.. اكول ابو علاوي شوكت تحن علية مو جنك نسيتني
.. شنو وين نسيتك
.. يعني تارك المكتب كلة علية حتى ماتكول اخوي الصغير خطية لوحده
ضرغام.. موكاعد العب انا وعايفك لوحدك
ما جاي تشوف منعول ابوطاهري بالسفر وما جاي الحك وتعال انت شنو كل حجاية والثانية صحت صغير
اشو اتزوجت وصرت صاحب عائلة ومسؤل عنهم
واذا مو انت تلزم حلالك منو يلزمه عنك
.. لا والله ياخوي مو قصدي بس محتاج اجازة
اغير بيها جو اخذ الاهل ونسافر
.. صار ٺــڊٍلََُلََُؖ بس خلي اخصم شغلة ابوي
ويجرالك ادري بيك هذا من حقك تسافر وتغير جو خصوصاً انت متعود تسافر
قطع كلامنا نقال ضرغام
اشرتله راح اشغل السيارة حتى نرجع للبيت
ركبت بالسيارة
ودك نقالي رديت بدون ما انتبه عالمتصل
شغلت السيارة ودكيت هورن لضرغام حتى يستعجل
.. الو
.. الو عيني شدعوة شايف نفسك علينا ونترد على رسايلنا
عقدت حواجبي وباوعت للشاشة اهووو
.. هلا حنين اتفضلي ممحتاجة شي
.. هههه حقك اتعودت علية كلة واكعة بشدة وتنقذني منها بس لا هاي المرة كلت اسمع صوتك واسلم عليك
يااخي ارسلك مسجات وانت ما تعبرنا ولا واحد
.. والله يا بنت الحلال تعبان صدكي ما فارغ حتى لزوجتي ارسللها مسج مو اكعد ارد عالمسجات
.. هيعونها لمرتك شكد تفكر بيها
اجة ضرغام من بعيد
.. يالله حنين انا اترخص كولي ممحتاجة شي
.. لا ممحتاجة غير بس تحن علية برسالة تسعد بيها يومي
.. الله كريم اذا فرغت
نهيت الاتصال وركب ضرغام بالسيارة
(((((()))))))
ميس طلعت من الغرفة
وانا شايلة كومة ملابس وفساتين
رحت يم ريام وحطيتهم بحضنها
.. هاج اخذي هذولي مني الج
ريام مستغربة.. شنو هذولي
.. هاي شوية ملابس ما احتاجهم تكدرين تكولين سوالف بنات ما اريدهم بكنتوري
ريام.. يعني صدك تحجي وشنو هذا الي لابسته
جنج ولد
ميس.. كلمن يلبس الي يعجبه واني راحتي بهذني الملابس
اشرت على ملابسي الي جنت لابستهم
التفتت على امها
ميس.. اكول يمة اريد اروح للصالون
حليمة.. خير شتسوين بالصالون ترة بعدة ابن عمتج
ما عرس تلحكن عالصالونات
ميس.. لا يمة والله محتاجة اروح اكص شعري
لان حيل اختنكت منة
شهكة هيام لفتت انتباهي
.. ولج ميس ديري بالج تفكرين تكصين شعرج والله اموتج ليش ولج
ميس بلا مبالات .. يا اختي مليت منة شسوي بي
تعبت لازم اكعد اغسله واعتني بي
ادري بيها تريد ترجع مثل قبل بس وين هيهيات
خالة حليمة وبيبي خاجية كاعديلها بالمرصاد
حليمة.. حتى ما اكص السانج والله هو انتي فكري تكصين شعرة والله اطين عيشتج
ميس..شنو يمة ليش انا مو جنت قبل كلة اكصه قصير
هسة شنو الي اتغير
الحجية خاجية.. ولج عوبة جا غير الشعر الطويل ينضرب بي المثل انتي سامعة بشاعر شعر على ام شعر الكصير
ميس.. لا وما اريد اعرف شاعر يشعرلي
وانا راح اكص شعري وما علية بيكم
حليمة.. جا خوش ولج مدام سويتها زماط
جا اختاري لو شعرج لو كليتج اونتي بكيفج
ميس.. اهوووووو يمة يعني الواحد ما يكدر يعيش بهذا البيت هسة الكل ماخذ راحته ويسوي الي يعجبه الا ميس اذا تريد شي لازم الف واحد يكعد يقرر عنها ترة ما صايرة
الحجية خاجية .. تعاي جدة ميسة كعدي يمي واحجلي شبيج ياهو المزعلج شبيج
حليمة.. هي هاي نسرة منو اليكدر يزعلها تزعل بلد بحاله وما تزعل
باوعت للبنات .. يالله هاك استلم ويكولون ليش لحد هسة محد دك بابج اذا امي نبع الحنان تشرد الناس بكلامها عني
حليمة.. اي يايمة حقي اذا اشوفج هشكل لابسة مثل اخوانج عبالك ولد وتردين تكصين شعرج شبيج شجاج
ليش اتغيرتي
ميس.. يمة لاتسويها قضية كل ما بالموضوع اني جربت نفسي وحاولت اتأقلم بملابس البنات بس ما كدرت وفشلت خلاص انا اوفع العلم الابيض واستسلم
واعلن عن استقلالي واكول انا بنت اخت رجال
وهاي انا وهذا شكلي ولو اموت ما راح اكعد اغير
بروحي وبملابسي علمود احصل رجال
اندك الجرس ورحت ركض اريد اتهرب من امي وجدتي اكلوني حاصل فاصل بالاسئلة
يعني حسرة علية اسوي شي اذا ملازم اقدم بي تقرير
فتحت الباب وشفت ضرغام
خزرني .. اكول ليش انتي تفتحين الباب عمتي رحاب وامي وين احنا ما عدنا بنات يركضن يفتحن الباب
ميس التفتت يمنة يسرى وعقدت حواجبي
.. العفو هي وينها البنية الي كاعد تحجي عليها
لزمني ضرغام من طرف التيشرت
.. ثولة وياج احجي ليش انتي مو بنية لو شنو
.. لا انا محسوبك ميسي ابن راضي
انتبهت لأخوي ضرغام كاتم ضحكته
.. انتي الحجي وياج مهدور بس اسأل الله تطيحين بقسمة رحال حوك يعلمج شلون تصيرين مرية من صدك
ضاري.. هَـا ميسي شلونج اليوم حضري روحج
اليوم المبارات النهائية الدوري الاسباني
ميس.. اي انت هم حضر جيبك لا تنسى ترة من هية اكلك انا الرابحة
دخلنا جوة وسلمو على جدتي
هيام
خلص اليوم واني ملتهية ما بين علاوي والبيت
وخطية ميس اخذت كل تفكيري اجتي خالة هيفاء واخذتها هي وبيبي خاجية وخالة حليمة لبيت البنية
صديقة ميس علمود يتفقون وهسة قبل شوية رجعوا من بيت صديقتها
انتبهت لميس دخلت لغرفتها بدون ما تحجي اي شي وبعد ما طلعت منها لحد هسة
مرت من يمي رفاه
اباوع عليها خطية صارلها كم يوم كلشي متاكل وهواي ضعفانة هاي هم حظها الله انطاها حية مو اخت
مسودة عيشتها
رفاه.. هيام مشايفة ضاري وين اشو ماكو
هيام .. شفته بالحديقة جان يحجي وية ضرغام
قبل شوية
راحت للحديقة احس بيها اكو مشكلة جاية
من نظرات عيونها ورجفة ايدها
رفاه
شفته واكف بالحديقة وضرغام فات جوة للمطبخ مبين عليهم جانو يسولفون
باوعت عليه بقهر
.. ضاري اسألك سؤال واريدك تجاوبني عليه بصراحة بدون لف ودوران
منو هاي البنية الي طالع وياها للمول
ضاري .. ما افتهمتج تقصدين منو
.. البنية الي قبل اسبوع جنت طالع وياها للمول
انتبهت عليه باوعلي بصدمة
.. منو كلج
.. مو مهم منو كلي المهم انت صدك جنت وية بنية بالمول
ضاري .. اي صحيح جنت بالمول بس مو مثلما منقولج
صادفت بنية وجانت تحتاج مساعدة وشفت ثنين اولاد حرام جاي يتحارشون بيها وانا بعدتهم عنها
هذا كل ما بالموضوع
رفاه.. انت جذاب اذاصدك مثلما تكول هاي بنية التقيت بيها بالصدفة زين شيسوي رقمها عندك
وليش دتحجي وياك وترسلك رسايل
شنو علاقتك بيها
اقترب مني ولزمني من زندي
.. بالله شو تعاي صعدي فوك بغرفتنا وانا افهمج كلشي
نفضت ايدي منة بقوة وباوعت عليه بعناد
.. لا ما اتحرك منا الا تكلي هاي منو وليش تخوني وياهااني شسويت وياك بيمن قصرت حتى تطعني
صار يمسح على وجهه وينفخ بصبر
.. بس كليلي انتي شلون عرفتي
رفعت نقالي كدام وجهي وشمرته على صدري
ظليت مصفصف
استغفر الله تعال هاي شيقنعها انا ماعندي شي وية البنية وهذا الصار كلة بالصدفة
اجتني امي وعمتي رحاب
.. شنو شبيكم صوتكم طالع للجوارين
ضاري.. لا يمة ماكو شي بس هاي بنت اخوج
اتخبلت علية
رفاه صحت بقهر.. هي هاي تاليتي راح تطلعني مخبلة
لان عرفت بخيانتك انت واحد جذاب ونذل وخاين
ومتندمة بكد شعر راسي اتزوجتك
انت ما تستاهل احبك واصبر عليك
عمة اتصلي على بابا خلي يجي ياخذني اني مالي كعدة وياه ما ابقى عنده
حليمة .. كولي يالله عمة رفاه شجاج معقولة تخلين رسالة تهجم بيتج وتعرفين رجلج علمودها
مو هاي انا كدامج عمج راضي اتزوج علية وانا باقية وصابرة عليه
رفاه.. اي هو ابن ابوه ومستحيل ابقى انتظر يجيب علية
وحدة ثانية واسكتله مثلج
ما حسيت الا وضاري ضربني راشدي
.. احترمي نفسج ولتتجاوزين مو عبالج سكتتلج
تكومين تتعدين حدودج وياي
انا كلتلج الي صار كلة صدفة بعد بقت يمج
تصدكيني ما تصدكين هذا الشي راجعلج
باوعت عليه واني لازمة وجهي وابجي
.. خلاص ما عندك غير حل بس الضرب هذا الي تكدر عليه
التفت على امه
ضاري.. اكلج يمة رحمة على والديج لزميها وعلميها
رفاه.. عمة اتصلي على بابا خلي يجي علية والا اكلج
اني رايحة اتصل عليه
رحت دخلت جوة للبيت واني احس النار تاكل بروحي
سمعته حجة من وراي بتحذير
.. شوفي رفاه اذا عتبتي خطوة وحدة بباب البيت
راح احرك الدنيا على راسج سامعة
رفاه.. سمعتك و تهديدك ما راح يأثر بية هالمرة
رحت صعدت لغرفتي واخذت نقالي ودست اتصال على بابا
دخل ضاري وراي وسحب النقال والخط انفتح
بجيت بقهر .. ضاري انطيني النقال اريد احجي وية
بابا حتى يجي ياخذني ما ابقى وياك لو اموت
ضاري.. مستحيل اخليج تطلعين من البيت
انتي مكانج هنا تنجبين وتكعدين وتسمعيني زين
كتفت ايدية على صدري بعناد ودموعي تنزل
بدة يحجي
.. راح اكولها للمرة الاخيرة انا ما عندي اي علاقة
صدكي وامني بالله هذا الشي الي ببالج ماموجود
كل ما بالموضوع صدفة بحته
وانا راح اتصل عالرقم كدامج وراح احجي وية البنية واسألها كدامج
وانتي تسمعين
اتصلت عالرقم طلع مغلق او خارج منطقة التغطية رجعت اكثر من مرة
لزمت النقال وشمرته
ما اعرف شنو الصاير بي الرقم مغلق
.. اي طبعاً مغلق مو اني لزمتها وطيحت حظها للساقطة
.. الله ياخذج شحجيتي وياها وهي شنو جاوبتج
.. ما انطتني مجال بس صيحت عليها وغلطت هي كبل
سدي النقال بوجهي
.. اي طبعاً تلكينها انصدمت
.. منين تنصدم اذا هي تارسة نقالك مسجات وحبيات واشعار
.. سمعنا صوت امي دكت الباب ودخلت
حليمة .. يمة ضاري خالك فاضل جوة
.. منو اتصل عليه
.. سامعك انت ورفاه جاي تتعاركون والخط مفتوح وكال خلي رفاه تلبس عبايتها وتنزل وصيحي ضاري
باوع علية ضاري بغضب النار كامت تطلع من عيونه
رحت اخذت عباتي ونزلت
يمهم شفت بابا رحت كبل عليه وحضنته وصرت ابجي مثل الطفلة مهضومة
فاضل.. بوية ضاري اترخص منك اليوم راح اخذ رفاه
وياي اريدها ترتاح عندي كم يوم
باوعت لضاري دنك راسه وسحب نفس عميق
.. براحتك خالي بس اذا ماتصير زحمة يومين تبقى يمك واجي عليها اخذها
التفتت على حضن بابا ودفنت وجهي بي
.. ان شاء الله يصير خير
انتبهت على بابا محجة اي شي بخصوص الموضوع
اخذني وطلعنا بقة ضاري واكف بمكانه ما اتحرك وجهه جامد ما يعبر عن اي شي غير بس رصة سنونه
وضرغام وصلنا للباب
.. خالي امسحها بوجهي ولا تزعل من ضاري انا راح اكعد وياه وافتهم منة شنو السالفة
فاضل.. لايا بوي الله لا يجيب الزعل بينا بس احسن
خلي اخذها وياي حتى ترتاح ووانت اكعد وية اليمك
وافتهم منه وان شاء الله نحلها
.............
ضاري
كاعد وضرغام يحوم فوك راسي
اكل كلبي علمود موضوع رفاه والبنية
بس اتفاجئت بي من كال ترة انا كلشي اعرف بالموضوع ولا عبالك ما وصلتني سالفة المول بس
انا بمزاجي فوتتها ماحبيت انبهك ما دام ما انعادت ماكو
اي داعي احذرك
ما كدرت ادافع عن نفسي مو لان مذنب بس قهرني موقف رفاه من عدت اليومين ورحت عليها اخذها رفضت ترجع وياي صدك بلحظتها حلفت
بعد ما ارجعها واهي تجي لوحدها للبيت
وظل هذا الرقم مغلق ردت بس اطيح بي
جنت واصل حدي لاكدرت احصل الرقم واثبت برائتي
ولا ضرغام راضي يفك مني ياخة
كمل السبحة وكاعد ينك براسي
التفتت عليه.. ادري شنو اسوي اروح ابوس الايدين
يابة حلفت دين قسم ما عندي شي هي عاجبها تزعل خليها بس خلي ببالك روحة لبيت خالي ما اروح
وانت بكيفك
ضرغام.. خلي اتصل على الحجي ويجي وهو يسوف شغله وياك انا اكدر اخذك سحل على بيت خالي
بس ادري ما راح استفاد شي منك
وراح تسودها بالزايد فخلي انتظر الحجي
طلع ضرغام
ودك نقالي باوعت المتصل رقم غريب كمت من يمهم ورديت
واجاني صوت ناعم
.. الو هلا شلونك ضاري اني حنين
.. حنين الله جابج شنو وين رحتي وليش رقمج ذاك مغلق
.. ما اعرف بس صادف اخوية موجود واختك اتصلت على رقمي وصارت تغلط وتسب خفت منها وغلقت النقال حتى مكدرت احجي وياها اي شي
ضاري.. هاي زوجتي مو اختي تدرين من ورة رسايلج
صارة مشكلة وضربت المرة وطلعت زعلانة من البيت
ردت اتصل عليج حتى تفهمينها الصار
وان رقمج صار عندي بالصدفة بس ماكو انتي اختفيتي
.. اوي سودة علية والله ما ادري هشكل راح يصير بيك من وراية ضاري اعتذر منك اذا تريد انطيني رقمها واني احجي وياها
.. لا يابة وين كاعدين حتى ما تتخبل علية بالزايد
.. والله حاسة بالذنب ما اعرف شلون اساعدك
اني كل الي ردته اخ عزيز وصديق حريص علية
بس مع الاسف الظاهر زوجتك متتقبل هيج علاقة
ولو هي حقها اني هم لو بمكانها وزوجي مثلك
لو اموت ما اخليه لوحده يطلع
ولو مو تضربني لو تريكني كتلة وتعشيني كتلة
هم راضية ابقة عندك وما راح اتركك واطلع زعلانة عند اهلي
ضاري بأرتباك .. احم احم بالحقيقة فاجئني كلامج
حنين .. اعرف اني دست زايد بالحجي واحرجتك واذا تحب بعد ما الح عليك بالاتصال بس امانة عليك اذكرني
خلينا حتى لو بس اصدقاء بالسؤال
ضاري ظليت مصفصف معرفت شحجي وياها
كلامها فاجئني وسلبت كل الحجي مني
.. ما اعرف شنو احجي وياج
.. لتحجي اي شي يكفيني انك تسمعني
اني رايحة ما اريد اطول عليك
نهت الاتصال وانا اباوع عالنقال
ابو حسين جنت بوحدة صرت بثنين
هسة اريد اعرف هذني البنات منين يجيبن هذا الحجي
والصلافة هسة هو منو الرجال انا لو هي غير المفروض تنتظر مني انا ابادر حتى هي تسلم
اشو هاي جاية بالعكس
والله ياربي خاف جنت اريد اطلب منها تساعدني
بس من بعدما سمعت حجيها غسلت ايدي
اذا هاي تحلي سالفتي وية رفاه واحتمال حتى تعقدها (((((())))((((())))((()))
يتبع