#تائهة_بين_اروقة_الماضي
#بقلم_الكاتبة_nuha-d-h
صباح القرنفل عليكم يا احبتي
عندما حان الوداع تركت قلمي هنا مودعة لابطال قصتي مع وعد وعهد لكم بالجديد ان شاءالله .. الى كل من تابع نهى الكاتبة الناشئة وقلمها الصغير استودعكم الله احبتي مع البارت الاخير من قصتي تائهة بين اروقة الماضي راجية من الله تعالى ان اكون قد وفقت في سردها واعجبتكم وقوفكم معي سند ودعم لي لن انساه فطالما انتم معي بجانبي انا استمر من اجلكم احبتي
اختكم نهى
ضاري
دخلت للبيت وشفت الكل كاعدين متجمعين وكالعادة علاوي ابن ضرغام يكمز بالنص سلمت عليهم انتبهت بس البنات ردو علية السلام اما البقية ما سلموا رفعت حاجبي بتسائل
.. خير شنو داخل عليكم يهودي وما تردون السلام
اباوع لأبوي بس ينافخ
حليمة.. واخير شرفت ابن بطني تعال اكعد ابوك يريد يحجي وياك
باوعت لأبوي .. خير بوية كول شرايد مني
راضي.. كلشي ما رايد منك بس اليوم خالك فاضل اتصل وكال خلي ضاري يستعجل بالطلاك
ضاري.. ان شاء الله من افرغ اطلك كله انا هسة مشغول
كعدت اخذت كوب الجاي مالت ميس وكعدت اشرب
راضي.. لا هاي المرة تعوف شغلك وتفرغ نفسك حتى تطلك لان البنية جايينها خطابة وابوها يريد يزوجها
رفعت كوب الجاي حتى اشربه واجتني كلمات ابوي مثل الضربة عالراس وكع الكوب من ايدي على حضني وكمزت من حرارة الجاي ..وكفت مرعوب احس كلبي انتفض
.. شنوووووو؟؟؟ شلون يريد يزوجها وهي على ذمتي
.. مو الناس الي اتقدمولها يعرفون بيها مطلكة وهو اتصل علية علمود احجي وياك حتى تستعجل بأجراءات الطلاك ويريد الطلاك محكمة مو بس سيد
ضاري
احياناً الشخص يكون متأكد من قرارته الي اتخذها ويعرف نفسه انه ماشي صحيح وواثق من روحه ان مستحيل يطراء عليه شي يخرب خططه ..لكن فجاءة تصحى على خبر تحس نفسك انك ولا شي اي هذا حالي بعد ما سمعت كلام ابوي حسيت انا لاشئ وان كل القرارات الي حاولت اقنع نفسي بيها ان هي الصح انكلبت بوجهي وبانت معانيها القبيحة وادركت بلحظتها انا راح اخسر احب شيء على كلبي ..جنت امشي وراسي مرفوع بين الغيم من الثقة العمية.. اي جنت واثق من حب رفاه الي وكل يوم اروح اوصل ريام للكلية اشوف وعد الحب بعيون رفاه واتأكد ان هي باقية على حبي وهذا الشي يطمني ان هي باقية الي لو مهما صار بس الي صدمني قرار خالي هذا الي ما جنت حاسب حسابه حجيت وجسمي كلة يرجف احس اتفرهدت
ضاري.. شنو بوية مستحيل اخليه يزوجها هو مو بكيفه ..رفاه مرتي
الحجية خاجية.. هي صحيح مرتك بس انت فقدت حقك بيها من يوم الي قررت الطلاك وصار ابوها هو الامر الناهي وهو اولى بيها ويعرف بمصلحتها
حليمة.. والله اخوي فاضل كلش صعب خصوصاً وية الي يغلط بحقه وانت يايمة هواي غلطت بحق خالك بيوم كسرته برفض بنته ونويت تطلكها وما اتوقع راح يقبل يرجعها الك
راضي.. والله انا لو بمكان فاضل وواحد مسوي هشكل وية بنتي انطي بنتي للجلاب السايبة ولا ارجعها لواحد نبذها من حياته واتعزز عليها
ضاري.. والله مو بكيفهم مرتي وانا حر بيها ردت اعاقبها وبطريقتي محد له دخل بيها وخالي مو بكيفه ارجع مرتي ماغصبن على اليرضى والمايرضى
ماحسيت الا واجاني راشدي طبع خدي ضليت واكف مصدوم فاتح حلكي ولازم خدي حسيت بالحرار ارتفعت لراسي وصارت النار تطلع من عيوني كوة لزمت روحي لا اتهور واصيح بصوت عالي بوجه ابوي غمضت عيوني وسحبت نفس عميق ولميت ايدي بقبضة حسيت بانت العروك ودنكت
راضي.. اشو انت صاير ما تحشم احد ولا جنك عندك جبير يشكمك ماتكلي انت عليمن هشكل طالع راسك يابس ومستقل لحالك عبالك انت القانون وما يردك شي ويوكفك عند حدك شوف ولك من باجر تروح وية اخوك ضرغام وتطلك بنت خالك وتاكل تبن وتكعد ما اريد اتفاشل وية خالك من تالي عمري كافي الي صار بينا لحد هسة هو ماخذ على خاطره منا وما يحتاج اعددلك المواقف فطلكها ما دام النفس عليك راضية
باوعت لابوي حجيت وانا انكت من الغضب
..شوف بوية طلاك ما اطلك ومرتي ارجعها لو اعرف اكتل وانكتل رفاه تبقى الي ماتصير لغيري
درت وجهي واخذت سويج السيارة وطلعت من البيت واسمع صوت امي تركض وراي تترجاني ارجع بس انا وين نار نار احسها تطلع من صدري
ميس
ميتة قهرعلى ضاري اخوي اعرفه كلش زين هو يموت على رفاه بس هو من ورة سواية اختها راد يعاقبها... اتذكر من حجيت وياه وسألته ليش هشكل قاسي بتعاملك وية رفاه معقولة تحطم حياتك وتخرب كلشي علمود كبريائك وكرامتك ...جاوبني
.. ميس ترة السالفة مو شغلة كرامة وكبرياء انا مو لهاي الدرجة متعصب ومتشدد بالعكس كل ما بالموضوع ردت اعاقب رفاه
لان هي السبب بكلشي لان ياما حذرتها من اختها رنا وكلتلها تبتعد عنها ولا تخليها تتدخل بحياتنا ورنا لو ما متأكدة من طاعة رفاه العمية الهة جان ما اتجرأت وسوت هشكل هسة عرفتي ليش انا اقسى عليها لان لو هي من البداية حاطة حد لاختها جان ما صار الي صار ترة بسوايتهن هاي الي اتأذيت وخسرت هواي اشياء وحطوني بموقف لا احسد عليه كدام اخواني وابوي خسرت ثقتهم بية وصرت بنظرهم رجال غير مسؤل وغير واعي لتصرفاتي يعني بأختصار انا طايش وابوي وضرغام من يوم الي صار شددو بمراقبتي وحراستي وهذا الشي يحط من شخصيتي ويقلل من قدري لاعبالج انا ما مقهور مو تشوفيني ساكت لا انا باليوم اموت الف مرة من اشوف بعيونهم عدم الثقة ويخافون لا اوكع بورطة ورجعت اسعى من جديد حتى اثبتلهم انا اهلاً للثقة والصار جان محض صدفة
ميس.. لتحجي هشكل بالعكس ابوي وضرغام يعتبرونك ايدهم اليمنى ومالهم غنى عنك وهذا التشديد من زود حرصهم يخافون عليك
ضاري.. ميس انا رجال مو بنية صعبة علية اتراقب و اتخبل من واحد يحط علية رقيب وجنت دائما اتعارك وية حمزة اذا اشوفه يمشي وراي يتبعني وشوفت عينج اذا تتذكرين شلون جنت ارجع للبيت واتعارك وياهم واكللهم انا مو جاهل وحمزة يحرسني انا رجال حالي حال ضرار حال ضرغام ما اريد احد يوكف فوك راسي بس مع الاسف بموقف رفاه ورنا وياي ثبت صحة قرار ابوي وضرغام بتعيين حمزة بمتابعتي ورجعت لنقطة الصفر هسة عرفتي انا ليش مقهور من رفاه لان احس اتعرضت للظلم بشي خارج عن ارادتي
كلما اتذكر كلام ضاري بخصوص هذا الموضوع اموت قهر عليه محد يفتهمه بهذا البيت غيري وهسة هو طلع من البيت صارله جم ساعة وبالي ظل عنده صارت الساعة ب١٢ بالليل وصرت انتظره شفت ضرغام دخل جوة للمطبخ وجان ستوه راجع من برة شافني
.. شعندج كاعدة هنا
وكفت من الكرسي ورحت يمه وباوعت عليه احس بي ابوي مو اخوي لان هيبته تفرض علينا احترامه
.. جاي انتظر ضاري بعدة لحد هسة ما رجع للبيت
ضرغام.. ضاري راح يبات ببيت خالي مازن
ميس.. خطية خالو مازن صاير محطة الزعلانين وملاذ الهاربين ضرغام اريد احجي وياك
باوعلي .. كولي اسمعج
قررت احجيله عن ضاري وسبب عناده وقهره بلكي ضرغام يكدر يساعده ويحل السالفة بهدوء بدون مشاكل
ضرغام.. يعني هو حاجي وياج هشكل
:. اي هو بكل عقله انتوا ما عندكم ثقةبي
ضرغام.. بالعكس مو بس هو عليه حراسة حتى انا صرت ما اتحرك الا حمزة وياي
لان من يوم الي اتسلبت بي واتعرضت للحادث انا اخذت عهد على نفسي ما اخلي اي واحد من عائلتي يتعرض لهيج تهديد لذلك تشددت بسالفة الحماية وفعلاً لوما حمزة وانتباهه بتوصيل المعلومات الي اول بأول جان انا ما عرفت بسالفة حنين ورنا وجان هسة اخوج واكع بمصيبة بس الله اليعلم شلون يطلع منها بس ميخالف انا منا ورايح راح اخفف عنه وارجعه يستلم شغل ثكيل حتى ما ياخذ على خاطره مسح على راسي وابتسم
.. اكول ميسي اشو جنك كبرت وصرت تقلق على اخوانك
ميس ببتسامة.. گلب والدة مو بيدي اخاف عليكم وبالذات ضاري
.. وشمعنا ضاري
.. يا اخي اذا يصير عليه شي بعد منو يلعب وياي بلاي واكعد اتعارك وياه ويشتريلي جبس وحلويات
ضرغام.. هههههه الله يلعن ابليسج يعني كلشي عندج مصالح
ميس.. اي يا اخي اضمن حقوقي مثل علاوي ابنك ..شفته شلون طالعله السان
ضرغام.. اي والله انتبهت عليه خصوصاً من تنطينه اليدة مالت البلاي الواكفة وهو يصيح كووول مثي كووول
ميس.. فديته حبيب عمته يطلع مستقبله باهر
ابتسم .. يالله كومي نامي وراج دوام
هيام
كعدت الصبح على لمسات خفيفة على خصري وزندي فتحت عيوني بالكوة وصرت ارمش بنعاس ..باوعت شفته ضرغام
ضرغام.. صحي النوم ياحلو شنو ما ناوية تكعدين تريكيني
هيام.. امممم هسة اكوم اريكك
.. صايرة تنبل مال نوم
.. حقك تحجي هشكل لان ما كاعد الليل كله سهران على استاذ حمودي
..لاتتبلين على ابني ترة هو حباب على ابوه بس انتي ما تعرفيله
.. اي يعني هسة اني صرت ما اعرفلك
.. اي والله صايرة هواي تغلسين علية ماتكولين هذا ابو جهالي خطية اشوفه شنو محتاج
.. اي يابو جهالي بالله كلي بيمن قصرت وياك
.. ماتشوفين نفسج كاضيتها علينا كله جفاف
جان يحجي ولمساته تشتغل لحد ما حسيت عليه رفع ثوبي
.. يبووووو عزة بعينك ضرغام ترة اني والله خطية مصارلي شهر من جبت وابنك ما منطيني مجال
بعدت ايده وضحكت وردت اكوم من السرير وهو لزمني من خصري وقربني عليه
.. تعاي رجعي اريد احجي وياج
.. لا ما تحجي وياي ادري بيك شنو تريد بس مو هسة بعدني تعبانة على كولت بيبي خاجية بعدني خضرة ومطالعة من الاربعين
.. يعني ليمتة الفرج
.. اوعدك اعوضك كلشي بس اصبرعلية ارتاح واروح دكتورة تجيكني
قربني عليه حيل وباسني من راسي
.. يالله ميخالف مو الا ناكل بس زين على الاقل شوية مقبلات خلينا نضوك
ابتسمت ومحسيت الا هولاكو بدة بشن الهجوم علية احس بروحي غركت بين احضانه وما اعرف شوكت اوقفه لان اصلاً اني هم نسيت نفسي بين ايديه وضعت لحد ما حسيت على علاوي يضرب بالباب الفاصل بينا وبين غرفته كمزت من جوة ضرغام ودفعته عني ورحت اعدل بملابسي وهو يضحك التفتت عليه واني حمرة خرب اباوع على زنودي حمر
.. على شنو تضحك عيب عليك جنك مجرم حرب
فتحت الباب لعلاوي وهو دخل بدون احم ولا استأذان كبل راح يركض على ابوه وصعد عالسرير وصارو يتصارعون عالسرير الشبل وابوه الاسد
التهيت ابدل ملابسي واخذت حمودي وبدلتله وبعدين حضرت ملابس لعلاوي ونزلتهم جوة وياي حتى اسبحه ورة الريوك باوعت لضرغام قبل لا انزل
.. عفية ضرغام نزل وياك هاي السلة والترمز
نزلت ودخلت للمطبخ شفت خالة حليمة كاعدة ومنورة المطبخ وشكلها الجديد يجنن وخدودها خرب صدك لو كالت ميس صاكة ماشاء الله عليها جانت لابسة دشداشة ربع ردن ودلعتها متوسطة وجاي تتحرك بالمطبخ تسوي الريوك وخالو راضي دخل وعلى راسه المنشفة
.. صبحكم الله بالخير
الحجية خاجية.. هلة يمة راضي تعال بوجهك اتريك اليوم حليمة مسويتلنا ريوك من اليحبه كلبك كيمر وكاهي وسياح وبيض
راضي يغمض عيونه ويشتم ريحة السياح
.. افيييييييييش صارلي شكد ما ماكل
حليمة.. سودة علية وليش ما تاكل
راضي.. تردين الصدك محد تلحكج بالطبخ الج نفس بالطبخ ما شفت منه
دخلت ميس محضرة نفسها ولابسة زي الكلية
ميس..اي حجي راضي امي خلتك تصير شاعر من تالي عمرك
حليمة.. تعالي اتريكي وبلا حجي زايد
اباوع لخالة حليمة صارت حمرة
نزل ضرغام مبدل ملابسه بملابس الشغل وعلاوي على ظهره يضحك
صبح علينا وراح يم خالة ودار انطاهة ظهره
ومدت ايدها ونزلت علاوي من على ظهره
بدينا ناكل ونزلت ريام جنها بطريق جانت تتمايل بالمشي وراها ضرار يحجي
.. على كيفج ام راضي لا تتهورين وتركضين سريع
خطية ناصب عليها صايرة اصلاً كوة تمشي وكوة تاخذ نفس صارلها يومين من دخلت بشهر التاسع يارب يسهل عليهاكمت جبتلها كوب هي وضرار وصبيتلهم جاي وصرت اسويلها لكمات صغار وانطيها تاكل خطية دائما تنسى نفسها بالاكل ومتاكل لان خطية كلية وبيت وزوجها احاول بقدر الامكان ما اخليها تسوي شي رغم اني جايبة مصارلي هواي بس الحمدلله اني كدرت اكوم على حيلي ورة اسبوعين من ولادتي وخالة حليمة هم ما قصرت وخالة رحاب هم رغم خطية كانت ملتهية وخالة حليمة وياها يجهزون للخطوبة لان خالو مازن قرر يعقد عليها وبنفس اليوم ياخذها للزيارة لان هي رفضت تسوي عرس وتلبس بدلة عروس
وشرطت تروح تسافر للزيارة وهناك تبدي اول صفحة من زواجها
ضرغام.. اكول حجي اليوم اخذك انت وجدتي والولدة ونروح لبيت خالي فاضل نرجع رفاه لضاري لان شوفت عينك البارحة ضاري بعده يريد مريته وهو جان يريد يعاقبها على غلطتها وهاي هي ان شاء الله راح تعرف غلطها وما تنعاد
راضي،.اي والله بوية انا البارحة جنت احجي وية امك اكللها خلي نروح نرجع رفاه ونطيب من خاطر اخوج بس اشو هي تكول اخوي ما اظن يوافق يرجعها حتى لو رحناله وطلبناها منه
ضرغام.. حجي احنا هسة خلي نروحلهم بالاول وبعدين نكعد وياهم ونتفاهم وان شاء الله هو راح يشوفك ويشوف جدتي خاجية ويستحي يحجي لان هو هواي يسويلكم حساب وخاطر
حليمة.. جا خوش اليوم العصر انطي خبر لبيت اخوي اجهز روحي ونروحلهم
ميس
اباوع لأبوي شلون يحجي وية امي وياخذ رأيها ابتسمت يارب يحفظهم الي وما يحرمني منهم
سمعت صوت سيارة الخط كمت من مكاني وسلمت عليهم وطلعت وصلت للكلية وشفت هديل تنتظرني وتضحك وبعيونها هواي حجي صديقتي واعرفها سلمت عليها
.. يالله هاتي ما عندكِ من اخبار احجي اسمعج
.. شمدريج عندي اخبار
.. عيونج على بعد عشر مترات تصيح انا عندي اخبار
هديل.. همة بالحقيقة خبرين مو اخبار
.. اي بلشي احجي قبل لا تبدي المحاضرة
.. الخبر الاول انا وافقت على هذا الولد الي حجيتلج عنه
حضنتها بفرحة .. عاااااا مبروك واخيراً وحدة من عدنا راح تنقلع من حديقة العوانس
ضربتني خفيف على كتفي
.. انجبي هو احنا شكد عمرنا حتى تكولين عوانس
.. يالله عاد لا تثبرينا انطينا الخبر الثاني وفضيها
.. ها اي اتذكرت خلي نرجع نكمل كلامنا
الخبر الثاني اخوي غسان البارحة حجة وية امي علمود تخطبله
جنت اضحك وفرحانة بخبر خطوبة هديل
بس من سمعت الخير الثاني انمغصت بطني وانقبض كلبي واختفت ضحكتي من على وجهي وهمست بصوت حذر .. اي ومنو هاي الي ناوين تخطبوها لغسان
.. بالحقيقة ما اعرفها بس هو كال لأمي انا احبها وهاويها بس بالاول يريد يتأكد منها لان هو خايف من شي فكال اتأكد منه وانطيكم خبر ترحون تخطبونها الي
ما اعرف شصار بية من سمعت كلام هديل اجيت اوكع على وجهي بالكاع من الصدمة
اي اني مصدومة لان هسة وبهاي اللحظة اكتشفت انا احب غسان وواكعة بهواه ومو بس احبه لا انا اعشكه
واجة كلام هديل وكع فوك راسي مثل الصاعقة
الي خلتني انتبه على روحي واعرف كلبي ليش جان ينتفض من يمر طاريه
بس بعديش عرفت بعدما اكتشفت هو يحب وحدة ثانية وناوي يتزوجها
جانت هديل منطلقة بالكلام واني رحت بغير عالم حسيت انطفى شي بروحي مثل الشمعة وتنطفي ..اختنكت لاول مرة بحياتي حسيت بدمعة خاينة نزلت على خدي
هديل سألتني مستغربة
.. شنو جاي تبجين
.. على شنو ابجي بس ما اعرف شنو دخل بعيني
.. عبالي كمتي تبجين علية لان راح اتزوج واعوفج
.. ما تطيرين هو انا ابوي راضي من اتزوج على امي ما بجيت عليه تردين ابجي عليج انتي
جنت احجي وية هديل وانا كلبي محترك
من القهر اتمنيت اكعد اسألها عن هاي البنية الي حبها غسان ااااااخ والله صار ذكر اسمه غصة بكلبي ..دنكت ومشيت وخلصت محاضراتي وانتهى الدوام وانا كلشي ما مفتهمة احس بروحي تايهة ضايعة معقولة هيج شعور اليحب وينخذل يكون مهموم اشو محسيت بهذا الشعور من سمعت بأيمن يريد يخطب هالة
جنت امشي مدنكة ونقالي يدك مالي واهس ولا الي نفس اشوف المتصل وارد عليه
فجاءة اصطدمت بكتف واحد رفعت راسي اعتذر انصدمت من شفت ايمن واكف كدامي
.. ميس عفية اترجاج انطيني فرصة احجي وياج
.. كم مرة اكلك ما اريد احجي وياك يا اخي هي مو بالكوة
.. ميس عفية والله زعلج ثكيل علية وانا جاي اريد اعتذر منج واريد نرجع علاقتنا مثل قبل اصدقاء واخوان
.. اعتذر ايمن ما اكدر ارجع وياك مثل قبل لان عمر الينكسر ما يتصلح بس تبقى صلة الرحم تجمعنا وهذا الشي ما اكدر اقطعه يالله مع السلامة يا ابن عمتي العزيز رفعت راسي اتفاجئت بغسان واكف وعيونه تجدح شرار ارتديت للخلف بخوف من خزرت عيونه هذا شبي ليش نظراته تحسسني عبالك مسوية مكسورة ..اقترب مني
غسان.. لحظة ميس
ظليت متصنمة بمكاني وكأنما كلماته اوامر فاتحة حلكي بغباء وهمست
.. ها تحجي وياي
.. اي احجي وياج اخوج ضرغام اتصل علية وكال رجعها وياك للبيت لان السايق مالتج سيارته عطلانة وما يكدر يجي عليج وجاي
يتصل عليج ضرغام وما تردين عليه
.. ها اي مسوية نقالي صامت
انا حجيت منا والنقال اعلن عن جذبتي ودك وانفضحت كدام غسان وكالعادة الاحراج يلاحقني اينما ذهبت باوعت عليه احس بخدودي صارو نار من الفشلة طلعت النقال وجاوبت جانت هديل منصلة علية
هديل .. عوبة وينج كلبت الكلية ادور عليج انتي ماكو وين اختفيتي اخوي غسان اجة وكال صيحي ميس حتى اوصلها ويانة
.. اي هو هسة اني واكفة يم البوابة وية غسان اخوج
.. انتظروني اني جاية
سديت التقال واني اتهرب بنظراتي من عيون غسان ما اعرف مستحية من الفشلة مدري مقهورة لان يحب وحدة ثانية المهم انا حالياً اتمنى اختفي من كدامه
غسان .. يالله امشي خلي ننتظر هديل بسيارتي
جان يحجي وهو عاكد الحواجب ومعصب
ما اعرف شنو سبب انزعاجه
رحت وراه وفتحلي باب السيارة الخلفي
وصعدت وكعدت واني مدنكة حسيت بالباب ما انسد رفعت راسي واجتي عيني بعينه
هاي لثاني مرة يدفعني تصرفه اباوع بعيونه
للحظة حسيت شفت بعيونه نظرة غريبة سرعان ما تلاشت واختفت وسد الباب والتف حول السيارة وصعد
اتفاجئت بي من صعد بالسيارة جنت متوقعة راح ينتظر هديل تجي ويصعد هو وياها
ما ادري ليش من صرت اني وياه بنفس المكان وقريبين على بعضنا كلبي انتفض من مكانه وصار يدك سريع وحتى انفاسي اضطربت...جو السيارة الصامت من الداخل زاد من توتري
سمعته سحب نفس عميق وكمزت من مكاني من سمعت ضربته لمقود السيارة رفعت عيني وباوعلي من المرايا حسيت بعيونه حجي بس ما يعرف منين يبدي
وحجة بنفاذ صبر
.. ميس شنو علاقتج وية ايمن
اتسعت عيوني متفاجئة من سؤاله
وسألته بأستنكار
.. ايمن؟؟
.. اي ايمن ابن عمتج
.. ما بيني وبين ايمن اي علاقة غير هو ابن عمتي وبس
.. زين هو شعندة يجي عليج هنا ويحجي وياج ليش هو ذاك اليوم مو اكله كتلة غسل ولبس علمود اتحارش بيج
.. يريدني ارجع وياه مثل قبل ونصير اخوان واصدقاء
.. وانتي شنو جاوبتيه
جان يحجي بغيض..رفعت حاجبي وانتبهت على روحي اني شكو كاعدة اجاوبه على اسألته شنو هو امي لو ابوي
.. العفو انت منتبه لروحك جاي تسألني اسئلة شخصية
غسان .. ميس انا ما احب اللف والدوران
وراح انطيج اياها من الاخير انا اريد اتقدم اطلبج من اهلج بس حبيت بالاول اعرف ايمن شنو بالنسبة الج ..وهسة من اتأكدت ماكو شي بينج وبين ايمن اريد اعرف رأيج قبل لا اتقدملج لان ما اريد يصير احراج بيني وبين صديقي ضرغام بسبب اخته فكلت اسألج قبل كلشي
جان غسان يحجي وانا مصدومة فاتحة حلكي يعني شنو معقولة اني المقصودة بكلامه من حجة وية امه وهديل لا لا ما اصدك عزززززة والله لوما عيب جان طكيتها هلهولة باوعت عليه من المرايا جان يباوع بحذر ومتردد خرب كوة لزمت حلكي من الفرحة لا انفضح واضحك بصوت عالي
غسان.. انا ما احاول اضغط عليج وراح انطيج اسبوع تفكرين وانتظر ردج
جاوبته بسرعة بدون شعور
.. لاااااا على شنو الانتظار ما يحتاج روح اتوكل واخطب على بركة الله
شهكت بصدمة ولطمت ايدي على حلكي من ورة زلة الساني عزة بعيني والله ياخذني معقولة انا حجيت وياه هشكل صخام يارب شلون بية اكص الساني لو اخيط حلكي هي وحدة من الثنين يالله ارتاح اتمنيت الكاع تنشكل وتبلعني والله هسة شنو يكول علية ما مصدكة اجاها عريس .باوعت عليه خربان ضحك وعيونه تريد تطلع من الضحك وصلت هديل وصعدت بالسيارة وهي تباوع على اخوها مستغربة ودارت راسها تباوعلي
هديل.. دوم الضحكة شنو شصاير
حرك السيارة وباوعلي من المرايا
.. هديل حضري نفسج بعد كم يوم راح تركصين بعرس اخوج
هديل.. عااااا احلف كول والله يعني شنو وافقو الجماعة
جانت هديل تحجي وانا غديت ماي من المستحة اول مرة احس بروحي خجلانة شكلها بدت عندي بوادر الانوثة جان يحجي ويضحك ومنطلق اول مرة اشوف هذا الشخص رغم هو فرحان بس خرب يومه حتى وهو يضحك شكله جدي وثكيل بس انا عودك شنو غير ابجي طين مامصدكة غسان راح يصير الية
