كيان
وكفت صافن ع وضعها شنو اشرح وهي بوضع هستيري
جانت تتنفس بسرعة و نزلت ع طولها بثكل و كعدت بالكاع
تهز راسها و تبجي بحركة
كعدت و تقربت يمها حجيت وكوة يطلع الحجي من حلكي كل شي مخنوك بية .. زين لو ردت ابرر شنو راح احجي ما الغلط مني
زهراء فدوة اهدئي والله يعز علية اشوفج هيج
شالت عيونها بعيوني ووجها صار اصفر
أهدأ شدتحجي انت !! ... جنت متخيلة تخوني بس عمرها توقعاتي ما وصلت لهيج شي ... معقولة انت كيان تكتل بشر .. ما اعقل هالشي
والله لو خايني و متزوج علية و طاب انت وياعا من هاي الباب ولا اشوفك تطب بهاي الحالة
سكتت شأريد احجي خلي اسكت احسلي
خايف والله مرعوب عليها لان حالتها و خايف من الهبطة الأكلتها
بطلت بجي و ضلت صافنة ع الباب و اني كاعد بصفها متحركت
جتفي ضل يون بية لان اليوم العملية جانت كلش صعبة و معسورة
بحيث من اجيت انفذ بإيدي قاومني وجان ضخم حيل و اجت الطلقة بجتفي و ابو الحسن أنهى عليه و جنا ع بعد خطوة وحدة وننفضح و نروح بيها بس تجاوزنا العملية بخبرتنا و ضلت المناوشات و المراقبة لساعة كاملة
مجنت ادري راح تكمل بمعرفة زهراء بشغلي ... جنت افكر شلون اخفي هاي الإصابة اثاري هسة وكعت بالاضرب
كامت تحط اديها ع الحايط و اني كمزت ونسيت جتفي فصحت حيل لان اوجعني
صفنت علية و عيونها تجري حطيت ايد اسندها دفعت ايدي و همست
داويتها
هزيت راسي
لا
بلعت ريكها و دنكت فاتت من يمي و اني وراها امشي مثل الطفل اليغلط و منتظر امه تعاقبه
فاتت للكاونتر و طلعت منه علبة الاسعافات و الادوية
حطتها ع الطاولة و اني وراها خايف لا توكع و ايدي ع جتفي و الدم تارس ايدي
اشرت ع الطاولة بلا متباوعلي
كعدت و نظفت الجرح جنت اتوسل بعيوني تسامحني ع السويته بس هي جانت متجاهلتني تماما كثل الفرض الي مجبور عليها
خلصت و اني ناسي الالم و غركان بعيونها ... خايف و كلبي مقبوض حاس راح افقدها
مديت ايدي امسك ايدها جرتها بس ما حررتها و ضليت متمسك بيها
كمت و صرت بطولها و حجيت بتوسل
زهراء ادري ال....
رفعت ايدها بسرعة و كالت
كيان لا تبرر ... ما كو مبرر لفعلتك هاي رجاءا ... ما اكدر اتقبل هالفكرة والله بأي حق تقتل الناس و تسلبهم حياتهم منو انت حتى تحكم ع حياتهم
جنت مجبور
هه انت مو طفل كيان حتى تنجبر ... رجال انت متنجبر تجبر ما تنجبر ... جنت دائما تكول اهلي ضلموني بس محد ضلمك غيرك
سكت و همست بخوف
تدري صرت اخاف منك
هي كالت هالشي و اني ركبني الشيطان صدك اصلا اني شوصلني لهذا الطريق غيرهم كلشي سويته عناد بيهم و عناد بنفسي
ضجت و الغضب ركبني ركوب صرت اشوفهم كلهم و خيانتهم كبالي مجنت اشوف زهراء جنت اشوف الخذلوني
بعدت ايدها بعصبية و ركعت بإيدي المصيوبة الطاولة فلشتها بإيدي لان جانت زجاج
باوعتلها بغضب و صحت بيها
منو الوصلني لهاي الحالة غيرهم هااا !! ... خلوني اتحمل ذنب ما مسوي . دفنوني بالحياة ضيعوا مستقبلي و حياتي و فوكاها تبروا مني و صوروني ع اساس اني شيطان
وليش ما اصير شيطان و ساقط مدام هم حاجين علية بكل الاحوال خلي من يحجون اني منحرف ما يجذبون
كامت تبجي و اني صرت اخبص اكثر و ازيد بعياطي اكثر دخلت بحالة عصبية ومصرت اسيطر ع روحي ضليت افلش شكو شي كدامي و صوتي يعلى اكثر
موبايلي يدك و زهراء تبجي و تسكت بعباس الكعد ع صوت عياطي
ادري راح اخسرهم و يمكن لان حسيت هالشي طلعت عن طوري و فتحت دفاتر قديمة
عباس يباوعلي فاحط من البجي وزهراء لبست حجابها و عباتها لان يحيى و ايوب و ابو الحسن طبو كلهم للمطبخ ع عياطي
كعد يمي ايوب متفاجأ وعيونه بيني و بين زهراء الكاعدة بالغرفة و حاضنة عباس يصرخ من شافني و كعد من نومه
كعد ع ركبه كبالي و اني توني هدأت لان حيلي نهد و ايدي زيدتها كلها كزاز صارت حاطها ع ركبتي و راسي منتحي ع الحايط
احس النار صارت بكلبي و شعلتني شعل اريد ارتاح والله ما اريد غير الراحة
همس بصوت بيني و بينه
عرفت مرتك !؟
باوعتله بثكل و هزيت راسي
جر نفس و تنهد كال
وليش هيج سويت لعد
كوة بلعت ريكي و صوتي طلع مخنوك ع كد ما صيحت
مو كتلك اني خلي اعوف هالشغلة ... كتلك ما اريدها
دنك ايوب و الندم بعيونه خجل مني و كام
صاح ابو الحسن وعيونه علية
خيتي حضري روحج اخذج لبيت ام مالك
هزيت راسي و اشرتله
ما تطلع من البيت
عكد حاجبه و كال
انت متعرف شتسوي من تعصب خليني اخذها هناك ثنينكم ارتاحو
باوعتله بإنفعال ونترت بعصبية
كتلك متطلع و تعدي باب البيت
غمض عيوني و تخوصر طلع برة ضل يحوم شوي و رجع كال
كوم انت يمنا لعد
جحيت بحيل مهدود
ما اتحرك اني من مكاني
عاط هو و ضرب الباب برجله
لا تحيرني لو انت تروح لو مرتك شوفهم شلون مخطوف لونهم و يتباجون اني ادري شمسوي بيهم
لو انت تتحرك ويانة لو اخذهم لبيت مالك
ما اريد اعوفهم والله خايف اعوفهم ما مستعد اخسرهم خسرت بما فيهم الكفاية بس اروح وياهم عندي استعداد و لا اشوفها تطلع من بيتي زعلانة
كمت اتسند بس وجعتني ايدي و فلتت وكعت بالكاع حيل فقدت التوازن و الدوخة لزمتني لان فقدت دم هواي اجة يحيى و تسندت ع جتفه طلعت و عيوني عليها جنت اتوسل رضاها و ندمت حيل صارت بوجهها بس والله مالها ذنب شعراية بالصار
بس هي جانت تباوعلي بعتب و ألم بس تحبني والله لا زالت تحبني
عثرت بعتبة الباب كمزت من مكانها و حطت ايدها ع صدرها و تبجي
دنكت و عيوني كامت تغوش
اخذوني للبيت و حطوني ع التخم حجوا هواي واني بالي مو يمهم ابد عقل مضل براسي
اخر شي عطت بيهم
كاااااافي
كمت ودفرت الطاولة الكدامي وكع المي و الغراض كلهن بحضن ابو الحسن الجان كاعد بالكاع و صافن علية
محجو شي و سكتو
طلعت مخنوك حيل و ضايج من نفسي
دا اعاقب و ءأذي الناس الغلط
الي وكفولي وكت العازة وكت ما اهلي عافوني
طلعت برة و بيدي الجكاير
ضليت كاعد بباب بيتي خايف لا تشرد مني خايف تطلع
اني تكلي اخاف منك !!!
اااااخ ليش ما تضحكلي الدنيا لان صارلي سنة مرتاح وياها لازم اتعذب يعني
خلصت باكيتين جكاير ع ذيج الكعدة صار الصبح و اني كلش صخنت و عيوني غوشن حتى كلبي صار يوجعني
تسندت ع الحايط و كمت طبيت للبيت اباوع بخوف
شفتها كاعدة صافنة و عباس بحضنها توكله بشرود شافتني باوعتلي بعتب
عباس باوعلي وبرطم و كمز من مكانه اجة يمي اني واكف بباب المطبخ خايف اخطو خطوة للداخل
دنكت عليه اريد اشيله جان اسمعها تهمس
لتشيله بإيدك هاي جرحك لسة ما التم
باوعتلها لسة تفكر بية و تهتم حتى بهاي حالتي تحبيني
شلت عباس و اني عيني عليها .. حضنته حيل و اشتم بي و هو يحجي مبين من حركة دمه يشكي
باوعتلي بعتب و كالت
شوف حتى عباس صار يخاف منك
ضغطت ع نفسي و حجيت بصوتي المخنوك
رجاءا زهراء لتعيديها
رفعت راسها و كالت بتحدي
غلطانة شي ... دا تتصرف و كأنك شخص ثاني مو كيان ابد الي نعرفه
حجيها جان مثل الي يذب نفط ع نار ... والله ع ساعة تحركها النار هم
مدا اتحمل هالحجي اصلا اني صاير مثل المخبل و هي تحجي هالشكل
اختنكت حيل ذبيت عباس و تقربت منها حيل جريت ايدها فتقربت حيل
حجيت و صوتي صاير همس ماكو رايح من صوايح البارحة
هذا اني من زمان اني هيج اصلا انتي شتعرفين عني .. ولا شي . هذا شغلي من زمان و كل شي سيء بحياتي مسوي ... قاتل مأجور .. متاجر مخدرات ... اتعاطى حبوب .. وحتى شرب اشرب ... و مالي لا عشيرة و لا اهل
لا تعيشين دور المتفاجأة تمام لان هذا اني من اول يوم تزوجنا و اعتقد جنتي راضية
جانت تباوع و عيونها تبجي و تهز براسها كالت بخنكة
والله لو ادري تقتل جنت ما تزوجتك ... والله الموت ع ايد زهير ارحم الي من العيشة وية قاتل
دفعت ايدها حيل و اختل توازنها اجت توكع ... اكره هاي الكلمة اتنرفز منها حيل جانو يكولوها وين ما اروح من بعد ما مات احمد
صفنت علية متفاجأة ما مصدكة شهكت بصوت و الحجي مخنوك
اشرتلها بإصبعي مهدد كلش فاقد و اعصاب
لو شخص غيرج يكولها اخلي يتمنى الموت و ميلكاه حمدي ربج انتي عندي غير و ابني ببطنج
هه تخاف عليه !! ... لو جنت مفكر بي ع الاقل مسويتها ما خفت تطلع حوبة احد بيه
فركت راسي حيل كلامها يوجع و ما اريد أذيها وهي تريدني أذيها بهذا حجيها والله كلبي مينطيني النس شعرة منها صحت بيعا بصوت
يا حوبة هاي ... انتي تدرين شنو اشكالهم الي انفذ بيهم لو بيا اماكن يتواجدون و شنو يسوون وشنو اعمالهم ... اني انفذ بامر بالحكومة يعني محد نزيه
كاااافي فدوة كافي ... كيان ليش تكسرني و انت احلى تعويض اجاني ... ليش قبلت اصلا بيهم
عطت بيها
ولج اكلج موافق ع هذا الشغل و اشتغل بي قبل لا اتزوجج .. و من زمان مفكر اتركه خاصه من عرفت حامل و زادو عائلتي
لتحجين بشغلة متعرفين عنها شي
وليش ضميت علية
لان ميصير لازم تكتم ... لان نروح بيها و يروح روس كبيرة بالدولة
باوعتلها هدأت نوعا ما شالت صينية الريوك و حطته ع السنك تغسل بالمواعين
دخت حيل و مضل بية عافية والله فطبيت للغرفة و اتفاجأ بجنطة الملابس
تجمدت اني بالباب وكفت و كوة بلعت ريك حطيت ايدي ع الباب تسندت اني طبيت حيلي مهدود و هسة اشوف الجنطة
جنت اتنفس بسرعة و اريد اصيح باسمها والله صوتي ميطلع
ضليت واكف و الصخونة لساتها اجت هي حسيتعا وراي
حجيت بصوت ناصي
شنو هاي الجنطة
كالت بارتباك
لميت ملابسنا
سكتت حجيت بنفاذ صبر
لووووويش!!
محجت شي صحت بخنكة
احجي وياج
اريد اروح لأهلي ... ردت اروح لزهير و جدي
التفتت عليها شفتها تباوع للكاع وتلعب بأصابيعها
و شنو منتظرة ... يلا تفضلي !
باوعتلي وعيونها تلمع دموع كالت بعبرة
شفتك تعبان و بطلت ...
ضحكت بمرارة تشفق علية ... زهراء تشفق علية !!
فركت وجهي بعصبية و مشطت شعر راسي باصابيعي اخر شي ضربت راسي بالباب و ضليت اركع بي و هي تصيح و تبجي توخرني عن الباب
كاااافي ... بس كافي عاد والله دا تعذبني هيج
صحت بيها
انتي تتعذبين !! لعد اني شيصير بية من اسمع هذا الكلام منج بالذات
ولج انتي دا تذبحيني.... شنو يعني تلمين ملابسج و ترحين .. هااا!!؟ شنو يعني و انتي تدرين دمج مهدور يم اخوج و بس اني آمانج و فوك كل هذا تاخذين ولدي وياج .... ولج ليش دا تلويني من ايدي التوجعني .. مسويت وياج شي مزين !
ليش هالشكل تجازيني
حجت بمرارة و لازمة وجهي بإيديها تمسح وجهي
ما اروح والله ما اروح بطلت ...
ههه ما اريد شفقتج ... و جان كتلج روحي بس اني مو قليل اصل وإن جان تتنرفزين من وجودي هذا اني طالع و ان شاء الله ما اضايقج بعد
بعدت إيديها و طلعت والدنيا تفتر بية
رحت يم الشباب لكيتهم كاعدين قلقين من شافوني عيونهم تحجي مبين الخوف عدهم
طبيت لغرفتي السابقة و ذبيت نفس لان صخونة والم جتفي و دوخة و حرك اعصاب والله صرت ما اميز شنو ووين العلة ما ادري
حاولت انام ما اكدر كمت و طلعت
ابو الحسن
وين رايح كيان
حجيت واني امشي
اجيب علاج
اروح وياك اني هم اريد علاج
ادري بي يجذب و يريد يروح وياه التفتت ليحيى
عينك ع البيت يحيى
هز راسه و اني طلعت صعدت بسيارة ابو الحسن محجى شي بس جان يباوعلي و يجر نفس و يهز راسه
نزلت يم ابو صيدلية صديقي كبل لان كل الادوية الاريدها هسة مينطوها الا عرف
اول مطبيت صفن هو وبعدين ابتسم عاكد حاجبه كال
كيان !!
كوة جبرت نفسي ع ابتسامة و كتله
شلونك
سلم بحفاوة و اني كلش بارد جريت الورقة من ايدي و انطيتها اله قراها عاكد حاجبه رفع راسه و هزه كال
ما عندي
جريت نفس و قربت وجهي عليه همست
ادري كلهن عندك ... علي فدوة انطيني اياه لان راح اتخبل و اذا ما تخبلت انتحر
صفن بوجهي و كال
شبيك ليش هيج وجهك و حالك
اذا تعز فد يوم من ايامنا السابقة سوة انطيني الدوا
اضرك والله اذا سويتها
اني مو جاهل علي ... انطيني بس امشي هال كم يوم
هز راسه و راح اجة انطاني الجيس كال
ذني مو كلهن ... انت صاحبي و ما اكدر ما انطيك و لا اكدر انطيك
هزيت راسي و انطيته الفلوس
مشكوور و متقصر
طلعت و رجعت للبيت اخذتهن يلا نمت ...
.
.
.
توقعاتكم و نقدكم منا وهيج كله احداث حضرو حالكم 🤓