الحلقة 3
يوم جديد أنا كنت مزروبة باسكو كانت عندي جلسة محاكمة تاع قضيتي وجدت الفطور بكري و لبست حوايجي ... جواد في هاذ الوقت كان راقد
نجوى : أياا حبيبي نوض أو راح عليك الحال ( و بستو من خدو)
جواد : أيااا راح عليا الحال علاه مانوضتينيش
نجوى : ماحبيتش نحيرك و نتا راقد و علابالي بلي عيان
جواد (بالعياط شوي ): لالا نوضيني ذرك يديري حالة المعلم .... حابتني نتحاوز ولا كيفاه
نجوى : اايي خلاص المرة الجاية نوضك بكري مايهمنيش فيك ..... اني رايحة ذرك
خرجت و رحت للمحكمة لقيت موكلي يسنا نثم صبتو متوتر وخايف
نجوى : ماتخافش بربي ان شاء الله القضية في يدي و ديما الحق يبان طول ولا قصر
قالي ايه ان شاء الله و دخلنا و دافعت على موكلي كيما كنت موجدة و كما توقعت ربحت القضية
موكلي بعد ما خرجنا : الله يرضى عليك و يخليك ديما في طريق الحق كيما بينتي الحقيقة في قضيتي
نجوى : والله يا عمي حشمتني ما درت والو هذا واجبي برك
رحت للشركة كامل باركولي و قالولي بلي استاذنا يسحقني رحتلو للبيرو (دقدقت)
نجوى : نقدر ندخل أستاذ؟
أشرف : تفضلى بنتي تفضلي
دخلت و قعدت مقابلاتو قال
أشرف : يعطيك الصحة بنتي شرفتيني و شرفي مهنة المحاماة تعرفي أكثر حاجة تعجبني فيك ؟
نجوى : وشنو هي أستاذ ؟
أشرف : أنك تخدمي بضميرك ... لحد الآن و بعد عمري هذا ما قابلتش محامين بهاذ الشغف غير زوج نتي و واحد عزيز على قلبي
نجوى : أستااذ ...ديما تحكيلي على هاذ الانسان لي عزيز عليك و ديما تشكر فيه اذا كان شاطر لهاذ الدرجة علاش ماوش يخدم معانا
أشرف : هذا انسان مثال على الكفاح و الاجتهاد ... و هاذ النوع ماتقدريش تقيدهم في جهة وحدة .....أنا اقتارحت عليه يخدم معايا بصح هو فضل يبني شركة خاصة بيه
نجوى : والله تالمون راك تحكي عليه غير بالخير ...حسيتو من كوكب آخر
أشرف : ههه ايه .... المهم وش درتي في القضية الجديدة
نجوى : أني نخدم عليها
أشرف : مليييح ... تقدري تروحي لمكتبك و تخدمي عليها و كشما استصعبتي حاجة راني هنا
نجوى : شكرا ...( و رحت للبيرو تاعي )