الحلقة 4
دخلت البيرو نتاعي و بقيت نخدم حتان وصل وقت الغدا حبيت نعيط لجواد نشوف وش راه
نجوى : ألوو ؟؟
جواد : ألو
نجوى : واش ..كشما صرالك مشكل في الخدمة
جواد : لالا لحقت في الوقت
نجوى : شتت ؟ و نتا قاعد تعيط
جواد : أيي بصح ... المهم صاي هاذي نهدرو فيها مبعد و نتي وش درتي فيها
نجوى : أنا الحمد الله كسبت القضية
جواد : هيا بيا ... نعرفك شاطرة ... حقا على قداه تكملي ؟
نجوى : جواية 4 ... علاه ؟
جواد : اييه ملييح أني نجوز نديك .... عيطتلي مقبيل إناس و قاتلي بلي يما شوي مريضة
نجوى : أوو .. وش بيها ؟؟؟
جواد : طلعتلها لاطونسيون سوور .... تعرفي يما قلوقية
نجوى : ماعليه ماكانش مشكل لعشيا نروحو كيف كيف
كوبيت و رحت فطرت و كملت خدمتي و العشية كيما تفاهمنا جا جواد و رحنا لدارهم
جواد عندو زوج خاوتو إناس لي تقرا في الجامعة كلية طب عاقلة و ظريفة بصح شوي هازة روحها بصح ميش متكبرة كي شغل ثقيلة ( فهمتو ؟؟) و الطايش تاع دارهم سي مراد جون صغير و شباب و تاع صهرات و خرجات بصح مع صحابو ميش مع البنات ..في الصح راهو مطلع روح البنات بصح ماو راضي بحتى وحدة كامل نقولو بلي هذا الفصعون ماراهوش راح يتزوج خلاص ...
لحقنا للدار صونينا خرجت إيناس
إناس : تفضلو يما راهي في الصالون
نجوى : تعيشي ...... وش راكي خالتي صفية ( و انا نسلم عليها قعدت و كملت) كيفاه راكي حاسة روحك
صفية : والله يابنتي هاني كيما شايفتني ... الحمد الله و خلاص
راح نهدر جا جواد قعد قدام يماه و سلم على راسها
جواد : وش رااهي الشابة و الصغيرة تاعنا
صفية ( شافت فيه واحد الشوفة تاع باين بلي راك غير تبلعط فيا) : اييه أتمعكس .... بصحتك على آخر كبري يتمسخرو بيا ولادي
جواد : ههههه لالا والله مازلتي صغيرة في عيني
صفية : اممم .... ايي ارواح هنا ... نتوما لازم الواحد يمرض باه تزوروه آآه ؟؟
نجوى : خالتي علابالك الخدمة والله ماكان الوقت ... سمحيلنا
صفية : لوكان تحبسي الخدمة و دجيبو طفل تعمرو بيه داركم ماشي خير ؟؟
انا هنا بلعت ريقي و مالقيتش وش نقول
جواد : يما خلاص خلينا من هاذ السوجي ديما تجبدي عليه أصلا شوفي ....
نجوى (قاطعتو): خالتي ماعليه كل شي في وقتو حلو
شفت في جواد لقيتو منارفي شفت فيه تاع كالمي روحك شوي هك و تكالما وانا رحت عاونت إناس تعشينا و صهرنا و روحنا عادي
