قيود بين سلاسل الماضي
البارت السادس
ريتاج الموسوي
من دخلت لغرفتي لكيت الكنتور مكسور القفل مالته تخبلت
فتحته لكيت كتابي والرسمه مموجودات بهاي اللحظه حسيت اغلا شي عندي راح
جانت ماما استوها اجت
صرخت بصوت عااالي لأول مره ادافع عن حق من حقوقي....مامااااا الأغراض مالتي
ماكو وين منو لاعب بيها
مريم...ماادري اسألي اختج انه هسه اجيت
رحت ل ميس
...ميس اغراضي مالكيتها ماتدرين وين ومنو دخل لغرفتي
ميس...هاي سرى اخذتهن تكول حجيت لحماي كتله بت خالتي رسمها يخبل وعدها كتب حلوه
ويريد يشوف رسمج ويقرا كتبج وهيه قبل هالمره طلبتهن منج وانتي ماقبلتي
عاد هيه حلفت الا تاخذهن بدون علمج واني ساعدتها
...اي اي ساعدتها لا تفتحين عيونج عليه
عيب من خطيبي شتردينه يكول عليه ساعدتها
وانتي شدعوه عيني متقبلين تنطيها الها شكو شصار هيه ورقه حالها حال الأوراق الي ترسميها وتشككيها ومصيرها بالزبل والكتاب يقرا ويرجعه الج
افنان...هيه تحجي واني مصدومه معقوله اختي هيج اسوي بيه تصف وياها عليه شلون تاخذ شي
موملكها وتنطيه لغيرها
رغم اني رفضتها قبل من طلبت مني
استفزتني بكلامها وبدون وعيماحسيت الا ضربتها راشدي
وجانت اول مره اضربها واتجرء ع اختي الاكبر مني شفتها لزمت خدها مصدومه من السويته
عفتها ودرت وجهي لغرفتي اتفقد بالكنتور شنو ناقصني
لكيت الفلوس هم ماموجودات
صحت....يووووووم افلوسي بالكنتور وين
مريم...انه اخذتهن دزيت بيهن معجون احتاجيت
من يجي ابوج ارجعها الج
اني هنا فقدت شنو ياخذون شغلاتي بدون ميكلولي
شنو ياخذون كلشي يخص مشاعري
حسيت فعلا انو متقصدين
اتهسترت حسيت ماعندي بس الدموع هيه اسلاحي بقيت ابجي بدون وعي
لحدما عله صوتي بالبجي اجت امي وميس الي اكتفت بالمشاهده صاحت
....شعندج تبجين مره شكبرج شنو قحط هنه ٥٠٠ دينار من يجي ابوج انطيج ابدالهن١٠ مرات
واذا ع الرسمه التفتت على ميس... ولج ليش حماتج تاخذ الرسمه وماتمنعينها طايحت الحظ
ألف مره اختج كايله لا تتقربون لأوراق الرسم مالتها
والكتاب هسه تخابرينها
ترجعه ولا تسوينها بعد افتهمتي يامدمغه
ميس...اكلتوني بكشوري ماصار كتاب خبصتونه بيه ماادري شنو من كتاب
كومتو الدنيا وماكعدتوها
واني دكيت رجل الا هسه يرجع كتابي بس وين اليسمعني
لثاني يوم امي نطتني إبدال الفلوس الخذتهن واني ماكذبت خبر اخذتهن ورحت
ل ابو المحل الي اشترو منه معجون
...السلام عليكم
...وعليكم السلام تفضلي بنتي
...عمو امس اجو اهلي اشترو منك معجون ب ٥٠٠
ممكن ترجعلي الفلوس نفسها وانطيك هاي بدالها
...اي عمي من عيوني
بقه يدور ب ١٠ دقايق رجع كال...اسف مموجودات رايحات ويه الترجيع
رجعت للبيت واني كلي حزن على يأس ودموعي تصب
باوعت على بيتهم جان ماكو احد
دخلت لغرفتي طلعت كل الأوراق والملاحضات الي عندي واخذت عود شخاط وصعدت فوك السطح
شعلت بيهن النار
بقيت واكفه كبالهن اشوفهن شلون يحتركن جانت عوده وحده كفيله بحرق كل ذكرياتي الحلوه ومشاعري البريئه الي بداخلي
هنه يحتركن واني احس النار شابه بكلبي مو بلاوراق
جانت بوقتها شتا والدنيا باااارده وجانت عاصفه قويه بحيث النهار صار مثل الليل
ضلمه
واكفه وعيوني تصب واسمع صوت من وراي التفتت
جنان...اكو مثل يكول ثلاثه لايشعرون بالبرد
...العاشق...والطفل...والمجنون
شموكفج هناا ولج
لا انتي طفله ولا انتي مجنونه...اكيد عاشكه....
ماحجيت شي
ابتسمت ابتسامه خفيفه وشبكتها وابجي حيلل بصوت عالي حاوطت وجهي بكفوفها ....هااا ولج شبيج ليش تبجين
افنان...عمه امي وميس وبجيت....كالت...شبيهم ..سولفتلها ع السوو
اخذتني من ايدي ودخلتني للبيت
راحت على ميس....تعالي ولج اعتذري من افنان وبعد لتسويها
طبعا الموقف كان فاجعه لكلبي ومااعر ف السبب ليش هيج اتاثرت ليش هيج بجيت
وتالمت ليش حسيت انو حتى المشاعر الحلوه حرام أعيشها والصار تنبيه الي ليش
الصدفه حكمت يأخذون اعز كتاب عندي واعز ذكرى بيوم واحد ويكملوها بااعز رسمه
على كلبي جرحوني بدون قصد امي واختي بس سرى اذتني حيل ليش سوت هيج هواي اسأله ترددت
العقلي الي اعرفه انو اني أساسا ملازم اكن اي مشاعر لهذا الشخص رغم براءتها ورغم مابيها
اي شي محرج او محرم
لكن يبدو انو الله كتبلي عدم الراحه والعيش بسلام
امي شافتني حيل متأذيه خابرت على خالتي
الي جانت عد عيال بتها مو بعيده علينه
كاللها...لازم تخلين سرى ترجع الكتاب
لان عزيز على قلب افنان وهيه تبجي وكليلها مره ثانيه لتسوي هاي السوايه
...كالتلها للعصر اجيبه واجي
للعصر اجت سرى ركضت عليها بلهفه أريد اخذ اغراضي
نطتني بس الكتاب كتلها...وين الرسمه
كالت.حماي عجبته الرسمه واخذها واستحيت اكله رجعها
اخذت اختي ودخلت لغرفتها
عافتني واكفه بدون حته تعتذر مني ع السوته
واني ماحاجيتها حسيت باكو مشاعري
واشيائي المحببه لكلبي
بقيت بالصاله شويه وطلعت اختي اخذت التلفون الأرضي ودخلته لغرفتها وسدت الباب
صار عندي شك ليش دخلته للغرفه وقفلتها ليش مااتصلت هنا اذا اتريد
وره دقيقه طلعت ميس وبقت بس سرى بالغرفه
صار عندي شك اكثر
ليش طلعت ميس وبقت سرى يم التلفون اكيد اكو شي واني لازم اعرفه شنو
ركضت للديوانيه جان بيها تلفون ثاني رفعت السماعه شويه شويه والغايه انو اسمع ويه منو تحجي
سمعتها تحجي ويا واحد اول مره شكيت وبعدين
كلت حرام اضلمها يجوز مو الشي الي ابالي
بقيت اسمع فهمت انو هوه معلم للمدرسه كالت...لعد زوجتك وين
رد عليها...بالبيت
كالت...لعد شلون تحجي لا تسمعك يمعود
اطلع من البيت
كاللها...ختولي اني الوحدي بالاستقبال
مشتاقلج واريد اشوفج
سرى...لا وين تشوفني مااكدر اطلع زوجي مايقبل اني بالكوه اجيت لبيت خالتي
حته احجي وياك
...مو المكان تعالي للمدرسه
اني سمعتها هيج تحجي عقلي وكف شلون متزوجه وتخون زوجها
بعدها تحجي والصوت ضعف عرفت انو هيه شكت بأحد يتسمع عليها سديت السماعه ورجعت لغرفتي
محتاره وافكر شلون ترضاها نفسها تسوي هيج وهيه عدها بنيه
ألف سؤال وسؤال اجه ابالي بس ماكو اي اجابه لهيج وضع مخزي
مرت الايام بدون احداث
اتأجل عرس اختي ميس للصيف بحجة الضروف وانو بالصيف احسن
وفعلا اجه الصيف حددو موعد العرس
بيومها جنت كلش فرحانه هاي اول فرحه النه
لان اختي الجبيره رحنه وياها للصالون
جانت طالعه تخبل مثل الكمر هيه حلوه وخلت مكياج صارت اتجنن
ياهو الي يشوفها يوكف على حيله ويصلي على محمد
وزوجها هم جان حلو
الاجواء جانت دك وركص ونسه وفرحه متنوصف اني مداخله عرس قبل
لان ميخلونه نحضر اعراس عدهم البنيه ماتطلع الا البيت زوجها هيج جانت عاداتنه
اني بوقتها جنت لابسه كوستم ماروني مطعم بأسود الي هوه تنوره وستره ويصير جواها قميص ابو التعلاكه
جان موديله بذاك الوقت بس كلش حلو واني فرحانه بيه طالع عليه حلو
اجه العريس واجت وياه المعازيم والفرقه الجو انعلك علك بالموسيقى
دخل العريس حته ياخذ العروس ودخلو وياه بس عمامي وخوالي ممنوع يدخل احد غيرهم حته اخوانه مادخلو لان عدنه عيب يشوفون العروس وهيه بالبدله بدون عبايه
غطيناها بالحجاب الإسلامي وطلعت هيه وياه صعدوهم بالسياره
واني وخواتي منعونه منعا باتا انو نروح وياها لان حسب تقاليدهم ميصير
بس محمد وسيف اخذتهم امي
خواتي دخلن جوه واني اباوع عليها شلون صعدت بالسياره شلون نسوان عمامي صعدن هنه وبناتهن ابجي ادموعي تنزل غصب عني
صافنه فزيت من صفنتي على ايد انخلت على متني
التفتت شفته بابا كال...تبجين
هزيت براسي بمعنى اي
...تردين تروحين وياها ومحد خلاج تمشين
افنان..اي
امير...لا تبجين امسحي ادموعج راح اخليج تروحين وياهم بدون مايدرون عمامج
واصعدي بس لاتخلين احد يشوفج انتي صعدتي
كتله..اي
مشاني بصفه بدون ماحد يشوفني صعدت بالسياره ريم جبيره
وصاحت مرت عمي مازن
....هاي شنو شلون صعدتي منو سمحلج يلا انزلي
وجان سمعت صوت من وراي اتفاجئت لأول مره يدافع عني واحس الي ضهر وراي
امير.بنتر ..اتركي افنان تروح ولاتحجين اي شي يغثها مفهووووم
هزت راسها بالموافقه صعدتني بصفه
تحركت السياره واني اباوع شلون اخوانه يدكون ويركصون
سوو العرس يخبل واني اباوع فرحانه ومندمجه اصفك شعور الفرح هذا مجنت حاسه بيه ولا عايشته
دنكت مرت عمي وشاورتني
...لا تصفكين ولاتغنين وياهم انتي اخت العروس وعيب
ميصير هالشي غلط
انتبهت على نفسي وبقيت بس اباوعلهم
منا لليل وصلنه جانو مأجرين فندق ببغداد وبغداد موكلش بعيده علينه ساعتين وصلنه
لفندق شيراتون
قبل لاننزل بلحضات سمعت ولد يهوسون بآخر السياره وجانت الهوسه
يوم الألج يا افنان نذبح طلي بالبستان
جانت الهوسه عاليه كلش اتفاجئت منو ذوله ومنين يعرفوني
ردت التفت حته اشوف منو جرت ايدي مرت عمي
...عيب لا ادورين وجهج الهم انه اشوف منو
التفتت عليهم وشافتهم كالتلهم عيب سكتو ميصير هذا الحجي
ولا جنها وياهم بقو مستمرين واني شصار بيه استحيت كلش
نزلنا للفندق باوعت عليهم مااعرفهم وانقسمنه مجاميع اصغار اني صرت ويه مرت عمي وبنت عمي احلام
اني جنت صافنه بالصار هوه الموقف حلو وموحلو بنفس الوقت لان اسمي
بالهوسه
صعدو العرسان للغرفه ومرت عمي صعدت وياهم
اني واحلام بقينه كاعدين جوه
جان الجو حار بوقتها متنه عطش
ردنه نروح نشرب مي بس ممنوع علينه كبنات ممسوح النه نحجي وي الغريب ونطلب
افنان...متت عطش حلكي يبس اريد مي
احلام...واني مثلج بس شنسوي مانكدر نروح اكو ولد هناك واهلنه لو يشوفونه نطلب منهم يذبحونه
خلي ننتظر من تنزل امهاتنه نكللهن
افنان...واني شيصبرني مااتحمل
بعدنه نسولف واجت اخت العريس الثانيه اماني
اماني...مو جني سمعت تكولون عطشانين
احلام...اي والله بس محد موجود يجيبلنه
راحت لخوها وكالتله فعلا جاب مي للكل وببسي وموطه ام الكيس الي جنه نسميها قبل دوردمه
انتبهت ع الولد هوه نفسه
الي جان مسوي الهوسه بالسياره بقيت كاتمه ع السالفه بكلبي
احلام ....بضحك...افنان افتحيلي الموطه مااكدر افتحتها
ردت اخذها منها رفعت ايدها تتشاقه وياي جان الكيس مفتوح طارت الموطه بالهوا
بدون قصد على تشيرت الولد وانتلف
احلام....اني اسفه مجان قصدي بس جنت اشاقه ويا افنان
...لا عادي مصار شي
راح الولد حته يبدل ملابسه
افنان...شبيج خبله فشلتينه كدام الولد هسه شيكول ماشايفات موطه
احلام..خايبه اسكتي متت بدمي من الفشله ماادري بيه وراي جنت اشاقه وياج عود
ماادري بيها مفتوحه
جان موقف محرج ومن مقصود بنفس الوقت
بعدها اجت امي وكملنه كلنه رجعنه بالسيارات امي جانت بغير سياره
السايق بده ينزل كل شخص لبيته أو المنطقته اني ومرت عمي جنه اخر الناس صارت نص اليل وضلمه كلش السياره جبيره وضلمه متنشاف
فجئه وكفت السياره
حته ينزل آخر شخص شفت ايد صارت على كشن السياره ووكع شي بحضني
شلته حته اشوف شنو طلع مفاتيح وبيهن ميداليه
صحت ...منو وكع المفاتيح محد جاوب
المنو ذني..هم محد جاوبني ضميتهن
نزلنه لبيتنه من وصلت جانت امي واصله قبلنه طلعتهن جانن مفاتيح
وبيهن ميداليه كلش حلوه
جنت تعبانه من الطريق سبحت وبدلت عدلت افراشي واريد انام
سمعت صوت التلفون يدك لان قريب ع غرفتي
اسمع امي تكوله...اي عمه وصلت ويمكن نايمه
هسه اصيحها واشوفها نامت لو بعدها
مريم...افنان وين المفاتيح الي لكيتيهن
افنان...ارتبكت...يامفاتيح
...وج هذا ابن عم العريس ويكول انتي لاكيه مفاتيح واكعه منه
صفنت لحضه هوه الي شمرهن بحضني شنو وليش يكذب مااعرف
فزيت من صفنتي على صوت امي ...وين مخليتهن...كتلها بالكنتور
مريم...اي عمه موجودات تعال الصبح واخذهن
....عمه انطيني افنان بس اسألها عليهن هنه لو لا
مريم...هاج احجي بسرعه وسدي التلفون
اخذته منها وجاوبت
...الووو
...لتحجين بس اسمعيني ولاتجاوبين اي شي
يتبع....