قيود بين سلاسل الماضي(مكتمله)

البارت الخامس

قيود بين سلاسل الماضي
البارت الخامس
ريتاج الموسوي

مبارك عليكم الثبات على ولاية علي❤ عليه السلام
.......................................................

كعدت بابا
فز مرعوب من كتله عمي يكول خل يجي بسرعه نزل من السرير
بسرعه بدل ملابسه وراح ركض
رحنه وياه من دخلنه سمعناهم يصرخون
راسن اخذوها للمستشفى
وهناك اعلن الدكتور وفاتها بابا بوقتها جان حاله ماينوصف ضعيف كلش ولاكانو هذا الوحش الي تعودنه عليه يهجم علينه
بالضرب والقسوه بهذا اليوم بالذات حسيته ضعيف لا حول ولا قوه حسيته طفل صغير يبجي على امه
طول الطريق بالرجعه جان يصرخ ويضرب راسه بالستيرن مالت السياره
جانت كل كلمه ينطقها طالعه من كلبه
كلمة يمه ليش رحتي خليتيني مافاركت السانه
وخصوصا هيه طالبه تشوفه قبل لا تموت

اني حسيت بالوحده وباليتم الحقيقي اني مو بس فقدت بيبي فقدت امي الي ربتني
فقدت سعادتي وكلشي جانت تمثله الي جنت مصدومه بس دموعي تحجي بمكاني
جنت ماخذه مكان معزول عن النسوان مخليه راسي بين ركبي وابجي
وراها خلصت القرايه مالت الملايه
اجتني امي...افنان روحي للبيت جيبيبي ملابس ل محمد وتعالي
طلعت من الباب مدنكه وامسح بدموعي بكف ايدي
حسيت اكو احد كدامي
رفعت راسي شفته حسام راسن دنكت راسي
جان هذا اول لقاء بينه عين بعين
ماادري شحسيت بوكتها مشاعر متضاربه بين الحزن وبين الحنين
حسيت كلبي يريد يطلع من الدك ويعلن استسلامه
يمكن لان عشت ايام الطفوله والحرمان

وممجربه هاي الأمور وماعرف شلون وشنو تعني
بس الي اعرف انو لو صار كبالي أو مجرد لمحه بالمنطقه تنتابني عدة مشاعر
واولها الخوف لان عدنه البنت اهم شي محد ياخذ عنها نضره موحلوه
والتقيد بلعرف والتربيه
كل هاي الأشياء تنرسم ببالي بلحضه وحده وتصير حرام ولاتتجاوزين حدودج
حته وان كان مجرد احساس حته الإحساس جنه نخاف منه ولازم مانشعر بيه لأن عائلتنه كلش محافضه
وتخضع لقوانين صارمه لازم كل بنت تمشي عليها

لحضتها انتبهت وصحيت من مشاعري
خطيت اول خطوه واني اكمل طريقي
سمعت صوته وهوه يكول...البقيه بحياتج
جانت اول مره تتواجه بيها نضراتنه واول كلام بينه

بوقتها من الخوف والخجل ماكدرت حته ارد
كملت طريقي واني ساكته
مشاعري متضاربه الشي الوحيد الي اعرفه انو ارتاح لرؤيه هذا الشخص
رغم الفوارق البينه انو حالتهم الماديه جانت شبه العدم

عدت الايام وراحت وبابا اكله الندم جان دائما ضايج جان عندي امل انو يتغير

بس مع مرور الأيام اثبتلي العكس
وانو ابو طبع مستحيل يغير طبعه
بابا صار ازيد من قبل بضلمه وجبروته وسكره ولعبه ووناسته صارت علينه
بحيث حته الجيران يسمعون صوته من يسكر لان يصيح ويخربط بالكلام
بوقتها جنت اريد انام مااكدر واني اسمع صوت ضحكهم العالي وهمه سكارى بالبيت

جانت اصعب ليالي تمر عليه واقساها واني اتمنه الصبح يصبح بسرعه لان خايفه وسجينتي جوه مخدتي
لان سكارى واخاف يعتدون علينه اقلها عندي وسيله
ادافع بيها عن نفسي

جنت انام والدمعه بطرف عيني مقهوره جانت ليالي حزينه وتخوف بالنسبه الي
اما امي فشنو جانت مشاعرها وبشنو تحس ماجنت اعرف لأن مااكدر افهمها
وقت سهره يبلش من ٩ بليل لحد ٣ الفجر وامي طول هذا الوقت واكفه على حيلها بالمطبخ
خاف يصيحها ومتسمعه وصلت بيه القسوه والحديث انو ميصيح بلاسم
لا يصفك مرتين واذا بالثالثه مااجت تكون ليله سوده علينه يتكطع بيه جسمنه وجسمها

ف بيوم من الايام بابا ضربنه بدون سبب امي بس تبجي وماتكدر تكله حته ليش
وراها طلع من البيت

امي جانت تبجي ووجها صاير ازرك من الضرب
تعرج ماتكدر تمشي
تصيح راح انتحر راح اروح للشط واشمر نفسي واخلص من هالحياة والقهر العايشته
لشوكت إنه اضل هيج لاميته ولا عدله
النسوان المثلي ارتاحت وانه بالضيم مااكدر احجي ولااتنفس الا بأمره
خواتي يبجن حاولن يمنعنها ماكدرن
ركضت لعباتي لبستها ورحت لبيت عمي لكيته بالشارع كتله عمي ام راح تنتحر
خطيه اجه يركض لحكنه عليها بنص الشارع

مازن...عفو عليج ام سيف هاي سوايه تسوينها انتي الجبيره العاقله
تردين تنتحرين
مريم تبجي...خويه مليت من حياتي اريد اموت واخلص لاليلي ليل ولا نهاري نهار

...انه ماراح اجيج من جهة الدين
واكلج حرام هاي سالفه الوحدها
بس تعوفين بناتج نسوان الوحدهن مافكرتي شنو مصيرهن من تنتحرين وشنو تحجي عليج وعليهن العالم

بهذا الحجي كدر يقنعها ويغير رأيها وترجع للبيت


مرت على وفاة بيبي ٦ اشهر بليلتها نزلت من السطح اريد اشرب مي لانو قبل أكثر الاوقات اننام بالسطح
جانو امي وابوي ماكو مريت ع الغرفه واسمع امي تصالح وتراضي ابويه بحياتي محسيت بالم مثل هذا
يمكن لان ماعرف شعور المزوجات
أو شنو نوع علاقتهم بس كل الي افتهمته انو هيه دتذل نفسها اله
وشلون نطاها كلبها تصالحه وهوه قبل ساعات جان يضربنه ومعذبنه
رجعت لفراشي واني كلي الم وحسره واتسائل ليش وليش الى ان لكيت نفسي نايمه

صبح الصبح مثل كل يوم يوم عادي مايخلو من الضرب والتعذيب
للعصر اندك باب بيتنه طبعا الوضع جان اشبه بغابه
اني وامي وخواتي مجردين من اي حقوق
وبابا جان هوه الاسد الي مسيطر وحاكم هالغابه

فتحت الباب شفتهم نسوان غرب
...مساء الخير
...هلا مساء النور
....امج هنا
...اي هنا تفضلو
دخلتهن للديوانيه ورحت صحت امي...ماما نسوان بالديوانيه يردونج
...منو النسوان معرفتيهن
...لا معرفتهن لان مشايفتهن قبل
عافتني امي ودخلت للديوانيه واني رحت يم البنات الي لزموني تحقيق منو و شنو وجان جوابي
..ماعرفهن
كعدو تقريبا ربع ساعه وطلعن مافهمنه على شنو جايات
رحت أسأل امي
...ماما منو ذوله وشعدهن جايات
مريم...ماعليج بيهن سالفه مو يمج البسي عباتج وروحي لبيت عمج مازن صيحيلي مرت عمج وداد بسرعه موتتاخرين

افنان..اي بس غير اعرف ليش تره اني هسه مثل الأطرش بالزفه
مريم...سوي الكتلج عليه ولاتدخلين فاهمه
عافتني وراحت لبست عباتي وطلعت من الباب باوعت على بيت حسام
بس ماكو ماشفته جنت اتمنه لو المحه من بعيد

رحت وجبت وداد وياي اخذتها امي وفاتت للديوانيه
وره شويه هم طلعت
بعد ساعتين اجه عمي مازن وجان الدنيا المغرب
بابا استوه جاي
مازن...ابوكم هناا
...اي عمي هنا تفضل
...لا صيحي اريد احجي وياه
رحنه لبابا وكناله اجه وهم دخلو وبقو يسولفون

افنان..ولجن اني طكت روحي راح اموت كلساعه واحد جاي مدري شعدهم اموت واعرف ذني النسوان شعدهن

الاء...اروح اسمعلجن بالباب
افنان..اكعدي وسكتي انتي فاهيه تفضحينه وابوي يموتننه
اني اروح واجيبلجن الاخبار
رحت يم الباب يحجون شويه شويه مافهمت شي الي عرفته انو جايين خطابه على ميس وامي ماتكدر تحاجي بابا لانو مالها اي كلمه يمه

لثاني يوم دك التلفون شالته امي
طلعت خالتي الجبيره سهام
...الو هلا مريم شلونج
مريم...هلا سهام الحمدالله انه زينه انتم شلونكم جهالج شلونهم إن شاء الله بخير
..بخير دامج بخير
مريم....وين ماادكون لاتسئلون على اختكم تكولون نشوفها عدله ميته
سهام...يخيه الدنيا مشاغل والله دوم أعلى بالي بس أنتي تعرفين انتم مو يمنه هنا هنيه واجي اعليكم أسأل الناس معارفنه اليمكم من يجون يكولون عايشه بخيرات الله
مريم..بحسره... اي الحمد لله
سهام ...يووو اخذتيني بالحجي ونسيت الي مخابره عليه
....امري ادللي
... مايدلل عليج ضالم عساج سالمه سمعت ب ميس جاينها خطابه صدك
...اي صدك منين عرفتي
...الناس الجاينكم يصيرون كرايب مرت حماي
هسه مو هذا موضوعنه اريد اكلج تره احنه اولى من الغريب وابني علاء مايتعيب
والف وحده تتمناه وانه كلت بنيت اختي لبني احسن من الغريبه عاد نعرفها ونعرف اخلاقها

مريم..والله يخيه ماادري شكلج
انه ماالي كلمه بالبيت الشور والراي بيد امير
سهام....اذا ردت السالفه لأمير يعني اغسل ايدي بسبع شطوط
نسيتي الزعل الي بينه وبين رجلي اعلى الفلوس

....انه هم ودي بنيتي عد اخيتي
انه اكلج حاجي عمامها وهمه يضغطون عليه الهم تأثير جبير وهوه يسمع حجيهم
...يالله الله يكتب البيه الخير ان شاء لله مع السلامه
............................... .
وره اسبوع اجت خالتي لعمامي وحاجتهم انو همه اولى من الغريب
استغربت من خالتي وجيتها احنه علاقتنه مكطوعه بيها من زمان وحته ناسينها لان ابد ماتتواصل ويانه لان اكو مشكله بين بابا وبين رجلها من زمان
قبل لنصير احنه للدنيا

وفعلا عمامي اثرو على بابا وقبل ينطيهم ميس
تمت الخطوبه بسرعه بسرعه
امي اخذت مرت عمي وداد وراحت للسوك حته تشتري شكم شغله


سديت الباب وراهن ورجع اندك
كلت..منو
...أفنان انه حيدر فتحي الباب
افنان...هاا حيدر شعندك مااكدر افتح الباب محد ويانه بس احنه
حيدر...زين بس صيحيلي ميس احجي وياها بالباب واروح
رحت واني مستغربه شيريد وليش ميس مااعرف لكيتها بالمطبخ تكلي كباب
افنان...ميس
ميس...هااا.
...حيدر بالباب يريدج
ميس...يريدني ليش؟
...علمي علمج روحيله وخلي نشوف شعنده
راحت واني وراها ...هلا بيك حيدر شلونك
حيدر...هلا الحمدالله تمام انتي شلونج
...بخير افنان تكول تريد تحاجيني خير

حيدر ...ميس انه احبج واريدج مره الي
أرفضي ابن خالتج وانه اخطبج والله احطلج بيت الوحدج
وسياره خاصه بس الج واشتريلج احلا ذهب والمهر الي اطلبينه انتي اعيشج بجنه بس قبلي بيه

ميس...حيدر اني مااشوفك الا اخ الي ومستحيل اقبل بيك لو تصبني ذهب
حيدر...بس انه احبج
ميس...حيدر كافي لا تحاول كتلك مااقبل بيك واني هسه مخطوبه وبعد شكم يوم راح اعقد فلا تحاول
وبعدين وكفتك بالباب غلط واحنه بنات
لو سمحت روح منا

حيدر.بحسره..ماشي انه صدك هويتج وردتج تصيرين مريتي بس المايريدك خير شر لاتريده
اودعناكم

بوكتها كسر خاطري حيدر صدك يحب ميس
بس هيه رفضته حقها حياتها وتريد تعيشها ويه الشخص الي هيه تريده

ملجو وعقدو
سوينالها حفله
اختي ميس
طلعن تخبل هيه حلووه كلش
طبعا تمت الخطوبه بعاداتها انو لازم الخطيب ميكعد يم خطيبته ولا يكثر الجيات للبيت
هاي الشغلات ممنوعه عدنه منعا باتا

جنت كلش فرحانه لختي ميس واخيرا اكو وحده راح تطلع من
البيت وتتخلص من العذاب والحكيم
الي احنه عايشين بيه

حددو موعد الزواج يوم الخميس

جان يوم الثلاثاء
جانت بت خالتي شهد اخت علاء موجوده عدنه
تجي اسلم على ميس وتكعد وياها بالغرفه ويحجن
شنو ماعرف لانو ممهتمه يجوز
تريد تشوفها الملابس والاغراص الي اشترتهن

دخلت لغرفتي اختار ملابس اروح بيهن للعرس
جان عندي كنتور بيه خانه مخصصه ضامه بيها شغلاتي المهمه
باوعت جان نفس الكتاب(جامع السعادات)
الي بوكتها ع كد ماحبيته طلبته مرتين وكتبلي اذا تردينه اخذيه عندي نسخه غيره
فرحت كلش واحتفضت بيه
وبعد الورقه الي من ضمن الاوراق الي يكتبيلي بيها ملاحضات
جان كاتب ببدايتها(يا أءيتها العزيزه) ومكمل كلامه هاي الكلمه الي خلتني اقراها ١٠٠ مره
شعور جدا غريب ومخيف ومرعب بالنسبه الوحده مثلي

هاي الكلمه خلتني احس انو عنده نفس المشاعر الي عندي تجاهه حاولت هوااي اكتب بس ارجع وامزق كتاباتي
حاليا جان غايب لسبب مجهول صارله شهرين ونص مموجود
مااكدر أسأل عنه وين وعن سبب اختفاءه لان العرف والتربيه يمنعني من السؤال

والشي الثالث جانت عندي لوحه رسمتها واحتفضت بيها من بين كل رسوماتي
جانت رسمه لبنت مقتوله بخنجر بصدرها
ونايمه على صدر حبيبها
جانت من اعز اللوحات عندي راسمتها ببراعه واتقان

اجت الاء
الاء...افنان عمتي جنان تريدج
اوك هسه اروح الها
نزلت هيه واني قفلت الكنتور وضميت المفتاح نزلت
سلمت عليها
جنان...عمه هاي وحده اعرفها جايبه واريد اكضي واجب محد تروح وياي
تعالي انتي عيب اروح الوحدي

افنان..اي عمه اروح بس امي مو هنا
جنان...واذا عود من تجي البنات يكلولها اخذتج وياي ماتكول شي
يالله بسرعه تأخرنه
...ماشي بس ابدل واجي
بدلت ولبست عباتي شافتني وكامت طلعنه ورحنه للمره
اخذنه نص ساعه عدها واجينه
بس وصلتني وراحت لبيتها
...هاا الاء امي بعدها مااجت احجي وانزع بعباتي
...لا بعدها
عفتها ورحت لغرفتي اول مافتحت الباب
تفاجئت جان الكنتور مكسور القفل مالته
باوعت لكيت اغراضي ماكو
اللوحه ماموجوده والكتاب هم ماموجود

يتبع....