خفايا القدر

بارت ..خامس
انين الرووح

الكل كان نايم ويمكن من طلعه جراح هو وابوه بليل الحد هسه مراجعين لان الاعرفه ابوه يكعد يصلي الفجر هو والحجيه بس اليوم ماكو البيت في حاله سبات
ماتريكنه اخذنه ويانه فاكهه وكم كرصه خبز صارت الساعه خمسه طلعنه
بس ابو علاء كال خلي اسلم ع اخوي ابو جراح
.
اني الزمت كلبي كلت راح هم يجلبون
راح ورجع كال ماكو احد يمكن طالع لجامع رايح
بس فات عالجده يعني امه سلم عليها وباسها ولده وبناته كذلك حتى اني وامي واخويه فتنه سلمنه وطلعنه
.ارتاحيت صعدنه السياره كلنه ونطلقنه لان احنه باليل ودعنه الكل
وكنالهم طلعتنه لازم غباشي حتى نوصل من وكت اشويه
لان منعرف وضع بغداد شلون وهم رخصولنه بالطلعه ونطلقنه
وبالطريق اني غفيت اخذتني النومه ع كتف امي محسيت اله الساعه ١١ الصبح .
ها احنه وين
.بعدنه بالبصره
حيل كل هالمشي وبعدنه
اي راح نطلع منها بس بعد ١٠٠ متر .

طلعنه واني ما شفت جراح ولا هو شافني وماعرفت شنو راد يكلي ولا اريد اعرف

جراح.ارجعت للبيت ساعه ٩ راسي مدمر وجع فضيع ع دوخه
اول ما دخلت شفت زينب
.هاو لج وينهم
.والله ياخوي طالعين وماشفتهم
اشوكت طلعوا
.اني صحيت الساعه ٦ حتى اخبز مالكيتهم الكل ماشي
.ليش ماصحيتي قبلهم

.والله ياخوي من التعب ماحسيت عليهم وعيونك

.يعني رهف ما اهتمت الطلبي وراحت

.عساج روحه بلا رده خلها تولي همزين راحت وماحجيت وياها اني لجان تندمت زين ما ظلت

زنوبه راح انام لحد يصحيني لان حيل تعبان ونعسان
.صار خويه ...خطيه عصر كلبي جراح اول مره احسه مهتم الكلبه واكو الي حرك مشاعره .جان دائما يكول انه مو ابو حب وعواطف ما اصلحلها والله كيفت من شفته مهتم الرهف

جراح رحت ادخلت الغرفتي تمددت ع فراشي غمضت عيني اريد ارتاح عكب امس الصار وي صاحب وشريك ابوي

.خطيه ابنه اتصوب وحالته جانت خطره حيل واحتاج دم مستشفيات ماكو ابسبب الحرب والوضعيه الكسيفه الصارت بالعراق كمنه جبنه دكتور ع احسابنه وعالجه ونقله دم مني لان طلع دمه مطابق الدمي نفس الزمره الحمدلله وما فضت عمليته للساعه ٦ الصبح
وضعه جدا حرج وبعد ما اطمأنيت ع حالته ارجعت
وكل ضني اشوف رهف منتظرتني لكن انصدمت من اسمعت طالعين حتى من غير ماينطون خبر الاحد ولا مكعدين احد بالبيت عبالك بايكيلهم فد بوكه كرهت موقفهم هذا وانتي يارهف عسبالي انتي غير طلعتي مثلهم مايهمج غير مصلحتج وبس

ﺍﺻﻌﺐ ﻣﻮﻗﻒ ﺑﻠﺤﻈﺎﺕ ﺍﻟﻮﺩﺍﻉ
ﻣﻦ ‏ﺗﺸﻮﻑ ﺍﻟﭽﻨﺖ ﺗﺒﻨﻲ ﺗﻬﺪﻡ
ﻭﻣﻦ ﺗﻘﻮﻱ ﮔﻠﺒﻚ ﻭﺍﻧﺖ ﻣﺠﺮﻭح
‏ﻣﺎﻣﻬﺘﻢ ﺗﺒﻴﻦ...‏ﻭﺍﻧﺖ ﻣﻬﺘﻢ !
ﻭﻣﻦ ﺗﺒﺘﺴﻢ ﺑﺲ ﺑﺪﺍﺧﻠﻚ ‏ﻧﻮﺡ
‏ﺍﻟﺪﻣﻮﻉ ﺍﺑﺎﺏ ﻋﻴﻨﻚ ﺳﻜﺘﻪ ﺗﻠﺘﻢ
ﺗﻀﻄﺮ ﺗﻤﺸﻲ ﻟﻜﻦ ﻭﺍﻧﺖ ‏ﻣﻜﺴﻮﺭ
ﻋﺰﺕ ﻧﻔﺴﻚ ﺗﺒﺮﺭﻟﻚ ﺃﻟﻬﻢ
ﻭﺭﺍﻫﺎ ﺗﻌﻴﺶ ﻟﻜﻦ ﮔﻠﺒﻚ ﻳﻤﻮﺕ
ﻭﺍﺣﺴﺎﺳﻚ ‏ﺍﻟﻄﻴﺐ ﻳﺒﺪﻱ ﻳﻔﻬﻢ ؟؟
ﻭﻣﺎﺗﺤﻠﻢ ﺑﻌﺪ ﺑﺎﻟﻌﻨﻚ ‏ﻳﺮﻭﺡ
ﻭﻣﺎﻣﺴﻤﻮﺣﻠﻚ ﻳﻮﻣﻴﻪ ‏ﺗﻨﺪﻡ
‏ﻛﻞ ﺟﺮﻭﺣﻨﺎ ﻭﻛﻞ ‏ﺍﻟﻤﻌﺎﻧﺎﺓ
ﻣﻦ ﻣﺎﻭﺭﻯ ‏ﺍﻟﻨﺎﺱ ﺍﻟﺒﻴﻬﻪ ﻧﺤﻠﻢ !!

اووووو هسه شكو اني شاغل فكري بيها هي وحده وكحه وماتسمع كلام وعنيده ماترهملي هيج وحده انه
غفيت وتركت موضوعها بعد

.رهف بعد مرور عشر ساعات بالطريق واخيرا وصلنه حدود بغداد
بس صدك تخوف مدينه اشباح ماكو ناس بالشارع ولا محلات فاتحه ولا شي يدل ع استمراريه الحياه

.اجالي شعور بالخوف في لحظه اتمنيت ارجع للبصره
عالاقل اكو ناس اكو حركه بس هسه لا
مدينه جامده اليشوفها يتخيل الاشياء اكباله مجرد رسم مو حقيقه
.
ابو علاء الحمدلله ع سلامه الجميع
.الكل ربي يسلمك

.رهف عمو ليش تمشي بطيئ

.ابو علاء والله ياعمو اكو سيارات عسكريه اكبالي ردت اعدي منهم بس اشرولي امشي ابهدوء وتعرفين الاحتلال معنا نسمع ونفذ مناقش

.صح عمو قاريه عن الاحتلال
.رشا بس شوفو المكان خالي من الناس والحركه

.رهف صح اني هم حسيت عبالك مدينه مهجوره

.احمد لكم شوفوا هاي البنايه شلون واكعه كلها ومحروكه المنظر يرعب

.وتقريبا ساعه ٧ العصر دخلنه بغداد
وتوجهنه لبيوتنه بالدوره
بس ما احجيلكم كثره الخوف من المكان
الناس كلها في حاله صدمه ميعرفون يصدكون او يكذبون خبر سقوط النظام

والساعه ٧ونص وصلنه لبيوتنه البيوت بيها اثار رمي عالحيطان بس ماكو ولا بيت متهدم همه جانوا متقصدين فقط اسقاط النظام ماعليهم من الناس
وكفت السياره
نزلنه بيتنه وبيت ابو علاء لزك حايط ع حايط
الدنيا صارت اغروب وحاك الظلام المنطقه ومنعرف ناسها رجعت او لا
لان كتلكم ماكو طير بالشارع
فتنه للبيت والخوف مسيطر علينه
كهرباء ماكو مكطوعه
اني كمت ابجي لان خايفه حيل كتلها الامي خلي نروح البيت ام علاء نبقه يمهم بس هاليله والباجر نرجع للبيت
امي بالبدايه رفضت بس اني الحيت عليها اهواي وبالتواسيل قبلت طلعنه الظلام حل
دكينه الباب

.ام علاء منو
.اني عيوني ام احمد

.هله فتحت الباب عيوني ام علاء البيت ظلام هندس ماينشاف شي والجهال يخافون كلت بس هاليله نبقه وياكم والصبح ارتب وضعيه البيت

.اي عيوني تعالي دخلي ام احمد اني هم فكرت بيكم قبل لا تجين كلت شلون راح تنامون بالظلمه
والحمدلله انتي جيتي  دخلنه جانوا مشغلين شمعه بسيطه
ابو علاء هااا خوما بيتكم بي شي

.لاوالله ياخوي بس تعرف ظلمه وحشه والجهال خافوا كلنه بس اليله والصباح رباح

هله بيكم خيتي ام احمد البيت بيتج واحنه اهل

تسلم ابو علاء دايم البيتك والعايلتك

.هله بيكم اختي احنه اهل مو جوره
.تسلم ابوعلاء والله ماقصرتوا ابد ويانه

.رهف رحت ويه البنات امهم طبخت شوربه عدس اكلناها ومن التعب تمددنه عالزوليه الي بالهول وتغطينه ونمنه سوه كلنه عدا الولد وابوهم راحو بغرفه ثانيه

.فزيت يمكن نص الليل ماتنشاف الساعه لان ظلام دامس حتى الشمعه خلصانه وطافيه من
حالها
ردت ارجع انام بس اخذني التفكير بجراح وبحياتهم شلون جنه عايشين يمهم وشلون جنت اضحك وشاقه ويه ايوب وشلون جنت ما اتحمل شوفه جراح ولا حتى احب اسمع صوته وجنت دائما اتهرب منه ما اخلي يشوفني علمود ليظل يعيط بوجهي
اخذت فتره طويله بس اذكر امور مرت بيه خلال هالايام العشتها اهناك
شفت من البرده بده لون الفجر يطلع ردت اكوم اصلي بس البيت اظلم واخاف اتحرك استغفرت ربي ورجعت نمت
الكل كعد تقريب ساعه ١٠ الصبح لمينه المكان اني والبنات ورحنه للمطبخ جان البيت فارغ مابي ولا لكمه اكل لان متروك صار اسبوعين كعدت بالكاع مفروشه كانت
وذكرت بيت جراح من يكعدون الصبح ساعه ٨ وريحه الريوك الحلوه هي الي اجوعك اكثر
بعد اشتهيت ارجع اكل يمهم وشرب الحليب رغم ما احبه واكل البيض والجبن والخبز الحار
جانت زينب كل يوم الصبح تخبز لازم ياكلون خبز حار .

مها وين صافنه رهف .
هههه اذكرت شلون عشنه ابيت جدج وشلون جانت حياتهم

.مها اني ماحب حياتهم ابد اشوفها صعبه حيل لازم المره عدهم تكعد من الغبشه تخبز وتنظف وتطبخ وما ترتاح لليل من عده الخطار ناس رايحه وناس جايه
اني ماحب الدوخه والهوسه وتربيه الهوايج والدجاج ويع تلعب نفسي حتى من ريحتهم

.رهف هاي حياتهم هم متعلمين ع هاي العيشه

مها .اي بس بالنسبه النه نشوفها صعبه

رهف. بس همه يشوفوها حيل سهله وبسيطه لان متعلمين

.اجه ابو علاء جايب صمون وبيض وجبن
اصدكون ماكو ولا محل فاتح مدري شلون هذا ابو الصمون مفتح
اليشوف بغداد يكول عنها مهجوره

سوينه ريوك وتريكنه كمت ويه البنات ارتب

.ام رهف... يله عيوني احنه نترخص منكم وجزاكم الله الف خير والله وكفتكم هاي ماتنسي طول العمر
وانت ابو علاء اخ عزيز ودره من الله انت والاهل الطيبين والله ماكو احد حرجنه عبالك بيتنه مو بيتهم

خيتي .انتي اختي والجره عليج هم يجري عليه تسلم ابو علاء والله ما قصرتوا ابد
عيونج السالمه ام احمد

بس ابقي يمنه شعندج راجعه للبيت
.
لا والله هم يله الحك اشتري مسواك وكهربائيات وهم اجيب شموع خاف هم ماكو كهرباء
.ام علاء .حبيبتي اذا حسيتوا بشي لا تترددين كبل قفلي البيت وتعالي يمنه

.ان شالله خير وماكو شي الله حامينه خيتي ام علاء
اي والله ...الله حامينه الحمدلله والشكر الف مره
يله عيوني مع السلامه

.طلعنه من بيت ام علاء ودخلنه بيتنه التراب العليه مال سنه تكولون
فتنه جوه نفسه بس كله تراب امي كالت قبل لا انظف خلي نروح لسوك نشتري شغلات للبيت

.طلعنه اني وياها واحمد تمشينه لسوك قريب علينه بس موكلهم مفتحين اكو هواي معزلين محلاتهم
اخذنه شغلات للبيت وشموع ولاله وسوكنه مسواك ثلاجه ومنظفات وخبز ورجعنه

.بلشنه انظف البيت ثلاثتنه كلمن لزم مكان وبعدها امي راحت تطبخ
.
اذكرت الارضي مالنه شلت السماعه ماكو صوت ابد
ماما التلفون مابي صوت جان خابرنه ع رفيف نعرف اخبارها
.الام اي بعد الغده نروح للمحل ونتصل بيها من عنده
.اي ماما والله بالي يمها خطيه وين حل بيها الدهر هسه
.احمد يوم يوم تعاي شوفي الجهال تركض وره الامريكان ممصدكين

.اي طبعا عبالهم مخلوقات غريبه
.ماما ينطون حلويات للاطفال

.اي لازم حتى يحببون نفسهم
.
كملت ماما التنظيف بس الملابس ما اكدر اغسلهم بيدي
.عوفيهم من تجي الكهرباء عود نشغل الغساله .
شفت الساعه ٣ الظهر

.ماما متت جوع
.اي تعالوا صبيت

.اكلنه ورتاحينه صارت بالاربعه طلعنه اني وامي للمحل القريب نتصل برفيف نشوف اخبارها
.دخلنه للاسواق مرحبه سعد
.
هله خاله شلونكم الحمدلله ع سلامتكم
.بخير الله يسلمك وانتوا شلونكم
.الحمدلله
.اي اتفضلي خاله
.اريد اتصل
.وين اكو بعد اتصال
.ليش
.مو الامريكان ضربوا بداله الاتصالات ونكطعت كل الاتصالات حتى كهرباء ماكو صار اسبوع مكطوعه عود راح يجون عمال ويصلحوها
عود اليوم كالوا
.صدك كذب زين اذا انريد نتصل باحد شلون راح نعرف اخباره
الله اعلم خاله بس هسه ماكو ابد اتصال ارضي الله كريم اوليدي لعد احنه نترخص
.مرخوصه خاله

.ماما لعد شلون هسه راح نعرف اخبار رفيف
.الله كريم بنتي يمكن هي تجي علينه ونشوفها او احنه نروحلها

.زين ماما هي ام نسيبنه موصديقتج بالمدرسه اسئليها

.اي اكيد بس خل نداوم وسألها
.
رجعنه علكنه شموع لان بده الظلام
.شوفي رهف الباجر اني اروح للمدرسه اشوف شكو ماكو وارجع انتي واحمد لتطلعون ابد

.اي ماما تعشينه حضرت امي ملابسها ونجمعنه بالغرفه مالتها وعالجربايه نمنه حسيت ساعه ٧ شفت امي تبدل
.ها ماما حتروحين

.اي ماماتي ما اوصيج لتفتحين الباب ولا تطلعون ابد خاف كلشي يصير امريكان او شي حسيتوا بالخوف انتي واخوج كبل قفلي و روحي ابيت ام علاء
اي ماما

.صارت ونص طلعت امي  ارجعت اني قفلت وراها ورجعت للفراش حضنت احمد ونمت حسيت ساعه ٩ الباب اندك قوي
فزيت مرعوبه صحيت احمد

.احمد كوم هاي بابنه تندك قوي .
كمنه اثنينه رحنه عالمطبخ
اوكف خل اطلع سجين
ليش تاخذين سجين
خاف كلشي يصير يمكن احد يريد يبوكنه
شفت من شباك المطبخ هذا راس امي

احمد هاي امي طلعنه ركض فتحنه الباب
ها ماما شو رجعتي

.ماكو دوام محد جاي العالم اتخاف ادز جهالها للمدارس والشارع فارغ يخوف

.لعد شلون ماما اني لازم اداوم

انتي متفهمين .مو كتلج ماكو دوام مو وكتج رهف خلي الوضع يهدء وبعدين عود فكري بالدوام
واستمر الامر اسبوع ماكو دوام
ناس تكول صدام نلزم وناس تكول هسه يرجع للحكم ويعدم الجميع بعدها الناس متخوفه ومحد مصدك .

بده عدد الامريكان يزداد بالاخص تواجدهم بالمصفه صاروا اهواي

مر شهرين ع رجعتنه البيتنه مدارس دوام قليل اكثرهم تركوا من الخوف واني امي مقبلت ارجع اداوم تكول الوضع ميساعد اختي منعرف شي عنها
لان الطرق الخارجيه سيطر عليها الامريكان اتوقفت كل وسائل التواصل من اتصال وسيارات نقل صرنه عايشين مجرد عداد يمشي من عمرنه
اني مليت اريد ارجع للمدرسه جنت صف رابع عام امي كالت دوام ماكو اقري بالبيت وفعلا بديت اقره بالبيت فقط ما اطلع ابد النوب الوضع اتأزم اكثر البنات كامت متطلع من البيوت اله ابحجاب ولبس عريض لان الامريكان صاروا يباعون علينه عيونهم صارت نكسه
المعلمه صديقه امي منعرف عنها شي من يوم السقوط
بس سمعنه كالوا مشت الخانقين يم ابنها الي هو زوج اختي
تحددت امتحانات اخير السنه بالشهر السادس
امي كملتلي كل اوراقي وباجر اول يوم امتحان
امي تروح ويايه وترجع ويايه
كملت الامتحانات بشلعان الكلب بس جانت حيل سهله الدروس لان فكرو في وضع الطلاب
اكثرهم مجانوا يكدرون يداومون مدرستي اني مكانها جان بعيد يعني اله سياره ف جنت اروح اني وامي ويه بيت ام علاء ابسيارتهم
جان ياخذنه حسين او حسن وهم يرجعونه همه
.والحمدلله نجحنه اني والبنات اني جنت مقرره ادخل علمي حتى احقق حلمي اكون دكتوره  تحاليل مختبريه بس رشا كالت تدخل معهد

وبهاي الفتره كلها نكطعت اخبار بيت ابو جراح منعرف عنهم شي لان الطرق كلها انكطعت
محد يطلع من محافظته ابد
عشنه حياتنه عاديه تحسنت الرواتب امي مكامت تخيط بعد رجعت الكهرباء بس خطوط الاتصال الارضي ما رجع ابد اجه موعد الدوام خلونه نداوم في منتصف شهر ٩
عكب ما جان في بدايته امي كالت راح اخليلج خط ياخذج ويجيبج
بديت اداوم بعد توسل مني الامي كوه قنعت
مشت الايام بالدوام وعادي
بس بدت حالات قتل وعصابات وصحوات كمنه نسمع بالاغتيالات من باب البيت وخطف بنات وتعذيب شباب
ع دوامي شهرين بنص شهر ١١ الجو جان ممطر زخ مو طبيعي عبالك مطر مال شهر الواحد السيارات كوه تمشي صار ازدحام بالشارع فوق الخيال اني خلص دوامي ساعه وحده الظهر
ولازم اني بالوحده ونص بالبيت
ابسبب الفيضان مال الامطار وزدحامات السير للساعه ٣ الظهر واني بالخط ماواصله للبيت

ضل بالي ع امي هسه عبالها اني انخطفت
ياربي يسر ولا تعسر
وظليت ادعي الطريق كله
وصلت الساعه اربعه للمنطقه اشوف اكبال بيتنه لمه فز كلبي بس لا صاير شي الامي

.نزلت اركض دخلت شفت امي كاعده بالطرمه وتلطم وتبجي ويمها النسوان وام علاء
حاظنتها رحتله ركض .

ماما هاي شبيج ليش تلطمين وتبجين شنو اصار .رفيف بيها شي احمد وينه

شو ما اشوف اله امي كامت عليه مثل الاسد موتتني كتل حتى في بطني داست الدم مله وجهي
كومني النسوان من الكاع واسمعها تعيط وتسب
امي ابعمرها ما سابه ابويه اليوم شبعته مسبه
فتت جوه غسلولي البنات اشويه فاتت هي وام علاء للبيت
واني بس ابجي لان ماعرف ع شنو نضربت

اخذتها خاله غسلتلها وفوتتها غرفتها
رشا صبتلي غده بس مكدرت اكل جتي
ام علاء يمي

.شلونج بنتي .....هلو خاله
.عفيه خاله اشبيها امي ليش هيج متهستره وين احمد سمعتوا شي ع رفيف

.بنتي احمد طلع يدور عليج
.ليش يدور عليه

.بنتي احجيلي وين جنتي ليش بالاربعه رجعتي للبيت

.خاله والنبي وروح ابويه جنت بالخط بس تعرفين مطر والسيارات كوه تمشي الشارع انغلق بعد ماكو سير والنبي هو اني ظل بالي يم امي
.لج سكتي كل ظنها انتي انخطفتي ملخت روحها خطيه عليج انجنت تكول رهف خطفوها وراح يرجعوها الي مكطعه
.
اوووف يا امي سوده عليه خليتها تعيش يوم اسود بس والله خاله مو ذنبي واني مو وحدي جنت بالخط البنات كلها ويايه وروح بابا

اي بنتي اعرف والله بس هذا هم حق امج تخاف عليج وضعنه يخوف صار هالتسمعين الخطف والقتل
والنبي خاله حاسه بأمي وخايفه عليها اكثر من خوفها عليه والنبي

كامت ام علاء فوتتني ع امي رحت وكعت عليها ابجي وتعذر منها لان خليتها تخاف وتعيش بتوتر
بس امي كان ردها الي صدمه عمري كلها

بعد هذا اليوم امي مخلتني اداوم
لان زاد عدد خطف البنات والقتل والاغتيال صرت حبيسه البيت فقط لا طبه ولا طلعه

وبعد مرور كم شهر بدت الكراجات تنفتح شويه اشويه وبدت العالم تسافر

بس بعدها متخوفه واكو محافظات ساخنه حيل صار الانفجارات لا تعد ولا تحصى ابد

وليوم اني نايمه الصبح لان من امي تطلع هي واحمد ارجع انام لان ماعندي شي اسوي ندك بابنا
شفت الساعه ١٠ الصبح كمت شفت من شباك المطبخ ماكو احد مبين صحت منو ماكو جواب رجعت اريد افوت للغرفه رجع الجرس اندك طلعت صحت من  ماكو جواب صرت اخاف اكثر رجعت سحبت سجين وطلعت
فتحت الباب
وجان اعيط بعلو صوتي حتى من الصوت طلعوا بيت ابو علاء ع حسي
.
لج عمرررررري شلونج ابوس وحضن لج شلونج ياروحي والله مشتاقتلج موت وكلبي ميت ع شوفتج ياحبيبتي ياروحي وتبوس وتحضن لج  رفيف فوتي ياعمري فتنه جوه لج احجي وين جنتي مختفيه طول هالسنه ونص والله عبالنه متي لا حس منكم ولا خبر

.يمعوده اسكتي احجيلج كلشي بس اشويه خل اجر نفس

.اي شلونك طه اخبارك
.الحمدلله .انتوا شلونكم

.ولكم احجولي وين جنتوا كل هالوكت

.رفيف لج اسكتي اصار بينه ابسبب الامريكان صرنه مثل الدجاج المغرب الكل ابيته ومحد يطلع اله الثاني يوم
شغل ماكو العالم اتخاف تشتغل او تشتري شي تدرين بعدنه نصور صدام بالنظام وكل اشويه انكول راح يرجع ويذبح العالم

.اي والله يارفيف تعاي شوفي وضعيه بغداد متعرفين قتل مدري ثارات مدري خطف تذكرين مناف ابن ام اشهاب
.اي اشبي خطفوه ورا اسبوع جابوه  قطع وشامري بالزبل
.ياخطيه زين ليش.
يكولون عداوه
.هاي استلمي بعد
.هو احنه ليش ما اجينه البغداد بعد السلابه ملت الطرق كلها
اي سياره تطلع يسلبوها ويكتلون صاحبها.

اي ولج هسه امي تتخبل من اشوفج كل فكرها يمج والله .وكل يوم تكول اسافر وابو علاء يمنعها علمود الطريق

ولج جيبي هذا الدبدوب شسمه

.ياسر .فدوه يسوري الحلو ابو كرش هاي هالكدك وعندك كرش من تكبر شلون

.زين انتي شنو غايبه شو مرايحه للمدرسه

.لاوالله امي بطلتني اتخاف تكول انتي حلوه وخاف تنخطفين
.اي صدك والله الدنيا صارت اتخوف منج وبيج يأذيج
.بياشهر هسه انتي بالثامن
.يااااا بس ياسر اصغير
.اي عالاربعين احبلت
.
وجع وشبيكم مستعجلين
.شمدرينه صارت بعد
.
عاد شنو نوع الجنين
.مقبل طه اخذ سونار كال اليجي من الله نعمه عدنه ولد وان شالله تجي ابنيه

.ان شالله حبي اتكومين بالسلامه هسه امي من تشوف هالدب تتخبل عليه راح تاكله بعظامه خلي اكوم اسويلكم اريوك
.اي ولج احس نفسي جوعانه

وندكت الباب .تعاي تفضلي خاله
.رفيف جتي ام علاء وبناتها يسلمون عليج
.
اي رهف فوتيهم للهول .
اهلا خاله تفضلوا هاي رفيف وياكم اني اسمحولي اروح احضر ريوك الهم

.جراح بعد ما مشت رهف حيل تغيرت حياتي اني من قبل جنت ما احب البنات والنوب اجتي رهف خلتني اكرهم بالزايد ما احب حتى طاريهم
.جنت احاول الهي حالي بالشغل والمزرعه والخيل كمت اشتغل ليل ونهار
ما التقي بالبيت ابد لان من اشوف زينب اذكر رهف
جان عدنه بيتين في بغداد منعرف عنه اصار بي ما صار لان تقريبا الطرق الخارجيه البغداد انغلقت ونكطعت اخبار العالم
ارضيات بعد ماكو بس نزلت هواتف ثريا مو الكل عدها واتصالها مكلف اهواي
اتعينت ابشركه محطه كهرباء الفاو وشغلي تمام زادت مسؤليتي اكثر
هم وظيفه وهم حلال وهم عشيره مالحك احك راسي
. زينب ورقيه ازوجن بقت رباب بالبيت وخطيه زاد عليها الحمل حيل
وبعد ملحه امي عليه بالزواج ازوجت ازهار لان امي جانت اتحبها حيل واني اصلا مالي خلك سالفه العمه والجنه كلت هاي اختيار امي حتى من تحجي ما اتلومني اظل اتلوم حالها افضل
بس من يوم الي ازوجنه لليوم ما مرتاح اني
يوميه مشكله ومعارك ويه ازهار ومصار عدنه طفل راجعت ازهار اهواي اطباء ماكو سبب محدد
بس تأخير من الله مشكله ازهار حاطه رهف في بالها وكل سالفه وجابت طاريها

.ولج كافي ما مليتي من طاري البنيه جريتها من زندها وكعدتها اكعدي وسمعيني

هاي اخر مره احجي هالحجي وياج ترضين ما ترضين اطلكج وحق الله وما يرفلي جفن عليج
كافي طلعي رهف من بالج
البنيه صار سنه ونص مانعرف شي عنهم ولا شايفيهم لا كل سالفه وذكرتي اسمها

اي انه احسك تحبها
خرب شرفج وغيرتج لج بنت الكلب شلون احبها وانه ما شايفها
لج انتي مطي البعيد عن العين بعيد عن الكلب

جراح انه اريد طفل

اي هسه حكوم احصدلج ولج انتي ناويه ع موتي هو شني حصاد الطفل وتردين تحصدينه غير الله يخلقه الج
انت ماترضه تروح دكتور
اكلج تلصمين حلكج لا والعباس الصمنه انه الج لدوم
انه ماروح ولا اجي ع دكتور ..الله قاسملي يكون الي بزره هله بيها ماكو بعد احسن

ليش انت ماتريد يكون الك بزره مني كولها يبن جبار
خرب شرفج لج تره صابر ومتحمل كوه ع اعصابي 😠😠😠😠 راح اكوم اكسر راسج

والله انه مايخصني اكوم احجي وي عمي جبار وكله اريد طفل

وحق الحق ان طلعتي ورحتي لبوي وحجيتي ماتلومين غير نفسج وبس وتلحكج ورقتج وحق الزهره

رباب ..جراح جراح ..
خايبه شكو صوتج يطيح السكف

😟😟😟 زاعلتك ماحبك بعد
تعاي يالعوبه شكو هرجتي البيت هرج

وانه شكو جدتي تريدك تمر عليها هسه

بس هاي عسبالي صدام انلزم وهرجتينه
كوليلها جاي بس اسبح

هاي يبعد البيت كله واهله شلونج حبوبتي انطيني يدج احبها

هله بالذيب هله بطوايفي هله بريحه هلي

ايوب ..نحن هنا جده تره هم ولد جبار احنه

وك كوم لا اجيك بالعوجيه وكسر اظهرك
لا وعليمن هاي كايمين وخلي حبج بس الجراح هو طوايفج ام طوايف عطوبج طايرات علينه

اسكت يالاغم يالاديبس
جراح .ها حجيه محتاجه شي اجيبه الج

الجده .ليش حبوبتي يعني من اريد اشوفك وشتم عطورك  لازم اكون محتاجه شي تجيبه ليه
لا جدتي عذريني انه مشغول هالايام والمرحوم مالحك حتى اسبح ونام
حقك يايمه مسؤليتك جثيره
اي والله ياحبوبه امري انه خادم الج

فديتك انه وكل طوايفي
يذيب ماتشوف سالفه الخلفه تأخرت
جده بيد الله يجي مايطير
انه اترخص عندي موعد لازم اكوم
مرخوص اوليدي
اطلع زين مني وما كتلت احد انه توني متعارك وي الرعنه العندي علمود الخلفه والنوب الجده زادتها علي طينه
اوووووف ياكلبي
شيب بالراس يصبغونه بس شيبك شيصبغه

يتبع