البارت الثاني
ريتاج الموسوي
رحت للسطح حته أنشر ملابس سيف
رفعت راسي واجت عيني على بابا شفته نايم وشفت عليه شخص شكله يخوف بصوره موطبيعيه ضخم طويل
وشعره طويل بحيث من شفت شكله بقيت مصدومه وخايفه لا اكدر ابقه ولا اكدر امشي
احس رجليه بادت من الرعب
ماادري شلون سحلت روحي ونزلت لغرفتي بس شنو ميته من الخوف وأرجف
بقيت طول الليل ابجي وخايفه حاصره روحي بزاوية الغرفه للصبح ماشايفه النوم طلعت من غرفتي لكيت
عمتي بالمطبخ
...هاا عمه شعندج كاعده من الصبح
افنان...اني اليل كله ما نايمه
... ياا حبيبتي بس لا مريضه ليش مانايمه
...عمه اذا اريد احجيلج شي بس خايفه
جنان.تعوف البيدها وتمسح بايدها على شعر افنان..احجي عمه شكو بيج شي
..البارحه صعدت للسطح أنشر ملابس سيف وشفت
جنان..اي كملي ليش سكتي شنو شفتي
..شفت بابا وعليه وحش يخوف طويل وضخم وشعره طويل كلش يخوف
البارحه مانمت من الخوف عمه شنو هذا اني خايفه على بابا
جنان تدنك وتتحسر...عمه هذا لان ابوج يشرب وينام سكران وهذا الشي حرام يصير مو طاهر والملائكة تبتعد عنه وماتحيطه
وهذا الشي يخليه الشيطان قريب عليه يعني يصير عروس للشيطان
افنان...خايفه على بابا
...لا تخافين مابيه شي بس تعالي وياي نصعد حته تتاكدين مابيه شي
صعدنه للسطح لكيناه نايم
جنان..امير امير
امير...همممم
...اكعد الشمس كسرت عليك موزين
امير...اييي اي هسه بس شويه
شنو ما رحتي لهلج
جنان..اي هسه اروح بس كلت اسويلكم ريوك قبل لا امشي محتاج شي اسويه الك
امير...لا مااريد شي روحي لله وياج
كملت عمتي ونزلت نزلت وراها
..عمه جنان صدك راح تروحين
..اي عمه اريد اروح
افنان..ابقي عدنه بعد شكم يوم فدوه
..لا مااكدر عمه وراي بيت وجهال اذا تحسين روحج ضايجه روحي وياي
هالايام ماكو ماتجين قبل وين تضلين عدنه يومين تلاثه
افنان بيأس...بابا ما يقبل اروح يكول قبل جنتي صغيره هسه كبرتي لو تدرين شكد مشتاقه لجدي
كلما أتذكر ايام قبل اتحسر عليها شلون جان مدللني دلال فرق عن باقي أحفاده
هسه شوفته صارت بالصدف
جنان...ياعمري حته هوه دوم يسألني عليج بس تعرفين زعلان على ابوج ماايكدر يجيكم
و هوه هالايام مريض كلش ادعيله بلكي يتشافه ويرجع مثل قبل
...امين
اخذت عمتي ملابسها وراحت لأمي
...يالله خيه اسلم عليج أنه رايحه لبيتي
مريم..بعد كلبي تعبتج وياي فضلج هذا ماانساه الج
جنان..عفو عليج اخيتج انه مابينا افضال هذا واجبي
مريم..اردها الج بالافراح إن شاء الله
..ان شاء الله
باست سيف بكصته و هوه نايم وطلعت رحت وراها سديت الباب ورجعت
بابا نزل صبيتله جاي وانطيته خبز وجبن كعد ياكل
خلص سبح وطلع
مر اسبوع جدي تمرض بالزايد هوه عنده ذبحه صدريه
اخذنه بابا لبيت جدي
جنت بالمطبخ واسمع صياح عمتي وبيبي
ركضنه نشوف شكو التمو عمامي كلهم
اخذو للمستشفى بس للأسف مالحكو عليه
من جنت صغيره جنت مااعرف بابا دوم ببيت جدي اطلع وياه يشتريلي
احسه هوه ابوي وهسه فقدته صدك حسيت بفقدان الاب من توفه جدي
ضليت ابجي وعمامي هم يبجون لبسو اسود
اما بابا بوكتها كسر خاطري ابوه مات وماراضي عليه
بقت غصه بكلبه
جان يتمنه يسامحه بس الندم بالوقت الغلط والراح ما يرجع
واني دخلت بكآبه حسيت الدنيا اضلمت بعيني لان ابوي الي رباني مات
بابا من وفاة جدي لحد هسه عصبي ومايتحاجه خاف جان قبل يضربنه بالشهر مره
هسه صار يوميه
المشكله من يطلع اللشارع للدوام يصير شخص ثاني محبوب وطيب
بس من يدخل للبيت يتحول من الأنسان الي كله طيبه
إلى الأسد الشرس
الي ينهش كلمن يقتربله
فمره من المرات جانت بيبي كريمه جايه علينه
امير استوه جاي من الدوام..امي سويتيلها غدا
مريم..ليش ما تعرف امك
محرمه تاكل من بيتك ماتضوك شي
امير بأستغراب...ليش ؟ شمسويلها
مريم..بصوت عالي
تسوي نفسك ماتدري امك مانخرب حته ماي ببيتنا من وره السم وسوالف الحرام الي تسويها
الي حته ابوك مات وهوه ماراضي عليك
امير يتقرب عليها ويضربها.. لج تعلين صوتج عليه
شلون تحاجيني هيج هالايام السانج طولان
كمتي ماتحترميني إلا اادبج
افنان...جنه كاعدين يم بيبي ونسمع صوت بابا يصيح على امي
ركضنه عليهم لكيناه يضرب امي بوقتها ماحسيت على نفسي الا شامره نفسي على امي
وخواتي نفس الشي نحاول نحميها
وكانما ماصدك خبر بده يضرب بينه وحده وحده
كتله واني ابجي واصيح..بابا تره ملينه
موتنه وخلصنه من هالعذاب
امير...لا مااموتكم اريد اتونس بتعذيبكم
واشوفكم تتألمون
وبيبي ووكفت بوجهه..يمه فدوه
بنياتك راح يموتن من الطك كافي عوفهن الخاطري
امير..يمه وخري عني خليني ابرد نار كلبي
كريمه لازمه ايده...انه كدامك طكني(اضربني) وبرد نار كلبك
بعدها عاف البيت وطلع وسد الباب بكل قوته
كريمه تكوم مريم...سوده بوجهي عمه كومي انتي إلا تحاجينه
تدرين بيه مو بعقله من مات ابوه لحد هسه وهوه موش امير الأولي
تره ماينلام صعبه اعليه ابوه مات مو راضي عليه
مريم تبجي....عمه جا احنه شنو ذنبنه نتحمل نتائج اغلاطه ملينه نريد نعيش مثل العالم يوم حلو ماكو
كضيناهه مرار بمرار
...الله كريم إن شاء الله يجي يوم وينصلح وآلله انشلع كلبي ومابيه للضيم كافي اعليه العندي
عود اجيت يمكم حته اتونس ضيكتو خلكي بالزايد
مريم..اعذرينه عمه صارت بوجهج
...ولج شنهي جا انه غريبه وصارت بوجهي
يالله اروحن لبيتي احسنلي الله يعينج يبنيتي شسوين بعد اتحملي لخاطر جهالج
.............................................
افنان
مرت سنتين سيف صار عمره سنتين وماما حامل بولد
اني خلصت متوسطه
وصرت رابع اعدادي انتقلت الغير مدرسه اعداديه بس جانت بعيده عن بيتنه
رحت للمدرسه مشي واني طالعه من الباب انتبهت على ناس
استوهم مشترين البيت اليمنه جوارينه
جان ولد ينزل بالغراض من السياره عمره تقريبا بنهاية العشرين
مريت من يمه ولا شال عينه ابد ماادري شنو من احساس حسيت بيه اول ما شفته
رحت للمدرسه وانه بالي مشغول ماادري ليش صورته
مافاركت خيالي
خلص الدوام جانت الدنيا حاره كلش
البنات كلها منتضرتها خطوط الا اني ماكو
فاطمه..افنان حبيبتي اوصلج وياي بسيارتنه
افنان...لا فطوم مشكوره اني امشي
...بس بعيده عليج وحاره
...اووو يختي متعوده صار عندي عادي تأقلمت
فاطمه...شعجب ابوج مايأجراج خط
اشو انتو الحمدالله ماناقصكم عدكم خير من الله
افنان...بلكي من ارجع احاجي
بابا واكيد راح يأجرلي
...ان شاء الله حبي يالله مع السلامه
افنان....الله وياج
رجعت امشي حاره وجنطتي سامعه اسحلها وساعه اشيلها
الشارع فارغ الضهر الناس كلها نايمه شويه وطبكت بصفي سياره
ضليت امشي بسرعه خفت صار قريب عليه ونزل الجامه
باوعت عليه مرتبكه طلع عمي مازن
مازن...تعالي اصعدي
صعدت باوعلي وعقد حواجبه...شسوين هنا الوحدج
افنان..عمي استوني حليت من المدرسه
مازن...وليش مدرستج ذيج شبيها
..مابيها اعداديه واني خلصت متوسطه وانقلت لهنا
مازن...وتمشين الضهاري الوحدج
افنان...اي عمي شكو بيها وبعدين كلت راح احجي ويا بابا واخليه يأجرلي خط
مازن يباوع ع الشارع وعاقد حواجبه...يصير خير
وصلنه للبيت صفط سيارته بالباب ونزلنه
اول ما دخلت كال صيحي ابوج
...عمي اتفضل اكعد بالصاله واصيحه
اجت امي
مريم...هلا بيك خويه مازن شلونك
مازن...الحمدالله انتي شلونج
...بخير الله يسلمك
شويه واجه بابا سلم عليه وكعد
اني رحت للمطبخ اشرب مي ماادري شيريد من بابا
مازن..من شوكت افنان ادوام بأعدادية......
امير...السنه هاي داومت صارلها شهرين
ليش شبيها
مازن ...لا مابيها شي بس بتك جبيره وحلوه وعليها العين تمشي الضهر الوحدها ماتخاف عليها
امير..
مازن شبيك كلها البنات اداوم وياها
مازن...وانته شعجب لهسه مخليها بالمدرسه ومامبطلها
امير...تحجي صدك انته
ابطلها شنو افنان تحب المدرسه وحلمها تصير دكتوره
وانه راح اخليها تحقق بالحلم
مازن...بنتك مو وحد عن بناتنه كلها مبطله وكاعده بالبيت شناقصها
امير...مازن رجاءا لا تقارن بناتكم ببناتي انتم بطلتونهن هذا شي راجعلكم اما انه
لا عندي بس افنان تدرس وراح اخليها تحقق حلمها
مازن..امير لا تنسه انه اخوك الجبير والي اكلك عليه يصير افتهمت
امير.. لا اشوف ماافتهمت مالك حق تدخل بناتي وانه عدل شوكت مامتت ذيج الساعه سوي التريده
مازن يكوم...امير فكر عدل لو دراسة افنان لو انه وانته اختار
طلع زعلان وعيونه تريد تطلع من العصبيه
جنت بالمطبخ سمعت كلامه شركت باالمي نزلت دمعتي
لا ياربي كلشي ولا دراستي
اموت من دونها شفت عمي طلع واجيت البابا لكيته كاعد ومخلي ايده على كصته
اول ما شفته بجيت
باوع عليه وكال...لاتبجين ماحد يكدر يبطلج وانه موجود حضنته وابجي
...لاتبجين وابوج عدل
كلام بابا خلاني احس بالاطمئنان اول مره احس بحنانه
لثاني يوم مارحت للمدرسه بقيت بالبيت كلت اخذ اجازه لمن تهدء الاوضاع شويه
اندك الباب رحت فتحته طلعت بيبي كريمه وجايبها مازن
وصلها وحرك سيارته بسرعه بدون حته مايسلم
حضنتها بوستها
أموت على بيبي لأن هيه الي ربتنه واحنه اصغار جنت متعلقه بيها كلش
من اشوفها جني شايفه العافيه
حاوطتها بأيديه ودخلتها واني مبتسمه على شكلها
جانت بيضه ووجهه مميز بالوشم الأخضر القديم
الي صاير على حوجبها
ونقاط تحاوط شفايفها وايدها الي تمليها التجاعيد لازمه بيها العكازه
والشراين الخضر بارزه بوضوح
امي شافتها...هلا بيج عمه باستها
زارتنه البركه صدك جذب نورتي بيتج
كريمه...انتي الخير والبركه منور بأهله
...بعد كلبي شلونج عافيتج شلونها
كريمه..والله شكلج العافيه موش الاوليه والعمر ماضل بيه بكثر ماراح
...لا عمه الله يطول بعمرج ويخليج خيمه علينه
سيف كام يبجي واخذته امي للحمام
بيبي باوعت عليه وكالت ...بيبي افنان انه جيتي اليوم علمودج
جاوبتها مستغربه ...علمودي ليش
كريمه...انتي تعرفين عمامج وعاداتهم وتقاليدهم
وعدهم اهم شي سمعتهم بين الناس
ومايردون احد يمسهم بحجايه بطلو بناتهم كلهن
ونتي ماتفرقين عنهن بشي يبعد عيني
وعمج مازن مايريدج ادرسين يخاف عليج والناس تحجي انتي تعرفين مكانتهم بالمجتمع شنو
افنان...بيبي ابوس ايدج إلا دراستي مااكدر اعوفها
اطلبي مني اي شي الا مدرستي فدوه
كريمه...وليداتي ربيتهم بدموع عيني ومااريدهم يتخاربون ويصير زعل بينهم
اذا تعاركو اموت انه
...اسم الله عليج بيبي
...وهذا الشي بيدج
اول مره اطلب منج طلب لاترديني انتي تعرفين معزتج عندي مايحتاج اكلج بيها
ربيتج اعلى كلبي اذا الي خاطر عندج لا ترديني
باست ايدي نزلت ادموعي مصدومه
ماعرفت شجاوبها بوقتها ضلت ادموعي تنزل سكته
عفتها وصعدت فوك
لاكتني امي سالتني شبيج ماجاوبتها واصلا ماعرفت شكالتلي
ضليت للمغرب حابسه روحي بالغرفه وابجي
مااكدر محتاره شختار
لو بيبي الي هيه امي الثانيه الي اشوف الدنيا بعيونها
واضحي ب حلمي ودراستي لو أضحي بيبي وعمامي لان راح يزاعلون بابا لازم
اضحي بواحد من الثنين وثنينهن صعبات
آخر شي مسحت ادموعي
وقررت انزل وواجه الكل بقراري الي لازم يصير
نزلت جانت بيبي رايحه لبيتها وبابا وخواتي وامي كاعدين بالصاله
وكفت كبال بابا رفع راسه وكال...هااا افنان شبيج
افنان...بابا اني قررت اعوف المدرسه
فتح عيونه ع وسعهن وكام
يتبع.....