مساء الخير ع اجمل متابعين اتمنى لكم قراءه ممتعه
🌹🦋 البارت 40 🦋🌹
🌹🦋 بين الفقر والطغيان 🦋🌹
🌹🦋 للكاتبه رونق 🦋🌹
وجان انصدم هي ويا يسولفون ومندمجين ويضحكون
اكيد اكو غلط بالموضوع
اليوم لازم انتظر لمن يروح
واحجي وياها
وره شويه دخلت للمحاضره وهو راح
بقيت كاعد لمن طلعت
انصدمت من شافتني
رادت تروح كبل
كتلها اكعدي لا اسحلج سحل ومحمد
كعدت بدون سلام
شعنده هذا النذل يمج
هذا الشي ميخصك
ابن عمو وجاي يحجي ويايه بموضوع
انت شدخلك بالنص
لتحاولين تستفزيني وتهيجين الوحش الي بداخلي
حيدر للمره الالف اكلك لاتدخل بحياتي
افهم من كلامج صدك موافقه ع الزواج من ابن عمج السكط
لو يطيح بيدي اوافق عليه واني مغمضه بس كون اخلص منك
احس تدخلك بيه زاد عن اللزوم
لعد شنو العايقج متتزوجينه
ابني الوحيد الي واكف بعيني وعايقني
عادي يبقى يمي شنو المانع
اذا نمتي بحضن حبيب الكلب
مو مهم ابنج
حيدر احترم نفسك واحجي عدل
وياريت اطلكني وانساني لان تعبت منك هواي
واجه الوقت الي ارتاح بي منك
اتمنى تطلكني لان انت انسان اناني وياريت باسرع وقت
هذا اخر كلام عندج
اي اخر كلام
يعني المحادثه صحيحه طلعت
راح يجرالج الي تردي
من عيوني
باجر ورقة طلاكج راح توصلج
واحب اكلج
محد راح يخسر غيرج انت
عفتها ورحت بدون منطيها مجال
الظاهر موافقه عليه
هاي هي
رجعت وجنت حيل معصب
كمل الدوام ورجعت
لليل خابرت عمي يجهزلي نظوري
فعلا رحت اخذته
ثاني يوم رحت للمحكمه وطلكتها غيابي
عندي عرف خلال يومين كملت كلش
خبرت اهلها كتلهم تكدر تتزوج باي وقت
خلي تاخذ راحتها
قررت نظوري اخلي يمي
بعد مااخلي يروح يمها لو شيصير
خبرت اهلي وكتلهم ع قراري
بالبدايه اعترضوا كلهم
بس من عرفوا تريد تتزوج طاوعوني
زينب : اتخبلت منو الي يدز صوري لحيدر بيوم الحفله
روحي طلعت ولا فرحت لان جنت عايشه بقلق
لليل سوينه عشه
اتعشينه وخلصنا وصعدنه حتى ياخذن البنات راحتهن
فاطمه وزهراء اثنينهن بشهر الثامن
فتحنه الديجي ونصينه صوته
كلت هسه محد يصورنه
خلي اركص وافرح بابني
جنت لابسه تراك
بدينه نركص وجانت الاجواء تخبل
بس هم راسلني وازعجني
بعدها نرفزني بالحجي وانطيته حضر
هو حجيه صحيح
يكول اني ارهم مااخابرج
بس انت لا
صدك دائما احتاج اسال ع جهالي
ويجبرني اراسله
بس اكيد مو حبا بي
تصرفاته ويايه ابد متعجبني
شايف نفسه شوفه
عباله ميته علي
اتصل بنور ورفضت احجي ويا
دزلي رساله من فاطمه
قريتها وغلست
كلت للبنات فدوه منو الي تصورني وادز الصور لحيدر
بقن صافنات كالن تحجين صدك
يامخبله تسويها
ضحكت مور كالت اني طكيت الصور
وكلي بابا ابقيج يم امج
لزمتها ردت اخنكها
لج انت شلون هيج تسوين
هو كلي
يعني واذا هو كلج انت متفتهمين
كامت تبجي اسفه ماما والله مو قصدي
الصبح طهروا حبيبي واسمعه يبجي
واني ابجي ويا
احس كلبي راح يوكف
نقطة ضعفي ابني
كملوا ودخلت بس شابكته وابجي
ويكولي اوا
روحي راحت كلها
انتبهت ع حيدر لابس نفس دشداشة نظوري
ابيناتنه الحجي طالع يخبش 🙈👌👌👌
حيل لايكتله الدشداشه
هاي اول مره اشوفه يلبس دشداشه
بعدها حذرني ادخل يم الرياجيل
ماادري شنو الفكره الي ماخذها عليه بالضبط
بدت الناس تجي ع الغده
واحنه التهينه نجهز
البنات ويانه
بس زهراء وفاطمه خطيه ميكدرن
اتغدوا وراحوا الاغلبيه
بقوا بس مصطفى وعلي
صاحني مصطفى كلي ابنج يريدج
دخلت يمهم اتجاهلته لحيدر ولاكانو موجود
اتعمدت هيج اسوي
اسولف واضحك وياهم الصراحه ع اعصابي
بس عناد بي
نام حبيبي وهو هم نام
عفتهم وطلعت
وره شويه راحوا
محد بقه بس البنات
زهراء رجعت وي امير
وفاطمه رجعت وي عمو
بقن بس بنين وساره وخاله
وره شويه سمعته يبجي
كلي اريد للحمام
اخذته ودخلته وجان يرفس من الالم
احس روحي كلها راحت
ابجي ويا
كمل غسلتله ورجعته لفراشه
بس يبجي
كعد حيدر
كله كوم اخذك اشتريلك
وينه وين المشتره اخاف علي ينلجم
بس هذا ولاكانو
بس يصيح عليه
اخذه وراح
وبقيت عايشه بقلق
هسه لو كايلي اروح وياهم
جان رحت ع مود مينلجم
عمو اخذ خاله والبنات وراحوا
اتاخروا هسه اني غبيه لو مامنطيته حضر جان خابرت واطمانيت علي
وره فتره رجعه ومشتريلهم هواي اشياء
جايبله سكوتر وحاصرنه يريد يصعد بيها
بس جبيره ميكدر
كتله بس طيب واعلمك عليها
نزعته الدشداشه وخليته بس بفانيلا
كتله خل نلعب طوبه
سكت لعبنه شويه وكال تعبت
رقيه ونور يلعبن بالسكوتر وهذا ميقبل
اخذتها منهن وضميتها يله سكت
طبعا ابد مااكل هواي اتوسلت بي بس مقبل
اجه الليل وريته مااجه
بقه بس يبجي مااعرفه شيريد
اخر شي كال اريد بابا
طبعا حيل خوفني تعلقه بحيدر
ابد ميذكرني اذا راح يمهم
الكل نايم واني مخليته يبجي واني ابجي ويا
بعدين كلت خطيه خلي اتصل بحيدر
فتحت الحضر
دكيت علي لكيته هو هم حاضرني
جبت موبايل نور
هواي دكيت علي بس ماكو جواب
اكيد ملتهي وي حنان وينه وين ابنه
هواي لحيت علي
اخر شي كام ينطيني رفض
حيل ضجت منه
هسه دفكر كول يجوز متخربط نظوري
بس الظاهر ولا همه امره لحبيبي
نزلت لبابا كعدته خطيه اتخبل
كتله هذا كلبه وكف يريد ابو
خابره خل يجي
اتصل بي بابا باللحضه جاوب
كال راح يجي
حيل ضجت يعني مجاوبني عباله ميته علي واريد اطلب السماح مثلا
وره دقايق معدوده اجه
راد ياخذه ويا بس رفض بابا
بعدين بقه هنا وفرشت اله ولنظوري
نظوري كلي جوعان فرحت
رحت سويتله اكل وشبع ونام بحضن ابو
ابد مااسيطر بعد ع نظوري
حيل متعلق بحيدر
بقيت للصبح منمت اخاف يكعد ويبجي عليه
بس ولاكانو نايم بحضن ابو وساكت
حضرت لحيدر ريوك كلت عيب يطلع بدون ريوك
سويت اله بالخلاط حليب ومكسرات وخليت نكهة توفي
اتريك وطلع
جهزت ملابسه ومن رجع من الدوام اخذه ويا
كلبي نار علي
بس فد واحد متعلق بابو ويبجي علي واني ولا يذكرني
كمت اخابر خاله واطمان علي
بقوا 3 ايام ورجعوهم
من يرجع يوم كامل متنحس ويبجي ع ابو
بدت الامتحانات الابتدائيه
واجتي العطله
بعدها بدت امتحانات رقيه
اخذهم بقاهم اسبوع كامل
يوميه اخابر خاله واطمان عليهم
ونور كل نص ساعه اخابرها
علي بده هواي يضايقني
كلت لبابا حتى يوكفه عند حده
بس اتفاجات من كلي بابا
خطبوج مني واني موافق
شنو موافق بابا
اني مااتزوج ابد ولا اتنازل عن ابني ابد
وانت تعرف كلش زين شنو شرط حيدر
بس ميجوز هيج تبقين بابا
يعني طبه وطلعه بحجة ابنه
وحتى اذا معنده شي الولد
تعرفين الناس مترحم
وراح يشوهون سمعتنه
اشو نظوري متعلق بي ومينام اله بحضنه
علويش بعد مدمره حياتج
ابن عمج علي يحبج ويريدج
ويكول شنو التريده اني حاضر
حتى الجامعه ماعنده مانع تكملين
لتتعلقين بامل ضعيف
حيدر لو يحبج ويريدج جان مطلكج
وجان خلاج تكملين دراستج
مستحيل يرجعج اله تتخلين عن جامعتج
وانت يابنتي جبيره وتفتهمين
اني وامج مدايمين الج
لازم نامن عليجن يله نرتاح
لتخلينه نشيل همج بالدنيه والاخره
بابا حجيك كله صحيح
بس اني ماافكر بزواج وداعت نظوري
لا الي امل بحيدر ولا غيره
كل الي اريده ابقى هيج
مااريد انحكم
وماالي نفس بكل رجال
اتمنى تفهمني بابا
واذا متضايق من وجودي كلي حتى اني اشوفلي حل
لج بابا شتحجين انت
انت بنتي الغاليه اذا مشالتج الكاع تشيلج عيوني الاثنين
بس والله يابنتي لمصلحتج هيج احجي
ياريت تفكرين بالموضوع
واذا تحبيني وتعزيني فكري بالموضوع
واذا تردين ترجعين لحيدر ماعندي مانع والله
اهم شي نسكت حجي الناس الي ميرحم
فكري زين وبعدين جاوبيني
مستحيل افكر ارجع لحيدر اله اذا هو طلب مني
واهم شي يخليني اكمل دراستي
وبنفس الوقت مااكدر اتقبل واحد ثاني مستحيل
اني خليت مروان وحيدر اثنينهم يلمسوني ع اعصابي والله
مو يوميه واحد
المفروض شخص واحد يلمسني مستحيل ثاني
بس اني جنت مجبوره
بقيت افكر حسبه تاخذني وحسبه تاخذني
حجي بابا كله صحيح
الناس الها الظاهر
وعلاقتنه قوت بين العائلتين
الناس متعرف المضمون الها بس الظاهر
اني حتى اذا اجه ابالي ارتبط بشخص وهذا الاحتمال يجوز 1%
ماافكر بعلي لو اموت
ابد ماارتاحله ولا اطيقه
اجوي عمو ابو علي وعلي وياهم
كالو لازم نذبحها ع القبله
لازم لو يطلكج لو يرجعج
وبالحالتين راح نوافق
بس اذا رفض يرجعج لازم توافقين ع علي
سكتت محجيت كلت بلكي يكول ارجعها وارجع
مو مهم دراستي يطبها مرض
اهم شي ابقى يم جهالي وارجعله
اجوي وحجوا وره فتره شفته طلع
اجه علي
كال ها شكلنه وانت متصدكين
يكول لو اموت ماارجعها
مااحبها ولا اريدها وحتى طلاك راح اطلكها
بس هي تطلب مني
وامني ابنج ميكدر ياخذه
اكو محكمه واوكلج اكبر محامي
واكيد نكسبها للقضيه
وابنج راح اخلي بعيوني
حيل ضجت وانقهرت
يعني اتخله عني بسهوله
مدامه ميريدني اني هم مااريده
لازم اخلي كرامتي فوك كلشي
خل يطلكني يطبه مرض
ثاني يوم اجتي ام علي واخته
بقينه نسولف شويه
وطلبت مني اخته جهازي كالت اخابر بي بابا وارجعه الج
اخذته شويه ورجعته
بس ثار انتباهي ماكو رقم مسجل بالسجل
سالتها كالت لا ردت اخابر بس هو بابا خابرني ع خطي
مبقت ابالي ابد
ثاني يوم داومت وجان اشوف علي كبالي
فور دمي يعني لازم يوميه يجي ولازم يوميه يترزل
بقينه نحجي وكتله علي اتمنى تفهمني زواج ماازوج لو شيصير
لاانت ولا غيرك
اتمنى تفهمني
اني مو سلعه ويوميه تنباع
اني مكتفيه بابني وبس
وياريت بعد متزعجني
وثق واعتقد بس افكر بالزواج
ماافكر اله بيك
كال هاي هي راح ابقى ع امل توافقين بيوم
بس وعديني وعد متتزوجين غيري اذا فكرتي تزوجين
كتله وعد مني مااتزوج غيرك اذا نويت عود
وهو اصلا اني لو اموت ماافكر بغير حيدر
كلي ومراح ازعجج واجي للجامعه بعد
اتشكرت منه واترخصت رحت للمحاضره
طلعت وجان اشوف حيدر كبالي
الصراحه اتفاجأت
بس حيل ضايجه منه من موقفه اولت البارحه من رفضني كدام الكل
ردت اروح بس جبرني اكعد
حسيت بي يدخل بيه اكثر من اللازم
هو اناني بمعنى الكلمه
دائما يفكر بنفسه ابد مفكر بيوم بيه
من حركت كلبي طلبت الطلاك كلت لهنا وكافي
كرامتي فوك كلشي
عافني وطلع
ثاني يوم نسيتها للسالفه
اخذ نظوري جهزته مثل كل مره
وره يومين اجتي ورقة طلاكي من المحكمه
وجانت صدمه الي
حيل انقهرت وضجت
كلي بابا يكول خل تاخذ راحتها
باي وقت يعجبها خل تتزوج
زين بابا وابني
اسمعيني زينب
لهنا وكافي
احفظي كرامتج واسكتي
ابنه يبقه عنده وانت شوفي حياتج
بعدج صغيره والحياة طويله كدامج
بابا اموت والله بدون ابني
الله يخليك خل يجيبه يمي
حتلو اسبوع يمه واسبوع يمي هم اقبل
بعدين نتفاهم هسه خل نشوف هو شناوي يسوي
يبقي يمه لو يجيبه الج
بس خل يكون بعلمج اذا عرفت بيج متصله بي مراح اسامحج ابد
فكري بدوامج وركزيي مبقه شي للامتحانات
مو تضيعين تعبج وخسائرنه هيج
ولتنسين انت وراج شماته
خلي هسه ابنج منا لمن تخلصين امتحاناتج
اني اتخبلت شلون راح افاركه لابني
اموت والله بدونه
مااريد اتزوج ابد
والله لو قابل يرجعني ارجع ومستعده اضحي بكلشي
بس هو رفضني كدام اهلي ومقبل يرجعني
اتندمت من خليته يطلكني
هسه لو مامداومه يمكن عايشه حالي حال البشر
ياربي شاسوي
المشكله منطيني حضر شاسوي
كلت خلي اخابر ع نور
دكيت لكيت الجهاز مغلق
راسلت ع الفايبر هم ماكو اتصال
هو كلي راح تخسرين واندمج
فعلا خسرت كلشي بلحضة غباء مني
بقيت بقلق ياربي شاسوي
لليل خابرت ع خاله
جاوبتني وطمنتني عليهم
بس حسيت ع اعصابها تحجي ويايه
ياربي شاسوي
صار اسبوع وماكو خبر منهم
كال بابا ابد منخابره ولا نبين ضعفنه امامه
بابا ياضعف اني كاعد اموت
تحجي صدك
صار 10 ايام وماكو
عرفته بعد مناوي يدزه الي
لان هو كلي بيوم التطلبين طلاك اطلكج
بس نظوري اخذه منج
اني مشفت واحد مثله ينفذ كلامه ووعده لو شيصير ميخلف بي
وحجايته وحده متصير اثنين
بدت امتحاناتي واني بين المركزه وبين ال لا
بس كلت خطيه بابا هواي خسر عليه
ملازم اضيع خسايره وتعبه هيج
ذبيت نفسي ع القرايه
اتمنى اسمع صوته لابني
كل مااخابر خاله
لو تكلي نايم لو تكلي طالع وي ابو
لو تتحجج باي شي
احس كلبي راح يوكف
ياربي شاسوي
ساعدني ياربي
خلصت الامتحانات بطلاع الروح
وتبارك امتحنت
وصلت حدها وياي بعد مااتحمل
والله الليل كله ماانامه بس افكر بي
اشتريت خط جديد
واتصلت بي
رفع خط
بس سمع صوتي طبكه بوجهي
دزيتله رساله فدوه بس اريد اسمع صوته لابني
والله كلبي راح يوكف علي
لحضات وانطاني حضر
كمت بس 😭😭😭😭😭
رحت لبابا
فدوه بابا روح جيبه لابني
والنبي انتحر اذا ماجبتوا
كلبي راح يوكف علي والله
كال راح اخابره واشوف
دك علي ميجاوب ينطي رفض
اتخبلت
كتله خابر ع عمو
صدك خابره وكله يابه ميصير هيج تسون
البنيه راح تموت ع فراك ابنها
خلي اسبوع يمكم واسبوع يمها
حرام عليه حيدر هيج يسوي
كله والله ياابو سيف كاعد نلح علي الله شاهد
بس هو رافض ميقبل
ويكول احنه متفقين ع هذا الشي
كتله بس يوم واحد خل تشوفه وارجعه بيدي
كله الله كريم
رحت صليت ودعيت كون اشوفه لابني
والله راح اموت
حتى نوره حيل مشتاقتلها والله
ياربي شضاملي بعد القدر
جبت العمر كله قهر بقهر
حيدر : جبت نظوري لهنا وقررت حلم تشوفه بعد
راح امحيها من وجودي وراح اطلعها من كلبي
اني طبعي صعب
مااحب انطي فرصه ثانيه ابد
اله اخليها تبجي دم وتتندم والله
صارت سلوتي بالشرب
بس ابد مااسكر
انيم نظوري ونوره يمي
ووصيت حنان عليهم كتلها والله العظيم وهذا قسم عليه
اذا اذيتي واحد منهم راح اطلكج بدون تردد
اريدج تعتنين بيهم
واي شي تردينه اني حاضر
تردين اطلعج تردين اجيبلج سياره بكيفك
كالت من عيوني تدلل اخليهم بعيوني الاثنين
اصيرلهم ام واب
جهاز نور قفلته
واكدت ع امي متخليها تحجي وياهم ابد
كتلها اكلب الدنيه اذا عرفت حاجيه وياهم
كمت من يتصل عليه ابوها انطي رفض
ماالي خلك احجي وي واحد منهم
اخاف انحرج امامه واني حيل احترمه
يوميه ماانام اذا مااسمع نور الزين
ياريت الكلب ورقه 👇
دمرتني زينب دمار ليل نهار افكر بيها
اتخبل من اتصورها وي واحد غيري
وخاصه هذا الحقير ابن عمها
افور دم
ياربي هسه يجوز انخطبت
ويجوز لزم ايدها
ويجوز شاف شعرها
نقطة ضعفي شعرها
ردت اتخبل اله شويه
اني الغبي الي ضيعتها من ايدي
هسه لو دايس ع كرامتي
ومتنازل ومخليها تكمل
حياتي صارت فاهيه بلا معنى
زوجة امير ولدة بنيه
وفاطمه همين ولدت بنيه
ماكو فرق بينهن ايام بس
فاطمه اجت يمنه وزهراء عند اهلها
امي التهت وي فاطمه
بدوا ياذوني حيل نور ونظوري
يردون امهم
نور دمرتني دمار حتى ضرب كمت اضربها
رجعت لعنادها قبل
ماالها علاقه باخوها
مكابله الايباد 24 ساعه وحتى نومها قل
اكل متاكل بس حلويات وبخبال
كسرته الايباد ومفاد بيها
حيل تعاند كامت
ادري بيها هيج تسوي حتى ارجعها لزينب
بس هاي الفتره صرت اعصاب
شبعتها كتل
كامت تنام يم امي
ومتراويني وجها ابد
يمكن باليومين زين اذا لمحتها مره
ومن اجي اريد اشوفها تغطي وجها ومتحجي ولا كلمه
اما نظوري حبيبي
دومه يكلي ماما وين
كتله مريضه بيها اوا
اخذه اطلعه بس ميفيد بي
اشوفه تغير وضعف
بده يتحسس من بنت فاطمه
يريد بس يضربها وباي شي ميهمه
حسيت بامي تعبت ويا هواي خطيه
طبعهم كله تغير
جانوا هادئين بشكل هسه العكس صار
كلت يتعودون فتره وينسون
اتصلت بيه من رقم غريب واتوقعتها هي
اتوسلت بيه بس ولا همني
انطيتها حضر
اليوم اجه ابويه وحجه وياي ع مود نظوري
كال خطيه امه متخبله علي
ميصير هيج تسوي بيها
من حقها تشوفه خطيه
لو تموت مااودي الها
اله اخليها حسره بكلبها
لك يابه ميصير هيج والله حرام عليك
تكسر الخاطر
تكول حتى لو بس يوم
مستحيل اخليها تلمحه
ايس مني وعافني وطلع
والله يزينب اذا مااخليج تتندمين اني مو حيدر
لليل اتعشيت يمهم
حجت ويايه امي
لك يوم ماتدري بكلب الوالده
خطيه الله اليعلم شصاير بيها
لو تشوفها من تخابرني بس تبجي وتتوسل
والله يايمه حرام عليك
اني والده وماره بهيج شعور
دزه الها بس يوم واحد مراح تخسر شي
سويها لاالله
رفضت رفض نهائي
خل تولي لازم تدفع الثمن غالي
رحت اريد انام
اجاني اشعار ع الفايبر
فتحته وجانت منها هم رقم غريب
اروح فدوه الك بس خليني اشوفه والله راح اموت من دونه
بس يوم واحد لا بس ساعه وحده تكفي
الله عليك بروح مروان بداعت خاله بداعت عمو بداعت نور بداعت نظوري اذا صدك تحبه وتكول ابني
خليني اشوفه والنبي مااتحمل بعد الله يخليك
بقيت بحيره مااعرف ادزه الها لو لا
اخاف ادزه وهو يتعود ويجلب بيها
واني كوه نسيته امه
وهي هم من حقها تشوفه
قررت ادزه الصبح من اروح للدوام
ومن ارجع ارجعه
مجاوبتها
انطيت الرقم حضر
ثاني يوم دزيته من الصبح اخذته نايم خطيه
وخبرت ابوها اجي الظهر اخذه
الله يخليك ابني خلي بس ليله وحده يمها
راح تموت بدونه والنبي
لا عمي اعذرني مااكدر
لك يابه شبيك صاير قاسي
والله اذا تشوف حالتها
خطيه تكسر الخاطر حالتها لتسر لاعدو ولا صديق
والنبي تبجي ليل نهار
استحيت منه بس ع اعصابي وافقت
كتله خلي لباجر الظهر من اجي من الدوام اخذه
الله يرضه عليك ابني
رحت للدوام وافكر
هل ياترى قراري جان صحيح من طلكتها
لو لا
هل هي السبب الي وصلنه لهاي المرحله لو اني
مااعرف السبب وين
ع اعصابي فاركته حيل اتعلقت بي
رجعت لكيت نور مماكله شي وبس تبجي
تريد تروح يمها
بس لو تموت مااوديها
هي الابنها تخلت عنه ع مود تتزوج
شلون بعد نور
اكيد متريدهم
ثاني يوم رجعته ويايه
وجان يبجي
يكول اريد ابقى يم ماما
حبيبي ماما مريضه
اني اخذك اشتريلك موطا
ماما هم اشترتلي موطا بالليل
منو اخذكم
بس اني وماما وخاله كوكه
رقيه يصيحلها كوكه
وكت يخلي زينب تطلع بالليل بوحدها
يومين شلع كلبي ع امه بعدها سكت
نور صايره متنطاق ابد
ولاتحجي ويايه ابد ولا اشوفها اله صدفه
تقريبا صارلي شهرين من طلكتها لزينب
اليوم امي راحت وي فاطمه لبيت عيالها
توديها وكالت ابقى لليل وارجع
خليت نور تنام يمنه غصبا ماعليها
رحت للدوام وصدفه صار عندي مجال او بالاحرى كلبي نغزني
رجعت تقريبا ب11 للبيت
محد بالبيت بس حنان والجهال
وجان اسمع صوت نظوري ونور يبجون ويصيحون
رحت اركض للبيت
وجان انصدم بحنان حابستهم بالغرفه وتضرب بيهم بالصونده
ولازمه السجينه بيدها وتخوف بيهم
صحت صوت رجيت البيت رج
لج حنان هاي شكاعد تسوين بنت الكلب
هي انصدمت من شافتني
اجوي عليه يركضون ذبوا نفسهم عليه
كالت ردت اخوفهم لان يبجون ع امهم
اخذت الصونده والسجينه منها
كلت لنور اخذي اخوج واطلعي
قفلت الباب
اني شكتلج قبل بساع
اذا اذيتهم شراح اسوي بيج
والله مضاربتهم بس اخوف بيهم
خبلوني بس يبجون ع امهم
وامهم عافتهم وراحت نامت بحضن حبيبها
بديت اضرب بيها بالصونده بكل مكان بجسمها لمن خليتها تنتهي
اخذتها سحل من شعرها ولبستها العبايه
ورحت كبل لاهلها
الله يخليك بس خل نتفاهم
فدوه اروحلك بعد مااعيدها والله
حاسبتهم مثل جهالي الله شاهد
معتنيه بيهم وهيج تاليتها تطردني
اني ولا كانو تحجي
هواي اتحملتج وهواي انطيتج فرص
واني بطبيعتي ماانطي فرصه ثانيه ابد
وانت ولا كانو
فدوه اروحلك اتانه لتستعجل
وصلنه لاهلها واني افور دم
هاكم بنتكم
وانت طالق طالق طالق
رادوا يفتهمون السالفه شنو
كتلهم هي تحجيلكم الي صار
نسيت محد بالبيت
عفتهم بوحدهم
رجعت اسوق سريع مااشوف دربي
ردت اسوي حادث بس الله ستر
رجعت للبيت
دخلت صحت نور
اجتي تبجي وتركض
اباوع لوجها كله دم ملابسها همين
اتخبلت
شكو شبيج
بابا تعال لنظوري بساع
رحت اركض وجان اشوفه .......
توقعاتكم حبايب شبيهم نور ونظوري ؟؟؟؟؟
شراح تكون ردة فعل حيدر اذا متاذين ؟؟؟؟؟
زينب اذا عرفت بنظوري شراح تسوي ؟؟؟؟؟
رحمه لاهلكم لحد يطلب بارت مفاجئ
والقران كوه اكتب تعرفون تحضيرات العيد شتخلي بينه
والنبي لحد الان مريضه وع اعصابي اكتب مااريد اقصر وياكم
اتمنى تقدرون ظروفي
تحياتي للجميع 😘😘😘